തൃശൂര്‍: വായനയിലെ ജനകീയതയും എഴുത്തിലെ സ്ത്രീപക്ഷ ചായ്വും മുഖമുദ്രയാക്കി പുസ്തകപ്രസാധന രംഗത്തെ വനിതാകൂട്ടായ്മയായ "സമത" ശ്രദ്ധേയമാകുന്നു. ഒറ്റയ്ക്കോ ഒന്നോ രണ്ടോ പേര്‍ ചേര്‍ന്നോ നടത്തുന്ന പ്രസാധനക്കമ്പനികള്‍ സ്ത്രീകളുടേതായുണ്ടെങ്കിലും സംസ്ഥാനത്താദ്യമായാണ് പുസ്തകപ്രസാധനരംഗത്ത് വന്‍ കൂട്ടായ്മയൊരുക്കി "സമത" വേറിട്ടുനില്‍ക്കുന്നത്. ഈ പെണ്‍കൂട്ടായ്മയില്‍ ഡോക്ടര്‍മാരും റിട്ട. പ്രൊഫസര്‍മാരും സര്‍ക്കാര്‍ ജീവനക്കാരും വിദ്യാര്‍ഥിനികളും കലാകാരികളും വീട്ടമ്മമാരുമുണ്ട്. രൂപംകൊണ്ട് രണ്ടുവര്‍ഷത്തിനുള്ളില്‍ 11 പുസ്തകങ്ങള്‍ പ്രസിദ്ധീകരിച്ച് വമ്പന്‍ പുസ്തക പ്രസാധകരെപ്പോലും ഞെട്ടിച്ചാണ് ഈ വനിതാകൂട്ടായ്മയുടെ ജൈത്രയാത്ര. സാര്‍വദേശീയ വനിതാ ദിനത്തില്‍ ഇവര്‍ നടത്തുന്ന സ്ത്രീപക്ഷ ഇടപെടല്‍ സമൂഹത്തിന് മാതൃകയാണ്. എഴുത്തും വായനയും പ്രോത്സാഹിപ്പിക്കുന്നതിനൊപ്പം പ്രാന്തവല്‍ക്കരിക്കപ്പെട്ട സ്ത്രീപോരാട്ടങ്ങളെ അടയാളപ്പെടുത്താനും അവശതകളനുഭവിക്കുന്ന പഴയകാല സ്ത്രീപോരാളികള്‍ക്ക് പെന്‍ഷന്‍ നല്‍കാനും ഇവര്‍ മുന്നിട്ടിറങ്ങിയിരിക്കുന്നു. പുസ്തകവില്‍പ്പനയില്‍നിന്നാണ് ഇതിനുള്ള തുക കണ്ടെത്തുന്നതെന്നതും ശ്രദ്ധേയം.
കേരളത്തിലെ സ്ത്രീപക്ഷ സാംസ്കാരിക പ്രവര്‍ത്തനങ്ങളുടെ കേന്ദ്രബിന്ദുവായി തൃശൂരില്‍ 1987ല്‍ രൂപീകരിച്ച "സമത"യുടെ തുടര്‍ച്ചയാണ് ഈ കൂട്ടായ്മ. 1987 മുതല്‍ 1997 വരെയുള്ള കാലത്തിനിടയില്‍ 2500 വേദികളിലായി സമതയുടെ പ്രവര്‍ത്തകര്‍ ആലപിച്ച പാട്ടുകള്‍ സിഡിയായി പ്രസിദ്ധീകരിക്കുകയും ചെയ്തു. കവയത്രി പ്രൊഫ. ലളിത ലെനിനാണ് സമതയുടെ ചെയര്‍പേഴ്സണ്‍. മാനേജിങ് ട്രസ്റ്റിയായി പ്രൊഫ. ടി എ ഉഷാകുമാരി, ജോയിന്റ് ട്രസ്റ്റിയായി ഡോ. പി യു ശോഭ, വൈസ് ചെയര്‍ പേഴ്ണായി ഡോ. ആര്‍ ബി രാജലക്ഷ്മി, ട്രഷറര്‍ ഗിരിജാകുമാരി എന്നിവരടങ്ങിയ ഇരുപത്തൊമ്പതംഗ കമ്മിറ്റിയാണ് വിവിധ പ്രവര്‍ത്തനങ്ങള്‍ക്ക് ചുക്കാന്‍ പിടിക്കുന്നത്.
deshabhimani
No comments:
Post a Comment