തൊഴിലാളിവര്ഗപ്രസ്ഥാനത്തിന് അഭിമാനം പകര്ന്ന അഭൂതപൂര്വമായ ജനമുന്നേറ്റത്തിനാണ് വെള്ളിയാഴ്ച തലസ്ഥാനനഗരം സാക്ഷ്യംവഹിച്ചത്. സിപിഐ എം സംസ്ഥാന സമ്മേളനസമാപന റാലി അച്ചടക്കത്തിന്റെയും കരുത്തിന്റെയും ജനകീയാടിത്തറയുടെയും വിളംബരമായി. പ്രസ്ഥാനത്തെ നെഞ്ചേറ്റി കാത്തുസൂക്ഷിക്കുന്ന ജനലക്ഷങ്ങളും പോരാളികളുടെ വീര്യവുമായി സൈനികച്ചിട്ടയില് വീഥികളെ ത്രസിപ്പിച്ച ചെമ്പടയും തലസ്ഥാനം കണ്ട ഏറ്റവും മനുഷ്യസംഗമമായി. നഗരം ജനസമുദ്രമായി മാറിയിട്ടും എങ്ങും ഒരപസ്വരവുമുണ്ടായില്ല, അച്ചടക്കത്തോടെ ആ പ്രവാഹത്തിലലിഞ്ഞുചേര്ന്നവര് പ്രസ്ഥാനത്തിന്റെ അന്തസ്സും അഭിമാനവും ഉയര്ത്തിപ്പിടിച്ച് നാടിനു മാതൃകയായി. ഈ മുന്നേറ്റത്തിന് സാക്ഷികളായവര് മൂന്നു ലക്ഷത്തോളം വരുന്ന ജനാവലിയെ ഒരേസ്വരത്തില് അഭിനന്ദിച്ചു. രണ്ടുലക്ഷം പേര് അണിനിരക്കുന്ന റാലി സംഘടിപ്പിക്കാനാണ് പാര്ടി തീരുമാനിച്ചത്. എന്നാല് , എല്ലാ കണക്കുകൂട്ടലും തെറ്റിച്ച മനുഷ്യമഹാപ്രവാഹമാണ് ഉണ്ടായത്.
തിരുവനന്തപുരത്ത് ആദ്യമായെത്തിയ സംസ്ഥാന സമ്മേളനം ചരിത്രസംഭവമാക്കാന് പാര്ടി സംസ്ഥാന കമ്മിറ്റി അംഗം എം വിജയകുമാര് ചെയര്മാനും ജില്ലാ സെക്രട്ടറി കടകംപള്ളി സുരേന്ദ്രന് ജനറല് കണ്വീനറുമായി രൂപീകരിച്ച സ്വാഗതസംഘം ചിട്ടയായ പ്രവര്ത്തനമാണ് സംഘടിപ്പിച്ചത്. പതിനായിരക്കണക്കിനു പ്രവര്ത്തകരും അനുഭാവികളും സംഘാടനത്തില് രാപ്പകല് പങ്കാളികളായി. ഒരുമാസത്തോളം നീണ്ട അനുബന്ധപരിപാടികള് പുതിയ അനുഭവമാണ് കാഴ്ചവച്ചത്. സെമിനാറുകളും കല-കായിക-സാംസ്കാരിക പരിപാടികളും പ്രദര്ശനവും ലക്ഷങ്ങളെ ആകര്ഷിച്ചു. രാഷ്ട്രീയ പാര്ടിനേതാക്കളും വൈദികരും കായികപ്രതിഭകളും സാംസ്കാരിക നായകരുമൊക്കെ പങ്കാളികളായ അനുബന്ധപരിപാടികള് സമ്മേളനം വന്വിജയമാകുമെന്ന സൂചനയായിരുന്നു. റാലിയും ചുവപ്പുസേനാ മാര്ച്ചും സിപിഐ എം വിരുദ്ധശക്തികളെ അമ്പരപ്പിച്ചു. സമ്മേളനനടപടികള് ആരംഭിച്ചതു മുതല് ആശയക്കുഴപ്പമുണ്ടാക്കാന് കിണഞ്ഞുശ്രമിച്ച മാധ്യമങ്ങള്ക്കുള്ള ഓര്മപ്പെടുത്തല് കൂടിയായി ജനങ്ങളുടെ കുത്തൊഴുക്ക്. എത്രതന്നെ ശ്രമിച്ചാലും പാര്ടിക്ക് പോറലേല്പ്പിക്കാന് ആര്ക്കുമാകില്ലെന്ന പ്രഖ്യാപനമാണ് വെള്ളിയാഴ്ച ഉയര്ന്നത്. ജില്ലയില് പാര്ടിയുടെ ജനകീയാടിത്തറ എത്രമാത്രം വിപുലവും സുദൃഢവുമാണെന്നും റാലിയും ചുവപ്പുസേനാ പരേഡും തെളിയിച്ചു.
മാധ്യമങ്ങള്ക്കും അവഗണിക്കാനാകാത്ത അജയ്യത
"അണപൊട്ടിയെത്തിയ ചെങ്കടലില് നഗരം മുങ്ങി"യെന്ന്മനോരമ. പാര്ടിയുടെ സംഘടനാശേഷിയും കെട്ടുറപ്പും കരുത്തും വിളിച്ചോതിയ റാലി "ചരിത്രത്തിലിടം പിടിക്കുന്ന മഹാപ്രവാഹ"മായെന്ന് മാതൃഭൂമി. അണയാത്ത വിപ്ലവവീര്യവുമായി "ചെമ്പട തലസ്ഥാനം കീഴടക്കി"യെന്ന് മാധ്യമം. സിപിഐ എം സംസ്ഥാന സമ്മേളനത്തിന്റെ ഭാഗമായി ജനലക്ഷങ്ങള് അലകടലായി നഗരത്തിലേക്ക് ഒഴുകിയെത്തിയപ്പോള് മാധ്യമങ്ങള്ക്കും അത് അവഗണിക്കാനാകാത്ത അജയ്യശക്തിയായി. മഴയിലും തോരാത്ത ആവേശമെന്നും കരുത്ത് തെളിയിച്ച പ്രകടനമെന്നുമാണ് കേരള കൗമുദി റിപ്പോര്ട്ട്. റാലിയില് അണിനിരന്ന മൂന്നുലക്ഷം പേര്ക്ക് ശുദ്ധമായ തിളപ്പിച്ചാറ്റിയ വെള്ളം വിതരണംചെയ്തതിന് പിന്നിലെ സംഘാടനമികവിനെക്കുറിച്ചും കൗമുദിയില് റിപ്പോര്ട്ടുണ്ട്. രക്തനക്ഷത്ര ശോഭയുമായി ജനസാഗരം ആവേശത്തിരമാല തീര്ത്തെന്നാണ് മംഗളം റിപ്പോര്ട്ട്. സമ്മേളനത്തെക്കുറിച്ചുള്ള മംഗളം പ്രത്യേക സപ്ലിമെന്റും പുറത്തിറക്കി. നഗരത്തെ ചുവപ്പിച്ച ചിട്ടയായ റാലിയെക്കുറിച്ച് ഹിന്ദു, ഇന്ത്യന് എക്സ്പ്രസ് തുടങ്ങിയ ഇംഗ്ലീഷ് പത്രങ്ങളിലും മികച്ച വാര്ത്തയായി.
deshabhimani 120212
"അണപൊട്ടിയെത്തിയ ചെങ്കടലില് നഗരം മുങ്ങി"യെന്ന്മനോരമ. പാര്ടിയുടെ സംഘടനാശേഷിയും കെട്ടുറപ്പും കരുത്തും വിളിച്ചോതിയ റാലി "ചരിത്രത്തിലിടം പിടിക്കുന്ന മഹാപ്രവാഹ"മായെന്ന് മാതൃഭൂമി. അണയാത്ത വിപ്ലവവീര്യവുമായി "ചെമ്പട തലസ്ഥാനം കീഴടക്കി"യെന്ന് മാധ്യമം. സിപിഐ എം സംസ്ഥാന സമ്മേളനത്തിന്റെ ഭാഗമായി ജനലക്ഷങ്ങള് അലകടലായി നഗരത്തിലേക്ക് ഒഴുകിയെത്തിയപ്പോള് മാധ്യമങ്ങള്ക്കും അത് അവഗണിക്കാനാകാത്ത അജയ്യശക്തിയായി.
ReplyDelete