തൃശൂര്‍: സംഭവബഹുലമായ രാഷ്ട്രീയ ജീവിതത്തിനാണ് സി ഒ പൗലോസിന്റെ വിയോഗത്തോടെ തിരശ്ശീല വീണത്. പത്തു ദിവസം മുമ്പ് ആശുപത്രിയില്‍ പ്രവേശിപ്പിക്കുമ്പോള്‍ അവസ്ഥ ഇത്രയും ഗുരുതരമാണെന്ന് ആരും കരുതിയിരുന്നില്ല. ആശുപത്രിയില്‍ കാണാനെത്തുന്നവരോടെല്ലാം പുതിയ രാഷ്ട്രീയ സംഭവവികാസങ്ങളടക്കം അദ്ദേഹം സംസാരിച്ചു. പിന്നീട് വിവിധ പരിശോധനകള്‍ക്കുശേഷമാണ് രോഗത്തിന്റെ ഗുരുതരാവസ്ഥ അറിയുന്നത്. ഹൃദയം, വൃക്ക, കരള്‍ തുടങ്ങിയവക്കെല്ലാം സാരമായ പ്രശ്നങ്ങളുണ്ടായിരുന്നു. ഡയാലിസിസിനു വിധേയനായി ഐസിയുവില്‍ കഴിയുമ്പോഴും പ്രതീക്ഷ കൈവിടാത്ത മനസ്സുമായാണ് അദ്ദേഹം പെരുമാറിയതും സംസാരിച്ചതും. മരുന്നുകളോടും ആകുലതകളോടും പൊരുതി ചൊവ്വാഴ്ച പുലര്‍ച്ചെ മൂന്നുമണിയോടെയാണ് ആ വിലപ്പെട്ട ജീവന്‍ നഷ്ടമായത്.
പ്രൈമറി സ്കൂള്‍ അധ്യാപകനായിരുന്ന കയ്പമംഗലം ചാലിശേരി ഔസേപ്പിന്റെയും മറിയയുടെയും മകനായ പൗലോസ് 1960ല്‍ അവിഭക്ത കമ്യൂണിസ്റ്റ് പാര്‍ടിയില്‍ അംഗമായി. കോഴിക്കോട്ട് ടിടിസി പഠനം പൂര്‍ത്തിയാക്കി, കയ്പമംഗലം സ്കൂളില്‍ അധ്യാപകനായെങ്കിലും അധികം വൈകാതെ ജോലി വിട്ടു. ടിടിസി പഠനകാലത്താണ് കമ്യൂണിസ്റ്റ് ആശയങ്ങളില്‍ ആകൃഷ്ടനായത്. 1964ല്‍ പാര്‍ടി പിളര്‍പ്പിനുശേഷം നാട്ടിക ഫര്‍ക്കയില്‍ എസ്എന്‍ പുരം മുതല്‍ ചേറ്റുവവരെ രൂപീകരിച്ച ഓര്‍ഗനൈസിങ് കമ്മിറ്റിയില്‍ അംഗമായിരുന്നു. തുടര്‍ന്ന് ചാവക്കാട് താലൂക്ക് കമ്മിറ്റി സെക്രട്ടറിയായും പ്രവര്‍ത്തിച്ചു. ഏഴാം പാര്‍ടി കോണ്‍ഗ്രസിന്റെ ഭാഗമായി 1964ല്‍ കയ്പമംഗലത്ത് പുത്തൂര്‍ ബാഹുലേയന്‍ മാസ്റ്ററുടെ വീട്ടില്‍ ചേര്‍ന്ന മണ്ഡലം സമ്മേളനത്തില്‍ നാട്ടിക മണ്ഡലം സെക്രട്ടറിയായി തെരഞ്ഞെടുക്കപ്പെട്ടു. 1965ലും 1967ലും 1970ലും നടന്ന നിയമസഭാ തെരഞ്ഞെടുപ്പുകളില്‍ നാട്ടിക മണ്ഡലത്തിലെ ഇടതുപക്ഷ വിജയത്തിന്റെ മുഖ്യസൂത്രധാരന്‍ പൗലോസായിരുന്നു. "65ല്‍ പ്രമുഖ ചലച്ചിത്ര പ്രവര്‍ത്തകന്‍ രാമു കാര്യാട്ടാണ് നാട്ടികയില്‍നിന്ന് വിജയിച്ചത്.
മരണം വരെയും യാഥാസ്ഥിതികത്വത്തിന് കീഴടങ്ങാതെ...
തൃശൂര്‍: മരണം വരെ യാഥാസ്ഥിതികത്വത്തിന് കീഴടങ്ങാത്ത മനസ്സിന്റെയും ശരീരത്തിന്റെയും ഉടമയായി സി ഒ പൗലോസ് എന്ന രാഷ്ട്രീയ നേതാവ് പൊതുപ്രവര്‍ത്തകര്‍ക്ക് മാതൃകയായി. യാഥാസ്ഥിതികത്വത്തെയും അനാചാരങ്ങളെയും അന്ധവിശ്വാസങ്ങളെയും ചെറുപ്പത്തില്‍ത്തന്നെ ആശയപരമായി എതിര്‍ത്ത അദ്ദേഹം നിലപാടുകള്‍ ജീവിതത്തിലുടനീളം അഭിമാനകരമായി മുറുകെപ്പിടിക്കുകയും പ്രാവര്‍ത്തികമാക്കുകയും ചെയ്തു. വൈരുധ്യാത്മക ഭൗതികവാദത്തിലും മാര്‍ക്സിസ്റ്റ്-ലെനിനിസ്റ്റ് ആശയങ്ങളിലും അടിയുറച്ച മനസ്സ് ആചാരങ്ങള്‍ക്കായും കീഴ്വഴക്കങ്ങള്‍ക്കായും ഒരിക്കലും ദേവാലയങ്ങളെ ആശ്രയിച്ചില്ല; മരണശേഷവും. മക്കളുടെ വിവാഹംപോലും അത്തരത്തില്‍ സമൂഹത്തിന് മാതൃക കാട്ടുന്നതായിരുന്നു.
ഇനി ജനഹൃദയങ്ങളില്‍...
തൃശൂര്‍: മുതിര്‍ന്ന സിപിഐ എം-ട്രേഡ്യൂണിന്‍ നേതാവും മുന്‍ എം പിയുമായ സി ഒ പൗലോസിന് അന്ത്യാഭിവാദ്യമര്‍പ്പിക്കാന്‍ ജനസഹസ്രം. ചൊവ്വാഴ്ച പുലര്‍ച്ചെ തൃശൂര്‍ എലൈറ്റ് മിഷന്‍ ആശുപത്രിയില്‍ അന്തരിച്ച ട്രേഡ്യൂണിയന്‍ പ്രസ്ഥാനത്തിന്റെ അമരക്കാരനെ അവസാനമായി ഒരു നോക്കുകാണാനും ആദരാഞ്ജലി അര്‍പ്പിക്കാനുമായി ജില്ലയുടെ നാനാഭാഗത്തു നിന്നും ആയിരക്കണക്കിനു തൊഴിലാളികളും പാര്‍ടി പ്രവര്‍ത്തകരും സഹൃത്തുക്കളുമാണ് വിവിധ കേന്ദ്രങ്ങളിലെത്തിയത്. ആശുപത്രിയില്‍ നിന്ന് മൃതദേഹം ജന്മനാടായ കയ്പമംഗലത്തെ വസതിയില്‍ എത്തിച്ചപ്പോഴും തുടര്‍ന്ന് സിപിഐ എം നാട്ടിക ഏരിയ കമ്മിറ്റി ഓഫീസില്‍ പൊതുദര്‍ശനത്തിനുവച്ചപ്പോഴും പൗലോസ് മാസറ്റുടെ രാഷ്ട്രീയ ജീവിതത്തിന് തുടക്കം കുറിച്ച മണപ്പുറം- ചാവക്കാട് മേഖലയിലെ ജനാവലി വികാരനിര്‍ഭരമായ യാത്രാമൊഴിയേകി.
deshabhimani 130313
No comments:
Post a Comment