കൂടംകുളം ആണവനിലയവുമായി ബന്ധപ്പെട്ട പ്രശ്‌നപരിഹാരത്തിനായുള്ള നാലാംവട്ട ചര്‍ച്ചക്ക് കളമൊരുങ്ങുന്നു. കേന്ദ്രസമിതിയും - സംസ്ഥാനസമിതിയും ഇതു സംബന്ധിച്ച് നല്ലൈ ജില്ലാ കലക്‌ട്രേറ്റില്‍ നാളെ (31) ചര്‍ച്ച നടത്താനിരിക്കുകയാണ് . ആണവോര്‍ജ ചെയര്‍മാന്‍ ശ്രീകുമാര്‍ ബാനര്‍ജി കൂടംകുളം നിലയം സന്ദര്‍ശിച്ച് നിലവിലുള്ള സ്ഥിതിവിവരങ്ങള്‍ വിലയിരുത്തി. കേന്ദ്രസമിതി അംഗങ്ങളും കൂടംകുളത്ത് എത്തിയിട്ടുണ്ട്.
ആണവ നിലയത്തിനെതിരെ സമരം നടത്തിവരുന്ന കൂടംകുളം ആണവനിലയ വിരുദ്ധസമിതിയെ ഒഴിവാക്കി ചര്‍ച്ചകളും ഭാവിപരിപാടികളും നടത്താനുള്ള നീക്കവുമായാണ് കേന്ദ്രസമിതി മുന്നോട്ടുപോകുന്നത്. ഇതിന്റെ മുന്നോടിയായി നാലാംവട്ട ചര്‍ച്ചക്ക് സമരസമിതി പ്രതിനിധികളെ ഇനിയും ക്ഷണിച്ചിട്ടില്ല. സമരസമിതിയെ ഒറ്റപ്പെടുത്തി ചര്‍ച്ചകളുമായി മുന്നോട്ടുപോയാല്‍ സംസ്ഥാന സമിതിയിലെ സമരസമിതി അംഗങ്ങള്‍ നാലാംവട്ട ചര്‍ച്ചയില്‍ പങ്കെടുക്കില്ലെന്ന് സമരസമിതി കണ്‍വീനര്‍ ഉദയകുമാറും പ്രതിനിധി എം പുഷ്പരാജും അറിയിച്ചിട്ടുണ്ട്.
സംസ്ഥാനത്ത് ആയിരത്തോളം കേന്ദ്രങ്ങളില്‍ ആണവനിലയത്തിന്റെ സുരക്ഷ സംബന്ധിച്ച പഠനക്ലാസുകള്‍ നടത്തിയിട്ടുണ്ടെന്നാണ് കേന്ദ്രസമിതി അംഗം എസ് കെ ശര്‍മ്മ പറഞ്ഞത്. സംസ്ഥാനത്തെ ജനങ്ങള്‍ക്കുള്ള ഭീതി അകന്നതായി കേന്ദ്രസമിതി അവകാശപ്പെടുമ്പോള്‍, ഇതു സംബന്ധിച്ച് കോണ്‍ഗ്രസിന്റെ നേതൃത്വത്തില്‍ സമരക്കാര്‍ക്കെതിരെ പ്രചരണവും സമരപരിപാടികളും മാത്രമാണ് നടന്നതെന്ന് സമരസമിതി കുറ്റപ്പെടുത്തുന്നു. ഇടിന്തിക്കരയില്‍ ആണവനിലയം അടച്ചുപൂട്ടണമെന്നാവശ്യപ്പെട്ട് നടന്നുവന്ന റിലേ നിരാഹാരസമരം ഇന്ന് (30) 102-ാം ദിവസത്തേക്ക് കടക്കുകയാണ്. ഒരു ജനകീയ സമരത്തെ നിര്‍ജ്ജീവമാക്കാന്‍ കേന്ദ്രമന്ത്രി നാരായണസ്വാമി മുന്‍കൈയ്യെടുത്ത് റെയ്ഡുകളും പ്രചരണങ്ങളും നടത്തി വരുകയാണെന്ന് സമരസമിതി ആരോപിക്കുന്നുണ്ട്.
സമരക്കാര്‍ മുന്നോട്ടുവച്ച ജനങ്ങളുടെ ഭീതികളെ സംബന്ധിച്ച ചോദ്യാവലിക്ക് മറുപടിയായി കേന്ദ്രസമിതി നല്‍കിയ റിപ്പോര്‍ട്ട് അപൂര്‍ണമാണെന്നാണ് സമരസമിതി കണ്‍വീനര്‍ ഉദയകുമാര്‍ പറയുന്നത്. ജനങ്ങള്‍ക്കുള്ള ഭീതി അകറ്റാന്‍ സമരസമിതി രൂപീകരിച്ച വിദഗ്ധസമിതിയുമായി കേന്ദ്രസമിതി ചര്‍ച്ചക്ക് തയ്യാറാവണമെന്നാണ് സമരസമിതി പറയുന്നത്. സമാധാനത്തിന്റെ പാതയിലാണ് കൂടംകുളത്തെ സമരം മുന്നോട്ടുപോകുന്നത്.
ആരെയും നിര്‍ബന്ധിച്ച് സമരത്തില്‍ സമരസമിതി അണിനിരത്തുന്നില്ല. സ്വമേധയാ സമരരംഗത്തു വന്നവരാണ് എല്ലാവരും. കല്‍പ്പാക്കം ആണവനിലയത്തിനു സമീപമുള്ള ജനവാസകേന്ദ്രങ്ങളില്‍ മാറാ രോഗങ്ങള്‍ക്ക് അടിമകളായികൊണ്ടിരിക്കുന്ന മനുഷ്യരുടെ ജീവിതവും ആണവകേന്ദ്രങ്ങള്‍ക്കുണ്ടായ ദുരന്തങ്ങള്‍ വഴി ലോകം കണ്ട കഷ്ടതകളുമാണ് സമരത്തിനിറങ്ങിയ കൂടംകുളം നിവാസികളുടെ മുന്നിലുള്ളതെന്നും സമരസമിതി പറയുന്നു.
janayugom 300112
Showing posts with label കുട്ടംകുളം സമരം. Show all posts
Showing posts with label കുട്ടംകുളം സമരം. Show all posts
Monday, January 30, 2012
Sunday, December 18, 2011
വഴിനടന്നത് കുട്ടംകുളത്തെ അയിത്തം ഭേദിച്ച്
1946 ജൂലൈ ആറിനാണ് കുട്ടംകുളം സമരം നടക്കുന്നത്. അയിത്താചരണത്തിനും ക്ഷേത്രപ്രവേശനത്തിനും ഉത്തരവാദഭരണത്തിനും വഴിനടക്കല്‍ സ്വാതന്ത്ര്യത്തിനുമുള്ള പ്രക്ഷോഭങ്ങളാല്‍ തിരു-കൊച്ചി തിളച്ചുമറിഞ്ഞ കാലം. ഇരിങ്ങാലക്കുട കൂടല്‍മാണിക്യക്ഷേത്രത്തിനു മുന്നിലെ കുട്ടംകുളം അയിത്തത്തിന്റെ അതിരായിരുന്നു. അയിത്തജാതിക്കാര്‍ക്ക് അതിനപ്പുറത്തേക്ക് പ്രവേശനം ഇല്ലായിരുന്നു. ഇതിനെതിരെ കമ്യൂണിസ്റ്റ് പാര്‍ടിയുടേയും എസ്എന്‍ഡിപി, പുലയമഹാസഭ സംഘടനകളുടെയും നേതൃത്വത്തിലായിരുന്നു സമരം. ആദ്യനാളുകളില്‍ കൊച്ചിരാജ്യ പ്രജാമണ്ഡലവും സമരത്തിലുണ്ടായിരുന്നു. പ്രത്യക്ഷസമരപരിപാടികളുടെ ഭാഗമായാണ് "46 ജൂലൈ ആറിന് അയ്യങ്കാവ് മൈതാനത്ത് (ഇന്നത്തെ മുനിസിപ്പല്‍ മൈതാനം) ക്ഷേത്രപ്രവേശനസമരം നടന്നത്. പി ഗംഗാധരനായിരുന്നു അധ്യക്ഷന്‍ . പ്രജാമണ്ഡലം പ്രതിനിധി പുതൂര്‍ അച്യുതമേനോന്‍ , പി കെ ചാത്തന്‍മാസ്റ്റര്‍ എന്നിവര്‍ മുഖ്യപ്രസംഗകര്‍ .
വഴിനടക്കല്‍ നിരോധിച്ച് കുട്ടംകുളത്തിനു സമീപം സ്ഥാപിച്ചിരുന്ന ബോര്‍ഡ് ആരോ ഇളക്കിമാറ്റി. സമ്മേളനത്തില്‍ പങ്കെടുത്തവരെല്ലാം കുട്ടംകുളത്തിനപ്പുറത്തേക്ക് മാര്‍ച്ച്ചെയ്യുകയാണെന്ന് പി ഗംഗാധാരന്‍ പ്രഖ്യാപിച്ചു. നിയമലംഘനത്തെ അനുകൂലിക്കുന്നില്ലെന്നുപറഞ്ഞ് പുതൂര്‍ അച്യുതമേനോന്‍ പിന്മാറി. ആയിരങ്ങള്‍ പ്രകടനമായി മുന്നോട്ടുനീങ്ങി. കുട്ടംകുളത്തിനു സമീപം സിഐ സൈമണ്‍ മാഞ്ഞൂരാന്റെയും ഇന്‍സ്പെക്ടര്‍ ശങ്കുണ്ണിയുടെയും നേതൃത്വത്തില്‍ വന്‍സന്നാഹം പ്രക്ഷോഭകാരികളെ തടഞ്ഞു. തര്‍ക്കത്തിനിടെ പ്രകോപനമില്ലാതെ ലാത്തിച്ചാര്‍ജ് തുടങ്ങി. തലങ്ങും വിലങ്ങും തല്ലി. ബയണറ്റുകൊണ്ടുള്ള കുത്തേറ്റ് നിരവധിപേര്‍ക്ക് മുറിവേറ്റു. സഹികെട്ടപ്പോള്‍ കമ്യൂണിസ്റ്റ് പാര്‍ടി നേതാവ് കെ വി ഉണ്ണി കൊടികെട്ടിയ വടികൊണ്ട് തിരിച്ചടിച്ചു. അടിയേറ്റ് പൊലീസുകാരന്റെ ചെവിപൊട്ടി. ഇതോടെ മര്‍ദനം ശക്തമാക്കി. പി ഗംഗാധരനെയും കെ വി ഉണ്ണിയെയും പോസ്റ്റില്‍ കെട്ടിയിട്ടു. മര്‍ദനത്തിനുശേഷം ഇരുവരെയും സ്റ്റേഷനിലേക്ക് കൊണ്ടുപോയി. പിറ്റേന്ന് തൃശൂര്‍ സബ് ജയിലിലേക്കു മാറ്റി. പിറ്റേന്ന് എം കെ തയ്യിലിനെയും അറസ്റ്റ് ചെയ്തു. മൂന്നുദിവസത്തിനുശേഷം സഹോദരന്‍ അയ്യപ്പനും കെ ടി അച്യുതന്‍വക്കീലുമെത്തിയാണ് ഇവരെ ജാമ്യത്തിലെടുത്തത്.
രണ്ടുദിവസം കഴിഞ്ഞ് പി കെ ചാത്തന്‍മാസ്റ്റര്‍ അറസ്റ്റിലായി. ഇതില്‍ പ്രതിഷേധിച്ച് കെ വി കെ വാര്യരുടെയും സുബ്രഹ്മണ്യ അയ്യരുടെയും നേതൃത്വത്തില്‍ പ്രകടനം നടത്തി. ഠാണാവില്‍ വന്‍ പൊലീസ്സന്നാഹം പ്രകടനത്തെ നേരിട്ടു. മുന്‍കൂട്ടി ആസൂത്രണം ചെയ്ത മാരകമര്‍ദനം ഇവിടെയും അരങ്ങേറി. രാജ്യദ്രോഹക്കുറ്റം ചുമത്തി കെ വി കെ വാര്യരെ ആറുമാസം ജയിലിലിട്ടു. കേരളീയ നവോത്ഥാനചരിത്രത്തില്‍ ജ്വലിച്ചുനിന്ന ഈ സമരം നടന്ന് ഏറെക്കഴിയുംമുമ്പേ കൊച്ചിരാജ്യത്ത് ക്ഷേത്രപ്രവേശന വിളംബരവും ഉത്തരവാദഭരണ പ്രഖ്യാപനവുമുണ്ടായി എന്നത് ചരിത്രത്തിന്റെ തിരുത്തിയെഴുത്ത്.
deshabhimani 181211
Subscribe to:
Posts (Atom)