Tuesday, November 6, 2012
ദേവസ്വം വോട്ട്: വിശ്വാസം നിര്‍ബന്ധമില്ല; സ്ത്രീകള്‍ വേണ്ട
ദേവസ്വം ഓര്‍ഡിനന്‍സിലെ വിവാദ വ്യവസ്ഥ ഒഴിവാക്കാന്‍ യുഡിഎഫ് തീരുമാനിച്ചു. ദേവസ്വം ബോര്‍ഡ് അംഗത്തെ തെരഞ്ഞെടുക്കാനുള്ള വോട്ടവകാശം വിശ്വാസികളാണെന്ന് എഴുതിക്കൊടുക്കുന്ന എംഎല്‍എമാര്‍ക്കായി പരിമിതപ്പെടുത്തുന്ന വ്യവസ്ഥ ഒഴിവാക്കാന്‍ തിങ്കളാഴ്ച ചേര്‍ന്ന യുഡിഎഫ് യോഗം സര്‍ക്കാരിനോട് ശുപാര്‍ശചെയ്തു. എന്നാല്‍, സ്ത്രീസംവരണം ഉണ്ടാകില്ലെന്ന് പി പി തങ്കച്ചന്‍ യുഡിഎഫ് യോഗത്തിന് ശേഷം വാര്‍ത്താസമ്മേളനത്തില്‍ അറിയിച്ചു.
നിയമസഭയിലെ ഹിന്ദു എംഎല്‍എമാര്‍ക്കായിരുന്നു ബോര്‍ഡംഗത്തെ തെരഞ്ഞെടുക്കുന്നതിന് നിലവില്‍ വോട്ടവകാശം ഉണ്ടായിരുന്നത്. ദൈവവിശ്വാസിയാണെന്ന് സത്യവാങ്മൂലം എഴുതി നല്‍കുന്നവര്‍ക്ക് മാത്രമായി ഇത് പരിമിതപ്പെടുത്തിയായിരുന്നു ഓര്‍ഡിനന്‍സ്. നിര്‍ദിഷ്ട ഓര്‍ഡിനന്‍സിനെതിരെ സമൂഹത്തിന്റെ സമസ്തമേഖലകളില്‍നിന്നും പ്രതിഷേധം ശക്തമായതിനെത്തുടര്‍ന്നാണ് യുഡിഎഫിന്റെ മനംമാറ്റം. ജനാധിപത്യവിരുദ്ധമായ ഓര്‍ഡിനന്‍സിനെതിരെ എല്‍ഡിഎഫിന്റെ നേതൃത്വത്തില്‍ പ്രക്ഷോഭവും ശക്തമാക്കിയിരുന്നു. ഓര്‍ഡിനന്‍സില്‍ ഒപ്പുവയ്ക്കരുതെന്ന് ആവശ്യപ്പെട്ട് രാജ്ഭവന് മുന്നില്‍ കഴിഞ്ഞദിവസം എല്‍ഡിഎഫ് എംഎല്‍എമാര്‍ സത്യഗ്രഹം നടത്തുകയും ഗവര്‍ണര്‍ക്ക് നിവേദനം നല്‍കുകയുംചെയ്തു. ഇതിന്റെ അടിസ്ഥാനത്തില്‍ ഗവര്‍ണര്‍ സര്‍ക്കാരിനോട് വിശദീകരണം തേടിയിരുന്നു. യുഡിഎഫിലെ ചില ഘടകകക്ഷികളും ഈ വ്യവസ്ഥയില്‍ വിയോജിച്ചു. മന്ത്രി കെ എം മാണിയും എതിര്‍പ്പ്് പ്രകടിപ്പിച്ചു. സ്ത്രീസംവരണം എടുത്തുകളഞ്ഞതിനെ കണ്‍വീനര്‍ ന്യായീകരിച്ചു. സംവരണത്തിന് നിയമമില്ലെന്നും ഇത്തരത്തിലുള്ള എല്ലാ ആവശ്യവും അംഗീകരിക്കാനാവില്ലെന്നും തങ്കച്ചന്‍ പറഞ്ഞു. ദേവസ്വം ബോര്‍ഡിലെ ജീവനക്കാരുടെ നിയമനങ്ങള്‍ക്കായി പ്രത്യേക റിക്രൂട്ട്മെന്റ് ബോര്‍ഡ് രൂപീകരിക്കണമെന്ന വ്യവസ്ഥയും മാറ്റില്ല. പരിയാരം മെഡിക്കല്‍കോളേജ് ഏറ്റെടുക്കുന്നതിനെപ്പറ്റി റിപ്പോര്‍ട്ട് നല്‍കാന്‍ സിഎംപി നേതാവ് എം വി രാഘവന്‍ കണ്‍വീനറായി ആറംഗ ഉപസമിതിയെ നിയോഗിച്ചു.
നിയമപരവും രാഷ്ട്രീയവുമായ കാര്യങ്ങളാകും സമിതി പരിശോധിക്കുക. കോളേജ് സര്‍ക്കാര്‍ ഏറ്റെടുക്കുന്നത് സംബന്ധിച്ച് അന്തിമ തീരുമാനം ആയിട്ടില്ല. ഭരണസമിതി പിരിച്ചുവിട്ട് പുതിയ തെരഞ്ഞെടുപ്പ് നടത്തണമെന്നും മെഡിക്കല്‍ കോളേജ് പൂര്‍ണമായി സര്‍ക്കാര്‍ ഏറ്റെടുക്കണമെന്നും രണ്ട് അഭിപ്രായമാണ് യുഡിഎഫിലുള്ളത്. കോളേജ് ഏറ്റെടുക്കുന്നതുകൊണ്ട് സര്‍ക്കാരിന് നഷ്ടമൊന്നും ഉണ്ടാകില്ലെന്നും തങ്കച്ചന്‍ പറഞ്ഞു. പതിനാല് ജില്ലാ സഹകരണബാങ്കുകളില്‍ ഒരാഴ്ചയ്ക്കുള്ളില്‍ അഡ്മിനിസ്ട്രേറ്റീവ് കമ്മിറ്റികളെ നിയമിക്കും. രൂക്ഷമായ വിലക്കയറ്റം, തേങ്ങയുടെ വിലയിടിവ്, കുട്ടനാട് പാക്കേജ് തുടങ്ങിയ വിഷയങ്ങളില്‍ അടിയന്തര മന്ത്രിസഭായോഗം വിളിക്കണമെന്നും യുഡിഎഫ് യോഗം ശുപാര്‍ശചെയ്തു.
deshabhimani 061112
കുടുംബശ്രീയെ തകര്‍ക്കാന്‍ ബദല്‍ നീക്കവുമായി മുഖ്യമന്ത്രി
കുടുംബശ്രീമിഷനെ തകര്‍ക്കാനും കേന്ദ്രാവിഷ്കൃത ദാരിദ്ര്യനിര്‍മാര്‍ജന പദ്ധതികളുടെ ഫണ്ട് കൈപ്പിടിയിലാക്കാനും ലക്ഷ്യമിട്ട് ബദല്‍ സംവിധാനത്തിന് മുഖ്യമന്ത്രി ഉമ്മന്‍ചാണ്ടി മുന്‍കൈ എടുക്കുന്നു. കേന്ദ്ര ഗ്രാമവികസനമന്ത്രി ജയ്റാം രമേഷ് തന്നെ കുടുംബശ്രീ രാജ്യത്തിനാകെ മാതൃകയായെന്ന് ആവര്‍ത്തിക്കവെയാണ് സംസ്ഥാന സര്‍ക്കാര്‍ അതിനെ തകര്‍ക്കാന്‍ ശ്രമിക്കുന്നത്. കുടുംബശ്രീ പ്രവര്‍ത്തനങ്ങള്‍ ഉള്‍പ്പെടെ നിരീക്ഷിക്കാന്‍ കോ-ഓര്‍ഡിനേഷന്‍ കമ്മിറ്റിക്ക് രൂപം നല്‍കാനാണ് പുതിയ നീക്കം. ദേശീയ ഗ്രാമീണ ഉപജീവന മിഷന്‍ (എന്‍ആര്‍എല്‍എം) നോഡല്‍ ഏജന്‍സി സ്ഥാനത്തുനിന്ന് കുടുംബശ്രീയെ മാറ്റാന്‍ നടത്തിയ ശ്രമങ്ങള്‍ക്ക് കേന്ദ്ര ഗ്രാമവികസനമന്ത്രിയുടെ പിന്തുണ കിട്ടാതായതോടെയാണ് പുതിയ നീക്കം.
ദേശീയ ഗ്രാമീണ ഉപജീവന മിഷന്‍ മാതൃകയില്‍ മുഖ്യമന്ത്രി അധ്യക്ഷനായി സംസ്ഥാന ഗ്രാമീണ ഉപജീവന മിഷന്‍ സ്ഥാപിക്കാനായിരുന്നു ആദ്യം ശ്രമം. ദേശീയ ഗ്രാമീണാരോഗ്യ ദൗത്യം (എന്‍ആര്‍എച്ച്എം) നടത്തിപ്പിന് സംസ്ഥാനത്ത് രൂപീകരിച്ച സൊസൈറ്റിയുടെ മാതൃകയില്‍ മുഖ്യമന്ത്രിയുടെ അധ്യക്ഷതയില്‍ ഒരു സൊസൈറ്റി രൂപീകരിക്കാനായി പിന്നീട് ആലോചന. ഈ രണ്ടു നീക്കത്തിനുമെതിരെ മന്ത്രി എം കെ മുനീര്‍ ഉറച്ച നിലപാടെടുത്തു. മന്ത്രിയുടെ പിന്തുണയോടെ ഉദ്യോഗസ്ഥ മേധാവികള്‍ കേന്ദ്രത്തിന് കത്തയച്ചു. ഇതോടെ എന്‍ആര്‍എല്‍എം നോഡല്‍ ഏജന്‍സി സ്ഥാനത്തുനിന്ന് കുടുംബശ്രീയെ മാറ്റില്ലെന്ന നിലപാടില്‍ കേന്ദ്രം ഉറച്ചുനിന്നു. കേന്ദ്ര പിന്തുണ കിട്ടില്ലെന്ന് ഉറപ്പായതോടെയാണ് കോ- ഓര്‍ഡിനേഷന്‍ കമ്മിറ്റിക്കുള്ള നീക്കം. ഇത് നിലവില്‍ വരുന്നതോടെ കുടുംബശ്രീയുടെ നിയന്ത്രണം തദ്ദേശഭരണവകുപ്പില്‍നിന്ന് പിടിച്ചെടുക്കാന്‍ കഴിയുമെന്നും ഘട്ടംഘട്ടമായി കേന്ദ്രാവിഷ്കൃത പദ്ധതികള്‍ കൈപ്പിടിയിലൊതുക്കാമെന്നുമാണ് മുഖ്യമന്ത്രി ഉമ്മന്‍ചാണ്ടിയും ഗ്രാമവികസനമന്ത്രി കെ സി ജോസഫും കണക്ക് കൂട്ടുന്നത്.
കെ സി ജോസഫ്- മുനീര്‍ ഏറ്റുമുട്ടലില്‍ മുഖ്യമന്ത്രി ജോസഫിന്റെ പക്ഷം പിടിച്ചതോടെ മുനീര്‍ ദുര്‍ബലനായിരിക്കയാണ്. ആസൂത്രണബോര്‍ഡും കുടുംബശ്രീക്കെതിരായ നിലപാടാണ് സ്വീകരിക്കുന്നത്. പുതിയ ആലോചനയ്ക്കു പിന്നില്‍ ആസൂത്രണ ബോര്‍ഡ് അംഗം സി പി ജോണുമുണ്ട്. കെ സി ജോസഫ്- പി ടി തോമസ് എംപി അച്ചുതണ്ടും കുടുംബശ്രീയെ തകര്‍ക്കാന്‍ കൊണ്ടുപിടിച്ച് ശ്രമിക്കുന്നു. ഗ്രാമവികസനവകുപ്പിലെ ഉന്നതര്‍ക്കും ഫണ്ട് ധൂര്‍ത്തടിക്കാന്‍ കിട്ടാത്തതില്‍ കടുത്ത പ്രയാസമുണ്ട്. ഇവര്‍ മന്ത്രിയുടെ പിന്തുണയോടെ കീഴുദ്യോഗസ്ഥരെക്കൊണ്ട് സമരം ചെയ്യിപ്പിക്കാന്‍വരെ തുനിഞ്ഞു. കുടുംബശ്രീയെ തകര്‍ക്കാന്‍ കോണ്‍ഗ്രസ് നേതൃത്വത്തില്‍ രൂപീകരിച്ച ജനശ്രീ മിഷന്‍ തട്ടിപ്പുസംഘമാണെന്ന് വെളിപ്പെട്ടതോടെയാണ് പുതിയ വഴിതേടുന്നത്. കുടുംബശ്രീ സംരക്ഷണവേദിയുടെ നേതൃത്വത്തില്‍ സെക്രട്ടറിയറ്റിനു മുന്നില്‍ നടന്ന സഹന സമരം വന്‍ വിജയമായതും ഭരണക്കാരെ പ്രകോപിപ്പിച്ചു.
ദാരിദ്ര്യനിര്‍മാര്‍ജന കമീഷന്‍ കുടുംബശ്രീയെ തകര്‍ക്കാന്‍: ഐസക്
ന്യൂഡല്‍ഹി: മുഖ്യമന്ത്രി അധ്യക്ഷനായി പുതിയ ദാരിദ്ര്യനിര്‍മാര്‍ജന മിഷന്‍ രൂപീകരിക്കാനുളള നീക്കം കുടുംബശ്രീയെ തകര്‍ക്കാനുള്ള ശ്രമത്തിന്റെ തുടര്‍ച്ചയാണെന്ന് സിപിഐ എം കേന്ദ്രകമ്മിറ്റി അംഗം തോമസ് ഐസക് പറഞ്ഞു. കുടുംബശ്രീ സംരക്ഷണ വേദിയുമായി ഒപ്പിട്ട കരാറിന് വിരുദ്ധമാണിത്. സംസ്ഥാന സര്‍ക്കാര്‍ കേന്ദ്രത്തിന് സമര്‍പ്പിച്ച പദ്ധതിരേഖയില്‍ പറയുന്നതുപോലെ ദേശീയ ഉപജീവനമിഷന്‍ പദ്ധതികള്‍ നടപ്പാക്കുമെന്നാണ് മന്ത്രിമാര്‍ ഉറപ്പ് നല്‍കിയത്. എന്നാല്‍, കരാര്‍ അട്ടിമറിക്കാനാണ് ഗ്രാമവികസനവകുപ്പ് ശ്രമിക്കുന്നതെന്ന് ഐസക് പറഞ്ഞു. കേരളത്തിലെ ഭൂപരിഷ്കരണ, ഭൂവിനിയോഗനിയമങ്ങളെ അട്ടിമറിക്കാനാണ് കെ എം മാണി എന്നും ശ്രമിച്ചിട്ടുള്ളത്. അതിന്റെ തുടര്‍ച്ചയാണ് ഇപ്പോള്‍ മുഖ്യമന്ത്രിയുടെ പിന്തുണയോടെ സംസ്ഥാനത്ത് നടക്കുന്നതെന്നും ഐസക് പറഞ്ഞു.
deshabhimani 061112
Friday, November 2, 2012
ധൂര്‍ത്തിന്റെ മേള: മന്ത്രി കെ സി ജോസഫ് പ്രതിക്കൂട്ടില്‍
മലയാളത്തിന്റെ മഹാരഥന്മാരായ സാഹിത്യനായകര്‍ നിസ്വാര്‍ഥ പ്രവര്‍ത്തനങ്ങളിലൂടെ പടുത്തുയര്‍ത്തിയ കേരള സാഹിത്യ അക്കാദമിയുടെ വിശ്വാസ്യത വിശ്വമലയാള മഹോത്സവത്തെ അപഹാസ്യമാക്കി സാംസ്കാരിക മന്ത്രി കെ സി ജോസഫ് തകര്‍ത്തു. അക്കാദമി പ്രസിഡന്റ് പെരുമ്പടവം ശ്രീധരനെ അനങ്ങാന്‍ പോലും അനുവദിക്കാതെ മന്ത്രിയുടെ ഓഫീസ് നിയന്ത്രിച്ച മലയാള മഹോത്സവം എക്കാലത്തെയും വലിയ നാണക്കേട് ഭാഷയ്ക്കും സാഹിത്യത്തിനും സമ്മാനിച്ചപ്പോള്‍ സാഹിത്യ അക്കാദമിയുടെ നിലനില്‍പ്പിനെ കൂടിയാണ് അതു ബാധിച്ചത്. സര്‍ക്കാര്‍ അനുവദിച്ച പണം മുഴുവന്‍ ധൂര്‍ത്തടിക്കുകയാണെന്ന ആരോപണം അക്കാദമി അംഗങ്ങള്‍ തന്നെ ഉയര്‍ത്തിയതോടെയാണ് മഹോത്സവ നടത്തിന്റെ ഉദ്ദേശ്യശുദ്ധി ചോദ്യംചെയ്യപ്പെട്ടത്.
അക്കാദമി ജനറല്‍ കൗണ്‍സില്‍ കൂട്ടത്തോടെ പരിപാടി ബഹിഷ്കരിക്കുമെന്ന് പ്രഖ്യാപിച്ചിട്ടും സാംസ്കാരിക മന്ത്രി അത് രാഷ്ട്രീയവിരോധം മാത്രമായി വ്യാഖ്യാനിച്ചു. യുഡിഎഫ് സര്‍ക്കാര്‍ നിയമിച്ച അക്കാദമി വൈസ് പ്രസിഡന്റ് ബാലചന്ദ്രന്‍ വടക്കേടത്ത് ചടങ്ങ് ബഹിഷ്കരിച്ചപ്പോഴും മന്ത്രി അതിനെ ഗ്രൂപ്പുപോരായി ചിത്രീകരിച്ചു. കെപിസിസി പ്രസിഡന്റ് രമേശ് ചെന്നിത്തലയുമായി അടുപ്പമുള്ള ആളാണ് വൈസ് പ്രസിഡന്റ്. 21 ജനറല്‍ കൗണ്‍സില്‍ അംഗങ്ങളില്‍ അഞ്ചുപേര്‍ മാത്രമാണ് മന്ത്രിയോടൊപ്പം മഹോത്സവത്തിന് ഉണ്ടായിരുന്നത്. ആറ് എക്സിക്യൂട്ടീവ് അംഗങ്ങളില്‍ ഒരാള്‍ മാത്രമാണ് പ്രസിഡന്റിനെ തുണയ്ക്കുന്നത്. ജോസ് പനച്ചിപ്പുറം, ഡോ. അജയപുരം ജ്യോതിഷ്കുമാര്‍, പ്രമീളാദേവി, പി കെ പാറക്കടവ്, കെ രഘുനാഥന്‍ എന്നിവര്‍ അക്കാദമിയിലെ മലയാള മഹോത്സവ നടത്തിപ്പിലെ അഴിമതിക്കും അക്കാദമി സെക്രട്ടറിയുടെ ഏകാധിപത്യത്തിനും എതിരെ ശക്തമായ നിലപാടാണ് സ്വീകരിച്ചത്. ജനറല്‍ കൗണ്‍സിലിലെ നോമിനേറ്റഡ് അംഗങ്ങളും മേളയെ സഹായിച്ചില്ല. പ്രസിഡന്റ് പെരുമ്പടവം ശ്രീധരനും ജനറല്‍ കണ്‍വീനര്‍ ജോണ്‍ സാമുവലും മൂന്ന് അംഗങ്ങളും മാത്രമാണ് സജീവമായുണ്ടായത്. ഇതിനിടെ, വ്യക്തിപരമായ അധിക്ഷേപവും അക്കാദമി സെക്രട്ടറി നടത്തിയതായി വിവാദമുയര്‍ന്നിട്ടുണ്ട്. ഒരു വനിതാ അക്കാദമി അംഗം സെക്രട്ടറിക്കെതിരെ വകുപ്പുമന്ത്രിക്ക് പരാതി നല്‍കിയിട്ടും നടപടിയെടുത്തില്ലെന്നാണ് ആക്ഷേപം. മേളയിലെ ഫണ്ട് വിനിയോഗത്തെക്കുറിച്ച് വിജിലന്‍സ് അന്വേഷണം ആവശ്യപ്പെട്ട് കോടതിയെ സമീപിക്കാനൊരുങ്ങുകയാണ് അക്കാദമിയിലെ ഒരുവിഭാഗം.
ഒഴിവാക്കാന്‍ കാരണം തന്റെ നിലപാടുകളാകാം: സുഗതകുമാരി
വിശ്വമലയാള മഹോത്സവത്തില്‍ വികസന സെമിനാറിന്റെ അധ്യക്ഷസ്ഥാനത്തുനിന്ന് തന്നെ നീക്കിയത് സര്‍ക്കാരിനെതിരെയുള്ള തന്റെ പരിസ്ഥിതി നിലപാട് കാരണമായിരിക്കാമെന്ന് കവയിത്രി സുഗതകുമാരി പ്രതികരിച്ചു. എമര്‍ജിങ് കേരള അടക്കമുള്ള വിഷയങ്ങളിലും സര്‍ക്കാരിനെതിരെ പ്രതികരിച്ചിരുന്നു. തന്റെ നിലപാടില്‍ മാറ്റമൊന്നുമില്ല. നാട് നേരിടുന്ന പ്രശ്നങ്ങള്‍ ഭരണാധികാരികളോട് പറയാന്‍ ലഭിച്ച അവസരം നഷ്ടമായതില്‍ നിരാശയുണ്ട്. ആറന്മുള വിമാനത്താവളവിഷയത്തില്‍ തന്റെ നിലപാടിന് ഒരു മാറ്റവും വരുത്തില്ല. വയല്‍ നികത്താന്‍ അനുവദിക്കില്ല. ഇത് സര്‍ക്കാരിനെ ചൊടിപ്പിച്ചിട്ടുണ്ടാകാം-സുഗതകുമാരി പറഞ്ഞു. സമാപനദിവസം കേരളത്തിന്റെ വികസനം ചര്‍ച്ച ചെയ്യാനായി ചേരുമെന്ന് പ്രഖ്യാപിച്ച സെമിനാര്‍ കവയിത്രി സുഗതകുമാരിയെ അപമാനിച്ചതിന്റെപേരില്‍ മന്ത്രി കെ സി ജോസഫിനും കൂട്ടര്‍ക്കും നില്‍ക്കക്കള്ളിയില്ലാതായതോടെ ഉപേക്ഷിക്കേണ്ടിവന്നു. "നാളത്തെ കേരളം: വികസന കാഴ്ചപ്പാട്" എന്ന സെമിനാറിന്റെ അധ്യക്ഷസ്ഥാനത്തുനിന്ന് സുഗതകുമാരിയെ നീക്കംചെയ്ത് അപമാനിച്ചതോടെ സ്പീക്കര്‍ക്കുപോലും വിശ്വമലയാള മഹോത്സവത്തെ തള്ളിപ്പറയേണ്ടിവന്നു. മന്ത്രി കെ സി ജോസഫ് കവയിത്രിയുടെ വീട്ടിലെത്തി മാപ്പുപറഞ്ഞ ശേഷം സെമിനാര്‍ ഉപേക്ഷിക്കുന്നതായി പ്രഖ്യാപിക്കുകയായിരുന്നു. സമാപനദിവസത്തെ പ്രധാന സെമിനാര്‍ ഉപേക്ഷിച്ചതോടെ വിശ്വമലയാള മഹോത്സവത്തിന്റെ സമാപനം നിറംകെട്ടതായി.
deshabhimani
സുനന്ദയെ അപമാനിച്ച സംഭവം ഒതുക്കാന്‍ ഉന്നത ഗൂഢാലോചന
കേന്ദ്രമന്ത്രി ശശി തരൂരിന്റെ ഭാര്യ സുനന്ദ പുഷ്കറിനെ ഒരുസംഘം കോണ്‍ഗ്രസുകാര്‍ പരസ്യമായി ദേഹോപദ്രവം ചെയ്ത് അവഹേളിച്ച സംഭവം ഒതുക്കാന്‍ ഉന്നതതല ഗൂഢാലോചന. കോണ്‍ഗ്രസിന്റെ കേന്ദ്രനേതൃത്വത്തിലുള്ളവരും സംസ്ഥാന മന്ത്രിമാരും ഉള്‍പ്പെടെ സമ്മര്‍ദം ചെലുത്തിയതിനെ തുടര്‍ന്നാണ് പരാതിനല്‍കാനുള്ള തീരുമാനത്തില്‍നിന്ന് ശശി തരൂരും സുനന്ദയും പിന്മാറിയത്.
കേന്ദ്രമന്ത്രിയായി ചുമതലയേറ്റശേഷം തലസ്ഥാനത്തെത്തിയ ശശി തരൂരിന് തിരുവനന്തപുരം വിമാനത്താവളത്തില്‍ നല്‍കിയ സ്വീകരണത്തിനിടയിലാണ് ഒരുസംഘം കോണ്‍ഗ്രസുകാര്‍ സുനന്ദയുടെ ശരീരത്തില്‍ കൈവച്ചത്. സ്ത്രീത്വത്തെ പരസ്യമായി അപമാനിച്ച് നാടിനാകെ നാണക്കേടുണ്ടാക്കിയ സംഭവത്തിലെ കുറ്റവാളികള്‍ ആരെന്ന് ചാനല്‍ ദൃശ്യങ്ങളിലൂടെ വ്യക്തമായിട്ടും പൊലീസോ വനിതാ കമീഷനോ നടപടിയെടുത്തിട്ടില്ല. തന്നെക്കാള്‍ വളരെ പ്രായം കുറഞ്ഞ 19കാരനാണ് ആക്രമിച്ചതെന്നും അയാളുടെ രക്ഷിതാക്കള്‍ വീട്ടിലെത്തി കരഞ്ഞ് അപേക്ഷിച്ചതിനാല്‍ പരാതി നല്‍കുന്നില്ലെന്നും സുനന്ദ പറഞ്ഞതിനാല്‍ പ്രശ്നത്തില്‍ ഇടപെടുന്നില്ലെന്നാണ് ബുധനാഴ്ച ചാനല്‍ ചര്‍ച്ചയില്‍ വനിതാ കമീഷന്‍ അധ്യക്ഷ കെ സി റോസക്കുട്ടി പറഞ്ഞത്. എന്നാല്‍, ഒരുപാട് പേര്‍ തന്നെ ആക്രമിച്ചെന്നും അതില്‍ 19കാരനെ മാത്രമേ വീഡിയോദൃശ്യങ്ങളില്‍ കാണുന്നുള്ളൂവെന്നും അതിനാല്‍ പരാതിയില്ലെന്നും സുനന്ദ പറഞ്ഞതായി ചെയര്‍പേഴ്സണ്‍ വ്യാഴാഴ്ച "ദേശാഭിമാനി"യോട് പറഞ്ഞു.
ദൃശ്യമാധ്യമങ്ങളിലും പത്രങ്ങളിലും വന്ന ദൃശ്യങ്ങളില്‍ അക്രമികളാരൊക്കെയെന്ന് വ്യക്തമാണ്. സുനന്ദയെ രക്ഷിക്കാനെന്ന വ്യാജേന ചുറ്റും കൂടിയവരും ദേഹത്ത് കൈവച്ചെന്നാണ് ദൃശ്യങ്ങള്‍ വ്യക്തമാക്കുന്നത്. എന്നിട്ടും ചെയര്‍പേഴ്സണ്‍ ഉരുണ്ടുകളിക്കുകയായാണ്. തന്നെ ആക്രമിച്ച പ്രതി മാപ്പ് പറഞ്ഞതിനാല്‍ പരാതി നല്‍കുന്നില്ലെന്നാണ് ഡല്‍ഹിയില്‍ ദേശീയമാധ്യമങ്ങളോട് സുനന്ദ പ്രതികരിച്ചത്. തിരുവനന്തപുരത്തുനിന്ന് പോകുംവരെ തന്റെ സ്ത്രീത്വത്തെ അപമാനിച്ചതിനെതിരെ അവര്‍ പലരോടും രോഷാകുലയായി സംസാരിച്ചിരുന്നു. ഒന്നിലേറെ പേര്‍ അപമാനിച്ചതായും പറഞ്ഞിരുന്നു. അക്രമികള്‍ക്കെതിരെ നടപടിയെടുക്കുന്നതു വരെ അടങ്ങിയിരിക്കില്ലെന്ന് ശശി തരൂരും പറഞ്ഞിരുന്നു. എന്നാല്‍, പൊടുന്നനെയാണ് നിലപാട് മാറ്റം. പരാതിയില്‍ ഉറച്ചുനിന്നാല്‍ അത് കേന്ദ്രമന്ത്രിസ്ഥാനത്തിന് വരെ പ്രശ്നമാകുമെന്ന ഭീഷണി ഉയര്‍ത്തിയതായും വിവരമുണ്ട്. വഴിയെ പോകുന്നവര്‍ക്കെതിരെ പോലും നിസ്സാരകാരണങ്ങളുണ്ടാക്കി കേസെടുക്കുന്ന പൊലീസിന്റെ കണ്‍മുന്നില്‍വച്ച് ഒരു കേന്ദ്ര മന്ത്രിയുടെ ഭാര്യയെ സംഘംചേര്‍ന്ന് അപമാനിച്ചിട്ടും നടപടിയെടുക്കാത്തതും സമ്മര്‍ദങ്ങള്‍ക്ക് വഴങ്ങിയാണ്.
deshabhimani 021112
ഭൂമാഫിയകളുടെ സമ്മര്‍ദം റീസര്‍വേ അവസാനിപ്പിച്ചു
സംസ്ഥാനത്ത് റീസര്‍വേ അവസാനിപ്പിച്ച് സര്‍ക്കാര്‍ ഉത്തരവ്. ഭൂമാഫിയകളുടെ സമ്മര്‍ദത്തിനു വഴങ്ങിയാണ് പകുതിയോളം പൂര്‍ത്തിയായ റീസര്‍വേ പ്രവര്‍ത്തനം അവസാനിപ്പിച്ച് റവന്യു വകുപ്പ് ഉത്തരവിറക്കിയത്. സ്വകാര്യവല്‍ക്കരണവും തസ്തിക വെട്ടിക്കുറയ്ക്കലും ലക്ഷ്യമിട്ടാണ് സംസ്ഥാനത്തെ ഭൂപ്രശ്നം കൂടുതല്‍ സങ്കീര്‍ണമാക്കുന്ന നടപടി. ഇനിമുതല്‍ സര്‍ക്കാര്‍ഭൂമി മാത്രം റീസര്‍വേ നടത്തി അളന്ന് തിട്ടപ്പെടുത്തിയാല്‍മതിയെന്ന് റവന്യൂവകുപ്പ് ബുധനാഴ്ച പുറപ്പെടുവിച്ച ഉത്തരവില്‍ പറയുന്നു. സ്വകാര്യവ്യക്തികള്‍ സ്വന്തം നിലയില്‍ അപേക്ഷ നല്‍കിയാല്‍ മുറപ്രകാരം റീസര്‍വേ നടത്തിയാല്‍ മതിയെന്നും 409-12 നമ്പര്‍ ഉത്തരവില്‍ വ്യക്തമാക്കുന്നു. സര്‍ക്കാര്‍ ഭൂമിയില്‍ മാത്രം റീസര്‍വേ എന്നത് പ്രഹസനമാക്കി ഭൂമാഫിയകള്‍ക്ക് കീഴടങ്ങുന്നതോടെ സംസ്ഥാനത്ത് റീസര്‍വേ പ്രവര്‍ത്തനം പൂര്‍ണമായും ഇല്ലാതാകും.
റീസര്‍വേ നിര്‍ത്തുന്നതോടെ ഉണ്ടാകുന്ന അധിക തസ്തികകള്‍ പുനര്‍വിന്യസിക്കാനും ഓഫീസുകള്‍ പുനഃക്രമീകരിക്കാനും പിന്നീട് പ്രത്യേകം ഉത്തരവ് പുറപ്പെടുവിക്കും. തസ്തികകള്‍ വെട്ടിക്കുറയ്ക്കാനും ഓഫീസുകള്‍ അടച്ചുപൂട്ടാനുമുള്ള നടപടികളുടെ ഭാഗമാണീ തീരുമാനം. യുഡിഎഫ് അധികാരത്തില്‍വന്ന ഉടനെ, തിരുവഞ്ചൂര്‍ രാധാകൃഷ്ണന്‍ റവന്യൂമന്ത്രിയായിരിക്കെ തുടങ്ങിയ നീക്കങ്ങളുടെ ഭാഗമായാണ് ഉത്തരവ്. റീസര്‍വേ സ്വകാര്യവല്‍ക്കരിക്കുന്നതിനെ കുറിച്ച് ആലോചിക്കാന്‍ അന്ന് തിരുവഞ്ചൂര്‍ സര്‍വീസ് സംഘടനകളുടെ പ്രത്യേക യോഗം വിളിച്ചിരുന്നു. റീസര്‍വേ പ്രകാരം തയ്യാറാക്കുന്നത് അടിസ്ഥാന ഭൂരേഖയാണെന്നും ഇത് സ്വകാര്യ ഏജന്‍സികളെ ഏല്‍പ്പിക്കുന്നത് പൊതുതാല്‍പ്പര്യത്തിന് എതിരാണെന്നും സംഘടനകള്‍ ചൂണ്ടിക്കാട്ടി. സര്‍ക്കാര്‍ ഭൂമിയുള്‍പ്പെടെ ഭൂമാഫിയകള്‍ കൈവശപ്പെടുത്താനുള്ള സാധ്യതയും അവതരിപ്പിച്ച് സംഘടനകള്‍ ഇതിനെ ശക്തമായി എതിര്‍ത്തു. ഇതേതുടര്‍ന്ന് നിര്‍ത്തിവച്ച സ്വകാര്യവല്‍ക്കരണനടപടികളാണ് വളഞ്ഞവഴിയിലുള്ള ഉത്തരവിലൂടെ നടപ്പാക്കാന്‍ ശ്രമിക്കുന്നത്.
റീസര്‍വേ നടത്തിയ പ്രദേശങ്ങളില്‍ വ്യാപകമായ പരാതികള്‍ ഉയരുന്നുവെന്നും നടപടി പരാജയമാണെന്നും പറഞ്ഞാണ് നിര്‍ത്തലാക്കിക്കൊണ്ടുള്ള ഉത്തരവ് പുറപ്പെടുവിച്ചത്. എന്നാല്‍, സര്‍വേ പ്രവര്‍ത്തനത്തിലെ കാലതാമസത്തിന് പ്രധാന കാരണം ജീവനക്കാരുടെ കുറവും അടിസ്ഥാനസൗകര്യങ്ങളുടെ അപര്യാപ്തതയുമാണ്. ഈ രണ്ട് പ്രശ്നവും പരിഹരിക്കാന്‍ കഴിഞ്ഞ എല്‍ഡിഎഫ് സര്‍ക്കാര്‍ ഫലപ്രദമായ നടപടി സ്വീകരിച്ചിരുന്നു. ഇതിലൊന്നായിരുന്നു കെല്‍ട്രോണ്‍ മുഖേന ഡിജിറ്റലൈസ് ചെയ്യാനുള്ള നടപടി. ഈ കാലയളവില്‍ കെ ജി വത്സലകുമാരി സര്‍വേ ഡയറക്ടര്‍ ആയിരിക്കെ ഓരോ ജില്ലയിലും തെരഞ്ഞെടുക്കപ്പെട്ട വില്ലേജുകളില്‍ അധിക ജീവനക്കാരെ ഉപയോഗിച്ച് റീസര്‍വേ നാലുമാസം കൊണ്ട് പൂര്‍ത്തിയാക്കി. എല്ലാ പരാതികളും പരിഹരിച്ചുകൊണ്ടായിരുന്നു ഇത്. യുഡിഎഫ് അധികാരത്തില്‍വന്നതോടെ ഈ രണ്ട് പരിപാടികളും അട്ടിമറിച്ചു. ഡിജിറ്റലൈസേഷന്‍ കെല്‍ട്രോണിനെ ഏല്‍പ്പിക്കാനുള്ള തീരുമാനത്തിന്റെ മറവില്‍ മുഴുവന്‍ റീസര്‍വേ പ്രവര്‍ത്തനവും സ്വകാര്യമേഖലയ്ക്ക് കൈമാറാനാണ് തിരുവഞ്ചൂര്‍ രാധാകൃഷ്ണന്‍ മന്ത്രിയായിരിക്കെ ശ്രമം തുടങ്ങിയത്. റവന്യൂവകുപ്പ് ഏറ്റെടുത്ത അടൂര്‍ പ്രകാശും മുന്‍ഗാമിയുടെ പാത പിന്തുടര്‍ന്നു. റീസര്‍വേ പരാജയമാണെന്ന ഉത്തരവിലെ പരാമര്‍ശം ശരിയല്ലെന്ന് കണക്കുകള്‍ വ്യക്തമാക്കുന്നു. ഏതാണ്ട് പകുതിയോളം വില്ലേജുകളില്‍ ഇതിനകം റീസര്‍വേ പൂര്‍ത്തിയായി. 1635 വില്ലേജുകളില്‍ 773 ലാണ് പൂര്‍ത്തിയായത്. ഡിജിറ്റലൈസേഷന്‍ നടപ്പാക്കുന്നതോടെ ഇത് ഇനിയും വേഗത്തിലാക്കാനാകും. ആവശ്യമായ ജീവനക്കാരെ നിയമിച്ച് സമയബന്ധിതമായി റീസര്‍വേ പൂര്‍ത്തിയാക്കാന്‍ കഴിയുമായിരുന്നു.
(എം രഘുനാഥ്)
deshabhimani
കണ്ണൂരിലെ മണല്‍ മാഫിയ സുധാകരന്റെ ക്രിമിനല്‍സംഘം
കണ്ണൂര്‍ ജില്ലയിലെ മണല്‍മാഫിയയുമായി കെ സുധാകരന് എംപിക്കുള്ള ബന്ധത്തിന്റെ ആഴം വെളിപ്പെടുത്തുന്നതാണ് വളപട്ടണം പൊലീസ് സ്റ്റേഷനില്‍ കഴിഞ്ഞ ദിവസമുണ്ടായ സംഭവം. സുധാകരന്റെ കൂട്ടാളികളായ ക്രിമിനലുകളാണ് ജില്ലയില്‍ അനധികൃത മണല്‍വാരലിനും വില്‍പ്പനയ്ക്കും നേതൃത്വം നല്‍കുന്നത്. ഇതില്‍ സുധാകരന്റെ മരുമകനും ഉള്‍പ്പെടും. മണല്‍കടത്തുന്നതിനിടെ ബുധനാഴ്ച രാവിലെ വളപട്ടണം പൊലീസിന്റെ പിടിയിലായ നാറാത്തെ സമദും ഹമീദും രക്ഷപ്പെട്ട ഷംസുവും സുധാകരന് വേണ്ടപ്പെട്ടവരാണ്. സമദ് കോണ്‍ഗ്രസുകാരന്‍. മറ്റു രണ്ടുപേര്‍ ലീഗുകാരും.
പിടിയിലായവരെ രക്ഷപ്പെടുത്താനാണ് സുധാകരന്റെ നിര്‍ദേശപ്രകാരം യൂത്ത് കോണ്‍ഗ്രസ് അഴീക്കോട് ബ്ലോക്ക് പ്രസിഡന്റ് കല്ലിക്കോടന്‍ രാഗേഷ് വളപട്ടണം സ്റ്റേഷനിലെത്തിയത്.പൊലീസ് ശക്തമായ നിലപാടെടുത്തതോടെ നീക്കം പാളി. ഇതോടെ, കണ്ണൂര്‍ പ്രസ് ക്ലബ്ബില്‍ പകല്‍ 11ന് നിശ്ചയിച്ച വാര്‍ത്താസമ്മേളനം ഉപേക്ഷിച്ച് സുധാകരന് സ്റ്റേഷനിലെത്തി എസ്ഐയെ ഭീഷണിപ്പെടുത്തി ലോക്കപ്പിലുള്ള രഗേഷിനെ ഇറക്കിക്കൊണ്ടുപോകുകയുമായിരുന്നു. മണല്‍മാഫിയയുമായുള്ള ബന്ധം പൊലീസ് ചോദ്യംചെയ്യലില്‍ വെളിപ്പെടുമെന്ന ഭയമായിരുന്നു സുധാകരന്.
സുധാകരനുമായി ബന്ധമുള്ള നാറാത്തെയും കാട്ടാമ്പള്ളിയിലെയും എന്‍ഡിഎഫ്, ലീഗ്, കോണ്‍ഗ്രസ് ക്രിമിനലുകള്‍ അനധികൃതമായി കടത്തുന്ന മണല്‍ ആവശ്യക്കാര്‍ക്ക് വില്‍പ്പന നടത്തുന്നത് സുധാകരന്റെ മരുമകനാണ്. നടാലില്‍ കോണ്‍ഗ്രസ് ഓഫീസ് പ്രവര്‍ത്തിക്കുന്ന നവരശ്മി ക്ലബ്ബിന്റെ പിറകിലുള്ള, ഇയാളുടെ വീട്ടുമുറ്റത്താണ് മണല്‍ ഇറക്കുന്നത്. ഇവിടെനിന്നാണ് മണല്‍ അരിച്ച് വില്‍പ്പന നടത്തുന്നത്. അഴീക്കോട് പൊയ്ത്തുംകടവ്, നാറാത്തെ അനധികൃത കടവായ കല്ലൂരിക്കടവ്, കമ്പില്‍ പന്ന്യങ്കണ്ടിക്കടവ്, കീലത്തുകടവ്, കമ്പില്‍കടവ്, കുമ്മായക്കടവ് എന്നിവിടങ്ങളില്‍നിന്നാണ് ഇവിടുത്തേക്ക് മണല്‍ എത്തിക്കുന്നത്.
ജില്ലാ പൊലീസ് മേധാവിയെയും ഭീഷണിപ്പെടുത്തിയാണ് സുധാകരന് മരുമകന്‍ ഉള്‍പ്പെടെയുള്ള മണല്‍മാഫിയയെ സഹായിക്കുന്നത്. മയ്യില്‍, വളപട്ടണം പൊലീസ് അനധികൃത മണല്‍കടത്ത് തടയുന്നതിന് കര്‍ശന നടപടി സ്വീകരിച്ചത് മാഫിയക്ക് പ്രയാസമുണ്ടാക്കി. പൊലീസില്‍നിന്നുള്ള വിവരം മണല്‍മാഫിയക്ക് ചോര്‍ത്തിനല്‍കിയതിന് മയ്യില്‍ സ്റ്റേഷനിലെ എഎസ്യെയും സീനിയര്‍ സിവില്‍ പൊലീസ് ഓഫീസറെയും സ്ഥലം മാറ്റിയതും തിരിച്ചടിയായി. വളപട്ടണം, മയ്യില്‍ പൊലീസ് ബോട്ടുമാര്‍ഗം നടത്തിയ സംയുക്ത പരിശോധനയും മണല്‍മാഫിയക്ക് പിടിച്ചില്ല. പരിശോധനാവിവരം ചോര്‍ത്തിയ, കോസ്റ്റ്ഗാര്‍ഡ് ബോട്ടിന്റെ ഡ്രൈവറായ എആര്‍ ക്യാമ്പിലെ സിവില്‍ പൊലീസ് ഓഫീസറെ മയ്യില്‍ പൊലീസ് അറസ്റ്റ്ചെയ്തതും മണല്‍മാഫിയെ പ്രതിസന്ധിയിലാക്കി. ഇതിനിടയിലാണ് മണല്‍കടത്തിനിടെ രണ്ടുപേര്‍ വളപട്ടണം പൊലീസിന്റെ പിടിയിലാവുന്നത്. ഈനില തുടര്‍ന്നാല്‍ രക്ഷയില്ലെന്ന് ബോധ്യപ്പെട്ടതിനാലാണ് തന്റെ തണലില്‍ വളരുന്ന മണല്‍മാഫിയക്കുവേണ്ടി സുധാകരന് മറയില്ലാതെ രംഗത്തെത്തിയത്.
deshabhimani
എല്‍പിജിക്ക് വീണ്ടും വില കൂട്ടി, പിന്മാറി
പാചകവാതകവില വീണ്ടും വര്‍ധിപ്പിച്ച തീരുമാനം കടുത്ത പ്രതിഷേധം ഭയന്ന് കേന്ദ്രസര്‍ക്കാര്‍ മരവിപ്പിച്ചു. സബ്സിഡിയില്ലാത്ത ഗാര്‍ഹിക പാചകവാതക സിലിണ്ടറിന് 26.50 രൂപ കൂട്ടാനാണ് വ്യാഴാഴ്ച തീരുമാനിച്ചത്. പൊതുമേഖലാ എണ്ണക്കമ്പനിയായ ഇന്ത്യന്‍ ഓയില്‍ കോര്‍പറേഷന്‍ വിലവര്‍ധന പ്രഖ്യാപിക്കുകയുംചെയ്തു. എന്നാല്‍, രാത്രി ഏറെ വൈകി പെട്രോളിയം മന്ത്രി വീരപ്പ മൊയ്ലി ഇടപെട്ട് വിലവര്‍ധന തീരുമാനം മരവിപ്പിക്കുകയായിരുന്നു.
എണ്ണക്കമ്പനികളുടെ സമ്മര്‍ദ്ദഫലമായാണ് എല്‍പിജി വില വീണ്ടും ഉയര്‍ത്താന്‍ സര്‍ക്കാര്‍ തീരുമാനിച്ചത്. എന്നാല്‍, ഹിമാചല്‍പ്രദേശ്, ഗുജറാത്ത് നിയമസഭാ തെരഞ്ഞെടുപ്പുകള്‍ ആസന്നമായ സാഹചര്യത്തില്‍ ഇത് വലിയ തിരിച്ചടിയാകുമെന്ന വിലയിരുത്തലാണ് തീരുമാനം മരവിപ്പിക്കാന്‍ പ്രേരിപ്പിച്ചത്. ഉത്തരേന്ത്യ ദീപാവലി ആഘോഷത്തിലേക്ക് നീങ്ങവേ വിലവര്‍ധന ജനരോഷം ആളിക്കത്തിക്കുമെന്നും കോണ്‍ഗ്രസ് നേതൃത്വം ഭയന്നു. നവംബര്‍ 21ന് പാര്‍ലമെന്റിന്റെ ശീതകാല സമ്മേളനം ആരംഭിക്കാനിരിക്കുകയാണ്. തൃണമൂല്‍ കോണ്‍ഗ്രസ് പിന്തുണ പിന്‍വലിച്ചതോടെ നിലനില്‍പ്പ് അപകടത്തിലായ യുപിഎ സര്‍ക്കാര്‍, കൂടുതല്‍ പ്രതിഷേധം പാര്‍ലമെന്റില്‍ ഉണ്ടാകുന്നതിനെയും ഭയക്കുന്നു. തൃണമൂല്‍ അവിശ്വാസ പ്രമേയം കൊണ്ടുവരുമെന്നും പ്രഖ്യാപിച്ച സാഹചര്യത്തില്‍ സമാജ്വാദി പാര്‍ടി, ബിഎസ്പി തുടങ്ങിയ പാര്‍ടികളുടെ കൂടി എതിര്‍പ്പിന് എല്‍പിജി വിലവര്‍ധന ശക്തികൂട്ടുമെന്നും ഒരുവിഭാഗം കോണ്‍ഗ്രസ് നേതാക്കള്‍ ചൂണ്ടിക്കാട്ടി. വില നിയന്ത്രിക്കാനുള്ള അധികാരം എണ്ണകമ്പനികള്‍ക്ക് നല്‍കിയശേഷം ഇത് മൂന്നാം തവണയാണ് സിലിണ്ടര്‍ വില വര്‍ധിപ്പിക്കാന്‍ തീരുമാനിച്ചത്.
ഇതോടെ ഡല്‍ഹിയില്‍ ഒരു സിലിണ്ടറിന് 895.50 രൂപയില്‍നിന്ന് 922 രൂപയായി ഉയര്‍ന്നിരുന്നു. എന്നാല്‍, അന്താരാഷ്ട്രവിപണിയില്‍ ക്രൂഡോയിലിന്റെ വില താഴേക്കാണ്. ഒക്ടോബര്‍ 11ന് ബാരലിന് 112.60 ഡോളര്‍ വിലയുണ്ടായിരുന്ന ക്രൂഡോയിലിന് 30ന് 107.65 ഡോളറായി ഇടിഞ്ഞു. രൂപകണക്കില്‍ ബാരലിന് ഒക്ടോബര്‍ 11ന് 5975.68 ആയിരുന്നത് 5831.40 ആയി. 144 രൂപയുടെ കുറവ്. നവംബര്‍ ഒന്നിന് ഡോളറിന് 53.84 രൂപയാണ് വിനിമയനിരക്ക്. അതായത് ക്രൂഡോയിലിന്റെ ഡോളര്‍ കണക്കിലുള്ള വിലയും ഡോളറുമായുള്ള രൂപയുടെ വിനിമയമൂല്യവും നോക്കിയാലും ക്രൂഡോയില്‍ ഇറക്കുമതിക്ക് കഴിഞ്ഞ മാസത്തേക്കാള്‍ ചെലവ് കുറഞ്ഞു. ഇതൊന്നും കണക്കിലെടുക്കാതെ പെട്രോളിയം ഉല്‍പ്പന്നങ്ങളുടെ വില വര്‍ധിപ്പിക്കുകയാണ് സര്‍ക്കാര്‍.
(വി ജയിന്‍)
deshabhimani
Subscribe to:
Posts (Atom)