ശെന്തുരുണി വന്യജീവിസങ്കേതത്തില്‍ ഉള്‍പ്പെടുന്നതാണ് തെന്മല ഡാമിന്റെ വൃഷ്ടിപ്രദേശങ്ങളും ജലസംഭരണപ്രദേശങ്ങളും. അത്യപൂര്‍വ ജലജീവികളും സസ്യജാലങ്ങളും ഉള്ളതിനാല്‍ ഇവിടെനിന്ന് മണലും എക്കലും നീക്കംചെയ്യാന്‍ കേന്ദ്ര പരിസ്ഥിതി-വന്യജീവി മന്ത്രാലയം അനുമതി നല്‍കിയിട്ടില്ല. ഡാമിന്റെ ജലസംഭരണശേഷി വീണ്ടെടുക്കാന്‍ 2003ല്‍ മണല്‍വാരലിനായി കല്ലട ജലസേചനപദ്ധതി അധികൃതര്‍ ശ്രമം നടത്തിയപ്പോഴാണ് കേന്ദ്ര പരിസ്ഥിതി മന്ത്രാലയം ആ നീക്കം തടഞ്ഞത്. 2003ല്‍ ഐഎസ്ആര്‍ഒ ശാസ്ത്രജ്ഞ രാജശ്രീ പോത്താലയുടെ നേതൃത്വത്തില്‍ നടത്തിയ ഉപഗ്രഹ സര്‍വേയില്‍ ഡാമിന്റെ ജലസംഭരണശേഷി 15 മുതല്‍ 20 ശതമാനംവരെ കുറഞ്ഞതായി കണ്ടെത്തി. കഴിഞ്ഞവര്‍ഷം തുറമുഖവകുപ്പ് നടത്തിയ പഠനത്തില്‍ 35 ശതമാനം ഭാഗവും മണല്‍ എക്കല്‍നിക്ഷേപമാണെന്നു തെളിഞ്ഞു. ഈ പഠനറിപ്പോര്‍ട്ട് സര്‍ക്കാര്‍ ഇതുവരെ തുറമുഖവകുപ്പില്‍നിന്നു വാങ്ങിയിട്ടില്ല. ആയിരം കോടി രൂപയുടെ മണല്‍നിക്ഷേപമാണ് തെന്മല ഡാമിലുള്ളത്. നിര്‍മാണമേഖലയില്‍ മണല്‍ക്ഷാമം നേരിടുമ്പോഴാണ് ഇത്രയേറെ മണല്‍ ഡാമില്‍നിന്നു നീക്കം ചെയ്യാതെ കിടക്കുന്നത്. സര്‍ക്കാരിന് വരുമാനത്തോടൊപ്പം ആയിരക്കണക്കിനാളുകള്‍ക്ക് തൊഴില്‍ അവസരങ്ങളും മണല്‍വാരലിലൂടെ ലഭിക്കും.
കേരളത്തിലെ ഡാമുകളിലെ മണല്‍നിക്ഷേപങ്ങള്‍ നീക്കം ചെയ്യാനുള്ള പദ്ധതിയില്‍ ഉള്‍പ്പെടുത്തി തെന്മല ഡാമിലെ മണല്‍വാരാനുള്ള കേന്ദ്ര അനുമതിക്കായി സംസ്ഥാന വന്യജീവി ബോര്‍ഡ് കേന്ദ്രത്തിലേക്ക് ശുപാര്‍ശ ചെയ്യാന്‍ തീരുമാനിച്ചിട്ടുണ്ട്. ഇതുസംബന്ധിച്ച് കൊല്ലത്തെ ഒരു സര്‍ക്കാര്‍ നിയന്ത്രിത സ്ഥാപനം സാധ്യതാപഠനം നടത്താന്‍ വനംവകുപ്പില്‍ അനുമതിക്കായി സമീപിച്ചിട്ടുമുണ്ട്. എന്നാല്‍, ഇതുസംബന്ധിച്ച റിപ്പോര്‍ട്ട് കെഐപി വനം വന്യജീവി വകുപ്പിനു നല്‍കിയിട്ടില്ല. തെന്മല ഡാമിലെ മണല്‍നീക്കത്തിനുള്ള പ്രാഥമിക പ്രവര്‍ത്തനങ്ങള്‍ നടക്കവെയാണ് കസ്തൂരിരംഗന്‍ റിപ്പോര്‍ട്ട് അതേപടി അടിച്ചേല്‍പ്പിക്കാന്‍ ശ്രമിക്കുന്നത്. തെന്മല ഡാമില്‍നിന്ന് ഒരിക്കലും മണല്‍നിക്ഷേപം നീക്കംചെയ്ത് ഡാമിന്റെ ജലസംഭരണശേഷി കൂട്ടാന്‍ ഈ നിയമം നടപ്പായാല്‍ സാധിക്കുകയില്ല. ഇതുസംബന്ധിച്ച ആശയക്കുഴപ്പം നീക്കാന്‍ സര്‍ക്കാരാണ് ബാധ്യസ്ഥര്‍.
deshabhimani
No comments:
Post a Comment