കാരക്കോണം മെഡിക്കല്‍ കോളജില്‍ ലക്ഷങ്ങള്‍ വാങ്ങി പ്രവേശനം നടത്തിയതായി റിപ്പോര്‍ട്ട്

തിരുവനന്തപുരം: സി.എസ്.ഐ മാനേജ്‌മെന്റിനു കീഴിലുള്ള കാരക്കോണം മെഡിക്കല്‍ കോളജില്‍ മാനേജ്‌മെന്റ് സീറ്റില്‍ ലക്ഷങ്ങള്‍ തലവരിപ്പണം വാങ്ങി പ്രവേശനം നടത്തിയതായി റിപോര്‍ട്ട്. മാനേജ്‌മെന്റ് സീറ്റിലെ പ്രവേശനത്തിനായി നാളെ നടക്കുന്ന പരീക്ഷ പ്രഹസനമാക്കിയാണ് മുന്‍കൂട്ടി അഡ്മിഷന്‍ നടത്തിയിരിക്കുന്നത്. പ്രമുഖ മലയാളം ചാനലാണ് ഇതുസംബന്ധിച്ച വാര്‍ത്തകള്‍ പുറത്തുവിട്ടത്. സ്വാശ്രയ മെഡിക്കല്‍ കോളജ് മാനേജ്‌മെന്റ് അസോസിയേഷനു കീഴിലുള്ള കോളജാണ് കാരക്കോണം. പ്രവേശന പരീക്ഷയ്ക്കു മുമ്പുതന്നെ 50 വിദ്യാര്‍ഥികളുടെ പ്രവേശന പട്ടിക തയ്യാറാക്കിയതായാണ് റിപോര്‍ട്ട്. വിദ്യാര്‍ഥികളില്‍നിന്നും 20 മുതല്‍ 50 ലക്ഷം രൂപവരെ വാങ്ങിയശേഷം സീറ്റ് നല്‍കുകയായിരുന്നു. മാനേജ്‌മെന്റ് സീറ്റില്‍ 5.5 ലക്ഷം വാര്‍ഷിക ഫീസും അഞ്ചുലക്ഷം നിക്ഷേപവുമാണ് ഫീസ് നിശ്ചയിച്ചിരിക്കുന്നത്. സര്‍ക്കാര്‍ നടത്തിയ മെഡിക്കല്‍ പ്രവേശന പരീക്ഷാ റാങ്ക് ലിസ്റ്റില്‍ ഏറെ പിന്നിലുള്ളവരാണ് പ്രവേശനം നേടിയവരില്‍ ഭൂരിഭാഗവും. 47,000 റാങ്ക് കിട്ടിയവര്‍ 50 ലക്ഷം രൂപ നല്‍കി പ്രവേശനം ഉറപ്പിച്ചു. ലക്ഷങ്ങള്‍ നല്‍കിയാണ് പ്രവേശനം നേടിയതെന്നു വിദ്യാര്‍ഥികള്‍ ഫോണിലൂടെ വ്യക്തമാക്കുന്നുമുണ്ട്. ക്രിസ്തുദാസ് എന്നയാളാണ് പണം വാങ്ങിയതെന്നു രക്ഷിതാക്കള്‍ പറയുന്നു. എന്നാല്‍, പണം വാങ്ങിയതിന്റെ രസീത് ആര്‍ക്കും നല്‍കിയിട്ടില്ല. ചില വിദ്യാര്‍ഥികള്‍ക്കു പണം കുറവായതിന്റെ പേരില്‍ സീറ്റ് നിഷേധിച്ചു. കൂടുതല്‍ പണവുമായി വന്നാല്‍ സീറ്റ് നല്‍കാമെന്നായിരുന്നു സി.എസ്.ഐ അധികൃതരുടെ വിശദീകരണം.

എല്‍.എം.എസ് കോമ്പൗണ്ട് കേന്ദ്രീകരിച്ചാണ് ലക്ഷങ്ങള്‍ വാങ്ങിയുള്ള പ്രവേശനം നടന്നിരിക്കുന്നത്. തലവരിപ്പണം വാങ്ങരുതെന്ന സുപ്രിംകോടതി നിര്‍ദേശം ലംഘിച്ചാണ് സീറ്റ് കച്ചവടം നടന്നിരിക്കുന്നത്. മാനേജ്‌മെന്റ് അസോസിയേഷനു കീഴിലെ 11 കോളജുകളിലെ പ്രവേശന പരീക്ഷയാണ് നാളെ നിശ്ചയിച്ചിരിക്കുന്നത്. കാരക്കോണത്തെ സീറ്റുകളില്‍ പ്രവേശനം നടത്തിയതിലൂടെ നാളെ നടക്കുന്ന പ്രവേശന പരീക്ഷ പ്രഹസനമാവും. കാരക്കോണം മെഡിക്കല്‍ കോളജില്‍ തലവരിപ്പണം വാങ്ങിയ സംഭവത്തെക്കുറിച്ചു അന്വേഷിക്കുമെന്നു ആരോഗ്യമന്ത്രി അടൂര്‍ പ്രകാശ് അറിയിച്ചു. സര്‍ക്കാരുമായി ധാരണയുണ്ടാക്കിയശേഷം ഉയര്‍ന്ന ഫീസ് വാങ്ങിയതു തെറ്റായ നടപടിയാണെന്നും മന്ത്രി പ്രതികരിച്ചു. അതേസമയം, ഏത് അന്വേഷണത്തെയും നേരിടാന്‍ തയ്യാറാണെന്നു കാരക്കോണം മെഡിക്കല്‍ കോളജ് മാനേജ്‌മെന്റ് അധികൃതര്‍ വ്യക്തമാക്കി. പ്രവേശനത്തിനു തലവരിപ്പണം വാങ്ങിയിട്ടില്ല. എന്‍.ആര്‍.ഐ ക്വാട്ടയിലെ 15 സീറ്റുകളിലേയ്ക്കു മാത്രമാണ് നേരിട്ടു പ്രവേശനം നടത്തുന്നതെന്നും അധികൃതര്‍ അറിയിച്ചു.

തലവരിപ്പണം വാങ്ങിയ കാര്യത്തെക്കുറിച്ചു തനിയ്ക്കറിയില്ലെന്നു സ്വാശ്രയ മെഡിക്കല്‍ മാനേജ്‌മെന്റ് അസോസിയേഷന്‍ സെക്രട്ടറിയും കാരക്കോണം മാനേജ്‌മെന്റ് പ്രതിനിധിയുമായ അഡ്വ.സാജന്‍ പ്രസാദ് അറിയിച്ചു. കോളജ് ഡയറക്ടര്‍ അടക്കമുള്ളവരാണ് പ്രവേശനം നടത്തിയതെന്നും അദ്ദേഹം പറഞ്ഞു.

janayugom 130711