Showing posts with label തെരഞ്ഞെടുപ്പ് പരിഷ്കരണം. Show all posts
Showing posts with label തെരഞ്ഞെടുപ്പ് പരിഷ്കരണം. Show all posts

Wednesday, November 20, 2013

ജയിലില്‍ കഴിയുന്നവര്‍ക്ക് മത്സരിക്കാം: സുപ്രീംകോടതി

നാമനിര്‍ദേശപത്രിക സമര്‍പ്പിക്കുമ്പോള്‍ ജയിലിലോ പൊലീസ് കസ്റ്റഡിയിലോ കഴിയുന്നവര്‍ക്ക് തെരഞ്ഞെടുപ്പില്‍ മത്സരിക്കാനാകില്ലെന്ന മുന്‍ നിലപാട് സുപ്രീംകോടതി തിരുത്തി. ജയിലില്‍ കഴിയുന്നവര്‍ മത്സരിക്കുന്നത് വിലക്കണമെന്ന സുപ്രീംകോടതി ഉത്തരവ് മറികടക്കാന്‍ കേന്ദ്രസര്‍ക്കാര്‍ ജനപ്രാതിനിധ്യ നിയമത്തില്‍ ഭേദഗതി കൊണ്ടുവന്നിരുന്നു. ഭേദഗതി അംഗീകരിച്ച സുപ്രീംകോടതി, സര്‍ക്കാര്‍ സമര്‍പ്പിച്ച പുനഃപരിശോധനാ ഹര്‍ജി തീര്‍പ്പാക്കവെയാണ് നിലപാട് തിരുത്തിയത്. ജയിലില്‍ കഴിയുന്നവര്‍ക്ക് നിയമപ്രകാരം വോട്ടുചെയ്യാന്‍ അവകാശമില്ലാത്തതിനാല്‍ മത്സരിക്കാനും അവകാശമില്ലെന്ന പട്ന ഹൈക്കോടതിയുടെ ഉത്തരവ് ജൂലൈയിലാണ് ജ. എ കെ പട്നായിക്കിന്റെ അധ്യക്ഷതയിലുള്ള ബെഞ്ച് ശരിവച്ചത്.

ക്രിമിനല്‍ കേസില്‍ കുറ്റക്കാരെന്ന് വിധിക്കപ്പെടുന്ന ജനപ്രതിനിധികള്‍ അപ്പോള്‍ത്തന്നെ അയോഗ്യരാകുമെന്ന മറ്റൊരു ഉത്തരവും കോടതി പുറപ്പെടുവിച്ചിരുന്നു. രാജ്യത്തെ പ്രധാന രാഷ്ട്രീയപാര്‍ടികളെല്ലാം ഉത്തരവിനെതിരെ രംഗത്തുവന്നതിനെതുടര്‍ന്നാണ് കേന്ദ്രസര്‍ക്കാര്‍ പുനഃപരിശോധനാഹര്‍ജി സമര്‍പ്പിച്ചത്. ഇതിനിടെ പാര്‍ലമെന്റിന്റെ വര്‍ഷകാലസമ്മേളനത്തില്‍ ജനപ്രാതിനിധ്യനിയമം ഭേദഗതി ചെയ്ത്, ജയിലില്‍ കഴിയുന്നവര്‍ മത്സരിക്കാന്‍ പാടില്ലെന്ന ഉത്തരവ് സര്‍ക്കാര്‍ മറികടക്കുകയും ചെയ്തു. ക്രിമിനല്‍ കേസില്‍ ശിക്ഷിക്കപ്പെടുന്നവര്‍ അപ്പോള്‍ത്തന്നെ അയോഗ്യരാക്കപ്പെടുമെന്ന ഉത്തരവ് മറികടക്കുന്നതിനുള്ള നിയമഭേദഗതി ബില്ലും സര്‍ക്കാര്‍ പാര്‍ലമെന്റില്‍ അവതരിപ്പിച്ചിരുന്നു. എന്നാല്‍, ഇത് പാസാക്കാനായില്ല.

തുടര്‍ന്ന് ബില്‍ ഓര്‍ഡിനന്‍സ് രൂപത്തില്‍ സര്‍ക്കാര്‍ കൊണ്ടുവന്നു. എന്നാല്‍, ഓര്‍ഡിനന്‍സിനെതിരെ വ്യാപകവിമര്‍ശം ഉയര്‍ന്നതിനെതുടര്‍ന്ന് പിന്‍വലിക്കാന്‍ നിര്‍ബന്ധിതരായി. ഓര്‍ഡിനന്‍സ് വലിച്ചുകീറി ചവറ്റുകൊട്ടയിലിടണമെന്ന രാഹുല്‍ ഗാന്ധിയുടെ പരാമര്‍ശത്തെതുടര്‍ന്നായിരുന്നു സര്‍ക്കാര്‍ പെട്ടെന്ന് ഓര്‍ഡിനന്‍സ് പിന്‍വലിച്ചത്. ജനപ്രാതിനിധ്യനിയമത്തിലെ 62(5) വകുപ്പുപ്രകാരമായിരുന്നു ജയിലില്‍ കഴിയുന്നവര്‍ മത്സരിക്കരുതെന്ന ഹൈക്കോടതിയുടെയും സുപ്രീംകോടതിയുടെയും വിധി. ഈ വകുപ്പ് ഭേദഗതിചെയ്താണ് സര്‍ക്കാര്‍ ഉത്തരവ് മറികടന്നത്. ചൊവ്വാഴ്ച പുനഃപരിശോധനാഹര്‍ജി പരിഗണനയ്ക്ക് വന്നപ്പോള്‍ സര്‍ക്കാര്‍ ഇതിനോടകം ഭേദഗതി കൊണ്ടുവന്നതിനാല്‍ ഹര്‍ജിക്ക് പ്രസക്തിയില്ലെന്ന് ജ. എ കെ പട്നായിക് നിരീക്ഷിച്ചു. ഇതോടെ വിചാരണത്തടവുകാര്‍ക്കും കസ്റ്റഡിയില്‍ കഴിയുന്നവര്‍ക്കും തെരഞ്ഞെടുപ്പില്‍ മത്സരിക്കുന്നതിനുള്ള തടസ്സങ്ങള്‍ നീങ്ങി. കേന്ദ്രത്തിനുവേണ്ടി എല്‍ എന്‍ നാഗേശ്വരറാവുവും വി കെ ബിജുവും ഹാജരായി.

deshabhimani

Wednesday, October 30, 2013

ഒരു സ്ഥാനാര്‍ഥി മാത്രമെങ്കില്‍ "നോട്ട" ഇല്ല

നിഷേധവോട്ടിന് അവസരം നല്‍കുന്ന നോട്ട ബട്ടണ്‍ വോട്ടിങ് യന്ത്രങ്ങളില്‍ സ്ഥാപിച്ച ശേഷമുള്ള തെരഞ്ഞെടുപ്പുകളില്‍ മത്സരരംഗത്ത് ഒരു സ്ഥാനാര്‍ഥി മാത്രമാണെങ്കില്‍ ആ സ്ഥാനാര്‍ഥിയെ വിജയിയായി റിട്ടേണിങ് ഓഫീസര്‍ക്ക് പ്രഖ്യാപിക്കാമെന്ന് തെരഞ്ഞെടുപ്പ് കമീഷന്‍ വിശദമാക്കി. നിഷേധവോട്ടിന് അവസരം നല്‍കിയുള്ള സുപ്രീംകോടതി വിധിയുമായി ബന്ധപ്പെട്ട അവ്യക്തതകള്‍ നീക്കിയുള്ള വിശദീകരണത്തിലാണ് തെരഞ്ഞെടുപ്പ് കമീഷന്‍ ഇക്കാര്യം അറിയിച്ചത്. ലോക്സഭാ, നിയമസഭാ തെരഞ്ഞെടുപ്പുകളില്‍ ഒരു സ്ഥാനാര്‍ഥി മാത്രം വരുന്ന സാഹചര്യങ്ങളില്‍ നോട്ട ഉപാധി പ്രസക്തമല്ലെന്ന് കമീഷന്‍ അറിയിച്ചു. നിഷേധവോട്ടാണ് കൂടുതലെങ്കില്‍ പോലും കൂടുതല്‍ വോട്ടുകിട്ടിയ സ്ഥാനാര്‍ഥിയെ വിജയിയായി പ്രഖ്യാപിക്കും- കമീഷന്‍ പറഞ്ഞു.

deshabhimani

Tuesday, October 8, 2013

വോട്ട് ചെയ്താല്‍ രസീത് നല്‍കണം: സുപ്രീംകോടതി

പോളിങ്ബൂത്തില്‍ വോട്ടുചെയ്താലുടനെ വോട്ടര്‍ക്ക് രസീത് നല്‍കണമെന്ന് സുപ്രീംകോടതി. ആര്‍ക്കാണ് വോട്ട് രേഖപ്പെടുത്തിയതെന്നുള്ള രസീതാണ് നല്‍കേണ്ടത്. ജനതാ പാര്‍ടി പ്രസിഡന്റ് സുബ്രഹ്മണ്യന്‍ സ്വാമി നല്‍കിയ ഹര്‍ജിയിലാണ് സുപ്രീംകോടതിയുടെ ഉത്തരവ്.

ഈ രസീത് വോട്ടെണ്ണല്‍ കേന്ദ്രത്തിലെ പെട്ടിയില്‍ നിക്ഷേപിക്കണം. പിന്നീട് വോട്ട് എണ്ണുമ്പോള്‍ തര്‍ക്കം വന്നാല്‍ രസീതുമായി ഒത്തുനോക്കും. നിലവില്‍ വോട്ടിങ് യന്ത്രത്തില്‍ വോട്ട് രേഖപ്പെടുത്തുമ്പോള്‍ താന്‍ ആര്‍ക്കാണ് വോട്ട് ചെയ്തത് എന്ന് തിട്ടപ്പെടുത്താന്‍ ആകുമായിരുന്നില്ല. എന്നാല്‍ രസീത് ലഭ്യമാക്കുമ്പോള്‍ തന്റെ വോട്ടിന്റെ വ്യക്തത വോട്ടര്‍ക്ക് ലഭിക്കും. വോട്ടിങ് യന്ത്രങ്ങളെക്കുറിച്ച് നിരവധി പരാതികള്‍ ഉയരുന്ന സാഹചര്യത്തില്‍ രസീത് നല്‍കുന്നത് പരാതികള്‍ ഒഴിവാക്കാന്‍ സഹായമാകുമെന്നും സുപ്രീകോടതി നിരീക്ഷിച്ചു.

deshabhimani

Saturday, September 28, 2013

രാഷ്ട്രപതി ചോദ്യംചെയ്തത് മറികടക്കാന്‍ രാഹുല്‍നാടകം

കുറ്റവാളികളെന്നു കോടതി വിധിക്കുന്ന എംപിമാരെയും എംഎല്‍എമാരെയും അയോഗ്യരാക്കണമെന്ന സുപ്രീംകോടതി വിധി മറികടക്കാന്‍ കേന്ദ്രസര്‍ക്കാര്‍ കൊണ്ടുവന്ന ഓര്‍ഡിനന്‍സ് അസംബന്ധമെന്ന് എഐസിസി വൈസ് പ്രസിഡന്റ് രാഹുല്‍ഗാന്ധി. ഓര്‍ഡിനന്‍സ് വലിച്ചുകീറി കാറ്റില്‍പ്പറത്തണമെന്നും രാഹുല്‍ പറഞ്ഞു. ഡല്‍ഹി പ്രസ്ക്ലബ് സംഘടിപ്പിച്ച മീറ്റ് ദി പ്രസില്‍കോണ്‍ഗ്രസ് വക്താവ് അജയ് മാക്കന്‍ സംസാരിക്കുന്നതിനിടെ പെട്ടെന്നു കടന്നുവന്നായിരുന്നു രാഹുലിന്റെ പ്രതികരണം. ഓര്‍ഡിനന്‍സില്‍ രാഷ്ട്രപതി അതൃപ്തി പ്രകടിപ്പിക്കുകയും മന്ത്രിമാരോട് വിശദീകരണം ആവശ്യപ്പെടുകയുംചെയ്ത സാഹചര്യത്തിലാണ് രാഹുലിന്റെ പ്രകടനം.

കേന്ദ്രസര്‍ക്കാര്‍ നിലപാട് തെറ്റാണെന്നാണ് വ്യക്തിപരമായ അഭിപ്രായമെന്ന് രാഹുല്‍ പറഞ്ഞു. ഇതൊരു രാഷ്ട്രീയ തീരുമാനമാണ്. ഈ അസംബന്ധം നിര്‍ത്താന്‍ സമയമായി. ഇത്തരം ഒത്തുതീര്‍പ്പുകളുണ്ടാക്കുന്നതില്‍നിന്ന് രാഷ്ട്രീയപാടികള്‍ പിന്തിരിയേണ്ട സമയമായി. അഴിമതി തടയണമെന്ന് ആഗ്രഹിക്കുന്നുവെങ്കില്‍ ഇത്തരം വിട്ടുവീഴ്ചകള്‍ പാടില്ല- രാഹുല്‍ പറഞ്ഞു. ഓര്‍ഡിനന്‍സ് ന്യായീകരിക്കാന്‍ അജയ് മാക്കന്‍ ശ്രമിക്കവെയാണ് രാഹുലിന്റെ രംഗപ്രവേശം. രാഹുല്‍ പ്രതികരിച്ചതോടെ അജയ് മാക്കന്‍ സ്വരം മാറ്റി. കോണ്‍ഗ്രസിന്റെ അഭിപ്രായം രാഹുല്‍ഗാന്ധി പറഞ്ഞുകഴിഞ്ഞെന്നും പാര്‍ടിയുടെ അഭിപ്രായമാണ് പരമോന്നതമെന്നും അജയ് മാക്കന്‍ പിന്നീട് പറഞ്ഞു.

ഓര്‍ഡിനന്‍സ് രാഷ്ട്രപതിയുടെ അംഗീകാരത്തിനായി ബുധനാഴ്ച അയച്ചിരുന്നു. ഓര്‍ഡിനന്‍സില്‍ അതൃപ്തനായ രാഷ്ട്രപതി മൂന്ന് കേന്ദ്രമന്ത്രിമാരോട് വിശദീകരണം ആരാഞ്ഞു. ഓര്‍ഡിനന്‍സിന് രാഷ്ട്രപതിയുടെ അനുമതി ലഭിക്കുന്ന കാര്യം സംശയമായ ഘട്ടത്തിലാണ് രാഹുലിന്റെ നാടകീയ രംഗപ്രവേശം. കോണ്‍ഗ്രസിനുതന്നെ ഓര്‍ഡിനന്‍സില്‍ തൃപ്തിയില്ലെന്നും അതുകൊണ്ടാണ് ഓര്‍ഡിനന്‍സ് പിന്‍വലിച്ചതെന്നുമുള്ള പ്രതീതി സൃഷ്ടിക്കാന്‍ പ്രൊഫഷണല്‍ ഉപദേശകര്‍ പറഞ്ഞുകൊടുത്ത തിരക്കഥയനുസരിച്ചാണ് രാഹുല്‍ നാടകം കളിച്ചതെന്നും പുറത്തായി. രാഹുലിന്റെ വിമര്‍ശം മന്ത്രിസഭ ചര്‍ച്ച ചെയ്യുമെന്ന് പ്രധാനമന്ത്രി മന്‍മോഹന്‍സിങ് അമേരിക്കയില്‍ പറഞ്ഞു. യുഎന്‍ സമ്മേളനം കഴിഞ്ഞ് തിരിച്ചെത്തിയ ഉടന്‍ ചര്‍ച്ച നടത്തും-പ്രധാനമന്ത്രി പറഞ്ഞു.

രാഹുലിന്റെ കള്ളക്കളിയെ മറ്റു പാര്‍ടി നേതാക്കള്‍ പരിഹസിച്ചു. രാഷ്ട്രപതി വിശദീകരണം ചോദിച്ചതിനുശേഷംമാത്രം രാഹുല്‍ പ്രതികരിച്ചതെന്തുകൊണ്ടെന്ന് സിപിഐ എം പൊളിറ്റ് ബ്യൂറോ അംഗം വൃന്ദ കാരാട്ട് ചോദിച്ചു. അയോഗ്യത മറികടക്കാനുള്ള നിയമനിര്‍മാണം സംബന്ധിച്ച് പാര്‍ലമെന്റ് വിശദമായി ചര്‍ച്ചചെയ്ത് തീരുമാനമെടുക്കണമെന്നും ഓര്‍ഡിനന്‍സ് കൊണ്ടുവരുന്നത് ജനാധിപത്യവിരുദ്ധമാണെന്നും സിപിഐ എം പൊളിറ്റ് ബ്യൂറോ വ്യക്തമാക്കിയിരുന്നു. കേന്ദ്രസര്‍ക്കാരിനേറ്റ ക്ഷീണം തീര്‍ക്കാനുള്ള പരിപാടിയാണ് രാഹുല്‍ നടത്തിയതെന്ന് ബിജെപി നേതാവ് അരുണ്‍ ജെയ്റ്റ്ലി പറഞ്ഞു. ഓര്‍ഡിനന്‍സ് അസംബന്ധമാണെങ്കില്‍ അതിനു പിന്നിലുള്ളവര്‍ക്കെതിരെ നടപടിയെടുക്കണം- ജെയ്റ്റ്ലി ആവശ്യപ്പെട്ടു.

രണ്ടുവര്‍ഷത്തില്‍ കൂടുതല്‍ തടവുശിക്ഷ വിധിക്കപ്പെടുന്ന ജനപ്രതിനിധികളെ അവര്‍ അപ്പീല്‍ സമര്‍പ്പിക്കുന്നത് പരിഗണിക്കാതെ തന്നെ അയോഗ്യരാക്കണമെന്ന സുപ്രീംകോടതി വിധി മറികടക്കാനുള്ള ഓര്‍ഡിനന്‍സിന് കഴിഞ്ഞ മന്ത്രിസഭായോഗമാണ് അംഗീകാരം നല്‍കിയത്. മേല്‍ക്കോടതി അപ്പീല്‍ അനുവദിച്ചുകൊണ്ട് വിധി സ്റ്റേ ചെയ്താല്‍ വോട്ടവകാശമില്ലാതെ ജനപ്രതിനിധികള്‍ക്ക് സഭകളില്‍ അംഗമായി തുടരാമെന്ന വ്യവസ്ഥ ഉള്‍പ്പെടുത്തിയാണ് ഓര്‍ഡിനന്‍സ് തയ്യാറാക്കിയത്.
(വി ജയിന്‍)

deshabhimani

നിഷേധവോട്ട്: നടപടി അടുത്ത തെരഞ്ഞെടുപ്പ് മുതല്‍: തെര. കമീഷന്‍

നിഷേധവോട്ടിന് അവസരമൊരുക്കണമെന്ന സുപ്രീംകോടതി ഉത്തരവ് അടുത്ത തെരഞ്ഞെടുപ്പുമുതല്‍ നടപ്പാക്കുമെന്ന് തെരഞ്ഞെടുപ്പു കമീഷന്‍. നവംബറില്‍ അഞ്ചു സംസ്ഥാനങ്ങളില്‍ നടക്കുന്ന നിയമസഭാ തെരഞ്ഞെടുപ്പിലാകും നിഷേധവോട്ടിങ് രേഖപ്പെടുത്തിയ പാനല്‍ ഇലക്ട്രോണിക് വോട്ടിങ് യന്ത്രത്തില്‍ ഉള്‍പ്പെടുത്തുക. ആകെ വോട്ടിന്റെ 50 ശതമാനത്തിലധികം നിഷേധവോട്ട് വരികയോ അല്ലെങ്കില്‍ ആകെ പോള്‍ ചെയ്ത വോട്ടില്‍ കൂടുതല്‍ നിഷേധവോട്ടുകളാവുകയോ ചെയ്താലും ഫലത്തില്‍ മാറ്റംവരില്ലെന്ന് കമീഷന്‍ വൃത്തങ്ങള്‍ പറഞ്ഞു. ഏറ്റവും കൂടുതല്‍ വോട്ട് കിട്ടിയ സ്ഥാനാര്‍ഥിതന്നെയാകും വിജയി. ആകെ പോള്‍ചെയ്യുന്ന 100 വോട്ടില്‍ 90ഉം നിഷേധ വോട്ടായാല്‍തന്നെയും ശേഷിക്കുന്ന 10 വോട്ടില്‍ കൂടുതല്‍ വോട്ട് നേടിയ സ്ഥാനാര്‍ഥി വിജയിക്കും. തെരഞ്ഞെടുപ്പു കമീഷന്റെ ദീര്‍ഘകാലത്തെ ആവശ്യമാണ് കോടതി അംഗീകരിച്ചിരിക്കുന്നതെന്നും ഇതിനെ സ്വാഗതം ചെയ്യുകയാണെന്നും തെരഞ്ഞെടുപ്പു കമീഷന്‍ ഉന്നത ഉദ്യോഗസ്ഥന്‍ വ്യക്തമാക്കി. നിഷേധവോട്ടുകളുടെ എണ്ണം തെരഞ്ഞെടുപ്പു ഫലത്തോടൊപ്പം പരസ്യപ്പെടുത്തും. ഇതിനായി വോട്ടെണ്ണല്‍സമയത്ത് ഉപയോഗിക്കുന്ന 17 സി ഫോമിന്റെ പാര്‍ട്ട് രണ്ടിലും ഫോം 20ല്‍ വരുന്ന റിസള്‍ട്ട് ഷീറ്റിലും ആവശ്യമായ മാറ്റം കൊണ്ടുവരുമെന്നും കമീഷന്‍ ഉദ്യോഗസ്ഥന്‍ പറഞ്ഞു.

വോട്ടവകാശം മൗലികാവകാശമല്ലെന്ന് കുല്‍ദീപ് നയ്യാര്‍ കേസില്‍ സുപ്രീംകോടതി മൂന്നംഗ ബെഞ്ച് നേരത്തെ പറഞ്ഞിട്ടുണ്ടെന്ന് സര്‍ക്കാര്‍ വാദിച്ചെങ്കിലും കോടതി പരിഗണിച്ചില്ല. വോട്ടവകാശം മൗലികാവകാശമല്ലെങ്കിലും വോട്ടിനുള്ള സ്വാതന്ത്ര്യം ഭരണഘടന ഉറപ്പുനല്‍കുന്ന അഭിപ്രായസ്വാതന്ത്ര്യമായി വരുമെന്നും റിട്ട് പരിഗണിക്കുന്നതില്‍ തെറ്റില്ലെന്നുമായിരുന്നു കോടതിനിലപാട്. പിയുസില്ലിന്റെ ഹര്‍ജിയില്‍ കോടതിയില്‍ കേന്ദ്രസര്‍ക്കാര്‍ നിഷേധവോട്ടിന് എതിരെയാണ് വാദിച്ചത്. തെരഞ്ഞെടുപ്പു കമീഷന്‍ അനുകൂലമായും. നിഷേധവോട്ട് ആവശ്യപ്പെട്ടുള്ള റിട്ട് ഹര്‍ജിതന്നെ നിലനില്‍ക്കുന്നതല്ലെന്നാണ് അഡീഷണല്‍ സോളിസിറ്റര്‍ ജനറല്‍ പി പി മല്‍ഹോത്ര വാദിച്ചത്. ആര്‍ക്കും വോട്ട് ചെയ്യേണ്ടെന്ന് തീരുമാനിക്കുന്നവര്‍ക്ക് അത് രഹസ്യമായി രേഖപ്പെടുത്താന്‍ അവകാശമില്ലെന്നും ഇത് ഭരണഘടന ഉറപ്പുനല്‍കുന്ന അഭിപ്രായ സ്വാതന്ത്ര്യത്തിനുള്ള അവകാശത്തിന്റെ ലംഘനമാകുമെന്നായിരുന്നു സച്ചാറിന്റെ വാദം.

യൂറോപ്പിലും ലാറ്റിന്‍ അമേരിക്കയിലും ബംഗ്ലാദേശിലും നിഷേധവോട്ട്

വിവിധ യൂറോപ്യന്‍, ലാറ്റിന്‍ അമേരിക്കന്‍ രാജ്യങ്ങളിലും ബംഗ്ലാദേശിലും നിഷേധവോട്ട് നിലവിലുണ്ട്. ഫ്രാന്‍സ്, ബെല്‍ജിയം, ബ്രസീല്‍, ഗ്രീസ്, ഉക്രൈന്‍, ചിലി എന്നീ രാജ്യങ്ങളിലും അമേരിക്കയിലെ നെവാഡ സംസ്ഥാനത്തുമാണ് പൗരന്മാര്‍ക്ക് നിഷേധവോട്ട് ചെയ്യാന്‍ അവകാശമുള്ളത്. അമേരിക്ക, ഫിന്‍ലന്‍ഡ്, സ്വീഡന്‍, കൊളംബിയ, സ്പെയിന്‍ എന്നിവിടങ്ങളില്‍ ബാലറ്റില്‍ ഒരു പേരുമില്ലാത്ത കോളമോ അതല്ലെങ്കില്‍ വോട്ടര്‍ക്ക് ഇഷ്ടമുള്ള വ്യക്തിയുടെ പേരെഴുതി വോട്ട് ചെയ്യാനോ അവസരമുണ്ട്. റഷ്യ 2006ല്‍ നിഷേധവോട്ട് അവസാനിപ്പിച്ചിരുന്നു. പാകിസ്ഥാനില്‍ 2013ല്‍ നിഷേധവോട്ട് കൊണ്ടുവന്നെങ്കിലും അവിടത്തെ തെരഞ്ഞെടുപ്പു കമീഷന്‍ ഇത് പിന്നീട് നിരാകരിച്ചു.

deshabhimani

Friday, September 27, 2013

ഓര്‍ഡിനന്‍സ് അസംബന്ധം, സര്‍ക്കാരിനെതിരെ രാഹുല്‍

എംപിമാരെയും എംഎല്‍എമാരെയും ക്രിമിനല്‍ കേസുകളില്‍ ശിക്ഷിച്ചാല്‍ അപ്പീലിന് അവസരം നല്‍കാതെ അയോഗ്യത കല്‍പ്പിക്കണമെന്ന സുപ്രീംകോടതി വിധി മറികടക്കാന്‍ ഓര്‍ഡിനന്‍സ് കൊണ്ടുവന്ന കേന്ദ്രസര്‍ക്കാര്‍ നടപടി അസംബന്ധമാണെന്ന് കോണ്‍ഗ്രസ് വൈസ് പ്രസിഡന്റ് രാഹുല്‍ ഗാന്ധി. ജനപ്രാതിനിധ്യ നിയമത്തിലെ ഭേദഗതി അംഗീകരിക്കരുതെന്നും ശിക്ഷിക്കപ്പെടുന്ന ജനപ്രതിനിധികളെ മല്‍സരിക്കാന്‍ അനുവദിക്കരുതെന്നും അദ്ദേഹം പറഞ്ഞു. സര്‍ക്കാര്‍ ഓര്‍ഡിനന്‍സ് കീറി ചവറ്റുകുട്ടയിലിടണമെന്നും രാഷ്ട്രീയ സമ്മര്‍ദ്ദങ്ങള്‍ക്ക് വഴങ്ങി ഓര്‍ഡിനന്‍സ് ഇറക്കുന്നത് അവസാനിപ്പിക്കണമെന്നും അദ്ദേഹം കൂട്ടിച്ചേര്‍ത്തു. അജയ് മാക്കന്റെ വാര്‍ത്താസമ്മേളനത്തിനിടെ എത്തിയാണ് രാഹുല്‍ ഗാന്ധി രൂക്ഷമായ ഭാഷയില്‍ സര്‍ക്കാര്‍ നടപടിയെ വിമര്‍ശിച്ചത്.

രാഹുല്‍ ഗാന്ധി രൂക്ഷമായി വിമര്‍ശിച്ച സാഹചര്യത്തില്‍ കേന്ദ്രസര്‍ക്കാര്‍ ഓര്‍ഡിനന്‍സ് പിന്‍വലിക്കാനാണ് സാധ്യത. അതേസമയം രാഹുല്‍ ഗാന്ധിയുടെ നീക്കം സ്വന്തം പ്രതിച്ഛായ വര്‍ധിപ്പിക്കാനുള്ള ശ്രമത്തിന്റെ ഭാഗമാണെന്ന വിമര്‍ശനം പലകോണുകളില്‍ നിന്നും ഉയര്‍ന്നുവന്നു. രാഹുലിന്റെ പ്രസ്താവന അക്ഷരാര്‍ഥത്തില്‍ സര്‍ക്കാരിനെയും കോണ്‍ഗ്രസിന്റെ കേന്ദ്ര നേതൃത്വത്തെയും വെട്ടിലാക്കിയിരിക്കുകയാണ്.

സര്‍ക്കാര്‍ ഓര്‍ഡിനന്‍സ് പ്രതിഷേധാര്‍ഹമാണെന്ന് സിപിഐ എം പൊളിറ്റ് ബ്യൂറോ നേരത്തെ പ്രസ്താവനയില്‍ വ്യക്തമാക്കിയിരുന്നു. തുടര്‍ച്ചയായി ഓര്‍ഡിനന്‍സുകളിലൂടെ കാര്യങ്ങള്‍ നടത്തുന്ന യുപിഎ സര്‍ക്കാരിന്റെ രീതി ജനാധിപത്യവിരുദ്ധവും എതിര്‍ക്കപ്പെടേണ്ടതുമാണെന്നും പിബി വ്യക്തമാക്കിയിരുന്നു. ബിജെപി അടക്കമുള്ള മറ്റ് പാര്‍ട്ടികളും ഓര്‍ഡിനന്‍സിനെ എതിര്‍ത്തിരുന്നു.

deshabhimani

വേണ്ടത് സമഗ്രമായ തെരഞ്ഞെടുപ്പ് പരിഷ്ക്കാരം: സിപിഐ എം

സമഗ്രമായ തെരഞ്ഞെടുപ്പ് പരിഷ്ക്കാരങ്ങളാണ് ഇന്ത്യക്കാവശ്യമെന്ന് സിപിഐ എം പൊളിറ്റ് ബ്യൂറോ പ്രസ്താവനയില്‍ പറഞ്ഞു. ഇപ്പോള്‍ സുപ്രീംകോടതിവിധിയില്‍ പറഞ്ഞതുപോലെ ബാലറ്റില്‍ നിഷേധവോട്ടിനുള്ള അവസരം ഈ പരിഷ്ക്കാരങ്ങളില്‍ നിസ്സാരമായ ഒന്നാണ്. സിപിഐ എം സമഗ്രമായി തെരഞ്ഞെടുപ്പ് പരിഷ്ക്കാരങ്ങള്‍ ആവശ്യപ്പെട്ട് വരികയാണ്. എന്നാല്‍ ഗൗരവതരമായ ഇത്തരം വിഷയങ്ങള്‍ പാര്‍ലമെണ്ടിനു മുന്നില്‍ കൊണ്ടുവരാന്‍ സര്‍ക്കാര്‍ തയ്യാറാകുന്നില്ല. ആനുപാതിക പ്രാതിനിധ്യം, പണത്തിന്റെയും പേശിബലത്തിന്റെയും സ്വാധീനം നിയന്ത്രിക്കാനുള്ള അടിയന്തര നടപടികള്‍ തുടങ്ങിയ കാര്യങ്ങള്‍ ഉള്‍പ്പെടുത്തിയുള്ള പരിഷ്ക്കാരങ്ങളാണ് വേണ്ടത്. അവ പാര്‍ലമെണ്ടില്‍ ചര്‍ച്ച ചെയ്യുകയും അംഗീകരിക്കുകയുമാണ് വേണം. അല്ലാതെ ഇപ്പോള്‍ ഉണ്ടായതുപോലെ ജുഡീഷ്യറി ഇവയൊക്കെ കഷണം കഷണമായി തീരുമാനിക്കുകയല്ല വേണ്ടത്- പി ബി പ്രസ്താവനയില്‍ പറഞ്ഞു.

തെരഞ്ഞെടുപ്പുകളില്‍ നിഷേധവോട്ടാകാം: സുപ്രീം കോടതി

ന്യൂഡല്‍ഹി: തെരഞ്ഞെടുപ്പുകളില്‍ നിഷേധവോട്ടിന് ജനങ്ങള്‍ക്ക് അവകാശമുണ്ടെന്ന് സുപ്രീം കോടതി. സ്ഥാനാര്‍ഥികളെ എതിര്‍ത്ത് വോട്ട് ചെയ്യാനുള്ള ജനങ്ങളുടെ അവകാശം കണക്കിലെടുത്ത് നിഷേധവോട്ടിന് സുപ്രീംകോടതി അനുമതി നല്‍കി. പൊതുതെരഞ്ഞെടുപ്പില്‍ നിഷേധവോട്ട് രേഖപ്പെടുത്താനുള്ള പ്രത്യേക ബട്ടന്‍ വോട്ടിങ്ങ് യന്ത്രത്തില്‍ ഏര്‍പ്പെടുത്തണമെന്ന് കോടതി തെരഞ്ഞെടുപ്പ് കമ്മീഷന് നിര്‍ദ്ദേശം നല്‍കി. മത്സരിക്കുന്ന മുഴുവന്‍ സ്ഥാനാര്‍ഥികളുടെ പേരുകളും രേഖപ്പെടുത്തിയ ശേഷം വോട്ടിങ്ങ് യന്ത്രത്തില്‍ ഇതൊന്നുമല്ല എന്ന ഒരു ബട്ടന്‍ കൂടി ഏര്‍പ്പെടുത്തണമെന്നാണ് കോടതിയുടെ നിര്‍ദേശം. ഇതിനായി നിയമഭേദഗതി വരുത്താനും കോടതി നിര്‍ദേശിച്ചിട്ടുണ്ട്.

നിഷേധവോട്ടുകള്‍ ജനാധിപത്യപ്രക്രിയയെ ശുദ്ധീകരിക്കുമെന്ന അഭിപ്രായത്തോടെയാണ് കോടതി വിധി പ്രസ്താവിച്ചത്. ചീഫ് ജസ്റ്റീസ് പി സദാശിവം ഉള്‍പ്പെട്ട ബെഞ്ചാണ് വിധി പ്രസ്താവിച്ചത്. പീപ്പിള്‍സ് യൂണിയന്‍ ഫോര്‍ സിവില്‍ ലിബര്‍ട്ടീസ് നല്‍കിയ ഹര്‍ജി പരിഗണിച്ചാണ് കോടതിയുടെ ഉത്തരവ്.

തെരഞ്ഞെടുപ്പ് കമ്മീഷനും ഹര്‍ജിക്കാരുടെ ആവശ്യത്തെ പിന്തുണച്ചിരുന്നു. ഇതിനായി നിയമഭേദഗതി വരുത്താന്‍ 2009ല്‍ സര്‍ക്കാരിനോട് നിര്‍ദേശിച്ചിരുന്നെങ്കിലും ഇതുവരെ സര്‍ക്കാര്‍ ഇതിനു തയാറായില്ലെന്നും തെരഞ്ഞെടുപ്പ് കമ്മീഷന്‍ ചൂണ്ടിക്കാട്ടിയിരുന്നു.

ഇത്തരം കാര്യങ്ങളിൽ സുപ്രീം കോടതി എകപക്ഷീയമായി തീരുമാനിക്കേണ്ടതല്ലെന്ന് സിപിഐ എം പൊളിറ്റ്ബ്യൂറോ അംഗം സീതാറാം യെച്ചൂരി പറഞ്ഞു.പാർലമെണ്ടിനെ മറികടക്കുന്ന തീരുമാനമാണിത്. ഇക്കാര്യം പാർലമെണ്ട് ചർച്ച ചെയ്യണമെന്നും അദ്ദേഹം ആവശ്യപ്പെട്ടു.

facebook post by sunilkrishnan

Monday, October 31, 2011

ഡിസിസി ഓഫീസ്/സുന്നി ഓഫീസ് കേന്ദ്രീകരിച്ച് വോട്ടര്‍ പട്ടികയില്‍ പേരു ചേര്‍ക്കുന്നു

കോട്ടയം ഡിസിസി ഓഫീസ് കേന്ദ്രീകരിച്ച് വോട്ടര്‍ പട്ടികയില്‍ വന്‍തോതില്‍ പേരു ചേര്‍ക്കാന്‍ ശ്രമം. സ്ഥലത്തില്ലാത്തവരെയും മറ്റും വോട്ടര്‍പ്പട്ടികയില്‍ ചേര്‍ക്കാനാണ് പരിപാടി. ഇതിന്റെ ഭാഗമായി ഡിസിസി ഓഫീസില്‍നിന്ന് വിവിധ പ്രാദേശിക കോണ്‍ഗ്രസ് ഓഫീസുകളില്‍ നിന്നും കൂട്ടത്തോടെ വില്ലേജ് ഓഫീസുകളിലും താലൂക്ക് ഓഫീസുകളിലും അപേക്ഷ നല്‍കിത്തുടങ്ങി. ജില്ലയുടെ ചില ഭാഗങ്ങളില്‍ കേരളാ കോണ്‍ഗ്രസ് എം പ്രവര്‍ത്തകരും ഇത്തരത്തില്‍ അപേക്ഷ നല്‍കുന്നയായി പരാതിയുണ്ട്. അപേക്ഷ പരിശോധനാ സമയത്ത് അധികാരത്തിന്റെ മറവില്‍ ഉദ്യോഗസ്ഥരെ സ്വാധീനിച്ച് വോട്ടര്‍പ്പട്ടികയില്‍ കള്ള വോട്ടര്‍മാരെ ചേര്‍ക്കാനും മറ്റു ചിലര്‍ക്ക് വാഗ്ദാനങ്ങള്‍ നല്‍കി സ്വാധീനിക്കാനുമാണ് ശ്രമം.

18 വയസ്സ് കഴിഞ്ഞവര്‍ക്ക് പുതുതായി പേര് ചേര്‍ക്കാനും പട്ടികയിലെ തെറ്റുകള്‍ തിരുത്താനും നീക്കേണ്ടവ നീക്കാനും മറ്റുമുള്ള അവസരം മുതലെടുക്കാനാണ് കോണ്‍ഗ്രസ് ശ്രമിക്കുന്നത്. നവംബര്‍ ഒന്നു വരെയാണ് വോട്ടപ്പട്ടിക പുതുക്കലിനും മറ്റും അപേക്ഷകള്‍ സ്വീകരിക്കുക. പുതുതായി പട്ടികയില്‍ പേര് ചേര്‍ക്കേണ്ടവര്‍ അപേക്ഷയുമായി നേരിട്ട് വില്ലേജ് ഓഫീസര്‍ക്കോ തഹസില്‍ദാര്‍ക്കോ അപേക്ഷ നല്‍കണം. ഓണ്‍ലൈനായും അപേക്ഷ നല്‍കാമെങ്കിലും ചില രാഷ്ട്രീയ പാര്‍ടികളുടെ ഓഫീസ് കേന്ദ്രീകരിച്ച് അപേക്ഷകള്‍ തയ്യാറാക്കി അവ കൂട്ടത്തോടെ നല്‍കുന്നത് രാഷ്ട്രീയ ഗൂഢോദ്ദേശ്യമാണെന്ന് വ്യക്തം. കോട്ടയം താലൂക്ക് ഓഫീസിലടക്കം ഇത്തരത്തില്‍ കൂട്ടത്തോടെ അപേക്ഷകള്‍ നല്‍കിയിട്ടുണ്ട്. ഈ അപേക്ഷകളില്‍ വേണ്ട പരിശോധനകള്‍ നടത്താതെ സ്വീകരിക്കാനാണ് ഉദ്യോഗസ്ഥരില്‍ സമ്മര്‍ദ്ദം ചെലുത്തുന്നത്. എന്‍ജിഒ അസോസിയേഷന്‍ അംഗങ്ങളായവരും കോണ്‍ഗ്രസ് അനുകൂലികളായ ചില ജീവനക്കാരും ഇതിന് കൂട്ടുനില്‍ക്കുന്നതായും പരാതി ഉയര്‍ന്നിട്ടുണ്ട്. ചില വില്ലേജ് ഓഫീസര്‍മാര്‍ക്കും തഹസീല്‍ദാര്‍ക്കുമെതിരെ ഇത്തരത്തില്‍ പരാതി ഉയര്‍ന്നിട്ടുണ്ട്. ഇനി രണ്ടു ദിവസം മാത്രമാണ് വോട്ടര്‍പ്പട്ടികയില്‍ പേരുകള്‍ ചേര്‍ക്കാനും തിരുത്താനും നീക്കം ചെയ്യാനും മറ്റും അവസരം. അവസാനനിമിഷത്തിലാണ് ഇത്തരത്തില്‍ ഒന്നിച്ച് അപേക്ഷകള്‍ രാഷ്ട്രീയ പാര്‍ടി ഓഫീസ് കേന്ദ്രീകരിച്ച് തയ്യാറാക്കി അവ പട്ടികയില്‍ ഉള്‍പ്പെടുത്താന്‍ ശ്രമിക്കുന്നത്.

2012 ജനുവരി ഒന്നിനോ അതിന് മുമ്പോ 18 വയസ്സ് പൂര്‍ത്തിയാകുന്നവര്‍ക്ക് പട്ടികയില്‍ പേര് ചേര്‍ക്കാം. പട്ടികയില്‍ പേര് ഉള്ളവര്‍ക്ക് മണ്ഡലം മാറ്റാനോ ബൂത്ത് മാറ്റാനോ അപേക്ഷ നല്‍കാം. അതോടൊപ്പം തെറ്റുകള്‍ തിരുത്താനും അനര്‍ഹരായവരുടെ പേരുകള്‍ നീക്കം ചെയ്യാനും അപേക്ഷ നല്‍കാം.

വോട്ട് ചേര്‍ക്കല്‍ ലീഗ് സുന്നി ഓഫീസില്‍ ; നാട്ടുകാര്‍ തടഞ്ഞു

തിരൂര്‍ : മുസ്ലിംലീഗ് പ്രവര്‍ത്തകനായ ബൂത്ത് ഓഫീസറുടെ നേതൃത്വത്തില്‍ ലീഗ് അനുകൂല സംഘടന ഓഫീസില്‍വച്ച് വോട്ടര്‍ പട്ടികയില്‍ പേര് ചേര്‍ക്കുന്നത് നാട്ടുകാര്‍ തടഞ്ഞു. തിരൂര്‍ അസംബ്ലി നിയോജകമണ്ഡലത്തില്‍പ്പെട്ട നഗരസഭാ 35-ാം ബൂത്തിലെ വോട്ട് ചേര്‍ക്കുന്നതാണ് നാട്ടുകാര്‍ തടഞ്ഞത്. ലീഗ് പ്രവര്‍ത്തകനായ ബൂത്ത് ഓഫീസറുടെയും ബൂത്ത് ലെവല്‍ ഓഫീസറുടെയും നേതൃത്വത്തില്‍ നടുവിലങ്ങാടിയിലെ എസ്കെഎസ്എസ്എഫ് ഓഫീസില്‍വച്ചാണ് വോട്ട് ചേര്‍ത്തത്. നടുവിലങ്ങാടി മദ്രസയില്‍വച്ചാണ് വോട്ട് ചേര്‍ക്കല്‍ നടത്താന്‍ നിശ്ചയിച്ചിരുന്നത്. കേന്ദ്രം മാറ്റിയതറിയാതെ നിരവധി ആളുകള്‍ മദ്രസയിലെത്തി മടങ്ങി. ഇതിനിടെയാണ് എസ്കെഎസ്എസ്എഫ് ഓഫീസില്‍വച്ച് വോട്ട് ചേര്‍ക്കുന്നുണ്ടെന്ന് നാട്ടുകാര്‍ അറിഞ്ഞത്. തുടര്‍ന്ന് ഇത് തടയുകയായിരുന്നു. ഇതേ തുടര്‍ന്ന് ഇരുവരും മദ്രസയിലേക്ക് മടങ്ങുകയുംചെയ്തു. ബൂത്ത് ഓഫീസറുടെ നടപടിക്കെതിരെ സിപിഐ എം പ്രവര്‍ത്തകര്‍ കലക്ടര്‍ക്കും സംസ്ഥാന തെരഞ്ഞെടുപ്പ് കമീഷനും പരാതി നല്‍കി.

deshabhimani 311011

Sunday, February 27, 2011

തെരഞ്ഞെടുപ്പില്‍ കള്ളപ്പണത്തിന്റെ ഒഴുക്ക് തടയാന്‍

തിരഞ്ഞെടുപ്പിലെ കള്ളപ്പണത്തിന്റെ ഒഴുക്ക്: കൊച്ചിയില്‍ പ്രത്യേക കണ്‍ട്രോള്‍ റൂം തുറക്കും

കൊച്ചി: നിയമസഭാ തെരഞ്ഞെടുപ്പില്‍ കള്ളപ്പണത്തിന്റെ ഒഴുക്ക് തടയാന്‍ കൊച്ചിയില്‍ പ്രത്യേക കണ്‍ട്രോള്‍ റൂമും ജില്ലകളില്‍ പ്രത്യേക നിരീക്ഷണ സംഘത്തെയും നിയോഗിക്കുമെന്ന് ആദായ നികുതി വകുപ്പ് വാര്‍ത്താസമ്മേളനത്തില്‍ അറിയിച്ചു.

പണം നല്‍കി വോട്ടര്‍മാരെ സ്വാധീനിക്കാന്‍ ശ്രമിക്കുന്നവര്‍ക്കെതിരെ കര്‍ശന നടപടികള്‍ സ്വീകരിക്കും. തിരഞ്ഞെടുപ്പുമായി ബന്ധപ്പെട്ട എല്ലാ പ്രവര്‍ത്തനങ്ങളും വകുപ്പ് നിരീക്ഷിക്കും. കണക്കില്‍ കൂടുതല്‍ പണം ചെലവഴിക്കുകയോ രഹസ്യമായി പണം വിതരണം ചെയ്യുകയോ ചെയ്താല്‍ ഇത് പിടിച്ചെടുക്കുകയും അവര്‍ക്കെതിരെ നടപടികള്‍ സ്വീകരിക്കുകയും ചെയ്യും. അനധികൃത പണത്തിന്റെ ഒഴുക്ക് തടയാന്‍ കര്‍ശന നിരീക്ഷണം ഏര്‍പ്പെടുത്തും. എല്ലാ ജില്ലകളിലും പ്രത്യേക ഓഫീസറുടെ നേതൃത്വത്തില്‍ സംഘത്തെ നിയോഗിക്കും. ഇവര്‍ ജില്ലയിലെ വിവിധ ഭാഗങ്ങളില്‍ മൊബൈല്‍ നിരീക്ഷണം നടത്തും. റയില്‍വേ സ്‌റ്റേഷന്‍, വിമാനത്താവളങ്ങള്‍, ഹോട്ടലുകള്‍ എന്നിവ കേന്ദ്രീകരിച്ച് പ്രത്യേക നിരീക്ഷണം ഏര്‍പ്പെടുത്തും. ഒരു ലക്ഷത്തിനുമേലുള്ള ബാങ്ക് ഇടപാടുകള്‍ കര്‍ശനമായി നിരീക്ഷിക്കും. കൊച്ചിയില്‍ പ്രത്യേകമായി തുറക്കുന്ന കണ്‍ട്രോള്‍ റൂമില്‍ സാധാരണക്കാര്‍ക്ക് അനധികൃത പണമിടപാട് സംബന്ധിച്ച് വിവരങ്ങള്‍ നല്‍കാം. ഇത്തരം പരാതികള്‍ പരിശോധിച്ച് വകുപ്പ് ഉടന്‍ നടപടികള്‍ സ്വീകരിക്കും. പണവുമായി തിരഞ്ഞെടുപ്പ് സമയത്ത് പിടിക്കപ്പെടുന്നവര്‍ ശരിയായ വിശദീകരണം നല്‍കിയില്ലെങ്കില്‍ അവര്‍ക്കെതിരെ നിയമ നടപടി സ്വീകരിക്കും. പണം പിടിച്ചെടുക്കുകയും ചെയ്യും. എന്നാല്‍, നിയമപരമായി ഇടപാടുകള്‍ നടത്തുന്നവര്‍ ഭയപ്പെടേണ്ടതില്ല. തിരഞ്ഞെടുപ്പ് സമയത്ത് പണം കൈയില്‍ കൊണ്ടുപോകുന്നത് ഒഴിവാക്കണമെന്നും അധികൃതര്‍ അഭ്യര്‍ഥിച്ചു.

തിരഞ്ഞെടുപ്പ് ലക്ഷ്യമിട്ട് വിരുന്നുകള്‍ സംഘടിപ്പിച്ചാല്‍ നടപടികള്‍ സ്വീകരിക്കും. ഇതിനായി രാഷ്ട്രീയ പാര്‍ട്ടികളുമായി ബന്ധമുള്ളവര്‍ നടത്തുന്ന പാര്‍ട്ടികള്‍ കാമറയില്‍ പകര്‍ത്തും. രാഷ്ട്രീയ ലക്ഷ്യത്തോടെ പണം ചെലവഴിച്ചാല്‍ സാമൂഹിക സംഘടനകള്‍ക്കെതിരെയും നടപടി വരും. ഇതുമായി ബന്ധപ്പെട്ട നിരീക്ഷണങ്ങള്‍ ആരംഭിച്ചിട്ടുണ്ടെന്നും പൊതുജനങ്ങള്‍ക്ക് പരാതി നല്‍കുന്നതിനുള്ള ഫോണ്‍ നമ്പറുകള്‍ അടക്കമുള്ള വിവരങ്ങള്‍ ഉടന്‍ തന്നെ പുറത്തുവിടുമെന്നും അദ്ദേഹം പറഞ്ഞു. പറ്റ്‌ന ആദായ നികുതി വകുപ്പ് ഡറയക്ടര്‍ ജനറല്‍ അഞ്ജനി കുമാറിനെ കേരളമടക്കം തിരഞ്ഞെടുപ്പ് നടക്കുന്ന അഞ്ച് സംസ്ഥാനങ്ങളിലെ നോഡല്‍ ഓഫിസര്‍. കേരളത്തിലെ പ്രവര്‍ത്തനങ്ങള്‍ വിലയിരുത്തുന്നതിനായി ഇദ്ദേഹത്തിന്റെ നേതൃത്വത്തില്‍ ശനിയാഴ്ച കൊച്ചിയില്‍ ഉദ്യോഗസ്ഥരുടെ യോഗവും നടന്നു.  നോഡല്‍ ഓഫിസര്‍ അഞ്ജനി കുമാര്‍, കൊച്ചി ഡയറക്ടര്‍ ജനറല്‍ ഇ ടി ലൂക്കോസ് എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.

ജനയുഗം 270211

Friday, December 10, 2010

തെരഞ്ഞെടുപ്പു പരിഷ്കരണം: കരട് ബില്‍ 5 മാസത്തിനകം

സമഗ്ര തെരഞ്ഞെടുപ്പു പരിഷ്കരണ ബില്ലിന്റെ കരടിന് അഞ്ചുമാസത്തിനകം രൂപം നല്‍കും. ദേശീയ, പ്രാദേശിക രാഷ്ട്രീയ കക്ഷികളുമായും പൊതുസമൂഹവുമായും ചര്‍ച്ച നടത്തിയായിരിക്കും കരടു ബില്ലിനു രൂപം നല്‍കുകയെന്ന് നിയമമന്ത്രി വീരപ്പമൊയ്ലി അറിയിച്ചു. ഏപ്രില്‍ രണ്ടിനും മൂന്നിനും ന്യൂഡല്‍ഹിയില്‍ ദേശീയ സംവാദം നടത്തും. ഇതിനുമുമ്പ് ഭോപാല്‍, കൊല്‍ക്കത്ത, ബംഗളൂരു, ഗുവാഹത്തി, മുംബൈ, ലഖ്നൌ, ചണ്ഡീഗഢ് എന്നിവിടങ്ങളില്‍ 12നും ഫെബ്രുവരി അഞ്ചിനും ഇടയില്‍ ചര്‍ച്ച സംഘടിപ്പിക്കും. ദേശീയ സമവായം ഉണ്ടാക്കുകയാണ് ലക്ഷ്യം. നിയമമന്ത്രിയും മുഖ്യതെരഞ്ഞെടുപ്പു കമീഷണറും സംവാദങ്ങളില്‍ പങ്കെടുക്കും.

പ്രധാന ഭരണഘടനാ ഭേദഗതിക്കാണ് അരങ്ങൊരുങ്ങുന്നതെന്ന് മുഖ്യതെരഞ്ഞെടുപ്പു കമീഷണര്‍ എസ് വൈ ഖുറേഷി പറഞ്ഞു. വിവേക്തങ്ക ചെയര്‍മാനായുള്ള കോര്‍കമ്മിറ്റി തയ്യാറാക്കിയ തെരഞ്ഞെടുപ്പു പരിഷ്കരണ നിര്‍ദേശങ്ങളും രാഷ്ട്രീയത്തിന്റെ ക്രിമിനല്‍വല്‍ക്കരണം ഉള്‍പ്പെടെ നിരവധി വിഷയങ്ങളും യോഗങ്ങളില്‍ പ്രധാനമായും ചര്‍ച്ചചെയ്യും. അഞ്ചുവര്‍ഷ കാലയളവിലധികം ശിക്ഷിക്കപ്പെടുന്ന ഒരാള്‍ മത്സരിക്കാന്‍ പാടില്ലെന്നതാണ് കോര്‍കമ്മിറ്റി മുന്നോട്ടുവയ്ക്കുന്ന പ്രധാന നിര്‍ദേശം. തെരഞ്ഞെടുപ്പു കമീഷന് സ്വതന്ത്രമായ ഒരു സെക്രട്ടറിയറ്റ് സംവിധാനം ഏര്‍പ്പെടുത്തുക, ഒരു രാഷ്ട്രീയപാര്‍ടിയെ അയോഗ്യരാക്കാനുള്ള അധികാരം തെരഞ്ഞെടുപ്പു കമീഷനില്‍ നിക്ഷിപ്തമാക്കുക എന്നിവ മുഖ്യനിര്‍ദേശങ്ങളാണ്.

പാര്‍ലമെന്റിന്റെ കാലാവധി തീരുന്നതിന് ആറുമാസംമുമ്പുതന്നെ കേന്ദ്ര-സംസ്ഥാന സര്‍ക്കാരുകള്‍ പരസ്യം നല്‍കുന്നത് നിര്‍ത്തിവയ്ക്കുക, ഒരു സ്ഥാനാര്‍ഥി ഒരു സീറ്റില്‍ മാത്രം മത്സരിക്കുക, കൃത്രിമം കാണിച്ചാല്‍ തോറ്റ സ്ഥാനാര്‍ഥിക്കെതിരെയും നടപടി സ്വീകരിക്കുക, അഭിപ്രായവോട്ടുെപ്പിന് നിയന്ത്രണം ഏര്‍പ്പെടുത്തുക, വോട്ടിങ് യന്ത്രത്തില്‍ പട്ടികയിലെ ആര്‍ക്കുമല്ല വോട്ട് എന്ന കോളംകൂടി ഉള്‍പ്പെടുത്തുക, തെറ്റായ കണക്കുകള്‍ ബോധിപ്പിക്കുന്ന പക്ഷം തടവുശിക്ഷ അഞ്ചു വര്‍ഷമായി ഉയര്‍ത്തുക, രാഷ്ട്രീയ പാര്‍ടികള്‍ അവരുടെ അക്കൌണ്ടുകള്‍ പരസ്യമാക്കുക, തെറ്റായ കണക്കുകള്‍ ബോധിപ്പിക്കുന്ന രാഷ്ട്രീയ പാര്‍ടികളെ നിരോധിക്കാനുള്ള അവകാശം തെരഞ്ഞെടുപ്പു കമീഷന് നല്‍കുക തുടങ്ങിയ നിര്‍ദേശങ്ങളും കോര്‍കമ്മിറ്റി മുന്നോട്ട് വച്ചിട്ടുണ്ട്.

ദേശാഭിമാനി 101210