Sunday, February 16, 2014

എഴുത്തുകാരെ നിശ്ശബ്ദമാക്കാന്‍ ശ്രമം

ന്യൂഡല്‍ഹി: അമേരിക്കന്‍ ഗവേഷക വെന്‍ഡി ഡോണിഗര്‍ രചിച്ച "ദ ഹിന്ദൂസ്: ആന്‍ ആള്‍ട്ടര്‍നേറ്റീവ് ഹിസ്റ്ററി" (ഹിന്ദു ഒരു ബദല്‍ ചരിത്രം) എന്ന പുസ്തകം പിന്‍വലിച്ച പ്രസാധകരുടെ നടപടിയില്‍ വ്യാപക പ്രതിഷേധം. പുസ്തകം പിന്‍വലിച്ച പെന്‍ഗ്വിന്‍ ഇന്ത്യയുടെ തീരുമാനത്തിനെതിരെ വിവിധ സംഘടനകളും സാംസ്കാരികനായകരും രംഗത്തുവന്നു. പുസ്തകം ഹിന്ദുക്കളെ അപമാനിക്കുന്നതാണെന്ന ആരോപണവുമായി ഹൈന്ദവ സംഘടന പ്രതിഷേധമുയര്‍ത്തിയതോടെയാണ് പുസ്തകം പെന്‍ഗ്വിന്‍ ഇന്ത്യ പിന്‍വലിച്ചത്. പുസ്തകം പിന്‍വലിക്കുകവഴി എഴുത്തുകാരെ നിശബ്ദരാക്കുകയാണ് ചെയ്തതെന്ന് സഫ്ദര്‍ ഹശ്മി മെമ്മോറിയല്‍ ട്രസ്റ്റ് (സഹ്മത്) പ്രസ്താവനയില്‍ പറഞ്ഞു. ഇര്‍ഫാന്‍ ഹബീബ്, സി പി ചന്ദ്രശേഖര്‍, മൃദുല മുഖര്‍ജി, എം കെ റെയ്ന, രാം റഹ്മാന്‍, ജയതിഘോഷ്, സോയ ഹസന്‍ എന്നിവരാണ്് പുസ്തകം പിന്‍വലിച്ച നടപടിക്കെതിരെ സംയുക്ത പ്രസ്താവനയിറക്കിയത്.

പുസ്തകം പിന്‍വലിച്ച നടപടിക്കെതിരെ ബുക്കര്‍ പ്രൈസ് ജേതാവ് അരുന്ധതി റോയിയും രൂക്ഷ വിമര്‍ശവുമായി രംഗത്തെത്തി. പ്രസാധനരംഗത്ത് വര്‍ഷങ്ങളുടെ പാരമ്പര്യമുള്ള പെന്‍ഗ്വിന്‍ ഇന്ത്യ ഇത്തരമൊരു നടപടി സ്വീകരിക്കുകവഴി നിസ്സാര സംഘടനയുടെ മുന്നില്‍ അപമാനിതരായെന്ന് അരുന്ധതിറോയി പറഞ്ഞു.

അതേസമയം, പുസ്തകം പിന്‍വലിച്ച നടപടിയെ പ്രസാധകരായ പെന്‍ഗ്വിന്‍ ഇന്ത്യ ന്യായീകരിച്ചു. അതതു രാജ്യങ്ങളിലെ നിയമം പാലിക്കാന്‍ ബാധ്യസ്ഥമാണെന്നും മതവികാരം വ്രണപ്പെടുത്തുന്ന തരത്തിലുള്ള പരാമര്‍ശങ്ങള്‍ പ്രചരിപ്പിക്കാന്‍ കഴിയില്ലെന്നും പെന്‍ഗ്വിന്‍ ഇന്ത്യ വാര്‍ത്താക്കുറിപ്പില്‍ പറഞ്ഞു. തങ്ങളുടെ ജീവനക്കാരെ ഭീഷണിയില്‍നിന്ന് സംരക്ഷിക്കേണ്ട ബാധ്യതയുണ്ടെന്നും പ്രസാധകര്‍ അറിയിച്ചു.

സംഘപരിവാര്‍ സംഘടനയുടെ പരാതിയില്‍ ന്യൂഡല്‍ഹിയിലെ ജില്ലാ കോടതിയില്‍ നടന്ന ഒത്തുതീര്‍പ്പുപ്രകാരം പുസ്തകം പിന്‍വലിക്കുന്നതായി പ്രസാധകരായ പെന്‍ഗ്വിന്‍ ബുക്സ് എഴുതി നല്‍കുകയായിരുന്നു. 2009ലാണ് പുസ്തകം പ്രസിദ്ധീകരിച്ചത്. ലോകപ്രശസ്ത എഴുത്തുകാരിയും അധ്യാപികയുമായ വെന്റി ഡോണിഗര്‍ ഹിന്ദു സംസ്കാരം, പുരാണകഥകള്‍ തുടങ്ങി വിഷയങ്ങളില്‍ ഇന്ത്യയില്‍ തങ്ങിയാണ് ഗവേഷണജോലികള്‍ നടത്തിയത്. സ്ത്രീ സ്വാതന്ത്ര്യം, ലൈംഗിക സങ്കല്‍പ്പങ്ങള്‍, പല കാലഘട്ടങ്ങളില്‍ പലതരത്തില്‍ വ്യാഖ്യാനിക്കപ്പെട്ട കര്‍മ-ധര്‍മ വിചാരങ്ങള്‍ തുടങ്ങിയവ 800 പേജുള്ള ഗ്രന്ഥത്തില്‍ ചര്‍ച്ചചെയ്യുന്നു. കെട്ടിച്ചമച്ച കഥകളും കൃത്യമല്ലാത്ത വിവരങ്ങളുമാണ് പുസ്തകത്തിലെന്ന് ആരോപിച്ചാണ് ശിക്ഷാ ബചാവോ ആന്ദോളന്‍ കോടതിയെ സമീപിച്ചത്. ഹിന്ദു സംസ്കാരത്തോടും പുരാണകഥകളോടും സംസ്കൃതഭാഷയോടുമുള്ള ആരാധനയും സ്നേഹവുമാണ് ഇന്ത്യയെക്കുറിച്ച് പഠിക്കാന്‍ പ്രേരിപ്പിച്ചതെന്ന് വെന്റി ഡോണിഗര്‍ സ്വകാര്യ ചാനലിനു നല്‍കിയ അഭിമുഖത്തില്‍ പറഞ്ഞിരുന്നു. ഋഗ്വേദം, കാമസൂത്രം, മനുസ്മൃതി തുടങ്ങിയ ഗ്രന്ഥങ്ങള്‍ ഡോണിഗര്‍ ഇംഗ്ലീഷിലേക്ക് വിവര്‍ത്തനംചെയ്തിട്ടുണ്ട്.

deshabhimani

No comments:

Post a Comment