Wednesday, November 13, 2013

ഹൈക്കോടതി വിജിലന്‍സ് രജിസ്ട്രാറുടെ കണ്ടെത്തല്‍ കേസിലെ വഴിത്തിരിവ്

സോളാര്‍ കേസിലെ പ്രതി സരിതാ എസ് നായരുടെ രഹസ്യമൊഴി സംബന്ധിച്ച് ഹൈക്കോടതി വിജിലന്‍സ് രജിസ്ട്രാര്‍ നല്‍കിയ റിപ്പോര്‍ട്ട് കേസിലെ വഴിത്തിരിവാണെന്ന് പ്രതിപക്ഷ ഉപനേതാവ് കോടിയേരി ബാലകൃഷ്ണന്‍. പ്രതിപക്ഷം പറഞ്ഞ കാര്യങ്ങള്‍ ശരിയാണെന്ന് റിപ്പോര്‍ട്ടിലൂടെ തെളിഞ്ഞിരിക്കുകയാണ്. സരിതയുടെ മൊഴി രേഖപ്പെടുത്താത്തതുമായി ബന്ധപ്പെട്ട് ഹൈക്കോടതി രജിസ്ട്രാറുടേതായി വന്ന മാധ്യമ വാര്‍ത്തകള്‍, സോളാര്‍ കേസ് അട്ടിമറിക്ക് എക്സിക്യുട്ടീവും ജുഡീഷ്യറിയും ഒരുപോലെ ശ്രമിച്ചുവെന്നാണ് വ്യക്തമാക്കുന്നത്.

സരിതയുടെ മൊഴി രേഖപ്പെടുത്താതിരുന്ന എറണാകുളം ജുഡീഷ്യല്‍ മജിസ്ട്രേറ്റ് ഇനി പദവിയില്‍ തുടരരുതാത്തതാണ്. എന്നാല്‍ ഹൈക്കോടതിയാണ് അക്കാര്യം തീരുമാനിക്കേണ്ടത്. സോളാര്‍ കേസ് സംബന്ധിച്ച എല്ലാ കാര്യങ്ങളും ഹൈക്കോടതി വിശദമായി പരിശോധിക്കണമെന്നും കോടിയേരി ആവശ്യപ്പെട്ടു. തൃശൂരില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.

സോളാല്‍ കേസില്‍ വിരമിച്ച ജഡ്ജിയെ ഉപയോഗിച്ചുള്ള ജുഡീഷ്യല്‍ അന്വേഷണത്തോട് പ്രതിപക്ഷം സഹകരിക്കില്ല. നിലവില്‍ പ്രഖ്യാപിച്ച റിട്ട. ജഡ്ജി സര്‍ക്കാരിന്റെ തന്നെ ഭാഗമായ പിന്നാക്ക കമീഷന്റെ ചെയര്‍മാനാണ്. മുഖ്യമന്ത്രിയും അന്വേഷണ പരിധിയില്‍ വരുമെന്ന് വ്യക്തമാക്കാത്തതിനാലാണ് ഹൈക്കോടതി സിറ്റിങ്ങ് ജഡ്ജിയെ തരാത്തത്. ബിജു രാധാകൃഷ്ണന്റെയും സരിതയുടേയും തട്ടിപ്പ് നിലവില്‍ പൊലീസ് അന്വേഷിക്കുന്നുണ്ട്. അതിന് വീണ്ടുമൊരു സിറ്റിങ്ങ് ജഡ്ജിയുടെ അന്വേഷണം ആവശ്യമില്ലെന്ന് ഹൈകോടതി കരുതിയിരിക്കുമെന്നും കോടിയേരി പറഞ്ഞു. കേസില്‍ ആരോപണവിധേയനായ മുഖ്യമന്ത്രിയുടെ രാജി ആവശ്യപ്പെട്ട് പ്രതിപക്ഷം നടത്താനിരിക്കുന്ന ക്ലിഫ് ഹൗസ് ഉപരോധത്തില്‍ മാറ്റമില്ലെന്നും അദ്ദേഹം വ്യക്തമാക്കി.

deshabhimani

No comments:

Post a Comment