കേന്ദ്രമന്ത്രിയുടെ പ്രസ്താവന ആരോ പറഞ്ഞുകൊടുത്തത്: തിരുവഞ്ചൂര്‍

മുല്ലപ്പെരിയാര്‍ അണക്കെട്ട് സുരക്ഷിതമെന്ന് കേന്ദ്രമന്ത്രി

ന്യൂഡല്‍ഹി: മുല്ലപ്പെരിയാര്‍ അണക്കെട്ട് സുരക്ഷിതമാണെന്ന് കേന്ദ്ര ശാസ്ത്ര സാങ്കേതിക സഹമന്ത്രി അശ്വിനികുമാര്‍ . കാലപ്പഴക്കവും ഭൂചലനങ്ങളും കൊണ്ട് ദുര്‍ബലമായ അണക്കെട്ടിന്റെ സുരക്ഷ ഉറപ്പാക്കാന്‍ കേന്ദ്ര സര്‍ക്കാര്‍ ഇടപെട്ട് നടപടി സ്വീകരിക്കണമെന്ന് കേരളമൊന്നാകെ ആവശ്യപ്പെടുമ്പോഴാണ് കേന്ദ്രമന്ത്രിയുടെ നിരുത്തരവാദപരമായ പ്രസ്താവന. രണ്ട് സംസ്ഥാനങ്ങള്‍ തമ്മില്‍ നിലനില്‍ക്കുന്ന, സുപ്രീംകോടതിയുടെ മുന്നിലുള്ള പ്രശ്നത്തില്‍ കേന്ദ്രമന്ത്രി പക്ഷപാതപരമായ അഭിപ്രായപ്രകടനം നടത്തിയത് സത്യപ്രതിജ്ഞാലംഘനമാണെന്ന് ചൂണ്ടിക്കാണിക്കപ്പെടുന്നു.

അണക്കെട്ട് സുരക്ഷിതമാണെന്ന് ശാസ്ത്രീയപഠനങ്ങള്‍ തെളിയിച്ചെന്നാണ് ഹരിയാനയില്‍നിന്നുള്ള കോണ്‍ഗ്രസ് നേതാവ് കൂടിയായ അശ്വിനികുമാര്‍ പറഞ്ഞത്. വാര്‍ത്താസമ്മേളനത്തില്‍ ചോദ്യത്തിന് മറുപടി പറയുകയായിരുന്നു മന്ത്രി. പ്രശ്നം ഇപ്പോള്‍ സുപ്രീംകോടതിയുടെ പരിഗണനയിലാണ്. അണക്കെട്ടിന്റെ സുരക്ഷ ഉറപ്പുവരുത്താനാവശ്യമായ എല്ലാ നടപടിയും സ്വീകരിച്ചിട്ടുണ്ട്. തുടര്‍ന്നും സുരക്ഷ ഉറപ്പുവരുത്തും- മന്ത്രി കൂട്ടിച്ചേര്‍ത്തു. നേരത്തെ, തമിഴ്നാട്ടുകാരനും കോണ്‍ഗ്രസ് നേതാവുമായ കേന്ദ്ര ആഭ്യന്തരമന്ത്രി പി ചിദംബരവും സമാന പ്രസ്താവന നടത്തി. സുപ്രീകോടതി വിധി തമിഴ്നാടിന് അനുകൂലമായിരിക്കുമെന്നു വരെ ചിദംബരം പറഞ്ഞു. കേന്ദ്രമന്ത്രിയുടെ നിരുത്തരവാദപരമായ പ്രസ്താവന പ്രതിരോധമന്ത്രി എ കെ ആന്റണി ഇടപെട്ട് പിന്‍വലിപ്പിക്കണമെന്ന് സംസ്ഥാന ജലവിഭവമന്ത്രി പി ജെ ജോസഫ് ആവശ്യപ്പെട്ടു. പ്രശ്നത്തില്‍ പ്രധാനമന്ത്രി മന്‍മോഹന്‍സിങ്ങും കേന്ദ്ര ജലവിഭവമന്ത്രി പവന്‍കുമാര്‍ ബന്‍സാലും ആന്റണിയുമെല്ലാം ഇടപെട്ടിരിക്കെ സഹമന്ത്രിയുടെ പ്രസ്താവന അനുചിതമാണെന്ന് ജോസഫ് പറഞ്ഞു. അണക്കെട്ടിന്റെ ബലപരിശോധനയ്ക്കായി സുര്‍ക്കി സാമ്പിള്‍ ശേഖരിക്കാന്‍ നടക്കുന്ന ഡ്രില്ലിങ്ങില്‍ മതിയായ സുര്‍ക്കി കോറുകള്‍ ലഭിച്ചിട്ടില്ല. ഇതോടെ അണക്കെട്ട് സുരക്ഷിതമാണെന്ന തമിഴ്നാടിന്റെ വാദങ്ങള്‍ക്കുപോലും തിരിച്ചടിയുണ്ടായി. മാത്രമല്ല, 40 ലക്ഷം ജനങ്ങളുടെ സുരക്ഷ മുന്‍നിര്‍ത്തി പുതിയ അണക്കെട്ട് എന്ന കേരളത്തിന്റെ ആവശ്യം സുപ്രീംകോടതി നിയമിച്ച ഉന്നതാധികാരസമിതിയും അനുകൂലമായി പരിഗണിക്കുകയാണ്.

പുതിയ അണക്കെട്ടിന്റെ ഉടമസ്ഥതയും ജലനിയന്ത്രണവും സംബന്ധിച്ച വിശദാംശങ്ങള്‍ വരെ ഉന്നതാധികാരസമിതിയുടെ നിര്‍ദേശത്തെതുടര്‍ന്ന് കേരളം സമര്‍പ്പിച്ചിരുന്നു. പുതിയ അണക്കെട്ടിനെപ്പറ്റിയുള്ള അഭിപ്രായം സമര്‍പ്പിക്കാന്‍ തമിഴ്നാടിനോടും ഉന്നതാധികാരസമിതി നിര്‍ദേശിച്ചിരുന്നു. എന്നാല്‍ , അണക്കെട്ട് സുരക്ഷിതമാണെന്നും പുതിയ അണക്കെട്ട് നിര്‍മിക്കേണ്ട ആവശ്യമില്ലെന്നുമാണ് തമിഴ്നാടിന്റെ വാദം. ഉന്നതാധികാരസമിതിയുടെ അന്തിമ റിപ്പോര്‍ട്ട് വരാനിരിക്കെയാണ് തമിഴ്നാടിന്റെ വാദവുമായി കേന്ദ്രമന്ത്രി എത്തിയത്. പ്രശ്നപരിഹാരത്തിന് ചര്‍ച്ചകളിലൂടെ ഇടപെടാമെന്ന് കേരളത്തില്‍നിന്നുള്ള സര്‍വകക്ഷി സംഘത്തിന് കഴിഞ്ഞമാസം പ്രധാനമന്ത്രി മന്‍മോഹന്‍സിങ് ഉറപ്പ് നല്‍കിയിരുന്നു. ഉറപ്പ് നല്‍കി ഒരുമാസം പുര്‍ത്തിയായിട്ടും ഇടപെടാന്‍ കേന്ദ്രസര്‍ക്കാരിനും പ്രധാനമന്ത്രിക്കും കഴിഞ്ഞിട്ടില്ല. ഇതിനിടെയാണ് കേന്ദ്രമന്ത്രിയുടെ ഏകപക്ഷീയമായ പ്രസ്താവന. ഇതിനിടെ, ഇടുക്കിയെ തമിഴ്നാടിനോട് ചേര്‍ക്കണമെന്നാവശ്യപ്പെട്ട് കോണ്‍ഗ്രസ് നേതാവും തേനി എംപിയുമായ ജെ എം ആറൂണ്‍ ഞായറാഴ്ച തമിഴ്പത്രങ്ങളില്‍ പരസ്യം നല്‍കി.

കേന്ദ്രമന്ത്രിയുടെ പ്രസ്താവന ആരോ പറഞ്ഞുകൊടുത്തത്: തിരുവഞ്ചൂര്‍

കോഴിക്കോട്: മുല്ലപ്പെരിയാര്‍ അണക്കെട്ട് സുരക്ഷിതമാണെന്ന കേന്ദ്രമന്ത്രി അശ്വിനി കുമാറിന്റെ പ്രസ്താവന തെറ്റിദ്ധാരണയില്‍ നിന്നുണ്ടായതാണെന്ന് റവന്യൂ മന്ത്രി തിരുവഞ്ചൂര്‍ രാധാകൃഷ്ണന്‍ . മറ്റാരെങ്കിലും പറഞ്ഞുകൊടുത്തത് അദ്ദേഹം പറഞ്ഞതാവാനാണ് സാധ്യത. പുതിയ ഡാമെന്ന ആശയത്തില്‍ നിന്ന് കേരളം പിന്നോട്ടില്ലെന്നും കോഴിക്കോട് നടത്തിയ വാര്‍ത്താസമ്മേളനത്തില്‍ അദ്ദേഹം വ്യക്തമാക്കി. കേരളത്തില്‍ അനുഭവപ്പെടുന്ന രൂക്ഷമായ മണല്‍ക്ഷാമം പരിഹരിക്കാന്‍ സര്‍ക്കാര്‍ ശക്തമായ നടപടികള്‍ സ്വീകരിക്കുന്നുണ്ട്. കര്‍ണ്ണാടക, തമിഴ്നാട് സംസ്ഥാനങ്ങളില്‍ നിന്ന് മണല്‍ കൊണ്ടുവരുന്നത്് തീരുമാനിക്കാന്‍ തിരുവനന്തപുരം, കാസര്‍കോട് കലക്ടര്‍മാരെ ചുമതലപ്പെടുത്തി. പരിസ്ഥിതി പ്രശ്നങ്ങളെക്കുറിച്ച് പഠിച്ചശേഷം തുറമുഖങ്ങളില്‍ നിന്ന് മണല്‍ശേഖരിക്കുന്നത് ആലോചിക്കും. കേരളത്തില്‍ എല്ലാവര്‍ക്കും ഭൂമി ലഭിക്കാനുള്ള നടപടികള്‍ കൈക്കൊള്ളും. കോഴിക്കോട്, കാസര്‍കോട് ജില്ലകളിലാണ് ആദ്യം നടപ്പാക്കുക. ഈ ജില്ലകളില്‍ ആറ് മാസത്തിനകം ഭൂമിയില്ലാത്തവരെ കണ്ടെത്തി ഭൂമി നല്‍കും. ഭൂമി ലഭിച്ചവര്‍ക്ക് പട്ടയവും വിതരണം ചെയ്യുമെന്നും അദ്ദേഹം പറഞ്ഞു.

deshabhimani news