അന്വേഷണത്തില്‍ തിരുവഞ്ചൂര്‍ ഇടപെടുന്നു: കോടിയേരി

സോളാര്‍ തട്ടിപ്പ് കേസന്വേഷണത്തില്‍ ആഭ്യന്തരമന്ത്രി തിരുവഞ്ചൂര്‍ രാധാകൃഷ്ണന്‍ ഇടപെടുകയാണെന്ന് സിപിഐ എം പൊളിറ്റ് ബ്യൂറോ അംഗം കോടിയേരി ബാലകൃഷ്ണന്‍ പറഞ്ഞു. പൊലീസ് ഉദ്യോഗസ്ഥരെ സ്വതന്ത്രമായി പ്രവര്‍ത്തിക്കാന്‍ അനുവദിക്കാതെ അന്വേഷണത്തില്‍ ഇടപെടുന്നതിന്റെ തെളിവാണ് പൊലീസിനു ലഭിച്ച ഫോണ്‍പട്ടിക തന്റെ കൈയിലുണ്ടെന്ന അദ്ദേഹത്തിന്റെ വെളിപ്പെടുത്തലെന്ന് കോടിയേരി മാധ്യമങ്ങളോടു പറഞ്ഞു. ഇത് ചാനലുകളിലൂടെ പുറത്തുവരികയും ചെയ്യുന്നു. കെപിസിസി പ്രസിഡന്റിന്റെ ഫോണ്‍വരെ ചോര്‍ത്തുന്ന സ്ഥിതിയാണ്. എ ഗ്രൂപ്പിനുനേരെ വരുന്ന കാര്യങ്ങള്‍ ഐ ഗ്രൂപ്പിനുനേരെ തിരിച്ചുവിടാനാണ് തിരുവഞ്ചൂര്‍ ശ്രമിക്കുന്നത്. തന്റെ നേരെ ചെളിവാരി എറിയുന്നവരെ തെറ്റായി ചിത്രീകരിക്കുന്നു. തനിക്കേറ്റ ചെളി മറ്റുള്ളവരുടെ ശരീരത്തിലും ആകട്ടെയെന്നാണ് നിലപാട്. മുഖ്യമന്ത്രിയുടെ നേരെ ഉയരുന്ന ആരോപണങ്ങള്‍ മൂര്‍ച്ഛിപ്പിക്കാനും ശ്രമിക്കുന്നു.

പതിനായിരം കോടിയുടെ തട്ടിപ്പു നടത്തിയെന്ന് സരിത തന്നെ മൊഴി നല്‍കിയപ്പോള്‍ അഞ്ചുകോടി മാത്രമേ ഉള്ളൂവെന്നാക്കി മാറ്റാനാണ് ഉമ്മന്‍ചാണ്ടി ശ്രമിക്കുന്നത്. മാസങ്ങള്‍ക്കുമുമ്പ് പരാതി പൊലീസ് രജിസ്റ്റര്‍ചെയ്തിട്ടും അന്വേഷിക്കാന്‍ തയ്യാറായില്ലെന്നത് തട്ടിപ്പുസംഘത്തിന് സര്‍ക്കാര്‍ എല്ലാ ഒത്താശയും ചെയ്തുകൊടുക്കുന്നതിന്റെ തെളിവാണ്. കേസിലെ പരാതികള്‍ പൂഴ്ത്തിവയ്ക്കാനും ചിലത് ഒത്തുതീര്‍ക്കാനും പൊലീസ് സംവിധാനം ഉപയോഗിച്ചു. മുഖ്യമന്ത്രിയുടെ ഓഫീസും സര്‍ക്കാര്‍ സംവിധാനങ്ങളും സഹായിച്ചു നടന്ന സോളാര്‍ തട്ടിപ്പുകേസില്‍ സമഗ്രമായ ജുഡീഷ്യല്‍ അന്വേഷണത്തിന് സര്‍ക്കാര്‍ ഉത്തരവിടണം. മുഖ്യമന്ത്രിയും ആഭ്യന്തരമന്ത്രിയും തല്‍സ്ഥാനത്തുനിന്നു മാറിനിന്ന് അന്വേഷണം നേരിടണം. കേസില്‍ പ്രതിയായ നടി ശാലു മേനോനെ രാജകീയ പദവിയിലാണ് പൊലീസ് അറസ്റ്റ്ചെയ്ത് സ്വന്തം കാറില്‍ ചങ്ങനാശേരിയില്‍നിന്ന് തിരുവനന്തപുരത്തേക്കു കൊണ്ടുപോയത്. ടി പി ചന്ദ്രശേഖരന്‍ വധക്കേസില്‍ പ്രതിചേര്‍ത്ത് അറസ്റ്റ്ചെയ്ത അന്തരിച്ച സി എച്ച് അശോകനെ ഒരുവര്‍ഷമായി സ്വന്തം വീട്ടിലേക്കു പ്രവേശിക്കാന്‍പോലും സമ്മതിച്ചില്ല. പി മോഹനനെ പാര്‍ടിപരിപാടിയില്‍ പങ്കെടുത്തു മടങ്ങുന്നതിനിടെ റോഡില്‍ തടഞ്ഞു നിര്‍ത്തി സിനിമാ സ്റ്റൈലിലാണ് അറസ്റ്റ്ചെയ്തത്. ശാലു മേനോനെ രാജകീയ പദവിയില്‍ കൊണ്ടുപോയത് അസാധാരണ നടപടിയാണ്. ഇത് അന്വേഷണവിധേയമാക്കണമെന്നും കോടിയേരി ആവശ്യപ്പെട്ടു.

deshabhimani