സാഹിത്യ വിമര്‍ശകന്‍, എഴുത്തുകാരന്‍, ചിന്തകന്‍ എന്നീ നിലകളില്‍ വ്യക്തിമുദ്ര പതിപ്പിച്ച എം കെ സാനു അദ്ധ്യാപകന്‍, വാഗ്മി എന്നീ നിലകളിലും പ്രശസ്തനാണ്. 1928 ഒക്ടോബര്‍ 27ന് കെ പി ഭവാനിയുടെയും എം സി കേശവെന്‍റയും മകനായി ആലപ്പുഴയിലെ തുഗമ്പാളിയില്‍ ജനിച്ചു. നാലു വര്‍ഷത്തോളം സ്കൂളദ്ധ്യാപകനായി ജോലി ചെയ്തു. പിന്നീട് കോളേജ് അധ്യാപകനായി. വിവിധ ഗവണ്‍മെന്റ് കോളേജുകളില്‍ പഠിപ്പിച്ചു. 1958ല്‍ അഞ്ചു ശാസ്ത്ര നായകന്മാര്‍ എന്ന ആദ്യഗ്രന്ഥം പ്രസിദ്ധീകരിച്ചു. 1960ല്‍ വിമര്‍ശനഗ്രന്ഥമായ കാറ്റും വെളിച്ചവും പുറത്തിറങ്ങി. 1983ല്‍ അദ്ധ്യാപനത്തില്‍ നിന്ന് വിരമിച്ചു. 1984ല്‍ പുരോഗമന സാഹിത്യസംഘം പ്രസിഡന്റായി. 1987ല്‍ എറണാകുളം മണ്ഡലത്തില്‍ നിന്നും ഇടതുപക്ഷ സ്വതന്ത്രസ്ഥാനാര്‍ത്ഥിയായി മത്സരിച്ച് വിജയിച്ച് നിയമസഭയിലെത്തി.
വിമര്‍ശനം, വ്യാഖ്യാനം, ബാലസാഹിത്യം, ജീവചരിത്രം തുടങ്ങി വിവിധ സാഹിത്യശാഖകളിലായി നാല്‍പതോളം കൃതികള്‍ രചിച്ചു. കര്‍മഗതി എന്ന പേരില്‍ ആത്മകഥയും പ്രസിദ്ധീകരിച്ചു. മലയാള സാഹിത്യ നായകന്മാര്‍, കുമാരനാശാന്‍, ഇവര്‍ ലോകത്തെ സ്നേഹിച്ചവര്‍, എം ഗോവിന്ദന്‍, അശാന്തിയില്‍ നിന്ന് ശാന്തിയിലേക്ക്: ആശാന്‍ പഠനത്തിന് ഒരു മുഖവുര, മൃത്യുഞ്ജയം കാവ്യജീവിതം, ചങ്ങമ്പുഴ കൃഷ്ണപിള്ള: നക്ഷത്രങ്ങളുടെ സ്നേഹഭാജനം (ജീവചരിത്രം) യുക്തിവാദി എം.സി. ജോസഫ് (ജീവചരിത്രം)ബഷീര്‍: ഏകാന്തവീഥിയിലെ അവധൂതന്‍ (ജീവചരിത്രം) അസ്തമിക്കാത്ത വെളിച്ചം: (ആല്‍ബര്‍ട്ട് ഷൈ്വറ്റ്സറുടെ ജീവചരിത്രം), ഉറങ്ങാത്ത മനീഷി (പി കെ ബാലകൃഷ്ണന്റെ ജീവചരിത്രം) നാരായണഗുരു സ്വാമി, സഹോദരന്‍ അയ്യപ്പന്‍, കാറ്റും വെളിച്ചവും, അനുഭൂതിയുടെ നിറങ്ങള്‍, പ്രഭാതദര്‍ശനം, രാജവീഥി, അവധാരണം, എന്നിവയാണ് മറ്റു പ്രധാന കൃതികള്‍.
ഭാര്യ: എന്‍ രത്നമ്മ. മക്കള്‍: എം എസ് രഞ്ജിത്ത്, രേഖ, ഗീത, ഹാരിസ്. കേരള സാഹിത്യ അക്കാദമി അവാര്‍ഡ്, സമഗ്രസംഭാവനക്കുള്ള അക്കാദമി പുരസ്ക്കാരം, വയലാര്‍ അവാര്‍ഡ്, പത്മപ്രഭ പുരസ്കാരം, കേന്ദ്ര സാഹിത്യ അക്കാദമി പുരസ്കാരം തുടങ്ങിയവ ലഭിച്ചിട്ടുണ്ട്.
deshabhimani
No comments:
Post a Comment