അവസാന ഭ്രമണപഥം ഉയര്‍ത്തലും വിജയം

മംഗള്‍യാനെ ചൊവ്വയിലേക്ക് തൊടുക്കുന്നതിനുമുമ്പുള്ള അവസാന ഭ്രമണപഥം ഉയര്‍ത്തലും വിജയകരം. ശനിയാഴ്ച പുലര്‍ച്ചെ നടന്ന പഥം ഉയര്‍ത്തല്‍വഴി ഭൂമിയില്‍നിന്നുള്ള ഉപഗ്രഹത്തിന്റെ കൂടിയ ദൂരം 1,92,874 കിലോമീറ്റര്‍ ആയി. ഇതോടെ പേടകം അഞ്ചാം ഭൂഭ്രമണപഥത്തില്‍ എത്തി. പതിനാല് ദിവസംകൂടി ഭൂമിയെ വലംവയ്ക്കുന്ന മംഗള്‍യാന്‍ ഡിസംബര്‍ ഒന്നിന് ചൊവ്വയിലേക്ക് യാത്ര തുടങ്ങും. സൗരഭ്രമണപഥത്തിലേക്ക് തള്ളിവിടുന്ന ഈ പ്രക്രിയ നിര്‍ണായകവും സങ്കീര്‍ണവുമാണ്. പേടകത്തിലെ ബൂസ്റ്റര്‍ റോക്കറ്റ് പ്രവര്‍ത്തിപ്പിച്ച് പ്രവേഗം വര്‍ധിപ്പിച്ചാണ് ഇത് സാധ്യമാക്കുക. സെക്കന്‍ഡില്‍ 11.5 കിലോമീറ്റര്‍ വേഗത്തിലാകും ഭൂഭ്രമണപഥം വിട്ട് ഉപഗ്രഹം നീങ്ങുക. നേരിയ പാളിച്ച ഉണ്ടായാല്‍പ്പോലും ചൊവ്വയിലേക്കുള്ള ലക്ഷ്യം തെറ്റും. അടുത്തവര്‍ഷം സെപ്തംബര്‍ 21ന് മംഗള്‍യാന്‍ ചൊവ്വയുടെ ഭ്രമണപഥത്തിലെത്തുമെന്നാണ് പ്രതീക്ഷ. ശ്രീഹരിക്കോട്ടയില്‍നിന്ന് കഴിഞ്ഞ അഞ്ചിന് വിക്ഷേപിച്ച ഉപഗ്രഹത്തിന്റെ ഭ്രമണപഥം ആറുമുതലാണ് ഘട്ടംഘട്ടമായി ഉയര്‍ത്തിയത്. നാലാംഘട്ടം പഥം ഉയര്‍ത്തല്‍ ആദ്യതവണ പാളിയെങ്കിലും പരിഹരിക്കാനായി. അഞ്ചാംഘട്ട ഭ്രമണപഥ വികാസപ്രവര്‍ത്തനം ശനിയാഴ്ച പുലര്‍ച്ചെ 1.27നാണ് നടന്നത്.

deshabhimani