ജനദ്രോഹനയങ്ങളിലൂടെ കേന്ദ്രസര്‍ക്കാര്‍ സാധാരണക്കാരുടെ ജീവിതം കൂടുതല്‍ ദുസ്സഹമാക്കുന്ന ഘട്ടത്തിലാണ് ഇക്കുറി എ കെ ജിയുടെ ചരമദിനം ആചരിക്കുന്നത്. കേന്ദ്രസര്‍ക്കാരിന്റെ ബജറ്റ് കോര്‍പറേറ്റ് മേഖലയ്ക്ക് ലക്ഷക്കണക്കിന് കോടി രൂപയുടെ ഇളവുനല്‍കുമ്പോള്‍ , പാവപ്പെട്ടവര്‍ക്ക് ലഭിക്കുന്ന ആനുകൂല്യങ്ങള്‍ വെട്ടിക്കുറയ്ക്കുകയാണ്. പൊതുമേഖലാ സ്ഥാപനങ്ങള്‍ വിറ്റുതുലയ്ക്കുന്ന ആഗോളവല്‍ക്കരണ നയസമീപനം കേന്ദ്രസര്‍ക്കാര്‍ തുടരുകയാണ്. ഇതിന്റെ ഭാഗമായാണ് 30,000 കോടി രൂപയുടെ പൊതുമേഖലാ ഓഹരികള്‍ വിറ്റഴിക്കാന്‍ തീരുമാനിച്ചത്. കേന്ദ്രസര്‍ക്കാര്‍ പിന്തുടരുന്ന ആഗോളവല്‍ക്കരണനയങ്ങള്‍ അതേപോലെ നടപ്പാക്കാനാണ് സംസ്ഥാന സര്‍ക്കാര്‍ ശ്രമിക്കുന്നതെന്ന് തിങ്കളാഴ്ച അവതരിപ്പിച്ച ബജറ്റ് വ്യക്തമാക്കുന്നു. പശ്ചാത്തലസൗകര്യമേഖല ഉള്‍പ്പെടെ സ്വകാര്യവല്‍ക്കരിക്കുന്നതിനുള്ള നയം ഇതിന്റെ ഭാഗമാണ്. തൊഴിലാളികളുടെ ക്ഷേമപെന്‍ഷനുകള്‍ വര്‍ധിപ്പിക്കാന്‍ തയ്യാറാകാത്തത് അടിസ്ഥാന ജനവിഭാഗത്തോടുള്ള സര്‍ക്കാരിന്റെ സമീപനവും വ്യക്തമാക്കുന്നു. ഇതിനെതിരായ പോരാട്ടങ്ങള്‍ക്ക് പാര്‍ലമെന്ററി സംവിധാനത്തെയും ബഹുജനങ്ങളെയും കണ്ണിചേര്‍ത്ത് മുന്നോട്ടുകൊണ്ടുപോകുന്നതിന് എ കെ ജിയുടെ പ്രവര്‍ത്തനപാത നമുക്ക് കരുത്തുപകരും. പാവങ്ങള്‍ക്കുവേണ്ടി എന്നും പോരാടിയ സഖാവിന്റെ അനുസ്മരണപരിപാടികള്‍ സമുചിതമായി സംഘടിപ്പിക്കാന്‍ സംസ്ഥാന സെക്രട്ടറിയറ്റ് എല്ലാ പാര്‍ടിഘടകങ്ങളോടും അഭ്യര്‍ഥിച്ചു.
deshabhimani 200312
