ഇസ്രത്തിന്റെ കുടുംബാംഗങ്ങളുടെ ജീവന് ഭീഷണി
മുംബൈ/ന്യൂഡല്‍ഹി: ഒമ്പതുവര്‍ഷം മുമ്പ് ഗുജറാത്ത് പൊലീസ് ഏറ്റുമുട്ടല്‍ കഥയുണ്ടാക്കി വെടിവച്ചുകൊന്ന ഇസ്രത് ജഹാന്റെ കുടുംബാംഗങ്ങളുടെ ജീവന് ഭീഷണിയെന്ന് പരാതി. രാത്രികാലങ്ങളില്‍ അജ്ഞാതര്‍ വീട്ടിലെത്തി ശല്യപ്പെടുത്താറുണ്ടെന്നും ഭീഷണിടെലിഫോണ്‍ സന്ദേശങ്ങള്‍ ലഭിക്കുന്നെന്നും ഇവര്‍ വാര്‍ത്താസമ്മേളത്തില്‍ വെളിപ്പെടുത്തി. ഇക്കാര്യം ചൂണ്ടിക്കാട്ടി ഇസ്രത്തിന്റെ കുടുംബാംഗങ്ങളുടെ അഭിഭാഷകന്‍ കേന്ദ്ര ആഭ്യന്തരമന്ത്രാലയത്തിന് കത്തെഴുതി. കുടുംബാംഗങ്ങള്‍ ആവശ്യപ്പെട്ടാല്‍ സുരക്ഷ ഒരുക്കുമെന്ന് കേന്ദ്ര ആഭ്യന്തരമന്ത്രി സുശീല്‍ കുമാര്‍ ഷിന്‍ഡെ പ്രതികരിച്ചു. കഴിഞ്ഞമാസം ഗുജറാത്തില്‍ നിന്ന് മുംബൈയിലേക്ക് മടങ്ങിയ ഇസ്രത്തിന്റെ മാതാവും അമ്മാവനും സഞ്ചരിച്ച കാറിനു നേരെ അജ്ഞാതര്‍ വെടിയുതിര്‍ത്തിരുന്നു. ജൂലൈ പത്തിന് രാത്രി അഞ്ചംഗസംഘം വീട്ടിലെത്തി ബഹളമുണ്ടാക്കിയെന്നും കതക് തുറക്കാന്‍ വിസമ്മതിച്ചതിനെ തുടര്‍ന്ന് പൊലീസുകാരാണെന്ന് പറഞ്ഞ് ബഹളംവച്ചെന്നും കത്തില്‍ പറയുന്നു. ഗുജറാത്ത് മുഖ്യമന്ത്രി നരേന്ദ്രമോഡിയെ കൊല്ലാനെത്തിയെ ഭീകരരായി ചിത്രീകരിച്ച് 2004 ജൂണ്‍ 15നാണ് 19കാരിയായ ഇസ്രത് ജഹാനും മലയാളിയായ പ്രാണേഷ് കുമാറും അടക്കം നാലുപേരെ ഗുജറാത്ത് പൊലീസ് വെടിവച്ചുകൊന്നത്.
deshabhimani
No comments:
Post a Comment