Showing posts with label സംവരണം. Show all posts
Showing posts with label സംവരണം. Show all posts

Wednesday, December 23, 2020

ഐഐടികളിൽ സംവരണം വേണ്ടെന്ന്‌ ശുപാർശ; നിയമപരമായി നേരിടുമെന്ന്‌ എസ്‌എഫ്‌ഐ

 ന്യൂഡൽഹി > ഐഐടികളിലെ സംവരണം ഒഴിവാക്കണമെന്ന്‌ കേന്ദ്ര വിദ്യാഭ്യാസ മന്ത്രാലയം നിയോഗിച്ച സമിതിയുടെ ശുപാർശ. സംവരണനയം പാലിക്കേണ്ടാത്ത സ്ഥാപനങ്ങളുടെ പട്ടികയിലേക്ക് ഐഐടിയെ ഉൾപ്പെടുത്തണമെന്നാണ് ഡൽഹി ഐഐടി ഡയറക്‌ടർ അധ്യക്ഷനും വിവിധ ഐഐടികളിൽനിന്നും മന്ത്രാലയങ്ങളിൽനിന്നും പ്രതിനിധികൾ ഉൾപ്പെട്ട സമിതിയുടെ നിര്‍ദേശം.

ഐഐഎമ്മുകൾ മുമ്പ്‌ ഇതേ ആവശ്യം ഉയർത്തിയിരുന്നു. ശക്തമായ പ്രതിഷേധവുമായി എസ്‌എഫ്‌ഐ രം​ഗത്തുന്നതോടെ നിയോ​ഗിക്കപ്പെട്ട സമിതിയാണ് ഇപ്പോള്‍ സംവരണംതന്നെ ഉപേക്ഷിക്കാൻ നിര്‍ദേശിച്ചത്. സംവരണ വിഭാഗം വിദ്യാർഥികൾക്ക്‌ യോഗ്യതയില്ലെന്ന ജാതീയ ധാരണയിലൂന്നിയ നിഗമനമാണ് സമിതി റിപ്പോർട്ടിലുള്ളതെന്ന്‌ എസ്‌എഫ്‌ഐ പ്രസ്‌താവനയിൽ പറഞ്ഞു.

സംവരണവിഭാഗത്തിൽ‌ യോഗ്യരായ വിദ്യാർഥികൾ ഉണ്ടായിട്ടും പ്രവേശനം ലഭിക്കുന്നില്ലെന്ന വസ്‌തുത സമിതി കണ്ടില്ലെന്ന് നടിച്ചു. ഡിഗ്രി, പിജി കോഴ്‌സുകളിൽ സംവരണം പാലിക്കുന്നുണ്ടെന്ന സമിതിയുടെ കണ്ടെത്തൽ 13 ഐഐടിയിൽനിന്ന്‌ എസ്‌എഫ്‌ഐ ശേഖരിച്ച വിവരങ്ങൾക്ക്‌ കടകവിരുദ്ധമാണ്‌. സമിതിയുടെ ശുപാർശ തള്ളി സംവരണം ഉറപ്പാക്കണമെന്ന്‌ എസ്‌എഫ്‌ഐ ആവശ്യപ്പെട്ടു.സംവരണ അവകാശം ഉറപ്പാക്കാന്‍ നിയമനടപടിയടക്കം എസ്‌എഫ്‌ഐ സ്വീകരിക്കുമെന്ന്‌ പ്രസിഡന്റ്‌ വി പി സാനുവും ജനറൽ സെക്രട്ടറി മയൂഖ്‌ ബിശ്വാസും അറിയിച്ചു. ‌

Saturday, November 21, 2020

മുന്നോക്കക്കാരിലെ പിന്നോക്കക്കാർക്കുളള സംവരണം: ഇടതുപക്ഷ സർക്കാരിൻ്റെ നിലപാട് ശരിയോ? ഒരു പരിശോധന

സംവരണേതര വിഭാഗങ്ങളിൽ സാമ്പത്തികമായി പിന്നോക്കം നിൽക്കുന്നവർക്ക് പത്ത് ശതമാനം സംവരണം ഏര്‍പ്പെടുത്തിയതിനെപ്പറ്റി ഉയരുന്ന ചോദ്യങ്ങള്‍ക്ക് ഉത്തരം തിരയുകയാണ് അജിത്ത് എം എസ് ഈ ഫേസ്‌ബുക്ക് പോസ്റ്റില്‍.

പോസ്റ്റ് താഴെ:

1. "മുന്നോക്കക്കാരിലെ പിന്നോക്ക'ക്കാർക്ക് 10% സംവരണമോ അതെന്ത് സംഭവമാണ്?

2019 ജനുവരിയിൽ ഇന്ത്യൻ പാർലിമെൻ്റ് പാസാക്കിയ നൂറ്റിമൂന്നാമത് ഭരണഘടനാ ഭേദഗതിയാണത്. 'Economically Weaker Sections who are not covered under existing reservation' എന്നാണ് ഭരണഘടനാ ഭേദഗതിയിൽ ഉപയോഗിച്ചിരിക്കുന്ന വാക്യം. അതിനെ E W S എന്ന് ചുരുക്കപ്പേരിൽ വിളിക്കുന്നു. (ചിത്രം 1)

ചിത്രം 1

 2. അപ്പോൾ ഈ സംവരണം മുന്നോക്കക്കാർക്ക് മാത്രമുള്ളതല്ലേ?

അല്ല, നിലവിൽ സംവരണം കിട്ടാത്ത എല്ലാവർക്കും ഇത് കിട്ടും. ഇതിനെ മലയാളത്തിൽ തർജ്ജമ ചെയ്തപ്പോൾ പറ്റിയ പിശകാണ്' ഈ സംവരണം മുന്നോക്കക്കാർക്ക് മാത്രമാണെന്ന തെറ്റിദ്ധാരണ ഉണ്ടാക്കിയത്. കേരളത്തിൽ ഉപയോഗിച്ച വാക്ക് തിരുത്തേണ്ടതാണ്. സംവരണേതര വിഭാഗങ്ങളിൽ സാമ്പത്തികമായി പിന്നോക്കം നിൽക്കുന്നവർക്കുള്ള സംവരണം എന്ന വാക്കാണ് ശരി.

 3. ആർക്കൊക്കെയാണ് ഈ സംവരണം കിട്ടുക?

നമ്പൂതിരി, നായർ, അമ്പലവാസി, തുടങ്ങിയവർ, ജനറൽ വിഭാഗത്തിൽ ഉൾപ്പെടുന്ന ക്രിസ്ത്യാനികൾ, കേരളത്തിന് പുറത്തുള്ള സംവരണമില്ലാത്ത മുസ്ലീങ്ങൾ , ജാതിയോ മതമോ രേഖപ്പെടുത്താത്തവർ, തുടങ്ങിയവരിലെ സാമ്പത്തികമായി പിന്നോക്കം നിൽക്കുന്നവർക്ക് ഇതിൻ്റെ ഗുണം കിട്ടും. ഉദാ: കേരള സർവകലാശാലയിൽ ഇതിൻ്റെ ഗുണം ആദ്യം കിട്ടിയവരിൽ ഒരാൾ ജാതി മതം എന്നിവ ചേർക്കാത്ത ഈഴവ സമുദായത്തിൽ പെട്ട വിദ്യാർത്ഥിക്കായിരുന്നു. (വിവരത്തിന് കടപ്പാട്: സുബിൻ ഡെന്നീസിൻ്റെ പോസ്റ്റ് )

4. അതെന്താ കേരളത്തിലെ മുസ്ലീങ്ങൾക്ക് ഈ സംവരണം കിട്ടാത്തത്? ഇന്ത്യയിലെ മറ്റ് സ്ഥലങ്ങളിൽ മുസ്ലീങ്ങൾക്ക് കിട്ടുന്നത്?

കേരളത്തിൽ നിലവിൽ മുസ്ലീം വിഭാഗത്തിലെ എല്ലാവർക്കും 12 % സംവരണം ഉണ്ട്. ഇന്ത്യയിൽ മറ്റിടങ്ങളിൽ ചില പ്രത്യേക ജാതിയിൽപ്പെട്ട മുസ്ലീങ്ങൾക്ക് മാത്രമാണ് സംവരണമുള്ളത്.ഭൂരിപക്ഷം മുസ്ലീങ്ങൾക്കും ഇന്ത്യയിൽ സംവരണമില്ല. ഇപ്പോൾ ഈ സംവരണത്തിൻ്റെ ഗുണം നിലവിൽ സംവരണമില്ലാത്ത 8 കോടി മുസ്ലീങ്ങളിലെ സംവരണമില്ലാത്ത ദരിദ്രർക്ക് കിട്ടും എന്ന് കണക്കാക്കപ്പെടുന്നു.

5. പിന്നെന്തിനാണ് ജമാഅത്തെ ഇസ്ലാമിയും വെൽഫെയർ പാർട്ടിയും ഇതിനെ എതിർക്കുന്നത്?

ആരു പറഞ്ഞു എതിർക്കുന്നു എന്ന്. കേരളത്തിൽ മാത്രമേ എതിർപ്പുള്ളു. ഇന്ത്യയിൽ മറ്റിടങ്ങളിൽ അവർക്ക് ഒരു എതിർപ്പുമില്ല. ജമാഅത്തെ ഇസ്ലാമി സെക്രട്ടറി ജനറൽ മുഹമ്മദ് സലിം എഞ്ചിനീയർ ഇതിനെ അനുകൂലിച്ച് പ്രസ്താവനയും ഇറക്കിയിട്ടുണ്ട്. വെൽഫെയർ പാർട്ടി ഇന്ത്യയിൽ മറ്റൊരിടത്തും ഒരു സമരവും നടത്തുന്നില്ല. (ജമാ അത്തെ ഇസ്ലാമിയുടെ വെബ്‌സൈറ്റ് ചിത്രം: 2 )

ചിത്രം 2

6. അതൊരു ഇരട്ടത്താപ്പല്ലേ?

മലയാളത്തിൽ അങ്ങനെ പറയാം.

7. കേരളത്തിലെങ്ങനെയാണ് ,എപ്പോഴാണ് ഈ മുസ്ലീം / ഈഴവ etc സംവരണം വന്നത്?

: 1957ലെ ഇ എം എസിൻ്റെ നേതൃത്വത്തിലുള്ള കമ്മ്യൂണിസ്റ്റ് മന്ത്രിസഭയാണ് ഇത് ക്വാട്ട നിശ്ചയിച്ച് നടപ്പിലാക്കിയത്. നിലവിലുണ്ടായിരുന്ന SC - ST സംവരണത്തോടൊപ്പം ഈഴവ, പിന്നോക്ക ഹിന്ദു, മുസ്ലീം തുടങ്ങിയ വിഭാഗങ്ങളുടെ സംവരണം കൂടി ശതമാനക്കണക്കിൽ ഇന്ത്യയിൽ ആദ്യമായി ഒരു സംസ്ഥാനത്ത് നടപ്പിലാക്കുന്നത് ആദ്യത്തെ കമ്മ്യൂണിസ്റ്റ് മന്ത്രിസഭയാണ്.ഇന്ത്യയിൽ മറ്റിടങ്ങളിൽ OBC സംവരണം, അതും ഭാഗികമായി വരുന്നത് 90 കളിൽ മണ്ഡൽ കമ്മീഷൻ റിപ്പോർട്ടിന് ശേഷമാണ്. മുസ്ലീങ്ങൾക്ക് 10% സംവരണം കേരളത്തിലും പിന്നീട് ബംഗാളിലും കമ്യൂണിസ്റ്റ് പാർട്ടിയാണ് കൊണ്ടു വന്നത്.

8. ഇ എം എസ് ജാതി സംവരണത്തെ എതിർത്തു എന്ന് പലരും പ്രചരിപ്പിക്കുന്നുണ്ടല്ലോ, ഭരണപരിഷ്ക്കാര കമ്മീഷനിൽ അങ്ങനെ എഴുതിയിട്ടുണ്ട് എന്നാണ് ആരോപണം. അത്. ശരിയാണോ?

ശരിയല്ല.കമ്മീഷൻ റിപ്പോർട്ടിൽ ജാതി സംവരണത്തെ അനുകൂലിക്കുകയാണ് ഇ എം എസ് ചെയ്യുന്നത്.ആ റിപ്പോർട്ടിൽ ഇ എം എസ് എഴുതിയതെന്താണെന്ന് അതേ പോലെ കൊടുക്കുന്നു.(പേജ് 97 -98 )

" We have considered the question of reservation of posts for backward classes. In this state 40 per cent of the posts in Government service are reserved for backward communities. This is in addition to the reservation of 10 percent for Scheduled caste and Scheduled Tribes. Within this 40 percent there is a "principle of sub-rotation" by which a certain percentage is reserved for a community or group of communities.

The system as it now exists has several disadvantages. Firstly there is a continuous clamour to include more and more communities in the list and the basis for the assessment of their backwardness is not entirely satisfactory. Secondly there are among the "backward classes" communities which are relatively advanced and those who are truly backward. The latter have a feeling that the benefit of the reservation generally goes to the former. The principle of sub-rotation has not met this to a satisfactory extension. Thirdly there is a consideration that such reservation inevitable brings down the quality and standard of the services. The most important point, however, is that the system creates a psychology amongst all the communities by which caste and communal consciousness is perpetuated.

On account of these it has been suggested by some that the criteria for backwardness should be economic rather than those based merely on communities. This suggestion looks attractive. But apart from the fact that over 80 percent of our people should be considered to be economically backward, it ignores the historical fact that economic backwardness in our country has in most cases be in the concomitant and result of social backwardness.

It is exceedingly difficult to suggest a simple solution to this complicated problem. A certain amount of protection and encouragement to the backward classes is necessary for some time more to come so that they may get over the handicaps to which they have been subjected for centuries. The grievances of the economically backward sections of the so-called "forward classes" are also real. Their complaint is that under the garb of reservation, richer persons of less merit belonging to the backward communities are able to get better facilities in education and recruitment to services which are not available to persons of merit in the "forward classes" who are really poor. The object of these concessions is obviously economic upliftment which it is hoped will automatically lead to social upliftment. The concessions should, therefore, be given only to those who are really poor in the communities now described as backward. We are therefore of the view that the benefit of the reservation for backward classes should be given to those given only to those individuals who fall below a prescribed economic level. We suggest this as a first step towards the recognition of economic backwardness as the index for giving state protection."

അതായത് ഒരു കമ്മീഷൻ എന്ന നിലയ്ക്ക് സംവരണത്തെ കുറിച്ച് ഉയർന്ന അഭിപ്രായങ്ങളെ മൂന്ന് പ്രശ്നങ്ങളായി പറയുകയും അതിനു ശേഷം കമ്മീഷന്റെ അഭിപ്രായമായി

"But apart from the fact that over 80 percent of our people should be considered to be economically backward, it ignores the historical fact that economic lbackwardness in our country has in most cases be in the concomitant and result of social backwardness "

എന്ന നിർണായക വാദം അവതരിപ്പിക്കുകയുമാണ് ഇ എം എസ് ചെയ്യുന്നത്.(കടപ്പാട്: ശ്രീജിത് ശിവരാമൻ )

9. അപ്പോൾ ഇ എം എസ് സാമ്പത്തിക സംവരണം എന്ന ആശയം മുന്നോട്ട് വെച്ചിട്ടില്ലേ?

ഉണ്ട്. അത് കമ്മ്യൂണിസ്റ്റ് പാർട്ടിയുടെ ദീർഘകാലത്തെ നയമാണ്. പ്രകടനപത്രികയിൽ അത് സൂചിപ്പിച്ചിട്ടുണ്ട്.നിലവിലുള്ള ജാതി സംവരണത്തെ ബാധിക്കാതെ തന്നെ മുന്നോക്കക്കാരിലെ ദരിദ്രർക്ക് 10 % സംവരണം കൊടുക്കണം എന്നതാണ് പാർട്ടി തീരുമാനം.

10. ദാരിദ്ര്യം എങ്ങനെ സംവരണത്തിൻ്റെ മാനദണ്ഡമാവും? സംവരണം ദാരിദ്ര്യ നിർമ്മാർജ്ജന പദ്ധതിയാണോ?

ഇത് ഇപ്പോഴത്തെ ഒരു തെറ്റിദ്ധരിപ്പിക്കൽ പ്രസ്താവനയാണ്. സംവരണത്തിന് പല മാനദണ്ഡങ്ങൾ ഉണ്ട്.സമൂഹത്തിലെ അവശ വിഭാഗങ്ങൾക്ക് സാമൂഹിക നീതി ഉറപ്പു വരുത്തുക എന്നതാണ് അതിൻ്റെ ലക്ഷ്യം അതിലൊന്ന് മാത്രമാണ് ജാതി സംവരണം. സംവരണം ജാതി നിർമ്മാർജ്ജന പദ്ധതിയല്ല.പട്ടികജാതി പട്ടിക വർഗ്ഗ വിഭാഗങ്ങൾക്ക് ജാതി അടിസ്ഥാനത്തിൽ സംവരണമുണ്ട്. OBC സംവരണത്തിന് മാനദണ്ഡം സാമ്പത്തികം കൂടിയാണ്. വികലാംഗ സംവരണം വികലാംഗ നിർമ്മാർജ്ജന പദ്ധതിയല്ല, ലക്ഷദ്വീപ് സംവരണം ലക്ഷദ്വീപ് നിർമ്മാർജ്ജന പദ്ധതിയല്ല, സൈനികരുടെ ആശ്രിതർക്കുള്ള സംവരണം സൈനിക നിർമ്മാർജ്ജന പദ്ധതിയുമല്ല. സമൂഹത്തിൽ അവശത അനുഭവിക്കുന്നവരെ കണ്ടെത്തി മുഖ്യധാരയിൽ കൊണ്ടുവരാനുള്ള വിവിധ വഴികളാണത്. . ഭരണഘടന മത ഗ്രന്ഥമല്ല, കാലാനുസൃതമായ മാറ്റങ്ങൾ ഭരണഘടനയിലും വരും. അതിനുള്ള വ്യവസ്ഥയും അംബേദ്കർ തന്നെയാണ് എഴുതിച്ചേർത്തത്.

11. സാമ്പത്തിക സംവരണം എന്ന ആശയം സി പി ഐ എം പോലെ ഒരു പാർട്ടി മുന്നോട്ട് വെക്കാമോ?

ഇന്ത്യയിലെ എല്ലാ പാർട്ടികളും അംഗീകരിക്കുന്ന നയമാണത്.എല്ലാ പാർട്ടിക്കാരും അനുകൂലിച്ച് വോട്ട് ചെയ്താണ് ഇത് നിയമമാക്കിയത്. പാർലിമെൻ്റിൽ ഈ ബില്ലിനെതിരെ എതിർത്ത് വോട്ട് ചെയ്തത് ആകെ മൂന്ന് അംഗങ്ങൾ മാത്രമാണ്.

12. അതാരൊക്കെയാണ്?

മുസ്ലീം ലീഗിൻ്റെ രണ്ട് പാർലിമെൻ്റ് അംഗങ്ങളും ഒവൈസിയുമാണത്.

13. അപ്പോൾ മുസ്ലീം ലീഗ് മാത്രമാണ് ഇതിനെതിരെ നിലപാടുള്ള ഏക പാർട്ടി?

ചരിത്രമറിയാത്തവർക്ക് അങ്ങനെ തോന്നും. ഇന്ത്യയിൽ ആദ്യമായി മുന്നോക്കക്കാരിലെ പിന്നോക്കക്കാർക്ക് 10% സംവരണം നടപ്പിലാക്കിയ ഉത്തരവ് ഇറക്കിയത് 2006 ഫെബ്രുവരിയിൽ ലീഗ് ഭരിക്കുന്ന വിദ്യാഭ്യാസ വകുപ്പാണ്. ഉമ്മൻ ചാണ്ടിയായിരുന്നു മുഖ്യമന്ത്രി. അന്ന് മുതൽ കോളേജ് പ്രവേശനത്തിന് ഈ 10% സംവരണം ഉണ്ട്. 14 വർഷമായി നടപ്പിലുള്ള കാര്യമാണത്.( ഉത്തരവ് ചിത്രം :3)

ചിത്രം 3

14. അപ്പോൾ ലീഗ് ഇതിനെതിരെ പ്രക്ഷോഭത്തിന് പോകുന്നതോ?

ഇരട്ടത്താപ്പ് എന്ന എന്ന് മലയാളത്തിൽ പറയാം

15. പാർലിമെൻ്റ് പാസാക്കി, എന്നാലും കേരളത്തിൽ EWS സംവരണം തിടുക്കത്തിൽ നടപ്പിലാക്കിയതാണെന്ന് പറയുന്നുണ്ടല്ലോ. എന്തിനായിരുന്നു ഈ തിടുക്കം?

ആരോപണം ശരിയല്ല,ഏറ്റവും വൈകി നടപ്പിലാക്കിയ സംസ്ഥാനമാണ് കേരളം. ഇന്ത്യയിലൊട്ടാകെ 32 ഇടങ്ങളിൽ , സംസ്ഥാനങ്ങളിലും കേന്ദ്ര ഭരണ പ്രദേശങ്ങളിലും ഇത് നടപ്പിലാക്കിക്കഴിഞ്ഞു.രണ്ടിടത്ത് മാത്രമാണ് ഇനി ബാക്കിയുള്ളത്. അത് തമിഴ്‌നാടും കർണാടകയുമാണ്. ബംഗാളിലൊക്കെ മമതാ ബാനർജി സർക്കാർ കഴിഞ്ഞ ജൂലൈയിൽ ഇത് നടപ്പിലാക്കി .(ബംഗാൾ സർക്കാർ ഉത്തരവ് ചിത്രം: 4 )

ചിത്രം 4

16. അതെന്താ തമിഴ്നാടും കർണാടകയും ഇത് നടപ്പിലാക്കാഞ്ഞത്. അതേ മാതൃക കേരളത്തിലും ആവാമായിരുന്നില്ലേ?

:കർണാടകയിലും തമിഴ്നാട്ടിലും നടപ്പിലാക്കാതിരിക്കാൻ കാരണം അതത് സംസ്ഥാനങ്ങളിലെ സാമുദായിക വോട്ട് ബാങ്ക് രാഷ്ട്രീയമാണ്. തമിഴ്നാട്ടിൽ നിലവിൽ തന്നെ 69 % സംവരണമുണ്ട്. കേരളത്തിൽ CPI M ആ രാഷ്ട്രീയം കളിച്ചില്ല എന്നത് അത് പാർട്ടിയുടെ ആർജ്ജവത്തെ കാണിക്കുന്നു.പാർട്ടി നയം എന്താണോ അത് നടപ്പിലാക്കി.

17. ഇത് നടപ്പിലാക്കുന്നതിന് മുമ്പ് വല്ല പഠനവും കേരള സർക്കാർ നടത്തിയിരുന്നോ?

ജസ്റ്റിസ് ശശിധരൻ നായർ കമ്മീഷനെ നിയമിക്കുകയും ആ റിപ്പോർട്ട് പരിഗണിക്കുകയും ചെയ്തതിന് ശേഷമാണ് നടപ്പിലാക്കിയത്. അത്തരമൊരു പഠനം നടത്തിയ ഏക സംസ്ഥാനവും കേരളമാണ്.

18. ആ പഠനം സമഗ്രമല്ല എന്ന് വിമർശനമുണ്ടല്ലോ

പഠനത്തിന് പരിമിതി ഉണ്ടെങ്കിൽ മറ്റൊരു പഠനം നടത്തി അത് പരിഹരിക്കണം. ഇന്ത്യയിൽ മറ്റൊരിടത്തും ഒരു കമ്മീഷനെ വെച്ച് പഠിച്ചിട്ടില്ല. അത് കൂടി ആലോചിക്കണം.EWS മാനദണ്ഡങ്ങൾ 3 വർഷം കൂടുമ്പോൾ പുതുക്കി നിശ്ചയിക്കുന്നതുമാണ്.

19 .കേരളത്തിൽ ഈ സംവരണവ്യവസ്ഥകൾ വളരെ ഉദാരമാക്കി എന്ന് പറയുന്നത് ശരിയാണോ?

ശരിയല്ല, EWS സംവരണം കിട്ടണമെങ്കിൽ കേന്ദ്രം തീരുമാനിച്ചത് ഒരു കുടുംബത്തിന്ന് വാർഷിക വരുമാനം 8 ലക്ഷം രൂപയാണ്. കേരളം അത് നേർ പകുതി, 4 ലക്ഷം രൂപയാക്കി. കേന്ദ്രത്തിൽ അഞ്ചേക്കർ വരെ സ്ഥലം ഉള്ളവർക്ക് സംവരണം ആവാം. കേരളം അതും പകുതിയാക്കി ,രണ്ടര ഏക്കർ. ഹൗസ് പ്ലോട്ട് ഗ്രാമത്തിൽ 50 സെൻ്റ് മുൻസിപ്പാലിറ്റിയിൽ 20 സെൻ്റ് കോർപ്പറേഷനിൽ 15 സെൻ്റ് എന്ന് കേരളം തീരുമാനിച്ചു.

20. വീടിൻ്റെ വിസ്തീർണത്തിന് കമ്മീഷൻ പരിധി വെച്ചില്ലല്ലോ, അത് ശരിയാണോ?

കേരള സാഹചര്യത്തിൽ ഇത് ശരിയാണ്.പല സംസ്ഥാനങ്ങളും ഈ രീതി സ്വീകരിച്ചിട്ടുണ്ട്.വീട് വെച്ച് മുടിയുന്നയാളാണ് മലയാളി. വീട് മാനദണ്ഡമാക്കിയാൽ അർഹതപ്പെട്ട പലരും പുറത്താവും. വീടിൻ്റെ സ്ക്വയർ ഫീറ്റ് OBC ക്രീമിലേയറിന് മാനദണ്ഡം ആക്കിയാൽ 1000 പോട്ടെ, 2000 സ്ക്വയർ ഫീറ്റ് ആണെങ്കിൽ തന്നെ നിലവിൽ OBC സംവരണം ലഭിച്ചുകൊണ്ടിരിക്കുന്ന എത്ര OBC ജാതിക്കാർക്ക് അത് കിട്ടുമെന്ന് ആലോചിച്ചു നോക്കുക.

21. പതിനഞ്ച് സെൻ്റ് സ്ഥലം എന്നൊക്കെ മാനദണ്ഡം ഉണ്ടോ?ഇക്കാര്യം ഇതിനെതിരെയുള്ള പോസ്റ്റുകളിൽ സൂചിപ്പിക്കാത്തതെന്താണ് ?

കോർപ്പറേഷനിൽ 15 സെൻ്റ്, മുൻസിപ്പാലിറ്റിയിൽ 20 സെൻ്റ് എന്നിവയാണ് പരിധി. ആ സത്യം മൂടിവെച്ചും അർദ്ധ സത്യങ്ങൾ പ്രചരിപ്പിച്ചും ജനങ്ങളെ തെറ്റിദ്ധരിപ്പിച്ച് സർക്കാരിനെതിരെ തിരിക്കാനുള്ള ഗൂഢശ്രമമാണ് പലരും നടത്തുന്നത്. (EWS മാനദണ്ഡങ്ങൾ -ചിത്രം5)

ചിത്രം5

22. കേന്ദ്ര മാനദണ്ഡങ്ങൾ പകുതിയാക്കി, ശരി,എന്നാലും ഈ നാലു ലക്ഷം രൂപ വാർഷിക വരുമാനം. ഗ്രാമത്തിൽ രണ്ടര ഏക്കർ എന്നൊക്കെ പറയുന്നത് കൂടുതലല്ലേ?

ഉയർന്ന പരിധിയാണത്. ആ മാനദണ്ഡവും 3 വർഷം കൂടുമ്പോൾ പുതുക്കി നിശ്ചയിക്കും എന്ന് കേരള സർക്കാർ ഉത്തരവിൽ പറയുന്നുണ്ട്. ഒ ബി സി ക്രീമിലേയറിൻ്റെ മാനദണ്ഡം കൂടി ഇതിനോട് ചേർത്ത് പരിശോധിക്കേണ്ടതാണ്.

23. OBC - ക്രീമിലേയറോ അതെന്താണ്?

നിലവിൽ സംവരണം ലഭിച്ചു കൊണ്ടിരിക്കുന്ന ഈഴവ മുസ്ലീം പിന്നോക്ക ഹിന്ദു തുടങ്ങിയ വിഭാഗങ്ങളിലെ സമ്പന്നരെ കണ്ടെത്തി ഒഴിവാക്കി, അതിലെ ദരിദ്രർക്ക് സംവരണം ലഭിക്കാനുള്ള പദ്ധതിയാണത്. ഇതില്ലെങ്കിൽ കോടീശ്വരൻമാരായ യൂസഫലിക്കും വെള്ളാപ്പള്ളിക്കും വരെ സംവരണം കിട്ടും. ആ സമുദായത്തിലെ ദരിദ്രർ പിന്തള്ളപ്പെട്ട് പോവുകയും ചെയ്യും.

24. എന്താണ് അതിൻ്റെ മാനദണ്ഡം?

നിലവിൽ ശമ്പളവരുമാനം 8 ലക്ഷം രൂപ .കാർഷിക വരുമാനം 8 ലക്ഷം രൂപ എന്നിങ്ങനെ 16 ലക്ഷം രൂപ വരെ വാർഷിക വരുമാനം ആവാം. മുന്നോക്ക സംവരണത്തിനായി തീരുമാനിച്ച തുകയുടെ നാലിരട്ടിയാണത്. ഭൂസ്വത്ത് പന്ത്രണ്ടര ഏക്കർ വരെയായാലും OBC സംവരണം കിട്ടും. EWS മാനദണ്ഡത്തിൻ്റെ അഞ്ചിരട്ടിയാണത് .

25. ലളിതമായി ഒന്നു പറഞ്ഞു തരൂ

എന്നു വെച്ചാൽ മുന്നോക്കക്കാരിലെ ദരിദ്രന് സംവരണം മാസവരുമാനം മുപ്പത്തിമൂവായിരത്തിൽ താഴെ വേണം. ഒരു ലക്ഷത്തി മുപ്പത്തിമൂവായിരം രൂപ വരെ വരുമാനം ഉണ്ടായാലും OBC ക്രീമിലേയറിൽ പെടില്ല. സംവരണം കിട്ടും.

26. എന്നാലും ഈ ക്രീമിലെയർ ഒരു അനീതിയല്ലേ?' ഒരു പിന്നോക്കക്കാരൻ കഷ്ടപ്പെട്ട് കുറച്ച് പൈസ ഉണ്ടാക്കി എന്ന് വെച്ച് അവനെ സംവരണത്തിൽ നിന്ന് ഒഴിവാക്കാമോ? അവന്‍റെ തലമുറ വർഷങ്ങളായി പിന്നോക്കാവസ്ഥ അനുഭവിച്ചു വരുന്നതല്ലേ?

ശരിയാണത്. ഒഴിവാക്കാൻ പാടില്ല. പക്ഷേ പിന്നോക്കക്കാരിലെ പാവപ്പെട്ടവർക്ക് അതിൻ്റെ ഗുണം ആദ്യം കിട്ടണം. പാവപ്പെട്ടവർ ഇല്ലെങ്കിൽ അതേ സമുദായത്തിലെ ക്രീമിലേയറിന് അതായത് സമ്പന്നർക്ക് അത് കൊടുക്കണം.

27. നല്ല നിർദ്ദേശമാണല്ലോ. ഇതാരെങ്കിലും മുന്നോട്ട് വെച്ചിട്ടുണ്ടോ?

ഉണ്ട്.സി പി ഐ എം എന്ന പാർട്ടിയുടെ നയമാണത്.

28. ഈ മുന്നോക്കക്കാരിലെ പിന്നോക്കക്കാരെ എങ്ങനെ കണ്ടെത്തും? എങ്ങനെയാണ് ഈ 10% ഇതിന് വല്ല കണക്കുമുണ്ടോ?

നിലവിൽ കേന്ദ്ര നിയമം 10% സംവരണമാണ് ശതമാനമാണ്. ഭൂരിപക്ഷ സംസ്ഥാനങ്ങളിലും അത് 10% ആണ്. പരിഷത്തിൻ്റെ 2006 ലെ കേരള പഠന റിപ്പോർട്ടിൽ മുന്നോക്കക്കാരിലെ ദരിദ്രർ 34.5 % ആണ് . അതിനോടു കൂടി മതം,/ജാതി രേഖപ്പെടുത്താത്തവരെ കൂടി കൂട്ടണം. 2006 ന് ശേഷം വർദ്ധിച്ച ദാരിദ്ര്യ നിരക്ക് കൂടി പരിഗണിക്കണം. പത്തു ശതമാനത്തിന് മുകളിലേ വരൂ.(പരിഷത്തിൻ്റെ കണക്ക് :ചിത്രം 6 )

ചിത്രം 6

29. അങ്ങനെയെങ്കിൽ ഇതെല്ലാ ജാതി / മത വിഭാഗത്തിലെ ദരിദ്രർക്കും കൊടുക്കണ്ടേ?

മറ്റ് ജാതിമത വിഭാഗങ്ങൾക്ക് ദരിദ്രരോ സമ്പന്നരോ എന്ന് പോലും നോക്കാതെ സംവരണം ഉണ്ടല്ലോ. ഈഴവർക്ക് 14% മുസ്ലീമിന് 12% അങ്ങനെ.

30. ഈ EWS സംവരണത്തിൽ കയറുന്നവർക്ക് മെറിറ്റ് കുറവാണ് എന്ന് വാദമുണ്ടല്ലോ. വളരെ താഴ്ന്ന റാങ്ക് ഉള്ളവർക്കാണ് ഇതിൽ കിട്ടുന്നത്. അത് ശരിയാണോ?

ഇത് പണ്ട് സവർണർ ഉന്നയിച്ച കേവല മെറിറ്റ് വാദമാണ്.വളരെ താഴെയുള്ള റാങ്കുള്ളവർക്കാണ് E W S സംവരണം കിട്ടുന്നത് എന്നത് അവരിലെ ദരിദ്രരുടെ സാമൂഹിക പിന്നോക്കാവസ്ഥയാണ് സൂചിപ്പിക്കുന്നത്. E W S സംവരണം ആവശ്യമാണ് എന്നതിൻ്റെ ഒരു വ്യക്തമായ സൂചനയാണ് ഇപ്പോഴത്തെ റാങ്ക് പട്ടികകൾ.

ഉദാ: MBBS റാങ്ക് പട്ടികയിൽ സീറ്റ് കിട്ടിയ അവസാന റാങ്ക് കൊടുക്കുന്നു. മുസ്ലീം - 1474, ഈഴവ 1576,

SC - 3200, EWS - 8461. എല്ലാ ലിസ്റ്റിലും EWS പിന്നിലാണ്. എന്നു വെച്ചാൽ മുന്നോക്കക്കാരിലെ എല്ലാവരും ഒരേ കൾച്ചറൽ കാപ്പിറ്റൽ ഉള്ളവരല്ല എന്നാണർത്ഥം.

31. അപ്പോൾ ഈ EWS കാരുടെ താഴ്ന്ന റാങ്ക് ചൂണ്ടിക്കാണിച്ച് പരിഹസിക്കരുത് എന്നാണോ?

: അല്ല, പരിഹസിക്കണം. മെറിറ്റും റാങ്കും പരിഗണിക്കാതെ താഴ്ന്ന ജാതിക്കാർക്ക് സംവരണം കിട്ടുന്നു ' എന്ന് പണ്ട് പരിഹസിച്ചിരുന്നവരാണ് മുന്നോക്കക്കാരിൽ ഭൂരിഭാഗവും. അതിനേക്കാൾ താഴ്‌ന്ന റാങ്കോട് കൂടിയാണ് നിങ്ങൾ ഉദ്യോഗത്തിലും കോളേജ് പ്രവേശനത്തിലും ചേരാൻ പോകുന്നത് എന്ന വിവരം അവരെ ഒന്നറിയിച്ചു കൊടുക്കേണ്ടത് ചരിത്ര പരമായ നീതിയാണ്.

32. 10% EWS സംവരണം എന്ന് പറയുമ്പോഴും നടപ്പിലാക്കിയത് 20 % ആണ് എന്ന് ചിലർ ആരോപിക്കുന്നുണ്ടല്ലോ.

തെറ്റിദ്ധരിപ്പിക്കുന്ന വാദമാണത്. പി എസ് സി യിൽ 9, 19, 29, 39, 49 ,59, 69, 79, 89, 99 എന്നീ ടേണുകളാണ് മാറ്റി വെച്ചത്. 10 ശതമാനം എന്നാൽ 100 ൻ്റെ 10 എണ്ണം. ഇത് കൊടുത്തത് സംവരണ വിഭാഗങ്ങളുടെ പങ്കിൽ നിന്നല്ല.ജനറൽ വിഭാഗത്തിൻ്റെ ടേണിൽ നിന്നാണ്. സംവരണ ടേണുകൾക്ക് ഒരു നഷ്ടവും വരില്ല. ആകെ സീറ്റിൻ്റെ 10% സംവരണ സീറ്റ് നഷ്ടപ്പെടുത്താതെ ജനറൽ സീറ്റിൽ നിന്ന് കൊടുത്തു എന്ന് മുഖ്യമന്ത്രി പറഞ്ഞിട്ടുണ്ട്. ജനറൽ വിഭാഗത്തിൻ്റെ 10% അല്ല ,സംവരണ സീറ്റുകൾ കൊടുക്കുന്നത് ജനറൽ വിഭാഗത്തിൽ നിന്നാണ് എന്നാണതിൻ്റെ അർത്ഥം. ഉത്തരവ് വ്യക്തമാണ്. (ചിത്രം 7 )


33. പൊതു വിഭാഗത്തിൽ സംവരണ വിഭാഗങ്ങൾക്ക് മൽസരിക്കാനുള്ള 10% നഷ്ടമാവില്ലേ?

നഷ്ടമാവും. 22% SC - ST സംവരണം മാത്രമുള്ളപ്പോൾ 28% OBC സംവരണം കൂടി 1957 ലെ സർക്കാർ കൊണ്ടുവന്ന് ആകെ സംവരണം 50% ആക്കിയപ്പോൾ SC ST വിഭാഗത്തിന് 28% സീറ്റിൽ മൽസരിക്കാനുള്ള സാധ്യത ഇല്ലാതായി. അത് പോലെ ഒരു സംഭവമാണ് ഇതും. 40 % ജനറലും 60% സംവരണവും. സ്വാഭാവികമാണത്. ഇങ്ങനെയല്ലാതെ അത് നടപ്പിലാക്കാൻ കഴിയില്ല.

34. ഈ കേന്ദ്ര നിയമം വരുന്നതിന് മുമ്പ് തന്നെ ദേവസ്വം ബോർഡിൽ ഇടതുപക്ഷം ഈ മുന്നോക്ക സംവരണം നടപ്പിലാക്കിയില്ലേ ? അതെന്തിനാണ്?

മുന്നോക്കക്കാരിലെ സാമ്പത്തികമായി പിന്നോക്കം നിൽക്കുന്നവർക്ക് 10% സംവരണം കൊടുക്കണം എന്നത് പാർട്ടി നയമാണ്.ദേവസ്വം ബോർഡിൽ അത് നടപ്പിലാക്കാൻ ഭരണഘടനാ ഭേദഗതി വേണ്ട. അതു കൊണ്ട് സർക്കാർ നടപ്പിലാക്കി.

അതോടൊപ്പം 40% പിന്നോക്ക ജാതിക്കാർക്ക് സംവരണം കൊണ്ടുവന്നു. ഈഴവ 17% SC 10% എന്ന അനുപാതത്തിൽ പിന്നോക്ക വിഭാഗങ്ങൾക്കെല്ലാം കൂടി ചരിത്രത്തിൽ ആദ്യമായി ദേവസ്വം ബോർഡിൽ 40% സംവരണം കിട്ടി. അക്കാര്യം ആരും കാണില്ല. അതിനെക്കുറിച്ച് എഴുതുകയുമില്ല. ഇപ്പോൾ മുന്നോക്കക്കാർക്ക് അമിത പ്രാതിനിധ്യം ഉണ്ടെന്ന് കരുതി അവരിലെ ദരിദ്രർക്ക് പ്രാതിനിധ്യം ഉണ്ടാവണമെന്നില്ല. അതാണ് ഇതിൻ്റെ യുക്തി.

ചിത്രം 8

35. എന്തൊക്കെയായാലും ഇടതുപക്ഷം സാമ്പത്തിക സംവരണത്തെ അനുകൂലിക്കുക എന്നത് ശരിയാണോ?

സിപിഐ എം ജാതി പാർട്ടിയല്ല, മത പാർട്ടിയല്ല, സ്വത്വവാദി പാർട്ടിയുമല്ല . സമ്പദ് വ്യവസ്ഥയ്ക്കനുസരിച്ച് ലോകത്തെ കാണുകയും വ്യാഖ്യാനിക്കുകയും ഉള്ളവനും ഇല്ലാത്തവനും തമ്മിലുള്ള വർഗ്ഗ വ്യത്യാസം കുറയ്ക്കാൻ ശ്രമിക്കുകയും ചെയ്യുന്ന പാർട്ടിയാണ് . പാർട്ടി ജാതിയെ തിരിച്ചറിഞ്ഞു എന്നതിൻ്റെ സൂചനയാണ് പാർട്ടി 57 ൽ OBC സംവരണം നടപ്പിലാക്കിയത്.സാമ്പത്തിക അന്തരം പിന്നോക്കാവസ്ഥയ്ക്ക് കാരണമാവുന്നു എന്ന തിരിച്ചറിവാണ് , നിലവിൽ സംവരണമില്ലാത്തവർക്ക് 10 % സംവരണം നൽകാനുള്ള ഇപ്പോഴത്തെ തീരുമാനം.

36. അപ്പോൾ സി പി ഐ എമ്മിൻ്റേയും ഇടതുപക്ഷ സർക്കാരിൻ്റെയും നടപടി ശരിയാണ് എന്നാണോ അനുമാനിക്കേണ്ടത്?

: 100 % ശരിയായ നിലപാടാണത്. ചരിത്രം അത് തെളിയിക്കുക തന്നെ ചെയ്യും.

അജിത്ത് എം എസ് 

Tuesday, November 10, 2020

ഭിന്നിപ്പിക്കാൻ സംവരണവും ആയുധമാക്കുമ്പോൾ

പൗരത്വഭേദഗതി നിയമത്തിനും കർഷകബില്ലുകൾക്കുംശേഷം ബിജെപി സംഘപരിവാർ പ്രഭൃതികളുടെ അടുത്ത നീക്കം എന്തായിരിക്കും എന്നാശങ്കപ്പെടുന്നവർക്ക് ഇതര പിന്നോക്ക വിഭാഗങ്ങൾക്കായുള്ള പാർലമെന്ററി കമ്മിറ്റി പുനഃസംഘടിപ്പിക്കുന്നതിൽ അനിശ്ചിതമായ അമാന്തം ചില സൂചനകൾ നൽകുന്നുണ്ട്.  ക്രീമിലെയർ നിർണയത്തിൽ ശമ്പളത്തെക്കൂടി ഒരു മാനദണ്ഡമാക്കാനും പിന്നോക്കക്കാരെ വീണ്ടും പല തട്ടുകളിലായി വിഭജിക്കാനുമൊക്കെയുള്ള ആവശ്യത്തിന് പിന്നിലെ ഒളി അജൻഡകൾ മറനീക്കുന്നു. നിലനിൽക്കുന്ന സംവരണതത്വങ്ങളെ അട്ടിമറിക്കാനുള്ള സവർണഫാസിസ്റ്റ് ഭരണകൂടത്തിന്റെ ചേരുവകൾ അണിയറയിൽ തയ്യാറാകുന്നു.

അധികാരദുർവിനിയോഗത്തിലൂടെ പാർലമെന്റിൽ കേന്ദ്രസർക്കാർ പാസാക്കിയെടുത്ത കാർഷിക ബില്ലുകൾക്കെതിരായി  കർഷകരുടെ ഇടയിൽ വലിയ അസംതൃപ്തി പുകഞ്ഞുകൊണ്ടിരിക്കുകയാണ്. ഹിന്ദി മേഖലയിലെ കർഷകസമൂഹങ്ങളിൽ ഒരു വലിയ പങ്ക് പിന്നോക്ക സമുദായത്തിൽപ്പെടുന്നവരായിരിക്കേ പിന്നോക്ക സംവരണത്തിൽ വെള്ളം ചേർക്കുന്നതിലൂടെ ഈ ജനവിഭാഗങ്ങളെ തമ്മിലടിപ്പിക്കാം എന്ന ദുഷ്ടബുദ്ധി ബിജെപി പയറ്റിക്കൂടായ്കയില്ല.  ഉപവിഭാഗങ്ങൾക്കുള്ള സംവരണം (ടാർഗറ്റഡ്‌ റിസർവേഷൻ), ഏറ്റവും പ്രാന്തവൽക്കരിക്കപ്പെട്ടവർക്കായുള്ള സംവരണം (മോസ്‌റ്റ്‌ മാർജിനലൈസ്‌ഡ്‌) എന്നൊക്കെയുള്ള ഓമനപ്പേരുകൾ നൽകി തമ്മിലടിപ്പിക്കുന്നതിലൂടെ അവരുടെ ന്യായമായ പ്രതിഷേധങ്ങളെയും ദുർബലമാക്കാം എന്നാണ് ബിജെപി കണക്കുകൂട്ടുന്നത്. വോട്ടുബാങ്കുകൾക്കനുസരിച്ച് പിന്നോക്ക സമുദായത്തെ പുനർനിർണയിക്കുകയും ചില സമുദായങ്ങളെ തങ്ങളുടെ വരുതിയിൽ നിർത്തുകയും ചെയ്തുകൊണ്ട് വലിയ സാമൂഹ്യഅസമത്വം സൃഷ്ടിച്ചിരിക്കുന്നു.  കേരളംപോലുള്ള സംസ്ഥാനങ്ങളിൽ ജനസംഖ്യയും സാമൂഹ്യപദവിയുമുൾപ്പെടെയുള്ള ശാസ്ത്രീയ മാനദണ്ഡങ്ങൾ പുനർനിർണയങ്ങളിൽ സ്വീകരിക്കുമ്പോൾ വോട്ട്ബാങ്ക് മാത്രമാണ് കേന്ദ്രം ലക്ഷ്യമിടുന്നത്. 

പിന്നോക്ക ക്ഷേമത്തിനായുള്ള പാർലമെന്ററി സമിതിയുടെ പുനഃസംഘടന അനിശ്ചിതമായി നീട്ടിവയ്‌ക്കുന്നതിലൂടെ പിന്നോക്ക ജനവിഭാഗങ്ങൾക്കുള്ള അവകാശങ്ങൾപോലും ഇല്ലാതാക്കുകയാണ്. കേന്ദ്ര നടപടികളെ നിരീക്ഷിക്കാനും വിലയിരുത്താനുമുള്ള ഭരണഘടനാദത്തമായ അവകാശമുള്ള കമ്മിറ്റിയാണത്.  അതുകൊണ്ടുതന്നെ അത്തരത്തിലുള്ള ഒരു കമ്മിറ്റി പുനഃസംഘടിപ്പിക്കാതിരിക്കുന്നത് സംവരണവിരുദ്ധ നിലപാടുകൾ കൈക്കൊള്ളുന്ന സംഘപരിവാർ അജൻഡകളുടെ ഭാഗമാണെന്നതിൽ സംശയമില്ല. 

പാർലമെന്ററി കമ്മിറ്റികൾ ആദ്യയോഗം ചേർന്ന് ഒരു വർഷം പൂർത്തിയാകുന്ന മുറയ്ക്ക് അവ പുനഃസംഘടിപ്പിക്കണമെന്നാണ് ചട്ടം. 2020 സെപ്തംബറിൽ ഇതനുസരിച്ച് എട്ടോളം പാർലമെന്ററി കമ്മിറ്റികൾ പുനഃസംഘടിപ്പിച്ചിരുന്നു. എന്നാൽ, ഒബിസി കമ്മിറ്റിമാത്രം പുനഃസംഘടിപ്പിക്കാത്തതിന്റെ കാരണം ഇപ്പോഴും ദുരൂഹമാണ്.  ഒബിസി കമ്മിറ്റിയുടെ അവസാനയോഗത്തിൽ ഒബിസി സംവരണത്തിൽ വെള്ളംചേർക്കാനുള്ള കേന്ദ്രഗവൺമെന്റ് നീക്കത്തിനെതിരെ ശക്തമായ എതിർപ്പുകൾ ഉയർന്നുവന്നിരുന്നു എന്ന വസ്തുതകൂടി ഇതോടൊപ്പം ചേർത്തുവായിക്കണം.

2019 ഫെബ്രുവരിയിൽ ഒബിസി കമ്മിറ്റി സമർപ്പിച്ച റിപ്പോർട്ടിൽ, വരുമാന മാനദണ്ഡവുമായി ബന്ധപ്പെട്ട് 1997 മുതൽക്കുള്ള നാല്‌ ഭേദഗതിക്കുശേഷവും ഒബിസി വിഭാഗങ്ങൾക്കായുള്ള സംവരണ സീറ്റുകളിൽ 27ശതമാനവും നിയമനം നടത്താതെ ഒഴിഞ്ഞുകിടക്കുകയാണെന്ന്‌ ചൂണ്ടിക്കാണിച്ചിരുന്നു.  ഈ റിപ്പോർട്ടിൽ പറയുന്ന വസ്തുതകൾ അനുസരിച്ച് കേന്ദ്ര ഗവൺമന്റിലെ ഉയർന്ന തസ്തികയായ "എ' വിഭാഗം ജീവനക്കാരിൽ 13 ശതമാനം മാത്രമാണ് ഒബിസി വിഭാഗത്തിൽനിന്നുള്ളവർ. മൊത്തം 32.58 ലക്ഷം ഗവ. ജീവനക്കാരിൽ ഏഴ്‌ ലക്ഷം പേർ മാത്രമാണ് ഒബിസി വിഭാഗത്തിൽനിന്നുള്ളത്. (21 ശതമാനം). എന്നാൽ, 27 ശതമാനമാണ് യഥാർഥത്തിൽ അവർക്കായി സംവരണം ചെയ്യപ്പെട്ടിട്ടുള്ളത്.  ഈ ഏഴ് ലക്ഷത്തിൽ 6.4 ലക്ഷവും (22.65 ശതമാനം) "സി' കാറ്റഗറി ജീവനക്കാരാണ് എന്നതും ശ്രദ്ധേയമാണ്.  ശുചീകരണ തൊഴിലാളികളായിട്ടും മറ്റും ജോലിനോക്കുന്നവരല്ലാതെ വാഗ്ദാനം ചെയ്യപ്പെട്ട 27 ശതമാനം സംവരണനിയമനങ്ങളിലേക്ക് ഒബിസി വിഭാഗത്തിൽ നിന്നുള്ളവർ  എത്തിയിട്ടില്ല.

ഈ സാഹചര്യത്തിലാണ് ഒബിസി കമ്മിറ്റി 2020 ജൂലൈയിൽ സമർപ്പിച്ച ഒരു റിപ്പോർട്ടിൽ ഒരു വ്യക്തിയുടെ അടിസ്ഥാനശമ്പളം കുടുംബത്തിന്റെ വാർഷികവരുമാനം കണക്കാക്കുന്നതിൽ ഉൾപ്പെടുത്തരുതെന്ന് ശുപാർശ നൽകിയത്.  കുടുംബാംഗങ്ങളുടെ സംവരണയോഗ്യത നിർണയിക്കുന്നത് ഈ അടിസ്ഥാന ശമ്പളവുംകൂടി കണക്കാക്കിക്കൊണ്ടുള്ള വാർഷികവരുമാന സർട്ടിഫിക്കറ്റ് ആയതുകൊണ്ടാണ്  ഇത്തരത്തിലുള്ള ഒരു ശുപാർശ നൽകേണ്ടിവന്നത്.

പിന്നോക്കവിഭാഗക്കാരുടെ ജോലി/വിദ്യാഭ്യാസ സാധ്യതകൾക്ക് വീണ്ടും മങ്ങലേൽപ്പിക്കുന്ന ഒന്നാണിതെന്ന കാര്യം ഒറ്റനോട്ടത്തിൽത്തന്നെ മനസ്സിലാകും.   ക്രീമിലെയറിന്റെ ഉയർന്ന വരുമാനപരിധി നിലവിലുള്ള എട്ട്‌ ലക്ഷത്തിൽനിന്ന്‌ 15 ലക്ഷമായി ഉയർത്താനും ശുപാർശ ചെയ്യുകയുണ്ടായി.  നിലവിൽ എട്ട്‌ ലക്ഷത്തിൽ ചുവടെ വാർഷിക വരുമാനമുള്ള ഉദ്യോഗാർഥികളും വിദ്യാർഥികളുമാണ് 27 ശതമാനം വരുന്ന ഒബിസി സംവരണത്തിന് അർഹരാകുക. സർക്കാരിന്റെ ക്രീമിലെയർ നിർണയിക്കാനുള്ള കടുംപിടിത്തവും അടിസ്ഥാനശമ്പളം ഉൾപ്പെടെ വരുമാനം കണക്കാക്കുന്ന രീതിയും നടപ്പാകുമ്പോൾ ഒബിസി വിഭാഗങ്ങളുടെ 27ശതമാനം സംവരണം ജലരേഖയാകും.

1979ൽ ജനതാഗവൺമെന്റ് സാമൂഹ്യപരമായും വിദ്യാഭ്യാസപരമായും പിന്നോക്കം നിൽക്കുന്ന ജനങ്ങളുടെ പ്രശ്‌നങ്ങൾ പഠിക്കാൻ ബിപി മണ്ഡലിന്റെ നേതൃത്വത്തിൽ ഒരു കമീഷനെ നിയമിച്ചതും ഈ കമീഷൻ 27 ശതമാനം സീറ്റുകൾ അവർക്കായി സംവരണം ചെയ്യാൻ നിർദേശിച്ചതും നമുക്കറിയാം.  ജനസംഖ്യയുടെ 52 ശതമാനം വരുന്ന ഒബിസി വിഭാഗങ്ങളുടെ പിന്നോക്കാവസ്ഥ പരിഗണിച്ചുകൊണ്ടായിരുന്നു മണ്ഡൽ കമീഷൻ അത്തരമൊരു റിപ്പോർട്ട് തയ്യാറാക്കിയത്.  1993ലെ ഗവൺമെന്റ് രേഖകൾ പ്രകാരം ക്രീമിലെയർ എന്ന വിഭജനത്തിന്റെ സത്ത ഉയർന്ന ഭരണഘടനാ പദവികൾ വഹിച്ചിരുന്നവർ (ഉദാ: ഇന്ത്യൻ പ്രസിഡന്റ്), ഗവൺമെന്റിലെയും സൈന്യത്തിലെയും ഉന്നത ഉദ്യോഗസ്ഥർ, ഉന്നതരായ പ്രൊഫഷണലുകൾ, ഉയർന്ന വരുമാനമുള്ളവർ, വലിയ ഭൂസ്വത്ത് ഉള്ളവർ എന്നിവരുടെ മക്കൾക്ക് സംവരണം നൽകേണ്ടതില്ല എന്ന കാഴ്ചപ്പാടായിരുന്നു.  ഈ കാഴ്ചപ്പാടിനെ സംവരണം അട്ടിമറിക്കാനുള്ള ഉപാധിയാക്കി മാറ്റുന്നത് പരിഹാസ്യമാണ്.

ഭരണകക്ഷിയായ ബിജെപിയുടെ എംപി തന്നെ അധ്യക്ഷനായ ഒബിസി കമ്മിറ്റി നൽകിയ യുക്തിസഹമായ റിപ്പോർട്ടിനോട് സാമൂഹ്യനീതി മന്ത്രാലയം സ്വീകരിച്ച സമീപനം അമ്പരപ്പിക്കുന്നതായിരുന്നു.  നിർദേശങ്ങൾ പരിഹരിക്കുന്നതിനായി ഒരു റിട്ടയേർഡ് ബ്യൂറോക്രാറ്റിനെ അധ്യക്ഷനാക്കിക്കൊണ്ടുള്ള ഒരു "വിദഗ്ധസമിതി'യെ നിയമിക്കുകയാണ് മന്ത്രാലയം ചെയ്തത്.  ഒബിസി സംവരണത്തെക്കുറിച്ച് പഠിക്കാനുള്ള ഈ വിദഗ്ധസമിതിയിലാകട്ടെ, ഒറ്റ ഒബിസി അംഗംപോലും ഇടംനേടിയില്ലെന്നതും വിചിത്രം!  സ്വകാര്യനിക്ഷേപകർക്കായി നമ്മുടെ പൊതുമേഖലാ സ്ഥാപനങ്ങൾപോലും തീറെഴുതിക്കൊടുക്കുന്ന, സ്വകാര്യവൽക്കരണ നയങ്ങൾ മുഖ്യ അജൻഡയാക്കി മുന്നോട്ടുപോകുന്ന ഗവൺമെന്റിന്റെ കാലത്ത് അതുകൊണ്ടുതന്നെ വാഗ്ദത്തം ചെയ്യപ്പെട്ടിട്ടുള്ള സംവരണം നടപ്പാകുമെന്ന കാര്യത്തിൽ ഒരുറപ്പുമില്ല.  കേന്ദ്രീയ വിദ്യാലയങ്ങൾ, നവോദയ വിദ്യാലയങ്ങൾ എന്നിവിടങ്ങളിൽ ഒബിസി സംവരണം ഇല്ലാത്തതിന്റെ പേരിലും പാർലമെന്ററി കമ്മിറ്റി വിമർശനങ്ങൾ ഉന്നയിച്ചിരുന്നു.  കേന്ദ്ര വിദ്യാഭ്യാസ സ്ഥാപനങ്ങളിലെ സംവരണവും പ്രവേശനവും സംബന്ധിച്ച ആക്ട് 2006ൽ പാസാക്കിയിട്ടും ഇവിടങ്ങളിൽ പ്രവേശനമാനദണ്ഡങ്ങൾ ഭേദഗതി ചെയ്യപ്പെട്ടിട്ടില്ല. 

ഈ സാഹചര്യത്തിലാണ് ഭരണഘടനയുടെ ആർട്ടിക്കിൾ 30 ക്ലോസ് 1 പ്രകാരം ന്യൂനപക്ഷപദവിയുള്ള സ്ഥാപനങ്ങളിലൊഴികെ സംസ്ഥാന ഗവൺമെന്റിനുകീഴിൽ പ്രവർത്തിക്കുന്നതോ സിബിഎസ്ഇയിൽ അഫിലിയേറ്റ് ചെയ്യപ്പെട്ടിട്ടുള്ളതോ ആയ എല്ലാ എയ്ഡഡ്, അൺ എയ്ഡഡ്, സ്വകാര്യസ്ഥാപനങ്ങളിലും ഒബിസി സംവരണം നടപ്പാക്കാൻ കമ്മിറ്റി ശുപാർശ ചെയ്തത്.

കാലാവധി ദീർഘിപ്പിച്ചും നീട്ടിവച്ചും സ്വാഭാവിക മരണത്തിന്‌ വിട്ടുകൊടുക്കുക എന്ന തന്ത്രമാണ് സാമൂഹ്യനീതിയുടെ കാര്യത്തിൽ കേന്ദ്രം സ്വീകരിക്കുന്നത്. ഒബിസി വിഭാഗത്തിലെ സബ് കാറ്റഗറി വിഭാഗങ്ങളെ കണ്ടെത്തുക എന്ന വിഷയത്തിൽ പഠനം നടത്താൻ 2017 ഒക്ടോബറിൽ നിയമിതമായതാണ് ജസ്റ്റിസ് ജി രോഹിണി കമ്മിറ്റി. 2018 ജനുവരിയോടെ പന്ത്രണ്ട് ആഴ്ചയ്‌ക്കകം റിപ്പോർട്ട് നൽകാൻ നിർദേശിച്ചുകൊണ്ട് രൂപീകരിച്ച ഈ കമ്മിറ്റിയുടെ ഒമ്പതാമത്തെ കാലാവധി ദീർഘിപ്പിക്കലാണ്  നടത്തിയിരിക്കുന്നത്.  2021 ജനുവരിവരെ ഇപ്പോൾ നീട്ടിയിട്ടുണ്ട്‌.

പിന്നോക്ക വിഭാഗങ്ങൾക്ക് കേന്ദ്രസർവീസിലും കേന്ദ്ര പൊതുമേഖലാ സ്ഥാപനങ്ങളിലും മറ്റും പ്രാതിനിധ്യംഉറപ്പ് വരുത്താൻ സാധിക്കാത്തതിന് കോൺഗ്രസും ബിജെപിയുമെല്ലാം ഉത്തരവാദികളാണ്. യോഗ്യതയുള്ള ഉദ്യോഗാർഥികളെ ലഭിക്കാത്തതാണ് കാരണമെന്ന ബ്യൂറോക്രസിയുടെ വിശദീകരണത്തിന്റെമേൽ അടയിരിക്കുകയാണ് ബിജെപി സർക്കാർ. നോൺക്രീമിലെയർ വിഭാഗത്തിൽനിന്ന് ഉദ്യോഗാർഥികളെ ലഭ്യമായില്ലെങ്കിൽ ആ വിഭാഗത്തിലെ ക്രീമിലെയർ വിഭാഗങ്ങളെയും പരിഗണിക്കുകയാണ് വേണ്ടത്. വളർന്നുവരുന്ന സാമൂഹ്യ അസമത്വം പരിഹരിക്കാൻ അതുമാത്രമാണ് പോംവഴി. നിലവിലുള്ള പ്രാതിനിധ്യംകൂടി ഇല്ലാതാകുന്ന പരിഷ്‌കാരങ്ങളാണ് ഗവൺമെന്റ് നടപ്പാക്കുന്നത്.

ഈ പശ്ചാത്തലത്തിലാണ് കേരളത്തിലെ ഇടതുപക്ഷസർക്കാർ ഇന്ത്യക്കാകെ മാതൃകയാകുന്നത്. ഏറ്റവുമൊടുവിൽ മുന്നോക്കവിഭാഗങ്ങളിലെ സാമ്പത്തികമായി പിന്നോക്കം നിൽക്കുന്നവർക്കുകൂടി പത്ത്ശതമാനം സംവരണം ഏർപ്പെടുത്തിയ ഭരണഘടനാഭേദഗതി നടപ്പാക്കാനുള്ള ആർജവം കാണിച്ചിരിക്കുകയാണ് സർക്കാർ. പിന്നോക്കവിഭാഗങ്ങൾക്ക് സംവരണം ഉറപ്പുവരുത്തുന്നതിൽ അതീവജാഗ്രത പുലർത്തിക്കൊണ്ടുതന്നെ പുതിയ ഭരണഘടനാഭേദഗതി നടപ്പാക്കിയിരിക്കുന്നു. അതോടെ നിലവിലുള്ള സംവരണം 60 ശതമാനമായി മാറി. രാജ്യത്ത് മുതലാളിത്ത നയം നടപ്പാക്കുന്നതിന്റെ ഭാഗമായി മുന്നോക്ക സമുദായങ്ങൾക്കിടയിൽ സാമ്പത്തികമായി പിന്നോക്കം നിൽക്കുന്ന വലിയൊരു വിഭാഗം സൃഷ്ടിക്കപ്പെട്ടിരിക്കുന്നു. അവർക്ക് പത്ത് ശതമാനം സംവരണം ഏർപ്പെടുത്താൻ ഭരണഘടനാഭേദഗതി വേണമെന്ന നിർദേശം സിപിഐ എം മുന്നോട്ടുവച്ചിരുന്നു. കഴിഞ്ഞ നിയമസഭാ തെരഞ്ഞെടുപ്പിൽ എൽഡിഎഫ്‌ പ്രകടനപത്രികയിൽ മുന്നോക്കക്കാരിലെ പിന്നോക്കക്കാർക്ക് സംവരണമെന്ന നിലപാട് പ്രഖ്യാപിക്കുകയും ചെയ്തു. അത് നടപ്പാക്കിയിരിക്കുന്നു. എന്നാൽ, തെറ്റിദ്ധാരണ പരത്തിയും വർഗീയവിഷം കുത്തിവച്ചും ജനക്ഷേമകരമായ തീരുമാനങ്ങൾക്കെതിരെ കലാപത്തിനൊരുങ്ങുകയാണ് ചിലർ. 

കേന്ദ്രത്തിന്റെ സ്വകാര്യവൽക്കരണനയങ്ങളും കരാർ തൊഴിൽ സമ്പ്രദായവുമാണ് സംവരണതത്വങ്ങളെ അട്ടിമറിച്ചതെന്ന് പകൽപോലെ വ്യക്തമാണെങ്കിലും ആ നയങ്ങൾക്കെതിരെ ചെറുവിരൽപോലും അനക്കാൻ തുനിയുന്നുമില്ല. പൊതുമേഖലയുടെ സ്വകാര്യവൽക്കരണത്തിലൂടെ നഷ്ടപ്പെടുത്തിയത് ലക്ഷക്കണക്കിന് സംവരണ തസ്തികകളാണെന്നത് മനഃപൂർവം മറന്ന് കേരളം ലാഭത്തിലാക്കിയ പൊതുമേഖലാസ്ഥാപനങ്ങളിലെ സംവരണക്കണക്കുകൾ കൂട്ടിക്കിഴിച്ചുകൊണ്ടിരിക്കുകയാണവർ. ഒബിസി സംവരണത്തിൽ വെള്ളംചേർത്തുകൊണ്ട് ഉപവിഭാഗങ്ങളെ തമ്മിലടിപ്പിച്ച് അതിൽ ഒരു വിഭാഗത്തിന്റെ സംരക്ഷകരായി സ്വയം അവരോധിച്ച് വിശാലമായ ഒബിസി ഐക്യത്തെ തുരങ്കംവയ്‌ക്കുകയാണ് സംഘപരിവാറിന്റെ രാഷ്ട്രീയലക്ഷ്യം. കാർഷികബില്ലുകളുടെ പശ്ചാത്തലത്തിൽ ഉത്തരേന്ത്യൻ കർഷകജനവിഭാഗങ്ങൾക്കിടയിൽ ഉടലെടുത്തിരിക്കുന്ന വർഗഐക്യത്തെ അട്ടിമറിക്കുന്നതിലൂടെ സാമ്പത്തിക –- രാഷ്ട്രീയ അജൻഡകളും നടപ്പാക്കാനാണ് ബിജെപിയുടെ നീക്കം. പിന്നോക്ക സമുദായങ്ങളുടെ ക്ഷേമത്തിനായുള്ള പാർലമെന്ററി കമ്മിറ്റി പുനഃസംഘടിപ്പിക്കാത്തതിനു പിന്നിലും ഇത്തരം താൽപ്പര്യങ്ങളല്ലാതെ മറ്റൊന്നുമല്ല.

കെ കെ രാഗേഷ്‌ 

Monday, November 2, 2020

സംവരണം: നിലപാട് വ്യക്തമാണ്

 സംവരണത്തിന് അർഹതയില്ലാത്ത പൊതുവിഭാഗത്തിലെ സാമ്പത്തികമായി പിന്നോക്കം നിൽക്കുന്നവർക്ക് സർക്കാർ നിയമനങ്ങളിൽ പത്ത് ശതമാനം സംവരണം നടപ്പാക്കാൻ എൽഡിഎഫ്‌ സർക്കാർ നടപടികൾ കൈക്കൊണ്ടിരിക്കുന്നു. പാവപ്പെട്ടവർക്ക് സാമൂഹ്യപരിരക്ഷ നൽകുന്ന കാഴ്ചപ്പാടിന്റെ ഭാഗമായാണ് സർക്കാർ കേരള സ്റ്റേറ്റ് ആൻഡ് സബോർഡിനേറ്റ് സർവീസസ് റൂൾസിലെ സംവരണ ചട്ടങ്ങളിൽ ഭേദഗതി വരുത്താൻ തീരുമാനിച്ചത്. മുന്നോക്ക വിഭാഗത്തിലെ പിന്നോക്കം നിൽക്കുന്നവർക്ക് സംവരണമെന്ന നിലപാടുമായി മുന്നോട്ടുപോകുമ്പോൾ ചില നിക്ഷിപ്ത താൽപ്പര്യക്കാർ അനാവശ്യ വിവാദങ്ങൾ ഉയർത്തിക്കൊണ്ടുവരുന്നുണ്ട്. സംവരണമാകെ അട്ടിമറിച്ചു എന്നാണ് അവർ പറയുന്നത്. എന്നാൽ, നിലവിലുള്ള സംവരണത്തിന് ഒരു പോറൽപോലും ഏൽപ്പിക്കാതെയാണ് പുതിയ ഭേദഗതി നടപ്പാക്കുന്നത്. ഇതുസംബന്ധിച്ച് എൽഡിഎഫിന് സുവ്യക്തമായ കാഴ്ചപ്പാടുണ്ട്.

കഴിഞ്ഞ നിയമസഭാ തെരഞ്ഞെടുപ്പിൽ ഇടതുപക്ഷത്തിന്റെ പ്രകടനപത്രികയിൽ അർഥശങ്കയ്ക്കിടയില്ലാത്ത വിധത്തിൽ 579–--ാമത് വാഗ്ദാനമായി ഇങ്ങനെ പറയുന്നു: ‘സാമൂഹ്യമായി പിന്നോക്കം നിൽക്കുന്ന ജനവിഭാഗങ്ങളെ കൈപിടിച്ചുയർത്തുന്നതിനുള്ള സംവരണത്തെ അട്ടിമറിക്കുന്നതിനുള്ള പരിശ്രമമാണ് ആർഎസ്എസ് നടത്തുന്നത്. പട്ടികജാതി പട്ടികവർഗ വിഭാഗക്കാർക്കും വിദ്യാഭ്യാസപരമായും സാമൂഹ്യമായും പിന്നോക്കം നിൽക്കുന്ന ജനവിഭാഗങ്ങൾക്കും സർക്കാർ ഉദ്യോഗങ്ങളിൽ ഇന്നുള്ള സംവരണം തുടരുമെന്ന നയത്തിൽ എൽഡിഎഫ് ഉറച്ചുനിൽക്കുന്നു. ഓരോ സമുദായത്തിനും അർഹതപ്പെട്ട സംവരണാനുകൂല്യം മുഴുവൻ അവർക്കുതന്നെ കിട്ടുമെന്ന് ഉറപ്പുവരുത്തേണ്ടതാണ്. അതോടൊപ്പം മുന്നോക്കസമുദായങ്ങളിലെ പാവപ്പെട്ടവർക്ക് 10 ശതമാനം സംവരണം ഏർപ്പെടുത്തുകയും വേണം. ഈ രണ്ടു കാര്യവും നടപ്പിൽ വരുത്താൻ ഉചിതമായ ഭരണഘടനാ ഭേദഗതി ആവശ്യമാണ്. ഇത്തരമൊരു ഭരണഘടനാഭേദഗതി നടപ്പിൽവരുത്താൻ എൽഡിഎഫ് പരിശ്രമിക്കുന്നതായിരിക്കും.' ഇതിന്റെ ഭാഗമായി ഭരണഘടനാ ഭേദഗതിക്കായി സർക്കാർ ഇടപെടൽ നടത്തുകയുണ്ടായി.

സിപിഐ എമ്മിനെ സംബന്ധിച്ച് സംവരണവിഷയത്തിൽ കൃത്യമായ നിലപാടുണ്ട്. 1990 നവംബറിൽ കേന്ദ്ര കമ്മിറ്റി അംഗീകരിച്ച പ്രമേയത്തിൽ അത് വ്യക്തമാക്കുന്നുണ്ട്. വി പി സിങ്‌ മന്ത്രിസഭയുടെ കാലത്ത് മണ്ഡൽ കമീഷൻ റിപ്പോർട്ട് നടപ്പാക്കുമ്പോൾ കേന്ദ്രസർവീസിൽ 27 ശതമാനം സംവരണം സിപിഐ എം ആവശ്യപ്പെട്ടു. അതോടൊപ്പം സാമ്പത്തികമായി പിന്നോക്കം നിൽക്കുന്ന മുന്നോക്കക്കാർക്കും നിശ്ചിതശതമാനം സംവരണം ആവശ്യപ്പട്ടു. 1991ൽ ലോക്‌സഭാ തെരഞ്ഞെടുപ്പ് പ്രകടനപത്രികയിലും ഇക്കാര്യം വ്യക്തമാക്കി. നരേന്ദ്രൻ കമീഷൻ റിപ്പോർട്ട് പുറത്തുവന്നപ്പോഴും സിപിഐ എം ഇക്കാര്യം പറഞ്ഞു. ഇതിന്റെ തുടർച്ചയായാണ് എൽഡിഎഫ് പ്രകടനപത്രികയിൽ  ഉൾപ്പെടുത്തിയിട്ടുള്ളത്.

മുന്നോക്കസമുദായങ്ങളിൽ സാമ്പത്തികമായി പിന്നോക്കം നിൽക്കുന്നവർക്ക് പത്ത്‌ ശതമാനം സംവരണം നൽകാനുള്ള ബിൽ പാർലമെന്റ് പാസാക്കിയത് ലോക്‌സഭയിലെ 326 അംഗങ്ങളിൽ 323 പേരുടെ പിന്തുണയോടെയാണ്. കോൺഗ്രസടക്കം  പിന്തുണച്ചു. ഇപ്പോൾ കേരളത്തിൽ മുസ്ലിംലീഗിനെ മുന്നിൽ നിർത്തി സംവരണവിരുദ്ധ പ്രക്ഷോഭം നടത്തുകയാണ് യുഡിഎഫ്. 2014ലെ പാർലമെന്റ് തെരഞ്ഞെടുപ്പിൽ കോൺഗ്രസ് ഇറക്കിയ പ്രകടനപത്രികയിൽ എല്ലാ സമുദായങ്ങളിലെയും സാമ്പത്തികമായി പിന്നോക്കം നിൽക്കുന്നവർക്ക് സംവരണം വാഗ്ദാനം ചെയ്തിരുന്നു. അന്ന് മുസ്ലിംലീഗ് ഒരഭിപ്രായവും പറഞ്ഞിരുന്നില്ല. മുന്നോക്ക വിഭാഗങ്ങളിലെ സാമ്പത്തികമായി ദുർബലമായ വിഭാഗങ്ങൾക്ക് സംവരണം ഏർപ്പെടുത്തണമെന്ന ആവശ്യം സിപിഐ എം നേരത്തേതന്നെ മുന്നോട്ടുവച്ചതാണ്. 1977ൽ മൊറാർജി ദേശായി സർക്കാർ ഇടതുപക്ഷത്തിന്റെ പിന്തുണയോടുകൂടി വന്ന കാലത്താണ് മണ്ഡൽ കമീഷൻ റിപ്പോർട്ട് പ്രസിദ്ധീകരിച്ചത്. അത് നടപ്പാക്കിയത് 1990ൽ വി പി സിങ്ങിന്റെ കാലത്താണ്. ആ ഘട്ടത്തിൽ ശക്തമായ എതിർപ്പ് മുന്നോക്ക സമുദായത്തിൽനിന്ന്‌ ഉയർന്നുവന്നിരുന്നു. അന്ന് സിപിഐ എം നിലപാട് അർഥശങ്കയ്ക്കിടയില്ലാതെ വ്യക്തമാക്കി. മുന്നോക്ക സമുദായത്തിൽ ഒരു വിഭാഗം വളരെ പാവപ്പെട്ടവരാണ്. സാമ്പത്തികമായി വളരെ പിന്നോക്കം നിൽക്കുന്നവരും സാമുദായികമായി മുന്നോക്കം നിൽക്കുന്നവരുമാണ് അവർ. ഒരു സംവരണാനുകൂല്യവും ലഭിക്കില്ല. ഇവർക്ക് പത്ത് ശതമാനത്തിൽ കുറയാത്ത സംവരണം കൊണ്ടുവരണമെന്നത് സിപിഐ എം നയപരിപാടിയുടെ ഭാഗമാക്കി. പാർടി പരസ്യമായി അത് ആവശ്യപ്പെട്ടു. 1991ലെ പൊതുതെരഞ്ഞെടുപ്പിൽ  പ്രകടനപത്രികയിലൂടെ ഈ ആവശ്യം മുന്നോട്ടുവച്ചു. മണ്ഡൽകമീഷൻ റിപ്പോർട്ട് നടപ്പാക്കുന്നതിന് സിപിഐ എം പൂർണപിന്തുണ നൽകി.  പിന്നോക്ക വിഭാഗങ്ങളിലും മുന്നോക്ക വിഭാഗങ്ങളിലുമുള്ള പാവപ്പെട്ട ജനവിഭാഗങ്ങളുടെ താൽപ്പര്യം  ഉയർത്തിപ്പിടിക്കണം എന്ന പ്രായോഗികമായ നിർദേശം സിപിഐ എം ഉയർത്തി. 1991ലാണ് ഒബിസി വിഭാഗങ്ങൾക്ക് 27 ശതമാനം സംവരണം ഏർപ്പെടുത്തിയിട്ടുള്ള ഉത്തരവ് നരസിംഹറാവു സർക്കാർ പുറപ്പെടുവിച്ചത്. സാമ്പത്തിക മാനദണ്ഡം അതിൽ മുന്നോട്ടുവയ്‌ക്കുകയുണ്ടായി. ജനറൽ കാറ്റഗറിയിൽ പത്തുശതമാനം സാമ്പത്തികമായി പിന്നോക്കം നിൽക്കുന്ന വിഭാഗങ്ങൾക്കായി പ്രത്യേകം മാറ്റിവച്ചിരുന്നു. സുപ്രീംകോടതിയാകട്ടെ ഒബിസിക്കുള്ള 27 ശതമാനം സംവരണംമാത്രം അംഗീകരിക്കുകയും ജനറൽ കാറ്റഗറിയിലുള്ള സംവരണം റദ്ദാക്കുകയും ചെയ്തു. ഇപ്പോൾ 124–-ാം ഭരണഘടനാ ഭേദഗതിയിലൂടെ സാമ്പത്തികമായി പിന്നോക്കം നിൽക്കുന്നവർക്ക് സംവരണം നടപ്പാക്കിയിരിക്കുന്നു.  നരസിംഹറാവുസർക്കാർ സംവരണം നടപ്പാക്കാനുള്ള നടപടി കൈക്കൊണ്ട വേളയിലും തുടർന്നും കോൺഗ്രസിന്റെ ഘടകകക്ഷിയായി നിൽക്കുന്ന മുസ്ലിംലീഗ് എതിർപ്പ് പ്രകടിപ്പിക്കുകയോ മുന്നണി വിടുകയോ ചെയ്തിട്ടില്ല. ഇപ്പോൾ മത തീവ്രവാദസംഘടനകളുടെ കൂട്ടായ്മയുണ്ടാക്കി അതിന്റെ നേതൃത്വം ഏറ്റെടുത്ത് ഭിന്നിപ്പിന്റെ രാഷ്ട്രീയം പ്രയോഗിക്കുന്നത് തീർത്തും രാഷ്ട്രീയപ്രേരിതമായാണ്.

കേരളത്തിൽ സാമ്പത്തിക സംവരണം നടപ്പാക്കുന്നു എന്നാണ് ചിലർ നുണപ്രചാരണം നടത്തുന്നത്. പട്ടികജാതി, -പട്ടികവർഗ വിഭാഗങ്ങൾക്കും മറ്റ് പിന്നോക്ക വിഭാഗങ്ങൾക്കും ഇവിടെ നിലവിലുള്ള അമ്പത് ശതമാനം സംവരണം അതേപടി തുടരുകയാണ്.  ബാക്കിവരുന്ന അമ്പത് ശതമാനം പൊതുവിഭാഗത്തിലെ പാവപ്പെട്ട പത്ത് ശതമാനത്തിന് പ്രത്യേക പരിഗണന നൽകുകയാണ് ചെയ്യുന്നത്. ഒരു കൈത്താങ്ങാണത്. ഇതെങ്ങനെയാണ് സംവരണവിരുദ്ധ നിലപാടായി മാറുക? സംവരണം സംബന്ധിച്ച സിപിഐ എം നിലപാട് പ്രഖ്യാപിതമാണ്. പട്ടികജാതി- പട്ടികവർഗ വിഭാഗങ്ങളുടെ സംവരണം അതേപോലെ തുടരണം. ആ വിഭാഗങ്ങളൊഴിച്ചുള്ള പിന്നോക്കവിഭാഗങ്ങളുടെ സംവരണത്തിൽ ആദ്യ പരിഗണന അതത് വിഭാഗത്തിലെ പാവങ്ങൾക്ക് നൽകണം. ബാക്കിവരുന്നത് അതത്  വിഭാഗങ്ങളിലെ മറ്റുള്ളവർക്ക് മാറ്റി‌വയ്‌ക്കണം. അതിനായി ഭരണഘടനാ ഭേദഗതി കൊണ്ടുവരണം. ഇതിനോടൊപ്പം ചേർത്തുപിടിക്കേണ്ട വിഭാഗമാണ് മുന്നോക്ക വിഭാഗത്തിലെ പാവപ്പെട്ടവർ. അവർക്ക്  സംവരണം ഏർപ്പെടുത്താനും ഭരണഘടനാ ഭേദഗതി വേണമെന്നും  സിപിഐ എം പറഞ്ഞു. ഈ നിലപാടിനെയാണ് സാമ്പത്തിക സംവരണമാണ് ലക്ഷ്യമിടുന്നത് എന്നൊക്കെ ദുർവ്യാഖ്യാനിക്കുന്നത്.

സംവരണത്തിന്റെ ചരിത്രം ബ്രിട്ടീഷ് ഭരണകാലത്തുതന്നെ തുടങ്ങുന്നതാണ്. 1902ൽ കോൽഹാപൂരിലെ രാജാവായ സാഹു അബ്രാഹ്മണരായ പിന്നോക്കക്കാർക്ക് 50 ശതമാനം സംവരണം ഏർപ്പെടുത്തി. 1909 ലെ ബ്രിട്ടീഷ് ഇന്ത്യാ ആക്ടിലും 1932 ലെ വട്ടമേശസമ്മേളനത്തിലും സംവരണത്തിനായുള്ള നീക്കങ്ങൾ ഉണ്ടായിരുന്നു. 1930ൽ തിരുവിതാംകൂറിലും അത്തരം ശ്രമങ്ങൾ നടന്നതായി പറയുന്നുണ്ട്. 1954ലാണ് സ്വാതന്ത്ര്യാനന്തര ഇന്ത്യയിൽ വിദ്യാഭ്യാസരംഗത്ത് പട്ടികജാതി, -പട്ടികവർഗ വിഭാഗങ്ങളിലുള്ളവർക്ക് 20ശതമാനം സംവരണം ഏർപ്പെടുത്തിയത്. 1982ൽ സർക്കാർ ജോലികളിൽ പട്ടികജാതി വിഭാഗത്തിന് 15 ശതമാനവും പട്ടികവർഗ വിഭാഗത്തിന് അഞ്ച്‌ ശതമാനവും സംവരണം ഏർപ്പെടുത്തി. പിന്നീട് പലപ്പോഴായി വിവിധസംസ്ഥാനങ്ങൾ സംവരണം ഏർപ്പെടുത്താൻ വിവിധ കമീഷനുകളെ നിയോഗിച്ചു. 1970ൽ ആന്ധ്രയിലും 71ൽ തമിഴ്‌നാട്ടിലും പിന്നോക്ക വിഭാഗ കമീഷൻ രൂപീകരിച്ചു. 1975ലാണ് കർണാടകത്തിൽ ഹവാനൂർ കമീഷൻ രൂപീകരിച്ചത്. കേരളത്തിൽ 1958ലെ ഇ എം എസ് ചെയർമാനായ ഭരണപരിഷ്‌കാര കമീഷൻ സംവരണത്തെ സംബന്ധിച്ച് കാതലായ ചില നിർദേശങ്ങൾ മുന്നോട്ടുവച്ചു. 1971ൽ നെട്ടൂർ ദാമോദരൻ അധ്യക്ഷനായ പിന്നോക്കവിഭാഗ കമീഷനും നിർദേശങ്ങൾ സമർപ്പിച്ചു. 1971ൽ സിപിഐ എമ്മും സംവരണം വേണമെന്ന് ആവശ്യപ്പെട്ടു.

മുതലാളിത്ത വികസനത്തിന്റെ പശ്ചാത്തലത്തിൽ ഇവിടെയുള്ള ഉയർന്ന ജാതിവിഭാഗത്തിൽ പലരും പിന്നോക്കം പോകുന്ന അവസ്ഥയുണ്ടായി. മുന്നോക്ക ജാതിവിഭാഗങ്ങളിലെ സാമ്പത്തികമായി മുന്നോക്കം നിൽക്കുന്നവർ അതേ ജാതി വിഭാഗത്തിലെ പിന്നോക്കക്കാരെ ചൂഷണം ചെയ്യുന്ന സ്ഥിതി അന്നും ഇന്നും തുടരുന്നുണ്ട്. ഒരു ജാതിയിലായി എന്നുള്ളതുകൊണ്ട് ഒരേ പരിഗണന ലഭിക്കണമെന്നില്ല. മുന്നോക്ക ജാതിയിലെ പിന്നോക്കം നിൽക്കുന്നവർ ആ ജാതിയിലെ മുന്നോക്കവിഭാഗത്തിന്റെ കുതിപ്പിൽ അരികുവൽക്കരിക്കപ്പെടുന്നു എന്നുള്ളത് യാഥാർഥ്യമാണ്. അത്തരമൊരു പശ്ചാത്തലത്തിൽ മുന്നോക്ക വിഭാഗങ്ങളിലെ പിന്നോക്കക്കാർക്ക് കരുത്തേകുന്ന കരുതലായി മാറുകയാണ് ഈ പത്ത് ശതമാനം സംവരണം.

സംവരണാർഹരല്ലാത്ത പൊതു വിഭാഗത്തിലെ പാവപ്പെട്ടവർക്ക് പത്ത് ശതമാനം സംവരണം ഏർപ്പെടുത്താൻ ഇടതുപക്ഷ ജനാധിപത്യ മുന്നണി സർക്കാർ നടപടി കൈക്കൊള്ളുമ്പോൾ, അത് വർഗപരമായ ഒരു കാഴ്ചപ്പാടിന്റെ പ്രകാശനമാണ്. ഇതിലൂടെ ഒരു വിധത്തിലും നിലവിലുള്ള സംവരണം അട്ടിമറിക്കപ്പെടുന്നില്ല.

നേരത്തേ ദേവസ്വം ബോർഡ് നിയമനങ്ങളിൽ മുന്നോക്കക്കാരിലെ പാവപ്പെട്ടവർക്ക് സംവരണം ഏർപ്പെടുത്തിയ വേളയിൽ മുസ്ലിംലീഗ് എതിർത്തു. അന്നും കോൺഗ്രസ് നേതൃത്വം മൗനത്തിലായിരുന്നു. പിന്നോക്കക്കാർക്ക് ദേവസ്വം ഭരണത്തിലോ ജോലിയിലോ പങ്കാളിത്തമില്ലാത്ത ഫ്യൂഡൽ ഭരണക്രമം തുടരുന്ന വേളയിലാണ് 2007ലെ എൽഡിഎഫ് സർക്കാർ പട്ടികജാതിക്കാരനായ ഒരാൾ ദേവസ്വം ബോർഡ് അംഗമാകണമെന്ന് തീരുമാനിച്ചത്. ആ വർഷംതന്നെ ദേവസ്വം ബോർഡ് നിയമനങ്ങൾ പിഎസ്‌സിക്ക് വിട്ടുകൊണ്ടുള്ള നിയമഭേദഗതിയുണ്ടാക്കി. എന്നാൽ, 2014ൽ ഉണ്ടാക്കിയ സംവരണവ്യവസ്ഥ നടപ്പാക്കാൻ യുഡിഎഫ് തയ്യാറായില്ല. 2015ൽ ദേവസ്വം റിക്രൂട്ട്‌മെന്റ് ബോർഡ് ചട്ടങ്ങൾ രൂപീകരിക്കുകയും അതിൽ 32 ശതമാനം പിന്നോക്കസംവരണം വ്യവസ്ഥ ചെയ്യുകയും ചെയ്‌തെങ്കിലും ഒരാൾക്കുപോലും യുഡിഎഫ് സർക്കാർ ജോലി നൽകിയില്ല. പട്ടികജാതി, പട്ടികവർഗ വിഭാഗത്തിലുള്ളവർക്കുള്ള പ്രായപരിധി ഇളവുപോലും പരിഗണിക്കാതെ അപേക്ഷകൾ തള്ളി.

2016ൽ എൽഡിഎഫ് സർക്കാർ  വന്നപ്പോൾ പുതിയ ദേവസ്വം റിക്രൂട്ട്‌മെന്റ് ബോർഡ് രൂപീകരിച്ച് സംവരണതത്വം പാലിച്ച് 62 ശാന്തിക്കാരെ നിയമിച്ചു. അതിൽ 36 പേർ അബ്രാഹ്മണരാണ്. ആറുപേർ പട്ടികജാതിക്കാരും. 1936ലെ ക്ഷേത്രപ്രവേശന വിളംബരത്തിനുശേഷമുള്ള ഏറ്റവും വലിയ സാമൂഹ്യവിപ്ലവമായാണ് ഇത് വിലയിരുത്തപ്പെട്ടത്. പിന്നോക്കസമുദായങ്ങൾക്കുള്ള സംവരണത്തിന്റെ തോത് ഉയർത്തിയതും മുന്നോക്കവിഭാഗത്തിലെ ഏറ്റവും പിന്നോക്കം നിൽക്കുന്നവർക്ക് 10 ശതമാനം സംവരണം നൽകാനും തീരുമാനിച്ചത് അപ്പോഴാണ്.

നിലവിലുള്ള ഒരു വിഭാഗത്തിന്റെയും സംവരണത്തെ ഹനിക്കാതെ മുന്നോക്ക വിഭാഗത്തിലെ സാമ്പത്തികമായി പിന്നോക്കം നിൽക്കുന്ന വിഭാഗങ്ങൾക്ക് പൊതുമത്സരവിഭാഗത്തിൽനിന്ന് പത്ത്‌ ശതമാനം നീക്കിവയ്‌ക്കാൻ സംസ്ഥാന സർക്കാർ തയ്യാറാകുമ്പോൾ തീർച്ചയായും അരികുവൽക്കരിക്കപ്പെട്ടവരോടൊപ്പം നിൽക്കുന്നവർക്ക് സർക്കാരിന്റെ നിലപാടിനോടൊപ്പം മാത്രമേ നിൽക്കാൻ സാധിക്കുകയുള്ളൂ.

എം വി ഗോവിന്ദൻ 

Friday, October 30, 2020

പട്ടിക വിഭാഗ സംവരണത്തില്‍ കൈകടത്താന്‍ ആരെയും അനുവദിക്കില്ല: മുഖ്യമന്ത്രി

 പട്ടിക വിഭാഗ സംവരണത്തില്‍ കൈകടത്താന്‍ ആരെയും അനുവദിക്കില്ലെന്നും സംവരണവുമായി ബന്ധപ്പെട്ട് ഇപ്പോഴുണ്ടായിട്ടുള്ള വിവാദങ്ങളില്‍ ചിലര്‍ പട്ടിക വിഭാഗക്കാരെ തെറ്റിദ്ധരിപ്പിക്കുവാന്‍ ശ്രമിക്കുകയാണെന്നും മുഖ്യമന്ത്രി  പിണറായി വിജയന്‍ പറഞ്ഞു. പട്ടിക വിഭാഗം സംഘടനപ്രതിനിധികളുമായി നടത്തിയ ഓണ്‍ലൈന്‍ ചര്‍ച്ചക്കുള്ള  മറുപടിയിലാണ് മുഖ്യമന്ത്രി ഇക്കാര്യം വ്യക്തമാക്കിയത്. 

പട്ടികജാതി പട്ടികവര്‍ഗ്ഗ ജനവിഭാഗങ്ങള്‍ സമൂഹത്തിന്റെ ഏറ്റവും പിന്നോക്കാവസ്ഥയിലുള്ളവരാണ്. അവരെ ഉയര്‍ത്തിക്കൊണ്ടു വരുന്നതിന് സര്‍ക്കാര്‍ പ്രതിജ്ഞാബദ്ധമാണ്.  അതിനായി നിരവധി ക്ഷേമ പദ്ധതികള്‍ നടപ്പിലാക്കിക്കൊണ്ടിരിക്കുകയാണ്. അത് ഇനിയും തുടരുമെന്ന് മുഖ്യമന്ത്രി  പറഞ്ഞു.

സംസ്ഥാനത്തെ പട്ടിക വിഭാഗം ജനങ്ങള്‍ നേരിടുന്ന പ്രശ്‌നങ്ങള്‍ ചര്‍ച്ച ചെയ്യുന്നതിന് ദലിത് ആദിവാസി മഹാസഖ്യം രക്ഷാധികാരി പി.രാമഭദ്രന്റെ അഭ്യര്‍ത്ഥന പ്രകാരം വിളിച്ച ചര്‍ച്ചയില്‍ ഇരുപത് സംഘടനകളാണ് പങ്കെടുത്തത്.

വാളയാര്‍, പന്തളം  സംഭവങ്ങളില്‍ പീഡനം അനുഭവിച്ച  കുടുംബത്തോടൊപ്പമാണ് സര്‍ക്കാരെന്ന് മുഖ്യമന്ത്രി പറഞ്ഞു. കുറ്റവാളികള്‍ ആരായിരുന്നാലും അവര്‍ യാതൊരു ദാക്ഷിണ്യവും അര്‍ഹിക്കുന്നില്ല. അവരെ നിയമത്തിനു മുന്നില്‍ കൊണ്ടുവന്ന് ശിക്ഷ ഉറപ്പാക്കുമെന്നും കുടുംബത്തിനായി കഴിയുന്നത്ര സഹായം ഉറപ്പാക്കുമെന്നും അദ്ദേഹം പറഞ്ഞു.

ഭൂരഹിതര്‍ക്ക് കൃഷിഭൂമി നല്‍കുന്നതിന് പ്രത്യേക പദ്ധതി രൂപീകരിക്കും. പട്ടികജാതി-പട്ടികവര്‍ഗ മാനേജ്‌മെന്റില്‍ കൂടുതല്‍ ഉന്നത വിദ്യാഭ്യസ സ്ഥാപനങ്ങളും കോഴ്‌സുകളും അനുവദിക്കണമെന്ന ആവശ്യം   പരിഗണിക്കുമെന്നും ഇതിനായി പ്രത്യേകമായ നയത്തിനു രൂപം നല്‍കുന്നത് ആലോചിക്കാമെന്നും മുഖ്യമന്ത്രി പറഞ്ഞു.

പട്ടികജാതി-പട്ടികവര്‍ഗ്ഗ മാനേജ്‌മെന്റു കള്‍ക്ക് നാക് അക്രഡിറ്റേഷന്‍ ഒഴിവാക്കി ന്യൂജനറേഷന്‍ കോഴ്‌സുകള്‍ അനുവദിക്കാന്‍ തീരുമാനിച്ചതിനെ സഭ  സ്വാഗതം ചെയ്തു.

ഭൂമി, പാര്‍പ്പിടം, സംവരണം വിദ്യാഭ്യാസം ,താത്കാലിക നിയമനങ്ങളിലെ സംവരണ നിഷേധം, അതിക്രമങ്ങള്‍ തടയല്‍ തുടങ്ങിയ വിഷയങ്ങളില്‍ മുഖ്യമന്ത്രി മറുപടി നല്‍കി. ചര്‍ച്ചയില്‍ കെ. സോമപ്രസാദ് എംപി യും പങ്കെടുത്തു. ഓരോ സംഘടനയും ഉന്നയിച്ചിട്ടുള്ള ആവശ്യങ്ങള്‍ വിശദമായി  പരിശോധിക്കുമെന്നും വേഗത്തില്‍ത്തന്നെ നടപടിയുണ്ടാകുമെന്നും മുഖ്യമന്ത്രി പറഞ്ഞു

10 ശതമാനം സംവരണം ആനുകൂല്യം ലഭിക്കുന്നത് ആര്‍ക്കൊക്കെ?; മാനദണ്ഡം ഏതൊക്കെ?

 മുന്നോക്കവിഭാഗത്തിലെ സാമ്പത്തികമായി പിന്നോക്കം നില്‍ക്കുന്നവര്‍ക്ക് പത്ത് ശതമാനം  സംവരണത്തിനുള്ള സംസ്ഥാന സര്‍ക്കാരിന്റെ വിജ്ഞാപനം കഴിഞ്ഞ ദിവസം പുറത്തിറങ്ങി. സംവരണമില്ലാത്തവരും സാമ്പത്തികമായി പിന്നോക്കം നില്‍ക്കുന്നവരുമായ ഉദ്യോഗാര്‍ഥികള്‍ക്ക് സര്‍ക്കാര്‍ നിയമനങ്ങളില്‍ പത്ത് ശതമാനം നിയമനം ഇനി കിട്ടും.  പട്ടികവിഭാഗത്തിലോ പിന്നോക്കവിഭാഗത്തിലോ ഉള്‍പ്പെടുന്നവര്‍ക്കാണ് ഇതുവരെ സംവരണം കിട്ടിയത്. അത് സംരക്ഷിച്ചുകൊണ്ടുതന്നെ മുന്നോക്ക സമുദായത്തിലെയും ക്രിസ്‌ത്യന്‍ ഉള്‍പ്പെടെ സംവരണാനുകൂല്യം കിട്ടാത്ത വിഭാഗങ്ങളിലെയും ഒരു ജാതിയിലും ഇല്ലാത്തവരിലെയും  സാമ്പത്തികമായി പിന്നോക്കക്കാരായവര്‍ക്കാണ് സംവരണം കിട്ടുക. 

പുതിയ നിയമപ്രകാരം സംവരണ പരിധിയില്‍പ്പെടാത്ത ജനറല്‍ കാറ്റഗറിയിലെ വിഭാഗങ്ങള്‍ക്ക് കേരള സര്‍ക്കാര്‍  ഇപ്പോള്‍ സംവരണം ഏര്‍പ്പെടുത്തിയിരിക്കുന്നു, അതിന്‍ പ്രകാരം സാമ്പത്തികമായി പിന്നോക്കം നില്‍ക്കുന്ന ജനറല്‍ കാറ്റഗറിയിലെ ആളുകള്‍ക്ക്  സര്‍ക്കാര്‍ പരീക്ഷകളിലും പൊതു പ്രവേശനപരീക്ഷകളിലും മറ്റും EWS (Economically Weaker Section) എന്ന് ചേര്‍ത്താല്‍ സംവരണം ലഭിക്കുന്നതാണ്. എന്നാല്‍ അതിനായി EWS സര്‍ട്ടിഫിക്കേറ്റ് വാങ്ങേണ്ടതുണ്ട്. സംസ്ഥാന / കേന്ദ്ര പരീക്ഷകള്‍ക്കായി വില്ലേജ് ഓഫിസര്‍ / തഹസില്‍ദാര്‍ എന്നിവര്‍ ആണ് സര്‍ട്ടിഫിക്കറ്റ് നല്‍കുക.

സമുദായത്തെ കുറിച്ചുള്ള സംശയങ്ങള്‍- ഇതിന് സത്യവാങ്ങ്മൂലം നല്‍കാം. എസ്എസ്എല്‍സി സര്‍ട്ടിഫിക്കറ്റിന്റെ അറ്റസ്റ്റഡ് കോപ്പി നല്‍കാം.

ഒരു കുടുംബത്തിലെ അംഗങ്ങളാണോ എന്ന സംശയം- ഇതു തെളിയിക്കാന്‍ റേഷന്‍ കാര്‍ഡിന്റെ കോപ്പി അപേക്ഷയോടൊപ്പം സമര്‍പ്പിക്കുക.

ഇവയെല്ലാം നല്‍കിയിട്ടും EWS സര്‍ട്ടിഫിക്കറ്റ് നല്‍കുന്നില്ലങ്കില്‍ എന്തു കാരണത്താല്‍ നല്‍കാന്‍ സാധിക്കില്ല എന്ന് എഴുതി വാങ്ങുക. തുടര്‍ന്ന് തഹസില്‍ദാര്‍ക്ക് ഇത് ഉപയോഗിച്ച് പരാതി നല്‍കുക.

സംവരണത്തിന് പരിഗണിക്കുന്നവര്‍, മാനദണ്ഡങ്ങള്‍

    കുടുംബ വാര്‍ഷിക വരുമാനം നാലു ലക്ഷം രൂപയോ അതില്‍ താഴെയോ ഉള്ളവര്‍.

    പട്ടികജാതി-- വര്‍ഗ, മറ്റ് പിന്നോക്ക വിഭാഗങ്ങളില്‍ പെടാത്തവര്‍

    കുടുംബ ഭൂസ്വത്ത് പഞ്ചായത്തില്‍ 2.5 ഏക്കറിലും മുനിസിപ്പാലിറ്റിയില്‍ 75 സെന്റിലും കോര്‍പറേഷനില്‍  50 സെന്റിലും കൂടരുത് 

    എല്ലായിടത്തുമുള്ള ഭൂസ്വത്ത് ആകെ രണ്ടര ഏക്കറില്‍ കൂടരുത്.

    മുനിസിപ്പാലിറ്റിയിലും കോര്‍പറേഷനിലും ഭൂമിയുണ്ടെങ്കില്‍  75 സെന്റില്‍ കൂടരുത്. 

    ഭൂവിസ്‌തൃതി കണക്കാക്കുമ്പോള്‍ സംസ്ഥാനത്തിനു പുറത്തുള്ള ഭൂമിയും പരിഗണിക്കും 

    കുടുംബത്തിനുള്ള ആകെ ഹൗസ് പ്ലോട്ടിന്റെ വിസ്‌തൃതി മുനിസിപ്പാലിറ്റിയില്‍ 20 സെന്റിലും  കോര്‍പറേഷനില്‍ 15 സെന്റിലും കൂടരുത്

    കുടുംബത്തിന് ഒന്നിലധികം ഹൗസ് പ്ലോട്ട് ഉണ്ടെങ്കില്‍ അവയെല്ലാം കൂട്ടിയാണ് പ്ലോട്ടിന്റെ വ്യാപ്തി കണക്കാക്കുക 

    അന്ത്യോദയ അന്നയോജന/ മുന്‍ഗണനാ വിഭാഗങ്ങളില്‍പ്പെടുന്ന റേഷന്‍കാര്‍ഡുള്ളവര്‍. ഇവര്‍ വില്ലേജ് ഓഫീസര്‍ നല്‍കുന്ന സാക്ഷ്യപത്രം ഹാജരാക്കണം 

    വരുമാന സര്‍ട്ടിഫിക്കറ്റ്, തൊട്ടുമുമ്പുള്ള സാമ്പത്തികവര്‍ഷത്തെ വരുമാനം അടിസ്ഥാനമാക്കും 

    കുടുംബത്തിന്റെ  വസ്‌തുവകകളുടെ വിശദാംശം സത്യവാങ്മൂലമായി സമര്‍പ്പിക്കണം

    അവകാശവാദം വ്യാജമെന്ന് കണ്ടെത്തിയാല്‍ നിയമനവും പ്രവേശനവും  ഉടന്‍ റദ്ദാക്കും 

    മാനദണ്ഡം മൂന്നുവര്‍ഷം കൂടുമ്പോള്‍  പുനഃപരിശോധിക്കും.

ലീഗിന്‌ അറിയാമോ ; കേരളത്തിന്‌ പുറത്ത്‌ ഭൂരിപക്ഷം മുസ്ലീങ്ങൾക്കും സംവരണമില്ല

 കേരളമൊഴികെയുള്ള പല സംസ്ഥാനങ്ങളിലും മുസ്ലീങ്ങളിലെ ഭൂരിപക്ഷവും  സംവരണത്തിന്‌ അർഹതയില്ലാത്തവരാണെന്ന്‌, ചന്ദ്രഹാസമിളക്കുന്ന മുസ്ലീംലീഗിന്‌ അറിയാമോ എന്ന്‌ മുഖ്യമന്ത്രി പിണറായി വിജയൻ ചോദിച്ചു. അവർക്കും സാമ്പത്തിക സംവരണത്തിന്റെ ആനുകൂല്യം ലഭിക്കും. ഹിന്ദുക്കളിലെയും ക്രൈസ്തവരിലെയും മറ്റ്‌ എല്ലാ മതങ്ങളിലെയും സംവരണമില്ലാത്ത വിഭാഗങ്ങളും ജാതിയും മതവുമില്ലാത്തവരും ഈ ആനുകൂല്യത്തിന്‌ അർഹരാകും. പുതിയ വിഭാഗത്തിന്‌ ലഭിക്കുന്ന സംവരണം ഏറ്റവും പാവപ്പെട്ടവർക്ക്‌ ലഭിക്കാനുള്ള മാനദണ്ഡങ്ങളാണ്‌ സംസ്ഥാനത്ത്‌ സ്വീകരിച്ചത്‌. അതിൽ അപാകതയെന്തെങ്കിലും ചൂണ്ടിക്കാട്ടിയാൽ പരിശോധിക്കാം. എന്നാൽ, ഈ വിഭാഗത്തിന്‌ സംവരണത്തിനേ അർഹതയില്ലെന്ന്‌ പറയുന്നത്‌ ശരിയല്ല. മുന്നോക്ക വിഭാഗത്തിലെ സാമ്പത്തികമായി പിന്നോക്കം നിൽക്കുന്നവർ എന്നതിനു പകരം സംവരണേതര വിഭാഗത്തിലെ സാമ്പത്തികമായി പിന്നോക്കം നിൽക്കുന്നവർ എന്ന പ്രയോഗമാണ്‌ ശരിയെന്നും മുഖ്യമന്ത്രി പറഞ്ഞു.

സാമൂഹ്യ യാഥാർഥ്യങ്ങൾ പരിഗണിച്ചു

സാമൂഹ്യ യാഥാർഥ്യങ്ങളെ ശരിയായ അർഥത്തിൽ പരിഗണിച്ചാണ്‌ സംവരണ വിഷയത്തിൽ ഇടതുപക്ഷം എക്കാലത്തും നിലപാട്‌ എടുത്തത്‌. പട്ടിക വിഭാഗങ്ങൾക്കടക്കം നിലവിലുള്ള സംവരണം തുടരേണ്ടതുണ്ടോ എന്ന കാര്യത്തിൽ അടുത്തിടെ ദേശീയതലത്തിൽ ചർച്ച ഉയർന്നിരുന്നു. അതിനെതിരെ ശക്തമായ നിലപാട്‌ സ്വീകരിച്ചു. പിന്നോക്ക വിഭാഗങ്ങൾക്ക്‌ നിലവിലുള്ള സംവരണം തുടരണം. ക്രീമിലെയർ നടപ്പാക്കിയപ്പോൾ പിന്നോക്ക വിഭാഗത്തിലെ  സമ്പന്നർ സംവരണത്തിന്‌ അർഹരല്ലാതായി. എന്നാൽ സംവരണപ്രകാരം ഉദ്യോഗാർഥികളെ എടുക്കുമ്പോൾ ആവശ്യമായ എണ്ണം ആ സമുദായത്തിൽനിന്ന്‌ ലഭിച്ചില്ലെങ്കിൽ ക്രീമിലെയർ വിഭാഗത്തിൽനിന്ന്‌ അർഹർക്ക്‌ നിയമനം നൽകണമെന്ന്‌ ആ ഘട്ടത്തിൽ വ്യക്തമാക്കിയിരുന്നു.

അതേസമയം, സംവരണമില്ലാത്ത വിഭാഗത്തിലെ ദരിദ്രർക്ക്‌ പത്ത്‌ ശതമാനമെങ്കിലും സംവരണം അനുവദിക്കണമെന്ന്‌ അഭിപ്രായം ഉയർന്നപ്പോൾ അതിനെ ശക്തമായി അനുകൂലിച്ചു. ഇക്കാര്യം നടപ്പാകണമെങ്കിൽ ഭരണഘടനാ ഭേദഗതി ആവശ്യമാണെന്നും അഭിപ്രായപ്പെട്ടു. കേരളത്തിൽ ദശാബ്ദങ്ങൾക്കുമുമ്പ്‌  തെരഞ്ഞെടുപ്പിൽ ഇത്‌ പ്രധാന വിഷയവുമായിരുന്നു. പിന്നീട്‌ യുഡിഎഫ്‌ പ്രകടനപത്രികയിലും ഈ നിലപാട്‌ സ്ഥാനംപിടിച്ചു. കഴിഞ്ഞ എൽഡിഎഫ്‌ പത്രികയിൽ ഇക്കാര്യം വീണ്ടും എടുത്തുപറഞ്ഞു. ദേവസ്വംബോർഡിൽ നടപ്പാക്കി. രാജ്യത്ത്‌ ഭരണഘടനാ ഭേദഗതി വന്നപ്പോൾ സംസ്ഥാനത്തും നടപ്പാക്കുകയാണ്‌. ഒരു വിഭാഗത്തിനും നിലവിലുള്ള സംവരണാവകാശം നേരിയ ശതമാനം പോലും ഹനിക്കപ്പെടില്ലെന്ന്‌ തെറ്റിദ്ധരിച്ച്‌ എതിർക്കുന്നവർക്ക്‌ ഉറപ്പുനൽകുന്നതായി മുഖ്യമന്ത്രി പറഞ്ഞു.

2005ൽ ലീഗിനാകാം; 2020ൽ ഇടതുപക്ഷം ചെയ്യരുത്‌

ഭരണത്തിലുള്ളപ്പോൾ മുന്നോക്ക സംവരണം നടപ്പാക്കിയ മുസ്ലിംലീഗ്‌ ഇപ്പോൾ അതിനെ എതിർക്കുന്നത്‌ അധികാരത്തിൽ വരാൻവേണ്ടി. നരേന്ദ്രൻ കമീഷൻ പാക്കേജിന്റെ പേരിൽ  2005–-ലാണ്‌ ലീഗ്‌ സാമ്പത്തിക സംവരണം നടപ്പാക്കിയത്‌. 

മുന്നോക്ക വിഭാഗത്തിലെ  സാമ്പത്തികമായി പിന്നോക്കക്കാർക്ക്‌  ഉന്നത വിദ്യാഭ്യാസ രംഗത്താണ് അന്ന്‌  10 ശതമാനം സംവരണം ഏർപ്പെടുത്തിയത്‌. മുസ്ലിംലീഗ്‌ നേതാവായ ഇ ടി മുഹമ്മദ്‌ ബഷീറായിരുന്നു അന്നത്തെ‌ വിദ്യാഭ്യാസ മന്ത്രി. സാമ്പത്തിക സംവരണ തീരുമാനം ‌ എതിർപ്പ്‌ ക്ഷണിച്ചുവരുത്തി.

മുസ്ലിം ജമാഅത്ത്‌‌ കൗൺസിൽ യുഡിഎഫ്‌ സർക്കാരിന്റെ തീരുമാനത്തിനെതിരെ കോടതിയെ സമീപിക്കുകയും ചെയ്‌തു. ഇപ്പോഴും ഈ വിഷയം സുപ്രീം കോടതിയുടെ പരിഗണനയിലാണ്‌. എന്നാൽ ഈ  വസ്‌തുത മറച്ചുവച്ചാണ്‌  സാമ്പത്തിക സംവരണത്തിൽ ഇരട്ടത്താപ്പുമായി ലീഗ്‌ സമരത്തിനിറങ്ങുന്നത്‌.

സംവരണവിഭാഗങ്ങൾക്ക്‌ വേണ്ടിയുള്ള നരേന്ദ്രൻ കമീഷൻ പാക്കേജുമായി ബന്ധമില്ലാതിരുന്ന ‌ സാമ്പത്തിക സംവരണം 2005–-ൽ എന്തിന്‌ കൊണ്ടുവന്നുവെന്ന്‌ ‌ ലീഗ്‌ ഇതുവരെ വ്യക്തമാക്കിയിട്ടുമില്ല.

സംവരണത്തിലെ പാര്‍ടിനയം - കോടിയേരി ബാലകൃഷ്ണൻ എഴുതുന്നു

 മുന്നോക്കവിഭാഗത്തിലെ സാമ്പത്തികമായി പിന്നോക്കം നിൽക്കുന്നവർക്ക് പത്ത്‌ ശതമാനം  സംവരണത്തിനുള്ള സംസ്ഥാന സർക്കാരിന്റെ വിജ്ഞാപനം കേരള സമൂഹത്തിന്റെ പൊതുപുരോഗതിക്ക് ശക്തിപകരുന്നതാണ്. സംവരണമില്ലാത്തവരും സാമ്പത്തികമായി പിന്നോക്കം നിൽക്കുന്നവരുമായ ഉദ്യോഗാർഥികൾക്ക് സർക്കാർ നിയമനങ്ങളിൽ പത്ത്‌ ശതമാനം നിയമനം ഇനി കിട്ടും.  പട്ടികവിഭാഗത്തിലോ പിന്നോക്കവിഭാഗത്തിലോ ഉൾപ്പെടുന്നവർക്കാണ് ഇതുവരെ സംവരണം കിട്ടിയത്. അത് സംരക്ഷിച്ചുകൊണ്ടുതന്നെ മുന്നോക്ക സമുദായത്തിലെയും ക്രിസ്ത്യൻ ഉൾപ്പെടെ സംവരണാനുകൂല്യം കിട്ടാത്ത വിഭാഗങ്ങളിലെയും ഒരു ജാതിയിലും ഇല്ലാത്തവരിലെയും  സാമ്പത്തികമായി പിന്നോക്കക്കാരായവർക്കാണ് സംവരണം കിട്ടുക.  അതായത്, മുന്നോക്കസമുദായക്കാർക്ക് മാത്രമല്ല, സംവരണേതര വിഭാഗത്തിലെ സാമ്പത്തിക പിന്നോക്കക്കാർക്കും ഉദ്യോഗനിയമനത്തിലും വിദ്യാഭ്യാസസ്ഥാപന പ്രവേശനത്തിലും സംവരണം ലഭിക്കും.

ചിലർ തെറ്റിദ്ധാരണ പരത്തുന്നു

സർക്കാർ നിലപാട് സംവരണവിഭാഗത്തെ ചതിക്കുന്നതാണെന്ന് ഒരുവിഭാഗം ആരോപിക്കുമ്പോൾ, സാമ്പത്തിക സംവരണ ഉത്തരവിൽ വിപുലീകരണം വേണമെന്ന് മറ്റൊരു വിഭാഗവും ആവശ്യപ്പെടുന്നു. വിയോജിപ്പ് പ്രകടിപ്പിക്കുന്ന സംഘടനകളും കക്ഷികളും വ്യക്തികളുമെല്ലാം ഒരേ മനോഭാവമുള്ളവരല്ല. ഇവരിൽ ഒരു കൂട്ടർ മുറുകെ പിടിക്കുന്നത് എൽഡിഎഫ് വിരുദ്ധതയാണ്. പിന്നോക്ക സംഘടനകളെ തെറ്റിദ്ധരിപ്പിച്ച് എൽഡിഎഫ് സർക്കാരിനെതിരെ സംവരണ സംരക്ഷണപ്രക്ഷോഭത്തിന് യുഡിഎഫിലെ മുഖ്യകക്ഷിയായ മുസ്ലിംലീഗ് ഇറങ്ങിയിരിക്കുകയാണ്. യുഡിഎഫിലേക്ക് പുതുതായി ചേർത്തിരിക്കുന്ന വെൽഫയർ പാർടിയുടെ സ്രഷ്ടാവായ ജമാ അത്തെ ഇസ്ലാമിയാണ് സംവരണത്തിന്റെ പേരിലെ എൽഡിഎഫ് സർക്കാർവിരുദ്ധ പ്രക്ഷോഭത്തിന് ചുക്കാൻ പിടിക്കുന്നത്. ജാതിമത കലാപത്തിലേക്ക് തള്ളിവിടാനുള്ള ഹീന നീക്കമാണിത്. കോൺഗ്രസ് ഉൾപ്പെടെയുള്ള യുഡിഎഫിലെ ഘടകകക്ഷികൾ ഇതിന് ചൂട്ടുപിടിക്കുകയാണോ മാപ്പുസാക്ഷിയാകുകയാണോ എന്ന് പരസ്യമായി വ്യക്തമാക്കണം. സാമ്പത്തിക സംവരണത്തിനുള്ള സർക്കാർ ഉത്തരവിനെ മുന്നണി എന്ന നിലയിൽ യുഡിഎഫ് തള്ളുമോ കൊള്ളുമോ? അത് വ്യക്തമാക്കാനുള്ള ബാധ്യത ഉണ്ട്. 2011ലെ നിയമസഭാ തെരഞ്ഞെടുപ്പ് വേളയിലെ  യുഡിഎഫ് പ്രകടനപത്രികയിൽ മുന്നോക്കക്കാരിലെ പിന്നോക്കക്കാർക്ക് സംവരണം നൽകുന്നതിന് നിർദേശിച്ചിരുന്നു. മുസ്ലിംലീഗ് അന്ന് അതിനെ അനുകൂലിച്ചു. എന്നാൽ, ഇന്ന് മുന്നണിയിലേക്ക് ജമാഅത്തെ ഇസ്ലാമിയും അവരുടെ കക്ഷിയും പങ്കാളിയായതുകൊണ്ടാകണം പഴയ നിലപാട് തിരസ്കരിക്കുന്നത്. 

സാമ്പത്തികസംവരണ വിജ്ഞാപനം നിയമവിരുദ്ധമാണെന്നാണ് ലീഗ് ഉൾപ്പെടെ ചില സംഘടനകളുടെ വാദം. അത് അർഥശൂന്യമാണ്. ഭരണഘടനയുടെ ആർട്ടിക്കിൾ 15ഉം 16ഉം വകുപ്പുകൾ സാമൂഹ്യമായും വിദ്യാഭ്യാസപരമായും പിന്നോക്കം നിൽക്കുന്ന വിഭാഗങ്ങൾക്കും സമുദായങ്ങൾക്കും പ്രത്യേക നിയമംവഴി സംവരണം ഏർപ്പെടുത്താൻ വ്യവസ്ഥ ചെയ്യുന്നതാണ്. ഇപ്രകാരം പട്ടികജാതി പട്ടികവർഗ സമുദായങ്ങൾക്കും(എസ്‌സി–-എസ്‌ടി) മറ്റ് പിന്നോക്കവിഭാഗങ്ങൾക്കും (ഒബിസി) ഈ സംവരണാനുകൂല്യം ഉണ്ട്. എന്നാൽ, പാർലമെന്റ് 2019 ജനുവരി 14ന് പാസാക്കിയ 103–-ാം ഭരണഘടനാഭേദഗതിയിലൂടെ ആർട്ടിക്കിൾ 15നും 16നും ഭേദഗതി വരുത്തി. ഭേദഗതിവഴി സാമ്പത്തികാടിസ്ഥാനത്തിലുള്ള സംവരണം നടപ്പാക്കാൻ കേന്ദ്രത്തിനും സംസ്ഥാനങ്ങൾക്കും അനുമതി ലഭിച്ചു. ഇതുപ്രകാരമാണ് കേരള സർക്കാർ സാമ്പത്തിക സംവരണം പത്ത്‌ ശതമാനം ഏർപ്പെടുത്തി 2020 ഒക്ടോബർ 23ന് ഉത്തരവിറക്കിയത്. അതിനാൽ ഈ നടപടി നിയമവിരുദ്ധമല്ല.

പാർലമെന്റിൽ കേന്ദ്രസർക്കാർ കൊണ്ടുവന്ന ഭരണഘടനാ ഭേദഗതി ബില്ലിന് അനുകൂലമായി ബിജെപി മാത്രമല്ല, കോൺഗ്രസും യുഡിഎഫിലെ മറ്റ് കക്ഷികളും വോട്ടുചെയ്തു. സിപിഐ എം നിലവിലുള്ള സംവരണം സംരക്ഷിച്ചുകൊണ്ട് മുന്നോക്കക്കാരിലെ പിന്നോക്കക്കാർക്ക് പത്ത്‌ ശതമാനത്തിൽ കൂടാത്ത സംവരണം നൽകുന്നതിന് മുമ്പുകാലം മുതലേ അനുകൂലിച്ചതാണ്. അതിനാൽ, സ്വാഭാവികമായി ബില്ലിനെ പിന്തുണച്ചു. ഇടതുപക്ഷകക്ഷികളും. എന്നാൽ, പാർലമെന്റ് പാസാക്കിയ ഈ ഭരണഘടനാ ഭേദഗതിയുടെ പശ്ചാത്തലത്തിൽ കേരള സർക്കാർ ഇറക്കിയ സാമ്പത്തിക സംവരണ ഉത്തരവിൽ പ്രതിഷേധിക്കുന്ന മുസ്ലിംലീഗ് നിർദിഷ്ട ഭരണഘടനാഭേദഗതി ബില്ലിന്റെ ആദ്യവായനയിൽ പാർലമെന്റിൽ എതിർത്തിരുന്നില്ല.

103–-ാം ഭരണഘടനാ ഭേദഗതി പൊടുന്നനെ ഉണ്ടായതല്ല. മണ്ഡൽ കമീഷൻ റിപ്പോർട്ടും  അതേത്തുടർന്നുള്ള പ്രക്ഷോഭവും കഴിഞ്ഞാണ് 1991 മെയ് 15ന് കേന്ദ്രസർക്കാർ, അന്നുവരെ സംവരണാനുകൂല്യം കിട്ടാത്ത വിഭാഗത്തിൽപ്പെട്ട സാമ്പത്തികമായി പിന്നോക്കം നിൽക്കുന്നവർക്ക് പൊതുനിയമനങ്ങളിൽ പത്ത്‌ ശതമാനം സംവരണം ഏർപ്പെടുത്താൻ വ്യവസ്ഥ ചെയ്യുന്ന ഉത്തരവിറക്കി. ഇത് ഭരണഘടനാ വിരുദ്ധമാണെന്ന് "ഇന്ദിരാ സാഹ്നി' കേസിൽ 1992ൽ സുപ്രീംകോടതി വിധിച്ചു. സാമ്പത്തികമായി പിന്നോക്കം നിൽക്കുന്ന മുന്നോക്കക്കാരുടെ വിഷയം പഠിക്കാൻ 2004ൽ ഒന്നാം യുപിഎ സർക്കാർ എസ് ആർ സിൻഹോ അധ്യക്ഷനായ സമിതിയെ നിയോഗിച്ചു. സാമ്പത്തിക സംവരണത്തിന്റെ ആവശ്യകത 2010 ജൂലൈയിൽ കേന്ദ്രത്തിന് നൽകിയ റിപ്പോർട്ടിൽ കമീഷൻ ചൂണ്ടിക്കാട്ടി. അതിനുശേഷമാണ് 2019 ജനുവരി 14ന് പാർലമെന്റിൽ ഭരണഘടനാ ഭേദഗതി പാസാക്കി മുന്നോക്കവിഭാഗങ്ങളിലെ സാമ്പത്തികമായി പിന്നോക്കം നിൽക്കുന്നവർക്ക്‌ വിദ്യാഭ്യാസത്തിനും ഉദ്യോഗത്തിനും പത്ത്‌ ശതമാനം സംവരണം ഏർപ്പെടുത്താൻ അനുമതി നൽകിയത്.

സാമൂഹ്യനീതി ഉറപ്പാക്കാനുള്ള ചുവടുവയ്‌പ്‌

ഭരണഘടനാഭേദഗതി നിലവിൽ വന്നതിനെത്തുടർന്ന് സാമ്പത്തിക സംവരണത്തിന്റെ മാനദണ്ഡങ്ങൾ നിശ്ചയിച്ച് കേന്ദ്രസർക്കാർ 2019 ജൂലൈ 17നും ഉത്തരവ് പുറപ്പെടുവിച്ചു. ഈ സാഹചര്യത്തിൽ കേരള സർക്കാർ ഈ സംസ്ഥാനത്ത് സാമ്പത്തിക സംവരണം ഏർപ്പെടുത്തുന്നതിനുള്ള മാനദണ്ഡങ്ങൾ നിശ്ചയിക്കാൻ ഒരു കമീഷനെ 2019 മാർച്ചിൽ നിയോഗിച്ചു. റിട്ട. ജഡ്ജി കെ ശശിധരൻനായർ ചെയർമാനും അഡ്വ. രാജഗോപാലൻനായർ അംഗവുമായ കമീഷൻ വിവിധ സംഘടനകളുമായും  മറ്റ് ബന്ധപ്പെട്ടവരുമായും ചർച്ച ചെയ്ത് മാനദണ്ഡങ്ങൾ ശുപാർശ ചെയ്തു. കുടുംബവരുമാന പരിധി നാല്‌ ലക്ഷം രൂപയാക്കി. കുടുംബത്തിന്റെ മൊത്തം വസ്തു പഞ്ചായത്തിൽ 12.5 ഏക്കറും മുനിസിപ്പാലിറ്റിയിൽ 78 സെന്റും കോർപറേഷനിൽ 50 സെന്റും കവിയരുതെന്നും നിർദേശിച്ചു. ഇത് അംഗീകരിച്ച് 2020 ഫെബ്രുവരി 12ന് സർക്കാർ ഉത്തരവിറക്കി. അതുപ്രകാരം വിദ്യാഭ്യാസ സ്ഥാപനങ്ങളിൽ നടപ്പാക്കാൻ യൂണിവേഴ്സിറ്റികൾക്കും വിദ്യാഭ്യാസ സ്ഥാപനങ്ങൾക്കും സർക്കാർ നിർദേശം നൽകി. നിയമനങ്ങളിൽ സാമ്പത്തിക സംവരണം നടപ്പാക്കാൻ കേരള സർവീസ് റൂളും കേരള സ്റ്റേറ്റ് സബോർഡിനേറ്റ് സർവീസ് റൂളും ഭേദഗതി ചെയ്യാനുള്ള തീരുമാനവും എടുത്തു. ഇതിനെല്ലാം ശേഷമാണ് ഉദ്യോഗനിയമനത്തിലെ സാമ്പത്തിക സംവരണത്തിനുള്ള വിജ്ഞാപനം 2020 ഒക്ടോബർ 23ന് സർക്കാർ പുറപ്പെടുവിച്ചത്.

ഇക്കാര്യത്തിൽ അനാവശ്യ ധൃതിയോ ഏതെങ്കിലും വിഭാഗത്തെ പ്രീണിപ്പിക്കാനുള്ള രാഷ്ട്രീയ കൗശലമോ അല്ല, സാമൂഹ്യനീതി ഉറപ്പാക്കാനുള്ള ചുവടുവയ്പാണ് ഉണ്ടായിരിക്കുന്നത്. 2016ലെ എൽഡിഎഫ് പ്രകടനപത്രികയിലെ വാഗ്ദാനം പാലിക്കുക മാത്രമാണ് ചെയ്തത്. എൽഡിഎഫ് പ്രകടനപത്രികയിൽ ഇപ്രകാരം പറഞ്ഞു: ‘പട്ടികജാതി പട്ടികവർഗ വിഭാഗങ്ങൾക്കും വിദ്യാഭ്യാസപരമായും സാമൂഹ്യപരമായും പിന്നോക്കം നിൽക്കുന്ന ജനവിഭാഗങ്ങൾക്കും സർക്കാർ ഉദ്യോഗങ്ങളിൽ ഇന്നുള്ള തോതിൽ സംവരണം തുടരുമെന്ന നയത്തിൽ എൽഡിഎഫ് ഉറച്ചുനിൽക്കുന്നു. ഓരോ സമുദായത്തിനും അർഹതപ്പെട്ട സംവരണാനുകൂല്യം മുഴുവൻ അവർക്കുതന്നെ കിട്ടുമെന്ന് ഉറപ്പുവരുത്തണം. അതോടൊപ്പം മുന്നോക്ക സമുദായങ്ങളിലെ പാവപ്പെട്ടവർക്ക് പത്ത്‌ ശതമാനം സംവരണം ഏർപ്പെടുത്തുകയും വേണം.'' ഇങ്ങനെ 2016ലെ നിയമസഭാ തെരഞ്ഞെടുപ്പിനുമുമ്പേ എൽഡിഎഫ് ജനങ്ങൾക്കു മുന്നിൽ സമർപ്പിച്ച വാഗ്ദാനമാണ് ഇപ്പോൾ നടപ്പാക്കിയിരിക്കുന്നത്. അതിനാൽ, ഏതെങ്കിലും വിഭാഗങ്ങളെ പ്രീണിപ്പിക്കാനോ മറ്റേതെങ്കിലും വിഭാഗങ്ങളെ ദ്രോഹിക്കാനോ ഉള്ള നടപടിയല്ല സാമ്പത്തിക സംവരണ ഉത്തരവ്. 

ഉദ്യോഗനിയമനങ്ങളിൽ 50 ശതമാനം സംവരണം നിലവിലുള്ളത് അതേപടി തുടരും. അതിനുപുറത്ത് പത്ത്‌ ശതമാനം സാമ്പത്തിക സംവരണം വരുന്നത് പൊതുവിഭാഗത്തിൽ നിന്നാണ്. അതിനർഥം സംവരണം ലഭിക്കുന്ന ആർക്കും ദോഷം സംഭവിക്കുന്നില്ല എന്നാണ്. ഇപ്പോഴത്തെ ഉത്തരവ് പ്രകാരം വിദ്യാഭ്യാസ പ്രവേശനത്തിനും ഉദ്യോഗനിയമനത്തിനും  സംവരണം ലഭിച്ചുവന്ന ഏതെങ്കിലും വിഭാഗത്തിൽ ഒരുതരത്തിലും കുറവ് സംഭവിക്കാൻ പാടില്ലായെന്നതാണ് സർക്കാർ താൽപ്പര്യം. അപാകങ്ങൾ ഏതെങ്കിലും വിഭാഗം നേരിടുന്നുവെങ്കിൽ അത് പരിഹരിക്കാൻ നടപടിയെടുക്കും.

സാമ്പത്തിക സംവരണം ചോദ്യം ചെയ്യുന്ന ഹർജികൾ സുപ്രീംകോടതിയുടെ പരിഗണനയിലായതിനാൽ, സർക്കാർ നടപടി നിയമവിരുദ്ധമാണെന്ന അഭിപ്രായം മുസ്ലിംലീഗും മറ്റും ഉന്നയിക്കുന്നു. ഈ വാദം നിലനിൽക്കുന്നതല്ല. ഭരണഘടനാ ഭേദഗതി വന്നതിനെത്തുടർന്ന് നിരവധി സംസ്ഥാനങ്ങൾ പ്രത്യേകമായി മാനദണ്ഡങ്ങൾ നിശ്ചയിച്ച് സാമ്പത്തിക സംവരണം നടപ്പാക്കി ഉത്തരവ് പുറപ്പെടുവിച്ചു. പശ്ചിമബംഗാൾ, മഹാരാഷ്ട്ര, രാജസ്ഥാൻ, ഗുജറാത്ത്, ഉത്തർപ്രദേശ്, ഛത്തീസ്ഗഢ്, മധ്യപ്രദേശ്, ഹിമാചൽപ്രദേശ്, ഹരിയാന തുടങ്ങിയവ ഇക്കൂട്ടത്തിൽ വരും. ഭരണഘടനാ ഭേദഗതി ചോദ്യംചെയ്ത് സുപ്രീംകോടതിയിൽ 28 റിട്ട് ഹർജി ഫയൽചെയ്യപ്പെട്ടു. അതിൽ എസ്ഡിപിഐ, പീപ്പിൾസ് പാർടി ഓഫ് ഇന്ത്യ ഡെമോക്രാറ്റിക്, ദേശീയ മക്കൾ കക്ഷി എന്നീ സംഘടനകൾ ഉണ്ട്. ഇപ്പോൾ സാമ്പത്തിക സംവരണത്തിനെതിരെ ‘ജിഹാദ്' മുഴക്കുന്ന മുസ്ലിംലീഗ് കേസ് ഫയൽ ചെയ്തിട്ടുമില്ല. റിട്ട് ഹർജികൾ വിശാല ഭരണഘടനാ ബെഞ്ചിൽ വാദം കേൾക്കുന്നതിന് നിശ്ചയിച്ച് സുപ്രീംകോടതി 2020 ഒക്ടോബർ അഞ്ചിന് ഉത്തരവായിട്ടുണ്ട്. എന്നാൽ, ഏതെങ്കിലും സംസ്ഥാനത്ത് സാമ്പത്തിക സംവരണം നടപ്പാക്കുന്നതിനെ സുപ്രീംകോടതി വിലക്കിയിട്ടില്ല. അതിനാൽ, കേരള സർക്കാർ നടപടി തികച്ചും നിയമവിധേയമാണ്.

സംവരണം വോട്ടു തട്ടാനുള്ള ഉപായമാക്കിയിരിക്കുന്നു എൽഡിഎഫ് സർക്കാർ എന്ന ദോഷൈകവീക്ഷണം ചില കേന്ദ്രങ്ങൾ ഉന്നയിക്കുന്നുണ്ട്. അത് ദുരുപദിഷ്ടവും ചരിത്രനിഷേധവുമാണ്. സംവരണത്തെ വോട്ടു കായ്ക്കുന്ന മരമായി കണ്ട് ഭരണനടപടികൾ സ്വീകരിച്ച് നാട്ടിൽ കലാപം കുത്തിയിളക്കിയതും കൈപൊള്ളിയതും യുഡിഎഫിനാണ്. സംവരണം സജീവ ചർച്ചാവിഷയമാകുമ്പോൾ 25 വർഷംമുമ്പ് കേരള നിയമസഭ പാസാക്കിയ സംവരണ സംരക്ഷണ ബില്ലിന്റെ ഗതിയും ആ ബിൽ കൊണ്ടുവന്ന കോൺഗ്രസ്, ലീഗ് നേതൃമുന്നണിയെ ജനങ്ങൾ ശിക്ഷിച്ചതും മറക്കേണ്ട. ‘സംവരണ സംരക്ഷണ ബിൽ' എ കെ ആന്റണി നിയമസഭയിൽ പാസാക്കിയത് 1995 ആഗസ്ത്‌ 31ന് ആണ്. സർക്കാർ നിയമനങ്ങളിൽ സംവരണം നൽകുമ്പോൾ പിന്നോക്കക്കാരിലെ മേൽത്തട്ടുകാരെ ഒഴിവാക്കണമെന്ന മണ്ഡൽ കമീഷൻ കേസിലെ സുപ്രീംകോടതി വിധി മറികടക്കാനുള്ള സൂത്രവിദ്യയായിരുന്നു ബിൽ. തദ്ദേശതെരഞ്ഞെടുപ്പിൽ വോട്ടുതട്ടാനുള്ള തന്ത്രമായിരുന്നു അത്. എന്നാൽ, സുപ്രീംകോടതിയുടെ ശക്തമായ പ്രഹരവും പ്രാദേശിക ഭരണതെരഞ്ഞെടുപ്പിലെ തോൽവിയും ഏറ്റുവാങ്ങുകയായിരുന്നു യുഡിഎഫ്. അതോടെ ‘സംവരണ സംരക്ഷണ ബിൽ’ തള്ളപ്പെട്ടു.

മറ്റ് പാർടികളിൽനിന്ന്‌ വ്യത്യസ്തമായി സംവരണപ്രശ്നത്തെ വർഗസമരത്തിന്റെ ഭാഗമായാണ് കമ്യൂണിസ്റ്റ് പാർടി കാണുന്നത്. തൊഴിലില്ലായ്മയും ദാരിദ്ര്യവും മുതലാളിത്ത സാമൂഹ്യവ്യവസ്ഥിതിയുടെ സൃഷ്ടിയാണ്. സംവരണം കൊണ്ടുമാത്രം ഈ പ്രശ്നത്തിന് ശാശ്വതപരിഹാരം കാണാനാകില്ല. പരമ്പരാഗതമായി സാമൂഹ്യ പിന്നോക്കാവസ്ഥയിലായിട്ടുള്ള വിഭാഗങ്ങളെ മുന്നണിയിലേക്ക് കൊണ്ടുവരാൻ സംവരണം ആവശ്യമാണ്. പിന്നോക്കദളിത് വിഭാഗങ്ങളെ ഉൾപ്പെടെ മുന്നോട്ടുകൊണ്ടുപോകുന്നതിന് ഭൂപരിഷ്കരണം പ്രധാനമാണെന്നും പാർടി കണ്ടെത്തി. 1957ലെ കേരളത്തിലെ കമ്യൂണിസ്റ്റ് സർക്കാർ അത് നടപ്പാക്കിയത് ഇതുകൂടി മനസ്സിലാക്കിയാണ്. പിന്നോക്കവിഭാഗക്കാർ ഉൾപ്പെടെയുള്ള ജനങ്ങളുടെ പുരോഗതിക്ക് എല്ലാ ജാതിയിലുംപെട്ട പാവപ്പെട്ടവരുടെ ഐക്യനിര കെട്ടിപ്പടുക്കേണ്ടത് അനിവാര്യമാണെന്ന് പാർടി കണ്ടു. അതിനാൽ, മുന്നോക്കവിഭാഗത്തിലെ പാവപ്പെട്ടവരെ പിന്നോക്കവിഭാഗത്തോടൊപ്പം അണിനിരത്തുന്നത് അനിവാര്യമാണെന്നും വിലയിരുത്തി. അതുപ്രകാരം സംവരണ കാര്യത്തിൽ മൂന്ന് അടിസ്ഥാന നിലപാട് പാർടി സ്വീകരിച്ചു.

1) പട്ടികജാതി പട്ടിക വർഗക്കാർക്ക് നിലവിലുള്ള സംവരണം അതുപോലെ തുടരുക.

2) പിന്നോക്ക വിഭാഗത്തിൽപ്പെട്ടവർക്കുള്ള സംവരണത്തിൽ പ്രഥമ പരിഗണന ആ വിഭാഗത്തിലെ പാവപ്പെട്ടവർക്ക് നൽകണം. അർഹരായ പാവപ്പെട്ടവരില്ലെങ്കിൽ ആ വിഭാഗത്തിലെ തന്നെ സമ്പന്ന വിഭാഗത്തെ പരിഗണിക്കണം. ഇത് അതത് സമുദായത്തിന് ലഭിച്ചുവരുന്ന സംവരണം നിലനിർത്തുന്നതിനു വേണ്ടിയാണ്.

3) മുന്നോക്കക്കാരിലെ പിന്നോക്കവിഭാഗങ്ങൾക്ക് 10 ശതമാനത്തിൽ കവിയാത്ത സംവരണം നൽകണം. ഇതിനായി ഭരണഘടന ഭേദഗതി ചെയ്യണം.

ഈ നയത്തിന് അനുസൃതമായ നിലപാടുകളാണ് സിപിഐ എം ദേശീയമായും എൽഡിഎഫ് സർക്കാർ ഇവിടെയും സ്വീകരിച്ചിട്ടുള്ളത്. നെട്ടൂർ കമീഷൻ, നരേന്ദ്രൻ കമീഷൻ തുടങ്ങിയവയുടെ റിപ്പോർട്ടുകളിൽ സംവരണത്തെ സംബന്ധിച്ച് ഇത്തരം സുതാര്യമായ നയം സിപിഐ എം സ്വീകരിച്ചു. മുന്നോക്കക്കാരിലെ പിന്നോക്കക്കാർക്ക് പത്ത്‌ ശതമാനം സംവരണം നൽകണമെന്നും അതിന് ഭരണഘടന ഭേദഗതി ചെയ്യണമെന്നും 1990 നവംബർ നാലിന് സിപിഐ എം കേന്ദ്രകമ്മിറ്റി അംഗീകരിച്ച പ്രമേയത്തിൽ ആവശ്യപ്പെട്ടിരുന്നു. സംവരണം സംബന്ധിച്ച് ഞങ്ങൾ പൊടുന്നനെ എന്തോ പുതിയ നയം രൂപപ്പെടുത്തിയിരിക്കുന്നു എന്ന പ്രചാരണത്തിന്റെ അർഥശൂന്യത ഓർമപ്പെടുത്താനാണ് ഇക്കാര്യം ചൂണ്ടിക്കാട്ടിയത്.

സംവരണനയത്തിൽ കേരളം മാതൃക

നയപരമായ ഉൾക്കാഴ്ച എൽഡിഎഫിന് ഉള്ളതുകൊണ്ടാണ്, കേന്ദ്രസർക്കാരിന്റെ ഭരണഘടനാ ഭേദഗതി വരുന്നതിനു മുമ്പുതന്നെ 2017ൽ ദേവസ്വംബോർഡുകളിൽ പുതിയ സംവരണനയം പിണറായി വിജയൻ സർക്കാർ നടപ്പാക്കിയത്. പട്ടികജാതി, വർഗ, പിന്നോക്കാദി സമുദായങ്ങൾക്ക് സംവരണം ഏർപ്പെടുത്തുകയും ഒപ്പം മുന്നോക്കക്കാരിലെ പാവപ്പെട്ടവർക്ക് പത്ത്‌ ശതമാനം സംവരണം നൽകുകയും ചെയ്തു. പട്ടികജാതി–-വർഗ പിന്നോക്കാദി ജനവിഭാഗങ്ങൾക്ക് ദേവസ്വം നിയമനങ്ങളിൽ സംവരണം നിലവിൽ വന്ന ആദ്യസംസ്ഥാനമായി കേരളം. ഇതിനൊപ്പം മുന്നോക്കക്കാരിലെ പിന്നോക്കക്കാർക്ക് പത്ത്‌ ശതമാനം സംവരണം നടപ്പാക്കുന്നതിലും നമ്മുടെ സംസ്ഥാനം മാതൃകയായി. കൂടുതൽ സ്ഥാപനങ്ങളെ പിഎസ്‌സി നിയമനത്തിന്റെ പരിധിയിൽ കൊണ്ടുവന്നതിലൂടെ എൽഡിഎഫ് സർക്കാർ സംവരണനിയമനങ്ങളുടെ അവസരം വർധിപ്പിച്ചു. സാമ്പത്തിക സംവരണത്തിനുള്ള എൽഡിഎഫ് സർക്കാരിന്റെ തീരുമാനം എല്ലാവിഭാഗത്തിലെയും പാവപ്പെട്ടവരുടെ ഐക്യത്തെ ശക്തിപ്പെടുത്തുന്നതിനാണ്. ദുരിതം അനുഭവിക്കുന്ന ജനങ്ങളെയാകെ യോജിപ്പിക്കുന്നതിനുപകരം അവർക്കിടയിൽ സംഘർഷമുണ്ടാക്കി എൽഡിഎഫ് വിരുദ്ധത വളർത്താനുള്ള വർഗീയശക്തികളുടെയും നിക്ഷിപ്ത രാഷ്ട്രീയമുന്നണികളുടെയും നീക്കങ്ങളെയും പ്രക്ഷോഭങ്ങളെയും നാട് തള്ളിക്കളയും.

കോൺഗ്രസ്‌‐ ബിജെപി നയങ്ങൾ

സംവരണത്തിൽ എൽഡിഎഫിനും വിശിഷ്യാ സിപിഐ എമ്മിനും വ്യക്തവും പ്രഖ്യാപിതവുമായ നയമുണ്ട്. അത് വോട്ടുകിട്ടുമോ നഷ്ടപ്പെടുമോ എന്ന് നോക്കിയുള്ള ചെപ്പടിവിദ്യയല്ല. നിലവിലുള്ള സംവരണത്തെ സംരക്ഷിച്ച്, അവശത അനുഭവിക്കുന്ന കൂടുതൽ ജനവിഭാഗങ്ങളിലേക്ക് അത് വ്യാപിപ്പിക്കണം എന്നതാണ് ഞങ്ങളുടെ കാഴ്ചപ്പാട്. ചരിത്രപരമായ കാരണങ്ങളാൽ അടിച്ചമർത്തപ്പെട്ട ജനവിഭാഗങ്ങൾക്ക് സാമൂഹ്യനീതി ഉറപ്പുവരുത്തുക എന്ന ലക്ഷ്യത്തോടെയാണ് സംവരണം രാജ്യത്ത് നടപ്പാക്കിയത്. ഇന്ത്യയിലെ സാമൂഹ്യയാഥാർഥ്യം ഉൾക്കൊണ്ട നടപടിയാണ് അത്. എന്നാൽ, ഈ സംവരണത്തെ അട്ടിമറിക്കുക എന്ന നിലപാടാണ് ആർഎസ്എസിനുള്ളത്. അതുകൊണ്ടാണ് ജാതിസംവരണം പുനഃപരിശോധിക്കണമെന്ന ആവശ്യം ആർഎസ്എസും സർ സംഘചാലക് മോഹൻ ഭാഗവതും ആവർത്തിക്കാറുള്ളത്. രാജ്യത്തിന്റെ ചരിത്രം പരിശോധിച്ചാൽ സംവരണം അട്ടിമറിക്കാനുള്ള നടപടികളാണ് ആർഎസ്എസ് സ്വീകരിച്ചിട്ടുള്ളതെന്ന് കാണാം. മണ്ഡൽ കമീഷൻ റിപ്പോർട്ട് നടപ്പാക്കാൻ വി പി സിങ് സർക്കാർ ശ്രമിച്ചപ്പോൾ അതിനെതിരെ ആത്മാഹൂതി ഉൾപ്പെടെയുള്ള സമരരൂപങ്ങൾ രാജ്യത്താകമാനം സംഘടിപ്പിച്ചതിൽ സംഘപരിവാർ സംഘടനകളുടെ പങ്ക് വ്യക്തം.

പിന്നോക്കവിഭാഗത്തിന് കേന്ദ്രസർവീസിൽ സംവരണം ഏർപ്പെടുത്താൻവേണ്ടി മണ്ഡൽ കമീഷൻ റിപ്പോർട്ട് നടപ്പാക്കാൻ വി പി സിങ് സർക്കാർ ശ്രമിച്ചു. അപ്പോഴാണ് ബാബ്റി മസ്ദിജ് പ്രശ്നം കുത്തിപ്പൊക്കി വർഗീയധ്രുവീകരണം ഉണ്ടാക്കി ആ സാമൂഹ്യമുന്നേറ്റത്തിന് വിലങ്ങുതടി തീർത്തത്. കേന്ദ്രത്തിലെ കോൺഗ്രസ് സർക്കാരുകളാകട്ടെ, സംവരണത്തെ ശക്തിപ്പെടുത്തി മുന്നോട്ടുകൊണ്ടുപോകാനുള്ള നടപടി സ്വീകരിച്ചിട്ടുമില്ല. പിന്നോക്ക ജനവിഭാഗങ്ങളുടെ അവസ്ഥ പഠിക്കാനുള്ള ഫലപ്രദമായ പഠനം നടന്നതുപോലും കോൺഗ്രസ് ഇതര സർക്കാർ രാജ്യം ഭരിച്ചപ്പോഴാണ്. അന്ന് ഏർപ്പെടുത്തിയ മണ്ഡൽ കമീഷന്റെ റിപ്പോർട്ട് ലഭിച്ചപ്പോൾ ഇന്ദിരഗാന്ധി സർക്കാർ നടപടിയെടുത്തതുമില്ല. കോൺഗ്രസ് അവഗണിച്ച ആ റിപ്പോർട്ടാണ് വി പി സിങ് സർക്കാർ നടപ്പാക്കാൻ ശ്രമിച്ചത്. പിന്നോക്കക്കാർക്ക് സംവരണം അഖിലേന്ത്യാ തലത്തിൽ കൊണ്ടുവരാൻ നടപടി സ്വീകരിച്ച വി പി സിങ് സർക്കാരിനെ അട്ടിമറിക്കാൻ കോൺഗ്രസും ബിജെപിയും യോജിച്ചു. യോജിച്ച് പിന്തുണച്ച അവിശ്വാസപ്രമേയത്തെ തുടർന്നാണ് മണ്ഡൽ കമീഷൻ റിപ്പോർട്ട് നടപ്പാക്കാൻ യത്നിച്ച സർക്കാർ അട്ടിമറിക്കപ്പെട്ടത്. ഈ ചരിത്രം നിലനിൽക്കെ യുഡിഎഫിലെ കക്ഷികളുടെ നേതൃത്വത്തിൽ നടക്കുന്ന പിന്നോക്ക സംവരണ സംരക്ഷണ സമരപ്രഖ്യാപനം ജനങ്ങളുടെ ഓർമശക്തിയെ പരീക്ഷിക്കലാണ്.

കോടിയേരി ബാലകൃഷ്ണൻ

Thursday, October 29, 2020

സംവരണം, ജാതി, ദാരിദ്ര്യം: വിവാദങ്ങളും വസ്തുതകളും

 സംവരണേതരവിഭാഗങ്ങളിലെ സാമ്പത്തികമായി പിന്നാക്കം നിൽക്കുന്നവർക്ക് പത്തു ശതമാനം സംവരണം നടപ്പിലാക്കാനുള്ള കേരളസർക്കാർ തീരുമാനം കേരളത്തിനകത്തും പുറത്തും വലിയ സംവാദങ്ങൾക്ക് വീണ്ടും തിരിതെളിച്ചിരിക്കുകയാണ്. ഈ പശ്ചാത്തലത്തിൽ, പ്രസ്തുതസംവാദങ്ങളെ, ഗ്രാമീണ ഇന്ത്യയിലെ ഒരു ദരിദ്രകുടുംബത്തിൽ ജനിച്ചുവളർന്ന രണ്ട് ദളിത് വിദ്യാർഥികൾ എന്ന നിലയിൽ നോക്കിക്കാണാനും വിമർശനാത്മകമായി വിലയിരുത്താനും ശ്രമിക്കുകയാണ്. സംവരണം - പ്രത്യേകിച്ച് സാമ്പത്തികമായി ദുർബലരായ വിഭാഗങ്ങൾക്കുള്ള (EWS) സംവരണം - എന്ന വിഷയത്തെ മാത്രം പരിശോധിക്കാനാണ് ശ്രമിക്കുന്നത്. ജാതി ഉന്മൂലനം എന്ന വലിയ പദ്ധതിയെ വിശദമായി പരിശോധിക്കുന്നില്ല എന്ന് ആമുഖമായി പറയട്ടെ.

കടുത്ത ചൂഷണവും അസമത്വവും നിലനിൽക്കുന്ന ഒരു സമൂഹമാണ് നമ്മുടേത്. ഈ അസമത്വത്തിന്റെ നിരവധിയായ ലക്ഷണങ്ങളിൽ ഒന്നാണ് തൊഴിൽ, വിദ്യാഭ്യാസം, നിയമനിർമാണം, ഭരണനിർവഹണം തുടങ്ങിയ മേഖലകളിൽ നിലനിൽക്കുന്ന പ്രാതിനിധ്യ അസന്തുലിതാവസ്ഥ. ചരിത്രപരമായ വിവിധകാരണങ്ങൾ കൊണ്ട് ഉടലെടുത്ത ഈ പ്രാതിനിധ്യപ്രശ്നം പരിഹരിക്കാനുള്ള ഒരു താത്കാലിക സമാശ്വാസപരിപാടിയാണ് സംവരണം. ഒരുകൂട്ടം ആളുകളെ ജോലിക്കോ വിദ്യാഭ്യാസത്തിനോ ഒക്കെ തെരഞ്ഞെടുക്കുമ്പോൾ, അതിൽ നിർബന്ധമായും ഒരു നിശ്ചിതശതമാനം പാർശ്വവൽക്കരിക്കപ്പെട്ട മനുഷ്യർ ഉണ്ടാകണമെന്നാണ്. അതായത് എന്തൊക്കെയായാലും നൂറിൽ പതിനഞ്ചു പട്ടികജാതിക്കാരും എട്ടു പട്ടികവർഗക്കാരും ഇരുപത്തിയേഴ് മറ്റു പിന്നാക്കവിഭാഗക്കാരും എല്ലാം ഉണ്ടാവണം എന്നതാണ് സംവരണം കൊണ്ടുദ്ദേശിക്കുന്നത്. ഒരു മിനിമം പ്രാതിനിധ്യമാണ് സംവരണം ഉറപ്പാക്കാൻ ശ്രമിക്കുന്നത്. അതു മാത്രമാണ്.

നിരവധിയായ വിവേചനങ്ങൾ നമ്മുടെ സമൂഹത്തിൽ നിലനിൽക്കുന്നതിനാൽ നിലവിൽ ഭാഷാന്യൂനപക്ഷങ്ങൾ, മതന്യൂനപക്ഷങ്ങൾ, ഭൂമിശാസ്ത്രപരമായ പ്രശ്നങ്ങൾ അനുഭവിക്കുന്നവർ, ട്രാൻസ്ജെൻഡർ വിഭാഗത്തിലുള്ളവർ, ആംഗ്ലോ-ഇന്ത്യൻ വിഭാഗത്തിലുള്ളവർ, വിവിധ ഗോത്രവിഭാഗങ്ങൾ, വിവിധ ജാതികൾ, ഭിന്നശേഷിക്കാർ തുടങ്ങി വിവിധതരം സംവരണങ്ങൾ നിലവിലുണ്ട്. അത് ലക്ഷദ്വീപിലെ മുക്കുവരും വടക്കുകിഴക്കേ ഇന്ത്യയിലെ തോട്ടം തൊഴിലാളികളായ ഗോത്രവിഭാഗക്കാരും കാർഗിലിലെ മുസ്ലിങ്ങളും കൊച്ചിയിലെ ട്രാൻസ്ജെൻഡർ സുഹൃത്തുക്കളും അടക്കമുള്ളവരുടെ പ്രാതിനിധ്യപ്രശ്നവും വേദനയും അഭിമുഖീകരിക്കാനുള്ള ചെറിയ ശ്രമങ്ങൾ കൂടിയാണ്. 

സംവരണത്തിന്റെ ശേഷിയും ശേഷിക്കുറവും

പൊതുസമൂഹവും ഭരണകൂടവും അത്രമേൽ വലതുപക്ഷത്തേക്ക് നീങ്ങിയിട്ടും ചെറിയതോതിലെങ്കിലും പാർശ്വവൽകൃതവിഭാഗങ്ങൾ പ്രാതിനിധ്യം നേടിയെടുത്തതിൽ നിലവിലെ സംവരണപരിപാടികൾ വലിയ പങ്കുവഹിച്ചിട്ടുണ്ട്. അത്തരത്തിലുള്ള സംവരണപരിപാടികളുടെ ഗുണഭോക്താക്കളാണ് ഈ എഴുതുന്ന ലേഖകരും.

എന്നാൽ കൂടുതൽ പരിശോധിക്കുമ്പോൾ ചില പ്രബലജാതികളും വിഭാഗങ്ങളും ആണ് ഓരോ കാറ്റഗറിയിലും സംവരണാനുകൂല്യങ്ങൾ താരതമ്യേന കൂടുതലായി നേടിയെടുക്കുന്നതെന്നു കാണാം. ഉന്നതവിദ്യാഭ്യാസ-തൊഴിൽ മേഖലകളിലെ പട്ടികജാതി സംവരണത്തിൽ മഹർ ജാതി വിഭാഗത്തിൽ പെടുന്നവരുടെ വലിയതോതിലുള്ള പ്രാതിനിധ്യവും, ഇതര ജാതിവിഭാഗങ്ങളിൽ നിന്നുള്ളവർക്ക് ആനുപാതികമായി ഈ സംവരണ സീറ്റുകളിൽ എത്തിപ്പെടാൻ ആവാത്തത് ഇതിനൊരു ഉദാഹരണമാണ്. സിവിൽ സർവീസിൽ പട്ടികവർഗവിഭാഗത്തിൽ മീണ വിഭാഗങ്ങളുടെ വലിയതോതിലുള്ള പ്രാതിനിധ്യവും മേല്പറഞ്ഞ സാഹചര്യത്തിനൊരുദാഹരണമാണ്. കേരളത്തിലും സമാനമായ സാഹചര്യം നിലനിൽക്കുന്നുണ്ട്. ഉദാഹരണത്തിന് കുറിച്യ-കുറുമ വിഭാഗങ്ങൾ പട്ടികവർഗ സംവരണവിഭാഗത്തിലെ സീറ്റുകൾ  കൂടുതലായി നേടുകയും എന്നാൽ ജനസംഖ്യാപരമായി, താരതമ്യേന വലിയ ഗോത്രവിഭാഗമായ പണിയർക്ക് അത് നേടാൻ കഴിയാത്തതുമായ ഒരവസ്ഥയുണ്ട്.

സംവരണാവകാശങ്ങൾ നേടിത്തുടങ്ങിയ ജാതികളും കുടുംബങ്ങളും, തുടർച്ചയായി അത് നേടാനും സംവരണവിഭാഗത്തിലെ ഇതരജാതിവിഭാഗങ്ങൾ പിന്നിലാവാനും തന്നെയാണ് സാധ്യതയുള്ളത്. ജാതിക്കു പുറത്ത് മറ്റു പ്രിവിലേജുകൾ അനുഭവിക്കാൻ അവസരം ഉണ്ടായ വിഭാഗങ്ങൾക്കാണ് ഈ രീതിയിൽ സംവരണാവകാശങ്ങൾ കൂടുതലായി ഉപകാരപ്പെട്ടു തുടങ്ങിയതെന്നു കാണാം. ബ്രിട്ടീഷ് ഭരണകാലത്തു തന്നെ തൊഴിലിനും വിദ്യാഭ്യാസത്തിനും മറ്റു പട്ടികജാതി വിഭാഗങ്ങളെക്കാൾ അവസരം ലഭിച്ചിരുന്ന മഹറുകൾ, ഭൂവുടമകളായിത്തീർന്ന കുറിച്യരുമൊക്കെ അങ്ങനെയാണ് സംവരണ സീറ്റുകളിൽ തുടർച്ചയായി വിജയിച്ചു കൊണ്ടിരിക്കുന്നത്. അതായത് ജാതി അല്ലെങ്കിൽ ഗോത്രങ്ങൾക്ക് കാറ്റഗറി അടിസ്ഥാനത്തിൽ നൽകുന്ന നിലവിലെ സംവരണവ്യവസ്ഥകൾ, ആ കാറ്റഗറിയിലുള്ള എല്ലാവരുടെയും പ്രാഥമികമായ പ്രാതിനിധ്യപ്രശ്നത്തെ പരിഹരിക്കാൻ പര്യാപ്തമല്ല എന്നുവേണം മനസ്സിലാക്കാൻ.

സ്വാതന്ത്ര്യത്തിന്റെ ഏഴ് പതിറ്റാണ്ടിനു ശേഷവും പല മേഖലകളിലും വലിയ തോതിൽ സംവരണ സീറ്റുകൾ ഒഴിഞ്ഞു കിടക്കുകയാണ്. കുറഞ്ഞത് സംവരണ സീറ്റുകളിലേക്ക് എങ്കിലും പാർശ്വവൽകൃതവിഭാഗങ്ങൾ എത്തിപ്പെടണമെങ്കിൽ ഘടനാപരമായ മറ്റ് പല മാറ്റങ്ങളും സമൂഹത്തിൽ ആവശ്യമാണ്. അതായത് സംവരണം എന്ന ഒരൊറ്റ പദ്ധതി കൊണ്ട് പരിഹരിക്കാൻ ആവുന്നതല്ല പ്രാതിനിധ്യപ്രശ്നം.  

കൂടാതെ ലേബർ ബ്യൂറോയുടെ കണക്കുകൾ പരിശോധിച്ചാൽ 2016-17 കാലയളവിൽ ഇന്ത്യയിലെ പൊതുമേഖലാ തൊഴിൽ ശേഷി 1.76 കോടിയാണ്. ഇതിൽ നാല്പത്തിനാലു ലക്ഷം താത്കാലികജീവനക്കാരും ആണ്. ഇവിടെ സംവരണം പൂർണതോതിൽ വിജയകരമായി നടപ്പാക്കാനായാൽ പോലും ഏതാനും ലക്ഷം പേർക്ക് മാത്രമാണ് തൊഴിലുണ്ടാവുന്നത്. സ്വകാര്യമേഖലയിൽ സംവരണം വരാത്ത കാലത്തോളം നിലവിലെ സംവരണം രാജ്യത്തെ തൊഴിൽ മേഖലയിലെ പ്രാതിനിധ്യപ്രശ്നത്തെ നേരിടാൻ ശേഷിയുള്ള വിജയകരമായ സമാശ്വാസപദ്ധതിയായി വളരുന്നില്ല. 

സംവരണം ദാരിദ്ര്യനിർമാർജനപദ്ധതി അല്ല?

ജാതീയമായ പരിഹാസങ്ങൾ തെറ്റാണെന്ന തിരിച്ചറിവ് ഉള്ളപ്പോൾ തന്നെ പരിഹാസ രൂപേണ ചിലർ പറയാറുള്ള ഒരു വാചകമാണ് 'സംവരണം ദാരിദ്ര്യ നിർമാർജന പദ്ധതിയല്ല' എന്നത്. പക്ഷേ,  ഭൂരിപക്ഷം ജനങ്ങളും കടുത്തദാരിദ്ര്യത്തിൽ കഴിയുന്ന ഒരു രാജ്യത്ത് ജാതി മാത്രമല്ല ദാരിദ്ര്യവും ഒരുതരത്തിലും പരിഹസിക്കപ്പെടാൻ പാടില്ലാത്ത യാഥാർഥ്യമാണ്. ദാരിദ്ര്യനിർമാർജനപദ്ധതികൾ ഇല്ലായിരുന്നുവെങ്കിൽ ഞങ്ങളെപ്പോലെ നിരവധി ദളിത് വിദ്യാർത്ഥികൾ സംവരണ സീറ്റുകളിലേക്ക് പോലും എത്തുകയില്ലായിരുന്നു. അതായത് ദാരിദ്ര്യനിർമാർജനപദ്ധതികൾ ഇല്ലാത്ത ലോകത്ത് കേവലമായ ജാതിസംവരണം വലിയ പരാജയം മാത്രമായിരിക്കും കൂടുതൽ സംശയങ്ങൾ ഉള്ളവർ ദാരിദ്ര്യനിർമാർജനപദ്ധതികൾ വലിയ പരാജയമായ ഇടങ്ങളിൽ നിന്നും ആരൊക്കെ എത്രയൊക്കെ ഉന്നതവിദ്യാഭ്യാസത്തിന് എത്തിച്ചേരുന്നു എന്ന് പഠിക്കാൻ തയ്യാറാവണം.

എങ്കിലും നിലവിലെ സാമ്പത്തികക്രമത്തിൽ ദാരിദ്ര്യനിർമാർജനപദ്ധതികൾ കൊണ്ടുമാത്രം ദാരിദ്ര്യവും സംവരണപദ്ധതികൾ കൊണ്ടുമാത്രം ജാതി പ്രശ്നവും പരിഹരിക്കാനാവില്ല എന്ന് തിരിച്ചറിയുമ്പോൾ തന്നെ, ഈ പദ്ധതികൾ വഹിക്കുന്ന പുരോഗമനപരമായ പങ്ക് നാം അടയാളപ്പെടുത്താതെയും പോകരുത്. 

പ്രാതിനിധ്യവും സാമ്പത്തികാസമത്വവും തമ്മിൽ ബന്ധമുണ്ടോ?

വിവിധ തൊഴിൽ മേഖലകളിൽ എങ്ങനെയാണ് സമ്പന്നരുടെ പ്രാതിനിധ്യം എന്ന് കേരളത്തിൽ നിന്നു തന്നെയുള്ള ഉദാഹരണങ്ങൾ എടുത്തു പരിശോധിക്കാം. കേരള ശാസ്ത്രസാഹിത്യ പരിഷത്തിന്റെ 2006ലെ കേരളപഠനമനുസരിച്ച് ജനസംഖ്യയുടെ 8.8 ശതമാനം മാത്രമാണ് സമ്പന്നർ. എന്നാൽ കോളേജധ്യാപകരുടെ കണക്കെടുത്താൽ 56.0 ശതമാനം പേരും വരുന്നത് ഈ 8.8 ശതമാനം വരുന്നസമ്പന്നവിഭാഗത്തിൽ നിന്നാണ്. ഡോക്റ്റർമാരിൽ 91.7 ശതമാനം സമ്പന്നരാണ്. അതായത് സമ്പന്നരല്ലാത്ത 91.2 ശതമാനം ജനങ്ങൾക്കിടയിൽ 8.3 ശതമാനം ഡോക്റ്റർമാർ മാത്രമാണ് ഉള്ളത്.

ചിത്രം 1: കേരളത്തിലെ വിവിധ തൊഴിൽമേഖലകളിലെ സമ്പന്നരുടെ പ്രാതിനിധ്യം. കേരള പഠനം, KSSP 2006

ഇനി സർക്കാർ ജോലി തന്നെ പരിശോധിക്കാം 8.6 ശതമാനം വരുന്ന ധനികനാണ് 31.1 ശതമാനം സർക്കാർ ജോലിയും കയ്യടക്കി വെച്ചിരിക്കുന്നത്. 15.1 ശതമാനം വരുന്ന പരമദരിദ്രർക്ക് 2.6 ശതമാനം സർക്കാർ ജോലി മാത്രമാണ് ഉള്ളത്.

ചിത്രം 2: കേരളത്തിലെ സർക്കാർ ജോലികളിൽ വരുമാനാടിസ്ഥാനത്തിലുള്ള  പ്രാതിനിധ്യം. കേരള പഠനം, KSSP 2006

കൂടാതെ ധനികരിൽ അൻപത്തിയെട്ടു ശതമാനത്തിനും ഉന്നതവിദ്യാഭ്യാസമുള്ളപ്പോൾ പരമദരിദ്രരായ 3.5 ശതമാനത്തിന് മാത്രമാണ് ഈ നേട്ടം ഉണ്ടാവുന്നത്.

ചിത്രം 3: കേരളത്തിലെ ഉന്നതവിദ്യാഭ്യാസമേഖലയിലെ വരുമാനാടിസ്ഥാനത്തിലുള്ള പ്രാതിനിധ്യം. കേരള പഠനം, KSSP 2006

അതായത് ഇക്കാലമത്രയും ദാരിദ്ര്യനിർമാർജനപദ്ധതികൾ ഉണ്ടായിരുന്നിട്ടു പോലും പരമദരിദ്രർ ഏകദേശം അഞ്ചിൽ നാലുപേരും സർക്കാർ ജോലിയുടെയും ഉന്നതവിദ്യാഭ്യാസത്തിന്റെയും നാലുകെട്ടിന് പുറത്തു തന്നെയാണ്.

ഒന്നുകൂടി കൃത്യമായി പറഞ്ഞാൽ, സാമുദായികമായി തീവ്രമായ പ്രാതിനിധ്യപ്രശ്നം നിലനിൽക്കുന്ന കേരളസമൂഹം സാമ്പത്തികമായി കൂടിയും ഇതേ പ്രശ്നം അഭിമുഖീകരിക്കുന്നുണ്ട് എന്നാണ്. പ്രാതിനിധ്യത്തിൽ വിവേചനം നേരിടുന്ന പരമദരിദ്രരെ കൂടെക്കൂട്ടാൻ സംവരണം പോലുള്ള ആശ്വാസപദ്ധതികൾ അനിവാര്യമാണ് എന്ന യാഥാർത്ഥ്യത്തിലേക്കാണ് കണക്കുകൾ വിരൽ ചൂണ്ടുന്നത്. 

മുന്നാക്കക്കാരിലെ പിന്നാക്കക്കാരെ പ്രത്യേകം പരിഗണിക്കേണ്ട ആവശ്യമുണ്ടോ?

സാമൂഹ്യവിഭാഗങ്ങൾക്കകത്തുതന്നെ സാമ്പത്തികമായി പല തട്ടുകൾ രൂപംകൊള്ളുകയും ഇവയിലെ മേൽത്തട്ട് അവസരങ്ങൾ കയ്യടക്കുകയും ചെയ്യുന്നുണ്ട്. അതുകൊണ്ടാണ് ഒബിസി സംവരണത്തിൽ നിശ്ചിതവരുമാനത്തിനും മുകളിലുള്ളവരെ പ്രാഥമികസംവരണത്തിൽ നിന്ന് മാറ്റി നിർത്തുന്ന ക്രീമിലയർ സംവിധാനം നിലവിലുള്ളത്. ഇഎംഎസ് അധ്യക്ഷനായ ഒന്നാം കേരള ഭരണപരിഷ്കാര കമ്മീഷൻ 1958ൽ ആദ്യമായി ഒബിസി സംവരണം എന്ന ആശയം അവതരിപ്പിച്ചപ്പോഴും, 1971ൽ നെട്ടൂർ ദാമോദരൻ കമ്മീഷൻ നടത്തിയ പഠനവും, 1976ൽ കർപൂരി ഠാക്കൂർ മുഖ്യമന്ത്രിയായിരിക്കെ ബീഹാറിൽ നടപ്പാക്കാൻ ശ്രമിച്ച OBC സംവരണപ്രവർത്തനങ്ങളിലും പിന്നീട് മണ്ഡൽ കമ്മീഷൻ റിപ്പോർടും ഇന്ത്യൻ പാർലമെന്റും ശേഷം സുപ്രീംകോടതിയും ഒരുപോലെ അംഗീകരിച്ച വസ്തുതയാണിത്.

OBC വിഭാഗത്തിൽ സമ്പത്തിന്റെ വിതരണവും തട്ടുകളുടെ രൂപീകരണവും നിലനിൽക്കുന്നു എന്നത് പരക്കെ അംഗീകരിക്കപ്പെട്ടിട്ടുള്ളത് കൊണ്ട് മറ്റു വിഭാഗങ്ങളെ പരിശോധിച്ചാൽ ഇങ്ങനെ വായിച്ചെടുക്കാം.

ചിത്രം 4:  കേരളത്തിലെ ജാതി വിഭാഗങ്ങളിലെ വരുമാനാടിസ്ഥാനത്തിലുള്ള പ്രാതിനിധ്യം. കേരള പഠനം, KSSP 2006

1.എല്ലാ സാമൂഹ്യവിഭാഗങ്ങളിലും സാമ്പത്തികാന്തരമുണ്ട്.

 2. മുന്നോക്ക വിഭാഗങ്ങളിലെ സാമ്പത്തികമായി മുന്നോക്കം നിൽക്കുന്നവരുടെ അനുപാതം ഇതര വിഭാഗങ്ങളെ അപേക്ഷിച്ച് കൂടുതലാണ്.

പൊതുവേ സാമ്പത്തികമായി മുന്നാക്കം നിൽക്കുന്നവർ ജോലിയിലും വിദ്യാഭ്യാസത്തിലും എല്ലാം മൃഗീയമായ മേധാവിത്വം നേടുന്നത് നാം കണ്ടു. നിലവിലിന്നുവരെ, പൊതുവിഭാഗത്തിലെ പ്രാതിനിധ്യത്തെ മിക്കവാറും കയ്യാളുന്നത് സവർണവിഭാഗങ്ങളാണെന്ന കാര്യത്തിൽ സംവരണത്തെ ഗൗരവമായി കാണുന്ന ആർക്കും തർക്കമുണ്ടാവില്ല എന്ന് കരുതുന്നു. (ചിത്രം. 2, 3)

അതായത് പഠനങ്ങളും ജീവിതാനുഭവങ്ങളും നമ്മെ പഠിപ്പിക്കുന്നത് ജനറൽ സീറ്റുകളിൽ ഭൂരിപക്ഷവും കൈയടക്കുന്നത് മുന്നാക്കക്കാരിലെ മുന്നാക്കക്കാരാണ് എന്നാണ്. ജനറൽ ക്വാട്ട കയ്യടക്കാൻ ശേഷിയുള്ള പ്രബലരായ സമ്പന്നവിഭാഗങ്ങൾ സമുദായങ്ങളിൽ ഉണ്ടായതുകൊണ്ട് തൊഴിലിനും വിദ്യാഭ്യാസത്തിനും പ്രാതിനിധ്യം ഉറപ്പാക്കാൻ ആവാതെ പോകുന്നവരെ അതിന് പ്രാപ്തരാക്കുന്ന പദ്ധതികളുടെയും പരിപാടികളുടെയും അനിവാര്യതയിലേക്കാണ് ഇത് വിരൽ ചൂണ്ടുന്നത്. താരതമ്യേന കുറവാണെങ്കിലും മറ്റു വിഭാഗങ്ങളിലെ (പട്ടികജാതി, പട്ടികവർഗ) സാമ്പത്തിക പിന്നാക്കാവസ്ഥ മൂലമുള്ള പ്രാതിനിധ്യപ്രശ്നം ഗൗരവമായി തന്നെ പരിശോധിച്ച് ആവശ്യമായ പദ്ധതികൾ രൂപീകരിക്കേണ്ടത് ആണ്.

എങ്കിലും ആദ്യം തന്നെ EWS നടപ്പാക്കുന്ന സംസ്ഥാനം അല്ലേ കേരളം?

നിലവിലെ വിവരങ്ങളനുസരിച്ച് EWS പരിപാടികൾ പൂർണമായോ ഭാഗികമായോ മറ്റ് മുപ്പത്തിരണ്ട് സംസ്ഥാനങ്ങൾ നടപ്പാക്കിയതിനു ശേഷം മാത്രമാണ് കേരളത്തിൽ ഇത് നടപ്പാക്കുന്നത്.

ചിത്രം 5: ഇന്ത്യയിൽ സംവരണേതരവിഭാഗളിലെ പാവപ്പെട്ടവർക്കായുള്ള സംവരണം നടപ്പിലാക്കിയ സംസ്ഥാനങ്ങൾ. GoI notification, various state government notifications, various UT admin notifications and various news reports during January 2019- October 2020

മമത ബാനർജിയുടെ ബംഗാൾ സർക്കാർ അടക്കമുള്ള ഒട്ടുമിക്കവാറും ഇടങ്ങൾ ബിജെപി നയിക്കുന്ന കേന്ദ്രം മുന്നോട്ടുവെച്ച മാനദണ്ഡങ്ങളെ അതേപടി പിന്തുടരുകയാണ്. കോൺഗ്രസ്സ് സംസ്ഥാന ഗവണ്മെന്റുകൾ പരിശോധനകൾ ഒന്നുമില്ലാതെ കൂടുതൽ വെള്ളം ചേർത്തപ്പോൾ ഇടതുപക്ഷം ഭരിക്കുന്ന കേരളം ഒരു സമിതിയെ നിയോഗിച്ച് പുതിയ മാനദണ്ഡങ്ങൾ ഉണ്ടാക്കിയ ശേഷമാണ് നടപടിയിലേക്ക് നീങ്ങിയത് (താരതമ്യം ചിത്രം 5.)

സംഘപരിവാറിനെ വെല്ലുവിളിക്കുന്ന തരത്തിൽ നിലവിലെ EWS മാനദണ്ഡങ്ങൾ കൂടുതൽ ദുർബലമാക്കി നടപ്പാക്കുകയാണ് കോൺഗ്രസ്സ് ചെയ്തത്. തങ്ങൾ നടപ്പാക്കിയത് പോലെ EWS നടപ്പിലാക്കാൻ ധൈര്യമുണ്ടോ എന്ന് രാജസ്ഥാൻ മുഖ്യമന്ത്രി പരസ്യമായി ബിജെപിയെ വെല്ലുവിളിച്ചതും, ഇപ്പോഴത്തെ UDF ചെയർമാൻ രമേശ് ചെന്നിത്തലയും അവരുടെ പുതിയ കൂട്ടുകാരൻ പി.സി. ജോർജും ശശിധരൻ നായർ കമ്മീഷനു മുന്നിൽ നിർദേശിച്ച ഉയർന്ന വരുമാനമാനദണ്ഡവും കോൺഗ്രസ്സിന്റെ ഔദ്യോഗികനിലപാടിന്റെ തുടർച്ച തന്നെയാണ്. നിലവിൽ സമരമുഖത്ത് മുന്നിൽ നിൽക്കുന്ന മുസ്ലിം ലീഗ് കഴിഞ്ഞ തെരെഞ്ഞെടുപ്പിനെ നേരിട്ടത് EWS എന്ന വാഗ്ദാനം പ്രകടനപത്രികയിൽ വെച്ചു കൊണ്ടാണ് എന്ന വസ്തുത ഇപ്പോഴത്തെ സമരങ്ങളുടെ രാഷ്ട്രീയപാപ്പരത്തം തുറന്നു കാണിക്കുന്നു.

സംവരണവിരുദ്ധർ 1950ലും 1990ലും 2006ലുമൊക്കെ പ്രധാനമായും ഉയർത്തിയത് മെറിറ്റ് vs സംവരണം എന്ന വാദമാണ്. തന്നേക്കാൾ റാങ്ക് (മെറിറ്റ്) കുറഞ്ഞവർ സംവരണം വഴി അനർഹമായ സ്ഥാനമാനങ്ങൾ നേടിയെടുക്കുന്നു എന്ന വലുതുപക്ഷയുക്തി തന്നെയാണ് EWS സാഹചര്യത്തിൽ മതമൗലികവാദികളും ലിബറലുകളും ഏറ്റടുത്തിരിക്കുന്നത്. ഒരർത്ഥത്തിൽ സംഘപരിവാറിന്റെ വിജയമാണിത്.

നിലവിലെ സംവരണതത്വങ്ങൾ അട്ടിമറിക്കപ്പെടുന്നുണ്ടോ?

ലിബറലുകളും സ്വത്വവാദികളും ഉയർത്തുന്ന വാദം, EWS നടപ്പാക്കുന്നത് വഴി ഓപ്പൺ ക്വാട്ട കുറയുന്നത് സംവരണതത്വങ്ങൾക്ക് എതിരാണ് എന്നാണ്. ഉദാഹരണത്തിന് ജനറൽ കാറ്റഗറിയിൽ സീറ്റ് നേടാനുള്ള പട്ടികജാതി വിഭാഗത്തിൽ പെടുന്ന വിദ്യാർത്ഥികളുടെ അവസരം EWS ഇല്ലാതാക്കുന്നു. ഒറ്റനോട്ടത്തിൽ ഈ വാദം ശരിയാണ് എന്ന് തോന്നാം. 

ആദ്യം സംവരണതത്വം തന്നെ എന്താണെന്ന് ഒരിക്കൽക്കൂടി പരിശോധിക്കാം. ഒരുകൂട്ടം ആളുകളെ ജോലിക്കോ വിദ്യാഭ്യാസത്തിനോ ഒക്കെ തെരഞ്ഞെടുക്കുമ്പോൾ, അതിൽ നിർബന്ധമായും ഒരു നിശ്ചിതശതമാനം പാർശ്വവൽക്കരിക്കപ്പെട്ട മനുഷ്യർ ഉണ്ടാകണമെന്നാണ്. അതായത് എന്തൊക്കെയായാലും നൂറിൽ പതിനഞ്ച് പട്ടികജാതിക്കാരും, എട്ട് പട്ടികവർഗക്കാരും, ഇരുപത്തിയേഴ് മറ്റു പിന്നാക്കവിഭാഗക്കാരും എല്ലാം ഉണ്ടാവണം എന്നാണ്. ഒരു മിനിമം പ്രാതിനിധ്യമാണ് സംവരണം ഉറപ്പാക്കാൻ ശ്രമിക്കുന്നത്. അത് മാത്രമാണ്. 

സംവരണതത്വങ്ങളുടെ അട്ടിമറി എന്നാൽ ഈ മിനിമം പ്രാതിനിധ്യം ദുർബലപ്പെടുത്തുക എന്നതാണ്. നിലവിൽ സംവരണം നേടുന്ന വിഭാഗങ്ങളുടെ മിനിമം പ്രാതിനിധ്യത്തിന് ഉള്ള സംവരണ ക്വാട്ട ഒട്ടും കുറയാതെ മറ്റൊരു പിന്നാക്കവിഭാഗത്തിന് സംവരണം നൽകിയാൽ അത് നിലവിലെ സംവരണതത്വങ്ങൾക്ക് എതിരല്ല. ഓപ്പൺ ക്വാട്ടയിൽ നിന്നാണ് പത്തു ശതമാനം EWS സംവരണത്തിന് മാറ്റിവെക്കുന്നത്. ഇത് നിലവിലെ സംവരണവിഭാഗങ്ങളുടെ മിനിമം പ്രാതിനിധ്യത്തെ ബാധിക്കുന്നില്ല. കൂടുതൽ പരിശോധിക്കാം.

പട്ടികജാതി/പട്ടികവർഗ സംവരണം മാത്രം ഉണ്ടായിരുന്ന കാലത്ത് എഴുപത്തിയഞ്ചു ശതമാനത്തിലേറെ ഓപ്പൺ ക്വാട്ട ആയിരുന്നു. ഇത് വെട്ടിമുറിച്ചു കൊണ്ടാണ് ഇരുപത്തിയേഴു ശതമാനം ഒബിസി സംവരണം നിലവിൽ വന്നത്. ഇപ്പോഴത്തെ സ്വത്വവാദ ലിബറൽ കേവലയുക്തി അനുസരിച്ച് ആണെങ്കിൽ, പട്ടികജാതി-പട്ടികവർഗ വിഭാഗങ്ങൾക്ക് കൂടി അവകാശപ്പെട്ട ഇരുപത്തിയേഴു ശതമാനം ഓപ്പൺ സീറ്റുകളാണ് അന്ന് നഷ്ടമായത്. അത്തരത്തിൽ പൊതുവിഭാഗത്തിൽ നിന്നുമെടുത്തുപയോഗിച്ച എല്ലാ സംവരണവും ദളിത്-ആദിവാസി വിരുദ്ധം ആവുമോ? ആവില്ല, കാരണം പട്ടികജാതി/പട്ടികവർഗ വിഭാഗങ്ങളുടെ മിനിമം പ്രാതിനിധ്യത്തെ ആണ് സംവരണതത്വങ്ങൾ ഉറപ്പുനൽകുന്നത്. അത് ദുർബലപ്പെടാതെയാണ് ഒബിസി (എൻ സി) യും മറ്റു സംവരണങ്ങളും നിലവിൽ വന്നത്. അതേതരം സാഹചര്യമാണ് EWS വിഷയത്തിലും ക്വാട്ടയുടെ കാര്യത്തിൽ ഉരുത്തിരിയുന്നത്.

എന്നാൽ ഇന്ത്യയുടെ ചരിത്രത്തിൽ സംവരണതത്ത്വങ്ങളുടെ അട്ടിമറി നടന്നിട്ടുണ്ട്. ഉദാഹരണത്തിന് മഹാരാഷ്ട്രയിൽ മുസ്ലീം വിഭാഗത്തിന്റെ പ്രാതിനിധ്യം ബിജെപി സർക്കാർ വെട്ടിക്കുറച്ചതും പിന്നീട് വന്ന കോൺഗ്രസ്സ് അത് പുനഃസ്ഥാപിക്കാൻ തയ്യാറാവാത്തതുമാണ് സംവരണ തത്വങ്ങളുടെ അട്ടിമറി. മധ്യപ്രദേശിൽ മാറിമാറിവന്ന ബിജെപി, കോൺഗ്രസ്സ് സർക്കാരുകൾ ഒബിസി സംവരണം പൂർണമായി നടപ്പാക്കാത്തതും വലതുപക്ഷം ഭരിക്കുന്ന വിവിധ സംസ്ഥാനങ്ങളിൽ സവർണജാതികൾക്ക് വലിയതോതിൽ ജാതി സംവരണം നൽകുന്നതുമാണ് തത്വങ്ങളുടെ അട്ടിമറി.

വിവാദങ്ങളിൽ നഷ്ടമാവുന്നത്

എതിർക്കുന്നതിനു വേണ്ടി എല്ലാം എതിർക്കുന്നത് മാത്രമാണ് നിലവിൽ നമ്മൾ കാണുന്നത്. യഥാർത്ഥത്തിൽ ഉയർന്നുവരേണ്ട ഗൗരവതരമായ സംവാദങ്ങളെ വഴിതിരിച്ചുവിടാൻ ആണോ നിലവിലെ സംഘടിതപ്രചാരണം എന്ന് സംശയിച്ചു കൊണ്ട് വിവാദങ്ങളിൽ നഷ്ടമാവുന്നു എന്ന് കരുതുന്ന ചില കാര്യങ്ങൾ സൂചിപ്പിക്കാം. 

1.    EWS സംവരണം എന്തുകൊണ്ട് 10 ശതമാനം ആയി? ഒമ്പതോ പതിനൊന്ന് ആവാത്തതിന്റെ സാംഗത്യം എന്താണ്? കൂടുതൽ പഠനങ്ങൾ ആവശ്യമുണ്ടോ?

2.    നിലവിലെ മാനദണ്ഡങ്ങൾ എത്രമാത്രം ശരിയാണ്? ഈ മാനദണ്ഡങ്ങൾ നിശ്ചയിച്ച രീതി എത്രത്തോളം എത്രത്തോളം ശാസ്ത്രീയമാണ്? അഥവാ ഈ മാനദണ്ഡങ്ങൾ തെറ്റാണെങ്കിൽ മറ്റെന്തു മാനദണ്ഡങ്ങൾ ഏത് രീതിയിലാണ് മുന്നോട്ടു വയ്ക്കേണ്ടത്?

3.    സംവരണവ്യവസ്ഥകൾ നിലവിലുണ്ടായിട്ടും കാലങ്ങളായി ഒഴിഞ്ഞു കിടക്കുന്ന കാറ്റഗറി സീറ്റുകളിലേക്കെങ്കിലും പ്രാതിനിധ്യം ഉറപ്പാക്കാൻ എന്തെല്ലാം മാറ്റങ്ങളും പദ്ധതികളുമാണ് ആവശ്യമുള്ളത്?

 4.   ജാതി സംവരണത്തിന് അകത്തുതന്നെ വിവിധ ജാതി വിഭാഗങ്ങൾ നേരിടുന്ന വിവേചനങ്ങൾ പരിഹരിക്കാനുള്ള നൂതനമാർഗങ്ങൾ വളർത്തിയെടുക്കാൻ എന്തു പദ്ധതിയാണ് മുന്നിലുള്ളത്? ഈ വിഷയത്തിൽ സംവാദങ്ങൾ ആരംഭിക്കാൻ സമയമായോ?

 5.   വിവിധ രാഷ്ട്രീയ-സാമൂഹ്യപ്രസ്ഥാനങ്ങളും ചിന്താപദ്ധതികളും വളർത്തിയെടുക്കുന്ന ജാതി ഉന്മൂലനപദ്ധതികൾ എന്താണ്? ഇവർക്കൊക്കെയും കാലങ്ങളായി സംവരണത്തോടുള്ള നിലപാട് എന്താണ്?

 6.   ആകെ ജോലിയുടെ 92 ശതമാനവും അസംഘടിതമേഖലയിലും ഭൂരിപക്ഷവും സ്വകാര്യമേഖലയിലും ആയ ഒരു രാജ്യത്ത് ജാതി അടക്കമുള്ള എല്ലാ സംവരണവും സ്വകാര്യമേഖലയിലേക്ക് വ്യാപിപ്പിക്കാൻ വിമർശകരിൽ എത്രപേർ ആവശ്യപ്പെടുന്നുണ്ട്? ഈ വിഷയം ഉയർത്തി ഇടതുപക്ഷം വിശിഷ്യ സിപിഐ(എം) അല്ലാതെ ആരെങ്കിലും പാർലമെന്റിലും പുറത്തും സമരം ചെയ്യുന്നുണ്ടോ?

 7.   ചരിത്രപരമായി പ്രാതിനിധ്യത്തിൽ പിന്നോക്കം നിൽക്കുന്ന ദളിത് ക്രിസ്ത്യൻ വിഭാഗം അടക്കം സംവരണത്തിന് അർഹതയുള്ള എന്നാൽ നിലവിലെ മാനദണ്ഡങ്ങൾ പ്രകാരം സംവരണം ലഭ്യമല്ലാത്ത, വിഭാഗങ്ങൾക്ക് കൂടി ദേശീയാടിസ്ഥാനത്തിൽ സംവരണം ഏർപ്പെടുതേണ്ടതല്ലേ?

*

രാമദാസ് പ്രിനി ശിവാനന്ദൻ, ജിഷ്ണുദാസ് കെ എസ് 

റ്റാറ്റാ ഇൻസ്റ്റിസ്റ്റ്യൂട്ട് ഓഫ് സോഷ്യൽ സയൻസസിലെ സ്കൂൾ ഓഫ് ഡെവെലപ്മെന്റ് സ്റ്റഡീസിലെ ഗവേഷകവിദ്യാർത്ഥികളാണ് രാമദാസും ജിഷ്ണുദാസും. ചായത്തോട്ട തൊഴിലാളികളും ട്രേഡ് യൂണിയനുകളുമെന്ന വിഷയത്തിലാണ് രാമദാസ് ഗവേഷണം നടത്തുന്നത്. മലബാറിന്റെ വിദ്യാഭ്യാസചരിത്രത്തെക്കുറിച്ചാണ് ജിഷ്ണുദാസിന്റെ ഗവേഷണം.

അവലംബങ്ങൾ

    കേരള പഠനം, കേരള ശാസ്ത്രസാഹിത്യ പരിഷത്ത്. web] [archive]

    All India survey on higher education 2018-2019, Institution by the Ministry of Human Resource Development, Government of India.

    Reservation Policy and the Plight of Matangs in Maharashtra, B. S. Waghmare, 2010.

    Reservations within Reservations: A Solution, Anand Teltumbde, 2009.

    Report of the Commission Constituted for Recommending the Criteria for Identifying the Economically Weaker Sections (EWSs) in the General Category in Kerala.

    Class and Caste in ‘Creamy Layer’ Controversy, EMS. 1995

(ബോധി കോമണ്‍സ് പ്രസിദ്ധീകരിച്ചത്)

Wednesday, October 28, 2020

സംവരണം: വര്‍ഗീയ ധ്രുവീകരണം അപലപനീയമെന്ന് സിപിഐ എം

 മുന്നോക്ക വിഭാഗങ്ങളിലെ സാമ്പത്തികമായി പിന്നോക്കം നില്‍ക്കുന്നവര്‍ക്ക് പത്ത് ശതമാനം സംവരണം ഏര്‍പ്പെടുത്തിയ ഭരണഘടനാ ഭേദഗതി നടപ്പിലാക്കുന്നതിനെ  വര്‍ഗ്ഗീയ ധ്രുവീകരണത്തിനും രാഷ്ട്രീയ താല്‍പര്യങ്ങള്‍ക്കും വേണ്ടി ഉപയോഗിക്കുന്നത് അപലപനീയമാണെന്ന് സിപിഐ എം സംസ്ഥാന സെക്രട്ടറിയേറ്റ്. നിലവിലുള്ള സംവരണാനുകൂല്യങ്ങളില്‍ കുറവൊന്നും വരുത്താതെയാണ് മുന്നോക്ക സംവരണം നടപ്പിലാക്കുന്നത്. ഭരണഘടന ഭേദഗതിയോടെ സംവരണം 60 ശതമാനമായി മാറി. ഇതില്‍ 50 ശതമാനം നിലവിലുള്ള സംവരണ വിഭാഗങ്ങള്‍ക്കും പത്തു ശതമാനം മുന്നോക്ക വിഭാഗങ്ങള്‍ക്കുമായിരിക്കും. ഈ പുതിയ രീതി നടപ്പിലാക്കുമ്പോള്‍ നിലവിലുള്ള സംവരണാനുകൂല്യത്തില്‍ ഒരു കുറവും ഇല്ലാതിരിക്കാനുള്ള ജാഗ്രത സര്‍ക്കാര്‍ പുലര്‍ത്തുകയും ചെയ്യും.

സംവരണ പ്രശ്‌നത്തില്‍ സിപിഐ എമ്മിന് സുവിദിതമായ നിലപാടുണ്ട്. പിന്നോക്കക്കാരിലെ സംവരണത്തിന് സാമ്പത്തികമായി പുറകില്‍ നില്‍ക്കുന്ന ജനവിഭാഗങ്ങള്‍ക്ക് മുന്‍ഗണന നല്‍കണമെന്ന നിലപാട് സിപിഐ എം ആദ്യമേ സ്വീകരിച്ചിരുന്നു. ക്രീമിലെയര്‍ വിഭാഗത്തില്‍പ്പെടാത്തവര്‍ ഇല്ലാതെ വന്നാല്‍ അതേ വിഭാഗത്തില്‍പ്പെട്ട ക്രീമിലെയറുകാരേയും പരിഗണിക്കാന്‍ ആവശ്യമായ ഭരണഘടന ഭേദഗതി വരുത്തണം എന്നും ആവശ്യപ്പെട്ടു.  രാജ്യത്ത് മുതലാളിത്ത നയം നടപ്പിലാക്കുന്നതിന്റെ കൂടി ഭാഗമായി മുന്നോക്കക്കാരില്‍ സാമ്പത്തികമായി പിന്നോക്കം നില്‍ക്കുന്ന വലിയൊരു വിഭാഗം സൃഷ്ടിക്കപ്പെട്ടിട്ടുണ്ട്. അവര്‍ക്ക് പത്തു ശതമാനം സംവരണം നല്‍കുന്നതിനായും ഭരണഘടന ഭേദഗതി ചെയ്യണമെന്നും പാര്‍ടി ആവശ്യപ്പെട്ടിരുന്നു. കഴിഞ്ഞ നിയമസഭ തെരഞ്ഞെടുപ്പിലെ പ്രകടന പത്രികയില്‍ ഇടതുപക്ഷ ജനാധിപത്യ മുന്നണി മുന്നോക്കക്കാരിലെ പിന്നോക്കക്കാര്‍ക്ക് സംവരണം ഏന്ന നിലപാട് പ്രഖ്യാപിച്ചിരുന്നു. ആ കാഴ്ചപാടിന് അനുസൃതമായാണ് ഭരണഘടന ഭേദഗതി പാര്‍ലമെന്റ് പാസാക്കിയത്.

മുസ്ലീം ലീഗ് ഉള്‍പ്പെടെയുള്ള യുഡിഎഫും 2011 ലെ തെരഞ്ഞെടുപ്പ് പ്രകടന പത്രികയില്‍ മുന്നോക്ക സംവരണം ഉള്‍പ്പെടുത്തിയിരുന്നു. എന്നാല്‍, ഇപ്പോള്‍ വര്‍ഗ്ഗീയ ധ്രുവീകരണത്തിനായി മുസ്ലീംലീഗ്, ജമാ-അത്തെ ഇസ്ലാമിയുടെ നേതൃത്വത്തില്‍ വിവാദം സൃഷ്ടിക്കാന്‍ ശ്രമിക്കുന്നത് തിരിച്ചറിയണമെന്നും  സംസ്ഥാന സെക്രട്ടറിയേറ്റ് പ്രസ്താവനയില്‍ അഭ്യര്‍ത്ഥിച്ചു.

സംവരണം: യുഡിഎഫില്‍ വ്യത്യസ്ത നിലപാടുണ്ടെന്ന് കുഞ്ഞാലിക്കുട്ടി

മലപ്പുറം > മുന്നോക്ക സംവരണ വിഷയത്തില്‍ യുഡിഎഫില്‍ വ്യത്യസ്ത നിലപാടുണ്ടെന്ന് ദേശീയ ജനറല്‍ സെക്രട്ടറി പി കെ കുഞ്ഞാലിക്കുട്ടി എംപി വാര്‍ത്താസമ്മേളനത്തില്‍ പറഞ്ഞു. സംവരണ കാര്യത്തില്‍ ലീഗിന് ലീഗിന്റെതായ നിലപാടുണ്ട്. കോണ്‍ഗ്രസിന് അവരുടെതായ നിലപാടുണ്ടാകും. ലീഗ് നേരത്തെയും വ്യത്യസ്തമായ നിലപാട് സ്വീകരിച്ചിട്ടുണ്ട്. ഇത് യുഡിഎഫിനെ ബാധിക്കില്ല. സംവരണവുമായി ബന്ധപ്പെട്ട കൂടുതല്‍ ചോദ്യങ്ങള്‍ക്ക് മറുപടി പറയാന്‍ അദ്ദേഹം തയ്യാറായില്ല. നിലപാടുകള്‍ മറ്റൊരു അവസരത്തില്‍ അറിയിക്കാമെന്ന് പറഞ്ഞ് കൂടുതല്‍ ചോദ്യങ്ങളില്‍ നിന്ന് അദ്ദേഹം ഒഴിഞ്ഞുമാറി.

ലീഗിന്റെ വര്‍ഗീയത പുറത്തുവെന്ന് വിമര്‍ശിച്ച് സീറോ മലബാര്‍ സഭ ചങ്ങനാശേരി അതിരൂപത ആര്‍ച്ച് ബിഷപ് ജോസഫ് പെരുന്തോട്ടം എഴുതിയ ലേഖനത്തെക്കുറിച്ച് പ്രതികരിക്കാനും കുഞ്ഞാലിക്കുട്ടി തയ്യാറായില്ല. സംസ്ഥാന ജനറല്‍ സെക്രട്ടറി കെ പി എ മജീദും പങ്കെടുത്തു.

Tuesday, October 27, 2020

സംവരണം: പ്രകടനപത്രികയില്‍ തന്നെ നയം വ്യക്തമാക്കി; ഒരാളുടെ ആനുകൂല്യത്തെയും ഇല്ലാതാക്കുന്നില്ല: മുഖ്യമന്ത്രി

 സംവരണത്തെ സംബന്ധിച്ച നയം ഇടതുപക്ഷ ജനാധിപത്യമുന്നണി അതിന്റെ പ്രകടനപത്രികയില്‍ വ്യക്തമാക്കിയതാണെന്ന് മുഖ്യമന്ത്രി പിണറായി വിജയന്‍. ആരുടെയും സംവരണം ഇല്ലാതായിട്ടില്ല. ഒരാളുടെ സംവരണ ആനുകൂല്യത്തേയും ഇല്ലാതാക്കുകയുമില്ല. മറിച്ച് പിന്നോക്ക വിഭാഗങ്ങള്‍ക്കുള്ള സംവരണം ഉറപ്പാക്കാനും പുതിയ മേഖലകളില്‍ അവര്‍ക്ക് പ്രാതിനിധ്യം നല്‍കാനുമാണ് സര്‍ക്കാര്‍ ശ്രമിച്ചതെന്ന് മുഖ്യമന്ത്രി പറഞ്ഞു.

വീഡിയോ

കഴിഞ്ഞ നിയമസഭാ തെരഞ്ഞെടുപ്പില്‍ ഇടതുപക്ഷ ജനാധിപത്യമുന്നണിയുടെ  പ്രകടനപത്രികയില്‍ 579-ാമത് നിര്‍ദ്ദേശമായി ഇങ്ങനെ രേഖപ്പെടുത്തുന്നുണ്ട്.

'സാമൂഹ്യമായി പിന്നോക്കം നില്‍ക്കുന്ന ജനവിഭാഗങ്ങളെ കൈപിടിച്ചുയര്‍ത്തുന്നതിനുള്ള സംവരണത്തെ അട്ടിമറിക്കുന്നതിനുള്ള പരിശ്രമമാണ് ആര്‍എസ്എസ് നടത്തിക്കൊണ്ടിരിക്കുന്നത്. പട്ടികജാതി പട്ടികവര്‍ഗ്ഗ വിഭാഗക്കാര്‍ക്കും വിദ്യാഭ്യാസപരമായും സാമൂഹ്യമായും പിന്നോക്കം നില്‍ക്കുന്ന ജനവിഭാഗങ്ങള്‍ക്കും സര്‍ക്കാര്‍ ഉദ്യോഗങ്ങളില്‍ ഇന്നുള്ള തോതില്‍ സംവരണം തുടരുമെന്ന നയത്തില്‍ എല്‍.ഡി.എഫ് ഉറച്ചുനില്‍ക്കുന്നു. ഓരോ സമുദായത്തിനും അര്‍ഹതപ്പെട്ട സംവരണാനുകൂല്യം മുഴുവന്‍ അവര്‍ക്കു തന്നെ കിട്ടുമെന്ന് ഉറപ്പുവരുത്തേണ്ടതാണ്. അതോടൊപ്പം മുന്നോക്കസമുദായങ്ങളിലെ പാവപ്പെട്ടവര്‍ക്ക് 10% സംവരണം ഏര്‍പ്പെടുത്തുകയും വേണം. ഈ രണ്ടു കാര്യങ്ങളും നടപ്പില്‍ വരുത്തുവാന്‍ ഉചിതമായ ഭരണഘടനാ ഭേദഗതി ആവശ്യമാണ്. ഇത്തരമൊരു ഭരണഘടനാഭേദഗതി നടപ്പില്‍വരുത്താന്‍ എല്‍ഡിഎഫ് പരിശ്രമിക്കുന്നതായിരിക്കും.'

സംവരണത്തെ സംബന്ധിച്ച ഈ നയമാണ് ഇടതുപക്ഷ ജനാധിപത്യമുന്നണി അതിന്റെ പ്രകടനപത്രികയില്‍ വ്യക്തമാക്കിയത്. അതായത് നിലവിലുള്ള സംവരണം അതേപോലെ നിലനിര്‍ത്തണം എന്ന സമീപനം മുന്നോട്ടുവച്ചു. അതു തുടരുമ്പോള്‍ തന്നെ മുന്നോക്ക സമുദായത്തിലെ പാവപ്പെട്ടവര്‍ക്ക് 10% സംവരണം ഏര്‍പ്പെടുത്തണമെന്നുമാണ് പറഞ്ഞത്. ഇത്തരമൊരു സ്ഥിതിയുണ്ടാകണമെങ്കില്‍ ഭരണഘടനാ ഭേദഗതി അനിവാര്യമാണ്. അതിന്റെ അടിസ്ഥാനത്തില്‍ പാര്‍ലമെന്റില്‍ ഭരണഘടനാഭേദഗതി കൊണ്ടുവന്നു. ഇന്ത്യയിലെ കോണ്‍ഗ്രസും ഇടതുപക്ഷവുമുള്‍പ്പെടെയുള്ള രാഷ്ട്രീയ പാര്‍ട്ടികള്‍ ഈ ബില്ലിനെ പിന്തുണച്ചു. സന്നിഹിതരായിരുന്ന 326 അംഗങ്ങളില്‍ 323 പേരും അനുകൂലിച്ച് വോട്ട് ചെയ്ത് പാസാക്കിയ നിയമമാണ് ഇത്. ആ നിയമമാണ് ഇപ്പോള്‍ കേരളത്തില്‍ നടപ്പിലാക്കുന്നത്. രാജ്യത്താകെ ബാധകമായ നിയമമാണിത്. ഇതിന്റെ പേരില്‍ സര്‍ക്കാരിനെതിരെ പ്രക്ഷോഭം നയിക്കുന്നവര്‍ ഈ യാഥാര്‍ത്ഥ്യത്തെ ഉള്‍ക്കൊള്ളേണ്ടതുണ്ട്.

നിലവിലുള്ള ഒരു വിഭാഗത്തിന്റെയും സംവരണത്തെ ഈ നിയമം ഹനിക്കുന്നില്ല. മുന്നോക്ക വിഭാഗത്തിലെ സാമ്പത്തികമായി പിന്നോക്കം നില്‍ക്കുന്ന വിഭാഗങ്ങള്‍ക്ക് പൊതു മത്സര വിഭാഗത്തില്‍നിന്ന് 10% നീക്കി വയ്ക്കുകയാണ് ഉണ്ടായിട്ടുള്ളത്. നിലവിലുള്ള സംവരണ വിഭാഗങ്ങള്‍ക്ക് അതേ ആനുകൂല്യം തുടരുന്നുണ്ടെന്നും മുഖ്യമന്ത്രി വ്യക്തമാക്കി.

Sunday, October 25, 2020

ചരിത്രത്തിലാദ്യം; ഫയർ ആൻഡ്‌ റെസ്‌ക്യൂ ഹോം ഗാർഡുകളായി സ്ത്രീകളെ നിയമിക്കാൻ ഉത്തരവായി

 ചരിത്രത്തിലാദ്യമായി ഫയർ ആൻഡ്‌ റെസ്‌ക്യൂ സർവീസിൽ ഹോം ഗാർഡുകളായി സ്ത്രീകളെ നിയമിക്കാൻ ഉത്തരവായതായി മുഖ്യമന്ത്രി പിണറായി വിജയൻ. അതിനുപുറമേ, 30% വനിതാസംവരണവും സ്ത്രീകൾക്കായി ഉറപ്പാക്കി.

അഗ്നിരക്ഷാ വകുപ്പിലും പൊലീസിലും നിയമിക്കുന്ന ഹോം ഗാർഡുകളെ നിലവിൽ ദുരന്തസ്ഥലങ്ങളിൽ രക്ഷാ പ്രവർത്തനത്തിന്‌ നിയോഗിച്ചു വരുന്നുണ്ട്‌. സ്ത്രീ ശാക്തീകരണത്തിനായ് നിരവധി പദ്ധതികളാണ് സർക്കാർ ഇതിനോടകം നടപ്പിലാക്കിയത്. ആ നയത്തിൻ്റെ ഭാഗമായാണ് ഹോം ഗാർഡുകളായി സ്ത്രീകളെ നിയമിക്കാനും സംവരണം ഏർപ്പെടുത്താനും തീരുമാനിച്ചതെന്നും മുഖ്യമന്ത്രി പറഞ്ഞു.

Wednesday, October 21, 2020

മുന്നോക്ക സംവരണത്തിന്റെ പേരിൽ കുപ്രചാരണം അടിസ്ഥാനരഹിതം

 മുന്നോക്ക വിഭാഗങ്ങളിലെ സാമ്പത്തികമായി പിന്നോക്കം നിൽക്കുന്നവർക്ക്‌ പത്ത്‌ ശതമാനം സംവരണം നൽകാനുള്ള തീരുമാനത്തിന്റെ പേരിൽ സംസ്ഥാന സർക്കാരിനെതിരെ പ്രചാരണം നടത്തുന്ന ചില മാധ്യമങ്ങളുടെ നീക്കം അടിസ്ഥാനരഹിതം.

നിലവിലുള്ള സംവരണ  വ്യവസ്ഥയെ ഒരുതരത്തിലും ബാധിക്കാതെയാകണം സാമ്പത്തികമായി പിന്നോക്കാവസ്ഥയിലുള്ളവർക്ക്‌ സംവരണം അനുവദിക്കേണ്ടതെന്ന വ്യക്തമായ നിലപാടാണ്‌ സർക്കാരിന്‌. നിലവിലുള്ള 100 ശതമാനം ഒഴിവുകളിൽ പത്ത്‌ ശതമാനം ഇതിനായി മാറ്റിവയ്‌ക്കുമെന്നും ശേഷിക്കുന്ന 90 ശതമാനത്തിൽനിന്നാകും നിലവിലുള്ള സാമുദായിക സംവരണമെന്നുമുള്ള നിഗമനം  തെറ്റാണ്‌. വിവിധ വിഭാഗങ്ങൾക്കായി നീക്കിവച്ചിരിക്കുന്ന 50 ശതമാനം സംവരണം അതേപടി തുടരും. തുടർന്ന്‌ ഓപ്പൺ ക്വോട്ടയിലുള്ള 50 ശതമാനത്തിൽനിന്നാണ്‌ സാമ്പത്തിക പിന്നോക്ക വിഭാഗത്തിലുള്ളവർക്ക്‌ അവസരം നൽകുന്നത്‌. നിലവിലുള്ള സംവരണവ്യവസ്ഥയെയോ നിയമനത്തിലുള്ള റൊട്ടേഷനെയോ ഒരുതരത്തിലും ഇത്‌ ബാധിക്കില്ല. ചുരുക്കത്തിൽ സംവരണ വിഭാഗത്തിനുള്ള സീറ്റുകളെ ഒരുതരത്തിലും ബാധിക്കാതെ അതിനു പുറത്തുനിന്നാണ്‌ സാമ്പത്തിക പിന്നോക്കാവസ്ഥയുള്ളവർക്ക്‌ സീറ്റ്‌ നീക്കിവയ്‌ക്കുന്നത്‌.

വിദ്യാഭ്യാസ രംഗത്തും തൊഴിൽ മേഖലയിലും ഒരുതരത്തിലും സംവരണവിഭാഗങ്ങൾക്ക്‌ നിലവിലുള്ള അവസരം നിഷേധിക്കപ്പെടാതിരിക്കാൻ ജാഗ്രതയോടെയാണ്‌ സർക്കാർ ഇക്കാര്യം നടപ്പാക്കുന്നത്‌. സംവരണത്തിന് കേന്ദ്രസർക്കാർ നിശ്ചയിച്ച മാനദണ്ഡങ്ങൾ സംസ്ഥാന സർക്കാർ അതേപടി സ്വീകരിക്കുകയായിരുന്നില്ല. ക്രീമിലെയർ ആനുകൂല്യത്തിന് സംസ്ഥാനത്ത് വാർഷിക വരുമാനപരിധി എട്ട്‌ ലക്ഷമാണ്. ഇതേ പരിധിയാണ് സാമ്പത്തികമായി പിന്നോക്കം നിൽക്കുന്ന വിഭാഗങ്ങൾക്കുള്ള സംവരണത്തിനും കേന്ദ്രസർക്കാർ നിശ്ചയിച്ചിരുന്നത്. എന്നാൽ, മുന്നോക്കക്കാരിലെ പിന്നോക്കം നിൽക്കുന്നവർക്കുള്ള സംവരണം സാമ്പത്തികമായി പിന്നോക്കം നിൽക്കുന്നവർക്ക്‌ തന്നെ ഉറപ്പാക്കാൻ സർക്കാർ നടപടി സ്വീകരിച്ചു. ഇക്കാര്യം പരിശോധിക്കാൻ കെ ശശിധരൻനായർ കമീഷനെ നിയോഗിച്ചു.

വാർഷിക വരുമാനം നാലുലക്ഷമായി നിജപ്പെടുത്തിയതും ഭൂവിസ്തൃതി സംബന്ധിച്ച്‌ റിപ്പോർട്ട്‌ സമർപ്പിച്ചതും കമീഷനാണ്‌. ഇത്‌ മന്ത്രിസഭ അംഗീകരിക്കുകയായിരുന്നു. മൂന്നുവർഷത്തിലൊരിക്കൽ അവലോകനം നടത്തി ആവശ്യമായി മാറ്റം വരുത്തുന്നതിനുള്ള വ്യവസ്ഥയും ഉൾക്കൊള്ളിച്ചിട്ടുണ്ട്‌. സാമ്പത്തിക പിന്നോക്കാവസ്ഥയിലുള്ളവർക്ക്‌ പരിഗണന നൽകാൻ സ്വീകരിച്ച നടപടിയെയാണ്‌ കുപ്രചാരണത്തിന്‌ ആയുധമാക്കുന്നത്‌.