സത്യഗ്രഹം ഉദ്ഘാടനം ചെയ്യാനെത്തിയ മലയാളത്തിന്റെ പ്രിയ എഴുത്തുകാരി പി വത്സല കണ്ണീരണിഞ്ഞാണ് സംസാരിച്ചത്. ലീഗിന്റെ ക്രൂരതയില്‍ മനംനൊന്ത അവര്‍ കമ്യൂണിസ്റ്റുകാരുടെ മനുഷ്യപ്പറ്റില്‍ ഊന്നിയാണ് സംസാരിച്ചത്. 2000 നവംബര്‍ 11ന് തളിപ്പറമ്പ് പുഷ്പഗിരിക്കുന്നില്‍ ലീഗുകാര്‍ കൊലപ്പെടുത്തിയ ഓട്ടോ ഡ്രൈവര്‍ കൃഷ്ണന്റെ അനുജത്തി ജ്യോതിയും അനുജന്‍ ചന്ദ്രനും പൊട്ടിക്കരഞ്ഞാണ് ജീവിതാനുഭവം വിവരിച്ചത്. അഞ്ചുസഹോദരിമാര്‍ ഉള്‍പ്പെടുന്ന കുടുംബത്തിന്റെ അത്താണിയായ കൃഷ്ണനെ എന്തിന് കൊന്നുതള്ളിയെന്ന ചോദ്യം "പാര്‍ടി കോടതി"യുടെ പ്രചാരണക്കാരും കേള്‍ക്കുന്നുണ്ടായിരുന്നു. ലീഗുകാര്‍ വധിക്കാന്‍ ലക്ഷ്യമിട്ട വള്ളേരി മോഹനന്റെ ഭാര്യ രാധയ്ക്കും അമ്മ കല്യാണിക്കും നടുക്കം മാറിയിട്ടില്ല. മോഹനനെ ആശുപത്രിയിലെത്തിക്കാന്‍ സഹിച്ച പ്രയാസം വിവരിക്കുമ്പോള്‍ ഇരുവരുടെയും സങ്കടം അലമുറയായി മാറി.
തളിപ്പറമ്പിലെ ഇരകളെ സംരക്ഷിക്കേണ്ടത് മുഖ്യമന്ത്രി: പി വത്സല
കണ്ണൂര്‍ : തളിപ്പറമ്പില്‍ അക്രമത്തിന് ഇരയായവരെ സംരക്ഷിക്കാനുള്ള ഉത്തരവാദിത്തം മുഖ്യമന്ത്രി ഉമ്മന്‍ചാണ്ടിക്കുണ്ടെന്ന് സാഹിത്യകാരി പി വത്സല പറഞ്ഞു. വടക്കേ ഇന്ത്യയില്‍ നടക്കുന്നതുപോലെയുള്ള കാര്യങ്ങളാണ് തളിപ്പറമ്പില്‍ നടന്നത്. ഇടതുപക്ഷ മാധ്യമങ്ങള്‍ ഒഴിച്ചുള്ളവ ഇവ റിപ്പോര്‍ട്ട് ചെയ്തില്ല. മുഖ്യമന്ത്രി ഉള്‍പ്പെടെയുള്ളവര്‍ തെറ്റായ വിവരത്തിന്റെ അടിസ്ഥാനത്തിലാണ് പ്രതികരിച്ചത്. പത്രവാര്‍ത്തകളെ വിശ്വസിച്ചതാണ് മുഖ്യമന്ത്രിക്ക് പറ്റിയ തെറ്റെന്നും വത്സല പറഞ്ഞു. കണ്ണൂര്‍ കലക്ടറേറ്റിന് മുന്നില്‍ മുസ്ലിംലീഗ്അക്രമത്തിന് ഇരയായവരുടെ സത്യഗ്രഹം ഉദ്ഘാടനം ചെയ്യുകയായിരുന്നു അവര്‍ .
നാല്‍പത് വര്‍ഷത്തിലേറെയായി കണ്ണൂരുമായി എനിക്ക് അടുത്തബന്ധമാണുള്ളത്. കണ്ണൂരാണ് ഇന്ത്യയിലെ കമ്യൂണിസത്തിന്റെ ഈറ്റില്ലമെന്ന് പറയാന്‍ ചരിത്രവിദ്യാര്‍ഥിയാവേണ്ട ആവശ്യമില്ല. ഒന്നുമില്ലാത്തവന്റെയും ഗതികിട്ടാത്തവരുടെയും പ്രസ്ഥാനമാണ് കമ്യൂണിസ്റ്റ് പാര്‍ടി. എന്റെ വീട്ടില്‍ കാരണവരായി ഒരു പഴയ സഖാവുണ്ടായിരുന്നു. ആ സഖാവിന്റെ ജീവിത സന്ദേശമാണ് എനിക്ക് മാര്‍ഗദര്‍ശകമായത്. മനുഷ്യബന്ധത്തിലും സ്നേഹത്തിലും അധിഷ്ഠിതമാണ് കമ്യൂണിസം. കമ്യൂണിസ്റ്റ് ഗ്രാമങ്ങള്‍ എന്നുപറയുന്ന കണ്ണൂരിലെ പാര്‍ടി ഗ്രാമങ്ങളില്‍ താമസിക്കുന്നതിന്റെ ആഹ്ലാദം എവിടെയും കിട്ടില്ല. ഇന്ത്യയില്‍ ഒരിടത്തും ഇത്രയും സൗഹാര്‍ദത്തോടെയും സഹവര്‍ത്തിത്വത്തോടെയും ജീവിക്കുന്ന ജനങ്ങളെ കാണാന്‍ പറ്റില്ല. മനുഷ്യ കാരുണ്യത്തിന്റെ മാതൃകകളാണ് കണ്ണൂരിലെ ഗ്രാമങ്ങള്‍ . ഇവിടെ താമസിച്ച് എഴുതുമ്പോള്‍ എനിക്ക് ഇത് ബോധ്യപ്പെട്ടതാണ്.
പൊലീസിന് വീഴ്ചയുണ്ടായതായി വ്യാപക പരാതി: മനുഷ്യാവകാശ കമീഷന്‍
പട്ടുവം അരിയില്‍ അനിഷ്ടസംഭവങ്ങള്‍ തടയുന്നതില്‍ പൊലീസിനുണ്ടായ വീഴ്ചയെക്കുറിച്ച് പരാതികള്‍ ശ്രദ്ധയില്‍പെട്ടതായി മനുഷ്യാവകാശ കമീഷന്‍ . അരിയില്‍ സന്ദര്‍ശിച്ചശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു കമീഷനംഗം കെ ഇ ഗംഗാധരന്‍ .
പത്രവിതരണക്കാരനായ മുതലപ്പാറയിലെ കുന്നൂല്‍ രാജന് വെട്ടേറ്റതാണ് അനിഷ്ടസംഭവങ്ങളുടെ തുടക്കം. പൊലീസ് സന്ദര്‍ഭത്തിനൊത്തുയര്‍ന്ന് പ്രവര്‍ത്തിച്ചിരുന്നെങ്കില്‍ തുടര്‍ന്നുണ്ടായ ദുരന്തങ്ങള്‍ ഒഴിവാക്കാനാകുമായിരുന്നുവെന്നാണ് എല്ലാ വിഭാഗക്കാരുടെയും അഭിപ്രായം. വെട്ടേറ്റ് പരിയാരം മെഡിക്കല്‍ കോളേജ് ആശുപത്രി തീവ്രപരിചരണ വിഭാഗത്തില്‍ കഴിയുന്ന വള്ളിയേരി മോഹനന്റെ വീട്ടുകാരും മരിച്ച ഷുക്കൂറിന്റെ സുഹൃത്തുക്കളുമാണ് ഈ ആക്ഷേപം ഉന്നയിച്ചത്. ഇക്കാര്യം സര്‍ക്കാരിന്റെ ശ്രദ്ധയില്‍പെടുത്തുമെന്ന് കമീഷന്‍ അറിയിച്ചു. മെഡിക്കല്‍ കോളേജ് ആശുപത്രിയിലെത്തി മോഹനനെയും കമീഷന്‍ സന്ദര്‍ശിച്ചു. ഡോക്ടര്‍മാരില്‍നിന്ന് വിവരങ്ങള്‍ ശേഖരിച്ചു. തുടര്‍ന്ന് മോഹനന്റെ വീട്ടിലെത്തി കുടുംബാംഗങ്ങളില്‍നിന്ന് വിവരങ്ങള്‍ ശേഖരിച്ചു. ശയ്യാവലംബിയായി കഴിയുന്ന കുന്നൂല്‍ രാജനെയും മുതലപ്പാറയിലെ വീട്ടില്‍ കമീഷന്‍ സന്ദര്‍ശിച്ചു.
deshabhimani 180312
ഉറ്റവര്‍ നഷ്ടപ്പെട്ടതിന്റെ വേദനയില്‍ നീറി ജീവിക്കുന്നവര്‍ . വെട്ടും കുത്തുമേറ്റ് ജീവച്ഛവമായവര്‍ . കുടുംബാംഗങ്ങളെ കൊല്ലാക്കൊല ചെയ്യുന്നതിന് സാക്ഷിയായി വിറങ്ങലിച്ച സ്ത്രീകളും കുട്ടികളും. വീടും ജീവിതസമ്പാദ്യവും തകര്‍ക്കുന്നതും കൊള്ളയടിക്കുന്നതും നിസ്സഹായതയോടെ നോക്കിനില്‍ക്കാന്‍ വിധിക്കപ്പെട്ടവര്‍ ... ഒട്ടേറെ പ്രക്ഷോഭങ്ങള്‍ക്കും സത്യഗ്രഹങ്ങള്‍ക്കും വേദിയായ കണ്ണൂര്‍ കലക്ടറേറ്റിനുമുന്നില്‍ ശനിയാഴ്ചത്തെ കാഴ്ചകളാണിത്. "ലീഗ് കോടതി" വിധിയില്‍ ജീവിതം വഴിമുട്ടിയവരുടെ രോദനമാണ് കലക്ടറേറ്റിനു മുന്നില്‍ ഉയര്‍ന്നത്. അക്രമങ്ങളും ഭീഷണിയും കൊണ്ട് പിറന്ന നാട്ടില്‍നിന്ന് ഇനിയും ആട്ടിയോടിക്കാന്‍ ശ്രമിച്ചാല്‍ ജീവന്‍ നല്‍കി ചെറുക്കുമെന്ന മുന്നറിയിപ്പും കൂട്ടായ്മയില്‍ മുഴങ്ങി. "സിപിഐ എം കോടതി"യെക്കുറിച്ച് വാചാലരായവരെ നിശബ്ദമാക്കുന്നതായിരുന്നു ഇരകളുടെ നേര്‍സാക്ഷ്യം. ആഘോഷങ്ങളിലും ദുഃഖത്തിലും അയല്‍ക്കാരായി ജീവിച്ചവര്‍ തീവ്രവാദത്തിന്റെ തണലില്‍ കൊലവാളുമേന്തി വീടാക്രമിച്ചതിന്റെ അവിശ്വസനീയത അവരുടെ മുഖങ്ങളിലുണ്ടായിരുന്നു.
ReplyDelete