തെളിവ് പുറത്ത്; തിരുവഞ്ചൂരിനും സരിതബന്ധം

സോളാര്‍ തട്ടിപ്പ്കേസില്‍ പിടിയിലായ സരിത എസ് നായര്‍ക്ക് ആഭ്യന്തരമന്ത്രി തിരുവഞ്ചൂരുമായും ബന്ധമുണ്ടെന്ന തെളിവുകള്‍ പുറത്തുവന്നു. നിരവധി തവണ സരിത തിരുവഞ്ചൂരിനെ ഫോണില്‍ വിളിച്ചതിന്റെ രേഖകള്‍ റിപ്പോര്‍ട്ടര്‍ ചാനലാണ് പുറത്തുവിട്ടത്. ഇതോടെ സരിതയേയും ബിജു രാധാകൃഷ്ണനേയും അറിയില്ലെന്ന തിരുവഞ്ചൂരിന്റെ വാദങ്ങളാണ് പൊളിഞ്ഞത്.

ജനുവരിയില്‍ മാത്രം സരിതയുടെ 8606161700 എന്ന നമ്പറില്‍നിന്ന് ആഭ്യന്തരമന്ത്രിയുടെ 9447018116 എന്ന നമ്പറിലേക്ക് നാലുതവണ വിളിച്ചു. ജനുവരി 23, 24,25 തിയതികളിലാണ് ഫോണ്‍ വിളിച്ചിട്ടുള്ളത്. 24 ന് രണ്ടു തവണ വിളിച്ച് ദീര്‍ഘനേരം സംസാരിച്ചിട്ടുണ്ട്. തനിക്കുവരുന്ന ഫോണുകളെല്ലാം ആഭ്യന്തര മന്ത്രി നേരിട്ടാണ് എടുക്കാറുള്ളത്്. ഇത് സരിതക്ക് മുഖ്യമന്ത്രിയുടെ സ്റ്റാഫ് മാത്രമായല്ല മന്ത്രിമാരുമായും നേരിട്ട് ബന്ധമുണ്ടെന്നതിന് തെളിവാണ്. അതിനാല്‍ മുഖ്യമന്ത്രിയുടെ സ്റ്റാഫിനെ സരിത വിളിച്ചിരുന്നതും മുഖ്യമന്ത്രിയെ കിട്ടുവാനായി തന്നെയാണെന്നും തെളിയുകയാണ്.

സോളാര്‍ തട്ടിപ്പ് വിവാദമായപ്പോള്‍ സരിതയെ പരിചയമുണ്ടെന്ന് കേന്ദ്ര സഹമന്ത്രി കെ സി വേണുഗോപാല്‍ അടക്കം വെളിപ്പെടുത്തിയിരുന്നു. മറ്റ് പലരും സരിത തങ്ങളെ വിളിച്ചിരുന്നു എന്നും പറഞ്ഞിരുന്നു. എന്നാല്‍ ഇതുവരെ സരിത തന്നെ വിളിച്ച കാര്യം തിരുവഞ്ചൂര്‍ പറഞ്ഞിരുന്നില്ല. കൂടാതെ കേസിലെ മറ്റൊരുപ്രതി ബിജു രാധാകൃഷ്ണനെ രക്ഷപ്പെടാന്‍ സഹായിച്ച ശാലുമേനോന്റെ വീടിന്റെ പാലുകാച്ചലിന് പോയതിനെ കുറിച്ചും പരസ്പര വിരുദ്ധമായാണ് തിരുവഞ്ചൂര്‍ സംസാരിക്കുന്നത്. ജനുവരിയില്‍ മാത്രം വിളിച്ച ഫോണ്‍കോള്‍ ലിസ്റ്റാണ് പുറത്ത് വന്നിട്ടുള്ളത്.

deshabhimani