നഗരത്തിന്റെ രണ്ടുഭാഗത്ത് കേന്ദ്രീകരിച്ചാണ് പ്രകടനം തുടങ്ങിയത്. പുതിയ ബസ്സ്റ്റാന്‍ഡ് പരിസരത്തെ പിബീസ് ഗ്രൗണ്ടില്‍ നിര്‍മാണം, കാര്‍പെന്ററി, കരിങ്കല്ല്, ആര്‍ടിസാന്‍സ് യൂണിയനുകള്‍ കേന്ദ്രീകരിച്ച് പ്രകടനം തുടങ്ങി. പുലിക്കുന്ന് ടൗണ്‍ഹാള്‍ പരിസരത്തുനിന്ന് തുടങ്ങിയ പ്രകടനത്തിന്റെ മുന്‍നിരയില്‍ സംസ്ഥാന നേതാക്കളും പ്രതിനിധികളും നീങ്ങി. അതിനുപിന്നിലായി അങ്കണവാടി, ആശ, സ്കൂള്‍ പാചകത്തൊഴിലാളി, ഖാദി, കൈത്തറി യൂണിയനുകള്‍ അണിനിരന്നു. ഇവര്‍ക്ക് പിന്നില്‍ പിബീസ് ഗ്രൗണ്ടില്‍നിന്ന് തുടങ്ങിയ പ്രകടനം അണിചേര്‍ന്നു. അവര്‍ക്ക് പിന്നിലായി ബീഡി ഫെഡറേഷന്‍, മത്സ്യത്തൊഴിലാളി, മോട്ടോര്‍ ഫെഡറേഷന്‍, തോട്ടം, ചെത്ത്, ചുമട്ട് യൂണിയനുകളും അതിനുപിന്നിലായി ചെറിയ യൂണിയനുകളായ സതേണ്‍ ക്ലേ, എല്‍ബിഎസ്, വഴിയോരം, ലോട്ടറി, ഹോട്ടല്‍ ആന്‍ഡ് പീടിക, ഫ്യുവല്‍, സോമില്‍, മുനിസിപ്പല്‍, പ്രൈവറ്റ് ഹോസ്പിറ്റല്‍, മെഡിക്കല്‍, ചികിരി, കൊപ്ര, മള്‍ട്ടിലെവല്‍ മാര്‍ക്കറ്റിങ് എന്നിവരും അതിനുപിന്നിലായി സഹകരണം, ഇലക്ട്രിസിറ്റി, വാട്ടര്‍, കെഎംഎസ്ആര്‍എ, ഗവ. ഫാം, മലബാര്‍ ദേവസ്വം, എല്‍ഐസി ഏജന്റ്സ് തുടങ്ങിയ യൂണിയനുകളും അണിനിരന്നു. വഴിയോരങ്ങളില്‍ അഭിവാദ്യമര്‍പ്പിക്കാന്‍ അണിനിരന്ന വര്‍ഗ ബഹുജന സംഘടനാ നേതാക്കളും പ്രവര്‍ത്തകരും റാലിയുടെ പിന്നില്‍ അണിനിരന്നതോടെ അത് മറ്റൊരു ജനപ്രവാഹമായി.
ഭെല്‍- ഇഎംഎല്‍ സംരംഭം സംരക്ഷിക്കണം
കാസര്‍കോട്: കാസര്‍കോട്ടെ ഭെല്‍- ഇഎംഎല്‍ സംയുക്ത സംരംഭം സംരക്ഷിക്കാന്‍ കേന്ദ്ര- സംസ്ഥാന സര്‍ക്കാരുകള്‍ നടപടി സ്വീകരിക്കണമെന്ന് സിഐടിയു സംസ്ഥാന സമ്മേളനം അംഗീകരിച്ച പ്രമേയത്തില്‍ ആവശ്യപ്പെട്ടു.
പൊതുമേഖല വ്യവസായ രംഗത്ത് കേരളത്തില്‍ കൂടുതല്‍ കേന്ദ്രനിക്ഷേപം കൊണ്ടുവരാന്‍ എല്‍ഡിഎഫ് സര്‍ക്കാര്‍ തീരുമാനപ്രകാരമാണ് കേന്ദ്ര- സംസ്ഥാന പൊതുമേഖലകളുടെ സംയുക്ത സംരംഭം തുടങ്ങിയത്. ഇതിന്റെ ഭാഗമായി ഒന്നാം യുപിഎ സര്‍ക്കാരിന്റെ കാലത്ത് നവരത്ന കമ്പനിയായ ഭെല്ലും സംസ്ഥാന പൊതുമേഖലാ സ്ഥാപനമായ കെല്ലിന്റെ കാസര്‍കോട് യൂണിറ്റും സംയുക്ത സംരംഭ നടപടിയാരംഭിച്ചു. 2011 ജനുവരി ഒന്നിന് സംയുക്ത സംരംഭത്തിന്റെ ഭാഗമായി ഭെല്ലിന്റെ സബ്സിഡിയറിയായി ഭെല്‍- ഇഎംഎല്‍ കമ്പനി രൂപീകൃതമായി. യുഡിഎഫ് സര്‍ക്കാര്‍ അധികാരത്തിലെത്തിയതോടെ തുടര്‍പ്രവര്‍ത്തനങ്ങള്‍ മന്ദീഭവിച്ചു. 20 മാസമായി പുതുതായി ഒരു വികസനമോ നിക്ഷേപമോ സ്ഥാപനത്തില്‍ വന്നിട്ടില്ല. ജീവനക്കാര്‍ക്ക് മുമ്പ് കിട്ടിക്കൊണ്ടിരിക്കുന്ന വേതനവ്യവസ്ഥ തുടരുന്നുവെന്നല്ലാതെ കരാര്‍ കാലാവധി കഴിഞ്ഞിട്ടും പുതുതായി ഒരാനുകൂല്യങ്ങളും അനുവദിക്കുന്നില്ല. വൈവിധ്യവല്‍ക്കരണത്തിന്റെ ഭാഗമായി പുതിയ ഉല്‍പന്നങ്ങള്‍ കൊണ്ടുവരാനും ഇതുവഴി ജീവനക്കാരുടെ ആനുകൂല്യങ്ങള്‍ മെച്ചപ്പെടുത്താനും കമ്പനി പൂര്‍ണമായും ഭെല്‍ ഏറ്റെടുക്കാന്‍ ആവശ്യമായ നടപടി ഉടന്‍ സ്വീകരിക്കണമെന്ന് കേന്ദ്ര- സംസ്ഥാന സര്‍ക്കാരുകളോട് സിഐടിയു സംസ്ഥാന സമ്മേളനം ആവശ്യപ്പെട്ടു.
deshabhimani 150113
No comments:
Post a Comment