ദൂരെ മറ്റൊരു "ഭൂമി"?

ലണ്ടന്‍ : സൗരയൂഥത്തിന് പുറത്ത് മറ്റൊരു "ഭൂമി" തേടിയുള്ള അന്വേഷണത്തിന് വീണ്ടും പ്രതീക്ഷാജനകമായ ഫലം. ചെറുതും വലുതുമായ നിരവധി ഗ്രഹങ്ങള്‍ മുമ്പ് കണ്ടെത്തിയിട്ടുണ്ടെങ്കിലും ഭൂമിക്ക് സമാനമായി മണ്ണും വെള്ളവും വായുവുമുള്ള ഗോളത്തിന്റെ സാന്നിധ്യമാണ് പുതിയ പ്രതീക്ഷ നല്‍കുന്നത്. അമേരിക്കന്‍ ബഹിരാകാശ ഏജന്‍സിയായ നാസയാണ് ജീവന്റെ സാന്നിധ്യമുണ്ടാകാന്‍ സാധ്യതയുള്ള ഗ്രഹം കണ്ടെത്തിയത്. കെപ്ലര്‍ 22-ബി എന്ന പേരിട്ട ഗ്രഹത്തെ 2009 മാര്‍ച്ചില്‍ കെപ്ലര്‍ ബഹിരാകാശ ടെലിസ്കോപ് കണ്ടെത്തിയിരുന്നെങ്കിലും ഇക്കാര്യം സ്ഥിരീകരിച്ചത് തിങ്കളാഴ്ചയാണ്.

ഭൂമിയുടെ 2.4 ഇരട്ടി വലുപ്പമുള്ള കെപ്ലര്‍ 22-ബി ഭൂമിയില്‍നിന്ന് 600 പ്രകാശവര്‍ഷം അകലെയാണ്. 290 ദിവസംകൊണ്ടാണ് കെപ്ലര്‍ അതിന്റെ നക്ഷത്രത്തെ വലംവയ്ക്കുന്നത്. കെപ്ലറിലെ ഊഷ്മാവ് 22 ഡിഗ്രി സെല്‍ഷ്യസ് (72 ഡിഗ്രി ഫാരന്‍ഹീറ്റ്) ആണെന്ന് വ്യക്തമായിട്ടുണ്ട്. ഗ്രഹം നക്ഷത്രത്തില്‍നിന്ന് "ആവാസയോഗ്യമായ" ഭ്രമണപഥത്തിലാണ്. കൂടുതല്‍ അടുത്തിരുന്നാലുള്ള ചൂടോ അകന്നിരുന്നാലുള്ള തണുത്തുറയലോ ഇല്ലാത്തതാണ് ജീവസാന്നിധ്യത്തിന് പ്രതീക്ഷ നല്‍കുന്നത്. ജീവന്റെ നിലനില്‍പ്പിന് യോജിച്ച മണ്ണും അന്തരീക്ഷവും ജലവും ഉണ്ടാകുമെന്നാണ് കരുതുന്നതെന്ന് കെപ്ലര്‍ ടെലിസ്കോപ് പ്രിന്‍സിപ്പല്‍ ഇന്‍വെസ്റ്റിഗേറ്റര്‍ ബില്‍ ബൊറൂകി പറഞ്ഞു.

deshabhimani 071211