ബാബറി മസ്ജിദ് പൊളിച്ചതില്‍ അഭിമാനിക്കണം: അദ്വാനി

അയോധ്യയിലെ ബാബ്‌റി മസ്ജിദ് പൊളിച്ചതില്‍ ബി ജെ പി പ്രവര്‍ത്തകര്‍ ഖേദിക്കുകയല്ല അഭിമാനിക്കുകയാണ് വേണ്ടതെന്ന്  ബി ജെ പി നേതാവ് എല്‍ കെ അദ്വാനി. ഡല്‍ഹിയില്‍ പാര്‍ട്ടിയുടെ മുപ്പത്തിമൂന്നാം സ്ഥാപക ദിനാഘോഷത്തില്‍ സംസാരിക്കവേയാണ് അദ്വാനിയുടെ വിവാദ പരാമര്‍ശം. അയോധ്യയില്‍ അമ്പലമുണ്ടെന്ന് വശ്വസിക്കുകയോ അതിനായി പ്രക്ഷോഭം നടത്തുകയോ ചെയ്താല്‍ അതില്‍ ഒട്ടും ഖേദിക്കേണ്ടതില്ല പകരം അഭിമാനിക്കുകയാണ് വേണ്ടതെന്ന് അദ്വാനി പറഞ്ഞു.

മുലായം സിംഗ് തന്നെ പ്രകീര്‍ത്തിച്ചപ്പോള്‍ ചിലര്‍ ആശങ്കപ്പെട്ടു. അതില്‍ ശങ്കിക്കുകയോ മറ്റ് അപകര്‍ഷതകള്‍ വച്ചുപുലര്‍ത്തുകയോ ചെയ്യരുതെന്ന് പറഞ്ഞുകൊണ്ടായിരുന്നു അദ്വാനിയുടെ അഭിപ്രായപ്രകടനം.ഇന്നത്തെ ബിജെപി തന്റെ ആശയത്തിലുള്ള പാര്‍ട്ടിയില്‍ നിന്നും ഏറെ വ്യതിചലിച്ചെന്ന തോന്നലാണ് ഉളവാക്കുന്നതെന്നും അദ്വാനി പറഞ്ഞു.

ബാബ്‌റി മസ്ജിദ് പ്രചാരണ വിഷയമാക്കിയപ്പോഴെല്ലാം ബി ജെ പി തെരഞ്ഞെടുപ്പില്‍ വിജയിച്ചിട്ടുണ്ടെന്ന പരാമര്‍ശവും അദ്വാനിയുടെ പ്രസംഗത്തിലുണ്ടായിരുന്നു. ബി ജെ പിയും ജനസംഘവും ഇന്നീനിലയിലെത്തിയത് അയോധ്യ പ്രശ്‌നം ഉയര്‍ത്തിയാണെന്ന് ചിലര്‍ വിമര്‍ശിക്കുന്നുണ്ട്. പക്ഷേ അതിലും താന്‍ അഭിമാനിക്കുന്നുവെന്ന് പറഞ്ഞ അദ്വാനി  അയോധ്യ പ്രശ്‌നം ഒരു രാഷ്ട്രീയ നീക്കം മാത്രമല്ലെന്നും ഒരു സാംസ്‌ക്കാരിക മുന്നേറ്റമാണെന്നും  അഭിപ്രായപ്പെട്ടു. ബി ജെ പി പ്രവര്‍ത്തകര്‍ അഴിമതിയോട് അനുരഞ്ജനം കാട്ടരുതെന്നും അദ്വാനി ഉപദേശിച്ചു.

janayugom