Showing posts with label പിടിപ്പുകേട്. Show all posts
Showing posts with label പിടിപ്പുകേട്. Show all posts

Wednesday, November 21, 2012

എന്‍ഡോസള്‍ഫാന്‍ ഉപയോഗിക്കാന്‍ അനുവദിക്കണമെന്ന് വിദഗ്ധസമിതി

ന്യൂഡല്‍ഹി: മാരക കീടനാശിനി എന്‍ഡോസള്‍ഫാന്‍ രാജ്യത്ത് രണ്ടുവര്‍ഷം കൂടി ഉപയോഗിക്കാന്‍ അനുമതി നല്‍കാമെന്ന് സുപ്രീംകോടതി നിയോഗിച്ച വിദഗ്ധസമിതി. രണ്ടുവര്‍ഷംകൊണ്ട് കീടനാശിനി കമ്പനികളുടെ പക്കല്‍ വിവിധ രൂപങ്ങളില്‍ ശേഷിച്ച എന്‍ഡോസള്‍ഫാന്‍ പൂര്‍ണമായി ഉപയോഗിച്ചുതീര്‍ക്കണമെന്നാണ് സമിതിയുടെ നിര്‍ദേശം. എന്‍ഡോസള്‍ഫാന്‍ ഉപയോഗം ഗുരുതരമായ ആരോഗ്യപ്രശ്നങ്ങള്‍ക്ക് കാരണമാകുന്നുണ്ടെന്ന് സമ്മതിക്കുന്ന വിദഗ്ധസമിതി, എന്നാല്‍ വലിയ അളവില്‍ ശേഷിക്കുന്ന കീടനാശിനി നശിപ്പിക്കുന്നതിലെ വമ്പന്‍ സാമ്പത്തികബാധ്യത ചൂണ്ടിക്കാട്ടിയാണ് രണ്ടുവര്‍ഷം കൂടി ഉപയോഗിക്കാമെന്ന് നിര്‍ദേശിച്ചത്. നിര്‍ദേശത്തോട് എതിര്‍പ്പുള്ളവര്‍ക്ക് ഒരാഴ്ചയ്ക്കുള്ളില്‍ രേഖാമൂലം അറിയിക്കാമെന്ന് കോടതി പറഞ്ഞു. അടുത്ത ആഴ്ച കേസ് വീണ്ടും പരിഗണിക്കും.

എന്‍ഡോസള്‍ഫാന്‍ മാരകമാണെന്ന അഭിപ്രായം സംസ്ഥാന സര്‍ക്കാരുകളൊന്നുംതന്നെ മുന്നോട്ടുവച്ചില്ലെന്ന് സമിതി പറഞ്ഞുസംസ്ഥാനങ്ങളുടെ അഭിപ്രായങ്ങള്‍ പരിഗണിക്കണമെന്ന് സുപ്രീംകോടതി നിര്‍ദേശിച്ചിരുന്നു. എന്നാല്‍, എന്‍ഡോസള്‍ഫാന്‍ ഏതെങ്കിലും വിധത്തിലുള്ള ആരോഗ്യപ്രശ്നം സൃഷ്ടിച്ചതായി ഒരു സംസ്ഥാനവും അറിയിച്ചില്ലെന്ന് സമിതി റിപ്പോര്‍ട്ടില്‍ പറഞ്ഞു. എന്‍ഡോസള്‍ഫാന്റെ ദോഷവശങ്ങള്‍ എന്തുകൊണ്ട് കേരളം സമിതിയെ അറിയിച്ചില്ലെന്ന ചോദ്യമാണ് ഉയരുന്നത്. എന്‍ഡോസള്‍ഫാന്‍ ഉപയോഗത്തെ എതിര്‍ത്ത് ആകെ ഡിവൈഎഫ്ഐ മാത്രമാണ് സമിതിമുമ്പാകെ ഹാജരായതും വാദമുഖങ്ങള്‍ നിരത്തിയതും. സമിതി റിപ്പോര്‍ട്ടില്‍ ഇക്കാര്യം എടുത്തുപറഞ്ഞിട്ടുണ്ട്. മറുവശത്ത് എന്‍ഡോസള്‍ഫാന്‍ ഉപയോഗത്തെ അനുകൂലിച്ച് കീടനാശിനി നിര്‍മാതാക്കളുടെ സംഘടനയും സമിതി മുമ്പാകെ നിലപാട് വിശദീകരിച്ചു.

നാലുവട്ടം സമിതി യോഗം ചേര്‍ന്നു. കേന്ദ്ര ആരോഗ്യസേവന ഡയറക്ടര്‍ജനറല്‍ ഉള്‍പ്പെടെ അഞ്ചുപേരെ കൂടി ഉള്‍പ്പെടുത്തി ഒക്ടോബര്‍ ഒമ്പതിന് സുപ്രീംകോടതി വിദഗ്ധസമിതി വിപുലീകരിച്ചിരുന്നു. എന്‍ഡോസള്‍ഫാന്‍ നിരോധിക്കണമെന്നാവശ്യപ്പെട്ട് ഡിവൈഎഫ്ഐ സമര്‍പ്പിച്ച ഹര്‍ജിയില്‍കേന്ദ്രം കൃത്യമായ നിലപാട് സ്വീകരിക്കുന്നില്ലെന്ന് ചൂണ്ടിക്കാട്ടിയാണ് കോടതി സമിതി വിപുലീകരിച്ചത്. ചോദ്യങ്ങള്‍ക്ക് കൃത്യമായ മറുപടിയോടെ ആറാഴ്ചയ്ക്കകം റിപ്പോര്‍ട്ട് സമര്‍പ്പിക്കാനായിരുന്നു ജസ്റ്റിസുമാരായ സ്വതന്തര്‍കുമാര്‍, മദന്‍ ബി ലൊക്കുര്‍ എന്നിവരുള്‍പ്പെട്ട ബെഞ്ചിന്റെ നിര്‍ദേശം. എന്‍ഡോസള്‍ഫാന്‍ നിരോധിക്കേണ്ടതുണ്ടോ എന്നതുള്‍പ്പെടെ കോടതി മുന്നോട്ടുവച്ച അഞ്ചുചോദ്യത്തിനാണ് വിദഗ്ധസമിതി മറുപടി നല്‍കിയത്. അര്‍ബുദ സാധ്യത, ഹോര്‍മോണ്‍ വ്യതിയാനം, ഗുരുതരമായ അംഗവൈകല്യ- പ്രത്യുല്‍പ്പാദന- നാഡീപ്രശ്നങ്ങള്‍ തുടങ്ങിയവയ്ക്ക് എന്‍ഡോസള്‍ഫാന്‍ ഉപയോഗം കാരണമാകുന്നുണ്ട്. എന്‍ഡോസള്‍ഫാന്‍ മാത്രമല്ല രാജ്യത്ത് ഉപയോഗിക്കുന്ന അംഗീകൃത കീടനാശിനികളില്‍ 13-35 ശതമാനവും ആരോഗ്യപ്രശ്നങ്ങള്‍ക്ക് കാരണമാകുന്നു. അതുകൊണ്ടുതന്നെ ആരോഗ്യപ്രശ്നങ്ങളുടെ പേരില്‍ എന്‍ഡോസള്‍ഫാനെ മാത്രം മാറ്റിനിര്‍ത്താനാകില്ല.

എന്‍ഡോസള്‍ഫാന്‍ ഉപയോഗം അനുവദിക്കുന്ന സംസ്ഥാനങ്ങള്‍ കൃത്യമായ കണക്ക് സൂക്ഷിച്ച് ഉപയോഗം സൂക്ഷ്മമായി നിരീക്ഷിക്കണം. എന്‍ഡോസള്‍ഫാന്‍ കയറ്റുമതി കമ്പനികള്‍ ആഗ്രഹിക്കുന്നുണ്ടെങ്കില്‍ അതും രണ്ടുവര്‍ഷം കൊണ്ട് പൂര്‍ത്തിയാക്കണം-സമിതി അറിയിച്ചു. സമിതി തങ്ങളോട് അഭിപ്രായം തേടിയില്ലെന്ന വാദമാണ് കേരള സര്‍ക്കാര്‍ മുന്നോട്ടുവച്ചത്. എന്നാല്‍, എന്‍ഡോസള്‍ഫാന്‍ ഉപയോഗത്തെ അനുകൂലിക്കുന്ന പല സംസ്ഥാനങ്ങളും സമിതി ആവശ്യപ്പെടാതെതന്നെ തങ്ങളുടെ അഭിപ്രായങ്ങള്‍ അറിയിക്കുകയാണ് ചെയ്തത്. ഇതേ മാര്‍ഗം കേരളത്തിനും സ്വീകരിക്കാമായിരുന്നു. ആറാഴ്ച സമയമുണ്ടായിട്ടും സംസ്ഥാനസര്‍ക്കാര്‍ അഭിപ്രായം അറിയിക്കുന്നതില്‍ വീഴ്ച വരുത്തുകയാണുണ്ടായത്.

എം പ്രശാന്ത്


അരിയില്ല; സ്കൂളുകളില്‍ ഉച്ചക്കഞ്ഞി നിലച്ചു

പൊതുവിതരണ സംവിധാനം തകര്‍ന്നതിന് പിന്നാലെ സ്കൂളുകളിലെ ഉച്ചക്കഞ്ഞി വിതരണവും നിലയ്ക്കുന്നു. ഉച്ചക്കഞ്ഞിക്കായി നവംബറില്‍ അനുവദിക്കേണ്ട അരി മിക്ക ജില്ലകളിലും ഇതുവരെ അനുവദിച്ചില്ല. ഇതോടെ നിരവധി ജില്ലകളിലെ ഭൂരിഭാഗം സ്കൂളുകളിലും ഉച്ചക്കഞ്ഞി നിലച്ചു. പല സ്കൂളുകളിലും അരിയുടെ സ്റ്റോക്ക് തീരുന്നതോടെ ഉച്ചഭക്ഷണ വിതരണപദ്ധതി മുടങ്ങും. ഉച്ചക്കഞ്ഞിക്കുള്ള അരി വകമാറ്റിയതും എഫ്സിഐയില്‍ കഴിഞ്ഞ മാസത്തെ തുക അടക്കാത്തതുമാണ് വിദ്യാര്‍ഥികളെ പട്ടിണിയിലേക്ക് തള്ളിവിടുന്നത്. സിവില്‍ സപ്ലൈസ് ഡിപ്പോയില്‍ നിന്ന് ഓരോ മാസവും ആദ്യ ആഴ്ച സ്കൂളുകള്‍ക്ക് അരി നല്‍കാറുണ്ട്. ഇത്തവണ മാസം പകുതിയായിട്ടും മിക്ക ഉപജില്ലകളിലും അരി എത്തിയില്ല. ഓണത്തിന് വിദ്യാര്‍ഥികള്‍ക്ക് പതിവായി നല്‍കുന്ന അരിക്കു പകരം ഉച്ചക്കഞ്ഞി അരി ഓണം സ്പെഷ്യലാക്കി വകമാറ്റി വിതരണം ചെയ്തതാണ് പ്രതിസന്ധിക്ക് കാരണം. ഉച്ചക്കഞ്ഞി നിലയ്ക്കുന്ന സാഹചര്യമുണ്ടായതോടെ ജനുവരി മുതല്‍ മാര്‍ച്ചുവരെ ഉച്ചഭക്ഷണ പദ്ധതിക്ക് ഉപയോഗിക്കേണ്ട നാലാം അലോട്ട്മെന്റിലെ അരി വിതരണം ചെയ്യാനാണ് സിവില്‍ സപ്ലൈസ് ഡിപ്പോകള്‍ക്ക് നിര്‍ദേശം നല്‍കിയിരിക്കുന്നത്. ഇതാകട്ടെ ഡിപ്പോകളില്‍ ഡിസംബറിലാണ് എത്തുക. ഈ സാഹചര്യത്തില്‍ സര്‍ക്കാരിന്റെ അടിയന്തര ഇടപെടല്‍ ഉണ്ടായില്ലെങ്കില്‍ പദ്ധതി മുടങ്ങും. പൊതുവിതരണരംഗത്തെ സര്‍ക്കാരിന്റെ പിടിപ്പുകേടാണ് സ്കൂളുകളിലെ ഉച്ചക്കഞ്ഞി വിതരണത്തിലേക്കും വ്യാപിക്കുന്നത്. 
 

പി പി സതീഷ്കുമാര്‍
 

Tuesday, November 20, 2012

നിര്‍മാണമേഖല സ്തംഭനത്തില്‍

തിരു: കരിങ്കല്ല്, സിമന്റ്, മണല്‍ക്ഷാമം രൂക്ഷമായതിനെത്തുടര്‍ന്ന് സംസ്ഥാനത്ത് നിര്‍മാണമേഖല സ്തംഭിച്ചു. നഗരത്തിലെ വന്‍കിട ഫ്ളാറ്റുകള്‍മുതല്‍ നാട്ടിന്‍പുറങ്ങളിലെ കൊച്ചുവീടുകള്‍വരെ നിര്‍മാണം നിര്‍ത്തിവച്ചിരിക്കുകയാണ്. നിര്‍മാണമേഖലയിലെ മരവിപ്പ് ഈ മേഖലയെ ആശ്രയിച്ചുകഴിയുന്ന 12 ലക്ഷത്തോളം പേരുടെ ജീവിതം പ്രതിസന്ധിയിലാക്കി. നിര്‍മാണമേഖലയില്‍നിന്ന് ആയിരംകോടിരൂപയിലധികം വാര്‍ഷികവരുമാനം ലഭിക്കുന്ന സര്‍ക്കാരിനും ദിനംപ്രതി കോടികളാണ് നഷ്ടം. 
 
സംസ്ഥാന വാണിജ്യനികുതി വകുപ്പ് അനാവശ്യനികുതി ഈടാക്കുന്നെന്ന് ആരോപിച്ച് വ്യാപാരികള്‍ സിമന്റുവില്‍പ്പന നിര്‍ത്തിവച്ചിട്ട് ഒരാഴ്ചയായി. സിമന്റ് കമ്പനികള്‍ വ്യാപാരികള്‍ക്കു നല്‍കുന്ന കിഴിവിന് മൂല്യവര്‍ധിതനികുതി ഈടാക്കേണ്ടതില്ലെന്നായിരുന്നു എല്‍ഡിഎഫ് സര്‍ക്കാരിന്റെ നിലപാട്. എന്നാല്‍, യുഡിഎഫ് സര്‍ക്കാര്‍ മുന്‍കാലപ്രാബല്യത്തോടെ പലിശയടക്കം നികുതി ഈടാക്കാന്‍ തുടങ്ങിയതാണ് സമരത്തിന് ഇടയാക്കിയത്. മാസം ഒമ്പതുലക്ഷം ടണ്ണിലധികം സിമന്റാണ് കേരളത്തില്‍ വില്‍ക്കുന്നത്. ചാക്കിന് 340 മുതല്‍ 365 രൂപവരെയാണ് വില. ഇതില്‍ 41 രൂപവരെ നികുതിയിനത്തില്‍ സര്‍ക്കാരിന് കിട്ടും. അനാവശ്യ നികുതി അടിച്ചേല്‍പ്പിച്ചതിനോട് സഹകരിക്കാത്ത വ്യാപാരികളുടെ ബാങ്ക് അക്കൗണ്ട് മരവിപ്പിക്കുകയും വില്ലേജ് ഓഫീസര്‍മാരെ അയച്ച് കണ്ടുകെട്ടല്‍നടപടി സ്വീകരിക്കുകയും ചെയ്യുകയാണ് സര്‍ക്കാര്‍. ഇതോടെയാണ് വ്യാപാരികള്‍ കഴിഞ്ഞ ഒരാഴ്ചയായി സിമന്റുകച്ചവടം പൂര്‍ണമായും നിര്‍ത്തിവച്ചത്. അത്യാവശ്യക്കാര്‍ കരിഞ്ചന്തയില്‍ 800 രൂപവരെ കൊടുത്താണ് സിമന്റ് വാങ്ങുന്നത്. പെര്‍മിറ്റ് പുതുക്കി നല്‍കണമെന്നാവശ്യപ്പെട്ടു നടത്തിയ സമരം താല്‍ക്കാലികമായി അവസാനിപ്പിച്ചെങ്കിലും കരിങ്കല്‍ ക്വാറികളുടെയും ക്രഷറുകളുടെയും പ്രവര്‍ത്തനം പഴയ നിലയിലെത്തിയിട്ടില്ല. പാറപ്പൊടി, മണല്‍ ക്ഷാമവും രൂക്ഷമാണ്.