വിവിധ ഗതാഗതസംവിധാനങ്ങൾ കോര്‍ത്തിണക്കി കൊച്ചിയില്‍ തടസ്സങ്ങളില്ലാത്ത യാത്ര സാധ്യമാക്കുമെന്ന് മുഖ്യമന്ത്രി പിണറായി വിജയന്‍ പറഞ്ഞു. ഇതിന് ഇന്റലിജന്റ് ട്രാഫിക് മാനേജ്‌മെന്റ് സിസ്റ്റം സഹായമാകുമെന്നും അദ്ദേഹം പറഞ്ഞു. കൊച്ചി സ്മാര്‍ട്ട് മിഷന്‍ പദ്ധതിയുടെ ഭാഗമായി നടപ്പാക്കിയ ഇന്റലിജന്റ് ട്രാഫിക് മാനേജ്‌മെന്റ് സിസ്റ്റം (ഐടിഎംഎസ്) വീഡിയോ കോണ്‍ഫറന്‍സിലൂടെ ഉദ്ഘാടനം ചെയ്യുകയായിരുന്നു അദ്ദേഹം.
മെട്രോപൊളിറ്റന്‍ ആക്ടിന്റെ ആദ്യ ചുവടുവയ്‌പാണ് കൊച്ചിയിൽ നടപ്പാകുന്നത്‌. കൊച്ചി മെട്രോ, വാട്ടര്‍ മെട്രോ, ബസ്, ഓട്ടോ തൊഴിലാളികളുടെ സൊസൈറ്റി എന്നിവയെ കോര്‍ത്തിണക്കിയാണ് കൊച്ചിയില്‍ തടസ്സങ്ങളില്ലാത്ത യാത്ര യാഥാര്‍ഥ്യമാക്കുന്നതെന്നും അദ്ദേഹം പറഞ്ഞു.
ഉദ്‌ഘാടനച്ചടങ്ങിൽ മന്ത്രി എ സി മൊയ്തീന്‍ അധ്യക്ഷനായി. മന്ത്രി ഇ പി ജയരാജന്‍, എംഎൽഎമാരായ ടി ജെ വിനോദ്, പി ടി തോമസ്, ജില്ലാപഞ്ചായത്ത് പ്രസിഡന്റ് ഡോളി കുര്യാക്കോസ്, ഡെപ്യൂട്ടി മേയര്‍ കെ ആര്‍ പ്രേംകുമാര്‍, ജിസിഡിഎ ചെയര്‍മാന്‍ വി സലിം, ചീഫ് സെക്രട്ടറി വിശ്വാസ് മേത്ത, കലക്ടര്‍ എസ് സുഹാസ്, ഡിജിപി ലോക്‌നാഥ് ബെഹ്‌റ, കേന്ദ്ര ജോയിന്റ് സെക്രട്ടറി കുണാല്‍ കുമാര്‍, കൊച്ചി സ്മാര്‍ട്ട് മിഷന്‍ എംഡി ജാഫര്‍ മാലിക് എന്നിവര്‍ പങ്കെടുത്തു. കൊച്ചി സ്മാര്‍ട്ട് മിഷന്റെ ലോഗോയും ഔദ്യോഗിക വീഡിയോയും മേയര്‍ സൗമിനി ജെയിന്‍ പ്രകാശനം ചെയ്‌തു. കൊച്ചി സ്മാര്‍ട്ട് മിഷന്‍ നിര്‍മിച്ച 1000 മാസ്കുകളുടെ വിതരണോദ്ഘാടനം ഹൈബി ഈഡന്‍ എംപി കൊച്ചി സിറ്റി പൊലീസ് കമീഷണര്‍ വിജയ് സാഖറെയ്ക്ക് നല്‍കി നിര്‍‌വഹിച്ചു.
No comments:
Post a Comment