അധികാരവികേന്ദ്രീകരണം വിദ്യാഭ്യാസനിലവാരം മെച്ചപ്പെടുത്തി: തോമസ് ഐസക്

കൊച്ചി: അധികാരവികേന്ദ്രീകരണം കേരളത്തിലെ വിദ്യാഭ്യാസരംഗത്ത് ഗുണപരമായ വളരെയധികം മാറ്റങ്ങള്‍ വരുത്തിയതായി ഡോ. തോമസ് ഐസക് എംഎല്‍എ പറഞ്ഞു.

വിദ്യാഭ്യാസത്തിന്റെ ഗുണനിലവാരം മെച്ചപ്പെട്ടു. അധ്യാപകര്‍ക്ക് പരിശീലനം പഠനാനുബന്ധ പ്രവര്‍ത്തനങ്ങളായ പ്രത്യേക കായിക പരിശീലനം, സയന്‍സ്ക്ലബ്ബുകളുടെ രൂപീകരണം എന്നിവ നടപ്പാക്കി. എസ്എസ്എല്‍സി പരീക്ഷാഫലം വളരെയധികം മെച്ചമായി. 75 ശതമാനത്തോളം വിദ്യാര്‍ഥികള്‍ പരാജയപ്പെട്ടിരുന്ന സ്കൂളുകള്‍പോലും മികച്ച വിജയം കരസ്ഥമാക്കുന്ന നിലയിലെത്തി. വിദ്യാര്‍ഥികളുടെ കൊഴിഞ്ഞുപോക്കും കുറഞ്ഞു. സ്കൂളുകളുടെ അടിസ്ഥാന സൗകര്യങ്ങളില്‍ വളരെയധികം പുരോഗതിയുണ്ടായി. കേന്ദ്ര പഞ്ചായത്തീരാജ് മന്ത്രാലയം "അധികാര വികേന്ദ്രീകരണവും കുട്ടികളുടെ അവസര തുല്യതയും" എന്ന വിഷയത്തില്‍ യൂണിസെഫ്, കേരള സര്‍ക്കാര്‍ എന്നിവയുടെ സഹകരണത്തോടെ സംഘടിപ്പിച്ച സെമിനാറില്‍ പ്രബന്ധം അവതരിപ്പിക്കുകയായിരുന്നു അദ്ദേഹം. "കേരളത്തിലെ അധികാരവികേന്ദ്രീകരണം; മാരാരിക്കുളത്തുനിന്നുള്ള അനുഭവപാഠങ്ങള്‍" എന്ന വിഷയത്തിലായിരുന്നു പ്രബന്ധം.

മാരാരിക്കുളത്ത് ബാലകൈരളി പദ്ധതി നടപ്പാക്കി. കുട്ടികളുടെ നേരെയുള്ള ബലപ്രയോഗവും മറ്റും തടയാന്‍ പദ്ധതികള്‍ നടപ്പാക്കി. ബാലസഭകളും രൂപീകരിച്ചു. സാര്‍വത്രിക വിദ്യാഭ്യാസം ഏര്‍പ്പെടുത്തുന്നതിലും അധികാരവികേന്ദ്രീകരണം ശക്തമായ പങ്ക് വഹിച്ചിട്ടുണ്ട്. പ്രാദേശിക ഭരണകൂടങ്ങള്‍ക്ക് പൂര്‍ണമായ പ്രവര്‍ത്തനസ്വാതന്ത്ര്യം അധികാരവികേന്ദ്രീകരണത്തിലൂടെ ലഭ്യമായെന്ന് ഡോ. തോമസ് ഐസക് പറഞ്ഞു. അധികാരവികേന്ദ്രീകരണത്തിലൂടെ മാരാരിക്കുളത്ത് നടത്തിയ പ്രവര്‍ത്തനങ്ങളെ ചടങ്ങില്‍ സംസാരിച്ച കേന്ദ്ര പഞ്ചായത്തീരാജ് മന്ത്രാലയം അഡീഷണല്‍ സെക്രട്ടറി ഋഷികേശ് പാണ്ഡെ അനുമോദിച്ചു.

deshabhimani news