യുഎസ് ജനപ്രതിധിനി സഭയില് സ്പീക്കറായ റിപ്പബ്ലിക്കന് നേതാവ് ജോണ് ബീനറുമായി ഒബാമ ടെലിഫോണില് സംസാരിച്ചു. ചര്ച്ച ക്രിയാത്മകമായിരുന്നെന്നും കൂടിയാലോചന തുടരുമെന്നും വൈറ്റ്ഹൗസ് അറിയിച്ചു. പിന്നീട് റിപ്പബ്ലിക്കന് സെനറ്റര്മാരെ കണ്ട ഒബാമ അവരുടെ നിര്ദേശങ്ങള് സംബന്ധിച്ച് ചര്ച്ച നടത്തി. സര്ക്കാര് അടച്ചുപൂട്ടല് ഓരോദിവസവും സ്ഥിതി മോശമാക്കുകയാണെന്നും ഇത് പരിഹരിക്കാനാണ് തങ്ങള്ക്കും ആഗ്രഹമെന്നും റിപ്പബ്ലിക്കന് സെനറ്റര് സൂസന് കോളിന്സ് പറഞ്ഞു.
ഒബാമയുടെ ആരോഗ്യ പരിരക്ഷാ പദ്ധതി വൈകിപ്പിക്കുകയോ ഉപേക്ഷിക്കുകയോ ചെയ്യാതെ ബജറ്റ് അംഗീകരിക്കില്ലെന്ന് റിപ്പബ്ലിക്കന്മാര് ശാഠ്യംപിടിച്ചതോടെയാണ് സാമ്പത്തിക വര്ഷാരംഭമായ ഒക്ടോബര് ഒന്നുമുതല് അമേരിക്ക "അടച്ചുപൂട്ടി"യത്. എട്ട് ലക്ഷത്തോളം സര്ക്കാര് ജീവനക്കാരാണ് ശമ്പളമില്ലാത്ത അവധിയില് വീട്ടിലിരിക്കുന്നത്. ഇവരില് പ്രതിരോധവകുപ്പിലെ ജീവനക്കാരോട് ഈ ആഴ്ച മുതല് ജോലിക്കെത്താന് നിര്ദേശിച്ചിരുന്നു. സ്റ്റാറ്റ്യൂ ഓഫ് ലിബര്ട്ടി അടക്കമുള്ള പാര്ക്കുകളും ദേശീയോദ്യാനങ്ങളും താല്ക്കാലികമായി തുറക്കാനും വഴിയൊരുങ്ങി. അതത് സംസ്ഥാനങ്ങള് ചെലവ് വഹിക്കാന് രംഗത്തെത്തിയതോടെയാണിത്. അതേസമയം, പ്രതിസന്ധി പരിഹരിക്കാന് അമേരിക്ക അടിയന്തര നടപടി സ്വീകരിക്കണമെന്ന് ജി20 രാജ്യങ്ങള് ആവശ്യപ്പെട്ടു. അന്താരാഷ്ട്രനാണയനിധിയുടെയും ലോകബാങ്കിന്റെയും വാര്ഷികയോഗത്തിന് മുന്നോടിയായാണ് ജി20 രാജ്യങ്ങളുടെ ധനമന്ത്രിമാരും കേന്ദ്രബാങ്ക് ഗവര്ണര്മാരും സമ്മേളിച്ചത്. ധനമന്ത്രി പി ചിദംബരം പങ്കെടുത്തു.
സാമ്പത്തിക പ്രതിസന്ധി ആഗോള മാന്ദ്യത്തിലേക്ക് നയിക്കുമെന്ന് ഐഎംഎഫ്
വാഷിങ്ടണ്: അമേരിക്കയിലെ സാമ്പത്തിക പ്രതിസന്ധി ഉടന് പരിഹരിച്ചില്ലെങ്കില് അത് ലോകത്തെ മറ്റൊരു സാമ്പത്തിക മാന്ദ്യത്തിലേക്ക് നയിക്കുമെന്ന് ഐഎംഎഫ് മേധാവി ക്രിസ്റ്റീന് ലഗാര്ഡോ. എബിസി ചാനലിന് നല്കിയ അഭിമുഖത്തിലാണ് ഐഎംഎഫ് മേധാവിയുടെ അഭിപ്രായ പ്രകടനം. അമേരിക്കന് പ്രതിസന്ധിയെക്കുറിച്ച് ലോക ബാങ്ക് തലവന് കഴിഞ്ഞ ദിവസം സമാനമായ അഭിപ്രായ പ്രകടനം നടത്തിയിരുന്നു.
ഒബാമ കെയര് എന്ന ആരോഗ്യ ഇന്ഷുറന്സ് പദ്ധതിയുടെ പേരില് പ്രസിഡന്റുമായി അഭിപ്രായ വ്യത്യാസമുണ്ടായതോടെ റിപ്പബ്ലിക്കന് ജനപ്രതിനിധിസംഘങ്ങള് ബജറ്റ് പാസാക്കാന് തയാറാവാതിരുന്നതോടെയാണ് അമേരിക്ക സാമ്പത്തിക പ്രതിസന്ധിയിലായത്. കടമെടുക്കാന് പ്രസിഡന്റിനുള്ള അധികാരം 17ന് അവസാനിക്കും. അത് കുറച്ചുകാലത്തേക്ക് നീട്ടിക്കൊടുക്കാമെന്ന് റിപ്പബ്ലിക്കന് പ്രതിനിധിസഭാംഗങ്ങള് പറഞ്ഞിരുന്നെങ്കിലും കുറച്ചുകലാത്തേക്ക് മാത്രമായി കടമെടുക്കല് പരിധി നീട്ടുന്നതിനോട് യോജിപ്പില്ലെന്ന് ഒബാമ വ്യക്തമാക്കിയതോടെ പ്രതിസന്ധി രൂക്ഷമായിരിക്കുകയാണ്.
deshabhimani
No comments:
Post a Comment