അമേരിക്കയിലെ വിര്‍ജീനിയ ആസ്ഥാനമായ അഡ്വന്റ്ഫോര്‍ട്ട് കമ്പനിയുടെ ഉടമസ്ഥതയിലുള്ള എംവി സീമാന്‍ ഗാര്‍ഡ് ഒഹിയോ എന്ന ചരക്ക് കപ്പലാണ് വെള്ളിയാഴ്ച കന്യാകുമാരി തീരത്ത് വച്ച് തീരരക്ഷാസേന വളഞ്ഞിട്ട് പിടിച്ചത്. വിശദപരിശോധനകള്‍ക്ക് ശേഷം തിങ്കളാഴ്ചയാണ് കേസെടുത്തത്. 31 യന്ത്രത്തോക്കും അയ്യായിരത്തോളം റൗണ്ട് തിരയും കപ്പലില്‍ നിന്ന് കണ്ടെത്തി. പ്രാദേശികഏജന്റ് വഴി ഇന്ത്യയില്‍ നിന്നും 1500 ലിറ്റര്‍ ഡീസല്‍ അനധികൃതമായി വാങ്ങാന്‍ ശ്രമിച്ചതിന് അവശ്യവസ്തു നിയമപ്രകാരവും കേസെടുത്തു. കപ്പലില്‍ പത്ത് ജീവനക്കാരും(രണ്ട് യുക്രയിന്‍കാരും എട്ട് ഇന്ത്യക്കാരും) 25 സായുധരായ സുരക്ഷാ ഉദ്യോഗസ്ഥരുമുണ്ട്.(ആറ് ബ്രിട്ടീഷ്, 14 എസ്തോണിയ, 1 യുക്രയിന്‍, 4 ഇന്ത്യക്കാര്‍) ഇന്ത്യന്‍ മഹാസമുദ്രത്തില്‍ കടല്‍ക്കൊള്ളക്കാരുടെ ശല്യമുള്ള മേഖലയിലൂടെ സഞ്ചരിക്കുന്ന കപ്പലുകള്‍ക്ക് സായുധസുരക്ഷ ഒരുക്കുന്നതിന്റെ ചുമതലയുള്ള കമ്പനിയുടേതാണ് കപ്പലെന്നാണ് ക്യാപ്റ്റന്റെ വിശദീകരണം. എന്നാല്‍, ഇത് സാധൂകരിക്കാനുള്ള രേഖകളോ സാക്ഷ്യപത്രങ്ങളോ ഇവരുടെ കൈവശമില്ലെന്ന് ഉദ്യോഗസ്ഥര്‍ അറിയിച്ചു. തൂത്തുക്കുടി തുറമുഖത്ത് എത്തിച്ച കപ്പലിലെ ജീവനക്കാരെ തീരരക്ഷാസേന, നാവികസേന, കസ്റ്റംസ് ഇന്റലിജന്‍സ് ഉദ്യോഗസ്ഥര്‍ ചോദ്യംചെയ്തുവരുന്നു. കപ്പലിന്റെ യഥാര്‍ഥ ലക്ഷ്യം ഇതുവരെ കണ്ടെത്താനായില്ല.
deshabhimani
No comments:
Post a Comment