നേരത്തെ അപേക്ഷ നല്‍കാത്തവര്‍ക്കും അപേക്ഷിക്കാന്‍ അവസരമുണ്ടാകുമെന്നു കേട്ട് സ്ഥലത്തെത്തിയ നൂറുകണക്കിനാളുകള്‍ നിരാശരായി. രാവിലെ എട്ടിനുതന്നെ ക്രിസ്ത്യന്‍ കോളേജ് പരിസരത്തെത്തിയ ഇവര്‍ക്ക് മണിക്കൂറുകളോളം പൊരിവെയിലത്ത് കാത്തുനില്‍ക്കേണ്ടി വന്നു. പകല്‍ രണ്ടിനും വൈകിട്ട് ആറിനുശേഷവുമാണ് ഇവര്‍ക്ക് മുഖ്യമന്ത്രിയെ കാണാനായത്. തൊട്ടടുത്ത പള്ളി കോമ്പൗണ്ടില്‍ കാത്തിരുന്ന സ്ത്രീകളടക്കമുള്ളവര്‍ തിക്കിലും തിരക്കിലുംപെട്ട് വലഞ്ഞു. ഭൂരിഭാഗം പേര്‍ക്കും മുഖ്യമന്ത്രിയെ കാണാനായതുമില്ല. ശനിയാഴ്ച കിട്ടിയ അപേക്ഷകളെല്ലാം ഉദ്യോഗസ്ഥര്‍ക്ക് കൈമാറി പിന്നീട് അറിയിക്കാമെന്ന മറുപടി മാത്രമാണ് കിട്ടിയത്. ശനിയാഴ്ച അപേക്ഷ നല്‍കിയവരാരും കാത്തുനില്‍ക്കേണ്ടതില്ലെന്ന് വൈകിട്ട് മൈക്കിലൂടെ അനൗണ്‍സ്മെന്റും വന്നു. എപിഎല്‍ കാര്‍ഡ് ബിപിഎല്‍ ആക്കിമാറ്റാനുള്ള അപേക്ഷകളിലും തീര്‍പ്പുണ്ടായില്ല.
കറുത്ത ഷാളണിഞ്ഞ വനിതാജീവനക്കാര്‍ക്ക് പൊലീസിന്റെ അവഹേളനം
കോഴിക്കോട്: ജനസമ്പര്‍ക്ക പരിപാടി റിപ്പോര്‍ട്ട് ചെയ്യാനെത്തിയ സര്‍ക്കാര്‍ വകുപ്പിലെ വനിതാ ജീവനക്കാര്‍ക്ക് പൊലീസിന്റെ അവഹേളനം. പബ്ലിക് റിലേഷന്‍സ് വകുപ്പിലെ താല്‍ക്കാലിക ജീവനക്കാരികളെയാണ് കറുത്ത ഷാള്‍ ധരിച്ചതിന്റെ പേരില്‍ ക്രിസ്ത്യന്‍ കോളേജിലെ കവാടത്തില്‍ പൊലീസ് അവഹേളിച്ചത്. ഷാള്‍ അഴിച്ചുവച്ചേ അകത്തുകടക്കാവൂ എന്നായിരുന്നു പൊലീസിന്റെ നിര്‍ദേശം. തങ്ങള്‍ പിആര്‍ഡിയിലെ ജീവനക്കാരാണെന്നു പറഞ്ഞിട്ടും ഫലമുണ്ടായില്ല. പിആര്‍ഡിയല്ല ആരായാലും കറുത്ത ഷാളണിഞ്ഞ് അകത്തുകടത്തില്ലെന്ന് പൊലീസുകാര്‍ ശഠിച്ചു. ഇതേത്തുടര്‍ന്ന് ഒരു ജീവനക്കാരിയില്‍നിന്ന് കറുത്തഷാള്‍ പൊലീസ് വാങ്ങിവച്ചു. ഷാളിടാതെയാണ് ഇവര്‍ പിന്നീട് ജോലി ചെയ്തത്. ഉദ്ഘാടന പരിപാടിയുടെ റിപ്പോര്‍ട്ടെടുത്ത് തിരിച്ച് പുറത്തേക്ക് വരുമ്പോള്‍ മാത്രമാണ് പൊലീസ് ഷാള്‍ തിരികെ നല്‍കിയത്. കൂടെയുള്ള ജീവനക്കാരിയും കറുത്ത ഷാള്‍ തന്നെയാണ് ധരിച്ചിരുന്നത്. കറുപ്പുഷാളിന്റെ അറ്റത്ത് മഞ്ഞനിറമുള്ള ഭാഗംകൂടിയുള്ളതിനാല്‍ ഊരിവയ്ക്കാനാവില്ലെന്ന് ഇവര്‍ വ്യക്തമാക്കി. ഒടുവില്‍ മഞ്ഞഭാഗം മുന്നിലേക്കിട്ടുവേണം അകത്തുകടക്കാനെന്ന് പൊലീസ് നിര്‍ദേശം നല്‍കി.
No comments:
Post a Comment