വ്യാപാരത്തില്‍ യുഎസിനെ പിന്തള്ളി ചൈന

ലോകത്ത് ഏറ്റവുമധികം വ്യാപാരം നടത്തുന്ന രാജ്യമെന്ന പദവിയിലേക്ക് ചൈന എത്തുന്നു. പതിറ്റാണ്ടുകളായി ഈ റെക്കോഡ് കൈവശംവച്ച അമേരിക്കയെയാണ് പിന്തള്ളിയത്. കഴിഞ്ഞവര്‍ഷം ചൈനയുടെ വ്യാപാരം 7.6 ശതമാനം വര്‍ധിച്ച് 4.16 ലക്ഷം കോടി ഡോളറിലെത്തി. ചൈനയുടെ വിദേശ വ്യാപാരം ആദ്യമായാണ് 4 ലക്ഷം കോടി കവിഞ്ഞത്. കഴിഞ്ഞവര്‍ഷം നവംബര്‍വരെ അമേരിക്കയുടെ മൊത്തം വ്യാപാരം 3.5 ലക്ഷം കോടി ഡോളര്‍. വര്‍ഷാന്ത്യകണക്ക് അടുത്തമാസം പുറത്തുവരും. ലോകത്ത് ഏറ്റവും കൂടുതല്‍ ചരക്ക് കയറ്റുമതിചെയ്യുന്ന രാജ്യമായി 2009ല്‍ ചൈന ഉയര്‍ന്നിരുന്നു. 2013ല്‍ മൊത്തം കയറ്റുമതി 7.9 ശതമാനം വര്‍ധിച്ച് 2.21 ലക്ഷം കോടി ഡോളറിലെത്തി. ഇറക്കുമതി 7.3 ശതമാനം വര്‍ധിച്ച് 1.95 ലക്ഷം കോടി ഡോളറിന്റേതായെന്ന് വെള്ളിയാഴ്ച പുറത്തുവിട്ട കസ്റ്റംസ് രേഖകള്‍ വ്യക്തമാക്കി.

നിലവിലെ സാഹചര്യത്തില്‍ ഏറ്റവുമധികം വ്യാപാരം നടത്തുന്ന രാജ്യമെന്ന ഖ്യാതി അമേരിക്കയെ പിന്തള്ളി ചൈന നേടുമെന്ന് ഉറപ്പാണെന്ന് ചൈനീസ് കസ്റ്റംസ് അഡ്മിനിസ്ട്രേഷന്‍ വക്താവ് ഴെങ് യുഷെങ് പറഞ്ഞു. ചില വ്യാപാരികള്‍ കയറ്റുമതിയുടെ കണക്ക് പെരുപ്പിച്ചു കാട്ടുകയാണെന്ന് പാശ്ചാത്യലോബി ആരോപിച്ചിരുന്നു. എന്നാല്‍, ക്രമക്കേട് തടയാന്‍ ചൈന സ്വീകരിച്ച ശക്തമായ നടപടികള്‍ ഫലംചെയ്തെന്ന് ബീജിങ് എച്ച്എസ്ബിസിയിലെ സാമ്പത്തിക വിദഗ്ധന്‍ സണ്‍ ജന്‍വീ പറഞ്ഞു. പെരുപ്പിച്ചുകാട്ടിയെന്ന് ആരോപിക്കപ്പെടുന്ന കണക്കുകള്‍ മാറ്റിനിര്‍ത്തിയാലും ഒന്നാംസ്ഥാനത്തിന് ചൈന അര്‍ഹത നേടിക്കഴിഞ്ഞെന്ന് സാമ്പത്തിക വിദഗ്ധര്‍ ചൂണ്ടിക്കാട്ടുന്നു. ചൈനയുടെയും അമേരിക്കയുടെയും 2013ലെ വ്യാപാരത്തില്‍ 25000 കോടി ഡോളറിന്റെ അന്തരമുണ്ടെന്ന് സാമ്പത്തികവിദഗ്ധന്‍ രാജീവ് ബിശ്വാസിനെ ഉദ്ധരിച്ച് ബിബിസി റിപ്പോര്‍ട്ട്ചെയ്തു.

deshabhimani