Tuesday, April 15, 2014

കോടികളുടെ വസ്തുവും കെട്ടിടവും ചില്ലറനിരക്കില്‍ പാട്ടത്തിന്

നെയ്യാറ്റിന്‍കര: കോണ്‍ഗ്രസ് അനുകൂല സംഘടനയുടെ നേതൃത്വത്തിലുള്ള സൊസൈറ്റിയുടെ മറവില്‍ നഗരമധ്യത്തില്‍ കോടികള്‍ വിലമതിക്കുന്ന വസ്തു തുച്ഛമായ നിരക്കില്‍ പാട്ടത്തിനെടുത്ത് കെട്ടിടം പണിത് പണം തട്ടുന്നു. പിഡബ്ല്യുഡി വക വസ്തുവാണ് കലക്ടറെ സ്വാധീനിച്ച് പാട്ടത്തിനൊപ്പിച്ചതും കെട്ടിടം നിര്‍മിക്കാന്‍ അനുമതി തേടിയതും. ഫ്ളാറ്റ് മാഫിയയാണ് സംഭവത്തിനു പിന്നില്‍. നെയ്യാറ്റിന്‍കരയിലെ സിവില്‍ സ്റ്റേഷന്‍ കോമ്പൗണ്ടാണ് ഇവിടത്തെ എന്‍ജിഒ അസോസിയേഷന്റെ നേതൃത്വത്തിലുള്ള സൊസൈറ്റിയുടെ പേരില്‍ കൈയടക്കിയത്. ഈ കോമ്പൗണ്ടില്‍ പ്രവര്‍ത്തിക്കുന്ന ഹോട്ടലും നീതി സ്റ്റോറും ഇത്തരത്തില്‍ ഒപ്പിച്ച് വാടകയ്ക്ക് കൊടുത്തിരിക്കയാണ്. തിങ്കളാഴ്ചമുതല്‍ തുടരെയുള്ള അവധി മുതലെടുത്ത് വീണ്ടും ഒരു നിര്‍മാണത്തിനുകൂടി നീക്കം നടന്നു. ഇതിനെതിരെ ജീവനക്കാരില്‍ ഒരു വിഭാഗംതന്നെ എതിര്‍പ്പുമായെത്തിയെങ്കിലും അവരെ പൊലീസിനെ വരുത്തി പറഞ്ഞയച്ചു.

നിര്‍മാണത്തിന് കലക്ടറും നെയ്യാറ്റിന്‍കര നഗരസഭയും അനുമതി കൊടുത്തിട്ടുണ്ടെന്നാണ് സൂചന. നൂറിലേറെ സര്‍ക്കാര്‍ ഓഫീസുകള്‍ പ്രവര്‍ത്തിക്കുന്ന സിവില്‍ സ്റ്റേഷനില്‍ ദിനംപ്രതി ആയിരത്തിലേറെ പേരാണ് വിവിധ ആവശ്യങ്ങള്‍ക്കായെത്തുന്നത്. പൊതുജനത്തിന് പ്രാഥമിക ആവശ്യം നിറവേറ്റാനും വാഹനം പാര്‍ക്ക് ചെയ്യാനുംപോലും സൗകര്യവും സ്ഥലവുമില്ല. ആയിരത്തോളം ജീവനക്കാര്‍ ഇവിടെ പണി ചെയ്യുന്നു. ഇവരുടെ വാഹനം പാര്‍ക്ക് ചെയ്യാനും പ്രാഥമിക കാര്യങ്ങള്‍ നിറവേറ്റാനും സൗകര്യമൊരുക്കിയിട്ടില്ല. ഈ അവസ്ഥയിലാണ് വസ്തുക്കള്‍ തുച്ഛമായ വിലയ്ക്ക് പാട്ടത്തിനൊപ്പിച്ച് സൊസൈറ്റിയുടെ മറവില്‍ പണം തട്ടുന്നത്. പാട്ടത്തിനെടുത്ത ഗോള്‍ഫ് ക്ലബ് പോലുള്ളവയുടെ സ്ഥിതി ഏറെ വിവാദമായതും വ്യവഹാരങ്ങള്‍ക്ക് ഇടനല്‍കിയതുമാണ്. സൊസൈറ്റിയുടെ നടത്തിപ്പും പണം കൈകാര്യംചെയ്യലും സംബന്ധിച്ച് വിശദമായ അന്വേഷണവും നടപടിയും വേണമെന്ന് എന്‍ജിഒ യൂണിയന്‍ പ്രവര്‍ത്തകര്‍ ആവശ്യപ്പെട്ടു. സൊസൈറ്റിക്ക് സ്ഥലം പാട്ടത്തിനെടുത്ത് കച്ചവടംചെയ്യാന്‍ അധികാരവും അവകാശവുമുണ്ടോ എന്ന് പരിശോധിക്കണം. ജീവനക്കാരുടെ സഹകരണ സംഘത്തില്‍ ഭൂമാഫിയ കടന്നുകൂടിയത് പരിശോധനാ വിധേയാക്കണം. സിവില്‍ സ്റ്റേഷനും പരിസരവും പൊതുജനങ്ങള്‍ക്കും ജീവനക്കാര്‍ക്കും ഉപയോഗപ്രദമായ രീതിയില്‍ സൗകര്യമൊരുക്കണമെന്നും എന്‍ജിഒ യൂണിയന്‍ ആവശ്യപ്പെട്ടു.

deshabhimani

No comments:

Post a Comment