പി കെ ശ്രീമതിക്കെതിരെ ഹസ്സന്റെ അശ്ലീലപ്രയോഗം

കോട്ടയം: സെക്രട്ടറിയറ്റിന് മുന്നിലെ കുടുംബശ്രീ സമരവുമായി ബന്ധപ്പെട്ട് സിപിഐ എം കേന്ദ്രകമ്മിറ്റിയംഗം പി കെ ശ്രീമതിക്കെതിരെ എം എം ഹസ്സന്റെ അസഭ്യപ്രയോഗം. "പി കെ ശ്രീമതിയും മറ്റും ഈ പ്രായത്തിലും അവിടെ നൃത്തമാടുകയായിരുന്നു. "ഈ പ്രായത്തില്‍ ഇങ്ങനെയാണെങ്കില്‍ യുവതിയായിരുന്നപ്പോള്‍ ഏതുരീതിയില്‍ നൃത്തം ചെയ്തിരിക്കണം". ഹസ്സെന്‍റ ആക്ഷേപം ഇങ്ങനെ. ടി എം തോമസ് ഐസക്കിനെയും ഹസ്സന്‍ ആക്ഷേപിച്ചു. "കഷണ്ടിത്തലയും താടിയും കൊണ്ടാണ് തോമസ് ഐസക്കിന്റെ നൃത്തം"- ഹസ്സന്‍ തുടര്‍ന്നു. കോട്ടയത്ത് "ജനശ്രീ" സമ്മേളനം ഉദ്ഘാടനം ചെയ്യുകയായിരുന്നു ഹസ്സന്‍.

കഴിഞ്ഞമാസം കെ കെ ലതിക എംഎല്‍എയെ ആഭ്യന്തരമന്ത്രി തിരുവഞ്ചൂര്‍ രാധാകൃഷ്ണന്‍ അശ്ലീല ചുവയോടെ ആക്ഷേപിച്ചതിനെതിരെ വ്യാപകപ്രതിഷേധം ഉയര്‍ന്നതിനെ തുടര്‍ന്ന് അദ്ദേഹം അത് പിന്‍വലിച്ച് മാപ്പ് പറഞ്ഞിരുന്നു. ജനശ്രീക്ക് സര്‍ക്കാരിന്റെ ആനുകൂല്യങ്ങള്‍ തന്നേ തീരൂവെന്നും അല്ലാത്തപക്ഷം വാങ്ങിച്ചെടുക്കാന്‍ അറിയാമെന്നും ഹസ്സന്‍ പറഞ്ഞു. സന്നദ്ധസംഘടനകള്‍ക്ക് അവകാശപ്പെട്ട സഹായം ജനശ്രീക്കും കിട്ടണം. ജനശ്രീ എന്തുപദ്ധതി സമര്‍പ്പിച്ചാലും സഹായം നല്‍കാമെന്ന് കേന്ദ്രമന്ത്രി ജയറാം രമേശ് അറിയിച്ചിട്ടുണ്ട്. നല്‍കില്ലെന്ന് മുന്‍പ് പറഞ്ഞത് തമാശയായിരുന്നുവെന്ന് അദ്ദേഹം തന്നോട് വ്യക്തമാക്കിയിട്ടുണ്ട്. ചില ബാങ്ക് ഉദ്യോഗസ്ഥര്‍ ജനശ്രീയുടെ പദ്ധതികള്‍ക്ക് വായ്പ അനുവദിക്കാതെ തകര്‍ക്കാന്‍ ശ്രമിക്കുകയാണെന്നും ഹസ്സന്‍ ആരോപിച്ചു.

deshabhimani 140113