Friday, November 15, 2013

സിബിഐക്ക് സ്വയംഭരണം നല്‍കാനാവില്ല

സിബിഐക്ക് സ്വയംഭരണാവകാശം നല്‍കുന്നതിനെ എതിര്‍ത്ത് കേന്ദ്രസര്‍ക്കാര്‍ സുപ്രീംകോടതിയില്‍ സത്യവാങ്മൂലം സമര്‍പ്പിച്ചു. സിബിഐ ഡയറക്ടര്‍ക്ക് വകുപ്പുസെക്രട്ടറിക്ക് തുല്യമായ പദവി നല്‍കാനാവില്ലെന്ന് സത്യവാങ്മൂലത്തില്‍ സര്‍ക്കാര്‍ വ്യക്തമാക്കിയിട്ടുണ്ട്. വലിയ തോതിലുള്ള അധികാരം ഒരു പദവിയില്‍ മാത്രം കേന്ദ്രീകരിക്കുന്ന സാഹചര്യമുണ്ടാകുമെന്ന വിദശീകരണമാണ് സര്‍ക്കാര്‍ നല്‍കുന്നത്. സര്‍ക്കാരിന്റെ നയവിഷയങ്ങളില്‍ സിബിഐ തലയിടേണ്ടതില്ലെന്ന് പ്രധാനമന്ത്രി മന്‍മോഹന്‍ സിങും ധനമന്ത്രി പി ചിദംബരവും കഴിഞ്ഞ ദിവസങ്ങളില്‍ വ്യക്തമാക്കിയതിന് പിന്നാലെയാണ് ഇപ്പോള്‍ കൂടുതല്‍ അധികാരം നല്‍കാനാവില്ലെന്ന് സര്‍ക്കാര്‍ കോടതിയെ ബോധിപ്പിച്ചിരിക്കുന്നത്. സിബിഐ ഡയറക്ടര്‍ക്ക് സെക്രട്ടറി സ്ഥാനം നല്‍കുന്നത് ചട്ടവിവിരുദ്ധമാകുമെന്ന് സത്യവാങ്മൂലത്തില്‍ പറയുന്നു. ഇത് പുതിയ കീഴ്വഴക്കങ്ങള്‍ക്ക് വഴിവെയ്ക്കും. മാത്രമല്ല മറ്റ് പല സ്ഥാപനങ്ങളിലും ഇത് പ്രശ്നങ്ങള്‍ സൃഷ്ടിക്കുകയും ചെയ്യും- സര്‍ക്കാര്‍ പറഞ്ഞു.

വകുപ്പു മന്ത്രി മുമ്പാകെ നേരിട്ട് റിപ്പോര്‍ട്ട് ചെയ്യാന്‍ സിബിഐ ഡയറക്ടര്‍ക്ക് അധികാരം നല്‍കണമെന്ന ആവശ്യത്തെയും സര്‍ക്കാര്‍ എതിര്‍ത്തിട്ടുണ്ട്. സിബിഐ ഡയറക്ടര്‍ക്ക് സെക്രട്ടറിക്ക് തുല്യമായ അധികാരവും മൂന്നുവര്‍ഷത്തെ കാലാവധിയും നല്‍കണമെന്ന ആവശ്യവുമായി അന്വേഷണ ഏജന്‍സി തന്നെയാണ് സുപ്രീംകോടതിയെ സമീപിച്ചത്. സിബിഐ ഡയറക്ടറുടെ ഭരണപരവും ധനപരവുമായ അധികാരം വളരെ പരിമിതമാണെന്നും ബാഹ്യസ്വാധീനങ്ങളില്‍ നിന്ന് മുക്തമാക്കുന്നതിന് കൂടുതല്‍ അധികാരവും സ്വയംഭരണാവകാശവും ലഭിക്കേണ്ടതുണ്ടെന്നും 14 പേജ് വരുന്ന സത്യവാങ്മൂലത്തില്‍ സിബിഐ ആവശ്യപ്പെട്ടിരുന്നു. പേഴ്സണല്‍ വകുപ്പു മുഖാന്തിരം നീങ്ങുന്നതിന് പകരം മന്ത്രിയെ നേരിട് സമീപിക്കുന്നതിന് ഡയറക്ടര്‍ക്ക് സെക്രട്ടറിപദവി നല്‍കണമെന്ന ആവശ്യവും സിബിഐ മുന്നോട്ടുവെച്ചു. സിബിഐ ഉദ്യോഗസ്ഥര്‍ക്കെതിരായി ഉയരുന്ന ആരോപണങ്ങളെ കുറിച്ച് പഠിക്കാന്‍ ഒരു പരിശോധക സമിതിയെ വെയ്ക്കാനുള്ള കേന്ദ്ര നീക്കത്തെയും സിബിഐ എതിര്‍ത്തിരുന്നു. കല്‍ക്കരി കേസില്‍ വാദംകേള്‍ക്കവെ സിബിഐ കൂട്ടിലടച്ച തത്തയാണെന്നും കൂടുതല്‍ അധികാരങ്ങള്‍ ലഭിക്കേണ്ടതുണ്ടെന്നും സുപ്രീംകോടതി നിരീക്ഷിച്ചിരുന്നു. ഇതിന് പിന്നാലെയാണ് സ്വയംഭരണാവകാശം ലഭിക്കണമെന്ന ആവശ്യവുമായി അന്വേഷണ ഏജന്‍സി കോടതിയെ സമീപിച്ചത്. വിഷയത്തില്‍ കോടതി സര്‍ക്കാരിന്റെ അഭിപ്രായം തേടിയിരുന്നു.

deshabhimani

No comments:

Post a Comment