നിന് തിരുമുറ്റത്തൊരുവട്ടംകൂടി ഞങ്ങള് ...
കൊച്ചി: തണല്വിരിച്ച പച്ചമരങ്ങളെക്കാള് തണുപ്പു പകരുന്ന ഓര്മകളാണ് മഹാരാജാസ് മുറ്റത്ത് ഒത്തുചേര്ന്ന പൂര്വവിദ്യാര്ഥികള് പങ്കിട്ടത്. അനുരാഗത്തിന്റെ ആര്ദ്രതയും വിപ്ലവത്തിന്റെ ദീപ്തിയും ഒത്തിണങ്ങിയ ഓര്മകളുടെ കുടമാറ്റത്തിന് ഹരിശ്രീകുറിച്ചത് എം കെ രവീന്ദ്രന് എന്ന കേന്ദ്രമന്ത്രി വയലാര് രവിയാണ്. ജീവിതത്തിന്റെ ഭാഗമായ മഹാരാജാസില് ജീവന്റെ ഭാഗമായ മേഴ്സി ഇല്ലാതെ ഏകനായി വരേണ്ടിവന്നല്ലോ എന്നു പറഞ്ഞപ്പോള് പഴയ തീപ്പൊരിനേതാവിന്റെ ശബ്ദമിടറി. എന്നും രാവിലെ 9.30ന് ഹിസ്റ്ററി ബ്ലോക്കിന്റെ പൊക്കത്തില്നിന്നു നോക്കുമ്പോള് രണ്ട് കന്യാസ്ത്രീകളുടെ മധ്യത്തില് നടന്നുവരുന്ന നല്ല കണ്ണുകളുള്ള, ധാരാളം മുടിയുള്ള മേഴ്സി എന്ന മരിയ ഫ്രാന്സിസ് കട്ടിക്കാരനെക്കുറിച്ചു പറഞ്ഞ രവിയുടെ വാക്കുകള് കാവ്യമനോഹരമായിരുന്നു. ഒടുവില് മേഴ്സിയുടെ ബിഎസ്സി പരീക്ഷ കഴിഞ്ഞപ്പോള് ബോട്ടണി ക്ലാസിന്റെ മുന്നിലെ വരാന്തയില്നിന്ന് "മേഴ്സി.. നമ്മുക്ക് വിവാഹംകഴിച്ചാലോ?" എന്നു ചോദിച്ചതും "സമ്മതം" എന്ന അര്ഥത്തില് മേഴ്സി മൂളിയതും ഓര്മിച്ച് ആ മൂളല് നല്കിയ സന്തോഷത്തോളം വലിയ സന്തോഷം എന്റെ ജീവിതത്തിലുണ്ടായില്ലെന്നും രവി കൂട്ടിച്ചേര്ത്തു.
രാഷ്ട്രീയ പാഠശാലയാണ് മഹാരാജാസെന്ന് ഡോ. ടി എം തോമസ് ഐസക് പറഞ്ഞു. "മഹാരാജാസില് ബിഎയ്ക്ക് കാല് കുത്തിയപ്പോള് വേണമെങ്കില് എന്നെ ക്രിസ്ത്യന് സോഷ്യലിസ്റ്റ് എന്നു വിളിക്കാമായിരുന്നു. പക്ഷേ, മഹാരാജാസില്നിന്ന് പടിയിറങ്ങിയ ഞാന് അടിയുറച്ച കമ്യൂണിസ്റ്റ് പ്രവര്ത്തകനും മാര്ക്സിസ്റ്റ് ചിന്താപദ്ധതിയില് അവഗാഹമുള്ള ആളുമായിരുന്നു"- ഐസക് പറഞ്ഞു.
ഒറ്റമുണ്ടുടുത്ത്, പുസ്തകങ്ങള് നെഞ്ചോടുചേര്ത്ത് മഹാരാജാസിന്റെ പ്രവേശനകവാടംവഴി അകത്തേക്കു കയറിയ ചെറുപ്പക്കാരന്റെ നെഞ്ചിടിപ്പ് ഇപ്പോഴും അനുഭവപ്പെടുന്നുണ്ടെന്ന് സംവിധായകന് സിദ്ദിഖ് പറഞ്ഞു. അധ്യാപകര് പഠിപ്പിച്ച ഷേക്സ്പിയര് നാടകങ്ങളുടെ മാറ്റൊലികളാണ് മഹാരാജാസിലെത്തുമ്പോള് മനസ്സില് ഉയരുന്നതെന്ന് ബാലചന്ദ്രന് ചുള്ളിക്കാട് പറഞ്ഞു.
കാര്ഷിക സര്വകലാശാല വൈസ്ചാന്സലറും ഓള്ഡ് സ്റ്റുഡന്റ്സ് അസോസിയേഷന് പ്രസിഡന്റുമായ ഡോ. കെ ആര് വിശ്വംഭരന് അധ്യക്ഷനായി. ഡോ. എം ലീലാവതി, പ്രൊഫ. എം അച്യുതന് , പ്രൊഫ. എം കെ സാനു എന്നിവരടങ്ങിയ മഹാരാജാസിലെ പഴയ ഗുരുനാഥന്മാരെയും 93 വയസ്സുള്ള സി ദിവാകരമേനോന് ഉള്പ്പെടെയുള്ള പൂര്വവിദ്യാര്ഥികളെയും ചടങ്ങില് ആദരിച്ചു. കേന്ദ്ര സാഹിത്യ അക്കാദമി അവാര്ഡ് നേടിയ സാനുമാസ്റ്റര്ക്കുള്ള ഉപഹാരം വയലാര് രവി സമ്മാനിച്ചു. "മഹാരാജകീയം"സ്മരണികയുടെ പ്രകാശനം നടന് മമ്മൂട്ടിയും വയലാര് രവിയും മറ്റുള്ളവരും ചേര്ന്ന് നിര്വഹിച്ചു. സര്ക്കാരിന്റെ നിര്ദിഷ്ട മലയാളം സര്വകലാശാലയുടെ ആസ്ഥാനം മഹാരാജാസ് കോളേജായിരിക്കണമെന്ന പ്രമേയം ചടങ്ങില് അവതരിപ്പിച്ചു. പി ടി തോമസ് എംപി, ടി എ അഹമ്മദ്കബീര് എംഎല്എ, പ്രൊഫ. എം കെ സാനു, ഡോ. വി പി ഗംഗാധരന് , ഡെപ്യൂട്ടി മേയര് ബി ഭദ്ര, ഡോ. കെ എസ് രാധാകൃഷ്ണന് , മുതിര്ന്ന മാധ്യമപ്രവര്ത്തകരായ ടി വി ആര് ഷേണായ്, കെ എം റോയ്, ജസ്റ്റിസ് കെ സുകുമാരന് , ജസ്റ്റിസ് ഹാറൂണ് അല് റഷീദ്, മഹാരാജാസ് കോളേജ് പ്രിന്സിപ്പല് പ്രൊഫ. എസ് വത്സലകുമാരി, എന് കെ വാസുദേവന് , സണ്ണി മാത്യു, സരയൂ മോഹന് എന്നിവര് സംസാരിച്ചു. വിവിധ കലാപരിപാടികളും അരങ്ങേറി. ആയിരക്കണക്കിന് പൂര്വവിദ്യാര്ഥികള് പങ്കെടുത്ത പരിപാടിയെ ഏഷ്യയിലെ ഏറ്റവും വലിയ വിദ്യാര്ഥിസംഗമം എന്ന പേരില് ഗിന്നസ് ബുക്കില് ഉള്പ്പെടുത്താന് ശ്രമിക്കുമെന്ന് സംഘാടകര് പറഞ്ഞു.
(എം അഖില്)
ചിതലിനും മായ്ക്കാനായില്ല ആ കാവ്യശകലം
കൊച്ചി: നാലുപതിറ്റാണ്ടുകള്ക്കുമുമ്പ് മഹാരാജാസില് തന്റെ ജൂനിയര് വിദ്യാര്ഥികളില് ഒരാളായ മുഹമ്മദ്കുട്ടി എഴുതിക്കൊടുത്ത ഓട്ടോഗ്രാഫിന് ഇപ്പോഴും ആലുവ സ്വദേശിയായ ഇ എം മെഹറയുടെ മനസ്സില് പൊന്നുംവിലയാണ്. ശനിയാഴ്ച മഹാരാജാസ് കോളേജില് നടന്ന "മഹാരാജകീയം" പൂര്വ വിദ്യാര്ഥിസംഗമത്തില് ആ പഴയ ഓട്ടോഗ്രാഫ് വായിച്ചപ്പോള് മലയാളികളുടെ സ്വന്തം മമ്മൂട്ടിയുടെ മുഖത്ത് ചിരി വിടര്ന്നു.
"മെഹറേ... വര്ണരേണുക്കള് ചായംവിതറിയ സായംസന്ധ്യയില് , സന്ധ്യാരാഗത്തിന്റെ വെളിച്ചം തട്ടി നിന്റെ മുഖത്ത് പ്രകാശം. ചുവന്നുതുടുത്ത മുഖത്ത് ദേഷ്യം വരുമ്പോള് സൗന്ദര്യം അവിടെ ഉടലെടുക്കുന്നു... അവിടെത്തന്നെ അത് അസ്തമിക്കുന്നു." സ്വന്തം കാവ്യസൃഷ്ടിയില് പൂത്തുലഞ്ഞ താരത്തിന് പക്ഷേ ഓട്ടോഗ്രാഫിന്റെ ബാക്കിഭാഗം വായിക്കാനായില്ല. ചിതലുകള് നിഷ്കരുണം ആ കാവ്യശകലം തിന്നൊടുക്കിയിരുന്നു. ഏറ്റവും ഒടുവില് ബഷീറിയന് സ്റ്റൈലില് - "മെഹറേ...താഴെ കാണുന്നതാണ് എന്റെ മേല്വിലാസം. വിവാഹത്തിനു തീര്ച്ചയായും വിളിക്കണം. സമ്മാനമായി തരാന് എന്റെ കൈയില് ഒന്നുമില്ല" എന്ന വാക്കുകള്കൂടി വായിച്ചതോടെ വേദിയിലും സദസ്സിലും പൊട്ടിച്ചിരിയുയര്ന്നു.
അന്ന് ഞാന് ഒന്നാന്തരം കോമാളി: മമ്മുട്ടി
കൊച്ചി: ആക്ഷനും കട്ടിനുമിടയില് തീരാത്ത ജീവിതമുഹൂര്ത്തമാണ് മഹാരാജാസിലെ പൂര്വ വിദ്യാര്ഥികള്ക്ക് മെഗാസ്റ്റാര് മമ്മൂട്ടി ശനിയാഴ്ച സമ്മാനിച്ചത്. കളിയും ചിരിയും കൂട്ടുകാര്ക്കുള്ള "കൊള്ളി" വാക്കുകളുമായി ഓര്മകളുടെ മുറ്റത്ത് നിറഞ്ഞുനിന്നതും ഈ താരരാജാവായിരുന്നു. ഓള്ഡ് സ്റ്റുഡന്റ്സ് അസോസിയേഷന് സംഘടിപ്പിച്ച "മഹാരാജകീയം" സംഗമത്തില് പങ്കെടുക്കാനെത്തിയ മമ്മൂട്ടി കാമ്പസിന്റെ മുക്കിലും മൂലയിലും ചുറ്റിയടിച്ചിരുന്ന പഴയ മുഹമ്മദ് കുട്ടിയായിരുന്നു.
"ഇവിടെ പഠിച്ചിരുന്ന കാലത്ത് ഞാന് ഒന്നാന്തരമൊരു കോമാളിയായിരുന്നു. അന്ന് പ്രചാരത്തിലുള്ള ഹിറ്റ് പാട്ടുകളും മൂളി എല്ലാ കൊറിഡോറിലും ഞാന് ചുറ്റി നടക്കുമായിരുന്നു"-ഗൗരവം തീണ്ടാത്ത കൊച്ചു കൊച്ചു വാക്കുകളില് മമ്മൂട്ടി പഴയ ഓര്മകള് നെയ്തെടുത്തു. തേവര എസ്എച്ച് കോളേജില് പ്രീഡിഗ്രി പഠനത്തിനുശേഷം മഹാരാജാസില്ത്തന്നെ പഠിക്കണമെന്ന വാശിയുണ്ടാക്കിയതിന്റെ കാരണവും അദ്ദേഹം വെളിപ്പെടുത്തി. "പെണ്കുട്ടികള്".. മഹാരാജാസിലെ സുന്ദരികളായ എല്ലാ പെണ്കുട്ടികളോടും പ്രണയമായിരുന്നു. മിക്കവാറും പേര്ക്ക് പ്രണയലേഖനങ്ങള് എഴുതി കൊടുത്തിട്ടുമുണ്ട്. ജൂനിയര്മാര്ക്കും സീനിയര്മാര്ക്കും "കടിതങ്ങള്"കൊടുത്തിട്ടുണ്ടെന്ന് ഓര്മിച്ച മമ്മൂട്ടി അതിന് ന്യായീകരണമായി പറഞ്ഞ- "ഈ കാര്യത്തിന് ജൂനിയര് , സീനിയര് വ്യത്യാസമൊക്കെ നോക്കാന് പറ്റുമോ?" എന്ന വാക്കുകള് പൂര്വവിദ്യാര്ഥികള്ക്കിടയില് ചിരിയുണര്ത്തി.
deshabhimani 120212
No comments:
Post a Comment