സംസ്ഥാന തലസ്ഥാനത്തിന്റെ മുഖഛായ മാറ്റുന്ന ബസ്ടെര്‍മിനല്‍ നിര്‍മാണത്തിന് കഴിഞ്ഞ എല്‍ഡിഎഫ് ഭരണകാലത്താണ് തുടക്കം കുറിച്ചത്. തുടര്‍ന്ന് ദ്രുതഗതിയില്‍ നിര്‍മാണം തുടങ്ങിയെങ്കിലും യുഡിഎഫ് ഭരണം വന്നതോടെ നിര്‍മാണം ഇഴഞ്ഞുനീങ്ങി. എന്നിട്ടും ജനങ്ങളുടെ കണ്ണില്‍ പൊടിയിടാനാണ് സര്‍ക്കാര്‍ ശ്രമിച്ചത്. രണ്ട് ആഴ്ചയ്ക്കുള്ളില്‍ ബസ് ടെര്‍മിനല്‍ പൂര്‍ണതോതില്‍ പ്രവര്‍ത്തനസജ്ജമാക്കുമെന്നാണ് അന്ന് മുഖ്യമന്ത്രിയും ഗതാഗാതമന്ത്രി തിരുവഞ്ചൂര്‍ രാധാകൃഷ്ണനും അവകാശപ്പെട്ടത്. എന്നാല്‍, മൂന്നാഴ്ച കഴിഞ്ഞപ്പോള്‍ തട്ടിക്കൂട്ടിയ താല്‍ക്കാലിക സംവിധാനം പൊളിച്ചുനീക്കുന്ന പ്രവൃത്തിമാത്രമാണ് നടന്നത്. 25 ബസിന് ഒരേസമയം പുറപ്പെടാനായി ഒരുക്കിയതെന്നു പറഞ്ഞ് ഉദ്ഘാടനംചെയ്ത പ്ലാറ്റ്ഫോമുകള്‍ മുഴുവന്‍ ജെസിബി ഉപയോഗിച്ചാണ് പൊളിച്ചുനീക്കിയത്. ഇവിടെ പാകിയിരുന്ന ടൈല്‍സുകളും ട്രാക്ക് വേര്‍തിരിച്ചിരുന്ന കോണ്‍ക്രീറ്റുകളും കിളച്ചുകോരി മാറ്റി. ഇതേ പോക്ക് പോയാല്‍ ഒരു വര്‍ഷം കഴിഞ്ഞാലും ബസ് ടെര്‍മിനല്‍ നിര്‍മാണം പൂര്‍ത്തിയാക്കാനാകില്ല.
ഉദ്ഘാടനത്തിനായി ലക്ഷങ്ങള്‍ പൊടിച്ചതിനു പുറമെയാണ് ലക്ഷങ്ങള്‍ ധൂര്‍ത്തടിച്ച് പേരിനൊരു ബസ്ബേ തട്ടിക്കൂട്ടിയതും. അര്‍ധവൃത്താകൃതിയില്‍ 12 നിലയിലായാണ് ടെര്‍മിനല്‍. കോംപ്ലക്സിന്റെ എട്ടുനിലകളില്‍ നിര്‍മാണപ്രവൃത്തി ഇനിയും ബാക്കിയാണ്. മുഴുവന്‍ നിലകളുടെയും കോണ്‍ക്രീറ്റ് മാത്രമാണ് പൂര്‍ത്തിയായത്. ഉദ്ഘാടനത്തിനായി നിര്‍മാണയന്ത്രങ്ങള്‍ സ്ഥലത്തുനിന്ന് മാറ്റിയശേഷം ലക്ഷങ്ങള്‍ ചെലവഴിച്ച് ബസ്ബേ എന്നപേരില്‍ ടൈല്‍സ് പാകുകയായിരുന്നു. എന്നാല്‍, ഉദ്ഘാടനത്തിനുശേഷം പുറത്തുനിന്ന് ആളുകള്‍ക്ക് കാണാനാകാത്തവിധം മറച്ചശേഷം ബസ് ബേ പൊളിക്കുകയായിരുന്നു. മൂന്നരലക്ഷത്തില്‍പ്പരം ചതുരശ്ര അടിയുള്ള കോംപ്ലക്സില്‍ എട്ടുനിലകളില്‍ ഫ്ളോറിങ് ബാക്കിയാണ്. മള്‍ട്ടി പര്‍പ്പസ് തിയറ്ററുകള്‍, ഫുഡ് കോര്‍ട്ടുകള്‍ എന്നിവയുടെയും പണി എങ്ങുമെത്തിയിട്ടില്ല. എസ്കലേറ്റര്‍, ലിഫ്റ്റ്, സെന്‍ട്രലൈസ്ഡ് എയര്‍കണ്ടീഷന്‍ എന്നിവയുടെയെല്ലാം പണി എങ്ങുമെത്തിയിട്ടില്ല. കഴിഞ്ഞ എല്‍ഡിഎഫ് സര്‍ക്കാരാണ് ബസ് ടെര്‍മിനല്‍ വിഭാവനംചെയ്ത് നിര്‍മാണം തുടങ്ങിയത്.
deshabhimani
No comments:
Post a Comment