പി സി ജോര്‍ജ് പറയുന്നത് സര്‍ക്കാരിന് ബാധകമല്ല: ആര്യാടന്‍

കൊച്ചി: കൊച്ചി മെട്രോസംബന്ധിച്ച് ചീഫ് വിപ്പ് പി സി ജോര്‍ജ് പറയുന്നത് സര്‍ക്കാരിന് ബാധകമല്ലെന്ന് മന്ത്രി ആര്യാടന്‍ മുഹമ്മദ്. മന്ത്രിസഭയുടെ അഭിപ്രായത്തിന് വിരുദ്ധമായി പി സി ജോര്‍ജ് നടത്തിയ പ്രസ്താവനയോട് പ്രതികരിക്കുകയായിരുന്നു അദ്ദേഹം. സര്‍ക്കാരിന് മന്ത്രിസഭ പറയുന്നതാണ് ബാധകം. ജോര്‍ജ് പറയുന്ന കാര്യങ്ങള്‍ക്കുള്ള മറുപടി തന്നോടല്ല കെ എം മാണിയോടാണ് ചോദിക്കേണ്ടതെന്നും ആര്യാടന്‍ പറഞ്ഞു. പ്രതിരോധമന്ത്രി എ കെ ആന്റണിയെക്കുറിച്ച് തിങ്കളാഴ്ചത്തെ ചന്ദ്രിക ദിനപത്രത്തില്‍ വന്ന റിപ്പോര്‍ട്ട് തെറ്റും വാസ്തവവിരുദ്ധവുമാണ്. അത് ലീഗിന്റെ അഭിപ്രായമാണെങ്കില്‍ മറുപടി നല്‍കും. പത്രത്തിന്റെ പ്രിന്ററും പബ്ലിഷറും ഹൈദരലി ശിഹാബ് തങ്ങളാണ്. ആന്റണി കൊണ്ടുവന്ന അഞ്ചോ ആറോ പദ്ധതികള്‍ക്ക് എളമരം കരീം വളരെയധികം ശ്രമിച്ചിട്ടുണ്ടെന്നു മാത്രമാണ് അദ്ദേഹം വ്യക്തമാക്കിയത്- ആര്യാടന്‍ പറഞ്ഞു.