""നടുറോഡായതിനാല്‍ ആരും കയറിപ്പിടിക്കാന്‍ ധൈര്യപ്പെടില്ലെന്നാണ് ഇതുവരെ കരുതിയിരുന്നത്.പത്മിനിയെ മര്‍ദിച്ച സംഭവത്തോടെ ആ വിശ്വാസം പോയി. രാത്രിയായാല്‍ ഭയമാണ്. ചിലര്‍ മദ്യപിച്ച് മോശമായി പെരുമാറും. പരാതിപ്പെടാന്‍ എല്ലാവരും പറയും. ജോലി പോകുമെന്ന ഭയത്താന്‍ ആരോടും പറയാറില്ല.""- ട്രാഫിക് വാര്‍ഡന്‍ ഷാജിതയുടെ സ്വരത്തില്‍ നിസ്സഹായത. ഭര്‍ത്താവില്ലാതെ രണ്ടു കുട്ടികളുമായി സഹോദരന്റെ കാരുണ്യത്തില്‍ കഴിയുന്ന ഷാജിതയുടെ ജീവിതദുരിതങ്ങള്‍ വര്‍ണിക്കാന്‍ വാക്കുകളില്ല.
നടുറോഡില്‍ ആക്രമിക്കപ്പെട്ട വനിതാ ട്രാഫിക് വാര്‍ഡന്‍ പത്മിനി പൊലീസ്സേനയുടെ ഭാഗമായിട്ടുപോലും ആവശ്യത്തിന് സുരക്ഷ നല്‍കാനോ നടപടിയെടുക്കാനോ അധികാരികള്‍ തയ്യാറായില്ല. ദിവസവും വാഹനങ്ങള്‍ക്കു നടുവില്‍ പണിയെടുക്കുന്ന ഇവര്‍ക്ക് ഇന്‍ഷുറന്‍സ് പരിരക്ഷയോ, ചികിത്സാസഹായമോ നല്‍കാനും നടപടിയില്ല. ഇത്തരത്തില്‍ നൂറോളം സ്ത്രീകളാണ് ജില്ലയുടെ വിവിധ ഭാഗങ്ങളില്‍ ജോലിചെയ്യുന്നത്. ഡ്യൂട്ടിക്കിടെ അപകടമുണ്ടായാല്‍ അതതു സ്റ്റേഷനുകളില്‍നിന്നുള്ള പൊലീസുകാര്‍ ആശുപത്രിയില്‍ എത്തിക്കും. അപകടം ചെറുതാണെങ്കില്‍ തനിയെ ആശുപത്രിയിലെത്തി ചികിത്സ തേടണം. ഡ്യൂട്ടിക്കിടെ പ്രാഥമികാവശ്യത്തിനുള്ള സൗകര്യമില്ലാത്തതിനാല്‍ ഏറെ ബുദ്ധിമുട്ടുന്നു. ഡ്യൂട്ടിക്കു നില്‍ക്കുന്ന പോയിന്റില്‍നിന്ന് ദൂരെയുള്ള സ്ഥലത്തേക്ക് പ്രാഥമികാവശ്യത്തിനായി പോകണമെങ്കില്‍ 10 മിനിറ്റ് മുന്‍കൂര്‍ അനുവാദം വാങ്ങണം. അല്ലെങ്കില്‍ അവധി മാര്‍ക്ക്ചെയ്ത് വേതനം റദ്ദാക്കും. അതിനാല്‍ പലപ്പോഴും വെള്ളം കുടിക്കാന്‍പോലും ഇവര്‍ക്കു കഴിയാറില്ല. ദിവസവേതനത്തിന് ജോലിചെയ്യുന്ന ഇവരില്‍ പലരും രണ്ടു വര്‍ഷംമുതല്‍ ഏഴു വര്‍ഷംവരെ സര്‍വീസുള്ളവരാണ്.
deshabhimani
No comments:
Post a Comment