ജോപ്പനും സരിതയും കരാറുണ്ടാക്കിയത് 5 കോടിക്ക്

പാലക്കാട് കിന്‍ഫ്രാപാര്‍ക്കില്‍ സോളാര്‍ പ്ലാന്റ് സ്ഥാപിച്ചുനല്‍കാന്‍ കോന്നി സ്വദേശി ശ്രീധരന്‍നായരുമായി സരിത എസ് നായരും ടെന്നി ജോപ്പനും കരാറുണ്ടാക്കിയത് അഞ്ചുകോടിക്ക്. ഇതിന്റെ ആദ്യഗഡുവായി 40 ലക്ഷം രൂപയുടെ മൂന്നു ചെക്കുകള്‍ ശ്രീധരന്‍നായരില്‍നിന്ന് കൈപ്പറ്റിയത് സെക്രട്ടറിയറ്റിലെ മുഖ്യമന്ത്രിയുടെ ഓഫീസില്‍ വച്ചാണെന്നും ജോപ്പന്‍ വെളിപ്പെടുത്തി. മുഖ്യമന്ത്രിയുടെ കോള്‍സെന്ററിലെ കോണ്‍ഫറന്‍സ് ഹാളില്‍ വച്ചാണ് ശ്രീധരന്‍നായരില്‍നിന്ന് ചെക്ക് വാങ്ങിയത്. ശ്രീധരന്‍നായരെ പുറത്താക്കിയശേഷം മൂന്നു ചെക്കുകളില്‍ ഒരെണ്ണം താന്‍ എടുത്തു. രണ്ടെണ്ണം സരിതയും. ഇടപാടിന് പ്രത്യുപകാരമായി സരിത തന്നെ കെട്ടിപ്പിടിച്ച് ചുംബിച്ചെന്നും ജോപ്പന്‍ അന്വേഷണ ഉദ്യോഗസ്ഥരോട് പറഞ്ഞു.

40 ലക്ഷം ജോപ്പനും സരിതയ്ക്കും നല്‍കിയതായി ചെങ്ങന്നൂര്‍ ഡിവൈഎസ്പി ഓഫീസില്‍ എഡിജിപി ഹേമചന്ദ്രന് മൊഴിനല്‍കിയ ശ്രീധരന്‍നായരും സമ്മതിച്ചിട്ടുണ്ട്. പദ്ധതിക്ക് സര്‍ക്കാര്‍ പിന്തുണയുണ്ടെന്ന് ജോപ്പന്‍ അറിയിച്ചിരുന്നു. ഇതിന്റെ അടിസ്ഥാനത്തിലാണ് തുക കൈമാറിയത്. പദ്ധതിക്ക് 39 കോടി ചെലവ് വരുമെന്നും സര്‍ക്കാര്‍ ഇളവ് കഴിഞ്ഞ് 5 കോടി തന്നാല്‍മതിയെന്നും ജോപ്പന്‍ വാഗ്ദാനംചെയ്തെന്നും ശ്രീധരന്‍നായര്‍ പറഞ്ഞു.

സരിതയുമായി രണ്ടുവര്‍ഷത്തിലേറെയായി ആഴത്തിലുള്ള ബന്ധമുണ്ടെന്ന് ജോപ്പന്‍ വെളിപ്പെടുത്തി. തട്ടിപ്പുകാരിയാണെന്ന് നേരത്തേ അറിയാമായിരുന്നു. സരിതയുമായി എല്ലാ തരത്തിലും ബന്ധമുണ്ട്. പലപ്പോഴും ഒരുമിച്ച് ദൂരയാത്രകള്‍ പോയിട്ടുണ്ട്. സ്ഥിരമായി ഫോണിലും ബന്ധപ്പെടാറുണ്ട്. സൗരോര്‍ജപദ്ധതിയുടെ പേരിലാണ് സരിതയെ മുഖ്യമന്ത്രിക്ക് പരിചയപ്പെടുത്തിയത്. മറ്റ് മന്ത്രിമാരുടെ സ്റ്റാഫുകളെയും ഉന്നത ഉദ്യോഗസ്ഥരെയും പരിചയപ്പെടുത്തി കൊടുത്തതും താനാണ്. എന്നാല്‍, ജിക്കുവും സലിംരാജും പതിവായി സരിതയെ വിളിക്കുന്നതില്‍ നീരസമുണ്ടായിട്ടുണ്ട്. ഈ വിഷയത്തില്‍ സരിതയുമായി പിണങ്ങിയിട്ടുണ്ട്.

ടീം സോളാറിന്റെ പാര്‍ട്ണറാണെന്നും മുഖ്യമന്ത്രി അറിഞ്ഞുള്ള പദ്ധതിയാണെന്നും ശ്രീധരന്‍നായരെ പറഞ്ഞുവിശ്വസിപ്പിച്ചതായി ചെങ്ങന്നൂരില്‍ നടന്ന തെളിവെടുപ്പില്‍ ജോപ്പന്‍ പറഞ്ഞു. അതിനിടെ ശ്രീധരന്‍നായരെ പരാതിയില്‍നിന്ന് പിന്‍വലിപ്പിക്കാന്‍ ഉന്നത തലത്തില്‍ നീക്കംനടന്നിരുന്നു. എന്നാല്‍, ശ്രീധരന്‍നായര്‍ പരാതിയില്‍ ഉറച്ചുനിന്നതാണ് ജോപ്പന്റെ അറസ്റ്റിലെത്തിച്ചത്. മുഖ്യമന്ത്രിയുടെ ചില ബന്ധുക്കള്‍ക്ക് ഇടപാടുമായുള്ള ബന്ധത്തെ പറ്റി വ്യക്തമായ വിവരം ലഭിച്ചെങ്കിലും ആ വഴിക്ക് നീങ്ങണ്ടായെന്നാണ് അന്വേഷണസംഘത്തിന്റെ തീരുമാനം.

തിരുവഞ്ചൂര്‍ - ശാലു ബന്ധം മറനീക്കുന്നു

കോട്ടയം: നടി ശാലുമേനോനെ സംരക്ഷിക്കാനുള്ള ആഭ്യന്തരമന്ത്രി തിരുവഞ്ചൂര്‍ രാധാകൃഷ്ണന്റെ നീക്കങ്ങളില്‍ കോണ്‍ഗ്രസിലും യുഡിഎഫിലും അമര്‍ഷം. വ്യക്തമായ തെളിവുകള്‍ പുറത്തായിട്ടും ശാലുവിനെതിരെ നടപടിയെടുക്കാത്തതിനെതിരെ ചീഫ് വിപ്പ് പി സി ജോര്‍ജ് പരസ്യമായി രംഗത്തെത്തി. ശാലുവിനെ സര്‍ക്കാര്‍ സംരക്ഷിക്കുകയാണന്ന് കേരള കോണ്‍ഗ്രസ് എമ്മിന്റെ മറ്റൊരു മുതിര്‍ന്ന നേതാവ് "ദേശാഭിമാനി"യോട് പറഞ്ഞു.

കോണ്‍ഗ്രസിലെ ഐ വിഭാഗവും എയിലെ തിരുവഞ്ചൂര്‍ വിരുദ്ധരും ഇത് ശരിവക്കുന്നു. ശാലുവിന്റെ വീടിന്റെ പാലുകാച്ചലിന് മന്ത്രി തിരുവഞ്ചൂര്‍ എത്തിയപ്പോള്‍ സ്വീകരിച്ചത് സോളാര്‍ കേസിലെ മുഖ്യപ്രതി ബിജു രാധാകൃഷ്ണനാണ്. ശാലുവും ബിജുവും മന്ത്രിക്കിരുവശത്തുമായി നില്‍ക്കുന്ന ചിത്രവും വീഡിയോയും പുറത്താകുമെന്ന ഭയത്താലാണ് ഈ വഴിക്കുള്ള അന്വേഷണം തിരുവഞ്ചൂര്‍ തടഞ്ഞത്. ബിജുവിന്റെയും സരിതയുടെയും മൊഴിയിലും ശാലുവിനെതിരായ തെളിവുകളുണ്ട്. ജയിലിലായ ജോപ്പന്റെ മൊഴിയും ഇത് സ്ഥിരീകരിക്കുന്നു. കേസിന്റെ എല്ലാ കാര്യങ്ങളും അന്വേഷണ സംഘത്തിന് എഴുതി നല്‍കുമെന്ന് വെളിപ്പെടുത്തിയ പി സി ജോര്‍ജ് തിരുവഞ്ചൂര്‍ ശാലുവിന്റെ വീട്ടിലെത്തിയതായി സ്ഥിരീകരിച്ചു. ഫോട്ടോകളും വീഡിയോയും നശിപ്പിക്കപ്പെട്ടതായി ചടങ്ങിന്റെ ചിത്രങ്ങളെടുത്ത ഫോട്ടോഗ്രാഫറും വെളിപ്പെടുത്തി. പൊലീസിന്റെ നിര്‍ദേശപ്രകരാമാണ് ഇത് ചെയ്തതെന്നാണ് സൂചന.

ശാലു ബിജുവിനൊപ്പം നില്‍ക്കുന്ന ചിത്രം പുറത്തായപ്പോഴാണ് തിരുവഞ്ചൂരുമൊത്തുള്ള ചിത്രം നശിപ്പിക്കാന്‍ പൊലീസിന് നിര്‍ദേശമെത്തിയത്. ഇതിന്റെ ആസൂത്രണത്തില്‍ ചിത്രത്തില്‍ ഉള്‍പ്പെട്ട കേന്ദ്രമന്ത്രി കൊടിക്കുന്നില്‍ സുരേഷും കോട്ടയം ഡിസിസി അംഗം പി എന്‍ നൗഷാദും രംഗത്തത്തുണ്ടായിരുന്നു. നൗഷാദും കൊടിക്കുന്നിലുമാണ് കേന്ദ്ര സിനിമ സെന്‍സര്‍ ബോര്‍ഡില്‍ ശാലുവിന് അംഗത്വം തരപ്പെടുത്തിയത്.

ഉമ്മന്‍ചാണ്ടിയുടെ വിശ്വസ്തനും ഓഫീസ് ജീവനക്കാരനുമായ ജോപ്പനെ ഉള്‍പ്പടെ ജയിലില്‍ അടച്ചിട്ടും ശാലുവിനെ സംരക്ഷിക്കുന്നതാണ് എ വിഭാഗത്തിന്റെ എതിര്‍പ്പിന് കാരണം. ബിജുവുമായി ശാലുവിന് വര്‍ഷങ്ങളുടെ അടുപ്പമുണ്ട്. മൂന്നു മണിക്കൂര്‍ നീണ്ട ചോദ്യം ചെയ്യലില്‍ ശാലുവില്‍നിന്ന് കിട്ടിയ വിവരങ്ങളിലൂടെ മറ്റ് തെളിവുകളിലേക്ക് നീങ്ങിയാല്‍ ശാലുവിന്റെ അറസ്റ്റും അനിവാര്യമാകും. ബിജു ഒളിവിലാകുന്നതിന്റെ തലേന്ന് തന്നോടൊപ്പം ഉണ്ടായിരുന്നതായി ശാലു വെളിപ്പെടുത്തിയിരുന്നു. ശാലുവിന്റെ മൊബൈലും ഒളിവില്‍ പോകുമ്പോള്‍ ബിജുവിന്റെ കയ്യിലായിരുന്നു. ഈ മൊബൈല്‍ മാറ്റത്തിലൂടെയാണ് പ്രതി പൊലീസിനെ കബളിപ്പിച്ചത്.
(എസ് മനോജ്)

deshabhimani

ഇനിയും പിടിച്ചുതൂങ്ങാനോ?

പ്രതിഷേധം അടിച്ചമര്‍ത്താന്‍ ശ്രമിച്ചും വിശ്വസ്തരെ ബലിയാടാക്കിയും മുഖ്യമന്ത്രിപദത്തില്‍ ഉമ്മന്‍ചാണ്ടിക്ക് ഇനിയും പിടിച്ചുതൂങ്ങാനാകുമോ. മുഖ്യമന്ത്രിയുടെ ഓഫീസും വസതിയും സരിത തട്ടിപ്പിന്റെ ആസ്ഥാനമാക്കിതിന്റെ തെളിവുകളുടെ പ്രവാഹമാണിപ്പോള്‍. ഭരണസിരാകേന്ദ്രത്തില്‍ തട്ടിപ്പുകാര്‍ക്ക് താവളമൊരുക്കിയ മുഖ്യമന്ത്രിക്കെതിരായ പ്രതിഷേധത്തെ പൊലീസ് രാജിലൂടെ ഒതുക്കാനാകില്ലെന്ന മുന്നറിയിപ്പാണ് ശനിയാഴ്ച കേരളത്തിലെ തെരുവുകളില്‍ കണ്ടത്. ഉപ്പുതിന്നവര്‍ വെള്ളം കുടിക്കണമെന്ന് കെപിസിസി പ്രസിഡന്റ് രമേശ് ചെന്നിത്തല തുറന്നടിച്ചു.

രാഷ്ട്രീയമായി ആരെയും സംരക്ഷിക്കാന്‍ കോണ്‍ഗ്രസിന് ബാധ്യതയില്ലെന്ന ചെന്നിത്തലയുടെ മുന്നറിയിപ്പിനും ഏറെ മാനങ്ങളുണ്ട്. സോളാര്‍തട്ടിപ്പിന് സ്വന്തം ഓഫീസും വസതിയും ഒരുക്കിയ ഉമ്മന്‍ചാണ്ടി നിരായുധനാണ്. ഏതുവിധേനയും പിടിച്ചുനില്‍ക്കാനുള്ള വെപ്രാളമാണ് മുഖ്യമന്ത്രിക്ക്. യുഎന്‍ അവാര്‍ഡ് വാങ്ങി തിരിച്ചെത്തിയ മുഖ്യമന്ത്രി നേരിട്ടത് ശക്തമായ രോഷമാണ്. സംസ്ഥാനത്തിന്റെ അന്തസ്സ് രക്ഷിക്കാനുള്ള മുന്നേറ്റമാണത്. സംരക്ഷണവലയമൊരുക്കിയിട്ടും മുഖ്യമന്ത്രിയെ ഊടുവഴികളിലൂടെ ഒളിച്ചുകടത്തുകയായിരുന്നു. പ്രതിഷേധം ഗ്രനേഡ് പ്രയോഗത്തിലൂടെ അവസാനിപ്പിക്കാമെന്ന ധാര്‍ഷ്ട്യത്തിനെതിരെ നാടൊന്നടങ്കം സമരമുഖത്താണ്. കുറ്റവാളികളെ രക്ഷിക്കാന്‍ പെടാപ്പാടിലായ ഉമ്മന്‍ചാണ്ടി സോളാര്‍ തട്ടിപ്പിനെക്കുറിച്ച് അഭിപ്രായപ്രകടനം നടത്തുന്നവരെ സസ്പെന്‍ഡ് ചെയ്യുന്നു. ഫേസ് ബുക്കില്‍ അഭിപ്രായം പറയുന്നത് മഹാപരാധമായി. ഈ കുറ്റം ചുമത്തി പൊലീസുകാരനെ സസ്പെന്‍ഡ് ചെയ്തു. ഇപ്പോള്‍ സെക്രട്ടറിയറ്റ് ജീവനക്കാരനും നടപടിക്ക് ഇരയായി.

സരിതയ്ക്ക് സന്തതസഹചാരി ഫോണ്‍ചെയ്തതില്‍ കുറ്റംകാണാത്ത മുഖ്യമന്ത്രി ജോപ്പനെ അറസ്റ്റ് ചെയ്തപ്പോള്‍ സ്വരംമാറ്റി. കുറ്റംചെയ്തവര്‍ ആരായാലും രക്ഷപ്പെടില്ല എന്നാണിപ്പോള്‍ പറയുന്നത്. ഗണ്‍മാനെ സംരക്ഷിച്ചെങ്കിലും തെളിവ് ശക്തമായപ്പോള്‍സസ്പെന്‍ഡ് ചെയ്യേണ്ടിവന്നു. മുഖ്യമ ന്ത്രിയുടെ ഓഫീസില്‍നിന്ന് അഞ്ചുപേര്‍ പുറത്തായി. ചരിത്രത്തിലാദ്യമായി പേഴ്സണല്‍ സ്റ്റാഫ് അംഗം അറസ്റ്റിലായി. സെക്രട്ടറിയറ്റിലും ക്ലിഫ് ഹൗസിലും തമ്പടിച്ച് തട്ടിപ്പ് നടത്തിയത് താനറിഞ്ഞില്ലെന്ന മുഖ്യമന്ത്രിയുടെ വാദം പൊളിഞ്ഞുകഴിഞ്ഞു. കഴിഞ്ഞ ജൂലൈ ഒമ്പതിന് മുഖ്യമന്ത്രിയുടെ ഓഫീസില്‍ എത്തി സരിതയുമായി സംസാരിച്ചെന്നാണ് തട്ടിപ്പിനിരയായ ക്രഷര്‍ ഉടമ വെളിപ്പെടുത്തിയത്. താനും സരിതയും കസേരയില്‍ ഇരുന്ന് ജോപ്പനുമായി സംസാരിച്ചു എന്നാണ് മൊഴി. യുഡിഎഫ് അധികാരത്തില്‍ വന്നതുമുതല്‍ സരിത ഇവിടം താവളമാക്കിയെന്നാണ് സൂചന. സരിത ക്ലിഫ് ഹൗസിലും പലതവണ വന്നുപോയി. അവിടെ നല്ല സ്വീകരണവും ലഭിച്ചെന്നും പറയുന്നു.

ആയിരത്തിലേറെ തവണ ജോപ്പനും സരിതയും ഫോണില്‍ സംസാരിച്ചെന്നാണ് അന്വേഷണസംഘത്തിന് ലഭിച്ച വിവരം. മുഖ്യമന്ത്രി സദാ ഉപയോഗിക്കുന്ന രണ്ടു ഫോണില്‍ ഗണ്‍മാന്‍ നാനൂറിലധികം പ്രാവശ്യം വിളിച്ചതായി സമ്മതിച്ചിട്ടുണ്ട്. സരിതയുടെ മറ്റു നമ്പരുകളിലെ ഫോണ്‍ വിവരങ്ങള്‍ ഇനിയും വരാനിരിക്കുന്നു. എന്നിട്ടും സ്വയം കുറ്റവിമുക്തനായി പ്രഖ്യാപിക്കുകയാണ് ഉമ്മന്‍ചാണ്ടി. ഓഫീസും വസതിയും പേഴ്സണല്‍ സ്റ്റാഫും സംശയത്തിന്റെ പിടിയിലായപ്പോള്‍ ശക്തമായി നിഷേധിച്ച മുഖ്യമന്ത്രിക്ക് അധികം പിടിച്ചുനില്‍ക്കാന്‍ കഴിഞ്ഞില്ല. ഇവര്‍ക്കെതിരെ നടപടിക്ക് നിര്‍ബന്ധിതനായി. ഇപ്പോള്‍ അവരെ ബലിയാടാക്കി തടിയൂരാനാണ് വെപ്രാളം. മുഖ്യമന്ത്രിയുടെ ഉപജാപകസംഘം നടത്തുന്ന വന്‍ തട്ടിപ്പിന്റെയും അഴിമതിയുടെയും അവിഹിത ഇടപാടുകളുടെയും കൂട്ടത്തിലൊന്നുമാത്രമാണ് സോളാര്‍ തട്ടിപ്പ്. ഇതില്‍ത്തന്നെ എത്രയോ പുറത്തുവരാനിരിക്കുന്നു. കൈയോടെ പിടിക്കപ്പെട്ടിട്ടും വിശുദ്ധന്‍ ചമയുന്ന ഉമ്മന്‍ചാണ്ടിയെ കാത്തിരിക്കുന്നത് ആര്‍ത്തിരമ്പുന്ന ജനരോഷത്തിന്റെ നാളുകളാണ്.
(കെ എം മോഹന്‍ദാസ്)

മുഖ്യമന്ത്രിയെ ചോദ്യംചെയ്യും

സൗരോര്‍ജ തട്ടിപ്പുകേസില്‍ മുഖ്യമന്ത്രി ഉമ്മന്‍ചാണ്ടിയെ അന്വേഷണസംഘം ചോദ്യംചെയ്യും. പക്ഷേ എഡിജിപിയുടെ നേതൃത്വത്തില്‍ എങ്ങനെ മുഖ്യമന്ത്രിയെ തട്ടിപ്പുകേസില്‍ ചോദ്യംചെയ്യുമെന്നത് അന്വേഷണസംഘത്തെ കുഴയ്ക്കുകയാണ്. മുഖ്യമന്ത്രിയുടെ നിഴലായി നടന്ന പേഴ്സണല്‍ സ്റ്റാഫ് അംഗം ടെന്നി ജോപ്പന്‍ മുഖ്യമന്ത്രിയുടെ ഓഫീസില്‍വച്ച് 40 ലക്ഷം രൂപ കൈക്കൂലി വാങ്ങിയതായി അന്വേഷണസംഘത്തിന് തെളിവ് ലഭിച്ചിരിക്കുകയാണ്. ഈ കേസിന്റെ തുടര്‍നടപടികളുടെ ഭാഗമായി ജോപ്പനെയും കൊണ്ട് വരുംദിവസങ്ങളില്‍ സെക്രട്ടറിയറ്റിലെ മുഖ്യമന്ത്രിയുടെ ഓഫീസിലെത്തി മഹസര്‍ തയ്യാറാക്കണം. മുഖ്യമന്ത്രിയുടെ ഓഫീസില്‍ കോഴക്കേസില്‍ തെളിവെടുപ്പ് നടത്തുമ്പോള്‍ ഓഫീസിന്റെ കസ്റ്റോഡിയനായ മുഖ്യമന്ത്രിയെയും ചോദ്യംചെയ്യേണ്ടിവരും. ഇത് ഒഴിച്ചുകൂടാനാകാത്ത നടപടിയാണ്. എന്നാല്‍, മുഖ്യമന്ത്രിസ്ഥാനത്തിരിക്കുന്ന ഒരാളെ കോഴക്കേസില്‍ എഡിജിപി ചോദ്യംചെയ്യുന്നത് നീതിപൂര്‍വമായിരിക്കില്ലെന്നതാണ് അന്വേഷണസംഘത്തെ കുഴയ്ക്കുന്നത്.

മുഖ്യമന്ത്രിപദവിയില്‍ തുടരുന്നയാളെ എങ്ങനെ ചോദ്യംചെയ്യുമെന്നതില്‍ വ്യക്തമായ തീരുമാനം ഇതുവരെ അന്വേഷണസംഘത്തിന് കൈക്കൊള്ളാന്‍ സാധിച്ചിട്ടില്ല. 40 ലക്ഷം രൂപയുടെ മൂന്ന് ചെക്കുകളാണ് ശ്രീധരന്‍നായര്‍ മുഖ്യമന്ത്രിയുടെ ഓഫീസില്‍വച്ച് ജോപ്പന് കൈമാറിയത്. മുഖ്യമന്ത്രിക്കു നല്‍കാനുള്ള തുകയാണെന്ന് ജോപ്പന്‍ പറഞ്ഞിട്ടുണ്ടായിരുന്നു. ശ്രീധരന്‍നായര്‍ പോയശേഷം മുഖ്യമന്ത്രിയുടെ ഓഫീസിന് എതിര്‍വശത്തെ കോണ്‍ഫറന്‍സ് ഹാളില്‍ ജോപ്പനും സരിതാനായരും പോകുകയും മൂന്നില്‍ രണ്ടു ചെക്കുകള്‍ ജോപ്പന്‍ സരിതയെ ഏല്‍പ്പിക്കുകയും ചെയ്തു. ചെക്കുകള്‍ കിട്ടിയ ഉടന്‍ സന്തോഷത്താല്‍ സരിത കെട്ടിപ്പിടിച്ച് തന്നെ ചുംബിച്ചതായും ജോപ്പന്‍ അന്വേഷണ സംഘത്തോട് സമ്മതിച്ചിട്ടുണ്ട്്. ഓഫീസിലെ പല ഉന്നതരും ചേര്‍ന്ന് തന്നെ ചതിക്കുകയായിരുന്നെന്നും ജോപ്പന്‍ പൊലീസില്‍ മൊഴി നല്‍കിയിട്ടുണ്ട്്. ഈ മൊഴിയുടെ അടിസ്ഥാനത്തില്‍ മുഖ്യമന്ത്രിയെ ചോദ്യംചെയ്യാതെ അന്വേഷണനടപടികള്‍ മുന്നോട്ടുകൊണ്ടുപോകാനാകില്ല.

deshabhimani

വഴിനീളെ കരിങ്കൊടി

സോളാര്‍ തട്ടിപ്പുകേസില്‍ പ്രതിക്കൂട്ടിലായ മുഖ്യമന്ത്രി ഉമ്മന്‍ചാണ്ടിക്കെതിരെ വഴിനീളെ കരിങ്കൊടി. ചങ്ങനാശേരിയില്‍ യാത്രാമധ്യേ കാറിനുള്ളില്‍ ഡിവൈഎഫ്ഐ പ്രവര്‍ത്തകര്‍ മുഖ്യമന്ത്രിയെ കരിങ്കൊടി പുതപ്പിച്ചു. യുവജനരോഷത്തില്‍ പിടിച്ചുനില്‍ക്കാനാകാതെ മുന്‍ നിശ്ചയിച്ച യാത്രാവഴികളില്‍നിന്ന് മുഖ്യമന്ത്രി ഒളിച്ചോടി. അവാര്‍ഡ് കൈപ്പറ്റി മനാമയില്‍നിന്ന് ശനിയാഴ്ച മടങ്ങിയെത്തിയ ഉമ്മന്‍ചാണ്ടി സഞ്ചരിച്ച വഴികളിലെല്ലാം കടുത്ത പ്രതിഷേധമാണ് നേരിട്ടത്. അധികാരത്തില്‍ കടിച്ചുതൂങ്ങുന്ന ഉമ്മന്‍ചാണ്ടിയെ തുടരാന്‍ അനുവദിക്കില്ലെന്ന പ്രഖ്യാപനവുമായാണ് യുവാക്കള്‍ തെരുവിലിറങ്ങിയത്.

route from tvpm to puthupally

നെടുമ്പാശേരിയില്‍ വിമാനമിറങ്ങിയ ഉമ്മന്‍ചാണ്ടിയെ ആലുവ ഗസ്റ്റ് ഹൗസിനുമുമ്പില്‍ ഡിവൈഎഫ്ഐ പ്രവര്‍ത്തകര്‍ കരിങ്കൊടികാട്ടി. വിമാനമാര്‍ഗം തിരുവനന്തപുരത്തെത്തിയ ഉമ്മന്‍ചാണ്ടിക്ക് വന്‍ പ്രതിഷേധമാണ് നേരിടേണ്ടി വന്നത്. വിമാനത്താവളത്തില്‍നിന്ന് ക്ലിഫ് ഹൗസിലേക്ക് പോകാനിരുന്ന മുഖ്യമന്ത്രിയുടെ വാഹനവ്യൂഹം പലതവണ വഴിമാറ്റി. നേരത്തെ നിശ്ചയിച്ച റൂട്ട് വിട്ട് അരമണിക്കൂറിലധികം കാര്‍ നഗരത്തില്‍ ചുറ്റിവളഞ്ഞു. ശംഖുംമുഖത്ത് ഡിവൈഎഫ്ഐ പ്രവര്‍ത്തകര്‍ കരിങ്കൊടികാട്ടി. ചാക്കയില്‍ പ്രതിഷേധക്കാര്‍ തമ്പടിച്ചതറിഞ്ഞ് വാഹനം കഴക്കൂട്ടം ബൈപാസ് വഴി തിരിച്ചുവിട്ടു. കുമാരപുരം, പട്ടം റൂട്ടിലൂടെ എത്തിയ മുഖ്യമന്ത്രി നേരെ സെക്രട്ടറിയറ്റിലേക്കുള്ള വഴി ഉപേക്ഷിച്ച് വഴുതക്കാട് വഴി പോയി. ക്ലിഫ് ഹൗസിലേക്ക് പോകുമെന്ന് നേരത്തെ അറിയിച്ചിരുന്നെങ്കിലും ഈ യാത്ര ഒഴിവാക്കി.

ഉച്ചതിരിഞ്ഞ് കോട്ടയം യാത്രയിലും റൂട്ട് പലവട്ടം മാറ്റിയെങ്കിലും വഴിനീളെ പ്രതിഷേധം നേരിട്ടു. അടൂരിലും തിരുവല്ലയിലും കൊട്ടാരക്കരയിലും കരിങ്കൊടികാട്ടി. ചങ്ങനാശേരി തെങ്ങണയ്ക്കു സമീപം വട്ടച്ചാല്‍പ്പടിയിലാണ് ഡിവൈഎഫ്ഐ പ്രവര്‍ത്തകര്‍ സാഹസികമായി കരിങ്കൊടി പുതപ്പിച്ചത്. യൂത്ത് കോണ്‍ഗ്രസുകാരുടെ സ്വീകരണമേറ്റു വാങ്ങിവന്ന മുഖ്യമന്ത്രിയുടെ കാറിന്റെ യാത്ര പതുക്കെയായിരുന്നു. ഈ സമയം മുദ്രാവാക്യം വിളിയുമായി എത്തിയ പ്രവര്‍ത്തകര്‍ കരിങ്കൊടി പുതപ്പിക്കുകയായിരുന്നു. ഗണ്‍മാനും പൊലീസുകാരും ഉള്‍പ്പെടെ പ്രതിഷേധക്കാരെ വളഞ്ഞിട്ട് മര്‍ദിച്ചു. മര്‍ദനത്തില്‍ പി ബി ജിയാഷിന് ഗുരുതര പരിക്കേറ്റു.

കൊട്ടാരക്കര പുലമണ്‍ ജങ്ഷനില്‍ പകല്‍ 2.30നാണ് കരിങ്കൊടി കാണിച്ചത്. എംസി റോഡ്വഴി വന്ന മുഖ്യമന്ത്രി പുലമണില്‍നിന്നു ഗോവിന്ദമംഗലം റോഡില്‍ കയറി യാത്ര തുടരുകയായിരുന്നു. തുടര്‍ന്ന് എംസി റോഡും ദേശീയപാതയും ഡിവൈഎഫ്ഐ പ്രവര്‍ത്തകര്‍ ഉപരോധിച്ചു. 15പേരെ അറസ്റ്റ്ചെയ്ത് ജാമ്യത്തില്‍ വിട്ടു. കോട്ടയത്തേക്കുള്ള വഴിയില്‍ എംസി റോഡില്‍ അടൂര്‍ നെല്ലിമൂട്ടില്‍പടിയിലും തിരുവല്ലയിലും കരിങ്കൊടി വീശി. പൊലീസുകാര്‍ ലാത്തിവീശി ഭീകരത സൃഷ്ടിച്ചു. ഡിവൈഎഫ്ഐ നേതാവ് എം കെ മഹേഷ് കുമാറിനെ പൈലറ്റ് വാഹനം ഇടിച്ച് തെറിപ്പിക്കാനും ശ്രമിച്ചു. അത്ഭുതകരമായാണ് മഹേഷ് രക്ഷപ്പെട്ടത്. ആലുവ പാലസില്‍ പ്രവര്‍ത്തകരെ അറസ്റ്റ് ചെയ്താണ് മുഖ്യമന്ത്രിക്ക് വഴിയൊരുക്കിയത്. അറസ്റ്റ് ചെയ്ത ഡിവൈഎഫ്ഐ പ്രവര്‍ത്തകര്‍ക്കെതിരെ പൊലീസ് കേസെടുത്തു.

പ്രമേഹത്തിനുള്ള പിയോഗ്ലിറ്റസോണ്‍ നിരോധിച്ചു

deshabhimani

ലീഗ് സഖ്യം ദോഷമായെന്ന് ചെന്നിത്തല

മുസ്ലീംലീഗുമായുള്ള സഖ്യം കോണ്‍ഗ്രസിന് ദോഷമായെന്ന് കെപിസിസി പ്രസിഡന്റ് രമേശ് ചെന്നിത്തല. സമുദായ സംഘടനകളുമായുള്ള ബന്ധം കോണ്‍ഗ്രസിനെ ദുര്‍ബലപ്പെടുത്തി. സമുദായങ്ങളുമായും ജാതിസംഘടനകളുമായും കോണ്‍ഗ്രസ് ലക്ഷ്മണ രേഖ പുലര്‍ത്തണം. ഡിസിസി ഓഫീസില്‍ നാരായണന്‍ തിക്കോടി എഴുതിയ സികെജിയുടെ ജീവചരിത്രം പ്രകാശനം ചെയ്ത് സംസാരിക്കുകയായിരുന്നു അദ്ദേഹം. ലീഗുമായുള്ള കൂട്ടുകെട്ട് എതിര്‍ത്ത സികെജിയുടെ നിലപാട് ഇന്ന് അനുഭവ പാഠമായി. ഒന്നും രണ്ട് സീറ്റ് കൊടുത്താല്‍ പിന്നീട് കൂടുതല്‍ സീറ്റ് ചോദിക്കുമെന്ന് അന്നേ സി കെ ജി പറഞ്ഞതാണെന്നും അദ്ദേഹം പറഞ്ഞു.

മന്നത്ത് പത്മനാഭനെ കെപിസിസി ജനറല്‍ സെക്രട്ടറിയാക്കണമെന്ന് പറഞ്ഞപ്പോള്‍ സമുദായം വേറെ പാര്‍ടി വേറെ എന്നുപറഞ്ഞയാളാണ് സി കെ ഗോവിന്ദന്‍ നായര്‍. കോണ്‍ഗ്രസ് മന്ത്രിമാര്‍ സമുദായ സംഘടനകളുടെയും മറ്റ് രാഷ്ട്രീയ പാര്‍ടികളുടെയും പരിപാടികളില്‍ സൗഹാര്‍ദ പ്രതിനിധികളായിപ്പോലും പങ്കെടുക്കരുതെന്ന സി കെ ജിയുടെ കത്ത് ഇന്നും പ്രസക്തമാണെന്ന് ചടങ്ങില്‍ മന്ത്രി ആര്യാടന്‍ മുഹമ്മദ് പറഞ്ഞു. ഞാന്‍ അക്കൂട്ടത്തിലാണ്. സമുദായ സംഘടനകളുമായി കൂട്ടുകൂടിയതിനാല്‍ ഉണ്ടായ കളങ്കം കുറച്ചുകൂടി സമയം വരും. മായ്ച്ചാലും മായാത്ത കറയായിപ്പോയി അതെന്ന് അദ്ദേഹം പറഞ്ഞു.

മുന്നണി വിട്ടുപോകും എന്ന് ഭീഷണിപ്പെടുത്തുന്നവര്‍ക്ക് പോകാന്‍ സ്ഥലമില്ലെന്ന് കെ മുരളീധരന്‍ എംഎല്‍എ പറഞ്ഞു. പോയാല്‍ അവരെ ആരും എടുക്കില്ല. ലോക്സഭയിലേക്ക് ഒരു സീറ്റ് നല്‍കുമ്പോള്‍ രണ്ടും രണ്ട് കിട്ടുമ്പോള്‍ മൂന്നും ചോദിക്കുകയാണ്. കോണ്‍ഗ്രസിനുള്ളത് മറ്റുള്ളവര്‍ക്ക് കൊടുക്കേണ്ടതില്ല. കോണ്‍ഗ്രസിനുള്ളത് എടുത്തിട്ടുമതി വീതംവെക്കലെന്നും അദ്ദേഹം പറഞ്ഞു. ഡിസിസി വൈസ് പ്രസിഡന്റ് യു രാജീവന്‍ അധ്യക്ഷനായി. യു കെ കുമാരന്‍ പുസ്തകം പരിചയപ്പെടുത്തി. എം കെ രാഘവന്‍ എംപി, എന്‍ സുബ്രഹ്മണ്യന്‍, കെ പി അനില്‍കുമാര്‍, പി ശങ്കരന്‍എന്നിവര്‍ സംസാരിച്ചു.

മുഖ്യമന്ത്രിയെ ക്രൂശിക്കരുതെന്ന് കുഞ്ഞാലിക്കുട്ടി.

കോഴിക്കോട്: പേഴ്സണല്‍സ്റ്റാഫിന്റെ പേരുപറഞ്ഞ് മുഖ്യമന്ത്രി യെ ക്രൂശിക്കരുതെന്ന് മന്ത്രി പി കെ കുഞ്ഞാലിക്കുട്ടി. മുഖ്യമന്ത്രി രാജിവെക്കേണ്ടതില്ല. പൊതുജനസേവനത്തിന് യുഎന്‍ പുരസ്കാരം വാങ്ങിയ ഉമ്മന്‍ചാണ്ടിക്ക് ദീര്‍ഘകാലത്തെ പൊതുപ്രവര്‍ത്തനത്തിന്റെ റെക്കോഡുണ്ട്. പേഴ്സണല്‍സ്റ്റാഫ് അംഗങ്ങളുടെ കുഴപ്പത്തിന്റെ പേരില്‍ മുഖ്യമന്ത്രിയെ പഴിക്കരുത്. മലപ്പുറം പാസ്പോര്‍ട് ഓഫീസറുടെ പേരില്‍ കുറ്റമുണ്ടെങ്കില്‍ നടപടിയെടുക്കണം. ഇതിന്റെ പേരില്‍ പ്രതിപക്ഷനേതാവിന്റെ കത്തെഴുത്ത് കണ്ട് വിരണ്ടുപോകില്ലെന്നും മന്ത്രി വാര്‍ത്താസലേഖകരോട് പറഞ്ഞു

ഐഗ്രൂപ്പ് ശക്തമാക്കാന്‍ ചെന്നിത്തല-മുരളി ചര്‍ച്ച

കോഴിക്കോട് : ഐഗ്രൂപ്പ് പ്രവര്‍ത്തനം ശക്തമാക്കാന്‍ കെപിസിസി പ്രസിഡന്റ് രമേശ് ചെന്നിത്തലയും കെ മുരളീധരന്‍എംഎല്‍എയും രഹസ്യയോഗത്തില്‍ ധാരണയായി. കോണ്‍ഗ്രസിലെയും യുഡിഎഫ് സര്‍ക്കാരിലെയും പുതിയസംഭവവികാസങ്ങളുടെ പശ്ചാതലത്തില്‍ കൂടതല്‍ ഐക്യത്തോടെ യോജിച്ച് പേകാന്‍ ഇരുവരും കൂടിയാലോചനയില്‍ തീരുമാനിച്ചു. ശനിയാഴ്ച രാവിലെ കോഴിക്കോടെത്തിയ ചെന്നിത്തല മുരളീധരന്റെ നടക്കാവിലെ വീട്ടിലെത്തികാണുകയായിരുന്നു.

മുരളീധരന്‍ ഈയടുത്ത് ഐഗ്രൂപ്പിലേക്ക് ചേര്‍ന്നതായി പ്രഖ്യാപിച്ചിരുന്നു. ഈ സാഹചര്യത്തിലാണ് ഐ വിഭാഗം നേതാക്കള്‍ക്കൊപ്പം ചെന്നിത്തല മുരളിയുമായി ചര്‍ച്ച നടത്തിയത്.മുരളിയോടൊപ്പം  ഐയിലേക്ക് തിരിച്ചുവന്ന പ്രവര്‍ത്തകരെ എല്ലാ പ്രവര്‍ത്തനത്തിലും പങ്കാളിയാക്കാന്‍ തീരുമാനിച്ചു. വാര്‍ഡ്തലണ്ടവരെ ഗ്രൂപ് യോഗങ്ങള്‍ വിളിക്കാനും ധാരണയായി. കഴിഞ്ഞയാഴ.ച തിരുവനന്തപുരത്ത് ചെന്നിത്തലയെ കണ്ട മുരളി അദ്ദേഹത്തിന്റെ നേതൃത്വത്തിന് പിന്തുണപ്രഖയാപിച്ചിരുന്നു. മുരളിയുടെ വരവോടെ പഴയ കരുണാകരഗ്രൂപ്പ്കാരെയെല്ലാം കൂട്ടിച്ചേര്‍ത്ത് ഐ ശക്തമാക്കാനാണ് നീക്കം.

ശനിയാഴ്ചത്തെ രഹസ്യയോഗത്തില്‍ കെപിസിസി ജനറല്‍സെക്രട്ടറിമാരായ എന്‍ സുബ്രമഹണ്യന്‍, കെ പി അനില്‍കുമാര്‍,സെക്രട്ടറി അഡ്വ. കെ പ്രവീണ്‍കുമാര്‍, മുന്‍മന്ത്രി പി ശങ്കരന്‍, കെപിസിസി നിര്‍വ്വാഹകസമിതി അംഗം അഡ്വ. പി എം നിയാസ് എന്നിവരുമുണ്ടായിരുന്നു.

deshabhimani

മുഖ്യമന്ത്രി കടിച്ചുതൂങ്ങുന്നത് അറസ്റ്റ് ഒഴിവാക്കാന്‍: വി എസ്

സോളാര്‍ തട്ടിപ്പ് കേസില്‍ അറസ്റ്റിലാകുന്നതില്‍നിന്ന് സ്വയം രക്ഷപ്പെടുന്നതിനു വേണ്ടിയാണ് മുഖ്യമന്ത്രി ഇപ്പോഴും അധികാരത്തില്‍ കടിച്ചുതൂങ്ങുന്നതെന്ന് പ്രതിപക്ഷ നേതാവ് വി എസ് അച്യുതാനന്ദന്‍ പറഞ്ഞു. പേഴ്സണല്‍ സ്റ്റാഫിനെ ബലിയാടാക്കി രക്ഷപ്പെടാന്‍ താനില്ല എന്ന് നിയമസഭയില്‍ പ്രറഞ്ഞ മുഖ്യമന്ത്രി, ഇപ്പോള്‍ അവരെ ബലിയാടാക്കി രക്ഷപ്പെടാനുള്ള തത്രപ്പാടിലാണ്. ഇതിനുവേണ്ടി സംസ്ഥാന പോലീസിനെ ദുരുപയോഗം ചെയ്യുന്നു- വി എസ് വാര്‍ത്താസമ്മേളനത്തില്‍ പറഞ്ഞു.

ജോപ്പന്‍ അറസ്റ്റിലായ കേസിലെ ശ്രീധരന്‍നായര്‍ നല്‍കിയ പരാതിയില്‍ പറയുന്നത് മുഖ്യമന്ത്രി നേരിട്ട് ഇടപെട്ടു എന്നാണ്. കോന്നി പോലീസ് സ്റ്റേഷനിലെ 656/2013 എന്ന പ്രഥമവിവര റിപ്പോര്‍ട്ടും അതിനാധാരമായ പരാതിയും പരിശോധിച്ചാല്‍ ഇത് ബോദ്ധ്യപ്പെടും. ഇത് മറച്ചുവെച്ച് ജോപ്പനില്‍ കേസൊതുക്കാന്‍ പോലീസ് കൂട്ടുനില്‍ക്കുന്നു. മുഖ്യമന്ത്രിയുടെ ചേംബറിലെ വിഡിയോ ദൃശ്യങ്ങള്‍ തെളിവായി പിടിച്ചെടുക്കുകയും പരിശോധിക്കുകയും ചെയ്യാന്‍ പോലീസ് അറച്ചുനില്‍ക്കുന്നു. ഇത്രയും നടപടിതന്നെ ഉണ്ടായത് ശ്രീധരന്‍ നായര്‍ കോടതിയെ സമീപിച്ചതുകൊണ്ടും കോടതി ഇടപെട്ടതും കൊണ്ടാണ്. സരിത തട്ടിപ്പിന്റെ ഇരകളെ സ്വീകരിച്ചിരുന്നത് മുഖ്യമന്ത്രിയുടെ ഓഫീസിലാണ് എന്ന് പോലീസ് സ്ഥിരീകരിച്ചിരിക്കുന്നു. ക്രിമിനല്‍ നടപടിക്രമം അനുസരിച്ച് കൃത്യം നടന്ന സ്ഥലത്ത് പ്രതികളെ എത്തിച്ച് മഹസര്‍ തയ്യാറാക്കണം എന്നാണ് നിബന്ധന. അതായത് മുഖ്യമന്ത്രിയുടെ ഓഫീസില്‍ പ്രതികളെ കൊണ്ടുവന്ന് തട്ടിപ്പിന്റെ മഹസര്‍ തയ്യാറാക്കണം. ഈ നാണക്കേട് മലയാളികളുടെ തലയില്‍ കെട്ടിവെക്കാനാണോ സര്‍ക്കാര്‍ ശ്രമിക്കുന്നത്?-വി എസ് ചോദിച്ചു.

ശാലു മേനോനെ പ്രതിചേര്‍ക്കാന്‍ പോലീസ് തയ്യാറാവാത്തതിന്റെ കാരണം വ്യക്തമാണ്. അവരുടെ വീടിന്റെ പാലുകാച്ചിന്റെ വിഡീയോ ചിത്രീകരിച്ച ഫോട്ടോഗ്രാഫറുടെ കമ്പ്യൂട്ടറില്‍നിന്ന് രേഖകള്‍ പോലീസ് എടുത്തുമാറ്റി എന്ന ആരോപണം ഗുരുതരമാണ്. ഒരു സര്‍ക്കാര്‍ ഉദ്യോഗസ്ഥനായ ജോപ്പനെതിരെ ഇപ്പോള്‍ വഞ്ചനാക്കുറ്റം മാത്രമാണ് ചുമത്തിയിരിക്കുന്നത്. അടിയന്തരമായി സലിംരാജിന്റേയും ജോപ്പന്റെയും ജിക്കുമോന്റെയും, അനധികൃത സ്വത്ത് സംബന്ധിച്ചും ഈ ക്രിമിനല്‍ തട്ടിപ്പിന് കൂട്ടുനിന്നതിനെക്കുറിച്ചും വിജിലന്‍സ് അന്വേഷണം പ്രഖ്യാപിക്കണം. അതുപോലെ മുഖ്യമന്ത്രിയുടെയും മകന്റെയും പോക്കറ്റായ പാവംപയ്യന്റെ ധനസ്രോതസ്സുകളെക്കുറിച്ചും അന്വേഷണം നടത്തണം. മുഖ്യമന്ത്രിയുടെ സ്റ്റാഫിലേക്ക് ഇത്രയും ക്രിമിനലുകളെ നിയമിക്കാന്‍ മുഖ്യമന്ത്രി കാട്ടിയ വൈഭവം പ്രശംസിക്കാതെ വയ്യ വി എസ് പരിഹസിച്ചു.
 ഉത്തരാഖണ്ഡില്‍ കുടുങ്ങിയ മലയാളികളുടെ കാര്യത്തിലോ, മണിപ്പാലില്‍ പീഡിപ്പിക്കപ്പെട്ട പെണ്‍കുട്ടിയുടെ വിഷയത്തിലോ നാട്ടിലെ പ്രളയദുരിതത്തിലോ ഒന്നും ശ്രദ്ധിക്കാന്‍ സര്‍ക്കാരിനാവുന്നില്ല. ജയിലില്‍ പോകാതിരിക്കാന്‍ വേണ്ടി തെളിവു നശിപ്പിക്കുന്നതില്‍ മാത്രമാണ് മന്ത്രിമാര്‍ക്ക് ശ്രദ്ധ. ഇനിയും മലയാളികളുടെ ക്ഷമ പരീക്ഷിക്കാതെ മുഖ്യമന്ത്രി ഉടന്‍ രാജിവെച്ച് ജൂഡീഷ്യല്‍ അന്വേഷണത്തിന് വിധേയനാകണം-വി എസ് ആവശ്യപ്പെട്ടു.

ജോസ് തെറ്റയിലിന്റെ കാര്യത്തില്‍ ജനതാദള്‍ ആണ് തീരുമാനം എടുക്കേണ്ടതെന്ന് ചോദ്യത്തിനു മറുപടിയായി വി എസ് പറഞ്ഞു.

പേഴ്സണല്‍സ്റ്റാഫ്: പേരുദോഷമായെന്ന് ചെന്നിത്തല

കോഴിക്കോട്: കോണ്‍ഗ്രസ് മന്ത്രിമാരുടെ പേഴ്സണല്‍ സ്റ്റാഫിന്റെ പ്രവര്‍ത്തനത്തിന് കര്‍ശനനിയന്ത്രണം ഏര്‍പ്പെടുത്തുമെന്ന് കെപിസിസി പ്രസിഡന്റ് രമേശ് ചെന്നിത്തല പറഞ്ഞു. പാര്‍ടിയല്ല മന്ത്രിമാരാണിപ്പോള്‍ പേഴ്സണല്‍ സ്റ്റാഫിനെ നിയമിക്കുന്നത്. അടുത്തിടെയുണ്ടായ സംഭവവികാസങ്ങള്‍ പാര്‍ടിക്ക് ദോഷമുണ്ടാക്കി- കെഎസ്ടി വര്‍ക്കേഴസ് യൂണിയന്‍(ഐഎന്‍ടിയുസി) സംസ്ഥാന സമ്മേളന ഉദ്ഘാടനവേളയിലാണ് മുഖ്യമന്ത്രിയുടെ ഓഫീസ് പേരുദോഷമുണ്ടാക്കിയെന്ന ആരോപണം കെപിസിസി പ്രസിഡന്റ് ഉന്നയിച്ചത്. മുഖ്യമന്ത്രിയുടെ പേര് പരാമര്‍ശിക്കാതെയായിരുന്നു കെപിസിസി പ്രസിഡന്റിന്റെ വിമര്‍ശനം.

കേന്ദ്രമന്ത്രിമാര്‍ പേഴ്സണല്‍ സ്റ്റാഫിനെ നിയമിക്കുന്നതിനൊരു വ്യവസ്ഥയുണ്ട്. ഡല്‍ഹിയിലതിന് കൃത്യമായ സമ്പ്രദായമുണ്ട്. പൊലീസ് പരിശോധനയടക്കം കഴിഞ്ഞാണ് നിയമനം. എന്നാല്‍ ഇവിടെ മന്ത്രിമാരുടെ താല്‍പര്യാര്‍ഥമാണിതെല്ലാം നടത്തുന്നത്. പുതിയ സംഭവവികാസങ്ങളുടെ പശ്ചാത്തലത്തില്‍ പാര്‍ടി ഇടപെടും. നിയമനം സുതാര്യമാക്കും. മന്ത്രിമാര്‍ക്ക് പൂര്‍ണസ്വാതന്ത്ര്യം കൊടുത്താലുണ്ടാകുന്ന പ്രശ്നങ്ങളാണ് ഇപ്പോള്‍ കാണുന്നത്.മുഖ്യമന്ത്രിയുടെ ഓഫീസ് ദുര്‍വിനിയോഗം ചെയ്ത ആരെയും സംരക്ഷിക്കാന്‍ പാര്‍ടി അനുവദിക്കില്ലെന്നും രമേശ് വ്യക്തമാക്കി.

പേഴ്സണല്‍ സ്റ്റാഫിനെ നിയമിക്കുന്നതില്‍ സിപിഐ എമ്മും എല്‍ഡിഎഫും തുടരുന്ന രീതിയാണ് നല്ലത്. പാര്‍ടി അറിഞ്ഞാകണം നിയമനം. മുഖ്യമന്ത്രിയുടെ പേഴ്സണല്‍ അസിസ്റ്റന്റ് ടെന്നിജോപ്പന്‍ അറസ്റ്റിലായതും സോളാര്‍തട്ടിപ്പും നേരിട്ട് പരമാര്‍ശിക്കാതെയായിരുന്നു ചെന്നിത്തലയുടെ ആക്ഷേപം. ടാഗോര്‍ഹാളില്‍ നടന്ന ചടങ്ങില്‍ യൂണിയന്‍ പ്രസിഡന്റ് തമ്പാനൂര്‍ രവി അധ്യക്ഷനായി.

പേഴ്സണല്‍ സ്റ്റാഫില്‍ ഇനിയും വമ്പന്‍വമ്പന്‍സ്രാവുകള്‍

കോഴിക്കോട് : മുഖ്യമന്ത്രിക്ക് ഐക്യരാഷ്ട്രസഭാഅവാര്‍ഡ് കിട്ടി പ്രഭാതസൂര്യനെപ്പോലെ വെട്ടിത്തിളങ്ങേണ്ട സമയത്ത് ഗ്രഹണസ്ഥിതിയാണ് സര്‍ക്കാരിനെന്ന് കെ മുരളീധരന്‍ എംഎല്‍എ. ഇപ്പോള്‍ രണ്ടുമുന്നുപേരെയെ പിടിച്ചിട്ടുള്ളു. ഇതിലും വമ്പന്‍സ്രാവുകള്‍ ചില മന്ത്രിമാരുടെ പേഴ്സണല്‍സ്റ്റാഫിലുണ്ട്. എമഎല്‍എമാരുടെ കത്തും നിവേദനവും പൂഴ്തുന്ന വിദ്വാന്മാരുണ്ട് സ്റ്റാഫില്‍. പത്താം ക്ലാസ് പോയിട് നാലാംക്ലാസും ഡ്രില്ലുമാണ് പലരുടെയും യോഗ്യത.മന്ത്രി പറഞ്ഞാലും കേള്‍ക്കാത്തസ്റ്റാഫുമുണ്ട്.ഇക്കാര്യത്തില്‍ കെപിസിസി കര്‍ശനമായി ഇടപെടണം.രോഗമറിഞ്ഞ് ചികിത്സിക്കണം.

സ്ക്രീന്‍ചെയ്ത് സുതാര്യമായിരിക്കണം നിയമനം. സിപിഐ എം അധികാരമേറിയാല്‍ അവരുശട സര്‍വീസ് സംഘടനകള്‍ക്കാണ് പേഴ്സണല്‍സ്റ്റാഫില്‍ പ്രാധാന്യം. എന്നാല്‍ കോണ്‍ഗ്രസ് വന്നാല എന്‍ജിഒ അസോസിയേഷനെയും മറ്റും പരിഗണിക്കില്ല.ഒട്ടേറെ നല്ലകാര്യം ചെയ്തിട്ടും ചീത്തപ്പേരുണ്ടാക്കിയ വമ്പന്മാരാണ് പേഴസണല്‍സ്റ്റാഫിലുള്ളത്. ഇപ്പം സോളാറെന്ന് പേരുകേള്‍ക്കുമ്പം ഞങ്ങള്‍ക്ക് ഭയമാണ്. കഴിഞ്ഞത് കഴിഞ്ഞു. പക്ഷെ ഇനി ആവര്‍ത്തിക്കാനനനുവദിക്കരുത്. നിയമസഭയില്‍ എല്ലാത്തിനും മുഖ്യമന്ത്രി ഇടപെടേണ്ടിവരുന്ന സ്ഥിതിയാണെന്നും മുരളി പറഞ്ഞു. കെഎസ്ടി വര്‍ക്കേഴ്സ്യൂണിയന്‍ (ഐഎന്‍ടിയുസി) സംസ്ഥാനസമ്മേളനത്തില്‍ സംസാരിക്കുകയായിരുന്നു മുരളീധരന്‍

deshabhimani

മുഖ്യമന്ത്രിക്ക് കരിങ്കൊടി

അഴിമതിയില്‍ കുടുങ്ങിയ മുഖ്യമന്ത്രി ഉമ്മന്‍ചാണ്ടിയെ ആലുവയിലും തിരുവനന്തപുരം വിമാനത്താവളത്തിലും ഡിവൈഎഫ്ഐ പ്രവര്‍ത്തകര്‍ കരിങ്കൊടി കാട്ടി. ആലുവയിൽ മുഖ്യമന്ത്രി താമസിക്കുന്ന ഗസ്റ്റ് ഹൗസിലെത്തിയാണ് മുപ്പതിലേറെവരുന്ന ഡിവൈഎഫ്ഐ പ്രവര്‍ത്തകര്‍ ശനിയാഴ്ച രാവിലെ പ്രതിഷേധിച്ചത്. ഗസ്റ്റ് ഹൗസിലേക്ക് തള്ളിക്കയറാന്‍ ശ്രമിച്ച പ്രവര്‍ത്തകരെ പൊലീസ് അറസ്റ്റ് ചെയ്തു നീക്കി.വിമാനത്താവളത്തിൽ നിന്ന് പുറത്തേക്ക് വരുമ്പോഴായിരുന്നു പ്രതിഷേധം.യുവമോർച്ച പ്രവർത്തകരും മുഖ്യമന്ത്രിയെ കരിങ്കൊടി കാട്ടി.

കുറച്ചു ദിവസമായി കേരളത്തിന് പുറത്തായതിനാല്‍  നടന്ന കാര്യങ്ങള്‍ അറിഞ്ഞിരുന്നില്ലെന്ന് മുഖ്യമന്ത്രി അലുവയിൽ മാധ്യമ പ്രവർത്തകരോട് പറഞ്ഞു. മാധ്യമങ്ങളിൽ വന്ന കാര്യങ്ങളെ അറിഞ്ഞുള്ളൂ. കേസില്‍ നീതിപൂര്‍വമായ അന്വേഷണം നടക്കും. കുറ്റം ചെയ്തവര്‍ ആരായാലും സംരക്ഷിക്കുകയില്ല. എന്നാല്‍ , കുറ്റം ചെയ്യാത്തവര്‍ക്കതിരെ ഒരു കാരണവശാലും നടപടിയുണ്ടാവില്ല. ആരെയും ബലിയാടാക്കില്ല- ലൈംഗികാപവാദ കേസിൽ ആരോപണം നേരിടുന്ന മുന്‍മന്ത്രി ജോസ് തെറ്റയിലിന്റെ കാര്യത്തില്‍ തീരുമാനം കൈക്കൊള്ളേണ്ടത് എല്‍ .ഡി.എഫും ജനതാദളുമാണെന്നും മുഖ്യമന്ത്രി പറഞ്ഞു.

ഐക്യരാഷ്ട്ര സഭയുടെ പുരസ്‌കാരം ഏറ്റുവാങ്ങി തിരിച്ചെത്തിയ മുഖ്യമന്ത്രിക്ക് എ ഗ്രൂപ്പ് പ്രവർത്തകർ വിമാനത്താവളത്തിൽ സ്വീകരണം നല്കി. ഐ ഗ്രൂപ്പ് വിട്ടുനിന്നു

ഉപ്പ് തിന്നവർ  വെള്ളം കുടിക്കട്ടെ: ചെന്നിത്തല

കോഴിക്കോട്: സോളാർ അഴിമതിക്കേസിൽ കോൺഗ്രസ് ആരെയും രാഷ്ട്രീയമായി സംരക്ഷിക്കില്ലെന്ന്  കെ പിസിസി പ്രസിഡണ്ട് രമേശ് ചെന്നിത്തല പറഞ്ഞു.ഉപ്പ് തിന്നവർ ആരായാലും വെള്ളം കുടിക്കട്ടെ. നിയമം അനുശാസിക്കുന്ന എല്ലാ ശിക്ഷയും കുട്ടക്കാർക്ക് കിട്ടണം  മുഖ്യമന്ത്രിയുടെ ഓഫീസ് ദുരുപയോഗപ്പെടുത്തിയിട്ടുണ്ടെന്ന കാര്യം അദ്ദേഹം തന്നെ നിയമസഭയിൽ സമ്മതിച്ചതാണു. അന്വഷണവും അറസ്റ്റും നടക്കട്ടെ. കൂടുതൽ കാര്യങ്ങൾ പിന്നീട് പറയാം.- ചെന്നിത്തല പറഞ്ഞു

കോഴിക്കോട്ടെത്തിയ ചെന്നിത്തല രാവിലെ കെ മുരളിധരനെ സന്ദർശിച്ചു ചർച്ച നടത്തിയിരുന്നു.