Saturday, March 1, 2014

തെരഞ്ഞെടുപ്പ് ചെലവുപരിധി 70 ലക്ഷമാക്കി

ലോക്സഭാ തെരഞ്ഞെടുപ്പില്‍ സ്ഥാനാര്‍ഥികള്‍ക്ക് ചെലവഴിക്കാവുന്ന തുകയുടെ പരിധി 40 ലക്ഷത്തില്‍നിന്ന് 70 ലക്ഷം രൂപയാക്കി ഉയര്‍ത്താന്‍ കേന്ദ്ര മന്ത്രിസഭായോഗം തീരുമാനിച്ചു. വടക്കുകിഴക്കന്‍ സംസ്ഥാനങ്ങളില്‍ 27 ലക്ഷം മുതല്‍ 35 ലക്ഷമായിരുന്ന പരിധി 54 ലക്ഷമാക്കി ഉയര്‍ത്തി. കേന്ദ്രഭരണപ്രദേശമായ ഡല്‍ഹിയില്‍ പരിധി 40 ലക്ഷത്തില്‍നിന്ന് 70 ലക്ഷമാക്കിയപ്പോള്‍ മറ്റ് കേന്ദ്രഭരണപ്രദേശങ്ങളില്‍ 54 ലക്ഷമാക്കി. തെരഞ്ഞെടുപ്പ് കമീഷന്റെ നിര്‍ദേശം പരിഗണിച്ചാണ് തീരുമാനം. നേരത്തെ നിയമസഭാ തെരഞ്ഞെടുപ്പില്‍ ചെലവഴിക്കാവുന്ന തുകയുടെ പരിധി 28 ലക്ഷമായി ഉയര്‍ത്തിയിരുന്നു. വിലക്കയറ്റവും പണപ്പെരുപ്പവും കണക്കിലെടുത്ത് ചെലവുപരിധി ഉയര്‍ത്തണമെന്ന ആവശ്യം വിവിധ രാഷ്ട്രീയ പാര്‍ടികള്‍ മുന്നോട്ടുവച്ചിരുന്നു. കമീഷനും ഈ നിലപാടിനോട് യോജിക്കുകയും പരിധി ഉയര്‍ത്താന്‍ കേന്ദ്രത്തോട് ആവശ്യപ്പെടുകയുമായിരുന്നു.

deshabhimani

ദേശീയ വാര്‍ത്തകള്‍ - മോദി, അഴിമതി, സാമ്പത്തികവളര്‍ച്ച, കിസാന്‍ സഭ...

മോഡിയുടെ മൗനം ബിജെപിയുടെ നയംമാറ്റം

ന്യൂഡല്‍ഹി: ചില്ലറ വില്‍പന മേഖലയില്‍ വിദേശനിക്ഷേപം അനുവദിക്കുന്ന കാര്യത്തില്‍ ബിജെപിക്കുണ്ടായിരുന്ന എതിര്‍പ്പ് അവസാനിക്കുന്നു. പുതിയ കാലഘട്ടത്തിന്റെ വെല്ലുവളികള്‍ അവസരമാക്കി മാറ്റണമെന്ന ബിജെപി പ്രധാനമന്ത്രി സ്ഥാനാര്‍ഥി നരേന്ദ്ര മോഡിയുടെ പ്രസ്താവനയാണ് ബിജെപിയും വഴങ്ങുകയാണെന്നതിന്റെ സൂചനയായത്. ചില്ലറ വില്‍പനമേഖലയില്‍ വിദേശനിക്ഷേപത്തെക്കുറിച്ച് നേരിട്ട് പറയാതെ നയം മാറുമെന്ന വ്യക്തമായ സൂചനയാണ് കോര്‍പറേറ്റുകളുടെ വക്താവായ നരേന്ദ്ര മോഡിയില്‍ നിന്നുണ്ടായത്്. രാജ്യത്തെ ചെറുകിട കച്ചവടക്കാര്‍ വലിയ ആധുനിക സ്റ്റോറുകളുമായി സഹകരിച്ച് പ്രവര്‍ത്തിക്കണമെന്ന് ന്യൂഡല്‍ഹിയില്‍ നടത്തിയ പ്രസംഗത്തില്‍ പറഞ്ഞ നരേന്ദ്രമോഡി വിദേശനിക്ഷേപം അനുവദിക്കണമോ എന്നതില്‍ മൗനം പാലിച്ചു. ചില്ലറവില്‍പന മേഖലയിലെ വിദേശനിക്ഷേപത്തെക്കുറിച്ചുള്ള നരേന്ദ്രമോഡിയുടെ മൗനം, ബിജെപിയുടെ നേരത്തേയുള്ള നയം മാറുന്നതിന്റെ സൂചനയാണെന്ന് സിപിഐ എം ജനറല്‍ സെക്രട്ടറി പ്രകാശ് കാരാട്ട് പറഞ്ഞു.

അഴിമതിവിരുദ്ധ ഓര്‍ഡിനന്‍സുകള്‍ മാറ്റി

ന്യൂഡല്‍ഹി: തെരഞ്ഞെടുപ്പിന് മുമ്പായി അഴിമതിവിരുദ്ധപ്രതിച്ഛായ നേടുകയെന്ന ലക്ഷ്യത്തോടെ രാഹുല്‍ഗാന്ധി മുന്നോട്ടുവയ്ക്കുന്ന ഓര്‍ഡിനന്‍സുകള്‍ കേന്ദ്രമന്ത്രിസഭായോഗം മാറ്റിവച്ചു. അഴിമതിവിരുദ്ധ ഭേദഗതി ബില്‍, സര്‍ക്കാര്‍ സേവനങ്ങള്‍ സമയബന്ധിതമായി ജനങ്ങള്‍ക്ക് ലഭിക്കുന്നെന്ന് ഉറപ്പാക്കുന്ന പൗരാവകാശ ബില്‍ എന്നിവ ഓര്‍ഡിനന്‍സ് രൂപത്തില്‍ കൊണ്ടുവരണമെന്ന ആവശ്യമാണ് രാഹുല്‍ഗാന്ധി മുന്നോട്ടുവച്ചിട്ടുള്ളത്. എന്നാല്‍, ഓര്‍ഡിനന്‍സുകളെല്ലാം മാറ്റുന്നതായി ക്യാബിനറ്റ് ചേര്‍ന്നപ്പോള്‍ സെക്രട്ടറി അജിത്ത് സേത്ത് അറിയിക്കുകയായിരുന്നു. ഓര്‍ഡിനന്‍സുകളുടെ കാര്യത്തില്‍ നിയമ മന്ത്രാലയം പല എതിര്‍പ്പുകളും ഉന്നയിച്ച പശ്ചാത്തലത്തിലാണ് മാറ്റിയതെന്ന് സൂചനയുണ്ട്. എസ്സി- എസ്ടി വിഭാഗക്കാര്‍ക്കെതിരായ അതിക്രമങ്ങള്‍ തടയുന്ന ബില്‍, ഭിന്നശേഷിക്കാരുടെ അവകാശങ്ങള്‍ ഉറപ്പാക്കുന്ന ബില്‍, സെബി ഭേദഗതി ബില്‍, ഡല്‍ഹി ഹൈക്കോടതി നിയമഭേദഗതി ബില്‍ എന്നിവയും ഓര്‍ഡിനന്‍സ് രൂപത്തില്‍ കൊണ്ടുവരികയെന്ന നിര്‍ദേശം സര്‍ക്കാരിന്റെ മുമ്പാകെയുണ്ട്.

സാമ്പത്തികവളര്‍ച്ച ചുരുങ്ങി

ന്യൂഡല്‍ഹി: ഡിസംബറില്‍ അവസാനിച്ച സാമ്പത്തികവര്‍ഷത്തിന്റെ മൂന്നാം പാദത്തില്‍ രാജ്യത്തിന്റെ വളര്‍ച്ച പ്രതീക്ഷിച്ചതിലും ചുരുങ്ങി. ആഭ്യന്തര മൊത്ത വരുമാനത്തില്‍(ജിഡിപി) 4.7 ശതമാനം വളര്‍ച്ചമാത്രമാണ് രേഖപ്പെടുത്തിയത്. 4.9 ശതമാനമെങ്കിലും വളര്‍ച്ചയാണ് പ്രതീക്ഷിച്ചത്. തുടര്‍ച്ചയായി ഏഴാമത്തെ പാദത്തിലാണ് അഞ്ച് ശതമാനത്തില്‍ താഴെ വളര്‍ച്ച. നിര്‍മാണമേഖല 1.9 ശതമാനം ചുരുങ്ങി. ഖനമേഖലയിലും വളര്‍ച്ചയില്ല; 1.6 ശതമാനം സങ്കോചിച്ചു. കാര്‍ഷികവളര്‍ച്ച 3.6 ശതമാനമായി കുറഞ്ഞു. തൊട്ടുമുമ്പുള്ള മൂന്ന് മാസത്തില്‍ ഇത് 4.6 ശതമാനമായിരുന്നു.

കിസാന്‍സഭ "കമീഷന്‍ രേഖകള്‍" പ്രകാശനം മൂന്നിന്

ന്യൂഡല്‍ഹി: അഖിലേന്ത്യ കിസാന്‍സഭ പ്രസിദ്ധീകരിക്കുന്ന "നവഉദാര പരിഷ്കാരങ്ങളും കര്‍ഷകപ്രതിരോധവും-കമീഷന്‍ രേഖകള്‍" എന്ന പുസ്തകം മാര്‍ച്ച് മൂന്നിന് പ്രകാശനം ചെയ്യും. വൈകിട്ട് 4.30ന് കേരളഹൗസ് കോണ്‍ഫറന്‍സ് ഹാളില്‍ ചേരുന്ന ചടങ്ങില്‍ കിസാന്‍സഭ വൈസ്പ്രസിഡന്റ് എസ് രാമചന്ദ്രന്‍പിള്ള പ്രകാശനം നിര്‍വഹിക്കും. അഖിലേന്ത്യ പ്രസിഡന്റ് അമ്രാറാം അധ്യക്ഷനാകും. വൈസ്പ്രസിഡന്റ് കെ വരദരാജന്‍, സിഐടിയു അഖിലേന്ത്യ പ്രസിഡന്റ് എ കെ പത്മനാഭന്‍ എന്നിവര്‍ സംബന്ധിക്കും

തെര. പത്രികയ്ക്ക് അന്തിമരൂപമാകും

ന്യൂഡല്‍ഹി: സിപിഐ എം പൊളിറ്റ്ബ്യൂറോ യോഗം ന്യൂഡല്‍ഹിയില്‍ ചേര്‍ന്നു. എ കെ ജി ഭവനില്‍ വെള്ളിയാഴ്ച വൈകിട്ട് നാലിനു ചേര്‍ന്ന യോഗത്തില്‍ എസ് രാമചന്ദ്രന്‍പിള്ള അധ്യക്ഷനായി. കേരളത്തില്‍നിന്നുള്ള പിബി അംഗങ്ങളായ പിണറായി വിജയന്‍, കോടിയേരി ബാലകൃഷ്ണന്‍, എം എ ബേബി എന്നിവര്‍ യോഗത്തില്‍ പങ്കെടുത്തു. കേന്ദ്രകമ്മിറ്റിയോഗം ശനി, ഞായര്‍ ദിവസങ്ങളില്‍ നടക്കും. ലോക്സഭാ തെരഞ്ഞെടുപ്പുമായി ബന്ധപ്പെട്ട വിഷയങ്ങളും പ്രകടനപത്രികയ്ക്ക് അന്തിമരൂപം നല്‍കലുമാണ് അജന്‍ഡ

ആര്‍വൈഎഫ് ദേശീയ സമ്മേളനം ഇന്ന് തുടങ്ങും

ന്യൂഡല്‍ഹി: ആര്‍വൈഎഫ് ദേശീയ സമ്മേളനത്തിന് ശനിയാഴ്ച തുടക്കമാകും. മാര്‍ച്ച് മൂന്നുവരെ ഡല്‍ഹിയിലാണ് സമ്മേളനം. ശനിയാഴ്ച ദേശീയകമ്മിറ്റി ചേരും. പ്രതിധിധി സമ്മേളനം ഞായറാഴ്ച രാവിലെ പത്തിന് ആര്‍എസ്പി ജനറല്‍ സെക്രട്ടറി ടി ജെ ചന്ദ്രചൂഡന്‍ ഉദ്ഘാടനംചെയ്യും. തൊഴിലില്ലായ്മ പരിഹരിക്കാന്‍ യുപിഎ സര്‍ക്കാര്‍ ഒന്നും ചെയ്തിട്ടില്ലെന്നും ഇക്കാര്യം സമ്മേളനത്തില്‍ ചര്‍ച്ചചെയ്യുമെന്നും ജനറല്‍ സെക്രട്ടറി അഡ്വ. കെ സണ്ണിക്കുട്ടി, സെക്രട്ടറി കോവൂര്‍ കുഞ്ഞുമോന്‍ എന്നിവര്‍ വാര്‍ത്താ സമ്മേളനത്തില്‍ പറഞ്ഞു.

deshabhimani

കെജ്രിവാള്‍ അധികാര മോഹി: ഹസാരെ

ആം ആദ്മിയില്‍ അഭിപ്രായ ഭിന്നത

ന്യൂഡല്‍ഹി: തെരഞ്ഞെടുപ്പ് അടുത്തതോടെ ആം ആദ്മി പാര്‍ടിയിലും അഭിപ്രായവ്യത്യാസങ്ങള്‍ പുകയുന്നു. പാര്‍ടിയുടെ മുതിര്‍ന്ന നേതാവ് യോഗേന്ദ്ര യാദവിന്റെ സ്ഥാനാര്‍ഥിത്വവും മുന്‍മുഖ്യമന്ത്രി അരവിന്ദ് കെജ്രിവാള്‍ അടക്കമുള്ള എംഎല്‍എമാര്‍ മത്സരിക്കണമെന്ന നിര്‍ദേശവുമാണ് പാര്‍ടിയില്‍ അഭിപ്രായവ്യത്യാസം രൂക്ഷമാക്കിയത്. ഹരിയാനയിലെ ഗുഡ്ഗാവില്‍നിന്ന് മത്സരിക്കാനാണ് യോഗേന്ദ്രയാദവ് തയ്യാറെടുക്കുന്നത്. എന്നാല്‍, തൊഴിലാളികളും സാധാരണക്കാരും ഏറെയുള്ള മണ്ഡലമാണ് ഗുഡ്ഗാവ്. ഡല്‍ഹിയില്‍ പാര്‍ടിയെ അധികാരത്തില്‍ എത്തിക്കുന്നതില്‍ നിര്‍ണായക പങ്കു വഹിച്ച തങ്ങള്‍ക്കിടയില്‍നിന്ന് ഒരാള്‍ സ്ഥാനാര്‍ഥിയാകണമെന്നാണ് ഇവരുടെ ആവശ്യം. ഇക്കാര്യം അറിയിച്ച് പാര്‍ടി നേതൃത്വത്തിന് കത്ത് നല്‍കിയിട്ടുമുണ്ട്. അനുകൂല തീരുമാനമെടുക്കാന്‍ തയ്യാറായില്ലെങ്കില്‍ ഹരിയാനയില്‍ ആം ആദ്മി പാര്‍ടിയുടെ ഭാവി പരുങ്ങലിലാകുമെന്നും കത്തില്‍ പറയുന്നു.

സ്ഥാനാര്‍ഥിത്വത്തിന് അപേക്ഷിക്കാനുള്ള അവസാന തീയതി ജനുവരി 31 ആയിരുന്നു. എന്നാല്‍, അഷുതോഷ് ഗുപ്ത, കുമാര്‍ വിശ്വാസ്, മേധ പട്കര്‍ തുടങ്ങിയവര്‍ ഈ സമയപരിധിക്ക് മുമ്പ് അപേക്ഷിച്ചിരുന്നോ എന്ന് അന്വേഷിക്കണമെന്നും കത്തില്‍ ആവശ്യപ്പെടുന്നു. മാര്‍ച്ച് അഞ്ചിന് റാലി സംഘടിപ്പിക്കുമെന്നും ഇതിന് ശേഷം പിന്തുണ നല്‍കുന്ന കാര്യത്തില്‍ തീരുമാനമെടുക്കുമെന്നുമാണ് ഇവരുടെ നിലപാട്.

കെജ്രിവാള്‍ അധികാര മോഹി: ഹസാരെ

ന്യൂഡല്‍ഹി: അരവിന്ദ് കെജ്രിവാള്‍ അധികാരമോഹിയാണെന്ന് അണ്ണ ഹസാരെ. ആം ആദ്മി പാര്‍ടിയും മറ്റ് പാര്‍ടികളും തമ്മില്‍ ഒരു വ്യത്യാസവുമില്ലെന്നും ഹസാരെ കുറ്റപ്പെടുത്തി. ലോക്സഭാ തെരഞ്ഞെടുപ്പില്‍ മമത ബാനര്‍ജിയെ പിന്തുണയ്ക്കാനുള്ള തീരുമാനം വിശദീകരിച്ച് ഇറക്കിയ പത്രക്കുറിപ്പിലാണ് വിമര്‍ശം. ലോക്സഭാ തെരഞ്ഞെടുപ്പില്‍ പിന്തുണയ്ക്കാന്‍ 17 നിര്‍ദേശങ്ങള്‍ മുന്നോട്ടുവച്ച് ആം ആദ്മി പാര്‍ടിയടക്കമുള്ള രാഷ്ട്രീയ പാര്‍ടികള്‍ക്ക് കത്തുനല്‍കിയിരുന്നു. മമത ബാനര്‍ജി മാത്രമാണ് പ്രതികരിച്ചതെന്നും അതിനാലാണ് പിന്തുണച്ചതെന്നും ഹസാരെ വിശദീകരിക്കുന്നു. അധികാരത്തെക്കുറിച്ച് മാത്രമാണ് കെജ്രിവാള്‍ ചിന്തിക്കുന്നതെന്നും ഹസാരെ കുറ്റപ്പെടുത്തി.

deshabhimani

ഗുല്‍ബര്‍ഗ ഡിവിഷന്‍: കേരളത്തിന് തിരിച്ചടി

പാലക്കാട് ഡിവിഷന്‍ വിഭജിച്ച് ഗുല്‍ബര്‍ഗയില്‍ പുതിയ റെയില്‍വേ ഡിവിഷന്‍ രൂപീകരിക്കാനുള്ള കേന്ദ്രതീരുമാനം കേരളത്തിന് വന്‍ ആഘാതമാകും. കേന്ദ്രമന്ത്രിസഭയില്‍ കേരളത്തില്‍ നിന്ന് റെക്കോഡ് പ്രാതിനിധ്യം ഉണ്ടായിട്ടും സ്വന്തം സോണെന്ന ദീര്‍ഘകാല ആവശ്യം നടക്കില്ലെന്നുറപ്പായി. യാത്രാ ദുരിതത്തിനും പരിഹാരമില്ല. 1958ല്‍ പാലക്കാട് ഡിവിഷന്‍ രൂപീകരിച്ചപ്പോള്‍ 1247 കിലോമീറ്ററുണ്ടായിരുന്നത് 2007ല്‍ സേലം ഡിവിഷന്‍ വന്നപ്പോള്‍ 548 കിലോമീറ്ററായി. കര്‍ണാടകത്തില്‍നിന്നുള്ള മല്ലികാര്‍ജുന്‍ ഖാര്‍ഗെയ്ക്ക് റെയില്‍മന്ത്രാലയത്തിന്റെ ചുമതല ലഭിച്ചതോടെ പാലക്കാടിനെ വീണ്ടും വെട്ടിമുറിക്കാനുള്ള നീക്കം ശക്തമായി. ഇപ്പോള്‍ പാലക്കാട് ഡിവിഷന്‍ പരിധിയില്‍വരുന്ന ഭാഗങ്ങളും ഉള്‍പ്പെടുത്തിയാണ് ഗുല്‍ബര്‍ഗ ആസ്ഥാനമായി പുതിയ ഡിവിഷന്‍ രൂപീകരിക്കുക.

തിരുവനന്തപുരം ഡിവിഷന്റെ ഭാഗമായ കന്യാകുമാരി-തിരുനല്‍വേലി-നാഗര്‍കോവില്‍ പാത മധുര ഡിവിഷനു നല്‍കാനും ആലോചനയുണ്ട്. ഇതുകൂടി ആയാല്‍ ഒറ്റഡിവിഷന്‍ എന്ന സ്ഥിതിയില്‍ കേരളം വൈകാതെ എത്തും. കേരളത്തില്‍ ആകെയുള്ള ട്രാക്ക് ദൈര്‍ഘ്യം 1588 കിലോമീറ്ററാണ്. തിരുവനന്തപുരം, പാലക്കാട് ഡിവിഷനുകളിലായി 156 എക്സ്പ്രസ് ട്രെയിനുകളും 109 പാസഞ്ചര്‍ ട്രെയിനുകളും പ്രതിദിനം ഓടുന്നു. അഞ്ച് ലക്ഷം യാത്രക്കാരുമുണ്ട്. ദക്ഷിണറെയില്‍വേയുടെ വരുമാനത്തിന്റെ മൂന്നിലൊന്നും സംഭാവനചെയ്യുന്നത് ഈ ഡിവിഷനുകളാണ്.എന്നാല്‍, തിരക്കിന് അനുസരിച്ച് ട്രെയിനുകള്‍ ഓടിക്കാനോ മെച്ചപ്പെട്ട ബോഗികള്‍ കൊണ്ടുവരാനോ അടിസ്ഥാനസൗകര്യത്തിനോ കഴിയുന്നില്ല. പുതിയ ട്രെയിനുകള്‍ പ്രഖ്യാപനത്തിലൊതുങ്ങുന്നു.

deshabhimani

ആന്റണിയുടെ പിടിപ്പുകേട് സേനയെ ദുരവസ്ഥയിലാക്കി

ഇന്ത്യന്‍ നാവികസേന നേരിടുന്ന ദുരവസ്ഥയ്ക്കു കാരണം പ്രതിരോധമന്ത്രി എ കെ ആന്റണിയുടെ പിടിപ്പുകേട്. ഏഴ് മാസത്തിനുള്ളില്‍ നാവികസേനയുടെ യാനങ്ങളില്‍ 10 അപകടങ്ങളാണ് സംഭവിച്ചത്. ഇരുപതില്‍പ്പരം സൈനികരുടെ ജീവന്‍ പൊലിഞ്ഞു. കഴിഞ്ഞദിവസം ഐഎന്‍എസ് സിന്ധുരത്നയില്‍ ഉണ്ടായ അപകടത്തിന്റെ ഉത്തരവാദിത്തം ഏറ്റെടുത്ത് നാവികസേന തലവന്‍ അഡ്മിറല്‍ ഡി കെ ജോഷി രാജിവച്ചുവെങ്കിലും അടിക്കടിയുണ്ടാകുന്ന ദുരന്തങ്ങള്‍ യഥാര്‍ഥത്തില്‍ പ്രതിക്കൂട്ടിലാക്കുന്നത് പ്രതിരോധമന്ത്രിയെയാണ്.

നാവികസേനയുടെ ആയുധബലം ആശങ്കാജനകമായ നിലയിലാണെന്ന് 2008-09ലെയും 2010-11ലെയും സിഎജി റിപ്പോര്‍ട്ടുകളില്‍ ചൂണ്ടിക്കാണിച്ചിരുന്നു; അന്തര്‍വാഹിനികള്‍ ഉള്‍പ്പെടെ പല സംവിധാനങ്ങളും കാലപ്പഴക്കം വന്നവയാണ്. അറ്റകുറ്റപ്പണികളും സ്പെയര്‍പാര്‍ട്സുകളുടെ വാങ്ങലും വൈകുന്നു, വാങ്ങാന്‍ തീരുമാനിച്ചവ ആവശ്യത്തിന് ഉതകുന്നവയല്ല. എന്നാല്‍, 2006 ഒക്ടോബര്‍ മുതല്‍ പ്രതിരോധമന്ത്രിസ്ഥാനത്തുള്ള എ കെ ആന്റണി ഈ റിപ്പോര്‍ട്ടുകള്‍ അവഗണിച്ചു. പ്രതിരോധ ഇടപാടുകളില്‍ അഴിമതി വ്യാപകമാണെന്ന് പ്രഖ്യാപിച്ച ആന്റണി അഴിമതി തടയാനുളള ഉറച്ച നടപടിക്കു പകരം രാജ്യസുരക്ഷയെതന്നെ അപകടത്തിലാക്കു വിധം ആയുധസംഭരണം നിര്‍ത്തിവച്ചു. അതേസമയം, ഇറ്റലിയില്‍നിന്ന് അഗസ്ത വെസ്റ്റ്ലാന്‍ഡ് ഹെലികോപ്റ്റര്‍ വാങ്ങാനുള്ള നടപടി കോഴക്കേസില്‍ കുടുങ്ങുകയുംചെയ്തു.

നവീകരണത്തിന്റെ കാര്യത്തില്‍ നാവികസേന ഏറെ പിന്നിലാണെന്നും സേനയുടെ ഗുണനിലവാരം താരതമ്യേന മോശമാണെന്നും സിഎജി ചൂണ്ടിക്കാണിച്ചിരുന്നു. 15 യുദ്ധക്കപ്പലുകളും 13 അന്തര്‍വാഹിനികളും ഉള്‍പ്പെടെ 120 യാനങ്ങളാണ് നാവികസേനയുടെ കൈമുതല്‍. ഇതില്‍ രണ്ട് വിമാനവാഹിനിക്കപ്പലുകള്‍ പൂര്‍ണമായും പ്രവര്‍ത്തനസജ്ജമല്ല. നാവികസേനയുടെ വ്യോമയാനവിഭാഗത്തിലെ മൂന്നില്‍ രണ്ട് വിമാനങ്ങളും അറ്റകുറ്റപ്പണി ആവശ്യമുള്ളവയാണെന്ന് റിപ്പോര്‍ട്ടില്‍ പറഞ്ഞു. മാത്രമല്ല, ഇവ കൈകാര്യംചെയ്യാന്‍ ഫലപ്രദമായ സംവിധാനം വേണം. സാങ്കേതികവിദ്യയും കാലോചിതമായി പരിഷ്കരിക്കണം. വെല്ലുവിളികളെ നേരിടുന്നതില്‍ സേനയുടെ ദൗര്‍ബല്യം പ്രകടമാണെന്നും സിഎജി റിപ്പോര്‍ട്ടില്‍ വ്യക്തമാക്കി. കരസേനയുടെയും വ്യോമസേനയുടെയും സ്ഥിതി വ്യത്യസ്തമല്ല. ആയുധങ്ങള്‍ക്ക് പഴക്കമേറുകയാണെന്ന് കാണിച്ചും ഇവ നവീകരിക്കുന്നതില്‍ നേരിടുന്ന കാലതാമസത്തില്‍ നിരാശ പ്രകടിപ്പിച്ചും മൂന്ന് സേനാമേധാവികളും സര്‍ക്കാരിന് മുന്നറിയിപ്പ് നല്‍കിയ വിവരം ജോഷിയുടെ രാജിയോടെ പുറത്തായിട്ടുണ്ട്.

വ്യോമസേനയുടെ പ്രവര്‍ത്തനക്ഷമമായ പോര്‍വിമാനങ്ങളുടെ എണ്ണം ഉടന്‍തന്നെ അപകടകരമായ തോതില്‍ ചുരുങ്ങും. കരസേനയുടെ ആയുധശേഷി അപര്യാപ്തമാണെന്ന് ചൂണ്ടിക്കാണിച്ച് 2013 മാര്‍ച്ച് 12ന് അന്നത്തെ കരസേന മേധാവി വി കെ സിങ് പ്രധാനമന്ത്രി മന്‍മോഹന്‍സിങ്ങിന് കത്തയച്ചിരുന്നു. ആയുധബലം മറ്റ് രാജ്യങ്ങളെ ആക്രമിക്കാന്‍മാത്രം ഉദ്ദേശിച്ചുള്ളതല്ലെന്നും ഇങ്ങോട്ടുള്ള ആക്രമണം ഒഴിവാക്കാനുള്ള തന്ത്രം കൂടിയാണെന്നും പ്രതിരോധവിദഗ്ധര്‍ ചൂണ്ടിക്കാട്ടുന്നു. അഴിമതിഒഴിവാക്കാനെന്ന പേരില്‍ ആയുധസംഭരണം മുടക്കുന്നത് കടുത്ത വീഴ്ചയാണ്. പ്രതിരോധമന്ത്രിയുടെ പരാജയമാണ് ഇതില്‍ വ്യക്തമാകുന്നത്. അഡ്മിറല്‍ ഡി കെ ജോഷിയുടെ രാജിയോടെ എ കെ ആന്റണി അധികാരത്തില്‍ തുടരുന്നതിന്റെ ധാര്‍മികതയാണ് ചോദ്യംചെയ്യപ്പെട്ടിരിക്കുന്നത്.

സാജന്‍ എവുജിന്‍ deshabhimani

മണ്ഡലം മറന്ന സുധാകരന്‍ രണ്ടാമൂഴത്തിന്

കണ്ണൂര്‍: ഒരുവട്ടംകൂടി ലോക്സഭാ തെരഞ്ഞെടുപ്പ് ഗോദയിലിറങ്ങാനുള്ള കെ സുധാകരന്റെ നീക്കത്തില്‍ കോണ്‍ഗ്രസ് അണികളിലും മുറുമുറുപ്പ്. സ്ഥാനാര്‍ഥി പട്ടികയ്ക്ക് കോണ്‍ഗ്രസ് നേതൃത്വം രൂപം നല്‍കിയിട്ടില്ലെങ്കിലും ഉറപ്പിച്ച മട്ടിലാണ് സുധാകരന്‍. അടുപ്പമുള്ള ചില മാധ്യമങ്ങളില്‍ ഇതിനായി നിരന്തരം വാര്‍ത്ത വരുത്തുന്നുമുണ്ട്. എംപിയെന്ന നിലയില്‍ സമ്പൂര്‍ണ പരാജയമായിരുന്ന സുധാകരന്‍ വീണ്ടും രംഗത്തുവരുന്നതില്‍ കോണ്‍ഗ്രസ് പ്രവര്‍ത്തകരില്‍ കടുത്ത അമര്‍ഷമുണ്ട്. കോണ്‍ഗ്രസിന് മറ്റാരെയും കിട്ടാനില്ലേയെന്ന് പൊതുജനങ്ങളും ചോദിക്കുന്നു.

ജനപ്രതിനിധികളെക്കുറിച്ച് നമുക്ക് സാമാന്യമായ ചില ധാരണകളുണ്ട്. സഭയിലെയും മണ്ഡലത്തിലെയും സജീവ സാന്നിധ്യം, നാടിന്റെയും ജനങ്ങളുടെയും നീറുന്ന പ്രശ്നങ്ങള്‍ സഭയിലോ, അധികൃതര്‍ക്കുമുന്നിലോ ഫലപ്രദമായി ഉന്നയിച്ച് പരിഹാരം തേടുന്നതിലുള്ള ആത്മാര്‍ഥത, വികസന- ക്ഷേമ പ്രവര്‍ത്തനങ്ങളിലെ മുന്‍കൈ, ജനങ്ങളെ ബാധിക്കുന്ന പൊതുപ്രശ്നങ്ങളിലെ നേതൃപരമായ ഇടപെടല്‍- ഇതൊക്കെയാണ് ജനപ്രതിനിധിയില്‍നിന്ന് നാട്ടുകാര്‍ പ്രതീക്ഷിക്കുന്നത്. പാര്‍ലമെന്റ് അംഗമാകുമ്പോള്‍ ഉത്തരവാദിത്വം കുറേക്കൂടി വര്‍ധിക്കും. എന്നാല്‍ ഇവിടെയെല്ലാം തികഞ്ഞ പരാജയമായിരുന്നു സുധാകരന്‍.

പാര്‍ലമെന്റില്‍ പോകാത്ത പാര്‍ലമെന്റ് മെമ്പറെന്നത് സുധാകരനെക്കുറിച്ചുള്ള കേവലമായ ആക്ഷേപമല്ല. പാര്‍ലമെന്റ് രേഖകള്‍ ഇക്കാര്യം അടിവരയിടുന്നു. ലോക്സഭയിലെ ഹാജര്‍നില 65 ശതമാനം മാത്രമാണ്. ആകെയുള്ള 543 അംഗങ്ങളില്‍ 411-ാം സ്ഥാനം. ദേശീയ ശരാശരി 76 ശതമാനവും കേരളത്തില്‍നിന്നുള്ള എംപിമാരുടെ ശരാശരി 79 ശതമാനവുമായിരിക്കെയാണ് സുധാകരന്റെ ഈ ദയനീയ പ്രകടനം. എല്‍ഡിഎഫ് എംപിമാരായ എംബി രാജേഷിന് 93 ശതമാനവും പി കെ ബിജുവിന് 86 ശതമാനവും എ സമ്പത്തിന് 77 ശതമാനവും പി കരുണാകരന് 76 ശതമാനവും ഹാജരുണ്ട്.

പാര്‍ലമെന്റിലെ പ്രകടനം നോക്കിയാലും സുധാകരന്‍ ഈ പണിക്ക് പറ്റിയ ആളല്ലെന്ന് ബോധ്യമാകും. അഞ്ചു വര്‍ഷത്തിനിടെ സുധാകരന്‍ ചര്‍ച്ചയില്‍ പങ്കെടുത്തത് 13 തവണ. ഒറ്റ സ്വകാര്യ ബില്ലും അവതരിപ്പിച്ചിട്ടില്ല. 292 ചോദ്യങ്ങളാണ് സുധാകരന്റെ ഓഫീസില്‍നിന്ന് എഴുതിക്കൊടുത്തത്. ചോദ്യങ്ങളുടെ സംസ്ഥാന ശരാശരി 398 ആണ്. പി കരുണാകരന്‍- 557, എം ബി രാജേഷ്- 493, പി കെ ബിജു- 436, എ സമ്പത്ത്- 386 എന്നിങ്ങനെയാണ് എല്‍ഡിഎഫ് എംപിമാരുടെ ചോദ്യങ്ങളുടെ എണ്ണം. ഗാഡ്ഗില്‍- കസ്തൂരിരംഗന്‍ റിപ്പോര്‍ട്ടുകള്‍, റബര്‍ വിലയിടിവ്, പാചക വാതക വിലവര്‍ധന, ചാലയില്‍ ഇരുപതു പേരുടെ ജീവനപഹരിച്ച ടാങ്കര്‍ ദുരന്തം എന്നിങ്ങനെ കണ്ണൂര്‍ മണ്ഡലത്തിലെ ജനങ്ങളുമായി ബന്ധപ്പെട്ട ഒരു പ്രശ്നത്തിലും സുധാകരന്‍ ഇടപെട്ടില്ല.

deshabhimani

കെഎസ്ആര്‍ടിസിയില്‍ 10,000 പേര്‍ പുറത്താകും

പുനരുദ്ധാരണ പാക്കേജിന്റെ മറവില്‍ സ്വകാര്യവല്‍ക്കരണ നടപടികള്‍ സുഗമമാക്കുന്നതിന്റെ ഭാഗമായി കെഎസ്ആര്‍ടിസിയിലെ പതിനായിരത്തിലധികം തൊഴിലാളികളെ പുറത്താക്കും. പുനുരുദ്ധാരണ പാക്കേജ് എന്ന പേരില്‍ സര്‍ക്കാര്‍ അംഗീകാരം നല്‍കിയ സ്വകാര്യവല്‍ക്കരണ നയരേഖയുടെ മറവിലാണ് നീക്കം. കോര്‍പറേഷന്റെ ഇപ്പോഴത്തെ പ്രതിസന്ധി മുതലെടുത്ത് ജീവനക്കാരുടെ എണ്ണം വെട്ടിക്കുറയ്ക്കുന്നതിനൊപ്പം അമിതജോലിഭാരം അടിച്ചേല്‍പ്പിക്കുകയും ചെയ്യും. പിഎസ്സി അഡൈ്വസ് മെമ്മോ ചെയ്തവര്‍ക്കും ഇനി നിയമനം നല്‍കില്ല. കോര്‍പറേഷനിലെ ബസ്, തൊഴിലാളി അനുപാതം 1: 7.8 ആണെന്ന് സര്‍ക്കാര്‍ അവകാശപ്പെടുന്നു. പുനരുദ്ധാരണത്തിന്റെ ഭാഗമായി ഇത് 1: 5.5 ആയി കുറയ്ക്കണമെന്നാണ് ആവശ്യം. ഇതിനായി നിറംപിടിപ്പിച്ച കണക്കുകളോടെ റിപ്പോര്‍ട്ട് തയ്യാറാക്കുകയായിരുന്നു.

പാക്കേജിലെ കണക്കനുസരിച്ച് 35,000 സ്ഥിരം തൊഴിലാളികളുണ്ട്. 9,801 താല്‍ക്കാലിക ജീവനക്കാരെ പുറംകരാര്‍ തൊഴിലിന്റെ സ്വഭാവത്തില്‍ നിയമിച്ചിട്ടുണ്ട്്. ഇവര്‍ക്ക് അവധി ആനുകൂല്യങ്ങളടക്കം ഒന്നും ലഭ്യമല്ല. ജോലിയുള്ള ദിവസത്തെ കൂലിമാത്രം നല്‍കുന്നു. പാക്കേജില്‍ എം-പാനല്‍, താല്‍ക്കാലിക തൊഴിലാളികളെയും ഉള്‍പ്പെടുത്തി ബസ്- തൊഴിലാളി അനുപാതം നിശ്ചയിച്ചു. ജീവനക്കാരുടെ എണ്ണം കുറയ്ക്കാനായി കണക്കില്‍ വെള്ളം ചേര്‍ത്തു. സുരക്ഷ, സാനിറ്ററി, അറ്റകുറ്റപ്പണി മേഖലയിലെ താല്‍ക്കാലിക തൊഴിലാളികളെയും സ്ഥിരം ജീവനക്കാരായി കണക്കാക്കി ബസ്-തൊഴിലാളി അനുപാതം നിര്‍ണയിക്കുകയായിരുന്നു. നിലവില്‍ അനുവദിച്ച 5,621 ഷെഡ്യൂളും 35,000 ജീവനക്കാരും എന്ന കണക്കനുസരിച്ച് അനുപാതം 6.22 ആണ്. അനുപാതം 7.8 ആയി പെരുപ്പിച്ചുകാട്ടിയതിലൂടെ കുറഞ്ഞത് പതിനായിരം പേര്‍ പുറത്താകും. തൊഴിലാളികളുടെ ജോലിഭാരം വര്‍ധിപ്പിക്കണമെന്നും എല്ലാ സര്‍വീസുകളുടെയും ദൈര്‍ഘ്യം വര്‍ധിപ്പിക്കണമെന്നതും ശുപാര്‍ശയിലുണ്ട്.

അധികഡ്യൂട്ടിക്ക് അലവന്‍സ് മാത്രം നല്‍കും. അധികഡ്യൂട്ടി കണക്കാക്കല്‍ ഇല്ലാതാക്കും. എല്ലാ ജീവനക്കാര്‍ക്കും എം-പാനല്‍ കൂലി നടപ്പാക്കുന്നതിന്റെ ഭാഗമായ നടപടിയാണിത്. പ്രതിസന്ധിയുടെ പേരില്‍ വികസന പദ്ധതികള്‍ ഉപേക്ഷിച്ചതോടെ കോര്‍പറേഷനില്‍ സമ്പൂര്‍ണ നിയമന നിരോധനം നടപ്പാക്കി. മൂന്നുവര്‍ഷത്തെ പ്രതീക്ഷിത ഒഴിവുകൂടി കണക്കിലെടുത്ത് 9,300 കണ്ടക്ടര്‍ ഒഴിവ് പിഎസ്സിക്ക് റിപ്പോര്‍ട്ട് ചെയ്തിരുന്നു. ഇത്രയും പേര്‍ക്ക് പിഎസ്്സി അഡൈ്വസ് മെമ്മോ അയച്ചു. എന്നാല്‍, 3,000 പേര്‍ക്കാണ് കോര്‍പറേഷന്‍ നിയമനം നല്‍കിയത്. 3,808 ഒഴിവേയുള്ളൂവെന്നാണ് മാനേജ്മെന്റ് വാദം. നിലവിലെ ഷെഡ്യൂള്‍ വെട്ടിക്കുറയ്ക്കുന്നതും, പുതിയ ഷെഡ്യൂള്‍ ആരംഭിക്കാത്തതുമാണ് കാരണം. എല്‍ഡിഎഫ് സര്‍ക്കാരിന്റെ കാലത്ത് പ്രതിവര്‍ഷം 500 പുതിയ ഷെഡ്യൂള്‍ ഉറപ്പാക്കിയതിലൂടെ 20,000 പേര്‍ക്കാണ് കോര്‍പറേഷനില്‍ നിയമനം ലഭിച്ചത്.

ജി രാജേഷ്കുമാര്‍

കെഎസ്ആര്‍ടിസിയില്‍ ശമ്പളവും വൈകി

തിരു: കെഎസ്ആര്‍ടിസിയില്‍ ശമ്പളവും അനിശ്ചിതത്വത്തില്‍. മാസത്തിലെ അവസാന പ്രവൃത്തിദിവസമായ വെള്ളിയാഴ്ച ജീവനക്കാര്‍ക്ക് ലഭിക്കേണ്ട ശമ്പളം വൈകിയും കിട്ടിയില്ല. ജീവനക്കാരുടെ പ്രതിഷേധം ശക്തമാകുന്നതിനിടെ മാനേജ്മെന്റ് ഇടപെട്ട് ശമ്പളം ജീവനക്കാരുടെ ബാങ്ക് അക്കൗണ്ടിലേക്ക് അയച്ചതായി അറിയിച്ചു. എന്നാല്‍, പലരുടെയും ശമ്പളം അക്കൗണ്ടില്‍ എത്തിയിട്ടില്ല. പെന്‍ഷന്‍ രണ്ടുമാസമായി കുടിശ്ശിക ആയതിനുപിന്നാലെയാണ് ശമ്പളവും വൈകിപ്പിച്ചത്.

സര്‍ക്കാര്‍ അനുവദിച്ച തുക സമയത്ത് ലഭിക്കാത്തതാണ് പ്രതിസന്ധിക്ക് കാരണം. 100 കോടി രൂപ സഹായം സര്‍ക്കാര്‍ പ്രഖ്യാപിച്ചിരുന്നു. ഈ മാസം 50 കോടിയും അടുത്ത രണ്ടുമാസം 25 കോടി വീതവും നല്‍കുമെന്നാണ് പറഞ്ഞത്. എന്നാല്‍, വെള്ളിയാഴ്ചയും ഈ മാസത്തെ തുക കോര്‍പറേഷന് ലഭിച്ചില്ല. 40 കോടി രൂപയാണ് ശമ്പളവിതരണത്തിന് ആവശ്യം. പെന്‍ഷന്‍ കുടിശ്ശികയ്ക്ക് 21 കോടിയും. സര്‍ക്കാര്‍ പ്രഖ്യാപിച്ച സഹായം ലഭിച്ചാലും 11 കോടിയില്‍പരം രൂപ കണ്ടെത്തിമാത്രമേ പെന്‍ഷനടക്കം വിതരണം ചെയ്യാനാകൂ. വെള്ളിയാഴ്്ച വൈകിയും ശമ്പളം ലഭിക്കാഞ്ഞതിനാല്‍ ഹരിപ്പാട്, കോഴിക്കോട് തുടങ്ങി വിവിധ ഡിപ്പോകളില്‍ ജീവനക്കാര്‍ മിന്നല്‍ പണിമുടക്കിലേക്ക് നീങ്ങി. അസോസിയേഷന്‍ നേതൃത്വം ഇടപെട്ടാണ് ജീവനക്കാരെ പിന്തിരിപ്പിച്ചത്. കെഎസ്ആര്‍ടിസി ജീവനക്കാര്‍ക്ക് ശമ്പളവും പെന്‍ഷന്‍ കുടിശ്ശികയും വിതരണംചെയ്തശേഷമേ താന്‍ ശമ്പളം വാങ്ങൂവെന്ന് ഗതാഗതമന്ത്രി അവകാശപ്പെട്ടിരുന്നു.

പണിമുടക്ക് തുടങ്ങി

തിരു: വെള്ളിയാഴ്ച അര്‍ധരാത്രി മുതല്‍ തൊഴിലാളികള്‍ ഒന്നടങ്കം പണിമുടക്കിയതിനെത്തുടര്‍ന്ന് കെഎസ്ആര്‍ടിസി ബസ് സര്‍വീസ് നിലച്ചു. ബസുകളൊന്നും ഓടുന്നില്ല. ശനിയാഴ്ച അര്‍ധരാത്രിവരെ പണിമുടക്ക് തുടരും.

സ്റ്റാറ്റ്യൂട്ടറി പെന്‍ഷന്‍ സംരക്ഷിക്കുക, പെന്‍ഷന്‍ കുടിശ്ശിക തീര്‍ത്ത് യഥാസമയം വിതരണംചെയ്യുക, കോര്‍പറേഷന്റെ താല്‍പ്പര്യങ്ങള്‍ക്ക് വിരുദ്ധവും തൊഴിലാളിവിരുദ്ധവുമായ പുനരുദ്ധാരണ പാക്കേജ് നടപ്പാക്കാനുള്ള സര്‍ക്കാര്‍ ഉത്തരവ് പിന്‍വലിക്കുക, ദേശസാല്‍കൃത-അന്തര്‍സംസ്ഥാന റൂട്ടുകള്‍ സംരക്ഷിക്കുക തുടങ്ങിയ ആവശ്യങ്ങള്‍ ഉന്നയിച്ചാണ്് സൂചനാപണിമുടക്ക്.

കെഎസ്ആര്‍ടി എംപ്ലോയീസ് അസോസിയേഷന്‍ (സിഐടിയു) എഐടിയുസി, ടിഡിഎഫ്, ബിഎംഎസ്, ലേബര്‍ യൂണിയന്‍ തുടങ്ങി കോര്‍പറേഷനിലെ ഭൂരിപക്ഷം സംഘടനകളും സമരരംഗത്താണ്. പണിമുടക്കിയ തൊഴിലാളികളും ജീവനക്കാരും വെള്ളിയാഴ്ച രാത്രി വിവിധ കേന്ദ്രങ്ങളില്‍ പ്രകടനം നടത്തി. ശനിയാഴ്ച രാവിലെ 10ന് എല്ലാ ഡിപ്പോ കേന്ദ്രങ്ങളിലും തലസ്ഥാനത്ത് സെക്രട്ടറിയറ്റിനു മുമ്പിലും പ്രകടനം നടക്കും. അതിനിടെ പണിമുടക്ക് നേരിടാന്‍ കെഎസ്ആര്‍ടിസി എംഡി ഡയസ്നോണ്‍ പ്രഖ്യാപിച്ചു.

deshabhimani