വസ്ത്രധാരണ രീതിയാണ് പ്രശ്നമെന്ന് മന്ത്രിയും; പ്രതിഷേധം വ്യാപകം

സംസ്ഥാന സര്‍ക്കാര്‍ സംഘടിപ്പിച്ച "മൂല്യബോധനയാത്ര" സമാപന പരിപാടിയില്‍ പെണ്‍കുട്ടികള്‍ക്കെതിരെ നടത്തിയ മര്യാദകെട്ട പ്രയോഗത്തില്‍ പ്രതിഷേധം വ്യാപകമാകവെ, അവഹേളനത്തെ ന്യായീകരിച്ച് വിദ്യാഭ്യാസമന്ത്രിയും. പെണ്‍കുട്ടികളുടെ വസ്ത്രധാരണ രീതിയും മൊബൈല്‍ഫോണ്‍ ഉപയോഗവുമാണ് കുറ്റകൃത്യങ്ങള്‍ക്ക് ഹേതുവാകുന്നതെന്നായിരുന്നു വിദ്യാഭ്യാസമന്ത്രി പി കെ അബ്ദുറബ്ബിന്റെ പരാമര്‍ശം. സംസ്ഥാനസര്‍ക്കാര്‍ സംഘടിപ്പിച്ച "മൂല്യബോധനയാത്രയുടെ" സമാപനചടങ്ങിന് അയച്ച സന്ദേശത്തിലാണ് മന്ത്രിയുടെ വസ്ത്രധാരണോപദേശം. മോശം വസ്ത്രധാരണരീതിയും ധാര്‍മികബോധം നഷ്ടപ്പെടുന്നതുമാണ് പലപ്പോഴും കുറ്റകൃത്യം ആവര്‍ത്തിക്കാന്‍ കാരണമാകുന്നതെന്നാണ് മന്ത്രിയുടെ സന്ദേശം. പെണ്‍കുട്ടികളുടെ വസ്ത്രധാരണരീതിയാണ് സകല കുഴപ്പങ്ങള്‍ക്കും കാരണമെന്നും പെണ്‍കുട്ടികള്‍ വീട്ടില്‍ അടങ്ങിയൊതുങ്ങി ജീവിച്ചാലേ പ്രശ്നങ്ങള്‍ ഇല്ലാതാകൂവെന്നുമുള്ള ജാഥാക്യാപ്റ്റനും അധ്യാപകനുമായ ഡോ. രജിത്കുമാറിന്റെ പരാമര്‍ശം കടുത്ത പ്രതിഷേധത്തിന് വഴിവച്ചിരുന്നു. ഇതിനുപിന്നാലെയാണ് വസ്ത്രധാരണ ബോധവല്‍ക്കരണവുമായി വിദ്യാഭ്യാസമന്ത്രിയും രംഗത്തെത്തിയത്.

വെള്ളിയാഴ്ച തിരുവനന്തപുരം വനിതാ കോളേജില്‍ നടന്ന സമാപനചടങ്ങിലാണ് ഡോ. രജിത്കുമാര്‍ പെണ്‍കുട്ടികളെ അവഹേളിച്ചത്. സ്ത്രീകള്‍ക്കെതിരെയും കുട്ടികള്‍ക്കെതിരെയും വര്‍ധിച്ചുവരുന്ന ധാര്‍മിക ഭ്രംശനത്തിനും അക്രമത്തിനുമെതിരെ വിദ്യാര്‍ഥി സമൂഹത്തെ "ഉണര്‍ത്താന്‍" വേണ്ടിയായിരുന്നു സംസ്ഥാനസര്‍ക്കാരിന്റെ "മൂല്യബോധനയാത്ര". ഈ ചടങ്ങില്‍തന്നെ പെണ്‍കുട്ടികളെ പരസ്യമായി അപഹസിച്ചത് സ്ത്രീസംഘടനകളുടെ പ്രതിഷേധത്തിനും വഴിയൊരുക്കിയിട്ടുണ്ട്. മതിലു ചാടുന്നവരും മൊബൈല്‍ഫോണില്‍ കിടന്നുറങ്ങുന്നവരുമാണ് പെണ്‍കുട്ടികളെന്നും പരാമര്‍ശമുണ്ടായി. കാലടി ശങ്കര കോളേജില്‍ ബയോളജി അധ്യാപകനായ ഡോ. രജിത്കുമാര്‍ വിഎച്ച്എസ്ഇ വിഭാഗം എന്‍എസ്എസിന്റെ സംസ്ഥാന പ്രോഗ്രാം ഓഫീസറാണ്. ഡെപ്യൂട്ടേഷനിലാണ് എന്‍എസ്എസ് പ്രോഗ്രാം ഓഫീസറായി പ്രവര്‍ത്തിക്കുന്നത്. ഇതിനെതുടര്‍ന്നാണ് "മൂല്യബോധനയാത്രയുടെ" ക്യാപ്റ്റനായി തീരുമാനിച്ചത്. ജനുവരി 31ന് കാസര്‍കോട്ടുനിന്നാണ് യാത്ര ആരംഭിച്ചത്. സര്‍ക്കാര്‍ പരിപാടിയുടെ മറവില്‍ പെണ്‍കുട്ടികളെ പരസ്യമായി അപമാനിച്ച സംഭവത്തില്‍ കര്‍ശന നടപടി വേണമെന്ന ആവശ്യവും ഉയര്‍ന്നിട്ടുണ്ട്.

deshabhimani 100213