കെഎല്‍ 17 ഇ-18 വെളുത്ത അംബാസിഡര്‍ കാര്‍ ദൂരെ തല കാണിച്ചപ്പോള്‍ത്തന്നെ രാമമംഗലം ന്യൂ ജങ്ഷനില്‍ കൂടിയ നാട്ടുകാരും പാര്‍ടി പ്രവര്‍ത്തകരും മുന്നോട്ടുനീങ്ങി. കത്തുന്ന വെയിലില്‍ കുറേ നേരമായി അവര്‍ പിറവത്തെ എല്‍ഡിഎഫ് സ്ഥാനാര്‍ഥി എം ജെ ജേക്കബിനെ കാത്തുനില്‍ക്കുന്നു. "ഇങ്ക്വിലാബിന്‍ മക്കള്‍ ഞങ്ങള്‍ ..." എന്ന പാട്ട് സ്പീക്കറുകളില്‍നിന്ന് ഒഴുകിയെത്തുന്നു. ചുവന്ന കൊടി തോരണങ്ങള്‍കൊണ്ട് അലങ്കരിച്ച കവല വൈകിട്ടത്തെ പൊതുസമ്മേളനത്തിനുള്ള ഒരുക്കത്തിലാണ്. നിറപുഞ്ചിരിയോടെ എം ജെ കാറില്‍ നിന്നിറങ്ങി. എല്ലാവര്‍ക്കും കൈ കൊടുത്തു. കാത്തുനിന്ന ചാനലുകാര്‍ മൈക്ക് നീട്ടി വികസനസങ്കല്‍പ്പം ചോദിച്ചപ്പോള്‍ അദ്ദേഹം പിറവത്തെക്കുറിച്ചും താന്‍ നടത്തിയ വികസനപ്രവര്‍ത്തനം, മണ്ഡലത്തിന്റെ ഭാവി വികസനസാധ്യതകള്‍ എന്നിവയെക്കുറിച്ചും വാചാലനായി- "എറണാകുളം വികസിക്കുകയാണ്. എന്തായാലും ഇനി പടിഞ്ഞാറ് അറബിക്കടലിലോട്ട് വികസിക്കാന്‍ കഴിയില്ല. കൊച്ചിയുടെ ഉപഗ്രഹ നഗരങ്ങളായി കൂത്താട്ടുകുളത്തെയും പിറവത്തെയും മാറ്റുകയാണ് ലക്ഷ്യം"-എം ജെ പറഞ്ഞവസാനിപ്പിച്ചു.
രാവിലെ ഉന്നേക്കാട് തൊഴിലുറപ്പുപദ്ധതിക്കു കീഴില്‍ ജോലിചെയ്യുന്ന സ്ത്രീകളെ കണ്ടപ്പോള്‍ ഉത്തരവാദിത്വമുള്ള ഗൃഹനായകന്റെ റോളായി എം ജെയ്ക്ക് - "കാപ്പി കുടിച്ചിട്ട് മതി കേട്ടോ കൊത്തും കിളയുമൊക്കെ..."- അവരോട് ജേക്കബ്ബേട്ടന്റെ സ്നേഹനിര്‍ദേശം. അടുത്തുള്ള ബസ്സ്റ്റോപ്പിലേക്ക് എത്തിയപ്പോള്‍ ബസ് കാത്ത് മുഷിഞ്ഞ യുവതി ജേക്കബ്ബേട്ടന്റെ അരികിലെത്തി പരാതി പറഞ്ഞു- "ഇവിടെ ബസിനൊരു വ്യവസ്ഥയുണ്ടാക്കിത്തരണം". വിഷയം "ഏറ്റെടുത്തെന്ന്" ഉറപ്പ് നല്‍കിയിട്ടാണ് എം ജെ അവിടംവിട്ടത്. മുന്‍ എംഎല്‍എ എം പി വര്‍ഗീസ്, സാബു ജോസഫ്, സുമിത് സുരേന്ദ്രന്‍ , സിപിഐ എം ലോക്കല്‍ സെക്രട്ടറി പി എം പൈലി, സിപിഐ നേതാവ് കെ വി മത്തായി, കെ വി വര്‍ക്കി എന്നിവര്‍ എം ജെയെ അനുഗമിച്ചു. വഴിയരികിലെ ഫ്ളെക്സുകളില്‍ "വികസനത്തിന്റെ സൂര്യ തേജസ്സ്" എന്ന വാക്കുകള്‍ക്കു താഴെ മോട്ടോര്‍ ബൈക്കോടിക്കുന്ന എം ജെ നിറഞ്ഞുനിന്നു.
രാമമംഗലം, ഉന്നേക്കാട്, കോട്ടപ്പുറം, കടവില്‍ , കിഴുമുറികടവ്, മാമലശേരി... എം ജെ ശനിയാഴ്ച സഞ്ചരിച്ച വഴികളിലെല്ലാം സ്ത്രീകളും കുട്ടികളും മുതിര്‍ന്നവരും അദ്ദേഹത്തെ കാത്തുനിന്നിരുന്നു. എല്ലായിടത്തും ഓരോ ചാനലുകാര്‍ അദ്ദേഹത്തെ കണ്ടു. മാമലശേരിയില്‍ തന്നെ കണ്ട ചാനലുകാരോട് അദ്ദേഹം പറഞ്ഞവസാനിപ്പിച്ച വാക്കുകള്‍ ഇതായിരുന്നു- " ചിലര്‍ വികസനം, വികസനം എന്ന് പറഞ്ഞോണ്ടിരിക്കും. പക്ഷേ, അങ്ങനെ പറഞ്ഞോണ്ടിരുന്നാല്‍ വികസനം വരില്ലല്ലോ. പറഞ്ഞ വാക്ക് പാലിക്കാന്‍ അക്ഷീണം പ്രയത്നിക്കണം. എന്നാലേ വികനത്തിന് രൂപം വരുള്ളു". എംജെയെ അറിയുന്ന പിറവത്തുകാരോട് ഇത് ഇങ്ങനെ പറഞ്ഞ് ബോധ്യപ്പെടുത്തേണ്ട കാര്യമില്ല. കാരണം, ഇന്ന് പുറംലോകം കാണുന്ന വികസ്വര പിറവത്തിന് ജേക്കബ്ബേട്ടന്റെ പങ്ക് എത്രത്തോളമുണ്ടെന്ന് അവര്‍ക്കറിയാം....
എല്‍ഡിഎഫ് സ്ക്വാഡുകള്‍
പാമ്പാക്കുട ടൗണിലേക്ക് ഓട്ടോയില്‍ വാഴക്കുലയും കയറ്റിപോകുകയായിരുന്നു സന്തോഷ്. ചെത്തുകാരന്‍ കേശവന്‍ ചേട്ടന്റെ വീട്ടില്‍ എല്‍ഡിഎഫ് പ്രവര്‍ത്തകരുടെ സ്ക്വാഡ് വോട്ടഭ്യര്‍ഥന നടത്തുകയായിരുന്നു. സ്ക്വാഡ് ലീഡര്‍ ഉലഹന്നാന്‍ മാഷ് ഒന്നു നീട്ടിവിളിച്ചു: "സന്തോഷേ ഒന്നിറങ്ങിയേച്ചു പോ. തെരഞ്ഞെടുപ്പിന്റെ ചൂടൊന്നും നിനക്ക് ഏറ്റിട്ടില്ലാന്ന് തോന്നണു." വണ്ടി തണലിലേക്കു നീക്കിനിര്‍ത്തി സന്തോഷ് ഇറങ്ങി. "ഇത്തവണ എല്‍ഡിഎഫിനാണ് മാഷെ സാധ്യത. പക്ഷെ യുഡിഎഫ് സ്ഥാനാര്‍ഥിയെ ജയിപ്പിച്ചാല്‍ മണ്ഡലത്തിന് ഒരു മന്ത്രിയെ കിട്ടുമെന്നാണ് യുഡിഎഫിന്റെ വാഗ്ദാനം". രാഷ്ട്രീയ കരുനീക്കങ്ങള്‍ ഒരുപാടു കണ്ട ഉലഹന്നാന്‍ മാഷ് ചിരിച്ചുകൊണ്ടു പറഞ്ഞു: "ഈ തെരഞ്ഞെടുപ്പു കഴിയുന്നതോടെ കേരള കോണ്‍ഗ്രസ് ജേക്കബ് പിറവത്തിന്റെ രാഷ്ട്രീയ ഭൂപടത്തില്‍ ഉണ്ടാവില്ല; കഴിഞ്ഞതവണ വച്ച കെണി വീഴാത്തതിന്റെ നിരാശ കോണ്‍ഗ്രസുകാര്‍ക്കുണ്ട്. പിന്നെ, വികസനമെന്ന വാക്കിന്റെ പര്യായമായിമാറിയ എം ജെ ജേക്കബ് ഇപ്പുറത്തും."
തെരഞ്ഞെടുപ്പു തീയതി പ്രഖ്യാപിച്ചതോടെയാണ് മൂന്നാം വട്ട സ്ക്വാഡ്പ്രവര്‍ത്തനം ആരംഭിച്ചത്. രാഷ്ട്രീയ വിശദീകരണമടങ്ങുന്ന ലഘുലേഖ വിതരണംചെയ്താണ് പ്രവര്‍ത്തനം. സിപിഐ എമ്മിന്റെ വര്‍ഗ-ബഹുജന സംഘടനകളും പ്രത്യേക സ്ക്വാഡുകളായി പ്രവര്‍ത്തിക്കുന്നു. ശനിയാഴ്ച പാമ്പാക്കുട ടൗണ്‍ ബൂത്ത് കേന്ദ്രീകരിച്ചു നടന്ന സ്ക്വാഡ്പ്രവര്‍ത്തനത്തിനിടെ പ്രവര്‍ത്തകര്‍ , പഞ്ചായത്തു തെരഞ്ഞെടുപ്പില്‍ യുഡിഎഫിന്റെ 13-ാം വാര്‍ഡിലെ സ്ഥാനാര്‍ഥിയായിരുന്ന സുനി പ്രദീപിന്റെ വീട്ടിലുമെത്തി. ഇത്തവണ രണ്ടു മുന്നണികളും ശക്തമായ മത്സരമാണ് നടത്തുന്നതെന്നായിരുന്നു അവരുടെ പ്രതികരണം. എതിര്‍ചേരിയില്‍ നിന്നവരെപ്പോലും ഹൃദയപക്ഷത്തേക്കു കൊണ്ടുവന്ന എല്‍ഡിഎഫ് സ്ഥാനാര്‍ഥി എം ജെ ജേക്കബിന്റെ ജനകീയത സമ്മതിച്ചുകൊണ്ടും എല്‍ഡിഎഫ്-യുഡിഎഫ് ഭരണങ്ങള്‍ ശരിയായി വിലയിരുത്തിയും പിറവം ജനത വീണ്ടും ഇടത്തോട്ടു ചായുന്നതിന്റെ സൂചനയാണ് സുനി പ്രദീപ് പറയാതെ പറഞ്ഞത്.
വിജയമേകാന്‍ സ്ത്രീകളും രംഗത്ത്
നാടിന്റെ വികസനത്തിന് വോട്ടുതേടിയുള്ള എല്‍ഡിഎഫ് സ്ഥാനാര്‍ഥിയുടെ തെരഞ്ഞെടുപ്പു പ്രചാരണത്തില്‍ വനിതകളുടെ സജീവസാന്നിധ്യം. മണ്ഡലത്തിന്റെ മുക്കിലും മൂലയിലും വീട്ടമ്മമാരുള്‍പ്പെടെയുള്ള വനിതകളുടെ പ്രത്യേക സ്ക്വാഡുകള്‍ വോട്ടഭ്യര്‍ഥനയുമായി നിറഞ്ഞുനില്‍ക്കുന്നു. രാവിലെ തിരക്കിട്ട് വീട്ടുജോലികള്‍ ഒതുക്കി എം ജെ ജേക്കബ്ബിന്റെ വോട്ടഭ്യര്‍ഥനയുമായി വീടുകള്‍ കയറുകയാണ് മണ്ഡലത്തിലെ എല്‍ഡിഎഫിന്റെ വനിതാപ്രവര്‍ത്തകരും അനുഭാവികളുമെല്ലാം. യുഡിഎഫ് സര്‍ക്കാര്‍ അധികാരത്തില്‍ വന്നശേഷം സ്ത്രീകള്‍ക്കുനേരെയുണ്ടായ വര്‍ധിച്ച അക്രമങ്ങളും വിലക്കയറ്റവുമെല്ലാം ചൂണ്ടിക്കാട്ടിയാണ് വനിതകള്‍ എം ജെ ജേക്കബ്ബിന് വോട്ടഭ്യര്‍ഥിക്കുന്നത്. കുടുംബബന്ധങ്ങള്‍ ഛിദ്രമാക്കുന്ന മദ്യത്തിന്റെ ഉപഭോഗം വര്‍ധിപ്പിക്കുന്നതിനും പിറവത്തുള്‍പ്പെടെ മദ്യശാല അനുവദിക്കുന്നതിന് യുഡിഎഫ് സര്‍ക്കാര്‍ കാണിച്ച അമിതവ്യഗ്രതയും വനിതാസ്ക്വാഡിലെ അംഗങ്ങള്‍ വീട്ടമ്മമാരെ ബോധ്യപ്പെടുത്തുന്നു. മണ്ഡലത്തിലാകെ മദ്യമൊഴുക്കി വോട്ടര്‍മാരെ സ്വാധീനിക്കാനുള്ള യുഡിഎഫ് ശ്രമം തിരിച്ചറിയണമെന്ന അഭ്യര്‍ഥനയും ഇവര്‍ മുന്നോട്ടുവയ്ക്കുന്നു. മണ്ഡലത്തിലെ പഞ്ചായത്തുകളിലെല്ലാം ബൂത്ത് അടിസ്ഥാനത്തില്‍ വനിതാ സ്ക്വാഡുകള്‍ വരുംദിവസങ്ങളില്‍ ഭവനസന്ദര്‍ശനം നടത്തും.
deshabhimani 260212
നാടിന്റെ വികസനത്തിന് വോട്ടുതേടിയുള്ള എല്‍ഡിഎഫ് സ്ഥാനാര്‍ഥിയുടെ തെരഞ്ഞെടുപ്പു പ്രചാരണത്തില്‍ വനിതകളുടെ സജീവസാന്നിധ്യം. മണ്ഡലത്തിന്റെ മുക്കിലും മൂലയിലും വീട്ടമ്മമാരുള്‍പ്പെടെയുള്ള വനിതകളുടെ പ്രത്യേക സ്ക്വാഡുകള്‍ വോട്ടഭ്യര്‍ഥനയുമായി നിറഞ്ഞുനില്‍ക്കുന്നു. രാവിലെ തിരക്കിട്ട് വീട്ടുജോലികള്‍ ഒതുക്കി എം ജെ ജേക്കബ്ബിന്റെ വോട്ടഭ്യര്‍ഥനയുമായി വീടുകള്‍ കയറുകയാണ് മണ്ഡലത്തിലെ എല്‍ഡിഎഫിന്റെ വനിതാപ്രവര്‍ത്തകരും അനുഭാവികളുമെല്ലാം. യുഡിഎഫ് സര്‍ക്കാര്‍ അധികാരത്തില്‍ വന്നശേഷം സ്ത്രീകള്‍ക്കുനേരെയുണ്ടായ വര്‍ധിച്ച അക്രമങ്ങളും വിലക്കയറ്റവുമെല്ലാം ചൂണ്ടിക്കാട്ടിയാണ് വനിതകള്‍ എം ജെ ജേക്കബ്ബിന് വോട്ടഭ്യര്‍ഥിക്കുന്നത്. കുടുംബബന്ധങ്ങള്‍ ഛിദ്രമാക്കുന്ന മദ്യത്തിന്റെ ഉപഭോഗം വര്‍ധിപ്പിക്കുന്നതിനും പിറവത്തുള്‍പ്പെടെ മദ്യശാല അനുവദിക്കുന്നതിന് യുഡിഎഫ് സര്‍ക്കാര്‍ കാണിച്ച അമിതവ്യഗ്രതയും വനിതാസ്ക്വാഡിലെ അംഗങ്ങള്‍ വീട്ടമ്മമാരെ ബോധ്യപ്പെടുത്തുന്നു. മണ്ഡലത്തിലാകെ മദ്യമൊഴുക്കി വോട്ടര്‍മാരെ സ്വാധീനിക്കാനുള്ള യുഡിഎഫ് ശ്രമം തിരിച്ചറിയണമെന്ന അഭ്യര്‍ഥനയും ഇവര്‍ മുന്നോട്ടുവയ്ക്കുന്നു.
ReplyDelete