പോപ്പുലര്‍ ഫ്രണ്ടിനെ പറയുമ്പോള്‍ പൊള്ളുന്നതെന്തേ?

പോപ്പുലര്‍ ഫ്രണ്ടിനെ പറയുമ്പോള്‍ യുഡിഎഫിന് പൊള്ളുന്നതെന്തേ

പോപ്പുലര്‍ ഫ്രണ്ടിന്റെ വിധ്വംസകപ്രവര്‍ത്തനങ്ങളെപ്പറ്റി പറയുമ്പോള്‍ യുഡിഎഫിനും കൂട്ടര്‍ക്കും പൊള്ളുന്നതെന്തേയെന്ന് മുഖ്യമന്ത്രി വി എസ് അച്യുതാനന്ദന്‍ നിയമസഭയില്‍ ചോദിച്ചു. കോഗ്രസിലെ കെ ബാബുവിന്റെ സബ്മിഷന് മറുപടി പറയുകയായിരുന്നു അദ്ദേഹം.പോപ്പുലര്‍ഫ്രണ്ടിനെ വിമര്‍ശിച്ചതിനെ ദുര്‍വ്യാഖ്യാനം ചെയ്യുന്നത് ദുരുദ്ദേശ്യപരമാണ്. താന്‍ മുസ്ളിം സമുദായത്തെ ആക്ഷേപിക്കുന്നതാണെന്ന വ്യാഖ്യാനം തെറ്റിധാരണ പരത്തുന്നതിനുള്ള ആസൂത്രിത നീക്കത്തിന്റെ ഭാഗമാണ്. പോപ്പുലര്‍ ഫ്രണ്ടിനെ ന്യായീകരിക്കുന്ന യുഡിഎഫ് നിലപാട് തീക്കൊള്ളികൊണ്ട് തലചൊറിയലാണ്. എന്‍ഡിഎഫ്, പോപ്പുലര്‍ ഫ്രണ്ട്, എസ്ഡിപിഐ തുടങ്ങിയ സംഘടനകളുടെ പ്രവര്‍ത്തനത്തെപ്പറ്റിയുള്ള വ്യക്തമായ വിവരങ്ങളുടെ അടിസ്ഥാനത്തിലാണ് സംസാരിച്ചത്. ആര്‍എസ്എസ്, ബജ്രംഗ്ദള്‍ തുടങ്ങിയ വര്‍ഗീയ തീവ്രവാദശക്തികളുടെ ഹിന്ദുരാഷ്ട്രപ്രചാരണത്തിന് ബദല്‍ പ്രചാരണവും വികാരവും സൃഷ്ടിക്കാനാണ് പോപ്പുലര്‍ ഫ്രണ്ടിനെപ്പോലുള്ളവരുടെ ശ്രമം. ഇത്തരം സംഘടനകളെ വിമര്‍ശിക്കുന്നതിനെ ദുര്‍വ്യാഖ്യാനം ചെയ്യുന്നത് വര്‍ഗീയ ലക്ഷ്യത്തോടെയാണ്. ആര്‍എസ്എസിനെ മഹാഭൂരിപക്ഷം ഹിന്ദുക്കള്‍ എതിര്‍ക്കുന്നപോലെ പോപ്പുലര്‍ ഫ്രണ്ടിനെയും മഹാഭൂരിപക്ഷം മുസ്ളിങ്ങളും എതിര്‍ക്കുന്നുവെന്നും മുഖ്യമന്ത്രി പറഞ്ഞു.

പോപ്പുലര്‍ ഫ്രണ്ട് മുസ്ളിങ്ങളുടെ വക്താക്കളല്ല: മുഖ്യമന്ത്രി

പോപ്പുലര്‍ ഫ്രണ്ടിനെ മുസ്ളിം സമുദായത്തിന്റെ വക്താക്കളായോ സമുദായത്തെ പ്രതിനിധാനംചെയ്യുന്ന സംഘടനയായോ കാണാനാവില്ലെന്ന് മുഖ്യമന്ത്രി വി എസ് അച്യുതാനന്ദന്‍ നിയമസഭയില്‍ പറഞ്ഞു. വര്‍ഗീയത ഇളക്കിവിടാനും മതസൌഹാര്‍ദവും സമാധാനാന്തരീക്ഷവും തകര്‍ക്കാനും ലക്ഷ്യമിട്ട് പ്രവര്‍ത്തിക്കുന്ന ജനദ്രോഹ പ്രസ്ഥാനങ്ങളാണിവ. മതത്തിന്റെ പേരുപയോഗിച്ച് വൈകാരിക പ്രചാരണം നടത്തി പ്രശ്നങ്ങളുണ്ടാക്കുന്ന അവര്‍ അങ്ങേയറ്റം അപകടകാരികളാണ്. ഇത്തരം ഹീനപ്രവര്‍ത്തനങ്ങളെയാണ് താന്‍ തുറന്നു കാട്ടിയത്. അധ്യാപകന്റെ കൈവെട്ടിയ സംഭവവുമായി ബന്ധപ്പെട്ട് പോപ്പുലര്‍ ഫ്രണ്ടിന്റെ ഓഫീസുകളില്‍ നടത്തിയ റെയ്ഡില്‍ കണ്ടെത്തിയ ചില ലഘുലേഖകള്‍ മതവിദ്വേഷം വളര്‍ത്തുന്നതും ജനാധിപത്യ സംവിധാനത്തെ നിരാകരിക്കാനും നശിപ്പിക്കാനുമുള്ള ആഹ്വാനമുള്ളവയുമായിരുന്നു. പോപ്പുലര്‍ഫ്രണ്ടിനെയും അവരുടെ പ്രചാരണത്തെയും തള്ളിപ്പറയുന്നതിനു പകരം അവര്‍ക്ക് പരോക്ഷ പിന്തുണ നല്‍കുകയാണ് ലീഗുള്‍പ്പെടെയുള്ള കക്ഷികള്‍. ഇവര്‍ തന്റെ പ്രസ്താവനയെ ആക്ഷേപിക്കുന്നതിനു പിന്നില്‍ ദുഷ്ടലാക്കാണുള്ളത്. പോപ്പുലര്‍ഫ്രണ്ടിനെ തള്ളിപ്പറയാന്‍ യുഡിഎഫ് തയ്യാറാകാത്തത് ഇതുമായി കൂട്ടിവായിക്കണം.

ഹിന്ദുരാഷ്ട്രവാദമുയര്‍ത്തുന്ന ആര്‍്എസ്എസിനെയും അവരുടെ വര്‍ഗീയ പ്രചാരണത്തെയും നഖശിഖാന്തം എതിര്‍ക്കുന്നവരാണ് സിപിഐ എമ്മും ഇടതുപക്ഷപ്രസ്ഥാനങ്ങളും. എന്നാല്‍, ആര്‍എസ്എസിനെ എതിര്‍ക്കുന്നതുകൊണ്ട് ഹിന്ദുമതത്തെയോ ഹിന്ദുക്കളെയോ എതിര്‍ക്കുന്നു എന്ന് ആര്‍ക്കെങ്കിലും വ്യാഖ്യാനിക്കാന്‍ കഴിയുമോയെന്ന് മുഖ്യമന്ത്രി ചോദിച്ചു. സമുദായത്തിന്റെ പേര് പറഞ്ഞ് ചെറിയൊരു വിധ്വംസക ഗ്രൂപ്പ് നടത്തുന്ന ആപല്‍ക്കരമായ പ്രവര്‍ത്തനങ്ങള്‍ തുറന്നുകാട്ടുമ്പോള്‍ യുഡിഎഫിനും ലീഗിനും പൊള്ളുന്നതെന്തിനാണ്. ഇനിയെങ്കിലും ഈ നിലപാട് തിരുത്താന്‍ യുഡിഎഫ് തയ്യാറാകണം. ഗുജറാത്തിലെ മതന്യൂനപക്ഷത്തെ ഇല്ലാതാക്കാനായി സംഘപരിവാര്‍ നടത്തിയ കൊടുംക്രൂരതകള്‍ ഒന്നൊന്നായി പുറത്തുവരികയാണ്. തീവ്രവാദിയെന്ന് മുദ്രകുത്തി സെറാബുദീനെയും ഭാര്യയെയും കൊന്ന കേസില്‍ അവിടത്തെ മന്ത്രിതന്നെ അറസ്റിലായിരിക്കുന്നു. രാജ്യത്ത് സംഘപരിവാര്‍ ശക്തികള്‍ നടത്തുന്ന കൊലപാതക രാഷ്ട്രീയത്തിന്റെ മറ്റൊരു പതിപ്പാണ് എന്‍ഡിഎഫും അതിന്റെ പുതുരൂപമായ പോപ്പുലര്‍ ഫ്രണ്ടും ചെയ്തുകൊണ്ടിരിക്കുന്നത്. ഇത്തരം പ്രവര്‍ത്തനങ്ങളെ വേരോടെ പിഴുതെറിയാനാണ് സര്‍ക്കാര്‍ ശ്രമിക്കുന്നതെന്നും മുഖ്യമന്ത്രി പറഞ്ഞു.

മുഖ്യമന്ത്രിക്കെതിരെ തിരിയുന്നത് എന്‍ഡിഎഫ് ബന്ധം മറയ്ക്കാന്‍: പിണറായി

എന്‍ഡിഎഫ്- യുഡിഎഫ് ബന്ധം മറയ്ക്കാനാണ് മുഖ്യമന്ത്രിക്കും സിപിഐ എമ്മിനുമെതിരെ ലീഗുകാര്‍ ആരോപണമുന്നയിക്കുന്നതെന്ന് സിപിഐ എം സംസ്ഥാന സെക്രട്ടറി പിണറായി വിജയന്‍ പറഞ്ഞു. എന്‍ജിഒ യൂണിയന്‍ ജില്ലാ കമ്മിറ്റി സംഘടിപ്പിച്ച കുടുംബസംഗമത്തില്‍ സംസാരിക്കുകയായിരുന്നു അദ്ദേഹം.

അറിയപ്പെടുന്ന കൊലയാളികളെ ന്യായീകരിക്കുകയാണ് കുഞ്ഞാലിക്കുട്ടി. ഇത്തരം കൊലയാളികളെ മുസ്ളിം എന്ന മറയിട്ട് സംരക്ഷിക്കാന്‍ ആരും മുന്നോട്ട് വരേണ്ട. പോപ്പുലര്‍ ഫ്രണ്ടിനെതിരെ പറയുമ്പോള്‍ യുഡിഎഫ് നേതാക്കള്‍ നിരനിരയായാണ് രംഗത്തിറങ്ങുന്നത്. ലീഗാണ് ഇവരുടെ പ്രധാന സംരക്ഷകര്‍. കഴിഞ്ഞ യുഡിഎഫ് സര്‍ക്കാരിന്റെ കാലത്തും ലീഗിലൂടെയായിരുന്നു എന്‍ഡിഎഫിന്റെ യുഡിഎഫ് ബന്ധം. സമൂഹത്തില്‍ ചെറുവിഭാഗം മാത്രമാണ് തീവ്രവാദം പ്രചരിപ്പിക്കുന്നത്. അതില്‍ത്തന്നെ ഒരുകൂട്ടര്‍ തനിഭീകരരാണ്. 'നഞ്ഞെന്തിനാ നാനാഴി'യെന്ന പഴഞ്ചൊല്ലാണ് ഇവരുടെ കാര്യത്തില്‍ പ്രസക്തം. ഇവര്‍ നഞ്ചാണ്, കൊടുംവിഷമാണ്.

എല്ലാ വര്‍ഗീയശക്തികളോടും സിപിഐ എമ്മിന് ഒരൊറ്റ നിലപാട് മാത്രമേയുള്ളൂ. കേരളത്തില്‍ 21പേരെയാണ് എന്‍ഡിഎഫ് കൊലപ്പെടുത്തിയത്. അതില്‍ ആറ് പേര്‍ സിപിഐ എം പ്രവര്‍ത്തകരാണ്. കൈ വെട്ടുന്നത് സിപിഐ എമ്മിന്റെ പാരമ്പര്യമാണെന്നാണ് കുഞ്ഞാലിക്കുട്ടി പറയുന്നത്. ഒരനുഭവമെങ്കിലും ചൂണ്ടിക്കാട്ടാന്‍ കുഞ്ഞാലിക്കുട്ടിക്ക് കഴിയുമോ. തീവ്രവാദരാഷ്ട്രീയത്തിനെതിരെ ലീഗിനകത്ത് ഉയരുന്ന എതിര്‍പ്പുകളെ മറികടക്കാന്‍ എന്ത് നെറികേടും വിളിച്ചുപറയുകയാണ്. ഇത് ലീഗ് അണികള്‍ പോലും വിശ്വസിക്കില്ല. പണ്ട് ഞങ്ങളെക്കുറിച്ച് നിങ്ങളെന്ത് പറഞ്ഞാലും അവര്‍ വിശ്വസിക്കുമായിരുന്നു. ഇപ്പോള്‍ ഞങ്ങളെ അവര്‍ ശരിക്കും തിരിച്ചറിഞ്ഞിട്ടുണ്ട്.

ബാബറി മസ്ജിദ് തകര്‍ത്തശേഷം ഇന്ത്യയിലാകെ പ്രതിഷേധത്തിന്റെ തീക്കാറ്റുയരുമ്പോള്‍ അതില്‍ പങ്കെടുക്കാതെ നാല് മന്ത്രിസ്ഥാനം രക്ഷിക്കാന്‍ നിങ്ങള്‍ ചടഞ്ഞിരുന്നതും അണികള്‍ തിരിച്ചറിഞ്ഞ കാര്യം മറക്കരുത്. ആര്‍എസ്എസിന്റെ അതേ രീതിയിലാണ് പോപ്പുലര്‍ ഫ്രണ്ടിന്റെയും പ്രവര്‍ത്തനം. വിവിധ സംഘപരിവാറുകളുണ്ടെങ്കിലും അവരുടെ നേതൃത്വം ആര്‍എസ്എസിന് ആകുന്നതുപോലെയാണ് പോപ്പുലര്‍ ഫ്രണ്ടിന്റെയും രീതി. പരിശീലനം, ആയുധം, ആവശ്യംപോലെ പണം ഇതെല്ലാം പോപ്പുലര്‍ ഫ്രണ്ടിനുണ്ട്. വിവിധ പള്ളി കമ്മിറ്റികളിലും മറ്റും വിശ്വാസികളെപ്പോലെയാണ് ഇവര്‍ നുഴഞ്ഞുകയറുന്നത്. കുട്ടികള്‍ യഥാര്‍ഥ വിശ്വാസികളാണെന്ന് തെറ്റിദ്ധരിച്ച് പ്രായമായവര്‍ സദുദ്ദേശ്യത്തോടെ മാറിനില്‍ക്കുന്നു. ഈ സൌകര്യം ഉപയോഗിച്ച് ആരാധനാലയങ്ങള്‍ ആയുധപ്പുരകളാക്കുകയാണ് പോപ്പുലര്‍ ഫ്രണ്ടുകാര്‍. ഇത് വിശ്വാസികളാകെ തിരിച്ചറിയണമെന്നും പിണറായി അഭ്യര്‍ഥിച്ചു.

deshabhimani 27072010