അരി മുടക്കിയത് കോണ്‍ഗ്രസ് നേതാക്കള്‍

എല്ലാ കാര്‍ഡുടമകള്‍ക്കും രണ്ടു രൂപയ്ക്ക് അരി നല്‍കുന്നത് മുടക്കാന്‍ തെരഞ്ഞെടുപ്പ് കമീഷന് പരാതി നല്‍കിയത് കോണ്‍ഗ്രസ്, യുഡിഎഫ് നേതാക്കള്‍. അരിവിതരണം തടഞ്ഞതിനെതിരെ കേന്ദ്ര തെരഞ്ഞെടുപ്പ് കമീഷന് മുഖ്യമന്ത്രി വി എസ് അച്യുതാനന്ദന്‍ ബുധനാഴ്ച പരാതി നല്‍കും. കുറഞ്ഞ വിലയ്ക്ക് അരി നല്‍കുന്നത് തെരഞ്ഞെടുപ്പ് പെരുമാറ്റച്ചട്ടലംഘനമാണെന്ന പരാതിയുമായി കേന്ദ്ര തെരഞ്ഞെടുപ്പ് കമീഷനെ സമീപിച്ചവരുടെ കൂട്ടത്തില്‍ കെ സുധാകരന്‍ എംപിയുമുണ്ട്. പ്രതിപക്ഷനേതാവ് ഉമ്മന്‍ചാണ്ടിയും കെപിസിസി പ്രസിഡന്റ് രമേശ് ചെന്നിത്തലയും പദ്ധതിക്കെതിരെ രംഗത്തിറങ്ങിയതിനുപിന്നാലെയാണ് തെരഞ്ഞെടുപ്പ് കമീഷന്‍ നടപടി.

രണ്ടു രൂപയ്ക്ക് അരി എല്ലാ കുടുംബത്തിനും നല്‍കാന്‍ ഫെബ്രുവരി 23ന്റെ മന്ത്രിസഭായോഗമാണ് തീരുമാനിച്ചത്. തെരഞ്ഞെടുപ്പ് പെരുമാറ്റച്ചട്ടം നിലവില്‍വന്നതാകട്ടെ മാര്‍ച്ച് ഒന്നിനും. രാജ്യത്തിന് മാതൃകയായ തീരുമാനം വ്യാപകമായി ചര്‍ച്ചചെയ്യപ്പെടുകയും പ്രശംസിക്കപ്പെടുകയും ചെയ്തതോടെ യുഡിഎഫ് അങ്കലാപ്പിലായി. തുടര്‍ന്ന് കേന്ദ്ര തെരഞ്ഞെടുപ്പ് കമീഷനും സംസ്ഥാന മുഖ്യതെരഞ്ഞെടുപ്പ് ഓഫീസര്‍ക്കും വ്യാപകമായി പരാതി അയക്കാന്‍ യുഡിഎഫ് നേതാക്കള്‍ നിര്‍ദേശം നല്‍കി.

പദ്ധതി തടഞ്ഞ് തിങ്കളാഴ്ച രാത്രി വൈകി പുറപ്പെടുവിച്ച ഉത്തരവ് ഏറെ ആശയക്കുഴപ്പം സൃഷ്ടിക്കുന്നതാണ്. പദ്ധതിയെപ്പറ്റി പ്രചാരണം നടത്തരുതെന്നുവരെ ഉത്തരവില്‍ പറയുന്നു. നേരത്തെതന്നെ തുടങ്ങിയ പദ്ധതികളും പ്രവൃത്തികളും കമീഷന്റെ അനുമതി കൂടാതെ സര്‍ക്കാരിന് തുടരാമെന്ന് മാതൃകാ പെരുമാറ്റച്ചട്ടം നടപ്പാക്കുന്നതുസംബന്ധിച്ച് തെരഞ്ഞെടുപ്പ് കമീഷന്‍ നേരത്തെ പുറപ്പെടുവിച്ച മാര്‍ഗനിര്‍ദേശങ്ങളില്‍ വ്യക്തമാക്കിയിരുന്നു. അരിവിതരണത്തിനുള്ള നടപടി ആരംഭിക്കുമ്പോള്‍ തെരഞ്ഞെടുപ്പ് പെരുമാറ്റച്ചട്ടങ്ങള്‍ നിലവില്‍വന്നിരുന്നില്ലെന്ന് സര്‍ക്കാര്‍ ചൂണ്ടിക്കാട്ടുന്നു. അരിവിതരണത്തിനുള്ള നടപടിക്രമങ്ങള്‍ ചട്ടലംഘനമല്ല. പദ്ധതിയില്‍ ബജറ്റില്‍ ഉള്‍പ്പെടുത്തിയതുമാണ്. ഈ സാഹചര്യത്തില്‍ തെരഞ്ഞെടുപ്പ് കമീഷന്റെ നടപടി പുനഃപരിശോധിക്കണമെന്ന് മുഖ്യമന്ത്രി ആവശ്യപ്പെടും.

രണ്ടു രൂപ അരി വിതരണം തടഞ്ഞത് ഗൂഢാലോചന

രണ്ടുരൂപയുടെ അരി വിതരണം 70 ലക്ഷം കുടുംബത്തിലേക്ക് വ്യാപിക്കുന്നത് തടഞ്ഞതിനു പിന്നില്‍ ഗൂഢാലോചന. തെരഞ്ഞെടുപ്പ് പെരുമാറ്റച്ചട്ടം നിലവില്‍ വരുംമുമ്പ് സര്‍ക്കാര്‍ പ്രഖ്യാപിച്ചതാണെന്നും നിലവിലുള്ള പദ്ധതി വ്യാപിപ്പിക്കുക മാത്രമാണ് ചെയ്യുന്നതെന്നുമുള്ള സര്‍ക്കാരിന്റെ വാദം അംഗീകരിക്കാതെയാണ് അരി വിതരണത്തിനുള്ള നടപടിക്രമങ്ങള്‍ തെരഞ്ഞെടുപ്പു കമീഷന്‍ തടഞ്ഞത്. സമീപകാല സംഭവങ്ങളില്‍ അടിപതറിയ യുഡിഎഫ് രണ്ടുരൂപ അരിക്കെതിരെ വ്യാപകമായ പ്രചാരണം ആരംഭിച്ചിരുന്നു. ഇതിന്റെ തുടര്‍ച്ചയായി കൊല്ലം കലക്ടറാണ് അരി വിതരണത്തിനുള്ള അപേക്ഷയുടെ വിതരണം ആദ്യം തടഞ്ഞത്. ഇതിനെതിരെ സംസ്ഥാന സര്‍ക്കാര്‍ തെരഞ്ഞെടുപ്പു കമീഷനെ സമീപിച്ചിരുന്നു. പുതിയ ആനുകൂല്യമല്ല സര്‍ക്കാര്‍ നല്‍കുന്നതെന്നും കലക്ടറുടെ നടപടി ചട്ടവിരുദ്ധമാണെന്നും സര്‍ക്കാര്‍ പരാതിയില്‍ ചൂണ്ടിക്കാട്ടി. ഇത് ഫയലില്‍ സ്വീകരിച്ചശേഷം സര്‍ക്കാരിന് മറുപടി പോലും നല്‍കാതെ അരി വിതരണം സംസ്ഥാന വ്യാപകമായി തടഞ്ഞ് ചീഫ് ഇലക്ടറല്‍ ഓഫീസര്‍ നളിനി നെറ്റോ തിങ്കളാഴ്ച രാത്രി വാര്‍ത്താക്കുറിപ്പ് ഇറക്കിയത്. ഇത് ദുരൂഹത വര്‍ധിപ്പിക്കുന്നു.

കേരളത്തില്‍ പട്ടിണി കിടക്കുന്ന ഒരു കുടുംബവുമില്ലെന്ന് ഉറപ്പാക്കുന്നതിന് എപിഎല്‍- ബിപിഎല്‍ വ്യത്യാസമില്ലാതെ എല്ലാ കാര്‍ഡുടമകള്‍ക്കും കിലോക്ക് രണ്ടുരൂപ നിരക്കില്‍ അരി നല്‍കാന്‍ ഫെബ്രുവരി 23നു ചേര്‍ന്ന മന്ത്രിസഭായോഗമാണ് തീരുമാനിച്ചത്. ഏഴു ദിവസത്തിനു ശേഷമാണ് പെരുമാറ്റച്ചട്ടം നിലവില്‍ വന്നത്. അരിവിതരണത്തിനുള്ള നടപടിക്രമങ്ങള്‍ അതിനു മുമ്പേ ആരംഭിക്കുകയും ചെയ്തിരുന്നു. പ്രതിമാസം 10 കിലോ അരിയും രണ്ടു കിലോ ഗോതമ്പുമാണ് കാര്‍ഡുടമകള്‍ക്ക് രണ്ടുരൂപ നിരക്കില്‍ 14,235 റേഷന്‍കടയിലൂടെ വിതരണം ചെയ്യുക. 70 ലക്ഷത്തിലേറെ കുടുംബത്തിന് പദ്ധതിയുടെ പ്രയോജനം ലഭിക്കും. പ്രതിമാസം 27 കോടിയുടെ അധിക ബാധ്യതയാണ് സര്‍ക്കാര്‍ ഇതിലൂടെ ഏറ്റെടുത്തത്. 25,000 രൂപയില്‍ കൂടുതല്‍ മാസവരുമാനമോ രണ്ടര ഏക്കറില്‍ കൂടുതല്‍ സ്ഥലമോഉള്ളവര്‍ക്ക് ഈ ആനുകൂല്യമില്ല. രണ്ടുലക്ഷത്തില്‍ താഴെ കാര്‍ഡുടമകളേ ഈ വിഭാഗങ്ങളില്‍ ഉള്‍പ്പെടൂ

ഭക്ഷ്യസുരക്ഷാ നിയമത്തിന്റെ മറവില്‍ പൊതുവിതരണ ശൃംഖലയില്‍നിന്ന് കൂടുതല്‍ പേരെ ഒഴിവാക്കാന്‍ കേന്ദ്രസര്‍ക്കാര്‍ ശ്രമിക്കുന്നതിനിടെയാണ് സംസ്ഥാനം എല്ലാ കുടുംബത്തിനും രണ്ടു രൂപ നിരക്കില്‍ അരി നല്‍കാന്‍ സര്‍ക്കാര്‍ തുടക്കമിട്ടത്. കേന്ദ്രം 6.20 രൂപയ്ക്ക് നല്‍കുന്ന ബിപിഎല്‍ അരി രണ്ടുരൂപയ്ക്ക് വിതരണം ചെയ്യുമ്പോള്‍ കിലോക്ക് 4.20 രൂപ നിരക്കില്‍ സംസ്ഥാന സര്‍ക്കാര്‍ പണം മുടക്കുന്നു. എപിഎല്‍ കുടുംബങ്ങള്‍ക്കായി 8.90 രൂപയ്ക്ക് കിട്ടുന്ന അരിയും 6.70 രൂപയ്ക്ക് തരുന്ന ഗോതമ്പും രണ്ടുരൂപ നിരക്കില്‍ ജനങ്ങളിലെത്തിക്കാന്‍ യഥാക്രമം 6.90 രൂപയും 4.70 രൂപയും സബ്സിഡി നല്‍കുന്നു. എല്ലാ കുടുംബത്തിലേക്കും രണ്ടുരൂപയുടെ അരി എത്തുന്നത് സംസ്ഥാനത്തെ വിലക്കയറ്റം തടയുന്നതില്‍ നിര്‍ണായകമാകും.

അരി തടഞ്ഞ വാര്‍ത്തയും മനോരമ തടഞ്ഞു

കിലോയ്ക്ക് രണ്ടു രൂപ നിരക്കില്‍ അരി നല്‍കുന്ന പദ്ധതി എല്ലാ കുടുംബത്തിനും ബാധകമാക്കാനുള്ള തീരുമാനം തെരഞ്ഞെടുപ്പു കമീഷന്‍ തടഞ്ഞത് മലയാള മനോരമ അറിഞ്ഞില്ല. അരിവിതരണം അട്ടിമറിക്കാനുള്ള കോണ്‍ഗ്രസ് സമ്മര്‍ദത്തിനു വഴങ്ങി ചൊവ്വാഴ്ച രാത്രി തെരഞ്ഞെടുപ്പു കമീഷന്‍ പുറപ്പെടുവിച്ച ഉത്തരവിന്റെ വാര്‍ത്ത പ്രസിദ്ധീകരിക്കാത്ത ഏക പത്രമാണ് മനോരമ. എപിഎല്‍, ബിപിഎല്‍ വ്യത്യാസമില്ലാതെ രണ്ടു രൂപയ്ക്ക് അരി നല്‍കാനുള്ള മന്ത്രിസഭാ തീരുമാനവും ഈ പത്രം തമസ്കരിച്ചിരുന്നു. മന്ത്രിസഭാ തീരുമാനം മുഖ്യമന്ത്രി വാര്‍ത്താസമ്മേളനത്തില്‍ വിശദീകരിച്ചതാണ്. എന്നിട്ടും മനോരമ ആ വാര്‍ത്ത പ്രസിദ്ധീകരിച്ചില്ല. യുഡിഎഫ് സമ്മര്‍ദത്തില്‍ രണ്ടു രൂപ അരി വിതരണം തടയുന്നത് ജനവികാരത്തിനെതിരാകുമെന്ന് മനോരമയ്ക്ക് നന്നായറിയാം. അതുകൊണ്ടാണ് ഇക്കാര്യവും മറച്ചുവയ്ക്കാന്‍ അവര്‍ നിശ്ചയിച്ചത്.

ദേശാ‍ഭിമാനി 090311