പിറവത്ത് എംപിയും മന്ത്രിയും "ഉദ്ഘാടനപ്പാച്ചിലില്‍"

പിറവം: തെരഞ്ഞെടുപ്പുപ്രഖ്യാപനം ഏതുസമയത്തുമുണ്ടാകുമെന്ന അഭ്യൂഹങ്ങള്‍ക്കിടെ മന്ത്രി അനൂപ് ജേക്കബും ജോസ് കെ മാണി എംപിയും ഉദ്ഘാടനമേളകളുമായി രംഗത്ത്. വെള്ളിയാഴ്ച പിറവം പഞ്ചായത്തില്‍ത്തന്നെ അഞ്ച് ഉദ്ഘാടനമാണ് നടന്നത്. ഇവയില്‍ പലതും രണ്ടാം ഉദ്ഘാടനങ്ങളാണെന്ന തിരിച്ചറിവുപോലുമില്ലാതെയാണ് ഇരുവരുടെയും പാച്ചില്‍. നാടമുറിച്ചും ശിലാഫലകം അനാച്ഛാദനംചെയ്തും അടുത്ത സമ്മേളനഗരയിലേക്കുള്ള ഓട്ടമാണ്. പിറവം കണ്ണീറ്റുമലയില്‍ പഞ്ചായത്തുവക മാലിന്യസംസ്കരണ പ്ലാന്റിന്റെ മുറ്റത്താണ് ആധുനിക ശ്മശാനത്തിന്റെ തറക്കല്ലിടീല്‍ മന്ത്രി അനൂപ് ജേക്കബ് നിര്‍വഹിച്ചത്. 23 സെന്റ് സ്ഥലത്ത് സ്ഥിതിചെയ്യുന്ന പ്ലാന്റിനു സമീപം മാലിന്യങ്ങള്‍ വകഞ്ഞുമാറ്റി ശിലാസ്ഥാപനത്തിന് സ്ഥലമൊരുക്കുകയായിരുന്നു. കൊച്ചി റിഫൈനറി നല്‍കുന്ന അരക്കോടിയോളം രൂപയുടെ പദ്ധതിയാണ് സ്ഥലം ഏറ്റെടുക്കാതെയും ശ്മശാനത്തിന്റെ പ്രാരംഭനടപടികള്‍പോലും പൂര്‍ത്തിയാക്കാതെയും തറക്കല്ലിടീല്‍ നടത്തിയത്. കാറുകളിലും ബൈക്കുകളിലുമെത്തിയ മുപ്പതോളംവരുന്ന യുഡിഎഫ് പ്രവര്‍ത്തകരാണ് ചടങ്ങില്‍ പങ്കെടുത്തത്. ജോസ് കെ മാണി എംപി മുഖ്യപ്രഭാഷണം നടത്തി.

പിറവം മിനി സിവില്‍ സ്റ്റേഷനില്‍ കഴിഞ്ഞയാഴ്ച നടന്ന ചടങ്ങില്‍ അക്ഷയ സെന്ററിന്റേയും ഡിടിപിസി റെയില്‍വേ ടിക്കറ്റ് ബുക്കിങ് കേന്ദ്രത്തിന്റേയും ഉദ്ഘാടനം നടത്തി. എന്നാല്‍, എംപി അന്ന് ചടങ്ങിനെത്താതിരുന്നതുകൊണ്ട് വെള്ളിയാഴ്ച വീണ്ടും ഉദ്ഘാനം നടത്തുകയായിരുന്നു. എംപിയുടെ അസൗകര്യം പരിഗണിച്ച് നോട്ടീസില്‍നിന്ന് വ്യത്യസ്തമായി ടിക്കറ്റ്കൗണ്ടര്‍ ഉദ്ഘാടനം മാറ്റിവച്ചിരുന്നതായാണ് അധികൃതരുടെ വിശദീകരണം. പഞ്ചായത്തിന്റെ ഉടമസ്ഥതയിലുള്ള കുട്ടികളുടെ പാര്‍ക്കിലെ ഓപ്പണ്‍ എയര്‍ സ്റ്റേഡിയത്തിന്റെ മുകളില്‍ ഷീറ്റിട്ടതിന്റെ ഉദ്ഘാടനവും വെള്ളിയാഴ്ച നടന്നു. എല്ലാ ഭാഗവും കെട്ടിമറച്ച് പൊക്കംകൂടിയ മരങ്ങളും ചെടികളും മുറിച്ച് നടത്തിയ നവീകരണംമൂലം ഇവിടെ കാറ്റുപോലും കടക്കാത്ത അവസ്ഥയാണ്. പാഴൂരില്‍ മുന്‍ പഞ്ചായത്ത് പണിതീര്‍ത്ത കുടുംബക്ഷേമകേന്ദ്രത്തില്‍ എന്‍ആര്‍എച്ച്എം ആയുര്‍വേദ ഡോക്ടറെ നിയമിച്ച് ഡിസ്പെന്‍സറിയായി ഉയര്‍ത്തിയും ഉദ്ഘാടനം നടത്തി. അടുത്തവര്‍ഷത്തെ പദ്ധതിയില്‍ ഉള്‍പ്പെടുത്തിയ പിറവം ബ്ലോക്ക് പഞ്ചായത്ത് തൊഴിലുറപ്പുപദ്ധതിയുടെ ഓഫീസ്നിര്‍മാണ ഉദ്ഘാടനമടക്കം ടെന്‍ഡര്‍ നടപടികള്‍ തുടങ്ങാത്ത പദ്ധതികള്‍വരെ കഴിഞ്ഞ ഒരാഴ്ചയ്ക്കിടെ ഉദ്ഘാടനംചെയ്തു. കൂത്താട്ടുകുളം കെഎസ്ആര്‍ടിസി ഡിപ്പോയുടെ രണ്ടാം ഉദ്ഘാടനം ഏറെ വിവാദമുയര്‍ത്തിയിരുന്നു.

ഉദ്ഘാടനച്ചെലവില്‍നിന്നു കൈയിട്ടുവാരാന്‍ കോണ്‍ഗ്രസ് നേതാക്കള്‍

പിറവം: മണ്ഡലത്തില്‍ നടക്കുന്ന ഉദ്ഘാടനങ്ങളുടെ പേരില്‍ പ്രാദേശിക കോണ്‍ഗ്രസ് നേതാക്കള്‍ വന്‍തുക തട്ടുന്നതായി ആരോപണം. ഒരുകോടി രൂപ എംഎല്‍എ ഫണ്ട് ഉപയോഗിച്ചു നിര്‍മിക്കുന്ന പിറവം ബസ്സ്റ്റാന്‍ഡ് കം ഷോപ്പിങ് കോംപ്ലക്സ് നിര്‍മാണോദ്ഘാടനത്തിനായി പഞ്ചായത്തിലെ മുഖ്യചുമതലക്കാരന് 50,000 രൂപ നല്‍കിയിരുന്നു. രണ്ടാഴ്ചകഴിഞ്ഞ് വീണ്ടും ഇതര ചെലവുകള്‍ക്കായി ഒരു ലക്ഷംരൂപ കൂടി ഇയാള്‍ ആവശ്യപ്പെട്ടതായും പറയപ്പെടുന്നു.

അതിനിടെ കെട്ടിടത്തിന്റെ കാല്‍ ഉറപ്പിക്കുന്ന ഭാഗത്ത് മുന്‍ കെട്ടിടത്തിന്റെ അവശിഷ്ടങ്ങള്‍ നീക്കാത്തതിനാല്‍ ഇപ്പോള്‍ പണികള്‍ നിര്‍ത്തിവച്ചിരിക്കുകയാണ്. നിര്‍മാണോദ്ഘാടനങ്ങള്‍ നടത്തുന്ന ചെലവുപറഞ്ഞ് ആകെ അടങ്കല്‍ത്തുകയുടെ രണ്ടു ശതമാനംവരെ ഇത്തരത്തില്‍ കോണ്‍ഗ്രസ് നേതാക്കള്‍ ഈടാക്കാറുള്ളതായി ആക്ഷേപമുണ്ട്. കെട്ടിടംപൂര്‍ത്തീകരിക്കുന്നതോടെ മൂന്നു ശതമാനത്തിനുമേല്‍ തുക ഇത്തരത്തില്‍ നഷ്ടപ്പെടുകയുംചെയ്യും. മേഖലയില്‍ നടക്കുന്ന ചെറുതും വലുതുമായ നിര്‍മാണങ്ങളില്‍ നേതാക്കളുടെ വലുപ്പച്ചെറുപ്പമനുസരിച്ച് നിശ്ചിത ശതമാനം തുക വീതംവയ്ക്കപ്പെടുന്നുണ്ടെന്നാണ് എ-ഐ ഗ്രൂപ്പിലുള്ളവര്‍ പരസ്പരം പഴിചാരുന്നത്. മണീടില്‍ നാലും രാമമംഗലത്ത് അഞ്ചും ഉദ്ഘാടനപരിപാടികളില്‍ മന്ത്രി അനൂപ് ജേക്കബും ജോസ് കെ മാണി എംപിയും വെള്ളിയാഴ്ച പങ്കെടുത്തു.

deshabhimani

പിറവം പണപ്പിരിവിനെച്ചൊല്ലി ജേക്കബ് ഗ്രൂപ്പില്‍ വാഗ്വാദം

പിറവം ഉപതെരഞ്ഞെടുപ്പിന്റെ പേരില്‍ പിരിച്ചുകൂട്ടിയ ലക്ഷക്കണക്കിനു രൂപ പാര്‍ടി ചെയര്‍മാന്‍ ജോണി നെല്ലൂര്‍ അടിച്ചുമാറ്റിയതായി പാര്‍ടി ജനറല്‍ സെക്രട്ടറിയുടെ ആരോപണം. ആരോപണം ഉന്നയിച്ചയാള്‍ കോട്ടയത്തെ റേഷന്‍ മൊത്തവില്‍പ്പനക്കാരനില്‍നിന്ന് 50 ലക്ഷം കൈക്കൂലി വാങ്ങിയെന്ന് ജോണി നെല്ലൂര്‍ വിഭാഗം. ആരോപണ പ്രത്യാരോപണങ്ങളെത്തുടര്‍ന്ന് കേരള കോണ്‍ഗ്രസ് ജേക്കബ് വിഭാഗം സംസ്ഥാന നിര്‍വാഹക സമിതിയോഗത്തില്‍ രൂക്ഷമായ വാദപ്രതിവാദം. കുറച്ചുകാലമായി പാര്‍ടിയില്‍ നിലനില്‍ക്കുന്ന ചേരിപ്പോര് ഇതോടെ രൂക്ഷമായി.

മന്ത്രി അനൂപ് ജേക്കബിന്റെ ഔദ്യോഗികവസതിയില്‍ കൂടിയ യോഗത്തിലാണ് ജോണി നെല്ലൂര്‍ പിരിച്ച തുക കണക്കില്‍ വന്നിട്ടില്ലെന്ന് കോട്ടയത്തുനിന്നുള്ള ജനറല്‍ സെക്രട്ടറി പറഞ്ഞത്. റീട്ടെയില്‍ റേഷന്‍ ഡീലേഴ്സ് അസോസിയേഷന്‍ സംസ്ഥാന പ്രസിഡന്റായ ജോണി നെല്ലൂര്‍ റേഷന്‍കട ഉടമകളില്‍നിന്ന് 2000 രൂപവരെ തെരഞ്ഞെടുപ്പുഫണ്ടിലേക്ക് സംഭാവന വാങ്ങിയെന്നും അങ്ങിനെ ലഭിച്ച 60 ലക്ഷത്തിലേറെ രൂപ അടിച്ചുമാറ്റിയെന്നുമായിരുന്നു ആരോപണം. എന്നാല്‍, അജന്‍ഡയില്‍ ഇല്ലാത്ത കാര്യങ്ങള്‍ ചര്‍ച്ചചെയ്യാനാവില്ലെന്നു പറഞ്ഞ് ജോണി നെല്ലൂര്‍ ചര്‍ച്ച തടഞ്ഞതായി എതിര്‍ വിഭാഗം പറഞ്ഞു. പിറവം തെരഞ്ഞെടുപ്പില്‍ പാര്‍ടിക്ക് കാര്യമായ പണം ചെലവായില്ലെന്നും പിരിച്ച തുകയില്‍ വലിയൊരുഭാഗം കണക്കില്‍ ചേര്‍ക്കാതെ ജോണി നെല്ലൂര്‍ അടിച്ചുമാറ്റിയയെന്നും എതിര്‍വിഭാഗം ആരോപിക്കുന്നു. തെരഞ്ഞെടുപ്പ് ചെലവ് മുഴുവന്‍ മുന്നണിയാണ് വഹിച്ചതെന്നും ഈ നേതാക്കള്‍ പറയുന്നു.

അതേസമയം, തനിക്കെതിരെ ആരോപണമുന്നയിച്ച നേതാവ്കോട്ടയത്ത് റേഷന്‍ മൊത്തവില്‍പ്പനകേന്ദ്രം അനുവദിച്ചതു വഴി ഏതാണ്ട് 50 ലക്ഷത്തോളം രൂപ വാങ്ങിയെന്നാണ് ജോണി നെല്ലൂര്‍ ആരോപിക്കുന്നത്. ആരോപണം ഇനിയും ഉയര്‍ത്തിയാല്‍ ഇയാള്‍ക്കെതിരെ നടപടിയെടുക്കാനാണ് നെല്ലൂരിന്റെ നീക്കമെന്നും അറിയുന്നു. അനൂപ് ജേക്കബിനെ പിന്തുണയ്ക്കുന്നവരും ജോണി നെല്ലൂരിനെ പിന്തുണയ്ക്കുന്നവരും തമ്മിലുള്ള ചേരിപ്പോര് പാര്‍ടിയില്‍ രൂക്ഷമാവുകയാണ്. സ്വന്തം നേട്ടത്തിന് അനൂപിനെ താഴ്ത്തിക്കെട്ടാനും പാര്‍ടിയെ കേരള കോണ്‍ഗ്രസ് എമ്മില്‍ ലയിപ്പിക്കുന്നതിനുമുള്ള ശ്രമമാണ് ജോണി നെല്ലൂര്‍ നടത്തുന്നതെന്നും ഇവര്‍ ആരോപിക്കുന്നു. പാര്‍ടി ചെയര്‍മാനും മന്ത്രിക്കും പുറമെ ആറ് ജനറല്‍ സെക്രട്ടറിമാരും രണ്ട് വൈസ് ചെയര്‍മാന്‍മാരും ട്രഷററുമാണ് തിരുവനന്തപുരത്തെ യോഗത്തില്‍ പങ്കെടുത്തത്.

deshabhimani 040712

അനൂപ് മന്ത്രിയാകുംമുമ്പേ ബസ് പിറവം വഴി; ജീവനക്കാര്‍ക്ക് പ്രതിഷേധം

അനൂപ് ജേക്കബ് മന്ത്രിയാകും മുമ്പേ കെഎസ്ആര്‍ടിസി ബസിന്റെ റൂട്ട് മാറ്റി പിറവം വഴിയാക്കി, ട്രിപ്പ് നഷ്ടത്തിലാക്കാനുള്ള അധികൃതരുടെ നടപടിയില്‍ ജീവനക്കാര്‍ പ്രതിഷേധിച്ചു. എംസി റോഡ് വഴി ഏറ്റുമാനൂര്‍-കുറവിലങ്ങാട്-കൂത്താട്ടുകുളം റൂട്ടില്‍ ലാഭകരമായി സര്‍വീസ് നടത്തിവന്ന കോട്ടയം-ബംഗളൂരു ബസാണ് കടുത്തുരുത്തി-പിറവം-കൂത്താട്ടുകുളം വഴി റൂട്ട് മാറ്റാന്‍ ഉത്തരവായിരിക്കുന്നത്. ശരാശരി ഒരു ട്രിപ്പിന് 35,000 മുതല്‍ 40,000 രൂപ വരെ കളക്ഷനുള്ള ബസാണിത്. റൂട്ട് മാറുന്നതോടെ കളക്ഷന്‍ കുറയുമെന്ന് ജീവനക്കാര്‍ പറഞ്ഞു. ചങ്ങനാശേരിയില്‍ നിന്ന് എം സി റോഡ് വഴി വേളാങ്കണ്ണിക്ക് സര്‍വീസ് നടത്തിവന്ന ബസ് കഴിഞ്ഞദിവസം പിറവം വഴി റൂട്ട് മാറ്റിയിരുന്നു. അതോടെ ആ ട്രിപ്പിന് 12,000 രൂപയോളം കളക്ഷന്‍ കുറഞ്ഞു. ഇതേ അനുഭവമാകും ബംഗ്ലൂര്‍ ബസിനും.

അടുത്തിടെ മുഖ്യമന്ത്രിയും ധനമന്ത്രിയും ഉള്‍പ്പെടെ ഇടപെട്ട് കോട്ടയത്തുനിന്ന് തുടങ്ങിയ അരഡസനിലേറെ ട്രിപ്പുകള്‍ നഷ്ടത്തിലാണ്. കോര്‍പറേഷന്റെ ഭാവി അനിശ്ചിതത്വത്തിലാക്കുന്ന ഇത്തരം നടപടികളില്‍ നിന്ന് അധികാരികള്‍ പിന്മാറണമെന്ന് കെഎസ്ആര്‍ടിഇഎ (സിഐടിയു) അധികൃതരോട് ആവശ്യപ്പെട്ടു.

മിനി ബസുകള്‍ പൊളിച്ചുവില്‍ക്കാന്‍ നീക്കം

ബസില്ലെന്ന കാരണംപറഞ്ഞ് കെഎസ്ആര്‍ടിസി സര്‍വിസുകള്‍ വെട്ടിക്കുറച്ചു. നിലവിലുണ്ടായിരുന്ന നാല് സര്‍വീസുകള്‍ റൂട്ടുമാറ്റി ഓടിച്ച് പുതിയ സര്‍വീസുകള്‍ ആരംഭിച്ചതായി അധികൃതര്‍ പ്രചരിപ്പിച്ചു. മുന്‍ യുഡിഎഫ് സര്‍ക്കാരിന്റെ കാലത്ത് വാങ്ങിയ മിനിബസുകള്‍ കൂട്ടത്തോടെ പൊളിച്ചുവില്‍ക്കാനും നീക്കം. സ്പെയര്‍ പാര്‍ട്സുകള്‍ മറിച്ചുവിറ്റ് ലക്ഷങ്ങളുടെ അഴിമതി നടത്താനും ശ്രമം. മുഹമ്മ- കഞ്ഞിക്കുഴി റൂട്ടില്‍ പുതുതായി നാല് സര്‍വീസ് തുടങ്ങിയതായാണ് കെഎസ്ആര്‍ടിസി ആലപ്പുഴ ഡിപ്പോയിലെ അധികൃതര്‍ പ്രചരിപ്പിച്ചത്. കേന്ദ്ര സഹമന്ത്രിയെക്കൊണ്ട് ഉദ്ഘാടനവും സംഘടിപ്പിച്ചു. എന്നാല്‍ നിലവിലുണ്ടായിരുന്ന സര്‍വീസുകള്‍ റൂട്ടുമാറ്റി ഓടിച്ചാണ് ഉദ്ഘാടനം സംഘടിപ്പിച്ചത്. രാവിലെ 6.30ന് ആലപ്പുഴയില്‍നിന്ന് പുറപ്പെട്ടിരുന്ന ഷണ്‍മുഖപുരം- മണ്ണഞ്ചേരി സര്‍വീസാണ് രാവിലെ ആറിന് മുഹമ്മ-കഞ്ഞിക്കുഴി വഴി ചേര്‍ത്തല സര്‍വീസാക്കി മാറ്റിയത്. ഇതുപോലെ 7.55ന് മുഹമ്മ- വിയാനി സര്‍വീസും 7.10നുള്ള ചേര്‍ത്തല- ആര്യാട് പിച്ച്സി സര്‍വീസും 6.05നുള്ള ചേര്‍ത്തല സര്‍വീസുമാണ് സമയക്രമവും റൂട്ടും മാറ്റി ഓടിച്ച് മുഹമ്മ- കഞ്ഞിക്കുഴി റൂട്ടില്‍ പുതിയ സര്‍വീസെന്ന പേരില്‍ ഉദ്ഘാടനംചെയ്തത്.

ഇതുകൂടാതെ ആലപ്പുഴ ഡിപ്പോയില്‍നിന്ന് വിവിധ സ്ഥലങ്ങളിലേക്കുള്ള പതിനൊന്നോളം സര്‍വീസുകളും വെട്ടിക്കുറച്ചു. രാവിലെ 7.30ന് തണ്ണീര്‍മുക്കം, 7.20ന് വെളിയനാട്, 6.35ന് കൈപ്പുഴമുട്ട്- കോട്ടയം, 7.30ന് കൈപ്പുഴമുട്ട് കോട്ടയം, 6.25ന് വൈക്കം, 5.50ന് ചേര്‍ത്തല, 7.30ന് തിരുവല്ല, 7.40ന് വലിയഴീക്കല്‍, 6.15ന് ഹരിപ്പാട്, 8.00 എറണാകുളം, 8.30ന് എറണാകുളം എന്നീ സര്‍വീസുകളാണ് വെട്ടിക്കുറച്ചത്. മറ്റു ഡിപ്പോകളിലും സര്‍വീസ് വെട്ടിക്കുറയ്ക്കല്‍ തുടരുന്നു. അഞ്ചുമുതല്‍ 28വരെ സര്‍വീസുകളാണ് ജില്ലയിലെ ഓരോ ഡിപ്പോകളിലും ദിനംപ്രതി വെട്ടിക്കുറയ്ക്കുന്നത്. ദേശസാല്‍കൃത റൂട്ടുകളിലെയും ഇടറൂട്ടുകളിലെയും യാത്രക്കാരാണ് ഏറെ ദുരിതമനുഭവിക്കുന്നത്.

ഗണേശ്കുമാര്‍ മന്ത്രിയായിരുന്നപ്പോള്‍ വാങ്ങിയ "ലജ്ജാവതികള്‍" (മിനി ബസുകള്‍) ഒന്നും ഇപ്പോള്‍ നിരത്തിലിറങ്ങുന്നില്ല. സ്പെയര്‍പാര്‍ട്സുകള്‍ കിട്ടാനില്ലെന്നാണ് അധികൃതര്‍ പറയുന്നത്. ഇടറൂട്ടുകളിലെ സര്‍വീസ് ഇതുമൂലം പാടെ നിലച്ചു. കട്ടപ്പുറത്തായതിനെത്തുടര്‍ന്ന് 165 ലേറെ മിനിബസുകള്‍ പൊളിച്ചുവില്‍ക്കുന്നതിനായി മാവേലിക്കര റീജിയണല്‍ വര്‍ക്ഷോപ്പിലെത്തിച്ചു. ഈ ബസുകള്‍ക്കായി വാങ്ങിയ 75 ലക്ഷത്തോളം രൂപയുടെ പാര്‍ട്സുകള്‍ കുറഞ്ഞവിലയ്ക്ക് ലേലംചെയ്തുവില്‍ക്കാനും നീക്കമുണ്ട്. ഇതില്‍ ലക്ഷക്കണക്കിനു രൂപയുടെ അഴിമതിയുള്ളതായും ആരോപണമുണ്ട്.

deshabhimani 060412

പിറവത്ത് സംഭവിച്ചത്

പിറവത്ത് യുഡിഎഫ് സ്ഥാനാര്‍ത്ഥി അനൂപ് ജേക്കബ് 12070 വോട്ടിെന്‍റ ഭൂരിപക്ഷത്തോടെ വിജയിച്ചത് പലര്‍ക്കും അത്ഭുതകരമായി തോന്നാം - പ്രത്യേകിച്ച് 2011ലെ 157 വോട്ട് ഭൂരിപക്ഷവുമായി താരതമ്യം ചെയ്യുമ്പോള്‍ . ഈ ഉപതിരഞ്ഞെടുപ്പില്‍ യുഡിഎഫിെന്‍റ വിജയം വ്യക്തമായ ഭൂരിപക്ഷത്തോടെയാണ്, 12 പഞ്ചായത്തുകളില്‍ 10ലും ഭൂരിപക്ഷം നേടിക്കൊണ്ടാണ്. പക്ഷേ, ഇതില്‍ അത്ഭുതത്തിന് അവകാശമില്ല. കാരണങ്ങള്‍ നാലാണ്. ഒന്നാമത്, പിറവം അതിെന്‍റ പിറവിമുതല്‍ ഒരു യുഡിഎഫ് മണ്ഡലമാണ്.

2009ലെ ലോകസഭാ തിരഞ്ഞെടുപ്പോടെയാണ് പഴയ മണ്ഡലങ്ങള്‍ പുന:സംഘടിപ്പിക്കപ്പെട്ടത്. അത് ഫലത്തില്‍ യുഡിഎഫ് സ്വാധീനത്തെ അരക്കിട്ടുറപ്പിക്കുകയാണ് ചെയ്തത്. 1977 മുതല്‍ ഇതേവരെ നടന്ന തിരഞ്ഞെടുപ്പുകളില്‍ പിറവത്ത് മൂന്നുതവണ മാത്രമാണ് എല്‍ഡിഎഫ് വിജയിക്കുകയോ വിജയത്തോട് അടുക്കുകയോ ചെയ്തത്. 1987, 2006, 2011. ഈ വര്‍ഷങ്ങളിലെല്ലാം യുഡിഎഫില്‍ അനൈക്യം ഉണ്ടായിരുന്നു. 1987ല്‍ കോണ്‍ഗ്രസ് വിമത സ്ഥാനാര്‍ത്ഥി ഉണ്ടായിരുന്നു. 2006ലും 2011ലും കോണ്‍ഗ്രസുകാരില്‍ ഒരു വിഭാഗം ടി എം ജേക്കബിന് വോട്ട് ചെയ്തിരുന്നില്ല. കെപിസിസി പ്രസിഡന്റ് രമേശ് ചെന്നിത്തല തന്നെ ഇത് പറഞ്ഞിട്ടുണ്ട്. ഇത്തവണ നിലനില്‍പിെന്‍റ പ്രശ്നമായതുകൊണ്ട് അവിടെ യുഡിഎഫിലെ ഘടകകക്ഷികളെല്ലാം, എല്ലാ തര്‍ക്കങ്ങളും മാറ്റിവെച്ച് ഒന്നിച്ചുനിന്നു പ്രവര്‍ത്തിച്ചു. അനൂപ് ജേക്കബിെന്‍റ വിജയത്തിെന്‍റ ഒരു പ്രധാന ഘടകം അതാണ്.

രണ്ടാമത്തെ കാരണം അധികാര ദുര്‍വിനിയോഗമാണ്. പുതിയ വോട്ടര്‍മാരെ ചേര്‍ക്കുന്നതു മുതല്‍ക്ക്, ആ മണ്ഡലത്തിലേക്ക് യുഡിഎഫിെന്‍റ, പ്രത്യേകിച്ച് കോണ്‍ഗ്രസിെന്‍റ നിയന്ത്രണത്തിലുള്ള ഉദ്യോഗസ്ഥരെ മാറ്റി സ്ഥാപിക്കുന്നതു മുതല്‍ക്ക് അത് ആരംഭിച്ചു. ഇതുമായി ബന്ധപ്പെട്ട് അവര്‍ നടത്തിയ പല അതിരുകടന്ന നടപടികളെ തുടര്‍ന്ന് ആ തന്ത്രം പരസ്യമായി. അതുകൊണ്ടും പ്രകടമായ ചട്ടലംഘനം ഉണ്ടായതുകൊണ്ടും അത്തരം ചില നടപടികള്‍ വിജയിച്ചില്ല. ഒരു ഡസന്‍ മന്ത്രിമാര്‍ക്കായിരുന്നു ഓരോ പഞ്ചായത്തിെന്‍റയും ചുമതല. ഈ മന്ത്രിമാരെല്ലാം തങ്ങളുടെ വകുപ്പുകളുമായി ബന്ധപ്പെട്ട് വഴിവിട്ട പല കാര്യങ്ങളും വാഗ്ദാനമായോ അല്ലാതെയോ നല്‍കി. മറ്റ് വകുപ്പുകളുമായി ബന്ധപ്പെട്ടും അങ്ങനെ ചെയ്തു. തിരഞ്ഞെടുപ്പ് പ്രചരണത്തിനിടയിലും മുഖ്യമന്ത്രി നിവേദനം സ്വീകരിച്ച് ഉടനുടന്‍ നടപടി കൈക്കൊണ്ടിരുന്നു. വോട്ടര്‍മാരെ സ്വാധീനിക്കാനായി ഭരണയന്ത്രത്തെ ദുരുപയോഗപ്പെടുത്തി അവര്‍ കൈക്കൊണ്ട നടപടികള്‍ പലതും തിരഞ്ഞെടുപ്പ് ചട്ടങ്ങളെയും ജനാധിപത്യ മര്യാദകളെയും കീഴ്വഴക്കങ്ങളെയും നഗ്നമായി ലംഘിക്കുന്നവയായിരുന്നു. അവരുടെ ഇത്തരം നടപടികളുടെ കൂടി ഫലമായിട്ടാണ് വോട്ടിങ് ശതമാനം 86.3 ആയി ഉയര്‍ന്നത്.

സമുദായ പ്രീണനമായിരുന്നു മൂന്നാമത്തെ കാരണം. പിറവത്ത് പ്രധാനമായി യാക്കോബായ, സിറിയന്‍ ക്രിസ്ത്യന്‍ , ഓര്‍ത്തഡോക്സ് സഭാ വിശ്വാസികളും നായര്‍ , ഈഴവ സമുദായങ്ങളും അങ്ങിങ്ങായി മുസ്ലീം വിഭാഗവുമുണ്ട്. ഇവരെയെല്ലാം പ്രീതിപ്പെടുത്താനുള്ള ശ്രദ്ധ വിപുലമായിത്തന്നെ യുഡിഎഫ് നടത്തി. എന്‍എസ്എസിനെ പാട്ടിലാക്കാന്‍ , കോടിക്കണക്കിന് രൂപയുടെ വില വരുന്ന സര്‍ക്കാര്‍ ഭൂമി സംസ്ഥാനത്തില്‍ പല ഭാഗങ്ങളില്‍ അവര്‍ക്ക് പാട്ടത്തിന് നല്‍കിയിരുന്നത്, ലക്ഷക്കണക്കിന് രൂപ വരുന്ന പാട്ടക്കുടിശ്ശികയൊക്കെ റദ്ദാക്കി അവര്‍ക്ക് പതിച്ചുനല്‍കി. ഇങ്ങനെ ഓരോ അപ്പക്കഷണങ്ങള്‍ കിട്ടുമ്പോഴാണ് എന്‍എസ്എസ് ജനറല്‍സെക്രട്ടറി സുകുമാരന്‍നായര്‍ യുഡിഎഫിലേക്ക് എന്‍എസ്എസില്‍നിന്നുള്ള ശരിദൂരം അളന്നു കണ്ടുപിടിച്ചത്. കാട്ടിലെ മരം, തേവരുടെ ആന എന്ന പഴയ ചൊല്ലിെന്‍റ പുതിയ രൂപമാണ് ശരിദൂരം എന്ന് ജനത്തിന് മനസ്സിലായി. ഏതാണ്ട് ഇതേ രീതിയില്‍ എസ്എന്‍ഡിപി ജനറല്‍ സെക്രട്ടറി വെള്ളാപ്പള്ളി നടേശനും പ്രസ്താവന ഇറക്കി. ക്രിസ്തീയ സഭകളില്‍ യാക്കോബായ-ഓര്‍ത്തഡോക്സ് വിഭാഗങ്ങള്‍ തമ്മിലുള്ള പോര് രൂക്ഷമായ ഒരു പ്രദേശമാണ് പിറവം. അവിടെ യാക്കോബായക്കാര്‍ക്കാണ് ഭൂരിപക്ഷം. അവര്‍ക്ക് പല കാരണങ്ങളാലും കുറച്ചുകാലമായി യുഡിഎഫിനോട് അതൃപ്തിയുണ്ടായിരുന്നു. എന്നാല്‍ , ഇത്തവണ പല അടവുകളും പയറ്റി യുഡിഎഫ് നേതൃത്വം അവരെ പാട്ടിലാക്കി എന്നും പാലം കടന്നപ്പോള്‍ കൂരായണശൈലിയില്‍ പ്രവര്‍ത്തിച്ചു എന്നും യാക്കോബായ സമുദായ പ്രമാണിമാരുടെ വാക്കുകളിലൂടെതന്നെ സ്പഷ്ടമായി. യാക്കോബായക്കാരെ യുഡിഎഫ് നേതൃത്വം പാട്ടിലാക്കുന്നതില്‍ ഓര്‍ത്തഡോക്സ് വിഭാഗത്തിന് ഉല്‍ക്കണ്ഠയുണ്ടായിരുന്നു. അതും വെളിവാക്കപ്പെട്ടിരുന്നു. എങ്കിലും ആ വിഭാഗങ്ങളും സിറിയന്‍ കത്തോലിക്കരും പൊതുവില്‍ യുഡിഎഫിനെ പിന്താങ്ങുകയാണ് ഈ തിരഞ്ഞെടുപ്പിലുണ്ടായത്. നാലാമത്തെ കാരണം ഉമ്മന്‍ചാണ്ടി ഘടകമാണ്. പിറവം മണ്ഡലത്തിലാകെ ക്രിസ്ത്യാനികള്‍ക്കിടയില്‍ നടത്തപ്പെട്ട ഒരു പ്രചരണം, ഇത് കുറെക്കാലത്തേക്ക് അവരെ സംബന്ധിച്ചിടത്തോളം അവസാന ചാന്‍സാണ് എന്നാണ്.

പിറവത്ത് യുഡിഎഫ് തോറ്റാല്‍ ഉമ്മന്‍ചാണ്ടിക്ക് മുഖ്യമന്ത്രിയായി തുടരാനാവില്ല. ഉമ്മന്‍ചാണ്ടി പോയാല്‍ ഒരു ക്രിസ്ത്യാനി മുഖ്യമന്ത്രി അടുത്തൊന്നും കോണ്‍ഗ്രസില്‍നിന്ന് ഉയര്‍ന്നുവരാനില്ല. മറ്റ് ഘടകകക്ഷികളുടെ കാര്യവും വ്യത്യസ്തമല്ല. അതിനാല്‍ കഴിഞ്ഞ തവണതന്നെ ഒരു ടേം മുഴുവന്‍ അധികാരത്തിലിരിക്കാന്‍ കഴിയാതിരുന്ന ഉമ്മന്‍ചാണ്ടിയുടെ അവസാന ചാന്‍സാണ് ഇത്. ഇതായിരുന്നു എല്ലാ ക്രിസ്ത്യന്‍ വിഭാഗങ്ങളിലും അവിടെ രഹസ്യമായി നടത്തപ്പെട്ട പ്രചരണം. ഇതെല്ലാം - ടി എം ജേക്കബിെന്‍റ നിര്യാണത്തിലുള്ള അനുതാപം, ഉമ്മന്‍ചാണ്ടിയോട് മറ്റൊരു തരത്തിലുള്ള അനുതാപം, കോണ്‍ഗ്രസിലെയും പൊതുവില്‍ യുഡിഎഫിലെയും പടലപിണക്കം പിറവത്ത് ഒഴിവാക്കിയത്-ചേര്‍ന്നപ്പോഴാണ് പിറവത്ത് യുഡിഎഫിന് 12070 വോട്ടിെന്‍റ ഭൂരിപക്ഷമുണ്ടായത്. ഈ അടിയൊഴുക്കുകളും മേലൊഴുക്കുകളുമെല്ലാം ഉണ്ടായിട്ടും എല്‍ഡിഎഫിന് 2011ല്‍ ലഭിച്ച വോട്ടില്‍ ഒന്നും നഷ്ടപ്പെട്ടില്ല. മാത്രമല്ല, 4000ല്‍ പരം വോട്ട് പുതുതായി ലഭിക്കുകയും ചെയ്തു. മുമ്പ് ചെയ്യപ്പെടാതിരുന്ന കോണ്‍ഗ്രസ് വോട്ടും ടി എം ജേക്കബ്-ഉമ്മന്‍ചാണ്ടി അനുഭാവ ഒഴുക്കും ഉണ്ടായപ്പോള്‍ യുഡിഎഫിന്റെ വോട്ട് ഗണ്യമായി വര്‍ധിച്ചു.

അതേസമയം എല്‍ഡിഎഫ് നേരത്തെ ലഭിച്ച വോട്ട് നിലനിര്‍ത്തുക മാത്രമല്ല, പുതിയ നേട്ടങ്ങള്‍ കൈവരിക്കുകയും ചെയ്തു. ഇതു കാണിക്കുന്നത് പിറവത്ത് എല്‍ഡിഎഫിന്റെ അടിത്തറയില്‍ ചോര്‍ച്ച ഉണ്ടായിട്ടില്ല എന്നും അത് കുറച്ചുകൂടി ശക്തിയാര്‍ജ്ജിച്ചു എന്നുമാണ്. പിറവം നെയ്യാറ്റിന്‍കരയില്‍ ആവര്‍ത്തിക്കാമെന്ന് കണക്കു കൂട്ടുന്നവരും പ്രവചിക്കുന്നവരും ഓര്‍ക്കേണ്ടത്, പിറവത്തെ പ്രത്യേക പശ്ചാത്തലം നെയ്യാറ്റിന്‍കരയില്‍ ഇല്ല എന്നാണ്. ടി എം ജേക്കബിനോടും ഉമ്മന്‍ചാണ്ടിയോടും പിറവത്തുണ്ടായ അനുഭാവ ഒഴുക്കിന്റെ സ്ഥാനത്ത് നെയ്യാറ്റിന്‍കരയിലുള്ളത് കാലുമാറ്റക്കാരനും കാലുമാറ്റം നടത്തിച്ചവര്‍ക്കും എതിരായ ശക്തമായ ധാര്‍മ്മിക രോഷമാണ്. അത് അവിടെ വളര്‍ന്നുകൊണ്ടിരിക്കയുമാണ്.

chintha editorial 300312

അനൂപിന്റെ മന്ത്രിസ്ഥാനം തടഞ്ഞത് മുസ്ലിംലീഗ്: കോടിയേരി

കേരളത്തിന്റെ ഭരണം പൂര്‍ണമായി ലീഗ് ഏറ്റെടുത്തിരിക്കുകയാണെന്നും അനൂപ് ജേക്കബ്ബിനെ മന്ത്രിയാക്കിയുള്ള സത്യപ്രതിജ്ഞ ഈ നിയമസഭാ സമ്മേളനത്തില്‍ നടക്കാത്തത് ലീഗ് തടഞ്ഞതിനാലാണെന്നും സിപിഐ എം പൊളിറ്റ് ബ്യൂറോ അംഗം കോടിയേരി ബാലകൃഷ്ണന്‍ . പുത്തന്‍ചിറയില്‍ സിപിഐ എം ലോക്കല്‍ കമ്മിറ്റി ഓഫീസ് ഉദ്ഘാടനം ചെയ്തും കൊടുങ്ങല്ലൂരില്‍ വി കെ ഗോപാലന്‍ രക്തസാക്ഷിദിനാചരണത്തില്‍ പങ്കെടുത്തും സംസാരിക്കുകയായിരുന്നു കോടിയേരി.

അനൂപ് ജയിച്ചാലുടന്‍ മന്ത്രിയായി സത്യപ്രതിജ്ഞ ചെയ്യും എന്നാണ് നേരത്തേ പറഞ്ഞിരുന്നത്. തങ്ങളുടെ അഞ്ചാം മന്ത്രിക്കൊപ്പം അനൂപും സത്യപ്രതിജ്ഞ ചെയ്താല്‍ മതി എന്നാണ് ലീഗ്ഭീഷണി. ഇതിനിടെ ശക്തന്‍നാടാരെ മന്ത്രിയാക്കണമെന്ന് തിരുവനന്തപുരത്ത് നാടാര്‍ സമുദായസംഘടനയും പരസ്യമായി ആവശ്യപ്പെട്ടിട്ടുണ്ട്. ആറുമാസം മുമ്പ് തങ്ങള്‍ക്ക് നല്‍കിയ ഉറപ്പ് പാലിക്കണം എന്നാണവര്‍ പറയുന്നത്. ലീഗില്‍ നുഴഞ്ഞുകയറിയ മുസ്ലിം തീവ്രവാദികള്‍ ഭരണത്തില്‍ ഇടപെടാന്‍ ശ്രമിക്കുകയാണ.് ലീഗിന് സ്വാധീനമുള്ള പല മേഖലകളിലും പൊലീസ് സ്റ്റേഷന്‍ അവരുടെ നിയന്ത്രണത്തിലാണ്. കോണ്‍ഗ്രസ് അടക്കം മറ്റു പാര്‍ടികള്‍ക്കൊന്നും പ്രവര്‍ത്തിക്കാനാകുന്നില്ല. തീവ്രവാദശക്തികളെ നിയന്ത്രിക്കാന്‍ ലീഗ് നേതൃത്വത്തിനാവുന്നില്ല. കാസര്‍കോട് ലീഗ് പരിപാടിക്കെത്തിയ സംസ്ഥാന ജനറല്‍ സെക്രട്ടറിമാരായ കെ പി എ മജീദിനെയും ഇ ടി മുഹമ്മദ്ബഷീറിനെയും കൈയേറ്റം ചെയ്യുന്ന സ്ഥിതിയുണ്ടായി. കണ്ണൂര്‍ ജില്ലാ സമ്മേളനത്തിലും സംഘര്‍ഷമുണ്ടായി.

പിറവത്തെ ജയത്തില്‍ സംശയം തോന്നിയപ്പോള്‍ ഉമ്മന്‍ചാണ്ടിയും ചില സാമുദായികകേന്ദ്രങ്ങളും നടത്തിയ ഗൂഢാലോചനയാണ് ശെല്‍വരാജിന്റെ രാജി. എംഎല്‍എമാരെ ചാക്കിട്ടുപിടിക്കുന്ന യദ്യൂരപ്പയുടെ തന്ത്രമാണ് ഉമ്മന്‍ചാണ്ടി പയറ്റിയത്. കര്‍ണാടകമല്ല കേരളമെന്ന് നെയ്യാറ്റിന്‍കരയില്‍ ജനം തെളിയിക്കും. സംസ്ഥാനത്ത് ഇതുവരെ 35 എംഎല്‍എമാര്‍ രാജിവച്ചിട്ടുണ്ട്. അതില്‍ 34 പേരും പരസ്യമായാണ് രാജിവച്ചത്. ശെല്‍വരാജ് മാത്രമാണ് രഹസ്യമായി രാജി നല്‍കിയത്. ഒന്നിനു പകരം മൂന്ന് എംഎല്‍എമാരെ തരാം എന്നാണ് ചിലര്‍ ഞങ്ങളോട് പറഞ്ഞത്. ജനപ്രതിനിധികളെ ചാക്കിട്ടു പിടിക്കുന്ന ഉത്തരേന്ത്യന്‍ മോഡല്‍ "ആയാറാം ഗയാറാം" രാഷ്ട്രീയത്തിന് സിപിഐ എമ്മിനു താല്‍പ്പര്യമില്ല. കുംഭകോണങ്ങളുടെ കുംഭമേളയാണ് കേന്ദ്രത്തില്‍ കോണ്‍ഗ്രസ് ഭരണത്തില്‍ നടക്കുന്നത്. കല്‍ക്കരിപ്പാടങ്ങള്‍ ലേലം ചെയ്യാതെ കുത്തകകള്‍ക്ക് പാട്ടത്തിന് നല്‍കിയതിനു പിന്നില്‍ പത്തുലക്ഷം കോടിയുടെ അഴിമതിയുണ്ടെന്നാണ് സിഎജി പറഞ്ഞത്. സ്വതന്ത്ര ഇന്ത്യ കണ്ട ഏറ്റവും വലിയ അഴിമതിയാണിതെന്നും കോടിയേരി പറഞ്ഞു.

deshabhimani 250312

വിജയാഘോഷത്തിന്റെ മറവില്‍ അക്രമം; 4 സ്ത്രീകള്‍ക്ക് പരിക്ക്

കോണ്‍ഗ്രസ് നേതാവിന്റെ നേതൃത്വത്തില്‍ കോളനിയില്‍ അക്രമവും അഴിഞ്ഞാട്ടവും. സംഭവത്തില്‍ നാലു സ്ത്രീകള്‍ക്ക് പരിക്കേറ്റു. ഏഴക്കരനാട് വില്ലംകുഴി കോളനിയില്‍ ബുധനാഴ്ച പകല്‍ രണ്ടോടെയാണ് അക്രമം നടന്നത്. പരിക്കേറ്റ കോളനി നിവാസികളായ ലളിത, ഗീത, സുജാത, മഞ്ജു എന്നിവരെ എ പി വര്‍ക്കി മിഷന്‍ ആശുപത്രിയില്‍ പ്രവേശിപ്പിച്ചു. അനൂപ് ജേക്കബിന്റെ വിജയം ആഘോഷിച്ച് മസ്ദ ലോറിയില്‍പ്രകടനമായി എത്തിയ പതിനഞ്ചോളം പ്രവര്‍ത്തകരാണ് കോളനിയില്‍ അക്രമം അഴിച്ചുവിട്ടത്. കോണ്‍ഗ്രസ് ബ്ലോക്ക് പഞ്ചായത്ത് അംഗം കെ എസ് രാജേഷിന്റെ അച്ഛന്‍ ശശിയുടെയും കോണ്‍ഗ്രസ് ബൂത്ത് പ്രസിഡന്റ് ജയ് തോമസിന്റെയും നേതൃത്വത്തിലുള്ള പ്രവര്‍ത്തകരാണ് അക്രമം നടത്തിയത്.

സംഘം എത്തുമ്പോള്‍ കോളനിയില്‍ ടാങ്കറില്‍ കുടിവെള്ള വിതരണം നടക്കുന്നുണ്ടായിരുന്നു. കോളനിയില്‍ ഉള്ളവര്‍ എല്‍ഡിഎഫിന് വോട്ട്ചെയ്തവരാണെന്നും ഇവര്‍ക്ക് വെള്ളം കൊടുക്കരുതെന്നും പറഞ്ഞ് ആഘോഷക്കാര്‍ അസഭ്യവര്‍ഷം തുടങ്ങി. തുടര്‍ന്ന് ഭീഷണിപ്പെടുത്തി ടാങ്കര്‍ പറഞ്ഞയച്ചു. പിന്നീട് അരമണിക്കൂറോളം കോളനിപ്രദേശത്ത്ഇവരുടെ അഴിഞ്ഞാട്ടമായിരുന്നു. പുരുഷന്മാര്‍ ജോലിക്കു പോയതിനാല്‍ വീടുകളില്‍ സ്ത്രീകളും കുട്ടികളും മാത്രമാണ് ഉണ്ടായിരുന്നത്. ഇവരെ വീടുകളില്‍ നിന്നു വിളിച്ചിറക്കി അസഭ്യം പറയുകയും അശ്ലീല ചേഷ്ടകള്‍ കാണിക്കുകയുമായിരുന്നു സംഘം. കലിയടങ്ങി സംഘം മടങ്ങാനൊരുങ്ങുമ്പോള്‍ ഏതാനും പേര്‍ ചോദ്യംചെയ്യാനെത്തി. ഇതോടെ സംഘം ഇവരുമായി ഏറ്റുമുട്ടി. സ്ത്രീകള്‍ക്കു നേരെയും ആക്രമണമുണ്ടായി. ഇതിലാണ് നാലു സ്ത്രീകള്‍ക്ക് പരിക്കേറ്റത്.

സംഭവത്തെത്തുടര്‍ന്ന് എട്ട് എല്‍ഡിഎഫ് പ്രവര്‍ത്തകര്‍ക്കെതിരെ കള്ളക്കേസ് എടുത്തിരിക്കുകയാണ്. മൂവാറ്റുപുഴ ഡിവൈഎസ്പി, പുത്തന്‍കുരിശ് സിഐ, രാമമംഗലം എസ്ഐ എന്നിവരുടെ നേതൃത്വത്തില്‍ സ്ഥലത്തെത്തിയ പൊലീസ്സംഘം തികച്ചും പക്ഷപാതപരമായാണ് പെരുമാറിയതെന്ന് കോളനിവാസികള്‍ പറഞ്ഞു. കോളനിയില്‍ അക്രമം നടത്തിയതിലും എല്‍ഡിഎഫ് പ്രവര്‍ത്തകരെ കള്ളക്കേസില്‍ കുടുക്കിയതിലും സിപിഐ എം മണീട് ലോക്കല്‍ സെക്രട്ടറി കെ എസ് രാജു പ്രതിഷേധിച്ചു.

deshabhimani 230312

ഭരണവിരുദ്ധ വികാരത്തിന് തടയിട്ടത് നെറികേടുകളിലൂടെ: പിണറായി

കണ്ണൂര്‍ : തെരഞ്ഞെടുപ്പില്‍ പാടില്ലാത്തതെല്ലാം നല്ലപോലെ ഉപയോഗിച്ചാണ് യുഡിഎഫ് പിറവത്ത് വിജയിച്ചതെന്ന് സിപിഐ എം സംസ്ഥാന സെക്രട്ടറി പിണറായി വിജയന്‍ . എ കെ ജി സ്മൃതിമണ്ഡപത്തില്‍ പുഷ്ചാര്‍ച്ചന നടത്തിയശേഷം അനുസ്മരണ സമ്മേളനത്തില്‍ സംസാരിക്കുകയായിരുന്നു അദ്ദേഹം.

ഭരണത്തിനെതിരെ ഉയര്‍ന്ന വികാരം നെറികേടുകളിലൂടെയാണ് തടഞ്ഞുനിര്‍ത്തിയത്. എല്ലാ പൊതുപ്രവര്‍ത്തന മൂല്യങ്ങളും ഇല്ലാതാക്കി. ഗവണ്‍മെന്റിനെതിരായ ജനവികാരം അതേരീതിയില്‍ പ്രതികരിക്കാതിരിക്കാന്‍ വഴിവിട്ട ഒട്ടേറെ കാര്യങ്ങള്‍ ചെയ്തു. ജാതി-മത ശക്തികള്‍ക്ക് വേണ്ടത് നല്‍കി ഒന്നിച്ചുനിര്‍ത്തി. മതപ്രീണനത്തിന് ഒരു പരിധിയുമുണ്ടായില്ല. പണത്തിന്റെ കുത്തൊഴുക്ക് തന്നെയായിരുന്നു. ആളുകളെ ബോധമില്ലാത്ത അവസ്ഥയിലാക്കുന്നതിന് വേണ്ടതെല്ലാം നല്‍കി. ആളുകള്‍ കൂടുന്നിടത്ത് ഇതിനെല്ലാം സൗകര്യമൊരുക്കിയെന്ന് മാത്രമല്ല, ആവശ്യമുള്ളവര്‍ക്ക് പോകുമ്പോള്‍ കൈയില്‍ കൊണ്ടുപോകാനും കഴിയുമായിരുന്നു. ഇതൊക്കെയായിട്ടും പിറവത്ത് എല്‍ഡിഎഫിന്റെയും സിപിഐ എമ്മിന്റെയും ബഹുജനാടിത്തറയ്ക്ക് പോറലേറ്റില്ല. കഴിഞ്ഞ തവണത്തെക്കാള്‍ എല്‍ഡിഎഫിന് നാലായിരത്തിലേറെ വോട്ട് കൂടുതല്‍ ലഭിച്ചു. എല്‍ഡിഎഫ് മണ്ഡലമല്ല പിറവം. വിരളമായേ അവിടെ എല്‍ഡിഎഫ് ജയിച്ചിട്ടുള്ളൂ. അതും യുഡിഎഫിനകത്ത് കാര്യമായ ഭിന്നത നിലനിന്നപ്പോള്‍ .

എ കെ ജിയുടെ ജീവിതകാലത്തെന്നപോലെ ഇപ്പോഴും കമ്യൂണിസ്റ്റ് പ്രസ്ഥാനത്തിനെതിരെ കടുത്ത ആക്രമണം നടത്തുന്നു. എല്ലാ ഘട്ടങ്ങളിലും ജനങ്ങളെ അണിനിരത്തിയാണ് എ കെ ജി ആക്രമണങ്ങളെ നേരിട്ടത്. പശ്ചിമബംഗാളില്‍ സിപിഐ എം പ്രവര്‍ത്തകര്‍ക്കുനേരെ കിരാതമായ ആക്രമണമാണ് നടക്കുന്നത്. ഭരണമാറ്റത്തിനു ശേഷം നിരവധി പ്രവര്‍ത്തകര്‍ കൊല്ലപ്പെട്ടു. ഇത് ഒറ്റപ്പെട്ട നീക്കമല്ല. രാജ്യത്തിനകത്തും പുറത്തുമുള്ള ശക്തികള്‍ സിപിഐ എമ്മിനെതിരെ നീങ്ങുന്നു. കേരളത്തില്‍ ജാതി- മത ശക്തികളുടെ വ്യൂഹം തീര്‍ത്താണ് സിപിഐ എമ്മിനെതിരെ യുഡിഎഫ് നീങ്ങുന്നത്. ഇതിനെയെല്ലാം മറികടക്കാന്‍ എ കെ ജി കാണിച്ചുതന്ന മാതൃക സ്വീകരിക്കേണ്ടതുണ്ടെന്ന് പിണറായി പറഞ്ഞു.

deshabhimani 230312

പിറവത്തേത് രാഷ്ട്രീയേതര വിജയം

പിറവം ഉപതെരഞ്ഞെടുപ്പുഫലം ഉമ്മന്‍ചാണ്ടി സര്‍ക്കാരിന്റെ കെട്ടുറപ്പിനും ഭരണസ്ഥിരതയ്ക്കുമുള്ള ഔഷധമാകില്ല. മന്ത്രിയായി ഭരണം തുടങ്ങുംമുമ്പേ വേര്‍പിരിഞ്ഞ ടി എം ജേക്കബ്ബിനോടുള്ള സഹതാപം മകന്‍ അനൂപിന്റെ വിജയത്തിന് പ്രധാന കാരണമായി. ഇന്ദിര ഗാന്ധി, രാജീവ് ഗാന്ധി എന്നിവരുടെ മരണത്തെതുടര്‍ന്നുണ്ടായ സഹതാപതരംഗം കോണ്‍ഗ്രസിനെ അന്ന് ദേശീയമായി സഹായിച്ചതുപോലെ ജേക്കബ്ബിന്റെ മരണം പിറവത്ത് യുഡിഎഫിനെ തുണച്ചു. 12070 വോട്ടിന്റെ ഭൂരിപക്ഷം യുഡിഎഫ് നേടിയതും എല്‍ഡിഎഫ് തോറ്റതും എന്തുകൊണ്ടെന്ന് എല്‍ഡിഎഫ് ടോര്‍ച്ചടിച്ച് പരിശോധിക്കണമെന്ന് കേന്ദ്രമന്ത്രി എ കെ ആന്റണി ഉപദേശിച്ചിട്ടുണ്ട്. യഥാര്‍ഥത്തില്‍ സ്വന്തം മനഃസാക്ഷിക്കുനേരെയാണ് ഞെക്കുവിളക്ക് തിരിക്കേണ്ടത്. കാരണം ദേശീയ-സംസ്ഥാന വിഷയങ്ങളെ ആസ്പദമാക്കിയുള്ള രാഷ്ട്രീയപോരാട്ടമാക്കി ബാലറ്റ് അങ്കത്തെ മാറ്റാനാണ് ആദ്യവസാനം എല്‍ഡിഎഫ് ശ്രമിച്ചത്. വിലക്കയറ്റം, അഴിമതി, പത്തുമാസത്തെ യുഡിഎഫ് ഭരണത്തിലെ കര്‍ഷക ആത്മഹത്യ ഉള്‍പ്പെടെയുള്ള ദുരന്തങ്ങള്‍ - ഇതെല്ലാം നിരത്തി. എന്നാല്‍ , സങ്കുചിത ജാതി-മത രാഷ്ട്രീയത്തില്‍ പിറവത്തെ തളയ്ക്കുന്നതില്‍ കോണ്‍ഗ്രസും യുഡിഎഫും പരിശ്രമിക്കുകയും അതില്‍ ജയിക്കുകയും ചെയ്തു. ഇതിനെ ശക്തിപ്പെടുത്തുന്നതായിരുന്നു അവസാന നാളുകളില്‍ മണ്ഡലത്തില്‍ ആന്റണിയുടെ പര്യടനവും. ഉമ്മന്‍ചാണ്ടി കോണ്‍ഗ്രസിനെ പ്രതിനിധാനംചെയ്യുന്ന മുഖ്യമന്ത്രിയാണെന്ന വസ്തുത പ്രത്യക്ഷമാക്കി ആ പേരിനെ ഒരു പ്രത്യേക സമുദായവുമായി കൂട്ടിയണക്കി. അങ്ങനെ ന്യൂനപക്ഷവര്‍ഗീയത ഒരു ഭാഗത്ത് കുത്തിയിളക്കി നേട്ടമുണ്ടാക്കി. മെത്രാന്‍ -ബാവാ കക്ഷി തര്‍ക്കത്തെ അതിജീവിക്കുന്ന വര്‍ഗീയയോജിപ്പുണ്ടാക്കി. മറുഭാഗത്ത് എന്‍എസ്എസ്- എസ്എന്‍ഡിപി തുടങ്ങിയ സംഘടനാ നേതാക്കളെ പോക്കറ്റിലാക്കി പ്രചാരണം നടത്തി വോട്ടുചോര്‍ച്ച തടയുകയും ചെയ്തു. ഇങ്ങനെ ജാതി-മത ശക്തികളുടെ ഏകീകരണവും വര്‍ഗീയതയെ നഗ്നമായി ഉപയോഗിക്കുന്നതിലെ കൂസലില്ലായ്മയും അധികാരദുര്‍വിനിയോഗവും യുഡിഎഫ് വിജയത്തിലെ ഘടകങ്ങളാണ്.

ഈ ഘട്ടത്തിലും എല്‍ഡിഎഫ് കഴിഞ്ഞ തെരഞ്ഞെടുപ്പിനെ അപേക്ഷിച്ച് നാലായിരത്തിലധികം വോട്ട് അധികമായി നേടിയെന്നത് പ്രധാനമാണ്. പരമ്പരാഗത യുഡിഎഫ് മണ്ഡലമായ പിറവത്ത് എല്‍ഡിഎഫ് മൂന്നുതവണ ജയിച്ചതും കോണ്‍ഗ്രസിലും യുഡിഎഫിലും വിള്ളലുണ്ടായപ്പോഴാണ്. അനൂപ് ജേക്കബ്ബിന്റെ വിജയം ഉറപ്പിച്ച് കെപിസിസി പ്രസിഡന്റ് രമേശ് ചെന്നിത്തല രണ്ടാഴ്ചമുമ്പ് ഒരു ചാനല്‍ അഭിമുഖത്തില്‍ പറഞ്ഞത്, കഴിഞ്ഞ നിയമസഭാതെരഞ്ഞെടുപ്പില്‍ ടി എം ജേക്കബ് മത്സരിച്ചപ്പോള്‍പോലും ഏഴായിരത്തോളം കോണ്‍ഗ്രസ് വോട്ട് മരവിക്കുകയോ കിട്ടാതിരിക്കുകയോ ചെയ്തെന്നും അതിന് മാറ്റമുണ്ടാകുമെന്നുമാണ്. ഇതടക്കമുള്ള ഘടകങ്ങളാണ് യുഡിഎഫ് ഭൂരിപക്ഷത്തിന് നിദാനം. ഇങ്ങനെ രാഷ്ട്രീയാതീതമായി യുഡിഎഫ് പിറവത്ത് നേടിയ വിജയത്തിന് നെയ്യാറ്റിന്‍കര ഉപതെരഞ്ഞെടുപ്പ് മറുപടി നല്‍കും. ഉപതെരഞ്ഞെടുപ്പ് വിജയവും ഒരു സര്‍ക്കാരിന്റെ നിലനില്‍പ്പും തമ്മില്‍ ബന്ധമില്ലെന്ന് എ കെ ആന്റണി തന്നെ ബോധ്യപ്പെടുത്തിയിട്ടുണ്ട്. 1995ല്‍ മുസ്ലിംലീഗിലെ യു എ ബീരാന്‍ രാജിവച്ച് തിരൂരങ്ങാടിയില്‍ മുഖ്യമന്ത്രിയായി ആന്റണി മത്സരിച്ചപ്പോള്‍ റെക്കോഡ് ഭൂരിപക്ഷമായിരുന്നു. പക്ഷേ, ഒരു വര്‍ഷം കഴിഞ്ഞപ്പോള്‍ വന്ന പൊതുതെരഞ്ഞെടുപ്പില്‍ എല്‍ഡിഎഫ് ജയിക്കുകയും നായനാര്‍ മുഖ്യമന്ത്രിയാകുകയും ചെയ്തു. 1977ല്‍ കഴക്കൂട്ടത്തെ ഉപതെരഞ്ഞെടുപ്പില്‍ ആന്റണി ജയിച്ചെങ്കിലും മുഖ്യമന്ത്രിയായി അധികനാള്‍ തുടര്‍ന്നില്ല. ഇന്ദിര ഗാന്ധി ജയിച്ച ചിക്കമംഗ്ളൂര്‍ ലോക്സഭാ തെരഞ്ഞെടുപ്പിന്റെ പേരില്‍ ആന്റണി മുഖ്യമന്ത്രിപദം ഒഴിഞ്ഞു. അങ്ങനെ ഒരു ഉപതെരഞ്ഞെടുപ്പിലെ വിജയത്തെ ആസ്പദമാക്കി കെട്ടിയടക്കപ്പെടുന്നതല്ല കോണ്‍ഗ്രസിലെയും യുഡിഎഫിലെയും കലഹവും മന്ത്രിസഭയുടെ അകാലത്തിലെ തകര്‍ച്ചയും. കോണ്‍ഗ്രസിലും യുഡിഎഫിലും ശക്തിപ്പെടാന്‍ പോകുന്ന ആഭ്യന്തരക്കുഴപ്പം തടയാനുള്ള ത്രാണി പിറവം ഫലത്തിനില്ല.
(ആര്‍ എസ് ബാബു)

കഴക്കൂട്ടത്തെ ജയകുമാര്‍ അനൂപിന്റെ വീട്ടിലെ വോട്ടര്‍

പിറവം ഉപതെരഞ്ഞെടുപ്പിന്റെ വിജയത്തില്‍ യുഡിഎഫ് മതിമറക്കുമ്പോള്‍ മണ്ഡലത്തില്‍ പരക്കെ ചേര്‍ത്ത കള്ളവോട്ടിന്റെ കഥകള്‍ പുറത്ത്. അനൂപ് ജേക്കബിന്റെ വീട്ടില്‍ തന്നെ കള്ളവോട്ട് ചേര്‍ത്തതായും ഉപതെരഞ്ഞെടുപ്പില്‍ ഇവ രേഖപ്പെടുത്തിയതായും വിവരം പുറത്തുവന്നു.

അനൂപ് ജേക്കബ്ബിന്റെ പിതാവ് ടി എം ജേക്കബ്ബിനെ കൂടാതെ പത്ത് വോട്ടര്‍മാരാണ് അനൂപിന്റെ താണിക്കുന്നേല്‍ വീട്ടിലെ വോട്ടര്‍ പട്ടികയിലുള്ളത്. ഇതില്‍ ഒമ്പത് പേരും വോട്ട് ചെയ്തു. 9-465 നമ്പറിലുള്ള താനിക്കുന്നേല്‍ വീട്ടിലെ ആദ്യപേര് ടി എം ജേക്കബ്ബിന്റെതാണ്. അടുത്ത പേര് ഭാര്യ ആനി ജേക്കബ്ബ്. ജേക്കബ്ബിന്റെ ഡ്രൈവറായിരുന്ന ജയകുമാറിന്റെ പേരിലാണ് മൂന്നാം വോട്ട്. വര്‍ഗീസ് മകന്‍ ജയകുമാര്‍ തെരഞ്ഞെടുപ്പ് ദിവസം കാലത്ത് തന്നെ പോളിംഗ് ബൂത്തിലെത്തി വോട്ട് രേഖപ്പെടുത്തി. ഇയാള്‍ കഴക്കൂട്ടം നിയോജക മണ്ഡലത്തില്‍ തിരുവന്തപരും കോര്‍പ്പറേഷന്‍ പരിധിയില്‍ വരുന്ന കറ്റച്ചക്കോണം വാര്‍ഡില്‍ 921ാം നമ്പര്‍ വോട്ടറാണ്. 11-802 നമ്പറിലുള്ള പുതവല്‍ പുത്തന്‍വീട്ടിലാണ് ഇയാളുടെ വോട്ട്. തിരുവനന്തപുരം സ്വദേശിയും ഇപ്പോള്‍ നാലാഞ്ചിറ താമസക്കാരനുമായ ഇയാള്‍ക്ക് പിറവവുമായി ഒരു ബന്ധവുമില്ല. എങ്കിലും വോട്ടര്‍ പട്ടികയില്‍ പേര്‍ ചേര്‍ത്തു. വോട്ട് രേഖപ്പെടുത്തുകയും ചെയ്തു. എന്നാല്‍ കഴക്കൂട്ടത്തെ വോട്ടര്‍ പട്ടികയില്‍ നിന്നും പേര് നീക്കിയിട്ടുമില്ല. ഒരു വ്യത്യാസം മാത്രം- പിറവത്ത് ജയകുമാറിന് വയസ്സ് 52. തിരുവനന്തപുരത്ത് 42.

ജേക്കബ്ബിന്റെ വീട്ടിലെ അഞ്ചാമത്തെ വോട്ടര്‍ അയ്യപ്പന്‍ മകന്‍ രവി എന്നയാളാണ്. ആറാമത്തെ വോട്ട് തങ്കപ്പന്‍ മകന്‍ സുമേഷ്. ഏഴാമത്തെ വോട്ടര്‍ അനൂപിന്റെ ഭാര്യ അനിലയും ഒമ്പതാമത്തെ വോട്ടര്‍ അനൂപും പതിനൊന്നാമത്തെ വോട്ടര്‍ മകള്‍ അമ്പിളിയുമാണ്. ഇതിനിടയില്‍ എട്ട്, പത്ത്, 12 നമ്പറുകളിലായി സാലു, അര്‍ജുനന്‍ , സാലി എന്നീ പേരുകളിലും മൂന്ന് വോട്ടര്‍മാര്‍ . ഇവരെല്ലാം അവരുടെ പ്രദേശങ്ങളിലെ വോട്ടര്‍ പട്ടികയിലുമുണ്ട്.

യുഡിഎഫ് വിജയം തിന്മയുടെ വഴികളിലൂടെ: എം വി ഗോവിന്ദന്‍

പിറവം മണ്ഡലത്തില്‍ എല്‍ഡിഎഫിന്റെ ജനകീയാടിത്തറയ്ക്ക് ഒരുവിധ ക്ഷതവും ഉപതെരഞ്ഞെടുപ്പു ഫലം ഉണ്ടാക്കിയിട്ടില്ലെന്ന് സിപിഐ എം ജില്ലാ സെക്രട്ടറി എം വി ഗോവിന്ദന്‍ വ്യക്തമാക്കി. സര്‍വ ജാതി-മത ശക്തികളുടെ ധ്രുവീകരണത്തിന്റെയും ജേക്കബ്ഗ്രൂപ്പിനു കിട്ടാതെവന്നിരുന്ന കുറെ കോണ്‍ഗ്രസ് വോട്ടുകള്‍ ഇക്കുറി നേടാന്‍കഴിഞ്ഞതിന്റെയും ഫലമാണ് യുഡിഎഫിന്റെ ജയം. തെറ്റിന്റെ എല്ലാ കുറുക്കുവഴികളെയും അവര്‍ ആശ്രയിച്ചു. തിന്മയുടെ വഴികളിലൂടെയായിരുന്നു അവരുടെ പ്രചാരണം. എന്തുചെയ്തും ജയിക്കുക എന്നതായിരുന്നു അവരുടെ മാര്‍ഗം. എന്നിട്ടും എല്‍ഡിഎഫിന് ഈ മണ്ഡലത്തില്‍ നാളിതുവരെ ലഭിച്ചതിലും കൂടിയ വോട്ടാണ് ഇക്കുറി കിട്ടിയത്. 2011ലെ തെരഞ്ഞെടുപ്പിനെ അപേക്ഷിച്ച് 4340 വോട്ട് എല്‍ഡിഎഫിനു കൂടുതല്‍ ലഭിച്ചു. 2011ല്‍ 66,346 വോട്ടാണ് ലഭിച്ചത്. ഇക്കുറി അത് 70,686 ആയി. ഇത് സര്‍വകാല റെക്കോഡാണ്. കഴിഞ്ഞതവണത്തെ അപേക്ഷിച്ച് മണ്ഡലത്തില്‍ 7175 വോട്ട് കൂടിയിരുന്നു. പോളിങ് ശതമാനം കഴിഞ്ഞതവണത്തെ അപേക്ഷിച്ച് 6.87 ശതമാനവും വര്‍ധിച്ചു. ഇതിന്റെ ഫലമായി 18,303 വോട്ട് കൂടുതല്‍ പോള്‍ചെയ്തു. ഈ രണ്ടു വിഭാഗങ്ങളില്‍നിന്നും ഒരുഭാഗം എല്‍ഡിഎഫിനു ലഭിച്ചു എന്നു വ്യക്തമാണ്. അതായത് എല്‍ഡിഎഫിന്റെ ജനസ്വാധീനം വര്‍ധിക്കുകയാണ് ചെയ്തത്. അതു പക്ഷേ ഭൂരിപക്ഷം നേടുന്നതില്‍ എത്തിയില്ലെന്നു മാത്രം. പ്രാഥമിക വിലയിരുത്തലില്‍ത്തന്നെ ഈ വസ്തുതകള്‍ തെളിഞ്ഞുനില്‍ക്കുന്നു. എല്‍ഡിഎഫ് തകര്‍ന്നു എന്ന നിലയില്‍ യുഡിഎഫ് പ്രചരിപ്പിക്കുന്നത് അവരുടെ കേവലമായ വ്യാമോഹം മാത്രമാണ്.

ഈ ഉപതെരഞ്ഞെടുപ്പില്‍ സാധ്യമായ എല്ലാ വഴിവിട്ട വഴികളും യുഡിഎഫ് പ്രയോഗിച്ചു എന്നത് എല്‍ഡിഎഫിന്റെ ആരോപണം മാത്രമല്ല; മറിച്ച് അവര്‍ക്കു നിഷേധിക്കാന്‍ കഴിയാത്ത സത്യവുമാണ്. യുഡിഎഫ് പണം വാരിയെറിയുകയായിരുന്നു; മദ്യം ഒഴുക്കി. ഭരണാധികാര ദുര്‍വിനിയോഗം വോട്ടര്‍പട്ടികയില്‍ പേരുചേര്‍ക്കുന്നതില്‍ത്തന്നെ തുടങ്ങി. എല്‍ഡിഎഫ് നിരത്തിയ തെളിവുകള്‍ക്കുമുന്നില്‍ നില്‍ക്കക്കള്ളിയില്ലാതെ യുഡിഎഫ് കൊടുപ്പിച്ച നാലായിരത്തോളം അപേക്ഷ തള്ളേണ്ടിവന്നു. അതിന്റെ ഇരട്ടിയോളമാണ് യുഡിഎഫ് കൊടുത്തത്. പ്രചാരണത്തിന് മന്ത്രിമാര്‍ പഞ്ചായത്തുതോറും ക്യാമ്പടിച്ചതോടെ അധികാരദുര്‍വിനിയോഗം വീടുവീടാന്തരം കയറിച്ചെന്നു. ജാതി-മത ശക്തികളെ തങ്ങള്‍ക്ക് അനുകൂലമായി ഒന്നിച്ച് അണിനിരത്തുക എന്നതായിരുന്നു യുഡിഎഫ് ആശ്രയിച്ച മറ്റൊരു ഗൂഢമാര്‍ഗം. ആ അടവും അവര്‍ക്ക് ഉതകിയെന്നു വ്യക്തമായി. ഈ വിധം യുഡിഎഫ് അധികാരത്തിലിരുന്ന് പ്രചാരണരംഗം ഇത്രത്തോളം മലിനപ്പെടുത്തിയൊരു തെരഞ്ഞെടുപ്പ് കേരളത്തില്‍ ഉണ്ടായിട്ടില്ല. കേരള രാഷ്ട്രീയത്തെത്തന്നെ യുഡിഎഫ് മലിനപ്പെടുത്തി. എല്ലാ പ്രലോഭനങ്ങളും മറികടന്ന് എല്‍ഡിഎഫിനെ ശക്തിപ്പെടുത്തിയ പിറവത്തെ ജനങ്ങളെ എം വി ഗോവിന്ദന്‍ പ്രസ്താവനയില്‍ അഭിവാദ്യംചെയ്തു. എല്‍ഡിഎഫിനെയും എം ജെ ജേക്കബിനെയും വിജയിപ്പിക്കാന്‍ അഹോരാത്രം യത്നിച്ച പ്രവര്‍ത്തകരെയും അദ്ദേഹം അഭിവാദ്യംചെയ്തു.

യുഡിഎഫിന്റേത് അധാര്‍മിക വിജയം: വി എസ്

എല്ലാ അധാര്‍മിക പ്രവൃത്തികളും ചെയ്താണ് യുഡിഎഫ് പിറവം ഉപതെരഞ്ഞെടുപ്പില്‍ ജയിച്ചതെന്ന് പ്രതിപക്ഷനേതാവ് വി എസ് അച്യുതാനന്ദന്‍ വാര്‍ത്താസമ്മേളനത്തില്‍ പറഞ്ഞു. ഭരണയന്ത്രത്തിന്റെ പൂര്‍ണമായ ദുരുപയോഗമാണ് പിറവത്ത് നടന്നത്. മന്ത്രിമാര്‍ മണ്ഡലത്തില്‍ ക്യാമ്പ് ചെയ്ത് വാഗ്ദാനപ്പെരുമഴ നടത്തി. തെരഞ്ഞെടുപ്പുചട്ടങ്ങള്‍ കാറ്റില്‍ പറത്തി. എല്ലാ ജാതി-സാമുദായികശക്തികളെയും പ്രീണിപ്പിച്ചു. ഇതിനായി എല്ലാ വൃത്തികെട്ട നടപടികളും സ്വീകരിച്ചു. ഉപതെരഞ്ഞെടുപ്പ് വരുന്നതിനുമുമ്പുതന്നെ നിയമവിരുദ്ധമായി ബാറുകള്‍ അനുവദിച്ചു. എക്സൈസ് മന്ത്രി മണ്ഡലത്തില്‍ ക്യാമ്പ് ചെയ്ത് മദ്യമുതലാളിമാരുടെ സഹായം ഉപയോഗപ്പെടുത്തി, പരക്കെ മദ്യമൊഴുക്കി വോട്ടര്‍മാരെ സ്വാധീനിക്കാന്‍ ശ്രമിച്ചു. യുഡിഎഫ് സ്ഥാനാര്‍ഥി ജയിച്ചാല്‍ മന്ത്രിയാകുമെന്ന് പ്രഖ്യാപനം നടത്തി. പരമ്പരാഗത ശക്തികേന്ദ്രമായിട്ടും എല്ലാത്തരം നീചപ്രവൃത്തികളും നടത്തി ഉണ്ടാക്കിയിരിക്കുന്ന വിജയത്തില്‍ യുഡിഎഫ് അഹങ്കരിക്കേണ്ടതില്ല. കേന്ദ്ര-സംസ്ഥാന സര്‍ക്കാരുകളുടെ ദുര്‍നയങ്ങള്‍ തുടരാനുള്ള ലൈസന്‍സായി ഈ വിജയത്തെ കണക്കാക്കേണ്ടതില്ല. സര്‍ക്കാരിന്റെ ജനവിരുദ്ധനയങ്ങള്‍ക്കെതിരെ എല്ലാ വിഭാഗം ജനങ്ങളെയും അണിനിരത്തി എല്‍ഡിഎഫ് ശക്തമായി മുന്നോട്ടുപോകുമെന്നും വി എസ് പറഞ്ഞു.

സര്‍ക്കാര്‍ അനുകൂല തരംഗമല്ല: എം ജെ ജേക്കബ്

കൊച്ചി: യുഡിഎഫിന്റെ ഈ വിജയം സര്‍ക്കാര്‍ അനുകൂല തരംഗമായി കാണേണ്ടതില്ലെന്ന് എല്‍ഡിഎഫ് സ്ഥാനാര്‍ഥി എം ജെ ജേക്കബ് മാധ്യമങ്ങളോടു പറഞ്ഞു. പിറവം ഉപതെരഞ്ഞെടുപ്പിലെ ജനവിധി അംഗീകരിക്കുന്നു. സര്‍ക്കാരിന്റെ ഔദ്യോഗിക സംവിധാനങ്ങള്‍ യുഡിഎഫ് സ്ഥാനാര്‍ഥിക്കായി പിറവത്ത് പ്രവര്‍ത്തിച്ചിട്ടുണ്ട്. ജാതിമത ശക്തികള്‍ യുഡിഎഫിനൊപ്പം നിലകൊണ്ടു. കഴിഞ്ഞതവണത്തേക്കാള്‍ എല്‍ഡിഎഫിന് വോട്ട് വര്‍ധിച്ചിട്ടുണ്ട്. പരാജയകാരണം എല്‍ഡിഎഫ് പരിശോധിക്കും. തനിക്ക് വോട്ട് ചെയ്ത മുഴുവന്‍ ആളുകളെയും അഭിനന്ദിക്കുന്നുവെന്നും എം ജെ മൂവാറ്റുപുഴയില്‍ മാധ്യമങ്ങളോടു പറഞ്ഞു.

deshabhimani 220312

പിറവം യുഡിഎഫ് നിലനിര്‍ത്തി

പിറവം നിയമസഭാ സീറ്റ് യുഡിഎഫ് നിലനിര്‍ത്തി. 12,070 വോട്ടിന്റെ ഭൂരിപക്ഷത്തില്‍ യുഡിഎഫ് സ്ഥാനാര്‍ഥി അനൂപ് ജേക്കബ് ജയിച്ചു. അനൂപിന് 82,756 വോട്ടും എല്‍ഡിഎഫ് സ്ഥാനാര്‍ഥി എം ജെ ജേക്കബിന് 70,686 വോട്ടും ലഭിച്ചു. ബിജെപിയിലെ അഡ്വ. കെ ആര്‍ രാജഗോപാല്‍ 3,241 വോട്ട് നേടി. വ്യാഴാഴ്ച രാവിലെ 9.30 ന് നിയമസഭാംഗമായി അനൂപ് ജേക്കബ് സത്യപ്രതിജ്ഞ ചെയ്യും. പഴയ തിരുവാങ്കുളം പഞ്ചായത്തില്‍ നിന്ന് തൃപ്പൂണിത്തുറ നഗരസഭയില്‍ ഉള്‍പ്പെടുത്തിയ പ്രദേശങ്ങളിലും ചോറ്റാനിക്കര പഞ്ചായത്തിലും എല്‍ഡിഎഫ് മേല്‍ക്കൈ നിലനിര്‍ത്തിയപ്പോള്‍ മറ്റിടങ്ങളില്‍ യുഡിഎഫ് ലീഡ് നേടി.

തിരുവാങ്കുളത്ത് 365ഉം ചോറ്റാനിക്കരയില്‍ 171 വോട്ടുമാണ് എല്‍ഡിഎഫ് ലീഡ്്. മുളന്തുരുത്തി -1522, മണീട്- 1042, രാമമംഗലം- 985, പാമ്പാക്കുട - 1216, ആമ്പല്ലൂര്‍ - 638, എടയ്ക്കാട്ടുവയല്‍ - 721, പിറവം- 1336, തിരുമാറാടി- 2197, ഇലഞ്ഞി- 1832, കൂത്താട്ടുകുളം- 1058 എന്നിങ്ങനെയാണ് മറ്റുപഞ്ചായത്തുകളില്‍ യുഡിഎഫ് നേടിയ ലീഡ്.

ഇതര സ്ഥാനാര്‍ഥികള്‍ക്കു ലഭിച്ച വോട്ടുകള്‍ : (പേര്, പാര്‍ടി, വോട്ട് ക്രമത്തില്‍) വര്‍ഗീസ് പി ചെറിയാന്‍ (ജനതാപാര്‍ടി)- 437, ആക്കാവിള സലീം (എസ്ആര്‍പി)- 142, എന്‍ ടി സുരേഷ്കുമാര്‍ (ഫോര്‍വേഡ് ബ്ലോക്ക്)- 96, അരുന്ധതി (സ്വത.)- 281, കെ ജി കൃഷ്ണന്‍കുട്ടി (സ്വത.)- 192, ബിന്ദു ഹരിദാസ് (സ്വത., ജനപക്ഷം)- 430. കഴിഞ്ഞ നിയമസഭാ പൊതുതെരഞ്ഞെടുപ്പില്‍ 157 വോട്ടിന്റെ ഭൂരിപക്ഷത്തിലാണ് ടി എം ജേക്കബ് വിജയിച്ചത്. ഇരുമുന്നണികളും കഴിഞ്ഞതവണത്തേക്കാള്‍ കൂടുതല്‍ വോട്ട് നേടിയപ്പോള്‍ 2011ല്‍ 4234 വോട്ടുണ്ടായിരുന്ന ബിജെപിക്ക് ഇക്കുറി 3241 വോട്ട് നേടാനെ കഴിഞ്ഞുള്ളൂ.

യുഡിഎഫിന്റെ ഭൂരിപക്ഷം കൂടിയെങ്കിലും എല്‍ഡിഎഫിന്റെ ജനകീയാടിത്തറ വര്‍ധിച്ചതായി വോട്ടിങ്നില വ്യക്തമാക്കുന്നു. മണ്ഡലത്തിന്റെ ചരിത്രത്തില്‍ എല്‍ഡിഎഫിനു ലഭിച്ചിട്ടുള്ളതില്‍ ഏറ്റവും കൂടുതല്‍ വോട്ട് ഇക്കുറിയാണ്. കഴിഞ്ഞ തവണത്തെക്കാള്‍ 4340 വോട്ട് വര്‍ധിച്ചു. മണ്ഡലത്തിനു പുറത്തുനിന്ന് ജീവനക്കാരെ തെരഞ്ഞെടുപ്പ് ജോലിക്ക് നിയോഗിച്ചിരുന്നതിനാല്‍ തപാല്‍വോട്ടുകള്‍ ഉണ്ടായിരുന്നില്ല. പട്ടാളത്തില്‍ ജോലി ചെയ്യുന്നവര്‍ക്കുള്ള 316 സര്‍വീസ് വോട്ടുകള്‍ അയച്ചെങ്കിലും മൂന്നെണ്ണമാണ് തിരികെ വന്നത.് അതില്‍ സാധുവായ ഏക വോട്ട് എം ജെ ജേക്കബ് നേടി.

മണ്ഡലത്തില്‍ പത്താമത്തെ തെരഞ്ഞെടുപ്പാണ് നടന്നത്. ഇപ്പോഴത്തേതടക്കം ഏഴു പ്രാവശ്യവും ജയിച്ചത് യുഡിഎഫാണ്. മൂവാറ്റുപുഴ നിര്‍മല ജൂനിയര്‍ സ്കൂളില്‍ ബുധനാഴ്ച രാവിലെ എട്ടിന് ആരംഭിച്ച വോട്ടെണ്ണല്‍ 10ന് പൂര്‍ത്തിയായി. ഇതിനിടെ, അനൂപ് മന്ത്രിയാകുമെന്നതില്‍ സംശയം വേണ്ടെന്നും എന്നാല്‍ വകുപ്പ് ഇപ്പോള്‍ പറയാന്‍ പറ്റില്ലെന്നും മുഖ്യമന്ത്രി ഉമ്മന്‍ചാണ്ടി തിരുവന്തപുരത്ത് പറഞ്ഞു.

അനൂപ് ജേക്കബ് എംഎല്‍എയായി സത്യപ്രതിജ്ഞ ചെയ്തു

പിറവം എംഎല്‍എയായി അനൂപ് ജേക്കബ് സത്യപ്രതിജ്ഞ ചെയതു. വ്യാഴാഴ്ച രാവിലെ 9.30നായിരുന്നു സത്യപ്രതിജ്ഞ ചടങ്ങ്. അതേസമയം അനൂപിനെ മന്ത്രിയാക്കുന്ന കാര്യം അടുത്ത യുഡിഎഫ് യോഗത്തില്‍ തീരുമാനിക്കുമെന്ന് യുഡിഎഫ് കണ്‍വീനര്‍ പി പി തങ്കച്ചന്‍ ബുധനാഴ്ച പറഞ്ഞിരുന്നു. അനൂപിന്റെ വകുപ്പുകളില്‍ അന്തിമതീരുമാനമാകാത്തതും ലീഗിന്റെ അഞ്ചാം മന്ത്രിസ്ഥാനം സംബന്ധിച്ച തര്‍ക്കവുമാണ് യുഡിഎഫ് നേതൃത്വം നേരിടുന്ന പ്രധാന വെല്ലുവിളി.

deshabhimani

പിറവത്ത് റെക്കോഡ് പോളിങ് 86.38%

കേരള രാഷ്ട്രീയത്തില്‍ നിര്‍ണായകമായ പിറവം ഉപതെരഞ്ഞെടുപ്പില്‍ റെക്കോഡ് പോളിങ്. തെരഞ്ഞെടുപ്പ് കമീഷന്റെ കണക്കനുസരിച്ച് പോളിങ് ശതമാനം 86.38 ആണ്. എട്ട് ബൂത്തുകളില്‍ 90 ശതമാനത്തില്‍ അധികം വോട്ട് രേഖപ്പെടുത്തിയിട്ടുണ്ടെന്നാണ് പ്രാഥമിക കണക്ക്. പോളിങ് സമാധാനപരമായിരുന്നു. 21ന് മൂവാറ്റുപുഴ നിര്‍മല ജൂനിയര്‍ സ്കൂളിലാണ് വോട്ടെണ്ണല്‍ .
1977ല്‍ രൂപീകൃതമായ മണ്ഡലത്തിലെ ഇതിനു മുന്‍പത്തെ ഉയര്‍ന്ന പോളിങ് 87ല്‍ ആയിരുന്നു- 85.45 ശതമാനം. അന്ന് എല്‍ഡിഎഫിനായിരുന്നു വിജയം. വോട്ടെടുപ്പ് അവസാനിക്കേണ്ട സമയമായ അഞ്ചിനുശേഷവും നിരവധി ബൂത്തുകളില്‍ വോട്ടെടുപ്പു തുടര്‍ന്നു. ചിലയിടങ്ങളില്‍ ഏഴുവരെ നീണ്ടു. തെരഞ്ഞെടുപ്പു കമീഷന്‍ പ്രശ്നബാധിതമായി പ്രഖ്യാപിച്ച 26 ബൂത്തുകള്‍ ഉള്‍പ്പെടെ ഒരിടത്തും അനിഷ്ടസംഭവങ്ങളില്ല. മണ്ഡലത്തിലെ ആകെ വോട്ടര്‍മാര്‍ 183170 ആണ്. ഇതില്‍ 158231 പേര്‍ വോട്ടു ചെയ്തു. 78488 പുരുഷന്മാരും 79743 സ്ത്രീകളും സമ്മതിദാന അവകാശം വിനിയോഗിച്ചു. ഏഴു ടെന്‍ഡര്‍ വോട്ടും ചെയ്തിട്ടുണ്ട്.

മണ്ഡലത്തില്‍ ഏറ്റവും ഉയര്‍ന്ന പോളിങ് ശതമാനം എടയ്ക്കാട്ടുവയല്‍ പഞ്ചായത്തിലാണ് 90.10 ശതമാനം. 80.66 ശതമാനം പേര്‍ വോട്ടു ചെയ്ത ഇലഞ്ഞി പഞ്ചായത്തിലാണ് എറ്റവും കുറവ്. മുളന്തുരുത്തി 86.57, തിരുവാങ്കുളം 85.34, ചോറ്റാനിക്കര 86.44, ആമ്പല്ലൂര്‍ 87.66, കൂത്താട്ടുകുളം 85.7, പിറവം 85.6, തിരുമാറാടി 88.55, രാമമംഗലം 85.62, പാമ്പാക്കുട 88.33, മണീട് 85.46 എന്നിങ്ങനെയാണ് മറ്റു പഞ്ചായത്തിലെ പോളിങ് ശതമാനം. മണീട് പഞ്ചായത്തിലെ 45-ാം നമ്പര്‍ ബൂത്തില്‍ 90.9 ശതമാനവും 79-ാം നമ്പര്‍ ബൂത്തില്‍ 91.9 ശതമാനവും വോട്ട് രേഖപ്പെടുത്തി. മുളന്തുരുത്തിയിലെ 36-ാം നമ്പര്‍ ബൂത്തില്‍ പോളിങ്സമയം കഴിഞ്ഞപ്പോള്‍ ഇരുന്നൂറോളംപേര്‍ ക്യൂവിലുണ്ടായിരുന്നു. ഇവര്‍ക്ക് ടോക്കണ്‍ നല്‍കി വോട്ടെടുപ്പ് പൂര്‍ത്തിയായപ്പോള്‍ ഏഴോടടുത്തു.

പിറവം പഞ്ചായത്തിലെ 98-ാം നമ്പര്‍ ബൂത്തില്‍ പകല്‍ മൂന്നോടെ വോട്ടിങ്യന്ത്രം തകരാറിലായി. പെട്ടെന്നു പരിഹരിച്ചതിനാല്‍ വോട്ടെടുപ്പ് തടസ്സപ്പെട്ടില്ല. പാഴൂര്‍ ഗവ. എല്‍പി സ്കൂളിലെ 102-ാം നമ്പര്‍ ബൂത്തിലെ പ്രിസൈഡിങ് ഓഫീസര്‍ അനീഷ് വോട്ടെടുപ്പിനിടെ കുഴഞ്ഞുവീണു. ഇദ്ദേഹത്തെ ആശുപത്രിയില്‍ പ്രവേശിപ്പിച്ചു. ഉടന്‍തന്നെ പുതിയ പ്രിസൈഡിങ് ഓഫീസര്‍ ചുമതലയേറ്റ് വോട്ടെടുപ്പ് തുടര്‍ന്നു. എല്‍ഡിഎഫ് സ്ഥാനാര്‍ഥി എം ജെ ജേക്കബ് തിരുമാറാടി പഞ്ചായത്തിലെ മണിമലക്കുന്ന് കോളേജിലെ 108-ാം നമ്പര്‍ ബൂത്തില്‍ വോട്ട്ചെയ്തു. രാവിലെ ഏഴോടെ എത്തിയ അദ്ദേഹം ഒരു മണിക്കൂറിലേറെ ക്യൂനിന്ന്് വോട്ട് രേഖപ്പെടുത്തി. യുഡിഎഫ് സ്ഥാനാര്‍ഥി അനൂപ് ജേക്കബ് ഇതേ പഞ്ചായത്തിലെ മണ്ണത്തൂര്‍ ഹൈസ്കൂളില്‍ 107-ാം നമ്പര്‍ ബൂത്തില്‍ വോട്ട്ചെയ്തു. ബിജെപി സ്ഥാനാര്‍ഥി അഡ്വ. കെ ആര്‍ രാജഗോപാല്‍ പെരുമ്പാവൂര്‍ സ്വദേശിയായതിനാല്‍ മണ്ഡലത്തില്‍ വോട്ടില്ല.

deshabhimani 180312

പിറവത്ത് ഇന്ന് വിധിയെഴുത്ത്

കേരള രാഷ്ട്രീയത്തിലെ നിര്‍ണായകമായ പിറവം ഉപതെരഞ്ഞെടുപ്പ് ശനിയാഴ്ച നടക്കും. രാവിലെ ഏഴുമുതല്‍ വൈകിട്ട് അഞ്ചുവരെ തുടര്‍ച്ചയായി പത്തുമണിക്കൂറാണ് പോളിങ്. 21നാണ് വോട്ടെണ്ണല്‍ ; പകല്‍ പതിനൊന്നോടെ ഫലമറിയാം. 134 ബൂത്തുകളിലായി 1,83,493 വോട്ടര്‍മാരാണ് വിധി നിര്‍ണയിക്കുക. കൂത്താട്ടുകുളം, ഇലഞ്ഞി, പിറവം, മണീട്, തിരുമാറാടി, പാമ്പാക്കുട, രാമമംഗലം, മുളന്തുരുത്തി, എടയ്ക്കാട്ടുവയല്‍ , ആമ്പല്ലൂര്‍ , ചോറ്റാനിക്കര പഞ്ചായത്തുകളും തൃപ്പൂണിത്തുറ നഗരസഭയിലെ തിരുവാങ്കുളം, ഇരുമ്പനം പ്രദേശങ്ങളും ഉള്‍പ്പെട്ടതാണ് മണ്ഡലം.

2011ലെ നിയമസഭാ തെരഞ്ഞെടുപ്പില്‍ എല്‍ഡിഎഫ് സ്ഥാനാര്‍ഥി എം ജെ ജേക്കബ് 157 വോട്ടുകള്‍ക്കാണ് പരാജയപ്പെട്ടത്. അദ്ദേഹംതന്നെയാണ് ഈ ഉപതെരഞ്ഞെടുപ്പിലെ എല്‍ഡിഎഫ് സ്ഥാനാര്‍ഥി. തെരഞ്ഞെടുപ്പിലെ കന്നിക്കാരനും ടി എം ജേക്കബിന്റെ മകനുമായ അനൂപ് ജേക്കബാണ് യുഡിഎഫ് സ്ഥാനാര്‍ഥി. ബിജെപിയിലെ കെ ആര്‍ രാജഗോപാലും പ്രചാരണത്തില്‍ സജീവമായിരുന്നു. ഒമ്പതു സ്ഥാനാര്‍ഥികളാണ് മത്സരരംഗത്തുള്ളത്. പോളിങ്ങിനും വോട്ടെണ്ണലിനും കനത്ത സുരക്ഷാസന്നാഹമാണ് ഏര്‍പ്പെടുത്തിയിട്ടുള്ളത്. റൂറല്‍ എസ്പി കെ പി ഫിലിപ്പിന്റെ കീഴില്‍ 1500 പൊലീസുകാരെ നിയോഗിച്ചു. 16 തെരഞ്ഞെടുപ്പു നിരീക്ഷകര്‍ മണ്ഡലത്തിലുണ്ട്. 23 പ്രശ്നബാധിത ബൂത്തുകളില്‍കൂടുതല്‍ പൊലീസുകാരെ നിയോഗിച്ചു. മണ്ഡലത്തിലേക്കു വരുന്ന മുഴുവന്‍ വാഹനങ്ങളും അതിര്‍ത്തികളില്‍ പൊലീസ് പരിശോധിച്ചു. വോട്ടര്‍മാരല്ലാത്തവരും സ്ഥിരതാമസക്കാരല്ലാത്തവരും മണ്ഡലത്തില്‍നിന്ന് പുറത്തുപോകണമെന്ന് പൊലീസ് ഉച്ചഭാഷിണിയിലൂടെ അറിയിപ്പു നല്‍കി. യുഡിഎഫിനുവേണ്ടി സര്‍ക്കാര്‍ നടത്തിയ അധികാരദുര്‍വിനിയോഗം പ്രചാരണകാലയളവില്‍ അസ്വസ്ഥതകളുയര്‍ത്തി. യുഡിഎഫിന്റെ കള്ളവോട്ട്ചേര്‍ക്കലിനെതിരെ വലിയ പ്രക്ഷോഭംതന്നെ നടന്നു. ഇതേത്തുടര്‍ന്ന് നാലായിരത്തില്‍പ്പരം കള്ളവോട്ട് അപേക്ഷ തള്ളപ്പെട്ടു. പോളിങ് സാമഗ്രികളുടെ വിതരണം മൂവാറ്റുപുഴ നിര്‍മല ജൂനിയര്‍ സ്കൂളില്‍ വെള്ളിയാഴ്ച ഉച്ചയോടെ പൂര്‍ത്തിയായി. 21ന് ഇവിടെയാണ് വോട്ടെണ്ണല്‍ .

deshabhimani 170312

ജനദ്രോഹത്തിനെതിരെ വിധിയെഴുതുക

കേന്ദ്ര-സംസ്ഥാന സര്‍ക്കാരുകളുടെ ജനവിരുദ്ധ നയങ്ങള്‍ക്കെതിരെ ഉചിതമായ പ്രതികരണത്തിനുള്ള അവസരമാണ് പിറവം മണ്ഡലത്തിലെ ജനങ്ങള്‍ക്ക് ലഭിച്ചിരിക്കുന്നത്. രാജ്യത്തെ സാധാരണ ജനങ്ങളുടെ ജീവിതം അനുദിനം ദുരിതങ്ങളിലേക്ക് വലിച്ചെറിയപ്പെടുമ്പോള്‍ അതിനു കാരണമായ സാമ്രാജ്യ ആഗോളവല്‍ക്കരണ നയങ്ങളുടെ കൊടി കൂടുതല്‍ ഉയര്‍ത്തിപ്പിടിക്കുകയാണ് യുപിഎ സര്‍ക്കാര്‍ . ശതകോടീശ്വരന്മാര്‍ക്കുവേണ്ടി ഭരണംനടക്കുന്നു. അധ്വാനിക്കുന്നവരുടെ ജീവിതം വഴിമുട്ടുന്നു. അഞ്ചു സംസ്ഥാനങ്ങളിലേക്ക് നടന്ന തെരഞ്ഞെടുപ്പില്‍ കേന്ദ്രഭരണകക്ഷിയായ കോണ്‍ഗ്രസിന് ദയനീയ തിരിച്ചടിയാണ് ലഭിച്ചത്. ഉത്തര്‍പ്രദേശില്‍ അത്ഭുതങ്ങള്‍ സംഭവിപ്പിക്കാന്‍ അവതരിപ്പിച്ച നവനേതാക്കള്‍ പരാജയത്തിന്റെ കയ്പുനീര്‍കുടിച്ച് പിന്‍വാങ്ങി. വിലക്കയറ്റമാണ് തിരിച്ചടിക്കു കാരണമെന്ന് യുപിഎ അധ്യക്ഷതന്നെ കുറ്റസമ്മതം നടത്തി. എന്നാല്‍ , വിലക്കയറ്റം രൂക്ഷമാക്കുന്ന നടപടികളില്‍നിന്ന് പിന്മാറിയതുമില്ല. തെരഞ്ഞെടുപ്പുഫലം വന്നയുടനെ ജനങ്ങളെ ശിക്ഷിച്ചത് ചരക്കുകടത്തുകൂലി വര്‍ധിപ്പിച്ചും തീവണ്ടിയാത്ര നിരക്കുകളില്‍ വന്‍ വര്‍ധന അടിച്ചേല്‍പ്പിച്ചുമാണ്.

പെട്രോള്‍വില അഞ്ചുരൂപകൂടി വര്‍ധിപ്പിക്കാന്‍ പോകുന്നു. കോണ്‍ഗ്രസ് ഒന്നില്‍നിന്നും പഠിക്കുന്നില്ല. കേന്ദ്രഭരണത്തിന്റെ അതേ പാതയിലാണ് കേരളത്തിലെ യുഡിഎഫ് സര്‍ക്കാരും. പതിമൂന്നാം കേരള നിയമസഭയുടെ ആദ്യത്തെ ഉപതെരഞ്ഞെടുപ്പിന് പിറവം വേദിയാകുമ്പോള്‍ സ്വാഭാവികമായും ജനങ്ങള്‍ അനുഭവിക്കുന്ന ജീവിതദുരിതങ്ങള്‍തന്നെയാണ് വിധിയെഴുത്തിന് കാരണമാവുക. മാര്‍ച്ച് 21ന് പുറത്തുവരുന്ന തെരഞ്ഞെടുപ്പു ഫലം സംസ്ഥാനത്ത് ഭരണമാറ്റത്തിന് വഴിവയ്ക്കുന്ന വ്യത്യാസം മുന്നണികള്‍ തമ്മില്‍ ഉണ്ടാക്കില്ല എന്നതുകൊണ്ട് പിറവത്തിന്റെ പ്രാധാന്യം ഒട്ടും കുറയുന്നില്ല. പത്തുമാസത്തെ യുഡിഎഫ് ഭരണം കേരളത്തിന് എന്ത് ചെയ്തു; എന്തൊക്കെ ചെയ്തില്ല എന്നതിനൊപ്പം കേരളത്തിന്റെയും ഇന്ത്യയുടെയും ലോകത്തിന്റെയാകെയും സമകാലീന രാഷ്ട്രീയവും ജനങ്ങളുടെ ജീവിതപ്രശ്നങ്ങളും ജനഹിതത്തില്‍ തെളിയും. ഏറ്റവുമൊടുവില്‍ സാധാരണക്കാരന്റെ ജീവിതഭാരത്തിനുമുകളില്‍ ഒരു കല്ലുകൂടി കയറ്റിവച്ച റെയില്‍വേ ബജറ്റും വോട്ടെടുപ്പിന് തലേന്ന് വരാനിരിക്കുന്ന പൊതു ബജറ്റുമുള്‍പ്പെടെ സമ്മതിദായകരെ സ്വാധീനിക്കും. അഞ്ചുകൊല്ലത്തെ എല്‍ഡിഎഫ് ഭരണവും പത്തുമാസത്തെ യുഡിഎഫ് ഭരണവും തമ്മിലുള്ള താരതമ്യമാണ് പിറവത്ത് ഗൗരവമായി ചര്‍ച്ചചെയ്യപ്പെട്ടത്. എല്‍ഡിഎഫ് അധികാരത്തിലിരുന്ന കാലം സംസ്ഥാനത്തിന്റെ മറ്റുഭാഗങ്ങളിലെന്നപോലെ പിറവത്തിനും വികസനത്തിന്റെയും പുരോഗതിയുടെയും കാലമായിരുന്നു. 450 കോടി രൂപയുടെ വികസനപ്രവര്‍ത്തനങ്ങള്‍ ആ അഞ്ചുകൊല്ലത്തിനുള്ളില്‍ എംഎല്‍എയായിരുന്ന എം ജെ ജേക്കബ്ബിന്റെ മുന്‍കൈയില്‍ മണ്ഡലത്തില്‍ നടന്നുവെന്നാണ് ഔദ്യോഗിക കണക്ക്.

1977ല്‍ നിലവില്‍വന്ന മണ്ഡലത്തില്‍ 11 പഞ്ചായത്താണുള്ളത്. ആകെയുള്ള 1,83,493 വോട്ടര്‍മാരുടെ സമ്മതി തേടി ഒമ്പത് സ്ഥാനാര്‍ഥികള്‍ രംഗത്തുണ്ട്. കൂടുതല്‍കാലം വലതുപക്ഷത്തോടൊപ്പം നിന്ന മണ്ഡലത്തില്‍ സമീപകാലത്ത് പ്രകടവും ഉറച്ചതുമായ ഇടതുപക്ഷാഭിമുഖ്യം ദൃശ്യമാണ്. 2006ല്‍ സിപിഐ എമ്മിലെ എം ജെ ജേക്കബ് 5150 വോട്ടിന് വിജയിച്ച് നിയമസഭയിലെത്തി. അന്ന് പരാജയപ്പെട്ടത് യുഡിഎഫിലെ കരുത്തനായ ടി എം ജേക്കബാണ്. 2011ല്‍ പഴയ എതിരാളികള്‍ വീണ്ടും മാറ്റുരച്ചപ്പോള്‍ , കടുത്ത മത്സരത്തിനൊടുവില്‍ 157 വോട്ട് എന്ന നേരിയ വ്യത്യാസത്തില്‍ ടി എം ജേക്കബ് ജയിച്ചു. മണ്ഡലം യുഡിഎഫ് തിരിച്ചുപിടിച്ചു എന്ന് പറയാന്‍തക്ക വിജയമല്ല ഉണ്ടായത്. ടി എം ജേക്കബ്ബിന്റെ നിര്യാണംമൂലം വന്ന ഉപതെരഞ്ഞെടുപ്പില്‍ മകന്‍ അനൂപ് ജേക്കബ്ബിനെ യുഡിഎഫ് രംഗത്തിറക്കിയത് സഹതാപവോട്ട് ഉന്നംവച്ചാണ്. മണ്ഡലത്തിലെ ജനങ്ങള്‍ക്കിടയില്‍ അവിശ്രമം പ്രവര്‍ത്തിക്കുകയും ആ പ്രവര്‍ത്തനത്തിന്റെ ഫലം ജനങ്ങള്‍ക്ക് അനുഭവയോഗ്യമാക്കുകയും ചെയ്തു എന്ന ആത്മവിശ്വാസത്തോടെ എം ജെ ജേക്കബുതന്നെ എല്‍ഡിഎഫിനുവേണ്ടി രംഗത്തുവന്നു.

യുഡിഎഫ്-എല്‍ഡിഎഫ് മത്സരം എന്നതിലുപരിയായ അര്‍ഥതലങ്ങള്‍ പിറവത്തെ തെരഞ്ഞെടുപ്പിനുണ്ട്. പിറവത്ത് പരാജയത്തിന്റെ നിഴല്‍ കണ്ടുതുടങ്ങിയപ്പോഴാണ്, ഉത്തരേന്ത്യന്‍ മാതൃകയില്‍ ചാക്കിട്ടുപിടിത്തത്തിലൂടെ ഒരു പ്രതിപക്ഷ എംഎല്‍എയെ യുഡിഎഫ് നേതൃത്വം രാജിവയ്പിച്ചത്. ജാതി-മത-വര്‍ഗീയ രാഷ്ട്രീയത്തിന്റെ പതിവ് ചേരുവകളും അധികാര ദുര്‍വിനിയോഗവും പണത്തിന്റെ കുത്തിയൊഴുക്കുമാണ് യുഡിഎഫിന്റെ തെരഞ്ഞെടുപ്പായുധങ്ങള്‍ . സമാനതകളില്ലാത്തത്രയും ചിട്ടയായ പ്രവര്‍ത്തനത്തിലൂടെ വോട്ടര്‍മാരെ നേരിട്ട് സമീപിച്ച് രാഷ്ട്രീയപ്രശ്നങ്ങള്‍ അവതരിപ്പിച്ചാണ് എല്‍ഡിഎഫ് പ്രചാരണം മുന്നേറിയത്. പിറവത്തിന്റേതായ പ്രത്യേക പ്രശ്നങ്ങള്‍ ചെറുതല്ലാതെ ചര്‍ച്ചചെയ്യപ്പെട്ടു എന്നതിനൊപ്പം, കേരളത്തിന്റെ ഭാവി എന്താകണം എന്ന ചോദ്യം പ്രചാരണവേദിയില്‍ മുഴങ്ങിനിന്നു. യുഡിഎഫിന്റെ ഭരണവൈകല്യങ്ങളും അഴിമതിയും വോട്ടര്‍മാര്‍ക്കുമുന്നില്‍ അവതരിപ്പിക്കപ്പെട്ടു.

എല്‍ഡിഎഫ് സര്‍ക്കാരിന്റെ നേട്ടങ്ങള്‍ ഒന്നൊന്നായി തകര്‍ക്കുന്ന യുഡിഎഫ് ഭരണത്തിനെതിരായി വിധിയെഴുതുന്നത്, കേരളത്തിന്റെ നല്ല നാളേയ്ക്കുവേണ്ടി പിറവത്തെ ജനങ്ങള്‍ക്ക് ചെയ്യാനുള്ള മഹത്തായ സേവനംതന്നെയാണ്. കര്‍ഷക ആത്മഹത്യ തിരിച്ചുവന്ന; അഴിമതി അരങ്ങുവാഴുന്ന; ക്ഷേമപദ്ധതികള്‍ തകര്‍ത്ത് സാധാരണക്കാരനോട് യുദ്ധംചെയ്യുന്ന; തസ്തികകള്‍ വെട്ടിക്കുറയ്ക്കുന്ന; പൊലീസടക്കം ഭരണസംവിധാനത്തെയാകെ രാഷ്ട്രീയവല്‍ക്കരിക്കുന്ന; വര്‍ഗീയതയ്ക്കും തീവ്രവാദത്തിനും പ്രോത്സാഹനം ലഭിക്കുന്ന; പൊതുവിദ്യാഭ്യാസവും പൊതുജനാരോഗ്യപാലനവും തുരങ്കംവയ്ക്കുന്ന യുഡിഎഫ് ഭരണത്തിനെതിരായ കേരള ജനതയുടെ രോഷപ്രകടനം ഏറ്റെടുക്കാനുള്ള നിയോഗമാണ് പിറവത്തെ സമ്മതിദായകര്‍ക്കുമുന്നിലുള്ളത്. എം ജെ ജേക്കബ്ബിനെ വിജയിപ്പിക്കുന്നതിലൂടെ, കേരളത്തില്‍ എല്‍ഡിഎഫ്് സര്‍ക്കാര്‍ സൃഷ്ടിച്ച വികസനനേട്ടങ്ങള്‍ സംരക്ഷിക്കാനുള്ള പോരാട്ടമാണ് വിജയത്തിലേക്ക് കുതിക്കുക. ആ നേട്ടങ്ങള്‍ സംരക്ഷിക്കപ്പെടാനും ജനങ്ങളെ ദ്രോഹിക്കുന്ന വലതുപക്ഷ രാഷ്ട്രീയത്തിന് അര്‍ഹമായ ശിക്ഷ നല്‍കാനുമാകട്ടെ പിറവത്തെ ജനങ്ങളുടെ സമ്മതിദാനം.

deshabhimani editorial 160312

വികസനവും "കരുതലും"

പിറവം ഫലം വരുന്നതിനു മുമ്പുതന്നെ നിയമസഭയിലെ എല്‍ഡിഎഫ്- യുഡിഎഫ് വ്യത്യാസം പഴയ നിലയിലെത്തിക്കാന്‍ സെല്‍വരാജിനെ രാജിവയ്പിച്ചതിലൂടെ ഉമ്മന്‍ചാണ്ടിക്ക് കഴിഞ്ഞു. ഉത്തരേന്ത്യയില്‍ ഏറ്റ കനത്ത ആഘാതത്തില്‍ നിന്ന് രക്ഷതേടുന്ന കോണ്‍ഗ്രസിന്റെ അവസ്ഥയോര്‍ത്ത് എ കെ ആന്റണിയും ഉമ്മന്‍ചാണ്ടിക്ക് പിന്തുണയുമായി എത്തി. സെല്‍വരാജിന്റെ മരുമകന് 40,000 രൂപ പ്രതിമാസ ശമ്പളം കിട്ടുന്ന ജോലി, ക്രിമിനല്‍ കേസില്‍ പ്രതിയായി വന്ന മരുമകന്റെ അച്ഛന് നിയമം ലംഘിച്ച് വിദേശത്ത് കടക്കാനുള്ള അവസരം. ഇതെല്ലാം കുതിരക്കച്ചവടസന്നാഹമല്ലെങ്കില്‍ പിന്നെ എന്ത്?

സെല്‍വരാജിന് അതിശീഘ്രം അനുവദിച്ച പ്രത്യേക ഭരണാനുമതിയും പ്രതിപക്ഷാംഗങ്ങളായ എനിക്കും ഹംസയ്ക്കും അനുവദിച്ചതും ഒന്നാണെന്ന് ഉമ്മന്‍ചാണ്ടി പറയുന്നത് നേരല്ല. അരൂര്‍ - വൈക്കം മണ്ഡലങ്ങളെ ബന്ധിപ്പിക്കുന്ന തുറവൂര്‍ -പമ്പാ പാത കഴിഞ്ഞ എല്‍ഡിഎഫ് സര്‍ക്കാര്‍ നിയമസഭയില്‍ ഉറപ്പുനല്‍കിയ പദ്ധതിയാണ്. 2008ല്‍ നബാര്‍ഡ് അനുമതി നല്‍കിയ പദ്ധതിയാണ് ഇത്. മൂന്ന് മണ്ഡലത്തിലേക്ക് എല്‍ഡിഎഫ് സര്‍ക്കാര്‍ അനുവദിച്ച "ഒരുകോടി പദ്ധതി"യിലെ തുകയില്‍ നിന്ന് തുല്യവിഹിതം വീതം ഉപയോഗിച്ച് ഇന്‍വെസ്റ്റിഗേഷനും സോയില്‍ ടെസ്റ്റും പൂര്‍ത്തിയാക്കിയ പദ്ധതി. എല്‍ഡിഎഫ് സര്‍ക്കാര്‍ ഡ്രിക്ക് മുഖേന ഡിസൈനും എസ്റ്റിമേറ്റും തയ്യാറാക്കിയ പദ്ധതി. കെ എം മാണി ബജറ്റ് അവതരിപ്പിക്കും മുമ്പ് പൊതുമരാമത്ത് മന്ത്രി ഇബ്രാഹിംകുഞ്ഞ് ഡിപിആര്‍ കിട്ടിയാല്‍ ഉടന്‍ ഭരണാനുമതി നല്‍കുമെന്ന് നിയമസഭയിലെ ചോദ്യോത്തരവേളയില്‍ രേഖാമൂലം ആവര്‍ത്തിച്ചു വ്യക്തമാക്കിയ പദ്ധതി. ബജറ്റില്‍ പ്രഖ്യാപിച്ച പദ്ധതിക്ക് എട്ടുമാസം കഴിഞ്ഞ് ഭരണാനുമതി നല്‍കിയെന്നു മാത്രം. ഇപ്പോള്‍ നബാര്‍ഡ് വഴി അനുവദിച്ച ഈ 49 കോടി രൂപയും സെല്‍വരാജിനെ തൃപ്തിപ്പെടുത്താന്‍ നടത്തിയ പ്രത്യേക ഭരണാനുമതിയും ഒന്നല്ല.

അതുപോലെ എല്‍ഡിഎഫ് സര്‍ക്കാര്‍ പ്രഖ്യാപിച്ച് തുക വകയിരുത്തിയ പാലക്കാട് ഫിലിം സിറ്റി പദ്ധതിക്ക് ഇപ്പോള്‍ ഭരണാനുമതി നല്‍കിയതും സെല്‍വരാജിന്റെ മണ്ഡലത്തില്‍ തിടുക്കത്തില്‍ നല്‍കിയ ഭരണാനുമതിയും ഒന്നല്ല. തുറവൂര്‍ -പമ്പാ പാതയുടെ ക്രെഡിറ്റിനു വേണ്ടി കെ സി വേണുഗോപാല്‍ ഫ്ളക്സ് യുദ്ധം നടത്തുന്നതിനിടെ അരൂരിലെ ആരിഫിന് 49 കോടി രൂപ നല്‍കിയെന്ന് ഉമ്മന്‍ചാണ്ടി പറഞ്ഞതില്‍ എനിക്ക് തെല്ല് ആശ്വാസത്തിന് വകയുണ്ടെന്നതു പറയാതെ വയ്യ.

എല്‍ഡിഎഫില്‍ നിന്ന് പലരും വരുമെന്ന് പി സി ജോര്‍ജ് പറയുന്നതില്‍ നിന്ന്, തന്നോളം വലുപ്പമുള്ള ചാക്ക് "തന്നെ" ഏല്‍പ്പിച്ചിരിക്കുന്നു എന്ന സൂചനയാണ് നല്‍കുന്നത്. ഇടതുപക്ഷം പിന്തുണ പിന്‍വലിച്ചപ്പോള്‍ കോടികള്‍ മുടക്കി നേടിയ ഭൂരിപക്ഷത്തിന്റെ യുപിഎ മാതൃക മുന്നിലുള്ളപ്പോള്‍ താനെന്തിന് അറച്ചു നില്‍ക്കണമെന്നും "കരുതലോടെ" ഇരിക്കാന്‍ താന്‍ ബാധ്യസ്ഥനാണെന്നും ഉമ്മന്‍ചാണ്ടിക്ക് പറയാം. ജനവിധി അട്ടിമറിക്കുന്ന ഭൂരിപക്ഷംകൊണ്ട് ഭരണം തുടരാന്‍ തയ്യാറല്ലെന്നു പ്രഖ്യാപിക്കാന്‍ മാത്രം ഉമ്മന്‍ചാണ്ടി ആദര്‍ശത്തിന്റെ ആള്‍രൂപമാണെന്ന അവകാശവാദമെന്നും ഇല്ലല്ലോ. "വികസനത്തോടൊപ്പം കരുതലും" എന്ന മുദ്രാവാക്യം ഭരണം നിലനിര്‍ത്താനുള്ള "കരുതലായി" മാറ്റുകയാണ് ഉമ്മന്‍ചാണ്ടി. സഹായിയായി കുതിര ഉള്‍പ്പെടെ എല്ലാത്തരം കച്ചവടത്തിനും വിരുതുള്ള പി സി ജോര്‍ജുമുണ്ടല്ലോ. വെറുതെ ഒരു ഭരണപക്ഷ എംഎല്‍എ ആയി മുന്നിലിരിക്കാനുള്ള വിഡ്ഢിയൊന്നുമല്ല രമേശ് ചെന്നിത്തല എന്നു നന്നായി അറിയാവുന്നതുകൊണ്ടു തന്നെയാണ് വികസനത്തോടൊപ്പം "കരുതലും" എന്ന മുദ്രാവാക്യം ഉമ്മന്‍ചാണ്ടി ഉയര്‍ത്തുന്നത്.

പക്ഷേ, സെല്‍വരാജ് സംഭവം പ്രതിപക്ഷത്തുണ്ടാക്കിയതിലുമപ്പുറം ഷോക്കുണ്ടാക്കിയത് വിശാല "ഐ"ഗ്രൂപ്പിനും രമേശ് ചെന്നിത്തലയ്ക്കും ആണെന്നതാണ് സത്യം. ഉമ്മന്‍ചാണ്ടിയുടെ ഈ "കരുതലിന്" എപ്പോഴാണ് ഒരു മറ് ഷോക്ക് എന്നാണ് രാഷ്ട്രീയ കേരളം ഉറ്റുനോക്കുന്നത്.

എം എം ആരിഫ് എംഎല്‍എ deshabhimani 160312

പിറവം കവലയില്‍ യുഡിഎഫിന് ചെണ്ടകൊട്ടി മനോരമ തളര്‍ന്നു

യുഡിഎഫ് ചെണ്ട കൊട്ടി പിറവത്ത് മനോരമ വല്ലാതെ വലഞ്ഞു. പ്രചാരണം തുടങ്ങിയശേഷം കഴിഞ്ഞ രണ്ടാഴ്ചത്തെ മലയാളമനോരമയുടെ താളുകള്‍ അവര്‍ കെട്ടിപ്പൊക്കിയ നുണക്കൊട്ടരങ്ങളുടെ സാക്ഷ്യപത്രമാണ്. ഓരോന്ന് കെട്ടും. പിന്നാലെ തകര്‍ന്നുവീഴും. പിന്നെയും കെട്ടും... എല്‍ഡിഎഫ് നേതാക്കളെ വ്യക്തിപരമായി അധിക്ഷേപിക്കുന്നതിലേക്കുവരെ ഈ ചെണ്ടകൊട്ട് അധഃപതിച്ചു. ഏറ്റവും അവസാനം 14ലെ പത്രത്തില്‍ വന്നത് ഇങ്ങനെ: കണ്ണൂര്‍ലോബി പ്രചാരണം നിയന്ത്രിക്കുന്നതില്‍ എല്‍ഡിഎഫിന് അമര്‍ഷം. സിപിഐ എം സംസ്ഥാന സെക്രട്ടറി പിണറായി വിജയനെ അടക്കമാണ് മനോരമ ഈ വിധം അപഹസിച്ചത്. പിറവത്ത് എല്‍ഡിഎഫിന്റെ ഐക്യത്തിന്റെ കരുത്തില്‍ യുഡിഎഫ് വിറളി പിടിച്ചുനില്‍ക്കുന്നതു കണ്ടപ്പോള്‍ മനോരമ കണ്ടുപിടിച്ച നുണയാണിത്.

പതിനഞ്ചിലെ പത്രത്തില്‍ മുഖ്യമന്ത്രിയുടെ റോഡ്ഷോമൂലം ഗതാഗതതടസ്സം ഉണ്ടായില്ലെന്ന് മനോരമ വാര്‍ത്ത. 40 വാഹനങ്ങളെങ്കിലും അദ്ദേഹത്തെ അനുഗമിച്ചു. നൂറോളം പൊലീസുകാരും അതിലേറെ കോണ്‍ഗ്രസുകാരും അദ്ദേഹത്തോടൊപ്പം ഉണ്ടായി. ഇത്രയും വലിയ വാഹനവ്യൂഹം ഗതാഗതതടസ്സം ഉണ്ടാക്കിയില്ലെന്നാണ് മനോരമയുടെ കണ്ടെത്തല്‍ . മറ്റൊരു വിലയിരുത്തല്‍ , എല്‍ഡിഎഫിന് ഒരു രക്ഷയുമില്ല എന്ന രീതിയിലാണ്.

വി എസ് അച്യുതാനന്ദനെ താറടിക്കാന്‍ ഈ പ്രചാരണ കാലയളവില്‍ മനോരമ കഠിനാധ്വാനംതന്നെ നടത്തി. സിന്ധു ജോയി കോലാഹലം മനോരമ അതിനുവേണ്ടി സംഘടിപ്പിച്ചതാണ്. വി എസ് പറഞ്ഞതും പിന്നീട് വിശദീകരിച്ചതും കേരളം കേട്ടു. എന്നിട്ടും മനോരമ വിട്ടില്ല. അതേസമയം വി എസിനെ പി സി ജോര്‍ജ് അസഭ്യം പറഞ്ഞത് മനോരമയ്ക്ക് വാര്‍ത്തയായതുമില്ല. മനോരമ കുടുംബക്കാര്‍ കൈയേറിയ പന്തല്ലൂര്‍ ക്ഷേത്ര ഭൂമി തിരിച്ചുപിടിക്കാനുള്ള സമരത്തിന്റെ മുന്‍പന്തിയില്‍ നില്‍ക്കുന്ന വിഎസ്സിനെതിരെ ആ പത്രം തിരിയുന്നത് സ്വാഭാവികം. ഈ കേസില്‍ ഹൈക്കോടതി ഉത്തരവുണ്ടായിട്ടും ഉമ്മന്‍ചാണ്ടി നടപടിയെടുക്കാതെ മാറ്റിവച്ചിരിക്കുന്നതും മനോരമയുടെ ഉളുപ്പില്ലാത്ത പാദസേവ കൊണ്ടു തന്നെ.

പിണറായി വിജയന്‍ അണികള്‍ക്ക് എന്തോ മുന്നറിയിപ്പു നല്‍കിയെന്നാണ് മാര്‍ച്ച് എട്ടിലെ മനോരമക്കഥ. സെല്‍വരാജിന്റെ രാജി മോശം ലക്ഷണമെന്ന് സിപിഐ എം കേന്ദ്രനേതൃത്വം വിലയിരുത്തിയെന്ന് 10ന് മനോരമ കഥ മെനഞ്ഞു. ഒരുപാട് അന്വേഷണാത്മക റിപ്പോര്‍ട്ടര്‍മാരുള്ള മനോരമക്ക് ശെല്‍വരാജിന്റെ മരുമകന് കൊച്ചി കോര്‍പറേഷനില്‍ വഴിവിട്ട് ജോലികൊടുത്തത് കണ്ടെത്താനായില്ല. രാജിക്ക് തലേന്നും രാജിയുടെ അന്നും ശെല്‍വരാജിനോട് പി സി ജോര്‍ജ് സംസാരിച്ചതും അവര്‍ അറിഞ്ഞില്ല. എം ജെ ജേക്കബ് സെക്രട്ടറിയായ റൂറല്‍ എഡ്യൂക്കേഷന്‍ സൊസൈറ്റി സ്ഥാപിച്ച മണിമലകുന്ന് കോളേജിലുള്ളവരെല്ലാംഅനൂപിന് വോട്ട് ചെയ്യുമെന്ന് അദ്ദേഹത്തിന്റെ ഭാര്യ ചെന്നപ്പോള്‍ വാഗ്ദാനംചെയ്തുവെന്നും മനോരമ തട്ടിവിട്ടു. എല്‍ഡിഎഫ് സ്ഥാനാര്‍ഥിയുടെ ബന്ധുവടക്കം ഇവിടെ ജോലി ചെയ്യുന്നുണ്ട്.

എല്‍ഡിഎഫ് സ്ഥാനാര്‍ഥിയുടെ പര്യടന വാര്‍ത്തകളോടൊപ്പം മനോരമ പ്രസിദ്ധീകരിച്ച ചിത്രങ്ങളിലും ചില്ലറ പൊടിക്കൈകള്‍ കാട്ടി. മനോരമ ന്യൂസിന്റെ "വോട്ട്കവല" പരിപാടിയും യുഡിഎഫ് അനുകൂല പരിപാടിയാക്കി. ഈ ചാനലിന്റെ പരിപാടിയില്‍ പങ്കെടുക്കേണ്ടെന്ന് അതത് മേഖലയിലെ എല്‍ഡിഎഫ് നേതാക്കള്‍ നിശ്ചയിച്ചത് അതുകൊണ്ടാണ്.

deshabhimani 160312

മുഖ്യമന്ത്രിയുടെ റോഡ് ഷോ ചട്ടവിരുദ്ധം: എല്‍.ഡി.എഫ്

മുഖ്യമന്ത്രിയുടെ റോഡ്ഷോ പരാതി കിട്ടി: നളിനി നെറ്റോ

തിരു: തെരഞ്ഞെടുപ്പ് പെരുമാറ്റച്ചട്ടം ലംഘിച്ചെന്ന് മുഖ്യമന്ത്രി ഉമ്മന്‍ചാണ്ടിക്കെതിരെ പരാതി ലഭിച്ചിട്ടുണ്ടെന്ന് ചീഫ് ഇലക്ട്രല്‍ ഓഫീസര്‍ നളിനി നെറ്റോ. ഈ പരാതിയെപ്പറ്റി അന്വേഷിച്ചുവരികയാണെന്നും തിരുവനന്തപുരത്ത് നടത്തിയ വാര്‍ത്താസമ്മേളനത്തില്‍ അവര്‍ വ്യക്തമാക്കി. കഴിഞ്ഞ ദിവസം മുഖ്യമന്ത്രി നടത്തിയ റോഡ് ഷോയാണ് പരാതിക്കാധാരം. തെരഞ്ഞെടുപ്പ് ക്രമീകരണങ്ങള്‍ പൂര്‍ത്തിയായതായി നളിനി നെറ്റോ വ്യക്തമാക്കി. തെരഞ്ഞെടുപ്പിന് മുന്‍പ് എക്സിറ്റ്പോള്‍ പ്രചരണങ്ങള്‍ നടത്തരുതെന്നും ഇലക്ഷന്‍ കമ്മീഷന്റെ നിര്‍ദ്ദേശങ്ങള്‍ കര്‍ശനമായി പാലിക്കണമെന്നും നെറ്റോ പറഞ്ഞു.

ഉദ്ദിഷ്ടകാര്യത്തിന് ഉപകാരസ്മരണ; മാഫിയകള്‍ യുഡിഎഫിന്റെ കീശയില്‍

പിറവം ഉപതിരഞ്ഞെടുപ്പിന് മണിക്കൂറുകള്‍ മാത്രം അവശേഷിക്കെ ഉദ്ദിഷ്ടകാര്യപ്രാപ്തിക്ക് ഉപകാരസ്മരണയുമായി മണ്ഡലത്തില്‍ തമ്പടിച്ചിട്ടുള്ള മദ്യമുതലാളിമാരും മണ്ണ് -മണല്‍മാഫിയയും തിരക്കിട്ട അവസാനവട്ട ആലോചനകളിലാണ്. സംസ്ഥാന മന്ത്രിമാര്‍ ആലുവ പാലസില്‍ വിശ്രമിച്ചിട്ടാണ് പിറവത്തേക്ക് പറക്കുക എന്നറിയാവുന്നതിനാല്‍ ഏത് കല്പനയും ശിരസ്സാവഹിക്കാന്‍ തയ്യാറായി അവിടെയും ചുറ്റിത്തിരിയുന്നുണ്ട് അവരില്‍ പലരും.

കേരളത്തിലെ ആദ്യ കമ്മ്യൂണിസ്റ്റ് മന്ത്രിസഭയുടെ കഴുത്ത് ഞെരിക്കാന്‍ രൂപം കൊണ്ട അവസരവാദ കൂട്ടുക്കെട്ടിന്റെ പുനരവതാരത്തെ പിറവത്തെ ജനങ്ങള്‍ ഇതിനകം തിരിച്ചറിഞ്ഞു കഴിഞ്ഞു.ആ സഖ്യത്തിന്റെ വിചിത്ര സന്തതിയായി ഒരു വിമോചന സമരം ജനിച്ചുവെങ്കില്‍, പിറവത്ത് ഭൂജാതനാവുക ചാപ്പിള്ളയാവും എന്നുറപ്പിച്ച് കഴിഞ്ഞു വോട്ടര്‍മാര്‍. അന്നത്തെപ്പോലെ ജാതിമത വര്‍ഗ്ഗീയ സംഘടനകള്‍ ഒപ്പമുണ്ട്.

ഉപരിതലം ശാന്തം എന്ന് തോന്നുമെങ്കിലും സംഘര്‍ഷഭരിതമാണ് യുഡിഎഫിലെ അന്തരീക്ഷം. മുന്നണി നേരിയ ഭൂരിപക്ഷത്തില്‍ തന്നെ ഭരണത്തില്‍ തുടരണമെന്നതാണ് വിലപേശല്‍ ആഗ്രഹിക്കുന്ന ചെറുകക്ഷികളുടെ ഉള്ളിലിരുപ്പ്. പിറവത്ത് യുഡിഎഫ് സ്ഥാനാര്‍ത്ഥിയുടെ പതനം അവരാഗ്രഹിക്കുക സ്വാഭാവികം. ഈ കുട്ടിപ്പാര്‍ട്ടികള്‍ക്ക് നെയ്യാറ്റിന്‍കരയിലെ കുതിരക്കച്ചവടം ഒട്ടും രസിച്ചിട്ടുമില്ല.

പിറവത്ത് തോറ്റുകിട്ടിയിട്ടു വേണം മുസ്ലീംലീഗിന് അവരുടെ അഞ്ചാം മന്ത്രിക്ക് വേണ്ടി കടുംപിടുത്തത്തിനിറങ്ങാന്‍. യുഡിഎഫിന് നിയമസഭയില്‍ അംഗബലം കൂടുന്നതിനെ ആശങ്കയോടെ കാണുന്നവരില്‍ ലീഗുമുണ്ട്. ഭീഷണിപ്പെടുത്തി കാര്യം നേടുന്നതിനുള്ള ലീഗിന്റെ തന്ത്രങ്ങള്‍ക്ക് അംഗബലം കൂടുന്നത് തടസ്സമാകും. എത്ര കാലമെന്ന് വച്ചാണ് മഞ്ഞളാംകുഴിയെ സമാധാനിപ്പിച്ച് കൂടെ നിര്‍ത്തുക. മുന്നണിയിലെ ഘടകകക്ഷി എന്നൊക്കെ കനത്തില്‍ എല്ലാവരും പറയുന്നുണ്ടെങ്കിലും ഒരു എംഎല്‍എ പോലും ഇല്ലാത്തതിനാല്‍ വാക്കുകള്‍ക്ക് വിലയില്ലാത്തവരാണ് സിഎംപിയും ജെ എസ് എസും. ഭരണം എത്രയും വേഗം നഷ്ടപ്പെട്ട് സംസ്ഥാനത്ത് ഒരു ഉപതിരഞ്ഞെടുപ്പ് വന്നുഭവിക്കാന്‍ ആറ്റുനോറ്റ് കാത്തിരിക്കുന്നവരാണവര്‍. അഞ്ചുകൊല്ലം വരെ കാത്തിരിക്കുക എന്നത് അസഹനീയം തന്നെ. മാതൃസംഘടനയില്‍ നിന്ന് പി ജെ ജോസഫും ടി എം ജേക്കബും പുറത്തുചാടിയത് മുമ്പും പിമ്പുമായാണ്. രണ്ടുപേരും ചേര്‍ന്നൊരു പാര്‍ട്ടിയുണ്ടാക്കിയെങ്കിലും ഇടക്കാലത്ത് ജോസഫിനെ തള്ളിപ്പറഞ്ഞ് ജേക്കബ് പുറത്തുപോയി. ജോസഫിന് ആ ചൊരുക്ക് ഇന്നും തീര്‍ന്നിട്ടില്ല.

ശെല്‍വരാജിന്റെ രാജി യുഡിഎഫിന്റെ കരുത്ത് വര്‍ദ്ധിപ്പിച്ചു എന്ന  കൊട്ടിയാഘോഷിക്കലും ആഹ്ലാദവും കുത്തക പത്രങ്ങള്‍ക്കേയൂള്ളൂ. പിറവത്തെ വോട്ടര്‍മാര്‍ക്കില്ല.
ഇറ്റാലിയന്‍ കപ്പലില്‍ നിന്ന് മത്സ്യത്തൊഴിലാളികളുടെ നേരെ വെടിയുതിര്‍ത്ത സംഭവം ഗൗരവത്തോടെ കൈകാര്യം ചെയ്യാന്‍ സര്‍ക്കാര്‍ ഉപേക്ഷകാണിച്ചതിനു പിന്നില്‍ രഹസ്യ ഇടപാടുകള്‍ നടന്നിട്ടിട്ടുണ്ടെന്ന ചിന്തയും പിറവത്തെ വോട്ടര്‍മാര്‍ക്കിടയില്‍ പ്രബലമാണ്.

പിറവത്ത് എല്ലാ പഴുതുകളും അടച്ചുകൊണ്ടുള്ള ചിട്ടയായ പ്രവര്‍ത്തനമാണ് തുടക്കം മുതല്‍ എല്‍ഡിഎഫ് ആസൂത്രണം ചെയ്തത്. ഇടതുമുന്നണിയിലെ ഘടകകക്ഷികളുടെ നേതാക്കളും പ്രവര്‍ത്തകരും വര്‍ഗ്ഗ ബഹുജന സംഘടനകളുടെ പ്രവര്‍ത്തകരും ഒക്കെ സജീവമായി പ്രവര്‍ത്തനരംഗത്ത് ഉണ്ടായിരുന്നു. ഇങ്ങനെ ഒരു ശൈലി പിറവത്തിന് പുതിയ ഒരു അനുഭവമാണെന്ന് സിപിഐ എറണാകുളം ജില്ലാ സെക്രട്ടറി ഇ എ കുമാരന്‍ വിലയിരുത്തി.

വിപണിയില്‍ സര്‍ക്കാര്‍ ഫലപ്രദമായി ഇടപെടാത്തതു മൂലം ഇഞ്ചിയും ചുക്കും മഞ്ഞളും കപ്പയും വീട്ടുമുറ്റങ്ങളില്‍ കൂമ്പാരമായി കൂടിക്കിടക്കുന്നത് ആരുടെയും മനസ്സ് വിഷമിപ്പിക്കുന്ന കാഴ്ചയാണ്. തീര്‍ത്തും നിരാശരാണ് പിറവത്തെ കര്‍ഷകര്‍. ഇത്തരം ഘട്ടങ്ങളില്‍ ഇടതുമുന്നണി സര്‍ക്കാര്‍ ഫലപ്രദമായി നടപടികള്‍ സ്വീകരിച്ചിരുന്നത് അവര്‍ ഓര്‍ക്കുന്നുണ്ട്. അതുകൊണ്ടുതന്നെ ഇടതുമുന്നണിയില്‍ അവര്‍ക്ക് പ്രതീക്ഷയുണ്ട്.

കഴിഞ്ഞ പ്രാവശ്യം നിസാരവോട്ടുകള്‍ക്ക് എം ജെ ജേക്കബ് തോറ്റുപോയതില്‍ ദുഃഖിക്കുന്നവരാണ് വോട്ടര്‍മാരില്‍ ഭൂരിഭാഗവും. ആ കൈപ്പിഴ ഇത്തവണ തിരുത്താനുള്ള തീരുമാനത്തിലാണവര്‍. ദിവസങ്ങളായി നിയോജകമണ്ഡലത്തിലെ തിരഞ്ഞെടുപ്പ് പ്രവര്‍ത്തനങ്ങളില്‍ മുഴുകിയ മുന്‍മന്ത്രിയും സിപിഐ നേതാവുമായ കെ പി രാജേന്ദ്രന്‍ അവസാന വിലയിരുത്തലായി 'ജനയുഗ'ത്തോട് പറഞ്ഞു.

janayugom 150312

കുതിരക്കച്ചവടത്തെക്കുറിച്ച് അറിയില്ല,ദേശീയപ്രശ്‌നങ്ങള്‍ പറയില്ല: ആന്റണി

പിറവം മണ്ഡലത്തില്‍ പര്യടനത്തിനെത്തിയ കോണ്‍ഗ്രസ് പ്രവര്‍ത്തക സമിതിയംഗം എ കെ ആന്റണിക്ക് ദേശീയ രാഷ്ട്രീയം പരാമര്‍ശിക്കാന്‍ മടി. പിറവത്തെ കര്‍ഷകരും സാധാരണക്കാരും തൊഴിലാളികളും അന്തര്‍ദേശീയ കാര്യങ്ങള്‍ കേള്‍ക്കുമെന്നല്ലാതെ ഇക്കാര്യം ചര്‍ച്ച ചെയ്യാന്‍ പോകുന്നില്ലെന്നാണ് ആന്റണി അഭിപ്രായപ്പെട്ടത്. ''ഉമ്മന്‍ചാണ്ടി കൊള്ളാം, ധാരാളം കഷ്ടപ്പെടുന്നുണ്ട്. ഉമ്മന്‍ചാണ്ടി സര്‍ക്കാര്‍ ദുര്‍ബലമാക്കാന്‍ ജനങ്ങള്‍ ഇഷ്ടപ്പെടുന്നില്ലെന്ന്'' ആന്റണി പറഞ്ഞു. ഗവണ്‍മെന്റ് മൊത്തത്തില്‍ കൊള്ളാമെന്ന അഭിപ്രായമില്ലായെന്നാണോ എന്ന ചോദ്യം ഉയര്‍ന്നപ്പോഴും വ്യക്തമായ മറുപടി പറയാന്‍ ആന്റണി തയ്യാറായില്ല.

കെ കരുണാകരന്റേയും തന്റേയും മന്ത്രിസഭയില്‍ അംഗമായിരുന്ന ടി എം ജേക്കബ് കഴിഞ്ഞ തവണ മന്ത്രിയായപ്പോഴാണ് എന്തെങ്കിലും ചെയ്യാന്‍ ശ്രമിച്ചതെന്ന രീതിയിലും ആന്റണി പരാമര്‍ശം നടത്തി. കോണ്‍ഗ്രസില്‍ ഇപ്പോള്‍ എല്ലാം ഭദ്രമാണെന്ന് പറഞ്ഞ ആന്റണി കഴിഞ്ഞ തവണ വിമത പ്രവര്‍ത്തനം നടത്തിയ പൗലോസിനോട് കുഴപ്പമൊന്നുമില്ലല്ലോ എന്ന് പരസ്യമായി ചോദിക്കുകയും ചെയ്തു.

യു ഡി എഫിന്റെ കുതിരക്കച്ചവടം സംബന്ധിച്ചും വ്യക്തമായ ഉത്തരങ്ങള്‍ ആന്റണി നല്‍കിയില്ല. സെല്‍വരാജിനെ യു ഡി എഫിലെടുക്കുമോ എന്നത് താന്‍ ഇവിടുത്തെ നേതാക്കളുമായി സംസാരിച്ചിട്ടില്ലെന്ന് ആന്റണി പറഞ്ഞു. മുല്ലപ്പെരിയാര്‍ പ്രശ്‌നത്തില്‍ കേരളത്തില്‍ നിന്നുള്ള നിവേദക സംഘങ്ങള്‍ക്ക് ആവശ്യമായതെല്ലാം ചെയ്‌തെങ്കിലും ദൗര്‍ഭാഗ്യകരമെന്നു പറയട്ടെ ഇക്കാര്യത്തില്‍ കേന്ദ്ര നിലപാട് വന്നിട്ടില്ലെന്നും ആന്റണി പറഞ്ഞു. മുല്ലപ്പെരിയാര്‍ പ്രശ്‌നത്തില്‍ പി ചിദംബരം എടുത്ത നിലപാട് കേരളത്തില്‍ നിന്നുള്ള കേന്ദ്രമന്ത്രിമാര്‍ കൈകൊണ്ടോയെന്ന ചോദ്യത്തിനും കൃത്യമായ മറുപടി പറയാന്‍ ആന്റണി തയ്യാറായില്ല.

ഉത്തരേന്ത്യയില്‍ കോണ്‍ഗ്രസിന് സംഭവിച്ചത് തിരിച്ചടിയല്ലെന്നായിരുന്നു ആന്റണിയുടെ പ്രതികരണം. തോല്‍വികള്‍ സംഭവിച്ചിട്ടുണ്ടെങ്കിലും അതില്‍ നിന്ന് തിരിച്ചുവന്ന പാരമ്പര്യമാണ് കോണ്‍ഗ്രസിനുള്ളത്. ഉപതിരഞ്ഞെടുപ്പുകളിലടക്കം കോണ്‍ഗ്രസിന്റെ കണക്കുകൂട്ടലുകള്‍ പലപ്പോഴും തെറ്റിയിട്ടുണ്ടെന്നും ആന്റണി സമ്മതിച്ചു. കഴിഞ്ഞ തവണ നിയമസഭാ തിരഞ്ഞെടുപ്പില്‍ തന്റെ കണക്കുകൂട്ടലുകള്‍ തെറ്റിയതു സംബന്ധിച്ചായിരുന്നു ഈ കുറ്റസമ്മതം.

ഇറ്റലിയില്‍ നിന്നുള്ള നാവികരെ വിട്ടുകിട്ടുന്നതിന് ഇറ്റലിയില്‍ നിന്നുള്ള കടുത്ത സമ്മര്‍ദ്ദത്തെ അതിജീവിച്ചാണ് കേരളത്തിന്റെ നിലപാടുകള്‍ക്കൊപ്പം നിന്നതെന്ന് ആന്റണി പറഞ്ഞു.

deshabhimani 140312

പിറവം വിധിയെഴുതും

പതിറ്റാണ്ടുകള്‍ക്കുമുമ്പ് പടിയിറക്കിവിട്ട രാഷ്ട്രീയ കുതിരക്കച്ചവടം തിരിച്ചുകൊണ്ടുവന്നു എന്നതാണ് ഉമ്മന്‍ചാണ്ടി സര്‍ക്കാരിന്റെ നേട്ടമെന്ന് ജനതാദള്‍ സംസ്ഥാന പ്രസിഡന്റ് മാത്യു ടി തോമസ് അഭിപ്രായപ്പെട്ടു. ഇതിനെതിരെ പിറവത്തെ ജനങ്ങള്‍ വിധിയെഴുതും. ഇത് കേരളരാഷ്ട്രീയത്തിന്റെ സംശുദ്ധിയും ധാര്‍മികതയും സംരക്ഷിക്കുന്നതിനുള്ള ദൗത്യമായി ജനങ്ങള്‍ കരുതണമെന്നും മാത്യു ടി തോമസ് അഭ്യര്‍ഥിച്ചു. ഉപതെരഞ്ഞെടുപ്പു പ്രവര്‍ത്തനങ്ങളുമായി ബന്ധപ്പെട്ട് മാത്യു ടി തോമസ് ആഴ്ചകളായി പിറവത്താണ്. അതിന്റെ അനുഭവം അദ്ദേഹം "ദേശാഭിമാനി"യുമായി പങ്കുവച്ചു.

യുഡിഎഫ് സര്‍ക്കാരിന്റെ ജനക്ഷേമം വെറും പ്രചാരണവും പ്രഹസനവുമാണ്. യഥാര്‍ഥത്തില്‍ ജനവിരുദ്ധതയാണ് സര്‍ക്കാരിന്റെ പൊതുധാര. "കരുതലും വികസനവു"മല്ല നടക്കുന്നത്. കുരുതിയും പ്രഹസനവുമാണ്. ഇതിനുപുറമെയാണ് രാഷ്ട്രീയ അധമ സംസ്കാരത്തെ തിരിച്ചുവിളിക്കുന്ന സംഭവം. എല്‍ഡിഎഫ് ഭരണകാലത്തുണ്ടായ നേട്ടങ്ങള്‍ യുഡിഎഫ് സര്‍ക്കാര്‍ തകര്‍ക്കുകയാണ്. കര്‍ഷക ആത്മഹത്യക്ക് വിരാമമിട്ടതാണ് എല്‍ഡിഎഫ് ഭരണം. യുഡിഎഫ് വന്നതിനുശേഷം ഇതിനകം 47 കര്‍ഷകര്‍ ആത്മഹത്യചെയ്തു. തങ്ങളുടെ പ്രശ്നങ്ങള്‍ പരിഹരിക്കാന്‍ എല്‍ഡിഎഫ് സര്‍ക്കാര്‍ ഒപ്പമുണ്ടായിരുന്നുവെന്ന ബോധ്യം കര്‍ഷകര്‍ക്കുണ്ടായിരുന്നു. ആ ആത്മവിശ്വാസം ഇപ്പോള്‍ നഷ്ടപ്പെട്ടു. വളത്തിന്റെ വിലനിര്‍ണയ അവകാശം അതതു കമ്പനികള്‍ക്ക് വിട്ടുകൊടുത്തതോടെ രാസവളത്തിന്റെ വില 15 ഇരട്ടിവരെയായി. കേന്ദ്രം സബ്സിഡി എടുത്തുകളയുകയാണ്. കാര്‍ഷികോല്‍പ്പന്നങ്ങള്‍ക്ക് വിലയിടിയുന്നു. റബര്‍ ഇറക്കുമതിത്തീരുവ 20ല്‍നിന്ന് ഏഴു ശതമാനമാക്കിയതിനുശേഷം 45,000 ടണ്‍ ഇറക്കുമതി ഉണ്ടായി. കര്‍ഷകവിരുദ്ധമായ ഈ നയത്തെ എതിര്‍ക്കാന്‍ യുഡിഎഫിനു കഴിയുന്നില്ല.

കേരളത്തിന്റെ മണ്ണിനും ജീവനും അരക്ഷിതാവസ്ഥയുണ്ടാക്കുന്നതാണ് മുല്ലെപ്പെരിയാര്‍പ്രശ്നം. കേന്ദ്രസര്‍ക്കാര്‍ നിലനില്‍ക്കണമെന്ന രാഷ്ട്രീയ ആവശ്യത്തിനാണ് കേന്ദ്രം ഇതിനെക്കാള്‍ പരിഗണന നല്‍കുന്നത്. ഒരുമാസത്തിനകം പ്രശ്നം പരിഹരിക്കാമെന്ന് പ്രധാനമന്ത്രി കേരളത്തില്‍നിന്നുള്ള സര്‍വകക്ഷിസംഘത്തിന് ഉറപ്പുകൊടുത്തത് കഴിഞ്ഞ ഡിസംബര്‍ 14നാണ്. രണ്ടു സംസ്ഥാനങ്ങളിലെയും മുഖ്യമന്ത്രിമാരെയും വിളിച്ചൊന്നു സംസാരിക്കാന്‍പോലും ഈ മൂന്നുമാസത്തിനിടയില്‍ പ്രധാനമന്ത്രി തയ്യാറായിട്ടില്ല. ഉന്നതാധികാരസമിതിയുടെ തീരുമാനം തമിഴ്നാടിന് അനുകൂലമാകുമെന്ന് കേന്ദ്ര ആഭ്യന്തരമന്ത്രി ചിദംബരം പ്രഖ്യാപിച്ചതിനോട് പ്രതികരിക്കാന്‍ കേരളത്തില്‍നിന്നുള്ള കേന്ദ്രമന്ത്രിമാര്‍ക്കു സാധിച്ചില്ല. കുറ്റകരമായ നിസ്സംഗതയാണിത്. ലക്ഷക്കണക്കിനു മനുഷ്യരുടെ ജീവന്റെ പ്രശ്നമാണിത്. അതിനെക്കാള്‍ പരിഗണന കേന്ദ്രസര്‍ക്കാരിനെ നിലനിര്‍ത്തുക എന്നതാണ്. കേരളവിരുദ്ധമായ ഈ സമീപനം പിറവത്തെ ജനങ്ങള്‍ അംഗീകരിച്ചുകൊടുക്കില്ല. പടിഞ്ഞാട്ടൊഴുകുന്ന പമ്പ, അച്ചന്‍കോവില്‍ നദികളെ കിഴക്കോട്ടൊഴുക്കി വൈപ്പാറില്‍ യോജിപ്പിച്ചാല്‍ കേരളത്തിലെ അഞ്ചു ജില്ലകള്‍ മരുഭൂമിയാകും. ഇതുസംബന്ധിച്ച സുപ്രീംകോടതിവിധി വന്നിട്ട് പ്രശ്നത്തില്‍ സംസ്ഥാനസര്‍ക്കാര്‍ ഇടപെടുന്നില്ല.

ഒരുമന്ത്രിസഭയിലെ മൂന്നിലൊന്നു മന്ത്രിമാര്‍ വിജിലന്‍സ് കേസില്‍ പ്രതികളാണ് എന്ന റെക്കോഡ് ഉമ്മന്‍ചാണ്ടി മന്ത്രിസഭയ്ക്കുണ്ട്. സുപ്രീംകോടതി അഴിമതിക്കുറ്റത്തിനു ശിക്ഷിച്ച പ്രതിയെ ശിക്ഷയില്‍നിന്നൊഴിവാക്കാന്‍ ഈ സര്‍ക്കാര്‍ സ്വീകരിച്ച കുറുക്കുവഴികള്‍ നിയമവാഴ്ചയുടെ തകര്‍ച്ചയുടെ തെളിവാണ്. ആ പ്രതിക്ക് മാരക രോഗമുണ്ടെന്നു പറഞ്ഞ് പഞ്ചനക്ഷത്ര ആശുപത്രിയില്‍ പ്രവേശിപ്പിച്ചു. എന്നാല്‍ , പ്രതിയെ സര്‍ക്കാര്‍ വിട്ടയച്ചശേഷം രോഗമൊന്നും ഇല്ലെന്നു വ്യക്തമായി എന്നുമാത്രമല്ല, മന്ത്രിയായ മകന്റെ ജീവനക്കാരനെ കായികമായി കൈകാര്യംചെയ്യാനുള്ള ആരോഗ്യമുണ്ടെന്നും വ്യക്തമായി. പ്രഖ്യാപനം ഒരുവഴി നടക്കുമ്പോള്‍ മറുവഴിയില്‍ ബാറുകള്‍ നല്‍കുന്നു. ഇതാണ് സര്‍ക്കാരിന്റെ മദ്യനയം.

എല്‍ഡിഎഫ് കൈവരിച്ച നേട്ടങ്ങള്‍ ഇല്ലായ്മചെയ്യുന്നു. പൊതുമേഖലാ സ്ഥാപനങ്ങള്‍ വീണ്ടും നഷ്ടത്തിലേക്കു പോകുന്നു. ഇവ സ്വകാര്യവല്‍ക്കരിക്കാനാണു നീക്കം. പിറവത്ത് കെഎസ്ആര്‍ടിസി ഡിപ്പോയുടെ പുനരുജ്ജീവനമായിരുന്നു എല്‍ഡിഎഫ് ഭരണകാലം. ഇപ്പോഴത്തെ നയപ്രഖ്യാപനത്തില്‍ കെഎസ്ആര്‍ടിസി എന്ന വാക്കുപോലുമില്ല. റവന്യുവകുപ്പ് ഇത്ര അരാജകത്വത്തിലായ കാലമുണ്ടായിട്ടില്ല. ഭൂമികൈയേറ്റങ്ങളെ പ്രോത്സാഹിപ്പിക്കുകയാണ് ഈ സര്‍ക്കാര്‍ - അദ്ദേഹം ചൂണ്ടിക്കാട്ടി.

ആന്റണിയുടെ പ്രസംഗത്തിലും കൊച്ചി മെട്രോയില്ല

വികസനം പ്രധാന അജന്‍ഡയായ പിറവം ഉപതെരഞ്ഞെടുപ്പിന്റെ പ്രചാരണത്തിനെത്തിയ കേന്ദ്രമന്ത്രി എ കെ ആന്റണി അംഗീകാരം കാത്തുകിടക്കുന്ന കൊച്ചി മെട്രോ റെയില്‍ പദ്ധതിയെക്കുറിച്ച് മൗനംപാലിച്ചു. ചൊവ്വാഴ്ച പകലന്തിയോളം വിവിധ യോഗങ്ങളില്‍ പ്രസംഗിച്ച അദ്ദേഹം പറഞ്ഞതുമുഴുവന്‍ പ്രതിപക്ഷനേതാവ് വി എസ് അച്യുതാനന്ദനെതിരെയുള്ള പുലഭ്യമാണ്.

രാഷ്ട്രപതിയുടെ നയപ്രഖ്യാപനപ്രസംഗത്തില്‍ കൊച്ചി മെട്രോ റെയില്‍ പദ്ധതിയുടെ അംഗീകാരത്തെപ്പറ്റിയോ അതിനു നല്‍കാവുന്ന സഹായത്തെപ്പറ്റിയോ പരാമര്‍ശമില്ല. ആറുവര്‍ഷമായി ഇതിന്റെ അംഗീകാരത്തിനായി കേരളം കാത്തിരിക്കുകയാണ്. ഇപ്പോള്‍ അയ്യായിരത്തില്‍പ്പരം കോടി രൂപ ചെലവു കണക്കാക്കുന്ന ഈ പദ്ധതി കഴിഞ്ഞ ലോകസ്ഭാ തെരഞ്ഞെടുപ്പില്‍ യുഡിഎഫിെന്‍റ പ്രധാന വാഗ്ദാനമായിരുന്നു. കഴിഞ്ഞ നിയമസഭാ തെരഞ്ഞെടുപ്പു സമയത്തും എറണാകുളം മേഖലയില്‍ മെട്രോ വാഗ്ദാനം ശക്തമായി പ്രചരിപ്പിച്ചിരുന്നു. വികസനത്തിനു വോട്ട് എന്ന് യുഡിഎഫ് നേതാക്കള്‍ പ്രചരിപ്പിക്കുമ്പോള്‍ കൊച്ചി മെട്രോ പദ്ധതി സ്വാഭാവികമായും പരാമര്‍ശിക്കപ്പെടേണ്ടതാണ്. പ്രത്യേകിച്ചും കേന്ദ്രമന്ത്രിമാരുടെ പ്രചാരണത്തില്‍ .

കഴിഞ്ഞ നിയമസഭാ തെരഞ്ഞടുപ്പിലും എ കെ ആന്റണിയുടെ പ്രചാരണ ഉന്നം വി എസിനെ അധിക്ഷേപിക്കല്‍ കേന്ദ്രീകരിച്ചായിരുന്നു. പിറവത്തും അതേ അസ്ത്രം തൊടുക്കുകയാണ്. പിറവം ജനതയെക്കൂടി ഗുരുതരമായി ബാധിക്കുന്ന മുല്ലപ്പെരിയാര്‍പ്രശ്നവും എ കെ ആന്റണി വിഴുങ്ങി. ഒരുമാസത്തിനുള്ളില്‍ തമിഴ്നാട്-കേരള മുഖ്യമന്ത്രിമാരെ ഒരുമിച്ചിരുത്തി പ്രശ്നപരിഹാരം ഉണ്ടാക്കാമെന്ന് പ്രധാനമന്ത്രി മന്‍മോഹന്‍സിങ് കേരളത്തില്‍നിന്നുള്ള സര്‍വകക്ഷിസംഘത്തിന് ഉറപ്പുനല്‍കിയതാണ്. ബുധനാഴ്ച മൂന്നുമാസം പിന്നിടുന്നു. കേരളത്തിനു നല്‍കിയ വാക്കിന് ഒരുവിലയും കല്‍പ്പിച്ചിട്ടില്ല. എ കെ ആന്റണിയും മറ്റും ഈ അവഗണന വെറുതെ നോക്കിയിരിക്കയാണ്. അതേസമയം, തമിഴ്നാട്ടില്‍നിന്നുള്ള കോണ്‍ഗ്രസ് എംപിയും കേന്ദ്ര ആഭ്യന്തരമന്ത്രിയുമായ ചിദംബരം കേരളത്തിനെതിരെ രംഗത്തുവരികയുണ്ടായി. ഇടുക്കി തമിഴ്നാട്ടില്‍ ചേര്‍ക്കണമെന്ന് തമിഴ്നാട്ടില്‍നിന്നുള്ള കോണ്‍ഗ്രസ് എംപിമാര്‍ ആവശ്യപ്പെട്ടു. ഇതിനെതിരെയും ആന്റണി മിണ്ടിയില്ല. പ്രധാനമന്ത്രി കേരളത്തിനു നല്‍കിയ വാഗ്ദാനം പാലിക്കാന്‍ കോണ്‍ഗ്രസില്‍ വലിയ സ്വാധീനമുണ്ടായിട്ടും ആന്റണി ചെറുവിരല്‍ അനക്കിയില്ല.

deshabhimani 140312

ആന്റണിക്കും യുഡിഎഫിനെ രക്ഷിക്കാനാവില്ല: പിണറായി

പിറവത്ത് ഉപതെരഞ്ഞെടുപ്പില്‍ തോല്‍വി ഉറപ്പായിരിക്കുന്ന യുഡിഎഫിനെ രക്ഷിക്കാനുള്ള എ കെ ആന്റണിയുടെ അവസാന ശ്രമമാണ് എല്‍ഡിഎഫ് ഭിന്നതയിലാണെന്ന ആരോപണമെന്ന് സിപിഐ എം സംസ്ഥാനസെക്രട്ടറി പിണറായി വിജയന്‍ പറഞ്ഞു. എല്‍ഡിഎഫില്‍ ഒരു ഭിന്നതയുമില്ല. മറിച്ചുപറഞ്ഞ് ആന്റണി അനുയായികളെ ആശ്വസിപ്പിക്കാനൊന്നും ശ്രമിക്കേണ്ട. "കാല്‍ കുഴിച്ചിട്ട മന്തന്‍ വഴിയേ പോകുന്നവരെ മന്താ" എന്ന് വിളിക്കുന്നതു പോലെയാണ് ആന്റണിയുടെ പരാമര്‍ശം- പിണറായി കൂട്ടിച്ചേര്‍ത്തു. പാമ്പാക്കുടയില്‍ ചേര്‍ന്ന എല്‍ഡിഎഫ് റാലി ഉദ്ഘാടനം ചെയ്യുകയായിരുന്നു അദ്ദേഹം.

പിറവത്ത് യുഡിഎഫ് പരാജയപ്പെടുമെന്ന് ഏറ്റവും നന്നായി അറിയാവുന്നത് ഉമ്മന്‍ചാണ്ടിക്കാണ്. എം ജെ ജേക്കബ് നല്ല ഭൂരിപക്ഷത്തോടെ ജയിക്കും. ആ വെപ്രാളത്തിലാണ് ഉമ്മന്‍ചാണ്ടി. അതുകൊണ്ട് തെരഞ്ഞെടുപ്പു കഴിഞ്ഞാല്‍ സര്‍ക്കാരിനു തുടരാനുള്ള ധാര്‍മികാവകാശം ഇല്ലാതാകും. അതിന് തടയിടാന്‍ എന്ത് ചെയ്യാന്‍കഴിയുമെന്ന ആലോചനയിലായിരുന്നു അദ്ദേഹം. അങ്ങനെയാണ് പ്രതിപക്ഷത്തുനിന്ന് ഒരാളെ ഉമ്മന്‍ചാണ്ടിയും അദ്ദേഹത്തിന്റെ ചീഫ്വിപ്പും ചേര്‍ന്ന് കണ്ടെത്തുകയും കാലുമാറ്റിയെടുക്കുകയും ചെയ്തത്. കേരളരാഷ്ട്രീയ സംസ്കാരത്തിന് ഒട്ടും ചേരാത്ത നടപടിയാണിത്. "ആയാറാം ഗയാറാം" രാഷ്ട്രീയത്തിനെതിരാണ് കേരളം. അതുകൊണ്ടുതന്നെ ഉമ്മന്‍ചാണ്ടിയുടെ ഈ നടപടിയില്‍ കേരളമാകെ പ്രതിഷേധത്തിലാണ്. പിറവം ഉപതെരഞ്ഞെടുപ്പില്‍ നീതിബോധമുള്ള മുഴുവന്‍ ആളുകളും, അവരില്‍ എല്‍ഡിഎഫില്‍ അല്ലാത്തവര്‍വരെ ഈ പ്രതിഷേധത്തില്‍ പങ്കുചേര്‍ന്ന് പ്രതികരിക്കണം. ഏതെങ്കിലും വഞ്ചകനെ കൂട്ടുപിടിച്ചാല്‍ എല്‍ഡിഎഫിനെ തകര്‍ക്കാന്‍ കഴിയുമോ? ആന്റണിയും ഈ വഞ്ചനയ്ക്ക് അംഗീകാരം കൊടുത്തതായി വ്യക്തമായി. മാന്യമായ രാഷ്ട്രീയപ്രവര്‍ത്തനം നടത്തുന്നവരാണ് എല്‍ഡിഎഫ്. ഞങ്ങള്‍ ഒന്നു കൈ കാണിച്ചാല്‍ തകര്‍ന്നുപോകുന്നതേയുള്ളു യുഡിഎഫ്. പക്ഷേ, ഞങ്ങള്‍ അത് ചെയ്യില്ല. ജനവിധിയില്‍ക്കൂടി മാത്രമേ എല്‍ഡിഎഫ് അധികാരമേല്‍ക്കൂ.

പിറവത്ത് യുഡിഎഫ് ജനകീയപ്രശ്നങ്ങളിലേക്ക് ചര്‍ച്ച കൊണ്ടുപോകാന്‍ അധൈര്യപ്പെടുകയാണ്. കാരണം അവിടങ്ങളിലെല്ലാം അവര്‍ പരാജയമാണ്. അതുകൊണ്ടാണ് ജനശ്രദ്ധ തിരിക്കാന്‍ "സംസ്കാരച്ചടങ്ങുകള്‍" നാട്ടിലാകെ പ്രദര്‍ശിപ്പിക്കുന്നത്. ജാര്‍ഖണ്ഡിലെ പ്രശ്നത്തില്‍ കോണ്‍ഗ്രസിലെ ഭിന്നിപ്പ് പരിഹരിക്കാന്‍ ചുമതലപ്പെട്ട ആളാണ് ആന്റണി. അവിടെച്ചെന്ന് അതൊന്നും പരിഹരിക്കാന്‍ കഴിയില്ലെന്ന് ആന്റണിക്ക് അറിയാം. അതുകൊണ്ടാണ് അദ്ദേഹം നേരെ പിറവത്തുവന്ന് എല്‍ഡിഎഫിനെതിരെ ഭിന്നിപ്പ് ആരോപിച്ചത്. ജാര്‍ഖണ്ഡ്പ്രശ്നത്തില്‍ കേന്ദ്രമന്ത്രി റാവത്ത് മന്ത്രിസ്ഥാനം മാത്രമല്ല കോണ്‍ഗ്രസിനെയും ഉപേക്ഷിക്കുകയാണ്. അവിടെയുള്ള 32 എംഎല്‍എമാരില്‍ പകുതി തന്നോടൊപ്പമാണെന്നാണ് അദ്ദേഹത്തിന്റെ വാദം. ഈ തരത്തില്‍ അതിരൂക്ഷമാണ് അവിടത്തെ ഭിന്നിപ്പ്. കോണ്‍ഗ്രസിനെക്കുറിച്ചും യുഡിഎഫിനെക്കുറിച്ചും ആരുവന്ന് നല്ലത് പറഞ്ഞാലും ജനങ്ങള്‍ വിശ്വസിക്കില്ല.

കോണ്‍ഗ്രസിനെ കോണ്‍ഗ്രസുകാര്‍പോലും അംഗീകരിക്കുന്നില്ല എന്നതിന്റെ തെളിവാണ് കഴിഞ്ഞ പണിമുടക്കില്‍ കോണ്‍ഗ്രസ് നേതാവ് പ്രസിഡന്റായ ഐഎന്‍ടിയുസി പങ്കെടുത്തത്. അഞ്ച് നിയമസഭകളിലേക്ക് നടന്ന തെരഞ്ഞെടുപ്പില്‍ ജനങ്ങളുടെ പൊതുവികാരം കോണ്‍ഗ്രസ് ഭരണത്തില്‍ വേണ്ടെന്നുതന്നെയാണ്. അതുകൊണ്ടാണ് പഞ്ചാബില്‍ നിലവിലുള്ള സര്‍ക്കാരിന്റെ കക്ഷിയെ വീണ്ടും അധികാരത്തിലേറ്റുക എന്ന പുതുചരിത്രംതന്നെ ഉണ്ടായത്. കോര്‍പറേറ്റുകള്‍ക്കുവേണ്ടിയാണ് കോണ്‍ഗ്രസ് നിലകൊള്ളുന്നത്. സാധാരണക്കാരന്‍ അവരുടെ മുന്നിലില്ല. ലക്ഷക്കണക്കിനുകോടി രൂപയുടെ അഴിമതിയുടെ ഭരണമാണ് യുപിഎയുടേത്. ഇങ്ങനെയുള്ള കോണ്‍ഗ്രസിനെ ജനങ്ങള്‍ ഉപേക്ഷിച്ചിരിക്കുകയാണ്. ഈ കോണ്‍ഗ്രസിനെ പിറവത്ത് വിജയിപ്പിക്കണമെന്നു പറഞ്ഞാല്‍ പിറവത്തുകാര്‍ അംഗീകരിക്കുമെന്ന് വ്യാമോഹിക്കേണ്ടതില്ല- പിണറായി പറഞ്ഞു.

deshabhimani 140312

പിറവത്ത് യുഡിഎഫിനെതിരെ ധാര്‍മിക രോഷം

പിറവം തെരഞ്ഞെടുപ്പില്‍ എല്‍ഡിഎഫിനെ വിജയിപ്പിക്കേണ്ടത് കേരളത്തിന്റെ അനിവാര്യമായ രാഷ്ട്രീയ ധര്‍മമായി മാറുകയാണെന്ന് കോണ്‍ഗ്രസ് എസ് സംസ്ഥാന പ്രസിഡന്റ് രാമചന്ദ്രന്‍ കടന്നപ്പള്ളി പറഞ്ഞു.

എല്‍ഡിഎഫ് ഈ തെരഞ്ഞെടുപ്പിനെ നേരിടുന്നത് ജനാധിപത്യ സംവിധാനത്തിലെ ശക്തിസ്രോതസ്സുകളായ ജനങ്ങളെ വിശ്വാസത്തിലെടുത്താണ്. എന്നാല്‍ യുഡിഎഫാകട്ടെ പണാധിപത്യത്തിന്റെയും ഭരണത്തിന്റെയും ദുര്‍വിനിയോഗത്തിന്റെ അകമ്പടിയോടെ രാഷ്ട്രീയ സദാചാരമോ ധാര്‍മികതയോ ഒന്നുമില്ലാതെയും. ഇതിനെതിരായ ധാര്‍മികരോഷം തിളച്ചുയരുകയാണ് പിറവത്ത്. കേന്ദ്ര-സംസ്ഥാന സര്‍ക്കാരുകളുടെ ജനവിരുദ്ധവും ദ്രോഹകരവുമായ നടപടികൊണ്ട് ജനങ്ങള്‍ കണ്ണീര്‍ കുടിക്കുകയാണ്. മുല്ലപ്പെരിയാര്‍ അണക്കെട്ടിന്റെ ഭദ്രത സംബന്ധിച്ച് ജനങ്ങളുടെ ആശങ്കയകറ്റാന്‍ ഇവര്‍ ഒന്നും ചെയ്യുന്നില്ല. മുമ്പു നല്‍കിയ ഉറപ്പുകള്‍ കേന്ദ്ര-സംസ്ഥാന സര്‍ക്കാരുകള്‍ കാറ്റില്‍പ്പറത്തുന്നു. പിറവത്തെ കര്‍ഷകര്‍ , പ്രത്യേകിച്ചും റബര്‍ കര്‍ഷകര്‍ കേന്ദ്രനയത്തിന്റെ ഫലമായി ദുരിതം അനുഭവിക്കുകയാണ്. എല്‍ഡിഎഫ് സര്‍ക്കാര്‍ നടപ്പാക്കിയ ജനക്ഷേമ പദ്ധതികള്‍ രാഷ്ട്രീയ വൈരാഗ്യത്തിന്റെ പേരില്‍ ഇവര്‍ അട്ടിമറിക്കുകയാണ്. സാര്‍വത്രികമായ അഴിമതി ഭരണത്തെയാകെ ഗ്രസിച്ചു. പിറവം തെരഞ്ഞെടുപ്പു കഴിയുന്നതോടെ കേരളം ഇരുട്ടിലാവും. എല്ലാ രംഗത്തും അഴിമതിയാണ് ഈ സര്‍ക്കാരിന്റെ മുഖമുദ്ര.

ഇപ്പോഴിതാ കേരള രാഷ്ട്രീയത്തിന് അപമാനം സൃഷ്ടിച്ച് എംഎല്‍എയെ വിലയ്ക്കു വാങ്ങി. പിറവം തെരഞ്ഞെടുപ്പിന്റെ പ്രാധാന്യവും പ്രസക്തിയും അതുകൊണ്ടുതന്നെ വര്‍ധിച്ചു. എല്‍ഡിഎഫ് സര്‍ക്കാരിനെയും യുഡിഎഫ് സര്‍ക്കാരിനെയും വിലയിരുത്താന്‍ പിറവത്തെ ജനങ്ങള്‍ക്ക് പ്രയാസമില്ല. ജീവിതാനുഭവങ്ങള്‍ അവര്‍ക്ക് നിത്യസത്യമായി ഒന്നിച്ചുണ്ട്. അതുകൊണ്ട് ജനങ്ങളോട് എല്‍ഡിഎഫ് ഭരണകാല നേട്ടങ്ങള്‍ വിവരിക്കേണ്ട കാര്യവുമില്ല. വികസന പ്രവര്‍ത്തനങ്ങള്‍ക്കുവേണ്ടി ജനങ്ങളോടൊപ്പം നടന്നുനീങ്ങുന്ന നായകനാണ് എല്‍ഡിഎഫ് സ്ഥാനാര്‍ഥി എം ജെ ജേക്കബ്. സാമുദായിക സാഹോദര്യത്തിനും മതസൗഹാര്‍ദത്തിനും സഹിഷ്ണുതയ്ക്കും വേണ്ടിയുള്ള ജീവിതമാണ് എം ജെ ജേക്കബിന്റേത്. സൗമനസ്യത്തിന്റെയും സ്നേഹത്തിന്റെയും വിശുദ്ധിയുടെയും പ്രതീകമായി ജനമനസ്സുകളിലേക്ക് ഒഴുകിയെത്തുന്ന എം ജെ ജേക്കബിന്റെ സുഗന്ധമാണ് പിറവം മണ്ഡലത്തിലാകെ. ലാളിത്യവും വിനയാന്വിതവുമായ പെരുമാറ്റവും മതേതരത്വത്തിന്റെ സൂര്യതേജസ്സുമാണ് എം ജെ.

എം ജെയുടെ വ്യക്തിത്വവും തുണയാകും

പിറവം ജനവിധി സര്‍ക്കാരിന്റെ പ്രവര്‍ത്തനങ്ങളുടെ വിലയിരുത്തലാകുമെന്ന് പറഞ്ഞുനടന്ന യുഡിഎഫ് ഇപ്പോള്‍ മാറ്റിപ്പറയുകയാണെന്ന് കേരള കോണ്‍ഗ്രസ് ചെയര്‍മാന്‍ പി സി തോമസ്. പിറവം സര്‍ക്കാരിന്റെ വിലയിരുത്തലാണെന്ന് മുഖ്യമന്ത്രി പ്രഖ്യാപിച്ചിരുന്നു. പിറവം ഫലം എന്തായാലും സര്‍ക്കാരിനെ ബാധിക്കില്ലെന്നാണ് ഏറ്റവുമൊടുവില്‍ വയലാര്‍ രവി വിശദീകരിച്ചത്. യുഡിഎഫ് വളരെ പരുങ്ങലിലാണെന്നു ചുരുക്കം. ഈ സാഹചര്യത്തിലാണ് മറ്റു ചില സംസ്ഥാനങ്ങളില്‍ മാത്രം കേട്ടുകേള്‍വിയുള്ള രീതിയില്‍ പ്രതിപക്ഷ എംഎല്‍എയെ രാജിവയ്പിച്ചതെന്ന് പി സി തോമസ് ദേശാഭിമാനിയോടു പറഞ്ഞു.

വലിയ ജനകീയ ചര്‍ച്ചയ്ക്കു കാരണമായ ഈ വിഷയംകൊണ്ടുതന്നെ യുഡിഎഫ് സ്ഥാനാര്‍ഥി കുറേയധികം പിന്നില്‍പ്പോയി. വന്‍ ഭൂരിപക്ഷത്തോടെ എം ജെ ജേക്കബ് വിജയക്കുമെന്നതിന് രണ്ടു പ്രധാന സാഹചര്യങ്ങളുണ്ട്- ഒന്ന്: അദ്ദേഹം അഞ്ചുവര്‍ഷം എംഎല്‍എ ആയിരുന്നപ്പോള്‍ മണ്ഡലത്തില്‍ നടത്തിയ വികസന മുന്നേറ്റം. രണ്ട്: എല്‍ഡിഎഫിന് അനുകൂലമായ രാഷ്ട്രീയ സാഹചര്യം. പിറവത്തു നടത്തിയ വികസനപ്രവര്‍ത്തനം അദ്ദേഹത്തിന്റെ വിജയസാധ്യതയുടെ രാഷ്ട്രീയത്തിനതീതമായ കാരണമാണ്്. എത്ര വിനയാന്വിതനാണ് എം ജെ ജേക്കബ്. അദ്ദേഹത്തിന്റെ പെരുമാറ്റവും തൊട്ടറിയാവുന്ന സത്യസന്ധതയും കഠിനാധ്വാന പ്രകൃതവും ആരെയും ആകര്‍ഷിക്കും. ഈ സ്വഭാവഗുണങ്ങള്‍ ജനങ്ങളില്‍ ഉളവാക്കിയ അനുഭാവം അതിശക്തമാണ്. അതിനെ വെല്ലാന്‍ ആര്‍ക്കും കഴിയില്ല- അദ്ദേഹം പറഞ്ഞു.

ഈ സര്‍ക്കാരിനോടുള്ള ജനരോഷം വളരെ ശക്തമാണ്. അതുതന്നെയാണ് എല്‍ഡിഎഫിന് അനുകൂലമായ ഏറ്റവും വലിയ രാഷ്ട്രീയ സാഹചര്യവും. കര്‍ഷകരുടെ പ്രശ്നങ്ങള്‍ സജീവ ചര്‍ച്ചാവിഷയമാണ്. പിറവം മണ്ഡലത്തില്‍ ഇഞ്ചി, മഞ്ഞള്‍ , കൈതച്ചക്ക എന്നിവ സാധാരണക്കാരുടെ കൃഷിയാണ്. വലിയ വിലയിടിവാണ് ഈ വക ഉല്‍പ്പന്നങ്ങള്‍ക്ക്. സര്‍ക്കാര്‍ ഇടപെടുന്നേയില്ല. റബര്‍ ഇറക്കുമതിച്ചുങ്കം കേന്ദ്രം കുറച്ചു. വ്യവസായികളെ സഹായിക്കുന്ന ഈ നടപടി കര്‍ഷകര്‍ക്ക് വലിയ ദ്രോഹമാണ്. സ്വാഭാവികമായും കര്‍ഷകര്‍ രോഷത്തിലാണ്.
പിറവം മണ്ഡലത്തിലേതുള്‍പ്പെടെ 40 ലക്ഷം ജനങ്ങളുടെ ജീവനു ഭീഷണിയാണ് മുല്ലപ്പെരിയാര്‍ അണക്കെട്ട്. എന്നിട്ടും ഉമ്മന്‍ചാണ്ടി സര്‍ക്കാരിന്റെ നിലപാട് കേരളവിരുദ്ധമാണ്. തമിഴ്നാടിനെ സഹായിക്കാനുള്ള എന്തോ പ്രേരണയിലോ ഭീഷണിയിലോ സര്‍ക്കാര്‍ പെട്ടുപോയെന്നു വ്യക്തം. തമിഴ്നാട് ഉന്നയിച്ച വാദമുഖങ്ങള്‍ കേരളസര്‍ക്കാര്‍ ഹൈക്കോടതിയില്‍ എഴുതിക്കൊടുത്തതും ആ സത്യവാങ്മൂലം പിന്‍വലിക്കുമെന്ന് സര്‍വകക്ഷിയോഗത്തില്‍ മുഖ്യമന്ത്രി പ്രഖ്യാപിച്ചത് പാലിക്കാതിരുന്നതും ഈ സമീപനത്തിന്റെ തെളിവാണ്. കേരളത്തെ വില്‍ക്കുന്ന നിലപാടാണിത്. അതിന് പിറവത്ത് ശക്തമായ തിരിച്ചടിയുണ്ടാകും- പി സി തുടര്‍ന്നു. അഴിമതിയിലും അതിലും മോശമായ കേസുകളിലും പ്രതികളാണ് മുഖ്യമന്ത്രിയും മറ്റു പല മന്ത്രിമാരും. അവര്‍ക്ക് ജനകീയ പ്രശ്നങ്ങളില്‍ ഇടപെടാന്‍ നേരമില്ല. പിറവത്തെ വലിയൊരു വിഭാഗമാണ് നേഴ്സുമാരും നേഴ്സിങ് വിദ്യാര്‍ഥികളും. വലിയ പ്രശ്നത്തിലാണ് അവര്‍ . സര്‍ക്കാര്‍ ഇതൊന്നും ശ്രദ്ധിക്കുന്നില്ല. ഗവണ്‍മെന്റിന്റെ ഈ സമീപനത്തില്‍ അവരും രോഷാകുലരാണ്- പി സി തോമസ് ചൂണ്ടിക്കാട്ടി.

ഒരുമനസ്സായി എം ജെയ്ക്കൊപ്പം

പിറവം: "ഇത്തവണ എന്തായാലും അങ്ങേര്‍ക്ക് വോട്ട്ചെയ്യും. വേറൊന്നുംകൊണ്ടല്ല; ഇത്തവണയെങ്കിലും ഞങ്ങള്‍ക്ക് വെള്ളം വേണം. അതിന് അങ്ങേര്‍ ജയിക്കണമെന്ന് ഞങ്ങള്‍ക്കറിയാം." മുത്തോലപുരം ഉരുളിച്ചാലില്‍ കോളനിയിലെ ശാന്തയ്ക്കും മോളിക്കും തങ്കമ്മയ്ക്കുമൊക്കെ അങ്ങേര്‍ എന്നാല്‍ എല്‍ഡിഎഫ് സ്ഥാനാര്‍ഥി എം ജെ ജേക്കബാണ്. കാരണം മറ്റൊന്നുമല്ല; 28 വീടുള്ള കോളനിയിലേക്ക് ആകെയുള്ളത് ഒരു കുടിവെള്ള പൈപ്പ്, അതും കാറ്റുമാത്രം വരുന്നത്. പഞ്ചായത്ത് ഭരിക്കുന്ന യുഡിഎഫ് നേതൃത്വത്തില്‍ തെരഞ്ഞെടുപ്പു മുന്നില്‍ക്കണ്ട് ടാങ്കറില്‍ വെള്ളമെത്തിക്കുന്നു. തെരഞ്ഞെടുപ്പു കഴിഞ്ഞാല്‍ ടാങ്കര്‍ ഈ വഴി വരില്ലെന്നും വെള്ളം കിട്ടണമെങ്കില്‍ എം ജെ എംഎല്‍എ ആകണമെന്നും ഇവര്‍ക്കറിയാം.

പഞ്ചായത്തില്‍ പര്യടനം നടത്തുകയായിരുന്ന എം ജെ പള്ളിത്താഴത്തെ സ്വീകരണം കഴിഞ്ഞ് തൊട്ടടുത്ത കേന്ദ്രത്തിലേക്ക് പോകവേയാണ് റോഡരികില്‍ ടാങ്കറില്‍നിന്ന് ശേഖരിച്ച വെള്ളം വീടുകളിലേക്ക് കൊണ്ടുപോകാന്‍ നില്‍ക്കുന്ന കോളനിവാസികളെ കണ്ടത്. ഉടന്‍ അവിടെയിറങ്ങി. മുന്‍നിശ്ചയിച്ച സ്വീകരണ കേന്ദ്രങ്ങളില്‍ ഇടംപിടിക്കാതിരുന്നിട്ടും കോളനിക്കാര്‍ എം ജെയെ വരവേറ്റു. കോളനിയുടെ ഏറ്റവും താഴ്ഭാഗത്ത് താമസിക്കുന്ന തങ്കമ്മ എം ജെയോട് പരാതി പറഞ്ഞു. "72 പടി കേറണം റോഡിലെത്താന്‍ . വന്നുനോക്കിയാല്‍ പൈപ്പില്‍ വെള്ളമില്ല; തെരഞ്ഞെടുപ്പായതിനാല്‍ ഇന്നലേം ഇന്നും അവര് വണ്ടീല്‍ വെള്ളംതന്നു. നാളത്തെകാര്യം ഉറപ്പില്ല." ഇലഞ്ഞി പഞ്ചായത്തില്‍ പ്രവര്‍ത്തിക്കാന്‍ അവസരം ലഭിച്ചിട്ടില്ലെന്ന് എം ജെ മറുപടി നല്‍കി. വെള്ളമെടുക്കാന്‍ വന്ന ശാന്ത പറഞ്ഞു- "ഇക്കുറി വോട്ട് എം ജെയ്ക്ക്. പിറവത്ത് ചെയ്ത കാര്യങ്ങളൊക്കെ ഞങ്ങള്‍ക്ക് നേരിട്ടറിയാം. ഇവിടെയും അതുപോലൊരു എംഎല്‍എയെയാണാവശ്യം."

പഞ്ചായത്തിന്റെ പല ഭാഗങ്ങളിലും കുടിവെള്ളം സംബന്ധിച്ച പരാതികളാണ് പര്യടനത്തിനെത്തിയ എം ജെയ്ക്ക് കേള്‍ക്കേണ്ടിവന്നത്.എല്‍ഡിഎഫ് സര്‍ക്കാരിന്റെ കാലത്ത് ആറേകാല്‍കോടി രൂപ ചെലവില്‍ ആരംഭിച്ച ഇലഞ്ഞി സമ്പൂര്‍ണ കുടിവെള്ളപദ്ധതി പഞ്ചായത്തിന്റെ കുടിവെള്ളക്ഷാമം പരിഹരിക്കാന്‍ ലക്ഷ്യമിട്ടുള്ളതായിരുന്നു. പൈപ്പുകള്‍ മാറാതെ നൂറുദിന കര്‍മപരിപാടിയില്‍ പദ്ധതി കമീഷന്‍ചെയ്ത യുഡിഎഫ് സര്‍ക്കാര്‍ പക്ഷേ വെള്ളം കിട്ടുന്നുണ്ടോയെന്ന് നോക്കിയില്ല. പുത്തന്‍കോളനിയും ചക്കാലപ്പാറയും ചേറ്റാനിയും പിന്നിട്ട് നെല്ലിക്കാനത്തെത്തുമ്പോഴും പരാതി കുടിവെള്ളംതന്നെ. നെല്ലിക്കാനം കോളനിയില്‍ ആകെയുള്ള പഞ്ചായത്തുകിണറിന്റെ അടിയില്‍ പാറ തെളിഞ്ഞുനില്‍ക്കുന്നു. വീട്ടമ്മമാര്‍ ഉള്‍പ്പെടെയുള്ളവര്‍ പരാതിയുമായി എം ജെയെ പൊതിഞ്ഞു. പാറപൊട്ടിച്ചാല്‍ വെള്ളംകിട്ടും, പഞ്ചായത്തില്‍ പറഞ്ഞിട്ടു പക്ഷേ തിരിഞ്ഞുനോക്കിയില്ലെന്ന് എല്ലാവര്‍ക്കും പരാതി. പല രാഷ്ട്രീയപാര്‍ടികളിലുള്ളവര്‍ കോളനിയിലുണ്ട്, പക്ഷേ ഇക്കുറി വോട്ട് എം ജെയ്ക്കെന്ന് കോളനിക്കാര്‍ പറയുന്നു.

പരാതിപ്രവാഹത്തിനിടയിലും എം ജെയോടുള്ള ജനങ്ങളുടെ സ്നേഹവായ്പ് പര്യടനത്തില്‍ നിറഞ്ഞുനിന്നു. സ്വീകരണ കേന്ദ്രങ്ങളില്‍ കണിക്കൊന്നയും കോളാമ്പിയും മുല്ലപ്പൂവുമെല്ലാം വാഴനാരില്‍ കോര്‍ത്തിണക്കിയ മാലയിട്ട് ചെത്തിയും ചെണ്ടുമുല്ലയുമെല്ലാം ബൊക്കെയായി നല്‍കി ഒരുമനസോടെ ജനം എം ജെയെ വരവേറ്റു. ജനങ്ങളുടെ ആവേശത്തിനു മാറ്റുകൂട്ടി വനിതാ ചെണ്ടമേളസംഘവും പര്യടനത്തിന് അകമ്പടിയായി.

ഉദ്യോഗസ്ഥര്‍ നോക്കുകുത്തി; യുഡിഎഫിന്റെ കള്ളവണ്ടിയോട്ടം തുടരുന്നു

പിറവം: യുഡിഎഫ് സ്ഥാനാര്‍ഥിയുടെ വാഹനപര്യടന സംഘത്തിലെ കള്ളവണ്ടിയോട്ടം തുടരുന്നു. തെരഞ്ഞെടുപ്പു നിരീക്ഷകരായ ഉദ്യോഗസ്ഥരെ നോക്കുകുത്തികളാക്കിയാണ് ഈ കള്ളയോട്ടം. വാഹനച്ചെലവിനത്തില്‍ കള്ളക്കണക്കുകാണിച്ച് തെരഞ്ഞെടുപ്പു കമീഷനെ കബളിപ്പിക്കാനാണ് ഇങ്ങനെ ചെയ്യുന്നത്. "ദേശാഭിമാനി" ഇക്കാര്യം റിപ്പോര്‍ട്ട്ചെയ്തിട്ടും തെരഞ്ഞെടുപ്പു നിരീക്ഷകര്‍ നടപടിയെടുക്കുന്നില്ല.

 ടാക്സികളുടെ നമ്പര്‍പ്ലേറ്റിന്റെ നിറം മാറ്റി സ്വകാര്യ വാഹനമാക്കി മാറ്റിയാണ് തട്ടിപ്പ്. മഞ്ഞ നിറത്തിലുള്ള പ്ലേറ്റ് മാറ്റി വെള്ള പ്ലേറ്റില്‍ കറുത്ത മഷിയില്‍ ടാക്സി നമ്പര്‍തന്നെ എഴുതി സ്വകാര്യ വാഹനമാക്കി മാറ്റുകയാണ് ചെയ്യുന്നത്. സ്ഥാനാര്‍ഥിയെ അനുഗമിക്കുന്ന വണ്ടികളില്‍ പലതും ഇത്തരത്തില്‍ വ്യാജ നമ്പര്‍ പ്ലേറ്റ്വച്ച് ഓടുന്നവയാണ്. തിങ്കളാഴ്ച മുളന്തുരുത്തി പഞ്ചായത്തില്‍ നടന്ന പര്യടനത്തിന് ഓടിയ കെഎല്‍ 17 എഫ്- 8369 ഇന്‍ഡിക്ക കാറും കെഎല്‍ 01 എസി-4325 ക്വാളിസും ഇത്തരത്തിലുള്ള കള്ളവാഹനങ്ങളാണ്. സജീവ് വി കെ എന്നയാളുടെ പേരിലുള്ളതാണ് ഇന്‍ഡിക്ക വണ്ടി. കെ ടി കുരുവിളയുടെ പേരിലുള്ളതാണ് ക്വാളിസ്. മൂവാറ്റുപുഴ ആര്‍ടിഒ ഓഫീസിലെ രേഖകള്‍ പ്രകാരം രണ്ടിനും ടാക്സി പെര്‍മിറ്റാണ്.

വാഹനങ്ങളുടെ പടതന്നെയുണ്ട് യുഡിഎഫിന്റെ പര്യടനത്തിന്. തിങ്കളാഴ്ച 20ലധികം വാഹനങ്ങള്‍ സ്ഥാനാര്‍ഥിയുടെ തുറന്ന വാഹനത്തിന് അകമ്പടിയായി ഉണ്ടായിരുന്നു. വണ്ടികളില്‍ ആളെ നിറയ്ക്കാന്‍ വണ്ടിക്കുള്ളില്‍തന്നെ മദ്യം വിളമ്പലും നടക്കുന്നുണ്ട്. സ്വീകരണകേന്ദ്രങ്ങളിലെ ആള്‍ക്ഷാമം പരിഹരിക്കാനും ഇവരെത്തന്നെയാണ് ഉപയോഗിക്കുന്നത്. വഴിയാത്രക്കാരുടെ ജീവന് ഭീഷണിയാകുന്ന രീതിയിലാണ് ഇത്തരം "മദ്യവണ്ടികള്‍" സഞ്ചരിക്കുന്നത്. റോഡിനു നടുക്കാണ് പലപ്പോഴും വണ്ടികള്‍ പാര്‍ക്ക്ചെയ്യുന്നത്. വെട്ടിക്കല്‍ ജങ്ഷനില്‍വച്ച് ഇത് ചോദ്യംചെയ്ത ബസ്യാത്രക്കാരനോട് അസഭ്യംപറഞ്ഞാണ് യുഡിഎഫുകാര്‍ രോഷംതീര്‍ത്തത്.

deshabhimani 130312