ഇടതുപക്ഷത്തെ തകര്ക്കാന് ശ്രമിക്കുന്നത് കേരളത്തിന് അകത്തുള്ള വലതുപക്ഷം മാത്രമല്ലെന്ന് സിപിഐ എം സംസ്ഥാന സെക്രട്ടറി പിണറായി വിജയന് പറഞ്ഞു. പുറത്തുള്ള ശക്തികളും ഇതിലുണ്ട്. നാം കാണുന്ന ശക്തികളും കാണാത്ത ശക്തികളും ഈ ആക്രമണങ്ങള്ക്കു പിന്നിലുണ്ടെന്നും അദ്ദേഹം പറഞ്ഞു. ഡോ. ടി എം തോമസ് ഐസക് രചിച്ച "വിരുദ്ധന്മാരുടെ രണ്ടാം വരവ്" എന്ന പുസ്കത്തിന്റെ പ്രകാശനം നിര്വഹിക്കുകയായിരുന്നു പിണറായി.
ശരിയായ രീതിയില് ജനാധിപത്യ കേന്ദ്രീകരണ തത്വം പ്രയോഗിച്ചതിന്റെ ഫലമായാണ് പാര്ടിക്ക് വെല്ലുവിളികളെ നേരിടാന് കഴിഞ്ഞത്. രാഷ്ട്രീയവും പ്രത്യയശാസ്ത്രപരവുമായ സമീപനങ്ങള് സ്വീകരിച്ചാണ് പാര്ടി കരുത്താര്ജിച്ചത്. പാര്ടി ഗ്രാമങ്ങള് മറ്റു രാഷ്ട്രീയവിശ്വാസങ്ങളുള്ളവര്ക്ക് താമസിക്കാന് പറ്റാത്ത സ്ഥലങ്ങളാണെന്നും പ്രചരിപ്പിക്കുന്നു. ഇത് ശരിയല്ല. വന്തോതില് ഇടതുപക്ഷ ആഭിമുഖ്യമുള്ള സംസ്ഥാനമാണ് കേരളം. അത് തകര്ക്കാനുള്ള ശ്രമങ്ങള് നടക്കുന്നു. നാട് തിരസ്കരിച്ച ആചാരങ്ങള് തിരിച്ചുകൊണ്ടുവരാനുള്ള ശ്രമങ്ങള് അതിന്റെ ഭാഗമാണ്. അരാഷ്ട്രീയത വളര്ത്താനുള്ള ശ്രമങ്ങളുടെ ഭാഗമായി ഗ്രന്ഥശാലാപ്രസ്ഥാനത്തെയും തകര്ക്കുകയാണെന്നും പിണറായി പറഞ്ഞു.
എ കെ ജി പഠന ഗവേഷണകേന്ദ്രത്തിന്റെ പ്രതിമാസ ചര്ച്ചാ പരിപാടിയുടെ ഭാഗമായി എ കെ ജി സെന്ററിലായിരുന്നു പുസ്തക പ്രകാശനം. ചിന്ത ജെറോം പുസ്തകം ഏറ്റുവാങ്ങി. ചെറിയാന് ഫിലിപ്പ് അധ്യക്ഷനായി. ഡോ. കെ എന് ഗണേഷ് പ്രഭാഷണം നടത്തി. പ്രൊഫ. കെ എന് ഗംഗാധരന് സ്വാഗതവും സി കെ ഗുപ്തന് നന്ദിയും പറഞ്ഞു. ചന്ദ്രശേഖരന് വധവുമായി ബന്ധപ്പെട്ട് പാര്ടിവിരുദ്ധര് സിപിഐ എമ്മിനെതിരെ അഴിച്ചുവിട്ട ആക്രമണങ്ങള് പ്രതിപാദിക്കുന്നതാണ് പുസ്തകം. ചിന്ത പബ്ലിഷേഴ്സാണ് പ്രസാധകര്.
deshabhimani 090413
facebook note by N Madhavan Kutty
No comments:
Post a Comment